زهرة🌸

الحلقة الثالثة و السبعون

حلقة 73🔸️
🔸️حسام يحكي:
حليت الباب و دخلت...الدار هادية بصفة غريبة...غير العادة...ضيقت عينيا مستغرب...كيف لقيتها وحدها في صالة...حاطة ملحفة على ساقيها...و تقرا في كتاب قربت منها...بستها من راسها...نحكي
انا:لباس صغرونتي ؟
مريم:لباس...هاك جيت بكري
قعدت بجنبها...تكيت لتالي...و تنهدت بالقاوي...نحكي
انا:كملت على بكري
قربت منها أكثر...حطيت يدي على كرشها...حسيت بطاقة غريبة...تبسمت نحكي
انا:بنتي كيفها ؟
حطت يديها زوز على يدي...غزرتلي ندرا كيف...حسيت برجة في قلبي...ساعة نحس روحي هابل عليها...و منجم نعمل شي...منجمش نضرها...و كان لزم باش نصبر حياتي الكل...و مانيش باش نلزها على حاجة متحبش عليها...يزيها لي عملتو فيها لتوا...يزيها القهرة و الوجيعة لي عاشتهم جرايري...تبسمت تحكي
مريم:متغشة هي
انا:من شنوة ؟
مريم:منك انت
انا:بربي...شعندي عملت ؟
مريم:خاطرك معادش سألت عليها كيما قبل
انا:حقها عليا ملا
نزلت عليها أكثر...بستها من كرشها...و طلعت راسي غزرتلها...نحكي
انا:نعرف كيفاش باش نرضيها...و نرضي مريتي لي بالأساس الكلام هذا عليها هي
مريم:كلشي مليح مش هكا ؟
انا:ايجا عندي تراه
قربت مني شوية...حطت راسها على صدري...بعد اليمات لي تعدات علينا...علاقتنا تحسنت برشا على قبل عالاقل توا تقرب مني و تخليني نشبع منها و من ريحتها من غير خوف...و لا تردد منها...خذيت نفس نحكي
انا:باش يكون مليح يا روحي
مريم:شنية باش يصير في عمر ؟
انا:الامور قاعدة تتحسن في شريكة...اما الحادثة لي صارت آخر مرة...تنجم تكون ضدهم زوز
مريم:تقصد...وقت زهرة ضربت مراد
انا:بالظبط...توا أسبوع معادش ظهر عالساحة...اما اكيد ماهوش باش يسكت
مريم:يا ريت فما حل لهذا الكل...حرام اللي قاعد يصير فيهم
انا:اكيد فما عزيزتي...ارتاح انتي
طلعت راسها...غزرتلي ندرا كيف...عديت عينيا على شفايفها...وتنهدت بالقاوي...نحكي
انا:وينها فتحية ياخي ؟
مريم:مشات بحذا اختها...قالت لهي تاعبة شوية
انا:شكون وصلها ؟
مريم:محمد
انا:باهي و خالتي نعيمة وينها ؟
مريم:مشات معاها
انا:بقيت وحدك ياخي ؟
مريم:كنت باش نمشي اما حسيت روحي سافا با...ياخي تلزيت باش نبقى في دار
انا:علاه مكلمتنيش ؟
مريم:من غير ما نتعبك معايا
انا:بربي ؟ مريم عيش حبي...تعرف لي تنجم تولد على بكري...من غير ما تحيرني عليك...معادش تبقى وحدك باهي
مريم:انا مليحة حسام...طمن
تبسمتلي تهدي فيا و لا تشعل فيا..معادش نعرف الحبالة وتاتها عاللخر...برغم تاعبة...اما ملامحها ظهرت أكثر عديت صوابعي على خصلات شعرها...غزرتها دخلتني بعضي أكثر...نزلت بيهم لشفايفها...نتحسس فيهم منعرفش كيفاش قربت منهم في لحظة...مخممتش شنية باش تكون ردة الفعل متاعها...اذا باش ترفضني و لالا...ما خممت في حتى شي...كان اني نعيش معاها اللحظة هاذي و كهو...دوب بستها و جبدت روحي...لزت ليا أكثر...منعرفش علاش حسيتها...غير العادة..منعرفش اذا نفرح و لا نخاف من اللي جاي...التفكير هذا الكل حطيتو على جنب...و غطست في شفايفها...كأني اول مرة نبوسهم...اول مرة نذوق بنتهم...نكذب كان نقول منحبش عليها...نكذب كان نقول متوحشتهاش...اللي نحسو و هي بين يديا...ما عشتو مع حتى وحدة قبل حتى شراز...عمرها ما هزتني كيفها...جبدت روحي شوية حطيت خشمي على خشمها...نحاول ناخو نفس نهدي بيه روحي...تبسمتلي بالوقت...كبست على خدها نحكي
انا:شفما ؟
كبست على يدي...و حطتها على كرشها...و هزت راسها شوية تحكي
مريم:ريت قاعدة تتحرك توا
انا:تحب تقولي حاجة هي ؟
مريم:مممم...قاتلي انا سامحت بابي اما بشرط معادش يعاودها الفازة...و معادش تغششها منك
عديت عينيا على وجها...حطيت شعرها على جنب...و خذيت نفس نحكي
انا:نحبك انتي تسامحني...نحبك تغزرلي كيما قبل...و معادش تبعد عليا جملة...خليك ديما هكا مريم
مريم:باش نحاول
هزيتلها براسي ايه...منعرفش اذا نعتبر هذا فرصة أخرى و لا لا اما لي يهمني...اني نجم نخليها تسامحني...برغم نعرف لهي لتوا موجوعة مني...لتوا تخاف...نخليها و نجبد بيها...يكفيني توا لي سمعتو منها...يكفي لهي تحب تعطيني فرصة أخرى...عديت صوابعي على خدها نحكي
انا:انتي كهو متخلينيش...متبعدش عليا مهما صار عزيزتي
مريم:زعمة علاه صار فينا هذا الكل ؟
انا:خاطرني واحد بوهالي...خاطر منجمتش نرا الحقيقة من اول مرة...حتى نحشم من روحي...وقت نقلك سامحني...خاطر لي عملتو معاك ميتغفرش
مريم:انا نحب نعرفها الحقيقة هاذي...نحب نعرف اذا انت عملت هكا...على خاطرها هي...يعني برشا أسئلة حد ما ينجم يجاوبني عليها غيرك
عديت يدي على كتفها جبدتها عندي...نحب نحكي كلشي و نرتاح...نحب كلشي يتوضح توا...لي سمعتو ليلة عرسنا و حكايتي مع شراز...نحب نبدا معاها صفحة جديدة...فارغة من كلشي...خاصة الماضي لي قاعد نحاول نخبيه...من غير ذنب...خذيت نفس نحكي
انا:انا عمري ما خممت نستغلك على خاطر اي حد في دنيا...وقت خممت نربط حياتي بيك...كنت متأكد من مشاعري ليك...كنت نعرف لانا نحبك و منجمش نخليك تكون لحد اخر...اما ليلتها انا
