زهرة🌸

الحلقة الثانية و التسعون

🔸️حلقة 92
🔸️محمد_يحكي:
ضربت يدي عالفولون بغزول...يعطيها الصحة الفرخة عرفت كيفاه تخليني على أعصابي...ليلة كاملة نطلب فيها و خلي الصباح لي خلاتني نستنى فيها كي الشاطر لا هزت لا طلت...أما مش عليا...أصلا منعرفش شبيني شديت صحيح في الحكاية...و داخل بعضي جرايرها يمكن خاطرني حسيت روحي وجعتها...بلا ما نفيقوعلى روحي...خلي الفرخ لي كانت واقفة معاها...فددني و تيقرني من روحي...لدرجة منعرفش شنية صارلي وقتها و لا علاش تصرفت معاها اكاكا...و كملت عليا بالخوف لي حسيتو في عينيها لي ضايعة...و قربها لي خلاني نفقد الكنترول على روحي...و نتمرد معاها اكثر...تنهدت بالقاوي...و غزرت لساعة...19:30 و لتوا مفما حتى خبر عليها...وليت كلمت مريم...حتى هي مهزتش عليا...غادي وين دخلت بعضي أكثر...و شديت ثنية الحومة...و نشوف اخرتها معاها...كبست عالتليفون في يدي و عاودت كلمتها...و بالزهر هزت...لدرجة عاودت نزلت تليفون باش نتأكد...و رديت عليها...نحكي
أنا:ويين ¤¤¤ ¤¤¤¤¤ ياخي نورمال التصرفات متاع
¤¤¤ هذوما
غمضت عينيا بالقاوي من سكاتها...أكثر حاجة تنرفزني و تخليني نخرج من دين أم عقلي...نفخت بالقاوي...باش نحكي...أما شهقاتها لي دوب لحقوني...خلى بدني الكل يتكبس..من الافكار لي هدت عليا و أولها انو بوها عمللها حاجة...و شافها معايا...منحبهاش تتضرر جرايري و لا تنزل دمعة منها...الأيامات لي قربتلها فيهم أكثر..ريت طفلة أخرى...ريت جانب آخر منها...و عرفت شمعناها طفلة صغيرة...تحاول تثبت روحها وسط الظغط لي تعيش فيه...ريت خوفها من بوها...ريت حشمتها ضحكتها...دموعها...كسوحية راسها...برشا تفاصيل صغيرة متحبش تغيب على عيني...شنية سبب ؟ منعرفش...منعرفش شبيني مركز معاها لهدرجة...شبيني ندخل في حاجات معنديش فيها...شبيني نجري وراها و خايف عليها..أسئلة منحبش حتى نسمعهم...أسئلة خايف منها...و منحبش نعرف الجواب متاعها...يمكن خاطر لاول مرة بعد سنين...نجمت نتواصل مع طفلة من غير ما نخمم في الماضي...مانيش باش نقول نسيت ريم و لا نحيتها من مخي...أما فما حاجة تخليني منجمش نبعد عليها...فما حاجة سبيسيال في هالطفلة...تخليني جايب ثنيتها بالسيف عليا...خذيت نفس نبرد في أعصابي و نحكي فرد وقت
أنا:رنييم...شفما ؟
رنيم:م..محمد...محمد أمانك...ا..أمان
أنا:رنيييم حل فمممك...شفمااا ياخي ؟
رنيم:م...مريم
انا:شبيها مريم ؟ تكلللم
رنيم:م..منعرفش...فما شكون ضربها...ال..الدم في كل بلاصة...ش..شنية نعمل محمد...أختي باش تموت
فقت من سرحتي و من كلامها...على كرهبة أخرى تزمرلي...دورت الفولون...و كبست عالفيتاس نحكي
أنا:رنيييم...وينكم توا ؟
رنيم:ب..بوتيك...أختي متحبش تفيق يا محمد
انا:شنية لي صار ؟
رنيم:م..منعرفش...فما شكون تهجم عالبوتيك...اعمل حاجة أماانك
كلامها و بكاها دخلني بعضي أكثر...خذيت نفس...نحكي
انا:رنيييم
كبست عالفيتاس أكثر..تروهجت و انا نسمع في شهقاتها لي نقبتلي وذني...دورت الكرهبة نحكي
