زهرة🌸

الحلقة مئة و الثامنة و العشرون

حلقة 128
حسام يحكي:
ركيت الكرهبة و نزلت...نحس في روحي تاعب من ظغط الخدمة...حتى ساعتين لي عديتهم مع عمر في القهوة...محسيتش بيهم...كبست على مفاتحي باش نحل الباب...تحل بالوقت...هزيت راسي نغزرلها...هزيت حاجبي مستغرب...معرفتش على شنوة نركز بالظبط لروبة النوار لي مكبوسة على بدنها...و لا على الروج لي خلى شفايفها تولي مغرية اكثر...دقايق تعدات منجمتش نعمل خطوة أخرى...قصت عليا سرحتي...كي كبست على يدي...تحبني ننزلها شوية...دوب باستني...و جبدت روحها تحكي
مريم:على سلامتك
انا:عيشك عزيزتي
مريم:ايجا معايا
كبست على يدي...دخلتني معاها...سكرت الباب بيدي لاخرى...و خلطت عليها...منظر صالة دخلني بعضي اكثر...الشموع لي مبعثرة في كل بلاصة...خلات الجو هادي اكثر...عديت عينيا عالطاولة...و هزيت حاجبي نحكي
انا:حضرت هذا الكل وحدك
مريم:مممم
انا:معناها باش نخلصو من ماكلة برا
مريم:بربي...هذا لي خممت فيه انت
انا:يعني تو كي نذوق نتأكد
مريم:من بكري نحضر فيه على خاطرك
قربتلها أكثر...بستها من جبينها...و عديت عينيا على وجها نحكي
أنا:صحة حبي...هاك بديت تكبر
مريم:زايد متنفعش معاك رومانسية
أنا:هههههههه والله تنفع...إنتي مجربتنيش بالقدا
مريم:ماكش باش تقعد
نحيت الفاست متاعي...حطيتها على جنب...و جبدتلها الكرسي نحكي
أنا:تفضل عزيزتي
مريم:عيشك يا جنتلماان
بستها من راسها...و قعدت مقابلها...نعدي في عينيا على الماكلة نحكي
انا:كيفاه حضرت هذا الكل وحدك ؟
مريم:من اليوتيوب عزيزي
انا:باهي...خلينا نشوفو قدرات مرتي ملا
مريم:تفضل
تبسمت و كبست عالشوكة في يدي...عينيها لي مركزين معايا...خلاوني شايخ اكثر...اول ما حطيت اللقمة في فمي...غزرتلي تحكي
مريم:شقولك
ضيقت عينيا...و انا نغزرلها...عوجت فمها شوية...تبسمت نحكي
انا:مممم تعدي روحها...معناها بديت تتحسن
مريم:كهو ؟
انا:شبيك تغششت ؟
مريم:شي...من غير ما تاكول ملا
انا:تخليني جيعان ملا
مريم:نطلبو من برا
انا:اما حبيت لي حضرتو انتي
مريم:بالرسمي ؟
انا:بالرسمي يا روحي
تبسيمتها خلات شطر التعب لي نحس فيه...يوفى في لحظة...غزرتلها نحكي
انا:محلاك ليلة
مريم:مممم حاولت نكون فرنسية الليلة...مدام حبي خذالي الدبش هذا من غادي
انا:صحة لحبي
مريم:عيشك يا روحي
انا:فما مفاجأة غيرها ؟
مريم:فما
طلعت حاجبي مستغرب...و عديت عينيا على وجها...نحكي
انا:نحب نعرفها
مريم:مش قبل ما تكمل
انا:ههههههه تدلل
بقيت مستغرب من تحضيرات...متوقعتش تعمل هذا الكل على خاطري...و اولها انها تعلم طيب...وقفت على غفلة...قربت مني...دورت يديها زوز على رقبتي..و نزلت عليا تحكي
مريم:صحة يا روحي
انا:عطيك صحة
مريم:مممم...شبيك شايخ زعمة
انا:من ريحة برفانتي...لي حاطة منها
مريم:صراحة هي تطلع بنينة عليك اكثر
انا:مزلت تاعب من بارح
مريم:زااايد متحشمش
عديت صوابعي على يديها زوز...و كبست عليها في لحظة...جبدتها عندي...قعدتها في حملتي...و عديت عينيا على وجها نحكي
انا:علاش امتى كنت نحشم انا ؟
مريم:حسااام يزززي
كبست على جنبها...و جبدتها عندي اكثر...عديت خشمي على رقبتها...اول مرة تعجبني ريحتي هكا...تبسمت نحكي
انا:تحبني نصبر قدامك هبالك و اغرائك...تي هاك انتي...مرحمتنيش يا روحي
حطت يدها على خدي...غزرتلي ندرا كيف...و نزلت على شفتها تحكي
مريم:حساام...نحب نخبرك بحاجة
انا:لباس ماهو ؟