مريم:انو ليلة تقصد ؟
انا:ليلة عرسنا
مريم:شصار ؟
انا:ليلتها انا
قص علينا صوت الباب لي يضرب بالقاوي...جبدت روحها مصدومة...تحكي
مريم:ش..شفما...شكون باش يجينا توا ؟
انا:اهدا تو نشوف شكون و نرجعلك
جيت باش نقوم...شدتني من يدي كبست عليا...غزرتلي ندرا كيف تحكي
مريم:متحلش لين تتأكد شكون ؟
قربت منها...بستها من راسها...و تبسمتلها نهدي فيها نحكي
انا:متخافش عزيزتي
حطت يدها على كرشها...حسيت بيها مرعوبة...خاصة مع الأحداث تالية لي صارت...تنهدت بالقاوي...و قربت من الباب...حليتها من غير ما نخمم مرتين...نغزرلو واقف بالسيف...كابس على عتبة الباب...بالعو عاللخر تبسم على جنب يحكي
محمد:هاك هووني انت
انا:شنية الحالة هاذي لانت فيها ؟
محمد:ابعد عليا توا
قرب باش يدخل...وقفتو بيدي...غزرلي ندرا كيف..عينيه حمر عاللخر...حالتو هاذي وراها حاجة اكيد...قحرتلو نحكي
انا:ماكش باش تدخل...حتى جاوبني
محمد:ا..انت خذيت مني كلشي...شنوة توا باش تطردني من هوني زادة
مريم:محمد
تلفت نغزرلها...واقفة ورايا...حاطة يدها على كرشها تغزرلنا مستغربة...كبست على الفاست متاعو...و دخلتو سكرت الباب بالقاوي...نحكي
انا:ياااخي نووورماال جااي لدار في الحالة هاذي...و تعرررف بالقدا لهي وحدها...مخممتش شنية ممكن يصير
مريم:حساام يزي امانك
انا:انتيي مدخلللش رووحك
محمد:خليه...اصلا هذا لي شاطر فيه...من سنين هذا الشي الوحيد لي ينجم يعملو...انو يدمر ناس لي دايرين بيه و كهو
انا:فاااش تخرم ياخي...شنننية لي قاعد تقول فيه
دزيتو بيدي لتالي...هز راسو مروهج...هزني و حطني يحكي
محمد:قااعد نكذب انا...انت من سنين حرمتني من ريم حرمتني من الطفلة لي حبيتها...على خاطرك ديما تظن انو البنااات الكل كيفها هي
انا:مححححمد...سكككر ■■■■■ فمك احسنلك...رد بالك تتعدا حدوودك معايااا
محمد:شباااش تعمل...تقتتلني انا المرة هاذي
انا:يزززي كهو...سكككر فممك و اطلع لبيتك...احسن ما نستجرم فيك توا
محمد:معادش يفيد تهديدك هذا...و ماكش باش ترجع شي من اللي راح...انت بخسارتك ليها...قاعد تضر في اللي دايرين بيك...شنية باش تبدل...انت خذيت مني الطفلة لي حبيتها...و خويا لي كان القدوة متاعي
بقيت نغزرلو...كلامو لي قالو بوجيعة...منجمتش نرد عليه...منعرفش علاه ليلة بالظبط تذكرها...خذيت نفس و قربت منو شوية نحكي
انا:تعرف بالقدا شنية لي صار...حياتك كانت باش تضيع كان انت و هي كملتو مع بعض...هي كان جات تحبك مكانتش تصوحب غيرك...حتى الاكسيدون لي عملتها مكانتش فيها وحدها
محمد:هااااذي الحكاااية انت لي طلععت بيها
انا:ماااانيش مجبووور باش نكذب عليك و نوضحلك هذا الكل...اللي لازم تعرفو...كنت تلوج عليه من سنين مش توا...مش كل مرة تطلعنا بطلعة....على خاطرها حتى حد ما عندو ذنب في موتها...على هذاكا فيق على روووحك
محمد:دييماا انت على حق...ديما انت لي واعي لكلشي باهي خلينا نرجعو لتالي شوية مع بعض...انا و انت حكايتنا متشابهة برشا خويا الغالي...انا ريم محبتنيش باهي و انت ؟ تسمي اللي عشتو حب ؟
انا:سككر فمك
محمد:حرام نحكيو عالماضي متاعك...ساعة ميجيش واحد كيفك تخليه طفلة...ساعة قولي كسرت فيك كلشي مش هكا...لدرجة منجمتش تنساها...و منجمتش تحب غيرها...حتى شنية عملت عرررست ؟
غزر لمريم...و عاود غزرلي...تبسم على جنب...يحكي
محمد:ساعة انت نجمت تحب مرتك...و لا كي العادة تحاول تنسى بيها حبك الأول
هزيت يدي ضربتو ببونية...وخر لتالي مروهج...هزيت يدي في وجهو نحكي
انا:ااخررر مرة...نقلك سكر فممك
محمد:ريت مزلت تخرج من سينتك وقت حد يجبد سيرتها...مزلت تدخل بعضك كي تحسها قريبة منك ماكش باش تنكر هذا الكل...خاطرك كان جيت تحب مرتك...مكنتش باش تستغلها...على خاطر حبيت تنتقم منها بعد سنين هذوما
انا:ياخي واعي للكلام لي تقول فيه ؟
محمد:انت واعي للي تعمل فيه ؟ شذنبها باش تستغلها هي...و لا على خاطر رجعت بعد سنين...كهو مريم لي كانت في طريقك...حبيت تثبتلها لانت نسيتها و باش تعرس كيما هي عملت بالظبط
بقيت نغزرلو مصدوم...منعرفش من وين يعرف هذا الكل...و لا شنية لي صار بالظبط باش وصل للحالة هاذي...خاطر لي نعرفو...هو وصل امي بحذا خالتي شنية لي صار بالظبط...جيت باش نحكي...قص عليا كي قرب مني...يحكي
محمد:تعرف شنية الفرق بيناتنا...انو انا حبيت ريم من كل قلبي...كنت نحب نسمع منها السبب لي خلاها تعمل هذا الكل...اما انت حرمتني منها و رغم اللي صار...عمري ما حاولت نستغل حد...باش نوصل للي نحب عليه...انت ربيتني صحيح...اما فرد وقت نسيت لي بابا رباك عليه كان تطردني و لا تخليني...معادش تفرق برشا صدقني
هز يدو حطها على صدرو...يكح بالقاوي...جبد روحو مني...و طلع...بقيت واقف في بلاصتي...عمري ما خممت بالطريقة لي كان يحكي عليها هو...و اللي تربيت عليه...ربيتو عليه زادة...و لا مرة ستخايلتو باش يوصل يقول الكلام هذا في وجهي...و لا يوصل للحالة لهو فيها من سنين حاولت نصلح لي صار...اما منجمتش...كل خطوة نقربها لعندو....نحس روحي قاعد نخسر فيه أكثر.
