🔸️حلقة 54
🔸️مريم تحكي:
وجيعة...وجيعة قوية...نحس بيها في قلبي...و بدني نغزر للفراغ لي داير بيا...نحاول نلقى روحي وسط الحلمة الخايبة...عديت عينيا على البيت...ظاهر باش تكون أكبر جحيم...يجمعني بحسام بعد توا...منعرفش شنوة لي قاعدة نحس فيه توا...كره...حقد...غل...و لا شنوة لي نحب نعملو...و لا لي لازم نعملو...كلامو قاعد يتعاود في وذني بالكلمة...أول مرة يكسرني حد لدرجة منجمش حتى نرد عليه...منجمتش حتى نهز روحي و نخلط عليه...منجمتش حتى نسألو علاه عمل هكا...أصلا معادش يهمني شنوة السبب لي خلاه يعمل هكا...مديت يدي...عديت صوابعي..شوية على بقايع الدم لي ترسخو على الفرش...تبسمت على جنب...ضحكت على روحي خاطرني جيت بساقيا لهوني...خاطر معادش نعرف وين أنا...و لا شنوة لي نعمل فيه...شنوة لي خسرتو...و شنوة لي مزال باش نخسرو...لفيت الروحي بالغطا...و كبست بيديا الزوز على حرف السرير...تقويت على روحي و قمت...نمد في الخطوة بالسيف...حاسة لأنا في بلاصة بعيدة برشا...بلاصة ملزمنيش نكون فيها دخلت لبيت البانو...قلبي دق بالوقت أول ما شميت ريحتو...أول ما ريت دبشو...سكينة تغرست فيا مرة أخرى...نحب نخرج من هوني...نحب نبعد...نحب نتحرر من هذا الكل...و أكثر شي...نحب نفيق من الحلمة الخايبة و ننسى لي صار جملة...رخفت يدي شوية...طاح الغطا على الأرض حليت السبالة...الما ياسر سخون...قعدت في وسط البانو...و لميت ساقيا...منعرفش من شنوة خايفة...أول مرة نعيش الإحساس هذا...هزيت يديا زوز حليتهم
نغزر للحنة...لتوا ريحتها جديدة...غمضت عينيا بقوة غصة واحلة في حلقي...نحب نصيح...نحب نفرغ غشي الكل...أما لقيت روحي مجبورة نكتم هذا الكل...حسيت بدمعة سخونة نزلت على خدي...أول مرة بعد سنين نحس نفس الإحساس...لي ريت فيه أمي آخر مرة..نفس الدمعة نزلت مرة اخرى...عديت يدي على خدي مسحتها بالوقت..دموع أخرى لقات طريقها على خدودي تخلطت مع الما لي نازل عليا..منعرفش قداش تعدا وقت بالظبط هزيت روحي بالسيف...نحس في بدني مدقدق مش نورمال...لفيت المنشفة كيما جا و قربت من المرايا مسحتها بيدي...و طلعت راسي نغزر لروحي عديت صوابعي على رقبتي...و على كتافي...و زنودي لتوا تراص شفايفو و كبست يديه عليهم...غمضت عينيا بقوة...و رجعت حليتهم...خذيت نفس نحكي
أنا:مش توا...رد بالك مريم...رد بالك تضعف مرة أخرى إنتي قوية مريم...قوية برشا...مش حسام لي يهدك
كبست بيدي على الرخامة...نوازن في روحي...دوخة قوية روهجتني...نفس تسكر عليا...عديت يدي على رقبتي نرد في نفس...خرجت للبيت...نفركس على الفونتولين متاعي...خذيت نفس منها...وقعدت على طرف السرير حسيت روحي تفرهدت على قبل...طلعت راسي...نغزر للفاست متاعو...تبسمت على جنب...هو حطمني في أهم ليلة في حياتي...خذا مني كلشي في لحظة...حياتي و بدني...و فرحتي زادة...