أنا:رنيييم...تسمع فيااا ماااو...جاااوبني
رنيم:ا..إيه
أنا:أسمعني...رد بالك تتحرك من بلاصتك...هاني باش نطلب الإسعاف...و البوليس زادة...متخافش باهي..هاني في ثنيتي لعندك
رنيم:فيسع اماانك
أنا:باهي..باهي عزيزتي...هاني في ثنية
علقت عليها...و طلبت الإسعاف بالوقت...و منها طلبت البوليس...عديت يدي على وجهي...و عاودت طلبتها نحكي
أنا:هزز يا رنيم...هز عليا
ضربت يدي عالفولون بغزول...فكرة لعاودو دخلو ليهم دخلتني بعضي أكثر...أول ما وصلت...شديت الفران بالقاوي...و نزلت نجري...و على وصلتي للبوتيك...جمدت في بقعتي...البلار لي في كل بلاصة...السلعة لي طايحة عالارض...و الحجر...الحجر لي منصوب بحذا الباب خلى قلبي يخض بالقاوي...قربت بخطوات متناقضة...حطيت يدي عالباب...و نزلت راسي نغزرلهم...هزت راسها جات عيني في عينيها...حمورة جمر...دوب غزرتلها و عاودت نزلت راسي لمريم...مريم لي دمها يجري على وجها...و نازل عالارض...منجمتش نستوعب لي قاعد يصير معرفتش إذا نركز فيها و لا في رنيم...لي تبعدلها في شعرها...و تكبس عالفونتولين في فمها...في بالها باش تخليها تفيق...هزيت راسي مرة أخرى على صوتها تحكي
رنيم:ا..أختي باش تموت محمد
قربت منها بالزربة...نزلت عليها...نتحسس في النبض متاعها...نحكي
أنا:متخافش لتوا حية
مديت يدي بالسيف...نبعد في شعرها لتالي...نحب نشوف بلاصة الضربة...و هي حركة لا...دموع رنيم...و دبشها لي تعبى بالدم...خلاني نخاف على حالتها أكثر كبست على يد مريم تحدي
رنيم:ش شبيها متحبش تفيق...محمد أمانك متخليهاش تموت تصرف
انا:رنييم اهدا...باهي اهدا
هزتلي براسها لا...بدنها الكل يرعش...خذيت نفس و قربت ليها أكثر...حطيت يديا زوز تحت راسها...و ساقيها كبست عليها و هزيتها في حملتي...و مع أول خطوة عملتها...سمعت صوت الأومبيلونس و البوليس لي وصلو مع بعضهم...هبطو عندي بالزربة...حطيتها في brancard نحكي
أنا:أماان فيسع...أعملو حاجة...طفلة باش تموت
هو:اهدا خويا
قص علينا صوت سي أحمد...لي قاعد يقرب منا...يصيح
أحمد:مرييم...بنتتتتي...مررريم
دخلوها بالوقت...بقيت واقف في بلاصتي...غزرلي يحكي
هو:شكون يمشي معاها
أحمد:أنا نمشي مع بنتي
هزيتلو براسي ايه...و تسكر الباب بالوقت...نغزرلهم كيفاه بعدو في لحظة...و صوت الإسعاف رجعني لوعيي رجعت للبوتيك بالزربة...نغزرلها مزالت في بلاصتها خذيت نفس و قربت منها...نزلت عليها...حطيت يدي على خدها...بلا ما نفيق لدم لي مزال عليا...كبست عليها نحكي
أنا:رنييم...أغزرلي هوني...هيا معايا توا...هيا قوم
تكات عليا بالوقت...معادش عندها طاقة لا تحكي و لا تشد روحها...كبست على شعرها نحكي
انا:قوي روحك...مريم بحاجتك توا...هيا معايا
كبست عليها أكثر...وقفتها معايا...و هزيت راسي على دخلت البوليس..و قبل ما يحكي حرف...غزرتلو نحكي
انا:تنجم تعدينا لتحقيق مبعد...لازمنا نلحقو عليها توا