🌸🌸🌸🌸🌸🌸🌸🌸🌸🌸🌸🌸🌸
خذيت نفس بالسيف...و تلفت شوية...نغزرلها...واقفة ورايا بالظبط...كابسة بيدها على كرشها...دموعها نازلين بصفة غريبة...من قبيل برك كان تضحك...من شوية كنت باش نحكيلها كلشي...نرتحها...و نرتاح...شنية لي صار ؟ كيفاش كلشي تقلب في لحظة...زعمة مش مكتوبلنا نفرحو...لهدرجة الدنيا ضدنا...علاه كل مرة نقربلها...نلقى روحي بعدت عليها دوبل...انا نحبها هي ؟ باهي علاه لتوا ما نجمت نعمل شي على خاطرها...علاه منجمتش حتى نقرب منها ؟ شنية باش نقلها اصلا ؟ زعمة باش تصدقني بعد الخيبات لي تعدات عليها...باش تحاول تفهمني...و لا باش نخسرها مرة أخرى...الأسئلة الكل قاعدة دور في مخي...و ما نجمت نعمل حتى شي...أكثر شي وليت خايف منو المستقبل...شنية مزال مخبي معاه...النفس تسكر عليا...دوب نجمت نلقى قوة توصلني ليها...حتى خطواتي رزنو...و المسافة لي بينا حسيتها طويلة برشا...وقفت قدامها بالظبط...حاوطت وجها بيديا زوز...نمسح في دموعها و نحكي فرد وقت
انا:شششش...رد بالك...رد بالك...حتى شي ما يستهل
قربت مني...دورت يديها زوز على ظهري...يمكن حتى انا استغربت الفازة...بعد اللي صار...نسمع فيها تحكي
مريم:م..مش صحيح...اللي قالو محمد الكل...مش صحيح...انت قتلي لي مستحيل تعملها...قتلي لفما سبب آخر...انت مستحيل تستغلني يا حسام...قولي لانت ماكش باش تعملها...اماانك
جيت باش نحكي...دزتني لتالي...و جبدت روحها مني...تضرب فيا على صدري...و تحكي فرد وقت
مريم:شبيك سكت...جاااوبني...هي سبب في هذا الكل...لتوااا مزلت تحبها انت...مش هكا
جبدتها عندي بالوقت...بقات تفرفط...تحاول تجبد روحها...كبست عليها بيديا زوز نحكي
انا:يزززي كهو...انتي لي نحبك جاوبني
طلعت راسها غزرتلي ندرا كيف...مش فاهمة الكلام لي نقول فيه...تنهدت بالقاوي نحكي
انا:في رايك كان جيت نحبها كيما قاعدة تقول...وين انا توا ؟ شبيني مطلقتكش...شبيني مزلت نلحلح بيك باش تسامحني...و فرد وقت خايف انك متنجمش تغفرلي خايف منجمش نرجعك ليا و نكون خسرتك جملة...كان مزلت نحبها...علاه مانيش معاها توا...علاه قاعد نبني في حياة جديدة لينا احنا و كهو...اغزرلي مريم...تنجم متسامحنيش حياتك الكل...تنجم حتى تمشي على روحك...مانيش باش نمنعك...مانيش باش نكون الوحش لانتي تخاف منو بعد توا...اما كان انتي خذيت الخطوة هاذي...باش تكسر كلشي فيا...كلشي عايش على خاطرو اصلا انا مهما حاولت مانيش باش نتبدل في نظركم زوز و من غير ما تسمع الحقيقة مني...في رايي استناه يصحى و يخبرك هو...حتى امي تعرف بيها...و نعيمة زادة...حتى عمر...انتي اسمعها من أي حد فيهم...باش تنجم تطمن
جيت باش نمشي...عاودت وقفت و قربت منها...قحرتلها نحكي
انا:و اااخررر مرة...تبكي على حاجة انا السبب فيها مفهوم كلامي
طلعت و خليتها...منحبش نغزرلها و هي في الحالة هاذي...اصلا كأني كنت في حلمة و فقت منها...بعد اللي صار...اكيد ماهيش باش تاثق فيا مرة أخرى...نحيت الفاست رميتها عالفوتاي...و دخلت لبيت البانو...نحيت بقية دبشي و دخلت تحت الما...نحب ننسى كلشي
نحب نرتاح من العذاب هذا الكل...حسيت بالباب لي تفتحت...تلفت نغزرلها بالوقت...اول مرة تتجرأ...و تعمل الفازة هاذي...لي كنت نخمم فيه طار في لحظة...مش مستوعب جرأتها...روبة مكبوسة على كرشها شوية خدودها حمورة باش يطرشقو...منظرها خلاني ننسى الحالة لانا فيها...و لي صار اللوطة جملة...منزلة راسها متحبش تغزرلي...تبسمت نحكي
انا:فاش تعمل هوني ؟
مريم:ن..نحب نحكي معاك
انا:استناني برا
مريم:منحبش...يمكن ندور في رأيي
انا:بربي
قربت مني أكثر...عطاتني بظهرها...و تكات عالحيط تحكي
مريم:ن..نعرف لي تعدا عليكم زوز مش ساهل...انت رغم السنين لي تعدات...محاولتش تفهم محمد...كلشي تحلوه بالصياح...الماضي يوجع برشا...على هذاكا حتى حد فينا ماهو باش ينجم يتعامل معاه...حاول مرة وحدة برك اقعد بجنبو...حاول تفهمو...حاول ترا الحكاية من نظرو هو...باش تفهم شنية لي يحب يوصلو بكلامك...انت مغلطتش في تربيتو جملة و الدليل انو و لا مرة هز يدو في وجهك مهما عملت فيه...ساعات حتى ميردلكش الكلام...مستحيل يكون خايب...برغم المشاكل لي كانت بينا كان يحاول يعاوني...من غير ما يضرك....صدقني خوك ماهوش خايب لهدرجة...هو جيست مقهور موجوع منك و من الماضي...حاول تفهمو مرة أخرى من غير ما تتهدد عليه...حتى انا قاعدة نحاول نفهمك من اول مرة دخلت فيها لهوني...انت كهو لي تنجم تحط حد لكلشي قاعد يصير...و عمري ماني باش ناقف حاجز في طريقك...و لا حتى باش نستغل بنتي زادة...اصلا كلشي قاعدة نعمل فيه...اني نحاول نعطي فرصة لحياتنا...كان مش على خاطري...على خاطر بنتي...على هذاكا منحبكش تخذلني مرة أخرى...على خاطرها هي و كهو
بقيت نغزرلها...فرد وقت الما هابط عليا...جات باش تمشي...جبدتها من يدها...تلفتت عندي...مصدومة متحبش تغزرلي...تحكي بالسيف
مريم:ف..فاش تعمل ياخي ؟
قربتلها شوية...و جبدتها عندي...لين ولات تحت الما قد قد...كبست عليا بيدها تحكي
مريم:انت بااز هبلت فاش تعمل ؟
انا:انتي لي هبلتني
دزيتها لتالي شوية...تكيتها عالحيط...و نزلت عليها أكثر كملت كلامي نحكي
انا:شفايفك هذوما هبلوني
مريم:ح..حس..