مريم:لباس...اما اليوم...صارت معايا حاجة
ضيقت عينيا و انا نسمع فيها...منحبش نحط إحتمال أنها تعرضت لحاجة في غيابي...خذيت نفس نحكي
أنا:نسمع فيك
مريم:باهي...وقت كلمتني و أنا برا...ممشيتش لدارنا
انا:شقصدك ؟
مريم:صحيح كنت برا...اما مشيت لبلاصة أخرى
انا:مانيش نفهم عليك مريم...وين مشيت
مريم:ايجا معايا تو تفهم
انا:وين ؟
جبدت روحها مني وقفت...و كبست على يدي...تنهدت بالقاوي...و خلطت عليها...نمشي وراها من غير حتى كلمة...كل درجة نطلعها...ندخل بعضي اكثر...ساقيا رزنت...كي قربت من بيت فرح...جبدت يدي منها..نحكي
انا:علاش جينا هوني
مريم:نحب نحكي معاك هوني
انا:مريم عزيزتي...نحكو في بيتنا أحسن
كبست على يدي...و قربتلي أكثر...حطت يدها لاخرى على خدي...تحكي
مريم:هيا يا روحي...كلشي باش يكون لباس...وعد
هزيتلها براسي ايه...البيت هاذي تذكرني...باكبر غلطة عملتها في حياتي...و اكبر خسارة بالنسبة ليا...فكرة انو بنتي...ماتت جرايري...منجمتش نتعداها...كبست عالبواني و حلت الباب...دخلت وراها من غير حتى كلمة...عديت عينيا على كل تركينة في البيت...و على كل بقعة...كنت نجم نلقى بنتي تلعب فيها...تنهدت بالقاوي...نحكي
انا:مريم...شفما ياخي ؟
مريم:ايجا
كبست على يدي أكثر...قربت معاها لسرير...غزرتلي ندرا كيف تحكي
مريم:حسااام...قبل عامين من توا...البيت هاذي...كانت احلى مفاجأة منك...رغم انو ظروفنا كانت تاعبة...اما حبيت لي عملتو على خاطر بنتنا
انا:عزيزتي...تعرف بالقدا...انو الموضوع هذا يوترني...و منجمش نحكي فيه
مريم:أنت ما عندك حتى ذنب في اللي صااار...نعرف لي فرح...كانت أكبر خسارة لينا زوز...كيما كان درس تعلمنا منو و قربنا لبعضنا اكثر
انا:سااامحني مرريم...و كاان عديت عمري الكل...نطلب في السماح عاللي عملتو فيك و في بنتي...مانيش باش نجم نعوضك
مريم:شكون قال ؟ ساعة انا فرحتي مانيش باش نعطيها لحد...أول حاجة...انت خليتني نعيش كلشي تحرمت منو...و عوضتني بطريقة اخرى على كلشي خسرتو قبل...اما توا بالظبط...انا عندي حاجة ليك
دورت راسها شوية...غزرت لسرير فرح...ضيقت عينيا...و دورت راسي بالوقت...قلبي خض بالقاوي...مديت يدي متردد...هزيت الايكو...نثبت فيه...بلعت ريقي...نحكي
أنا:ش..شنوة هذا ؟
مريم:م..مشيت لطبيبة متاعي...من غير ما نخبرك..خفت تطلع الحكاية غالطة...يعني حتى أنا متوقعتش باش نحبل بالسرعة هاذي
أنا:م..مريم...تحكي بجدك ياخي ؟
مريم:حساام شبيك ياخي ؟
أنا:منعرفش...معناها فما صغير هوني ؟
قربت مني شوية...تغزر للايكو...عوجت فمها...و غزرتلي تحكي
مريم:زوز
انا:زوز ؟
هزتلي براسها إيه...دورت راسي شوية..نغزر لزوز صبابط صغار...واحد في الروز و الآخر في الازرق...عديت صوابعي عليهم من غير حتى كلمة...معناها بالرسمي فما زوز...قربت مني شوية...تحكي
مريم:مظطر باش ترجع شطر البيت في الازرق...و لا حتى تخليها في الابيض...هكا يناسبهم زوز...على خاطر إحساسي يقول لي هوما باش يكونو طفلة و طفل
هزيت راسي غزرتلها...نحاول نستوعب كلامها...مش مصدق لي قاعد يصير معايا...خذيت نفس نحكي
انا:معناها...باش يولي عندنا زوز صغار ؟
قربتلي شوية...حطت يدها على خدي...كبست عليا تحكي
مريم:حسااام...يااا رووحي...أغزرلي...نعرف لأنت داخل بعضك...أما هوكا باش يولي عندنا صغاار...معناها البيت هاذي...ماهيش باش تبقى مسكرة كيما قبل
مديت يدي شوية...حطيتها على كرشها...قلبي خض بالقاوي...لدرجة حسيتو باش يخرج من بقعتو...حطت يدها فوق يدي...تحكي