هزلي براسو ايه و بعد من الباب...مشيتها معايا للكرهبة حليت الباب ركبتها و خالطت عليها...خدمتها و طرت بيها...جاب ربي ما لقيت حد في ثنيتي...شيعت راسي نغزرلها من بعيد...ضرب في راسي حسام...منعرفش كيفاه نسيتو جملة...هزيت تليفون في يدي بالسيف طلبتو...هز عليا بالوقت يحكي
حسام:طحت في يدي يا ¤¤¤¤¤ وين ¤¤¤¤¤ لتوا ؟
أنا:ح..حسام
حسام:توا تذكرت حسام يا هامل ؟
أنا:حسام أسمعني عيش خويا
حسام:شفما ؟
انا:وينك توا ؟
حسام:في ثنيتي لدار
انا:باهي برشا...هاك قريب للكلينيك ملا
حسام:كلينيك شنية ؟ فاش تحكي أنت ؟
انا:حسام أنت اسبقني...هاني لاحقك
حسام:محممممد مش وقت ¤¤¤¤¤¤ قولي شفما
أنا:م..مريم
حسام:شبيها مريم...هاي كانت بجنبي نهار كامل...صارت حاجة لبوها
أنا:حسااام...فما شكون تهجم عالبوتيك...و بالزهر مريم كانت فيه...طلبت الإسعاف و راني وراه توا...الحق علينا عيش خويا
أول ما كملت كلامي...سمعتو كي شد الفران بالقاوي غمضت عينيا و عاودت حليتهم نحكي
أنا:كلينيك ¤¤¤¤¤¤¤¤ عشر دقايق و نكونو غديكا الوو حسام تسمع فيا ياخي
من صوتو لي تقص عرفتو...معادش ينجم يسمع كلمة اخرى مني...دورت راسي...غزرتلها...تغزر لثنية من غير حتى كلمة...كبست عالفولون بيديا زوز...نعرف مش وقت إني نضعف حتى طرف...صورتها لتوا بين عينيا...و هي في الحالة هذيكا...مريم اكثر من انها تكون أختي و كلشي وصلتلو بعد حالتي لي كنت فيها...عندها فضل فيه...حسيت الثنية طوالت اكثر...مديت يدي بالسيف كبست على يدها...لي حسيتها باردة ثلج...و خذيت نفس نحكي
أنا:مريم باش تمنع المرة هاذي زادة...نعرف لهي قوية و باش تمنع
هزتلي براسها من غير حتى كلمة...وجها احمر باش يطرشق...و الدموع شاحو على خدودها...اول مرة نشوفها في الحالة بعد حالة مريم ليلتها...و هاذي ثاني صدمة تاخوها على اختها...نزلت على يدها اكثر نطمن فيها...و على اخر دورة دخلنا للكلينيك...دخلت وراهم بالظبط...شديت الفران مع كرهبة حسام بالوقت منعرفش كيفاه حرق الثنية ووصل معانا قد قد...نزلنا زوز مع بعض...دوب غزرلي و قرب من الاسعاف...حط يديه زوز عالباب يستنى فيها تفتح...منجمت نقرب خطوة أخرى منو...و مع حلة الباب وخر خطوة وحدة لتالي...و جبد الباب لتالي...يغزرلها...نزل بوها أول واحد بوها لي حتى محسش بوجودو و لي هو معاها...جبد معاهم brancard و قرب منها بالزربة...حاولو يجبدوه لتالي...دزهم و حط يدو على خدها...يمسح في دمها لي و يحكي
حسام:مرريم...يااا عمري...هاني جييت...هاني معاك توا نعرف لإنتي تسمع فيا...حل عينيك عزيزتي
نزل على خدها أكثر يمسح عليه...و على الكلام لي خرجت من الفرملي...خلاه يجبد روحو بالوقت
هو:سامحنا مسيو...أما المدام حالتها خطيرة برشا...و تعرضت لأكثر من ضربة..كان باش تعطلنا أكثر مستحيل نلحقوها...تعاون معانا أمانك
جراو بيها بالوقت...و في هذا الكل هو بقى واقف في بلاصتو...و دمعتو حبست في نص خدو...تكى عالباب متاع الاموبيلوس...و حط يدو عالدرجة...يحكي