مجبورة باش ندفن الحب هذا و ندفن روحي معاه زادة..هزيت روحي حطيت الفاليز على السرير...بدلت دبشي و حطيت بقية الدبش في القارد روب...قعدت على الكرسي...نشيح في شعري...تهزيت و تحطيت على صوت الباب...حسيت بيه من غير ما نغزرلو...طلعت راسي...نغزرلو من المرايا طيش الفاست على الفوتاي...هز دبشو و دخل لبيت البانو...من غير حتى كلمة..كأنو تهز و تحط عبد آخر في بلاصتو...مستحيل لي قاعد يصير...نحس في روحي باش نهبل...أما مستحيل نخليه يجرحني مرة أخرى كملت لميت شعري...و عملت مكياج خفيف...أول ما وقفت...خرج من بيت البانو...تبسمت نحكي
أنا:صحة
تلفت بالوقت...جات عيني في عينو...غزرلي ندرا كيف أول مرة يغزرلي بالطريقة هاذي...غزرة فارغة من كلشي غريبة حتى أنا لقيت روحي نغزر لعبد آخر...ما نحس معاه بحتى شي...و كلشي عشتو معاه لتوا...كان مع حسام لي حبيتو أنا و كهو...قحرلي...و قرب حل القاردروب جبد الفاست متاعو...غزرتلو نحكي
أنا:مطولش برشا...باز يستناو فينا على الفطور
جيت باش نمشي...أما في لحظة حبست و رجعت تلفت عندو...لقيتو واقف يغزرلي...قربتو منو...وقفت قدامو بالظبط...هزيت يدي حطيتها على صدرو...و غزرتلو في عينيه نحكي
انا:صحيح تذكرت حاجة...بالنسبة ليك أنت...اللعبة وفات ليلة البارح...أما بالنسبة ليا بدات توا...صدقني ميهمنيش شنوة السبب و لا حتى علاه عملت هكا..المهم أنت مقتنع باللي تعمل فيه...على هذاكا...أعمل لي تحب عليه و كيما تحب حسام...معادش يهمني شنوة اللي باش يصير مبعد أما
نزلت يدي منو...عديت عينيا على وجهو...و ثبت في عينيه لي منزلهمش مني...كملت كلامي نحكي
أنا:أما رد بالك...رد بالك تاقف قدامي...و تقولي سامحني رد بالك حسام...خاطر وقتها صدقني باش نذلك...و مستحيل نسامحك...و لا نغزر في وجهك مرة أخرى مستحيل...على هذاكا متوليش لتالي في اللي باش تعملو...باهي
بقى يغزرلي من غير حتى كلمة...خذيت نفس و جبدت روحي منو...وصلت للباب...كبست عالبواني نحكي
أنا:مجبور تتحملني هوني...و كي يلحق الوقت نمشي وحدي...على هذاكا مظطر باش تكمل اللعبة متاعك عالأقل على خاطر أمك
حليت الباب و خرجت...خذيت نفس بالوقت...توا برك وين حسيت روحي إرتحت..نعرف اللي جاي مش ساهل اما زادة نعرف لي مستحيل نخلي حد يرا دموعي...و لا يهدني مرة اخرى...اكيد باش يجي نهار...و يوفى هذا الكل...أما وقتها منعرفش وين لازم نكون...و لا شنوة لازم نعمل...دخلت للبيت لأخرى...هزيت تليفوني...لقيت ميساج من عند زهرة...حليتو نقرا فيه...<< بونجور يا عروسة..منعرفش على شنوة باش نبارك بالظبط صراحة طلعت محظوظة...هاك عرست و خرجت العام فرد نهار مانيش باش نقلقك توا...اما اكيد فما برشا حاجات نحكيو فيهم مبعد...رد بالك على روحك عزيزتي >> تبسمت بالسيف...زهرة كهو لي نحسها بالرسمي كل عيلتي...و أختي لي تحرمت منها...معناها عام آخر...و نكون كملت...وقتها أكيد نجم نبدا من جديد...أكيد باش تكون عندي فرصة...اني نعاود حياتي...من غير ما يكون فيها حد..كبست على التليفون في يدي و خرجت..لقيت محمد في وجهي...تبسمتلو بالوقت...نحكي