مريم:صغارك هوما سبب...في هبالي عليك
تبسمت بالوقت...و منها نزلو دموعي...مشاعري كانت مزيج من حزني على بنتي لي خسرتها...و على فرحتي بصغاري...لي متوقعتش باش يجو مع بعضهم...نزلت عليها شوية...دوب بستها من شفايفها نحكي
انا:مريم يا عمري...إنتي أحلى شي صار في حياتي لتوا
كبست على اجنابها بيديا زوز..و نزلت على ركبتي بستها من كرشها...و حطيت راسي عليها...نحب نحس بصغاري اكثر...نحب نسمعهم من توا...إحساسي و  فرحتي مستحيل نعطيها لحد...فكرة إني باش تكون بو مرة أخرى...خلاتني في عالم آخر...يدها لي تغرست في شعري من تالي...خلاتني نحس بطاقة غريبة...كبست عليها اكثر...نحكي
أنا:صغااري...موجودين هوني...و باش يجو على قريب ماهيش حلمة مريم
نزلت عندي بالوقت...دخلت في حضني...و كبست على سوريتي بيديها زوز...تحكي
مريم:مااهيش حلمة حسااام...بعد توا حياتنا باش تكون كاملة
مديت يديا زوز...كبست عليها اكثر...و ترميت لتالي تكيت عالسرير...و خذيت نفس من ريحتها نحكي
أنا:حياتي كاملة بوجودك...صدقني منعرفش نمشي خطوة من غيرك مريم
حطيت يدي على كرشها...كبست عليها...و تنهدت بالقاوي...نحكي
أنا:و لي هوني أحلى هدية منك...و أحلى خبر سمعتو ليلة...سامحني على قبل...سامحني خاطرني جرحتك خاطرني خليتك تعيش أول حبالة ليك كاابوس...خليتك تخاف على بنتك من بوها...صدقني مكنتش في وعيي و مكنتش نعرف لي نعمل فيه...أما رغم هكا...إنتي خليتني نعيش الإحساس هذا...مرة أخرى...مرررسي برشا يا روحي...على كلشي و على كل لحظة...خليتني نعيشها...لتوا
مريم:يكفي أنك تحبني و كهو
أنا:و نموت عليك يا عمري
مريم:حساام
انا:يا رووح حساام
مريم:زعمة صغارنا...باش يكونو طفل و طفلة
أنا:إن شاء الله عزيزتي
مريم:إن شاء الله
انا:ملا نخمو في إسم الأمير الجاي
مريم:و بنتنا ؟
أنا:متحبش تسميها فرح ؟
مريم:لااا...فرح خذات إسمها معاها...و باش يبقى ليها أكيد ماناش باش ننساوها مش هكا
أنا:مستحيل يااا روحي
مريم:باهي...على هذاكا باش نخمو في اسموات جديدة
انا:تدلل يا عمري
مريم:باهي...شقولك...نلمو العيلتين مع بعض...عمر و زهرة زاادة
انا:بااهي...من غدوة نعملو تحضيرات هذوما
مريم:مممم فما حاجة اخرى
انا:اشكي
مريم:ماكش باش تضحك عليا
انا:باهي نسمع فيك
مريم:نحبك تحط من برفانتك مرة أخرى
انا:باش تعاودلي سيناريو البارح
مريم:علاش أنت متحبش ؟
هزيت حاجبي مستغرب...و عديت عينيا على وجها تبسمت على جنب...نحكي
أنا:نحب شنوة عزيزتي ؟
مريم:ميزييتش توا...والله نحس في روحي باش نهبل عليك حسااام...هكا تغشش في صغاارك من توا
أنا:مررريم عزيزتي...مقدر وضعك...و مانيش احسن منك..اما تعرف حبالتك صعيبة...معناها ما تستنى مني حتى شي...قبل ما تشوف طبيبة مرة اخرى
مريم:معنااها هكا سلمت فياا...اصلا الحق عليا..خاطرني قاعدة ناخو و نعطي معاك
أنا:مررريم...هدي روحك عزيزتي...تحب تضر صغارك انتي ؟
مريم:لااا...ماهو باش يصير عليهم شي
حطت راسها عى صدري...بدني تكبس مع دموعها لي نزلت...بعدتلها شعرها...نحكي
انا:علاش دموع هذوما توا ؟
مريم:معناها كي وليت حبلة باش تبعد عليا ؟
أنا:بربي هذا فاش فكرت إنتي ؟
مريم:شنعمل...منحبكش تبعد عليا...حتى أنو الطبيبة ما حذرتني من حتى شي...جيست عطاتني شوية دوا كهو
أنا:شريتو و لا ؟
مريم:ل..لا...ملقيتش وقت
أنا:بربي مررريم...وينها الوصفة