قصيت عليها الكلام...كي بستها بالقاوي...غمضت عينيها بالوقت...عديت يدي على جنبها...و جبدت روحي شوية نحكي
انا:بدنك هذا هبلني
نزلت راسي نغزر لكرشها...لي بانت أكثر...كي لصقت الروبة على لحمها...عديت يدي عليها و غزرتلها نحكي
انا:حتى هاذي باش نهبل عليها زادة
كبست على يديها زوز...و نزلت نحكي...بين شفايفها
انا:الماضي لي تحكي عليه الكل...يطيح بين ساقيك انتي...حتى وحدة في دنيا...ماهي باش تخليني نعيش نفس الاحساس لي عشتو معاك انتي
مريم:ا..انا
انا:انتي متاعي
قصيت عليها الكلام...كيف نزلت على شفايفها...يزي ما صبرت عليهم لتوا...نزلت لرقبتها...تذكرت العضة لي خلاتها تركح ليلتها...دوب عضيتها نحكي
انا:تتذكرو العقاب متاعك ياخي ؟
مريم:مجنون
تبسمت بالوقت...جبدت روحي منها شوية...فرد وقت نحل في الروبة...كبست على يدي من غير ما تحس قربتلها بستها نحكي
انا:متخاافش...مانيش باش نتعدا حدودي معاك
هزتلي براسها ايه...نعرف لمزالت مترددة...بعد اللي صار ليلتها...نعرف لمزالت موجوعة منو الكلام لي قلتو...و ماهيش باش تنسى و تسلم فيسع...أما نحبها تعطيني ثقتها و كهو...حصرتها أكثر...و نزلت الروبة في لحظة كبست على يدي...و قربتلي أكثر...تخبي في روحها عندي...تبسمت نحكي
انا:قتلك متخافش
مريم:ح..حسام
انا:ممممم
لزت عندي أكثر...جبدت روحي من شوية و نزلت عندها بستها من كرشها...و غزرتلها نحكي
انا:شرايك في دوش توا ؟
مريم:يززي هكا...منحبش...شملزني نجي عند واحد مهبول انا
انا:بنتي تحب...و امها باش تركح...خاطر معندهاش حل آخر
مريم:بربي
انا:ممممم انتي ارخف روحك و كهو
مريم:دوشت قبيل انا
انا:باش تاخو دوش معايا توا
جات باش تحكي...فرغت الجال دوش على بدنها في لحظة...قحرتلي تحكي
مريم:خايبة ريحتو هذا
انا:في بالي خلصنا من فترة الوحم
مريم:انا مزلت...شمدخلك فيا ياخي ؟
انا:باهي...من غير ما تعاركني توا زادة
مريم:نحب على هذاكا
تبسمت كي ريتها تشير بيدها...لجال دوش متاعي..اصلا نشيخ عليها عليها...كي تبدا ريحتها كيما انا...هزت راسها شوية...تحكي
مريم:كمل مزيتك و اغسلي شعري زادة...خاطرني وليت نتعذب معاه برشا
انا:تدلل يا روحي...متحبش حاجة أخرى ياخي
هزتلي براسها لا...اول مرة نراها قدامي هكا...اول مرة نحسها قريبة مني...من غير خوف...هاذي الفرصة لي كنت نستنى فيها ؟ زعمة باش نجم نخليها تسامحني...و تنسى لي صار...نحس لانا اول مرة قاعد نمس فيها..اول مرة نرا بدنها...بالأصل انا ريتو مرة وحدة و كهو...و ملكتو مرة وحدة زادة...وقتها ضلمتها و ضلمت روحي معاها...تعبت و تعبتها معايا....اصلا لتوا قاعدة تعاني من اللي عملتو فيها...توا و بعد شهور...حسيت اني نجمت نرجع الطفلة لي حبيتها من اول مرة ريتها...الطفلة لي خلات كلشي على خاطري...و مخلاتنيش...رغم لي تعدا علينا...و رغم ما صار بينا حتى شي توا...يكفي لانا نجمت نقربلها مرة أخرى...و نحس بيها زادة..نغزر لرغوة لي نازلة على بدنها...لي تحاول تخبيه بيديها...حتى بنتي نحس بيها قاعدة تتحرك داخلها...حسيتها تعبت و معادش فيها...سكرت الما...لبست الكاب متاعي و هزيت الكاب متاعها في يدي...عاونتها لبساتو و حطيت شعرها على جنب نحكي
انا:ايجا معايا
كبست على يدي...عرفتها موجوعة....اصلا الفرخة مركحتش وهي تضرب فيها...قعدتها عالسرير...نعدي في المنشفة على شعرها...خليتها ترتاح و حليت القارد روب نبدل في دبشي...تلفت نغزرلها...تتغوصر...ترد في نفس بالسيف...هزيت الفونتولين من الكوافوز...و قربت منها نحكي
انا:هيا عزيزتي...حاول تاخو نفس
تنهدت بالقاوي...و حطت يدها على يدي...شدتها و نزلت راسها تحكي
مريم:ل..لباس
انا:حاول ترتاح توا
هزتلي براسها ايه...حسيتها تعبت أكثر...رجعت للقارد روب...جبدت دبش...ترتاح فيه...حطيتو بجنبها و قعدت مقابلها نحكي
انا:تبدل مبعد ترقد
مريم:تو نلبس وحدي
انا:متأكدة ؟
هزيت يدي...بعدت خصلات شعرها من وجها...باقي خدودها حمورة...غزرتلي ندرا كيف تحكي
مريم:صراحة انا
انا:شنية ؟
مريم:انا و بنتي جيعانين عاللخر
انا:صاار...شبيك محكيتش قبيل
هزت كتافها شوية و سكتت...قربت منها بستها من خدها نحكي
انا:شنية تحب نطلبلك ؟
مريم:لاا...فما عشا لوطة...حضراتو خالتي نعيمة لينا زوز قبل ما تمشي...هاني باش ننزل نسخنو
انا:ارتاح انتي...اتو نحضرو انا
مريم:رد بالك تحرقو...و اعمل حسابك باهي
انا:تدلل يا روحي
هزيت روحي وقفت...قربت من الباب...باش نخرج وقفتني تحكي
مريم:البس مريولك...تو تاخو برد