أنا:بونجور
محمد:صباح النور
حسيتو دوب مصحصح...ظاهر شرب برشا البارح...عدا يدو على شعرو يحكي
محمد:وينو راجلك ؟
أنا:في البيت
محمد:بالعادة ميخليكش وحدك
انا:هذاكا لي ترا فيه أنت
خليتو واقف و جيت باش ننزل...خلط عليا...شدني من يدي يحكي
محمد:مريم أستنى لحظة
أنا:شنوة ؟
محمد:شنوة لي قاعد يصير...إنتي مليحة ؟
عديت عينيا على وجهو...تبسمت بالوقت...نحكي
أنا:مفما شي دالي...لباس عليا
تحل الباب بالوقت...طلعت راسي نغزرلو...جات عيني في عينو...غزرلنا ندرا كيف...جبدت يدي نحكي
أنا:وقيت باش ننزلو
قرب منا وقف قدامي...شدني من يدي...بدني رعش بالوقت...كبس عليا يحكي
حسام:شفما ؟
محمد:مفما شي
نزل و خلانا وحدنا...تلفت عندي بالوقت...كبس على يدي اكثر...و وخر بيا لتالي...حصرني مع الحيط...و نزل عليا شوية يحكي
حسام:اغزرلي هوني...رد بالك تلعب دور الضحية...أنا و إنتي...نعرفو بالقدا لي قاعد يصير...على هذاكا باش تلتزم حدودك في دار هاذي...و مع كل حد عايش فيها
أنا:شنوة لي تحاول تعملو أنت...في رايك باش نخاف من تهديدك هذا...مسكين والله...انت لي باش تفهم كلامي...انو مهما عملت...و مهما صار...مستحيل ترا دموعي و لا تهدني...على هذاكا وفر على روحك عزيزي
تبسم ندرا كيف...يحاول يستفزني...قرب مني أكثر يحكي
حسام:باهي...خلينا نشوفو قداش باش تبقى قوية يا روحي
أنا:لدرجة متنجمش أنت تتوقعها
نزل عليا اكثر...باسني من راسي...جبدت روحي بالوقت تبسم يحكي
حسام:باهي مرتي العزيزة
رجعت تبسمتلو بنفس طريقتو...و جبدت يدي منو نحكي
انا:الجماعة يستناو فينا
خليتو و نزلت قبلو...خلط عليا بالوقت...لقيت محمد قاعد مع خالتي فتحية...تبسمت نحكي
انا:صباح الخير
فتحية:صباح الخير بنتي...وين حسام ؟
قرب مني في لحظة...حاوطني بيدو...و كبس عليا يحكي
حسام:هوني...صباح الخير فتحية
فتحية:وين مشيت الصباح
حسام:نسيت تليفوني في الكرهبة...ما عندي وين نمشي و نخلي مرتي
باسني من راسي بالوقت...كبست على يدي...نهدي في روحي...تبسمتلنا تحكي
فتحية:هيا الفطور باش يبرد
جبدت روحي منو...قعدت...قعد قدامي...بقيت نغزر لصحن...معينيش باش ناكول شي توا...طلعت راسي غزرت لمحمد...جات عيني في عينو...غزرلي ندرا كيف متأكدة لي حس بالتوتر لي بينا...فقت من سرحتي على صوتها...تحكي
فتحية:مريم بنتي
انا:مممم
فتحية:كان معجبكش...تو نقول لنعيمة تحطلك حاجة اخرى
انا:لا لا...عيشك خالتي
تبسمتلي...كبست عالشوكة في يدي و تلفت عندو...يفطر و مش على بالو بشي...ضحكت في سري على روحي للحظة سألت روحي...وين انا و شنوة نعمل هوني...علاه اخترت الثنية هاذي...شبيني فقت توا...غمضت عينيا بقوة...كلام بابا تعاود في وذني ساعتها...تخنقت بالوقت عديت يدي على رقبتي مروهجة...نسمع فيه يحكي