مريم:من غدوة ناخو منو...والله
انا:الصبر يا ربي...هيا قوم معايا توا
مريم:وين ؟
انا:بيتنا...تبدل دبشك و ترتاح
مريم:مننحببش
انا:هيا حبي...تصرفاتك هذوما يخلوني نستغنى على فكرة الصغار
مريم:بربي
انا:اي...هيا قوم
هزيت روحي وقفت...ووقفتها معايا...تو فهمت حالتها بالقدا...و فهمت لي خلاها دازة عالماكلة ورا بعضو تبسمت و انا نتذكر في ليلة البارح...قحرتلي تحكي
مريم:شبيك تضحك ؟
انا:شي حبي
دزتني بيدها و خرجت من البيت...تبسمت على جنب و خلطت عليها...اول ما دخلت...جبدتها من زندها لعندي...و نزلت نحكي في وذنها
انا:فيسع سلمت فيا
مريم:واضح شكون لي سلم فينا
انا:مممم باهي...مدام صغار باش يكونو لباس
مريم:شنوة لي باهي ؟
مديت يدي لاخرى...نزلت الشركة من اول رقبتها...لاخر ظهرها...قربتلها اكثر...عديت صوابعي على اكتافها...و غطست راسي في رقبتها...دوب عضيتها...نحكي
انا:ملا تحب عليا...يا فرخة
مريم:علاش انت متحبش ؟
انا:هههههههه تحب تعرف
كبست عالروبة أكثر...نزلتها شوية شوية...تلفتت عندي بالوقت...كبست على شفايفي بالوقت...عدات يدها على صدري...تحكي
مريم:منحبكش تهتم بالصغار اكثر مني...انا نهتم بيهم
انا:صار يا فرخة
انا:معندكش حل آخر
نزلت عليها شوية...خطفت بوسة من شفايفها...و تبسمت نحكي
انا:لتوا مش مصدق لباش يولي عندنا زوز صغااار...على هذاكا...منحبكش تتعب جملة...حتى كان تحب...نمشو بحذا فتحية...منحبش نخليك وحدك في دار
مريم:اهدا حساام...باش نكون مليحة والله...و زيد دلالك هذا...باش يخليني نرمي الحمل الكل عليك
انا:المهم تكونو بخير يا عمري
مريم:باهي و نجم نرجع للفاك ؟
انا:الموضوع هذا نحكو فيه مبعد
مريم:ماكش باش ترفض...مش هكا ؟
انا:لا عزيزتي...اما منحبكش تتعب...معناها كي توفى العطلة...ترجع اذا كنت مليحة
مريم:باهي
انا:يزززي كهو...منحبكش تغشش روحك توا...عندنا ما اهم يا روحي
عديت يديا على ظهرها...و كملت جبدت الروبة...جات باش تحكي...غطست في شفايفها...اصلا من بكري...الروج لي عليهم خلاني مش قد بعضي...هزيتها في حملتي....و نزلت بيها لنص السرير...غطست فيها كيما كل مرة...اما توا صغاري في الوسط...اكا لي خلاني...ناخو حذري عليها اكثر...اصلا نحس في روحي داخل حلمة...كان حد قالي باش نسمع خبر كيما هذا...مكنتش باش نصدقو...يمكن لي صار ليلة...هي احلى هدية منها...و احلى خبر سمعت بيه...و اهم خطوة باش تخليني نبرا من اكبر جرح في قلبي....و نتعود على خسارة بنتي...لي حملتها مرة وحدة كهو
🌸🌸🌸🌸🌸🌸🌸🌸🌸🌸🌸🌸🌸
سليم يحكي:
حطيت الكاسة من يدي...و تكيت لتالي...نحس في راسي باش يطرشق...اول مرة نحس روحي عاجز...لا حول و لا قوة...معادش نعرف شنوة لي قاعد يصير معايا...منجمتش نحيها من مخي...منجمتش ننسى تفاصيلها...و قد ما حاولت نهرب منها منجمتش...و لي صار آخر فترة تعبني اكثر...خاطرني نعرف بالقدا انو هذا هو الحل الاحسن...رجوعهم لبعضهم حاجة اكيدة...قدام لي تعداو عليه...اما لتوا منسيتش الظروف لي جمعتني بيها...حتى متاكد لي تفكيري غالط...اما اول مرة لقيت روحي في صراع كيما هذا...عديت يدي على وجهي...و سكرت دوسي مراد لآخر مرة...لتوا مش مصدق انو رسم نهايتو بيدو...و يوصل يختارها هي...رغم انها حاجة متوقعة قدام حبو ليها...تبسمت و انا نتذكر في تفاصيل وجها...مع اني موصلتش لدرجة الهوس كيفو...اما خلات فيا حاجة غريبة...لتوا منعرفش عليها شنوة...هزيت راسي شوية على صوت الباب...نحكي