حسام:ا أنا سبب...مكانش لازم نخليها الوقت هذاكا في البوتيك...أنا سبب...أنا سبب
قربت منو بالزربة...كبست على كتافو بيديا زوز...نرج فيه و نحكي
انا:حساااام...يزززي من تخلويض...مريم بحاجتك
حسام:انا سبب...انا لي خليتها...مريم باش تموت جرايري...مرتي باش تموت يا محمد
كبست عالبونية متاعي...و ضربتو بكل قوتي على وجهو...نصيح
انا:يززززي فيييق على وضعععك...مريم عاايشة تسمع فيا...مريم باش تقووم لباااس...قوم و يزي من تخلويض متاعك...هي بحاجتك انت توا...مش إحنا
هز راسو غزرلي مروهج...حسيتو فاق من الغيبوبة لي كان فيها...سندتو بيدي...نحكي
انا:هيااا قووم عيش خوويا...مش لازم كل مرة ترمي لوم على روحك...مريم بحاجتك توا...هيا أمانك
هز روحو وقف بالسيف...يغمض و يحل في عينيه بالقدرة...لدرجة استغربت حالتو و انا نغزرلو...جبد روحو مني...يحكي
حسام:ل..لباس...لباس عليا
شيع راسو لباب الكلينيك...و عدا يدو على وجهو...يدو لي كانت ترعش بطريقة غريبة...بعدني بيدو...و شد ثنية الباب...يمد في الخطوة بالزربة...كانو مش هو لي كان واقف بالسيف توا...خذيت نفس و تلفت لرنيم...لي واقفة بحذا الباب...من غير حتى حركة...قربت منها وقفت قدامها بالظبط...حطيت يديا زوز على وجها نحكي
انا:رنيم...إنتي زادة لازمك تكون قوية...هاك ريت حالة حسام...كان يشوفك عالحالة هاذي...يضعف اكثر من الاول
رنيم:م..محمد...أختي باش تعيش مش هكا
انا:باش تعيش...و راسك باش تعيش...هيا نمشو بحذاها توا
نزلت بيديا زوز من وجها...ليديها...كبست عليها و سكرت الباب...نمشي فيها معايا...نسايس في خطواتها لي دوب تمد فيهم...وقفت الفرملي نحكي
انا:الطفلة لي جبتوها توا وينها ؟
هو:دخلوها للعمليات...تنجمو تستناو بحذا الجماعة
هزيتلو براسي ايه...و مشيت بحذاهم...نغزر لحسام لي واقف بحذا الباب متاع البلوك...محبش يتحرك...و بوها لي واقف...ميعرفش ساقو من راسو...جبدت روحها مني في لحظة...و قربت منو تحكي
رنيم:ب..بابا...لباس ماهو ؟
هز راسو غزرلها...كأنو توا برك وين شافها...حط يدو على خدها يحكي
أحمد:انتي لباس ؟
رنيم:مانيش لباس
عنقاتو بالوقت...منعرفش اذا تمدلو في القوة و لا تاخو فيها منو...خذيت نفس و قربت من حسام...وقفت قدامو...نعرف و متأكد في حالتو هاذي...ماهوش باش ينجم يحكي كلمة...و لا ينطق بحرف...مديت يدي كبست على كتفو...من غير حتى كلمة...و جبدت روحي لتالي...نغزرلهم...حالتي مش أحسن من أي حد فيهم اما كان باش نضعف توا...ما نكون عاونتها في حتى شي هزيت راسي عالفرملية لي خرجت تجري...و تحكي فرد وقت
هي:ناقصنا دم...شكون منكم يتبرعلها ؟
رنيم:ا..أنا...أنا أختها
هي:عندكم نفس الزمرة ؟
رنيم:ممم
هي:إيجا معايا
قربت منها باش تمشي معاها...منعرفش كيفاه عملت الخطوة و جيت بحذاهم...غزرتلها...و هزيتلها براسي باش تمشي...و مديت يدي سندتها بيها...خاطر متأكد ماهيش باش تكمل تعمل خطوة اخرى وحدها...منعرفش كيفاه تعداو العشر دقايق هذوكا...اول ما خرجت الفرملية...كبست على يدها نحكي