هزيتلها براسي ايه...و خطفتو في يدي نلبس فيه...اول ما وصلت لدروج...جات عيني على بيتو...محلولة شطر منعرفش على روحي كيفاش رجعت لتالي...كملت حليتها و دخلت...نغزرلو مطيش عالسرير...الفاست متاعو عالارض...شاد تصويرتها في يدو...و غاطس في النوم...تنهدت بالقاوي و قربت منو...فكيت تصويرة من يدو...نغزرلها...معادش نعرف شنية صحيح من الغالط أما متأكد لانا مظلمتهاش...و لا حبيتها تموت بالطريقة هذيكا...جيست حبيتو يبعد عليها و كهو...محبيتوش يجي نهار و يوصل للحالة لهو فيها توا...بالمختصر محبيتش نخسر خويا...حطيتها عالتابل دونوي...و نزلت عليه شوية...غطيتو...نحكي
انا:ساامحني عيش خويا
تنهدت بالقاوي و خرجت من البيت...غصة واحلة في حلقي...خايف الامور تخرج من يدي و نخسرو بالرسمي نزلت اللوطة...تبسمت و انا نذكر في اللي صار قبيل صحة ليها الفرخة...لتوا مزلت مروهج و مش مصدق لي صار...ظاهر باش تقتلني بالعرق...و تهبلني عقاب عمري هزيت الصينية كي شاطر...و رجعت للبيت...نغزرلها تمشط في شعرها...حطت من يدها...و تلفتت عندي تحكي
مريم:شبيك طولت ؟
انا:صراحة معرفتش شنية نحضر بالظبط...أما لي هوني يعدي روحو...هيا قوم توا
مريم:مممم باهي
حطيتها عالطاولة...و هزيت راسي نغزرلها...روبة الحبالة وتاتها عاللخر...قربت مني تحكي
مريم:هاك طلعت تفلح في حاجة عزيزي
انا:بربي
مريم:عاوني نقعد ساعة
شديتها من يدها...كبست على يدها...قعدتها و تبسمت نحكي
انا:شبيك رزنت هكا يا روحي
مريم:بربي...معادش نعجبك توا...نسيت شكون سبب ياخي ؟
غزرتلها مستغرب...قعدت بجنبها...شدني ضحك نحكي
انا:انتي قولي شكون السبب ؟
مريم:والله لا تحشمها
انا:نسمع بيها الحشمة عزيزتي...الله غالب معنديش
مريم:ميزيتش توا...ياخي حبلت وحدي انا ؟
انا:لا حبي...محبلتش وحدك...و ساعة انتي من اول مرة...عاملة فيا حرام عليك...عالمعدل هذا مانيش باش نخليك تحبل...لبعد عشر سنين يا روحي
حطت المغرفة في فمي...و قحرتلي...بلعت اللقمة بالسيف...جبدت يدها تحكي
مريم:شو شكون يحكي عالعذاب...بنتي ماهيش باش تقلقني جملة طمن
انا:ملا حاضرة لحبالة أخرى ؟
مريم:ميزيتش توا...استنى ساعة نولد قبل
انا:مجنونة
بقيت نغزرلها و هي تاكول...دوب نجمت نعدي لقمة...من اللي تعدا على راسي ليلة...و من قربها زادة...غرست يدي في شعرها نحكي
انا:مريم
مريم:مممم
انا:مزلت مكبشة في قرارك ياخي
مريم:قرار شنوة ؟
انا:نحب نرجع لداري...نحب نكون انا و انتي كهو...و اللي صار الليلة منحبوش يتعاود
مريم:حساام...منحبش نمشي لدار هذيكا قبل ما نولد
انا:شنية السبب ؟
مريم:خاطرني خايفة
انا:من شنوة ؟
مريم:منعرفش...منحبش نبقى وحدي جملة...خايفة من الولادة...خايفة تصير حاجة و ما يكون حد معايا
كبست عليها أكثر...جبدتها عندي...نعرف لي الحكاية مش ساهلة حتى طرف...خاصة الكلام لي قالتو الطبيبة خلى الكل على اعصابو...خذيت نفس نحكي
انا:اسمعني يا روحي...مفما حتى شي يخوف...امورك الكل حاضرة...و كان منجمتش تولد ولادة طبيعية...فما équipes حاضرة على خاطرك...نتوما زوز باش تكونو بخير صدقني
مريم:منحبش حاجة تصير لبنتي
انا:حبي المزيانة...يزي من الأفكار هذوما توا...بنتنا باش تكون مليحة...نحبك جيست تنقص من ستراس و كهو
مريم:باهي زعمة باش نتوجع برشا انا ؟
انا:مريم عزيزتي...كلشي باش يكون مليح...ساعة نعرفك قوية على هكا
مريم:مزلت قوية...أما منعرفش...خايفة و كهو
عديت يدي على كرشها...حسيت بيها مش قد بعضها خاطر مدام دخلت في ثامن...تنجم تولد في اي لحظة خاصة و طبيبة حذرت من ولادة مبكرة...تبسمت نحكي
انا:شي ماهو باش يصير...انتي شد روحك و كهو
اليمات الجاية باش تكون احلى من هكا...و من هوني لوقتها انا معاك باهي
مريم:باهي
انا:هيا توا...يزيك الليلة...قوم ارتاح
مريم:وين ماشي انت ؟
انا:وين عندي نمشي ؟ هاني معاك
مريم:نجم نطلب منك حاجة ؟
انا:اكيد يا روحي
مريم:نحب نمشي بحذا زهرة...معادش نجم نمشي لللفاك...و حتى هي معادش جي زادة
انا:باهي عزيزتي...غدوة نمشيو بحذاهم
مريم:عيشك
انا:هيا قوم يا روحي
هزيت روحي...و وقفتها...عاونتها تسطحت...و تمديت بجنبها...قربتلي بالوقت...حطت راسها على صدري...و حاوطتني بيدها...عديت يدي على شعرها نحكي
انا:ما تخمم في حتى شي توا...ارتاح و كهو
مريم:كلشي باش يكون مليح
انا اكيد يا عمري
هزت راسها...غزرتلي ندرا كيف...عديت عينيا على وجها خطفت بوسة من شفايفها قبل ما تحكي..دوب تبسمتلي و عاودت نزلت راسها...غرست يدي في شعرها مرة أخرى نحكي
انا:نحبك كل ليلة ترقد في حضني...مهما صار بينا في نهار
مريم:حتى كي نبداو متعاركين و منحكوش مع بعضنا ؟
انا:مممم حتى كي نبداو متعاركين و منحكوش مع بعضنا
مريم:باهي
كبست عليها أكثر...تمنيت نحكيلها كلشي صار...و توفى حرب النفوس لي بينا...أما عكست و مجاش وقتها...باز مانيش باش نكمل حياتي معاها بستراس هذا...باش نحكيلها كلشي صار من اول ليلة...المهم عندي توا صحتها و صحة البيبي...و كلشي اتو يتصلح مع الوقت.