انا:ادخل
فراس:سي سليم...فما شكون يحب يشوفك
انا:مش وقتو فراس
فراس:مدام زهرة هوني...كان تحب نخليها ترجع مبعد
تقعدت في بلاصتي...متوقعتش باش نسمع اسمها...و انا نفكر فيها...خذيت نفس نحكي
انا:خليها تدخل
هزلي براسو ايه و خرج...كبست عالستيلو في يدي...و انا نغزرلها...حاطة بنتها في حملتها...تبسمت تحكي
زهرة:صباح الخير
انا:اهلا بيك
زهرة؛عيشك
انا:تفضل اقعد
كبست على ريحان...و قعدت...خذيت نفس...و قربت منها...قعدت مقابلها...نحكي
انا:شحالك ؟
زهرة:لباس...انت شعامل ؟
انا:على عينك...صغرونة...شنية احوالها ؟
نزلت راسها غزرتلها...باستها من خدها...و عاودت غزرتلي تحكي
زهرة:قاعدة تكبر
انا:صحيح تذكرت...مبروك
زهرة:عيشك سليم
عديت عينيا على وجها...و تبسمت...رغم نحس في روحي مخنوق من الفكرة...اما من شيرة فرحت...لهي نجمت تعاود حياتها و تبدا من جديد...من غير ما تتأثر بالماضي اكثر من هكا...غزرتلي تحكي
زهرة:يمكن جيت في وقت غالط...اما حبيت نحكي معاك في موضوع مهم
انا:تفضل
زهرة:ملقيتش فرصة باش نقابلك بعد اللي صار آخر مرة سليم...حتى ملقيتش فرصة باش نشكرك عاللي عملتو معايا الكل...من اكا ليلة لتوا
انا:نظن مبيناتناش...مش هكا
زهرة:صحيح...اما اللي عملتو انت على خاطري...منعرفش حتى كيفاش نردو...انت عاونتني من غير ما تعرفني...حتى من غيرك كنت باش نضيع اكثر سليم
انا:عملت واجبي
زهرة:يمكن...تمنيت كان تلاقينا في ظروف احسن من هكا...اما صار العكس...و يمكن تأخرت في اني نجي و نشكرك...اما كان مش انت انا
نزلت راسها شوية...تغزر لريحان...لي تلعب بيديها و تغزرلي فرد وقت...غريبة قداش تشبهلها...نسخة منها حتى في تفاصيلها الصغيرة...باستها من خدها...و كملت كلامها تحكي
زهرة:انا مكنتش باش نحضن بنتي...و مكنتش باش نشم ريحتها...ليلتها متوقعتش اني باش نتعدا لي صار معايا...و نجم نقاوم و نعيش...انت كنت المنقذ متاعي في آخر لحظة...و رغم ديما كنت نتهرب من الحديث هذا معاك...اما نظن لحق الوقت...باش نواجه الحقيقة...نقصد اني نتقبل لي صار...باش نجم نشكرك عاللي عملتو معايا
انا:عمر يعرف باللي صار معاك ؟
زهرة:لااا...و مانيش باش نخبرو
انا:شبيك متحبش تكشف حقيقتهم
زهرة:خاطرني خايفة عليه...خايفة يتصدم بحقيقة عيلتو...منحبش نكون سبب في انو يبعد عليهم مرة اخرى انا:اما لي صار عليك...حتى القانون ميسكتش عليه
زهرة:اما انت سكت
انا:محبيتش نعمل حاجة ضد رغبتك
زهرة:و اكا لي خلاني نجي توا...على خاطرك وعيتني على برشا حاجات...و خاصة على مراد ربي يرحمو
انا:تمنيت كان لحقت قبل الوقت...و مخليتكش تعيش هذاما الكل
زهرة:وفااات...حتى متوقعتش انو القانون باش يخليني نخرج قبل 20 سنة
انا:مكنتش باش نسمح يصير هذا الكل
زهرة:نعرف...و عيشك على كلشي عملتو معايا لتوا سليم
انا:من غير مزية
زهرة:يمكن عطلتك على خدمتك...على هذاكا نظن انسحابي يكون احسن توا
انا:لاا بالعكس...و كاان معندكش مانع...نجم نحملها شوية ؟
زهرة:اكييد
هزيت روحي شوية...مدتلي يديها بالوقت...تبسمت و هزيتها في حملتي...تعافر فيا و تضحك فرد وقت...اكا لي خلاني نشيخ عليها و على حلاوتها...غزرتلها نحكي
انا:طلعت نسخة منك
زهرة:هذا لي يقلوه الكل
قربتها ليا اكثر...بستها من خدها...و جبدتها لتالي شوية...حلت عينيها تغزرلي...تبسمت نحكي
انا:ساعة ملقيتش فرصة نتعرف عليك قبل يا صغرونة