انا:لباس توا ؟
هزتلي براسها لا...جبدتها عندي بالوقت حضنتها...نحكي
انا:لباس...كلشي باش يكون لباس
رنيم:هزني بحذا أختي أماانك
أنا:باهي...هيا عزيزتي
جبدت روحي منها...غزرتلي ندرا كيف...خذيت نفس و عاونتها تاقف...رجعنا بحذاهم...تعدات ساعة اخرى...من غير حتى حس...الوضع دخل بعضو اكثر...و حد فيهم ما نجم يشد بلاصة و يقعد...عديت عينيا عليها...يديها و خصلات شعرها...خدودها...الكل بالدم...و حسام حالتو مش احسن منها...هزيت راسي على صوت الباب لي تحل...نغزر لطبيب...لي خرج يغزرلنا الكل...و حد منهم ما خمم يسألو...خاصة حسام...لي يعدي في عينيه و كهو...كانو مش معانا جملة...خذيت نفس و قربت منو نحكي
أنا:لباس دكتور ؟
هو:الوضع تحت السيطرة أما
انا:شنوة ؟
غزرت لحسام بالوقت...و عديت يدي على وجهي نسمع فيه
هو:فما أكثر من ضربة أخرى على بدنها...على هذاكا باش نعدوها لسكنار...لازمني نتأكد لي مفماش نزيف داخلي خاصة في راسها
حسام:ن...نحب نشوفها
هو:لين نكملو سكنار...بلكشي لازمها عملية أخرى
انا:باش تكون بخير ؟
هو:ما نجم نوعدك بشي توا
جبدت النفس بالقدرة...معرفتش مع شكون ناقف بالظبط...قربت من سي احمد بالزربة...قبل ما يطيح شديتو من يدو نحكي
أنا:لباس ماهو ؟
رنيم:ب..بابا
أنا:مدموزال...إيجا لحظة
هي:تفضل ميسيو
أنا:فما طبيب آخر هوني ؟
هي:اكيد
أنا:هيا سي أحمد...خليه يطمنا عليك
أحمد:ل..لباس عليا
أنا:في حالتك هاذي ماكش باش تنجم تعاون مريم بحتى شي
غزرلي ندرا كيف...نزلت على يدو اكثر...جبد روحو شوية...يحكي
أحمد:باش نمشي وحدي
هزيتلو براسي ايه...و جبدت روحي لتالي...نغزر للفرملي لي قرب منو...يعس على خطواتو...متأكد كات يشوف بنتو توا...ماهوش باش ينجم ياقف اكثر...و على تلفيتي...نغزرلهم كيفاه خرجوها قدامنا...حسيت بالارض تحركت تحتي...خلي حسام لي متحركش من بقعتو خطوة وحدة...دوب يتبع فيها بعينيه و كهو...زربت في خطواتي و خالطت عليهم...شديتها من يدها نحكي
انا:تحمل مريم...تحمل عزيزتي
طبيب:استنى هوني مسيو
وخرت لتالي...ورجعت بحذاه...مديت يدي كبست على كتفو نحكي
انا:حسااام...فيق على روحك...ياخي باش تبقى عالحالة هاذي...هاك ريتها...لباس عليها و ما بيها شي...و تو يأكدلك طبيب كلامي...هيا اماانك عيش خووياا
حسام:لباس عليا محمد
كبس على يدي هبطها...و خالط عليهم...قربت منها...جبدتها من يدها...نمشي فيها معايا...تمدوفي الخطوة من غير حتى كلمة...وقفنا بحذاه جمب البلار...غمضت عينيا عالريدو لي نزل في لحظة...و كبست على يدها اكثر...الوقت لي تعدا توا اكثر من الوقت لي كانت بين يديهم في العمليات...كان باش تصيرلها حاجة...متأكد ماهوش باش يبقى رايض و مهدي روحو كيما توا...الدقايق لي تعدات علينا...يعلم بيها كان ربي...و مع خروج الطبيب...و قبل ما ننطق حرف...سبقني هو بخطوة...يحكي
حسام:شنية صار لمرتي ؟
حسيتو بدا يستوعب لي قاعد يصير ساعات لتالي...و سؤالو خوفني اكثر...كانو مش مريم لي كانت في العمليات من ساعة برك...جبدت يدها مني و قربت وقفت بحذا حسام...تحكي