حسام:لازمني نمشي توا
فتحية:وين ؟
حسام:لسوسيتي...عندي خدمة...لازمني نكملها
فتحية:حسام...واعي لروحك ياخي ؟
حسام:حكيت مع مريم...أصلا مانيش باش نطول برشا مش هكا عزيزتي
تبسمتلو بالسيف...و هزيتلو براسي ايه...باسني من خدي هز تيليفونو و مفاتحو...و خرج...خذيت نفس نحكي
انا:باش نخرج للجنينة شوية
فتحية:خليك شوية...لازمنا نحكيو
غزرتلها مستغربة...وقف محمد...غزرلها يحكي
محمد:ياخي حد فيكم ما تعب من التنوفيق هذا
صدقت لي ولدك باش يتصلح...متحاولش تغطي عليه خسارة الطفلة فيه
غزرتلو بالوقت...منعرفش على حسيت انو فما حكاية ورا هذا الكل...رمى من يدو...و خرج هو زادة...بقيت نتبع فيه بعينيا...حطت يدها على يدي تحكي
فتحية:محمد لتوا موجوع من خوه...على هذاكا قاعد يحكي بالطريقة هاذي
هزيتلها براسي ايه...غزرتلي في عينيا...تحكي
فتحية:و توا خبرني...تهنيت معاه ؟
بقيت نغزرلها...تذكرت كلامو وقتها...قلبي دق بالوقت كبست على يدي اكثر تحكي
فتحية:أغزرلي هوني...قتلك و باش نعاودلك احسبني أمك...نحبك تخبرني بكلشي قاعد يصير...و كان صار و حسام غلط معاك...صدقني انا باش نحطلو حد
هزيت يدي حطيتها على يدها...و تبسمت نحكي
انا:تهنى خالتي فتحية...حسام باهي معايا و إلا مكنتش اخترتو و تبعت ثنيتو...تهنى...منحبكش تخمم فينا بعد توا...طول ما انتي معانا...كلشي باش يكون مليح
فتحية:عيش بنتي
قربت منها اكثر...حضنتها...تنهدت بالوقت...يمكن هذا لي كنت نحتاجو من ليلة البارح...جبدت روحي نحكي
انا:شرايك تخرج معايا زادة...الجو باهي اليوم
فتحية:أطلع ألبس حاجة قبل...الجو هذا باش يمرضك
انا:باهي...كيما تحب
بستها من خدها و هزيت روحي...طلعت للبيت...نعمل في الخطوة بالسيف...نحس في بدني مهدود...سكرت الباب ورايا...نغزر للبيت داخلة بعضها من ليلة البارح خذيت نفس...لميتها الكل...و قعدت على طرف السرير منعرفش علاه حاسة للبيت هاذي...باش تكون الحبس متاعي بعد توا...سرحت مرة اخرى لبعيد...في غزرتو اللي اول مرة نراها...طبيعتو لي تبدلت بين يوم و ليلة تذكرت كلام رنيم البارح...يمكن تحقق بعد ساعات برك عندها حق...انا غزرت لفوق برشا...و الطيحة كانت قوية منعرفش شنوة مخبيتلي الدنيا اكثر من هكا...و شنوة باش نخسر اكثر من هكا...بين ليلة نهار...حسيت روحي ضيعت شطر عمري...غزرت للخاتم في يدي...عديت صوابعي عليه...تبسمت كي تذكرت اكا نهار...متأكدة لفما حكاية ورا لي عملو...اما مستحيل نسألو...باش نخليه يكمل لي بداه...خليه ياخو الثنية لي يحب عليه...خاطر مهما كان السبب اللي باش يقولو...و مهما برر عملتو مستحيل بعد توا فما شي إسمو مريم و حسام
أنت تقرأ
زهرة🌸
Acak🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