حطت يدها على وجهي...و قربتلي اكثر...كبست على شعري بيدها لاخرى...لي خلا امها تقرب مني بالوقت...تفك في يدها...غمضت عينيا على ريحتها لي دخلت لخشمي على غفلة...و من قربها لي متوقعتوش...في اللحظة هاذي...نحب نسيطر على افكاري...و على احساسي ناحيتها...لي قدامي توا مرا معرسة...و كلشي قاعد نخمم فيه غالط...خذيت نفس طويل...و جبدت ريحان من حضني نحكي
انا:يظهرلي الصغرونة...متغشة مني
زهرة:حتى حد ما يسلم منها بنوتي
انا:هههههههه هاني قاعد نشوف
زهرة:تأخرت برشا...حتى جيت من غير ما نخبر عمر...على هذاكا يلزمني نمشي توا
هزيت روحي وقفت...كبست عليها في حملتي...بستها مرة اخرى...و رجعتها لامها نحكي
انا:حبيت زيارتك...و تذكر ديما وقت الحاجة انا موجود
زهرة:نعرف...و اكيد مانيش باش نتردد حضرة المحقق
انا:عيشك مدام زهرة
زهرة:زهرة كهو
انا:زهرة
قربت مني شوية...و مدتلي يدها بالوقت...خذيت نفس و حطيت يدي في يدها...تبسمتلي تحكي
زهرة:معرفة طيبة مرة اخرى سيدي المحقق
هزيتلها براسي ايه و جبدت يدي منها...بقيت نغزرلها...لي خرجت من البيرو...و تسكر الباب في وجهي...دقايق عديتهم واقف...كاني نستوعب في اللي قاعد يصير معايا...قربت من شباك بخطوات رزينة و هزيت ريدو شوية...نغزرلها...تضحك مع بنتها...اليوم بالظبط ريت لمعة جديدة في عينيها...ريتها و هي تضحك من قلبها...عكس قبل...توا بالظبط فهمت شنية خلف عمر وراه...و مكانتو في حياتها...يمكن فرحانة ببنتها...اما بيه اكثر...فرحانة خاطرها بدات تكون في عيلتها من اول و جديد...و لي هي قاعدة تعمل في خطوات جديدة باش تعيش كيما حلمت بالظبط...غمضت عينيا...نتذكر في اول لقاء بيناتنا...و لاول غزرة منها في الكلينيك...من مرا ضعيفة...ريت وحدة قوية...و هي تخرج في اهم راجل في المنطقة...لمرا هادية ليلة الافتتاح...الوقت القصير لي عرفتو فيها...خلاني نعرف تقلباتها الكل...و كل مرة نشوفها في حالة...و توا كانت آخر حالة...فقت من سرحتي على صوت تليفوني ينوقز...عديت عينيا عليها...و جبدت تليفون من مكتوبي...خذيت نفس طويل...و هزيت عليه نحكي
انا:كولونيل
هو:حضرة المحقق سليم
انا:تفضل
هو؛شنية الاخبار ؟
انا:تعرف انو القضاايا هذوما معنديش فيهم...و حتى القضية تسكرت قبل ما تبدا بالنسبة ليا...و منحبش نغطس فيها اكثر...حضرة الكولونيل
هو:سليييم...القضية هاذي...كانت مجرد فترة نقاهة بالنسبة ليك...خاطرك حبيت ترتاح من الخدمة...و مدام مفما حتى شي ورا سي مراد...عندي ليك مهمة اخرى
انا:ايطاليا
هو:على حد علمي معادش تحب تسافر
غزرتلها مرة اخرى...هاذي اول مرة نفشل في قضية...و منعرفش نخرج منها...رغم انو مفما حتى شي كبير وراها...من وقت كنت نلاحق في مراد...لقيت روحي نحمي فيها هي...و نسيت خدمتي من اصلو...ضحكتها...خلاتني نتنهد بالقاوي...نحكي
انا:تونس معادش توسعني
هو:مش كنت تقول منجمش نعيش برا تونس
انا:يمكن لحق الوقت...باش نخلي بلادي مرة اخرى...انا موافق على القضية الجديدة لي تربط بين هوني و ايطاليا...و كان لزم نمشي ليلة...و اول تقارير يكونو عندك بعد جمعة
هو:ايطاليا ترحب بيك
انا:عيشك كولونيل
كبست على تليفوني و نزلتو...عديت عينيا على وجها...لآخر مرة بالنسبة ليا...و نزلت الريدو...كبست على يدي...نرد في نفس...منعرفش شنية احساسي معاها...اما احسن شي نبعد من هوني...و نحيها من مخي جملة...مدامها باش تكون مرتاحة في حياتها...هذاكا الاهم بالنسبة ليا...و ساعة نحب نرجع لخدمتي بقوة...و المرة هاذي...مستحيل نخلي روحي في نفس الموقف...و لا حتى نستسلم لمشاعري مرة اخرى...و فرد وقت...البعد و الوقت...كافي برشا...باش ننسى كلشي ربطني بيها هوني في تونس....و كلشي خلاني نتعلق بتونس مرة اخرى