رنيم:أختي لباس دكتور ؟
هو:لباس...بعد السكنار و التحاليل...تبين لي مفما حتى نزيف داخلي...و العملية كانت ناجحة...أما ميمنعش لهي باش تبقى ايامات بحذانا
غمضت عينيا بالقاوي...و حليتهم كي حسيت ببدنها الصغرون لي عنقني بالوقت...تحكي
رنيم:سمعتو محمد...اختي لباس...مريم باش ترجعلنا
مديت يدي عديتها على ظهرها بالوقت...نهدي فيها...و فرد وقت...منجمتش نزل عينيا عليه...كبس عالبونية متاعو يحكي
حسام:نحب نشوفها...لازمني تشوفها
هو:باش تشوفها أكيد...أنا لين يكملو يحضرولها بيتها...و حمد الله على سلامتها
خلاه واقف في بلاصتو و مشى على روحو...و تلفتنا الكل على صوت العون
هو:حسام الماجري
حسام:انا
هو:مريم عبد الله مرتك
هزلو براسو إيه...كبشت فيا أكثر...عرفتها خايفة...كبست على شعرها...مع صوتو
حسام:مرتي
هو:لازم تتفضل معانا
أنا:علاااه ؟
هو:باش نحققو بخصوص لي صار...و بعد ما تفيق المدام نكملو تحقيق معاها
أنا:مش وقتو تحقيق هذا...كان جاي تحقق معاه توا...برا فركس عالمجرم لي عمل هكا
حسام:نحب نتعدا للبوتيك قبل...نحب نشوف بعينيا شنية لي صار...كان تحب تنجم تحقق معايا غديكا
أنا:حسااام...ياخي نورمال تخلي مرتك و تمشي توا
هو:تفضل سي حسام
حسام:تو نخلط عليكم بكرهبتي
هو:باهي
حسام:محمد خلي عينك عليها...باش نرجع قبل ما تفيق
بقيت نغزرلو من غير حتى كلمة...خفت برشا من ردة فعلو...و اللي يخمم فيه...أما منجمش نوقفو...أول ما خرجو...كبست عليا تحكي
رنيم:علاش مشى معاهم
انا:متخممش في الحكاية توا
رنيم:بابا...بابا لازمو يعرف
أنا:مزال تحت تأثير البنج حتى هو...هيا إيجا معايا
رنيم:وين ؟
نزلت راسي نغزر لحالتها...لعينيها لي تحل فيهم بالسيف...عديت يدي على شعرها نحكي
أنا:أول سي تغسل حالتك قبل
رنيم:نغسل مبعد
عاودت حطت راسها على صدري...مديت يدي عديتها على جبينها...نحكي
انا:هاك باش تطرشق انتي زادة...هيا ايجا
رنيم:لباس عليا
انا:رنييم يعلم ربي بحالتي...متكملش عليا امانك
رنيم:شعملت انا توا ؟
انا:حسابنا هذاكا مبعد...مدام طمنا على مريم...ايجا معايا توا
رنيم:باهي
كبست عليها...نسايس في خطواتها...متأكد لي ماهيش قد بعضها جملة...منعرفش كيفاه وصلنا لتوالات...جبدت روحها شوية...تحكي
رنيم:هاني باش ندخل توا
كبست على يدها...و قربت منها اكثر حليت الباب...غزرتلي ندرا كيف تحكي
رنيم:فاش تعمل أنت ؟
أنا:هيا برك...مش وقت تخرنينك
دخلتها و دخلت وراها...نغزر لطفلة لي هبطت راسها حاشمة مني...و خرجت تجري...قحرتلي تحكي
رنيم:م...محمد أخرج فاش تعمل
أنا:إيجا هوني...و أسكت شوية
جبدتها عندي اكثر...حليت السبالة...و كبست على يديها زوز...حطيتهم تحت الما...نغزر لدم لي نازل منهم...هزت راسها غزرتلي في المرايا...تسكر في عينيها و تحل فيهم حتى إحنا نص الليل...و اللي تعدا عليها مش ساهل قربتلها اكثر...رميت شوية ما على وجها...نمسح في دم لي مسخت روحها بيه..حتى من خصلات شعرها..كبست بيدها عالرخامة...و يدها لأخرى حطتها على يدي تحكي