🌸🌸🌸🌸🌸🌸🌸🌸🌸🌸🌸🌸🌸🌸
🔸️عمر يحكي:
نزلت من الكرهبة...سكرت فلس الفاست...و هزيت راسي نغزر للخربة لي دلني عليها...توا بدا اللعب الصحيح نعرف اللي اكبر خطوة باش تبدا من هوني...و اللي فما حاجة محضرها زادة...خذيت نفس و دخلت...نسمع فيه يحكي
مراد:أكثر حاجة تعجبني فيك...انك ملتزم برشا سي عمر
انا:و انت مشاء الله عليك...فيسع قمت على ساقيك
مراد:ساعة الضربة اللي جيني من عندها...ماهيش باش تقتلني العكس...تعطيني قوة كبيرة برشا...تخليني نحط الكل تحت ساقيا
تلفت بالوقت نغزرلو...واقف ورايا بالظبط...حط يدو على جنبو...و تبسم ندرا كيف...هزيتو و حطيتو نحكي
انا:تعرف حاجة...كان احسن لو قتلتك انا بيديا زوز وقتها برك نكون رتحت مرتي منك
مراد:دوماج...حد كيفك ما ينجم يعمل شي...ساعة صعيب برشا حد يقرب من مراد بن عيسى
انا:صدقني الثقة الزايدة متاعك في روحك...هي اللي باش تقتلك
مراد:مش هذا حديثنا...تفضل
هز يدو شاورلي لطاولة...تبسمت على جنب...و هزيتلو براسي ايه...قربت منها...و جبدت الكرسي...قعدت..خلط عليا بالوقت...قعد مقابلني...عديت عينيا عالطاولة...زوز دوسيات محطوطين قدام بعضهم...غزرلي ندرا كيف يحكي
مراد:اليوم و توا بالظبط...انا باش نعقد معاك صفقة...و لا بالظبط...انا باش نخليك تختار انو صفقة تناسبك أكثر
انا:زوز ماهمش باش يكون لصالحي...اما قبل كلشي نحب نوضحلك حاجة...في الحالتين انت ماكش باش تربح حتى شي يا مراد
حط يدو عالدوسي الاول...قربو لعندي شوية يحكي
مراد:الدوسي هذا يخص زهرة
طلعت راسي غزرتلو...جات عيني في عينو...تبسم على جنب و كمل كلامو يحكي
مراد:المعلومات لي هوني...مثبتة من عند المحامي خليني نوضحلك اكثر...قبل اسبوع من توا...مدام زهرة حسيني...متهمة بجريمة قتل...أداة الجريمة موجودة زادة...فما شاهدة في الحكاية...و راجلها عمر كان حاضر و بالامارة هو لي كلم الاسعاف خاطر خايف على مرتو باهي انت كنت حاضر على هذا الكل...تراه تعرف شنية العقوبة متاعها ؟ خليني نكملك انا ملا...على حد علمي. و اقوال المحامي...لي قضية كيما هاذي تنجم تتحبس عليها شهر...شهرين...ثلاثة شهور...و لا يمكن 3 سنين عالاقل...كان مش اكثر...في الحالة هاذي...بنتك و لا ولدك باش يولد في الحبس...و انت ما تنجم تعمل حتى شي...و زعمة حبك ليها يكفي باش ينقذها...و لا مراد وقتها يدخل و ياخوها لعندو...زعمة باش تسامحك ؟ و الا انا باش ناخو فرصتي معاها
انا:وين تحب توصل بالظبط ؟
مراد:عندي ليك صفقة اخرى...الدوسي لي على يدك يقول لانت المسؤول الاول على المشكلة لي صارت في الشريكة...باش تعترف بكلشي...و وقتها مدة الحكم متاعك تنقص...عالاقل باش تتحبس عام واحد برك...و مرتك تكون حرة...انت مستعد لتضحية هاذي ؟
بقيت نغزرلو من غير حتى كلمة...فهمت بالقدا وين يحب يوصل...و نعرف انو الهدف متاعو من هذا الكل يحب يفرقنا و يقرب منها...أما ساعة حال أهون من حال...تكى لتالي...يحكي
مراد:قداش عندك تعرف زهرة...عام عامين...عالاكثر حبيتها و نجمت تاخوها مني...على خاطر الايامات لي عشتهم معاها...مستعد تدخل في حرب...متعرفش شكون باش يربح فيها...اما انا نعرفها أكثر من عشر سنين...ربيتها على يديا زوز...نعرف كلشي يتعلق بحياتها...امتى تبدا متغشة...خايفة...فرحانة...حضرت على كل مرحلة من حياتها...ريتها و هي تكبر قدامي...و ريت خوفها لي كبر معاها...منعرفش علاه انا نعمل في هذا الكل...يمكن حبي ليها محرم عليا...يمكن ماهيش باش تحبني في حياتها...و يمكن زادة ماهيش باش تنساك...أما رغم هذا الكل...مانيش باش نسلم فيها لاخر نهار في حياتي...و مدام فيا نفس...هي باش تكون متاعي انا و كهو...كان هكا نتسمى بسيكوبات...ايه انا واحد مهبول و بسيكوبات...و زهرة متاعي انا و كهو
انا:غريبة فيك...رغم انو عندك كلشي...رغم كانت معاك عشر سنين...أما منجمتش تحبك...تعرف سبب...خاطرك انت كلشي يهمك تملك كلشي...زهرة و لا اي شي غيرها لي يهمك انك تربح ديما...زوز مستعدين نموتو على خاطرها...أما انت تحب تقتلها في الحياة...كان جا نهار و سلمت في حياتي...باش يكون جيست على خاطرها و خاطر بنتي لي في ثنية...أما عمري ماني باش نسمحلك تمس شعرة منها...و كان قعدت في الحبس عشر سنين مش عام واحد...باش نرجعلك و ندمرك يا مراد...انت لتوا مجربتش الوجه الثاني متاعي...خليها الكرة في ملعبك توا...أما صدقني جاييك نهار
مراد:شنية قررت؟ حريتك و لا مرتك ؟
انا:مانيش باش نتفاوض معاك على حتى شي...اللي باش نعملو...ماهوش باش يكون أمر منك...و مانيش باش نشاورك زادة...أكيد باش تكون عندنا قعدة أخرى في موعد آخر
هزيت دوسي لي يخص الشريكة...و خرجت من عندو كبست عليه في يدي...و طلعت راسي نغزر لسما...تنهدت بالقاوي...نحاول نلقى نفس يريحني...حليت الباب ركبت و تكيت راسي لتالي نحكي
انا:ياااا ربي عاوني امانك عااوني...نحس في روحي باش نضيع و نضيع مرتي زادة
خذيت نفس و خدمت الكرهبة...نغزرلو واقف من بعيد يغزرلي...دورتها و طرت بيها...نحب نبعد من هوني جملة...مديت يدي كلمت المحامي...هز عليا بالوقت يحكي