🌸🌸🌸🌸🌸🌸🌸🌸🌸🌸🌸🌸🌸
زهرة تحكي:
كبست على ريحان اكثر...تقريب نص ساعة تعدات...و مفما حتى طاكسي...قص عليا صوت تليفوني...لي باقي ينوقز...خذيت نفس...و جبدتو...نغزر لعمر و هو يطلب تنهدت بالقاوي...و هزيت عليه نحكي
انا:عمر
عمر:وينك عزيزتي ؟
انا:نستنى في طاكسي
عمر:علاش ؟ مش على أساس باش تمشي لامك ؟
انا:ع..عمر صراحة...حبيت نبدل جو مع ريحان...و تعديت للمركز في ثنيتي
عمر:المرركز ؟
أنا:هدي روحك...انا جيست حبيت نشوف سليم و نحكي معاه
عمر:زهرة عزيزتي...شنية لي قاعد يصير ؟
أنا:ح..حتى شي...نحكيو في الدار احسن
عمر:خليك غااادي...مسافة الطريق و نكون عندك
علق عليا...قبل ما نقول كلمة أخرى...بدني تكبس بالوقت...من نبرة صوتو...وصلني غشو...اصلا هاذي اول مرة يحكي معاها هكا...بعد تعدلت امورنا شوية...نزلت راسي شوية...نغزر لريحان...تبسمت وقت ريت ضحكتها حطت راسها على صدري...تنهدت بالقاوي...نحكي
انا:كلشي باش يكون مليح يا روحي
خذيت نفس...و بعدت شوية على المركز...غفات في حضني...منعرفش علاش جيت لهوني...و لا علاش عملت خطوة هكا...اما حسيت روحي قصرت برشا في حقو...بعد اللي عملو معايا...هزيت راسي على صوت الفران...متوقعتش باش يلحق بسرعة...حل الباب و نزل...فك ريحان من حملتي...حطها في كرسيها من تالي...سكر الباب...و غزرلي يحكي
عمر:اررركب
هزيتلو براسي ايه...خذيت نفس و حليت الباب ركبت خلط عليا...بلا ما يقول حرف آخر...خدم الكرهبة..يسوق عالساكت...غزرتلو نحكي
انا:عممر
كبس عالفولون من غير حتى كلمة...رجعت شعري لتالي...نحكي
أنا:حبيت نشكرو عاللي عملو معايا و كهو
عمر:شنيييية لي عممملو معاااك زهرررة...و كيفاااه تمشي للمركز...من غييير ما تخبرني ؟
أنا:كنت باش نخبرك
عمر:اممممتى ؟ اصلااااا كيفاااه تقاابلو وحدك ؟
انا:مكنتش نعرف لي الحكاية...باش تقلقك هكا
ضرب يدو عالفولون...لي خلاني نتكبس اكثر...قحرلي يحكي
عمر:تقللقني...مداااامك باش تقاااابل أي حد غررريب تقلقني الحكااية
انا:ما عملت حتى شي غالط و كان باش تبقى تصيح عليا...خليني ننزل هوني
شد الفران بالقاوي...و دور راسو غزرلي ندرا كيف يحكي
عمر: صياحي و لا يقلقك توا ؟ معاادش يعجبك ملا ؟
انا:خاطرني ما عملت حتى شي غاالط...انا جيست حبيت نشكرو عاللي عملو معايا
عمر:تفضل قولي شنية لي عملو معاااك
انا:ن..نقصد لي عملو معانااا
عمر:فما حاجة انا منعرفش بيها ؟
هزيتلو براسي لا...عدا يدو على وجهو...و تنهد بالقاوي يحكي
عمر:آخررر مرررة زهررة...آخرر مرة تعمل حاجة بلااا ما تعطيني خبر...و بالاخص سي سلييم...ماااكش باش تقابلو مرة اخرى
جيت باش نحكي...قص عليا صوت ريحان من تالي لي فااقت تبكي...غزرتلو نحكي
انا:ف..فجعتها
عمر:مفهوووم كلاامي
انا:فهمت
مديت يدي...فكيت الحزاام...و هزيت راسي غزرتلو...نحكي
انا:هاني باش نقعد معاها من تالي
حليت الباب و نزلت...من غير ما نستناه يجاوبني..ركبت بحذاها...و هزيتها في حملتي نسكت فيها..خدم الكرهبة عالساكت...قربت ريحان لعندي...نسكت فيها...و نحكي فرد وقت
انا:هاااني يااا روحي...متخاافش
هزيت راسي...قحرتلو...من المرايا...و عاودت قربتها ليا...نحكي