رنيم:ب بارد
أنا:أصبر شوية كهو
عديت يدي من خدها لرقبتها...نمسح في اخر بقعات الدم...و من تسكيرة عينيها...دخلت بعضي اكثر...كأنها عاملة فيا بلعاني...سكرت الما...ورجعت شعرها لتالي نحكي
أنا:سيبون...هيا توا ؟
رنيم:وين ؟
أنا:رنيم...لازم منهم الاسئلة هذوما...إيجا نشوفلك بيت إرتاح فيها ليلة...و صباح يعمل ربي دليل
رنيم:نحب نبقى بحذا أختي
أنا:يا بنتي هاك باش ترقد عالواقف
رنيم:لباس عليا
جات باش تتحرك...شعرت لا طاحت...شديتها بالوقت رمات روحها عليا...كبست على ظهرها نحكي
أنا:واضح قداش لباس عليك...تحرك قدامي توا
رنيم:منحبش
جبدت روحها شوية...استندت بيدها عالرخامة...تحكي
رنيم:أخرج أنت...تو نخلط عليك
أنا:رنييم...ياخي تفرح إنتي كي تركبهالي...و لا شنية الحكاية ؟
رنييم:و أنت تفرح كي تكش عليا
خذيت نفس...و حاوطت وجها بيديا زوز...نغزر لعينيها لي مزالو حمر لتوا...شفايفها نفس الشي...خدودها باش يطرشقو...وجها الكل يعبر عالحالة لي تعدات بيها...و كملت عليا باكا الغزرة...لي تخليني عاجز باش نقول حرف...عديت صوابعي على خدها...نحكي
أنا:باهي إيجا معايا...و معادش نكش...سافا هكا
رنيم:مش سافا ؟
انا:أمشي برك...أحسن ما يدخلو علينا توا
هزت يدها حطتها على صدرها...و نفخت بالقاوي..تحكي
رنيم:افففف...مريولي تبلل
أنا:هاك لابسة كبوطك
رنيم:أنت سبب
انا:باهي...تو يرجع حسام...نهزك لدار بدل دبشك...سينو نحي المريول و عاود البس كبوطك
رنيم:لا...لباس...هيا توا لازمني نطمن على مريم
أنا:باهي إيجا
جبدت روحي شوية...حليت الباب...خليتها خرجت قدامي...و خالطت عليها نمشي وراها...عارضت للفرملي تحكي
رنيم:وين اختي ؟
هز راسو غزرلي...عرفتو بهت في حالتها...قربت منها شديتها ليا...نحكي
انا:تنجم تورينا البيت
هو:اول طابق
أنا: و بالنسبة لسي أحمد...نقصد الراجل لي كان معانا ؟
هو:مزال مفاقش...ساعة اخرى تنجم تطمن عليه
انا:باهي...كان ميقلقكش حضرلي بيت اخرى زادة
هو:لشكون ؟
انا:للفرخة هاذي...و يظهرلي عندها سخانة...خلي طبيب يعدي عليها
هو:باهي تفضل
كبست عليها اكثر...نمشي فيها...اصلا سخانتها طالعة...و شادة روحها بالسيف...تعديت لمريم اول شي...غزرتلها من البلار...مخليتهاش تدخل عندها و هي في الحالة هاذي...غاضتها الفازة...و عملت فيا بتخرنينها كي العادة...جبدتها معايا للبيت لاخرى...قعدتها عالسرير...تكات لتالي بالوقت...شديتها شوية...نحيتلها كبوطها حطيتو على جنب...دخل الطبيب بالوقت يفحص فيها...وخرت لتالي...من غير حتى كلمة...طلعت حاجبي و انا نغزرلو يحضر في الزريقة...هزت راسها شوية تحكي
رنيم:فاش تعمل ؟
هو:الزريقة باش طيحلك السخانة...و ترتاح شوية
رنيم:منحبش...محمد شفما ياخي ؟ قولو لانا لباس
قربت قعدت بجمبها...غزرتلي بخوف...ووجها مشى الوان...كبست على يدها نحكي
انا:رنيم...جرد زريقة طيحلك السخانة...ياخي باش يقتلك هو