هو:تفضل سي عمر
انا:سي نبيل كان ميقلقكش نجمو نتقابلو توا ؟
هو:هاني في بيرويا توا
انا:يا ريت نتقابلو برا
هو:باهي ابعثلي localisation...و تو نخلط عليك
انا:باهي عيشك
شديت ثنية الكافي...و بعثتلو الموقع...كبست بيدي على راسي...منعرفش شنية باش نعمل بالظبط...أما متأكد لهذا القرار الصحيح...تذكرت هبلتها و طرح البوس عالصباح...ساعة الوحم الكل خرجاتو فيا...تبسمت و تنهدت بالقاوي...حليت الباب نزلت...شديت طاولة مطرفة...نغزر للبحر...ذكرياتي معاها الكل...تعدات بين عينيا...من اول نهار ريتها فيه...قص عليا سرحتي...كي جبد الكرسي...و قعد بجنبي...يحكي
نبيل:شفما سي عمر...لباس ماهو ؟
انا:قولي القضية متاع المشروع قداش باش نتشد فيها ؟
نبيل:شنننوة...واعي لروحك فاش تحكي...مش على أساس القضية في يدنا و باش تتسكر قبل ما توصل للمحكمة
انا:جاوبني سي نبيل
نبيل:كمحامي مانيش باش نجاوبك...حتى نعرف السبب
انا:تنجم تقول هذا الحل الوحيد...باش نحمي مرتي
نبيل:اكيد فما حل آخر
انا:قداش باش نتشد ؟
نبيل:من ست شهور لعام
انا:و كان نعترف انا...قداش باش تولي مدة الحكم
نبيل:متأكد من اللي تقول فيه
هزيتلو براسي ايه...تنهد بالقاوي...و تكا لتالي...يحكي
نبيل:اكيد باش تكون عام و لا أقل...في الحالة هاذي منجموش نحكمو...انت متقولش كلشي عندك قدام النيابة...فوق هذا تنجم تتحبس من غير محاكمة
انا:يكون باهي برشا
نبيل:فكر مرة أخرى...قبل اي خطوة سي عمر
انا:نحبك تعاوني في حاجة مهمة...و كان لزم الليلة نحب كلشي حاضر
نبيل:اكيد لي نجم عليه
انا:نحب نكتب الدار على زهرة...و في حالة منجمتش نخرج منو الحبس هذاكا...و لا صارتلي اي حاجة...كلشي نملكو...الحسابات لي في البانكا...و حقي في البلاد باش يرجع لمرتي و بنتي...يعني حتى حد ما عندو الحق يتصرف في حاجة تخصني غيرها هي...و حسام باش يكون يدها اليمين
نبيل:ماهو باش يصير شي...انا معاك و حسام معاك زادة...باش نحضرلك لي وصيتني عليه...و صدقني كان صار و شديت الحبس...انا باش نخرجك...قبل ما توفى المدة
انا:مش مهم برشا...انت حضرلي الأوراق لي وصيتك عليها...نحب نريقل كلشي...معادش فما وقت
نبيل:باهي لي تحب عليه باش يصير
انا:عيشك نبيل مانيش باش ننسى مزيتك
نبيل:مفما حتى مزية...صدقني كلشي باش يتحل
انا:إن شاء الله...هاني باش نخليك توا...كلمني في اقرب فرصة
نبيل:باهي طمن
حطيت فلوس عالطاولة و هزيت روحي...نمشي بالسيف منعرفش كيفاش وصلت للكرهبة...المطر ماشية و تقوى و الدنيا بدات تظلام...خذيت الشكولا لي تحبها و شديت ثنية دار...هزيتها في يدي و طلعت...اول ما حليت الباب جاتني تجري...ترمات في حضني...دورت يديها زوز على ظهري تحكي
زهرة:و..وينك لتوا عمر...مشى في بالي صارت حاجة
عديت يدي على ظهرها...و خذيت نفس من ريحة شعرها...بستها نحكي
انا:يزي حبي...لباس عليا
هزت راسها غزرتلي ندرا كيف...شفايفها يرعشو...شادة روحها بالسيف...تحكي
زهرة:ملا شبيك مهزيتش عليا ؟
انا:طاحت شارج...ظطريت نسكرو
زهرة:كهو ؟
هزيتلها براسي ايه...و نزلت عليها أكثر...خذيت بوسة من شفايفها...و جبدت روحي نحكي
انا:حضرت العشا...و لا ناوية تبيتني اكاكا
زهرة:لا حضرتو من بكري...انت برا ارتاح...تو نحضر طاولة
انا:باهي...شد هاذي
عينيها وساعو بالوقت...شدتها من يدي...و نطرت عليا تحكي
زهرة:ياااا حتى انا شتهيتها...و معادش عندي منها...ربي يخليك ليا يا روحي
انا:هيا يا مهبولة...و سايس روحك...ماكش وحدك توا
زهرة:مممم نعرف...و زادة متخافش بنتك لباس
قحرتلي و دخلت للكوجينة...تبسمت بالوقت...ماهيش باش تكبر الفرخة...ناقصة صغير تربيه...طيشت الفاست متاعي عالفوتاي...و دخلت لصال الدوبان...نحيت دبشي و دخلت تحت الما...كبست بيدي عالحيط...نخمم في اللي جاي...نخمم كيفاش باش نخليها وحدها...نعرفها متنجمش تعمل كلشي وحدها...نعرف لخوفها منو باش يغلبها...و يقهرها...و ماهيش باش تستند على حد...اهم شي توا نخلي خبر لبابا و مصطفى...منحبش نخسر هند في اللعبة هاذي...و حتى زهرة باش تكون تحت عينهم مع انو متأكد حسام ماهوش باش يخليها وحدها و رغم هذا الكل...ينجم يضرو حتى هو...سكرت السبالة...و خرجت...بدلت دبشي...و مشيت عندها...وقفت في الباب...نغزرلها تتحرك...تحط في الصحون...عديت عينيا على بدنها...على شعرها لي ملموم شوية...كرشها بدات تبان شوية على قبل...تلفتت عندي بالصدفة...قحرتلي و بوزت شفايفها تحكي
زهرة:تفضل طاولة حاضرة
تلفتت باش تهز الخبز...قربت منها بالوقت...حاوطتها من تالي و كبست عليها نحكي
انا:شنوة باش تعديلي ليلة هكا ؟
زهرة:متغشة منك انا
انا:باهي يا مغيارة...قولي شتحب توا ؟
زهرة:حتى شي
عديت يدي على كرشها...رعشت بالوقت...تبسمت نحكي
انا:البيبي هذا متاعك انتي زادة...صدقني منحبكش تخسرو مهما صار زهرة...تمسك بيه قد ما تنجم...رد بالك تفرط فيه عيش حبي
جبدت روحها شوية...و تلفتت عندي بالوقت...غزرتلي تحكي
زهرة:ماانيش باش نفرط فيه عمر...صدقني باش نحميه ديما...متتصورش قداش فرحت كي عرفت لي فما قطعة منك عندي...و باش تربطني معاك لاخر عمري...اما جيست غرت شوية و كهو...خاطر بالعادة انت تهتم بيا انا برك
انا:بو وينها مرتي المغيارة...ساعة كان جيب عشر صغار تبقى دلولتي...و شي ماهو باش يتبدل
زهرة:ممممم توعدني ساعة ؟
انا:وعد يا روحي
كبست على يدي...و جبدتني معاها...قربت من طاولة تحكي
زهرة:هوني فما كلشي تحبو
انا:و بنتي شنية تحب تاكول ليلة ؟
زهرة:حتى شي...جيست امها شاهية البروف متاعها...و زيد عمل فيها بلعاني و غششها
جبدتها من يدها...قعدتها في حملتي...و غزرتلها نحكي
انا:و تعرف الفازات و لي قريماس هذوما شنية يعملو فيا
زهرة:لا منعرفش
انا:تحب نوريك توا و لا بعد العشا
زهرة:عمممر...يزززي حبي
انا:متحبش ياخي
عدات يدها على خدي...و نزلت عليا شوية...باستني من خدي تحكي
زهرة:يززي من تخرنين توا
انا:بربي
زهرة:شو كي عامل فيها متغشش
انا:سيبون صراحة خذيت بخاطري...هيا قوم توا
زهرة:انا نعرف كيفاش نرضيك مبعد
جيت باش نحكي...قصت عليا ببوسة قوية...سكتتني بيها...و جات باش تقوم...كبست عليها نحكي
انا:خليك
زهرة:مش على أساس تحبني نقوم ؟
انا:زهررة خليك و كهو
زهرة:لباس عزيزي ؟
هزيتلها براسي ايه...منحبهاش تبعد عليا خاصة ليلة نحب نشبع منها في كل لحظة باش نتحرم منها مبعد كبست على كرشها...نحب نتحسس البيبي...نحب نرا كل لحظة و هو يكبر فيها...غزرتلي تحكي
زهرة:ماكش باش تتعشى ؟
دوب تبسمتلها...جبدتها عندي...و نزلت نمتع روحي بماكلتها البنينة...و نوكل فيها معايا زادة...كي العادة خواطرها دايرة...دوب كلات لقمة على بعضها...منعرفش كيفاش باش نخليها ورايا...كان جا ليدي نقتلو و نرتحها منو...عوجت شفايفها تحكي
زهرة:كهو...معينيش...هاني باش نقوم توا و كمل انتي
انا:قتلك خليك...تو تقوم معايا
حطت راسها على كتفي...فرد وقت تعدي في يدها على صدري و تحكي
زهرة:شنية صار في قضية الهم هذاكا
انا:متخافش ما عندو ما يعملك
زهرة:باهي و أمور الخدمة
انا:زادة لباس عزيزتي
زهرة:تعبتك برشا يا عمر
انا:شششش معادش نعاود نسمع الكلام هذا منك باهي
زهرة:باهي يا روحي
انا:كيفاش تحس في روحك توا ؟
زهرة:احسن ببرشا
عديت صوابعي على رقبتها...و نزلت بيهم لشق متاع الروبة...نحكي
انا:خلينا من كلشي توا...و قولي
زهرة:شنية ؟
انا:مستعدة ترضيني ؟ ساعة مزلت مغشش و انتي دبري راسك
زهرة:بربي
انا:ممممم
زهرة:مممم و كيفاش باش نرضيك انا زعمة ؟
انا:خمم فيها انتي
قربت عندي أكثر...حطت خشمها على خشمي...و كبست بيدها على كتفي تحكي
زهرة:باهي خليني نخبرك حاجة
انا:تفضل
زهرة:من بكري شاهية حاجة انا
انا:متعلقة بالبيبي زادة
زهرة:لاا...المرة هاذي تخصني انا و كهو
انا:باهي...نسمع فيك ملا
زهرة:ماكش باش تندم يعني
انا:قولي تراه...مبعد نشوف اذا نندم و لا لا
زهرة:باهي اسمع
انا:مممم
كبست عليا أكثر...و نزلت على شفايفي...استغربت الفازة...نستنى فيها تطلب لي تحب عليه...جيت باش نحكي...قصت عليا...بعضة قوية...خلاتني مروهج منجمتش حتى نرد نفس...اول ما جبدت روحها...نطرت من عندي...و بعدت عليا تحكي
زهرة:قتلك باش تندم
عوجت راسي نغزرلها...عدات لسانها بين شفايفها...نعرف الوحم عامل فيها...منعرفش علاه منجمتش نقوم...يمكن نحب نحفظ كل حركة فيها...ضيقت عينيها تحكي
زهرة:مدامك بقيت هادي...معناها مقلقاتكش الحكاية
انا:علاه باش تقلقني ؟
زهرة:منعرفش...قلت بلكشي وجعتك
انا:وجعتني ؟
زهرة:مممم
انا:لا العكس عزيزتي
هزيت روحي وقفت...حسيتها تفرهدت شوية...اول ما قربتلها...جبدتها عندي...كبست عليها نحكي
انا:شنعمل فيك توا ؟
زهرة:شعندي عملت انا...فاش قام تهدد فيا حرام عليك
انا:و مش حرام لي عملتو فيا انتي ؟
زهرة:ما عملت شي
انا:ايجا تراه
نزلت عليها شوية...هزيتها بين يديا...و تبسمت نحكي
انا:ما عملت شي يا روحي...و متغزرليش اكاكا...منجمش نتحمل أكثر
نزلت راسها بالوقت...دزيت الباب بساقي و دخلت حطيتها عالسرير و نزلت عليها...نحكي
انا:وينو صوتك ؟ شبيني معادش سمعتو ؟
زهرة:ا..انا
انا:شنية ؟
زهرة:حتى شي...انا نحبك و كهو
تبسمت بالوقت...و عديت عينيا على وجها...يمكن تكون آخر ليلة نعديها معاها...بعد لي جاي...منحبش نفلت منها حتى دقيقة...حطيت كلشي على جنب...و غطست فيها في كل قطعة من بدنها...نحب الليلة هاذي تكون سبيسيال عاللخر...جبدت روحي منها كي حسيتها معادش فيها...قربتلي تحكي
زهرة:نحبك...و نموت عليك
بستها من راسها...و عديت يدي نبعد في خصلات شعرها...نحكي
انا:و انا نعشقك يا روحي
دوب تبسمت و غمضت عينيها...عديت ليلة كاملة نغزرلها...نغزر لتفاصيلها الصغيرة...للكوليي لي منحتوش من ليلة عرسنا...منعرفش الوقت شنية مخبيلنا و اليمات لي جاية شنية هازة معاها...أما لي متأكد منو انو اللحظات هذوما باش يرافقوني طول ما انا عايش باش نكمل كلشي بقى الليلة...و غدوة صباح...و أكثر شي باش نحاول نضمن لهي باش تكون مليحة...لين نرجع و أكيد مانيش باش نعديلو اللي صار بالساهل...انا خسرت معركة...أما مخسرتش الحرب يا مراد.
#سمر 💙