رنيم:منحبش محمد علاش هكا ؟ والله لباس
هو:قداش عمرك ياخي ؟
رنيم:18 سنة...علاش تسأل ؟
شدني الضحك...طلعت بالرسمي فرخة...خذيت نفس و كبست على يدها أكثر...طلعتلها مريولها شوية و هزيتلو براسي إيه...جبدت يدها شوية تحكي
رنيم:فاش تعمل محمد...ياخي هبلت أنت
أنا:رنييييم...يزززي توا
كبس على يدها أكثر...دموعها تحصرو باش ينزلو غزرتلي تلوم فيا...غمضت عينيها مع دقة الزريقة...لين خلات دموعها ينزلو بالوقت...عديت يدي على خدها نحكي
أنا:سااايي وفات...اهدا...هاك قبيل نحيت دم و مخفتش علاش تتشوكع على جرد إبرة
رنيم:هاذي توجع أكثر
هو:سيبون صغرونة...إرتاح توا...آخر مرة نزرقلك فيها
رنيم:أصلا آخر مرة نجي فيها عندكم
شدو ضحك...تبسملي و هز روحو خرج...جبدت روحها مني تحكي
رنيم:مزالت تحرق لتوا...كل جرايرك...شباش نعمل توا يديا زوز يوجعو
انا:شوية و ترتاح
رنيم:اففف منك
انا:زيد تشوكع...تو نهدلك فمك
رنيم:انت ديما هكا مجودر...ياخي انا في وضع يسمحلك باش تهدلي فمي
تنهدت بالقاوي...و مديت يدي جبدتها عندي...حطت راسها على صدري بالوقت...كبست على شعرها نحكي
انا:باهي منقصدش...و زيد زريقة هاذي طيحلك سخانة...مريتش حالتك ياخي
رنيم:لباس عليا...شوية سخانة و تمشي على روحها أصلا من بارح هكا...و ما صار شي
أنا:صار تقول فيها و محشمتش على روحك...و متذكرنيش في ليلة البارح...هذيكا حسابها وحدو
رنيم:علاه ؟
أنا:متسألش أحسنلك
رنيم:معناها خليتو يزرقلي بلعاني مش هكا
انا:منين جيب فيهم الافكار هذوما انتي
نزلت يدها شوية غزرتلها...و عاودت ردتها...تبسمت نحكي
انا:هيا توا...لازمك ترتاح شوية
جبدت روحي منها...و خليتها تتسطح لتالي...اول ما حطت راسها...راحت في الطويل...نزلت عليها شوية نحيتلها البوت...عدلتها و غطيتها...ترميت بجمبها...نغزر لتفاصيل وجها...تبسمت رغم التعب لي نحس فيه الكل...اخرتها بنت 18 سنة عاملة فيا الفرخة...مديت يدي عديت صوابعي على خدها...نسمع فيها تحكي
رنيم:أنت لي خليتهم يزرقولي...تو نوريك الانتقام كيفاه
تبسمت بلا ما نحس...و نزلت عليها أكثر...قربت لوذنها نحكي
أنا:هيا ارقد أحسن ما نعاود نكلمو توا
شخت على صوتها لي تقطع فرد مرة...نزلت عليها أكثر خطفت بوسة من خدها...بوسة خلات قلبي يخض بالقاوي...لدرجة مفهمتش شنية لي قاعد يصير...جبدت روحي شوية...نغزر لتراص الزريقة في يدها...دوب عديت صوابعي عليها...هزيت يدها شوية...طبعت بوسة فوق التراص بالظبط...منعرفش علاه عزت بيا...اول مرة نشوفها مريضة في حالة...هزيت راسي شوية...تبسمت و انا نذكر في تشوكيعها...و تخرنينها...وسط الاحداث الخايبة في الليلة هاذي...شوفتها و هي راقدة بالطريقة هاذي...احلى حاجة حسيت بيها و ريتها توا...منعرفش شنية الاحساس هذا بالظبط...اما منجمش نمنع روحي عليها...فما حاجة اقوى مني تشد فيا ليها...بعد الليلة غدوة مخبيتلنا برشا حاجات...حتى حد فينا ما يعرف شنية جايبة معاها و شنية مزال باش يصير فينا اكثر من هكا