انا:سامحني يا روحي...أما بوك من بكري...يصيح عليا هكا
عمر:و أمك من بكري تعمل لي في راسها
انا:الحق عليااا...على خاطرني حاولت نفهمك
عمر:زهرررة...كان تستنى فيا باش نتنازل...أنساها الحكاااية...من غير شي خليتني على أعصابي
انا:في شنية غلطت...اصلا دوب حكيت معاه و خرجت كلمتك باش نخبرك مهزيتش عليا...حتى الحكاية متستهلش هذا الكل...كان إذا أنت
عمر:انا شنوة ؟
انا:منعرفش...يمكن معادش فما ثقة بيناتنا
شد الفران مرة أخرى...و نزل من الكرهبة...قرب مني حل الباب...يحكي
عمر:حط ريحان و انزل
انا:منحبش
عمر:زهررة قتلك انزززل
طرشقت من البكا على صياحو...كبست عليها في يدي و نزلت...نحكي
انا:شفمااا عممر...شبيك تصييح عليا من بكري ؟ من شنية خااايف أنت...و مدام منجمتش تصدق كلامي ارجع و اسالو...حتى تنجم تطلبو توا
عمر:يزززي كهو
قرب مني...فك ريحان من يدي...باسها...و رجعها لبلاصتها...و عاود تلفتلي يحكي
عمر:هذا لي جا لمخك ؟
انا:هذا لي توقعتو من ردة فعلك و صيااحك
جبدني من زندي...و عدا عينيه على وجهي...انفاسو ضربت في وجهي بالوقت...تنهد بالقاوي يحكي
عمر:أغزرلي هووني...كلشي كووم...و انو حد غيري يغزرلك كووم آخر..افههم كيما تحب زهرة أما متستناش مني نتنازل عاللي صاار...و مهما كان لي عملو سي سليم على خاطرك...يكفي الغزرة...متاعو ليك...و يكفي لي ريتو في عينيه...على هذاااكا هاذي باش تكون آخر مرة...تمشي عندو...من غير علمي...هذا كان مزلت باش تقابلو...مكانش باش تلزني نتصرف من عندي
انا:بااهي...كيما تحب
عمر:مش انا لي نحب...هذا لي  لازم يصير...معنديش استعداد...باش نخسرك و نخسر عيلتي مرة أخرى
جبد يدو مني...ووخر خطوة لتالي...قربت منو شوية خايفة من ردة فعلو...و كلامو...غيرتو من سليم واضحة عاللخر...اما آخر حاجة توقعتها...انو يوصل يحكي عليه هكا...مديت يدي باش نحكي...حل الباب لي بجنبو يحكي
عمر:اركب
انا:نركب بحذا ريحان
عمر:هوكا سكتت...اركب توا
هزيتلو براسي ايه...و ركبت من غير ما نزيد معاه كلمة اخرى...خلط عليا...يسوق عالساكت...منعرفش كيفاه وصلنا لدار...شد الفران يحكي
عمر:اطلع لدار توا
انا:و أنت ؟
عمر:عندي خدمة
انا:بااهي
نزلت و هزيت ريحان معايا...عديت بقية النهار...على أعصابي...نعرف روحي غلطت كي مكلمتوش...اما زادة معندوش حق يتغشش مني هكا...نزلت راسي نغزر لريحان...تلعب عالارض...تنهدت بالقاوي و قعدت بجنبها نلعب معاها...و عيني عالوقت...صوت الباب...خلاني ناقف...من غير ما نحس...هزيت راسي نغزرلو...حط القضية من يدو...قرب مني باسني من جبيني...و نزل هز ريحان في حملتو يحكي
عمر:صغروونتي قااعدة تلعب
كبست على يدي...و قربت منو شوية...خذيت نفس نحكي
أنا:شبيك طولت ؟
عمر:خدمة
انا:لتوا ؟
عمر:مممم
أنا:محبيتش ترجع على خاطري مش هكا ؟
عمر:فاش قام الكلام هذا توا؟
أنا:حتى شي...أنسى
جبدت روحي منو...وخرت لتالي...و خرجت من صالة دخلت للبيت...و سكرت الباب ورايا...مديت يدي نمسح في دموعي..لي نزلو ورا بعضهم...دورت راسي على حلة الباب...خذيت نفس...نحكي
أنا:علاش خليتها وحدها ؟
عمر:قاعدة تلعب
انا:تعشيت ؟
عمر:لا
انا:بااهي هاني باش نحضر الطاولة ملا
شدني من زندي...رجعني لتالي...هزيت راسي نغزرلو مستغربة...مد يدو لأخرى...عدا صوابعو على خدي يحكي
عمر:علاش كنت تبكي ؟
أنا:منعرفش
جبدني عندو أكثر...حط خشمو على شعري...و نزل بيدو لجنبي...يحكي
عمر:منقصدش لي صار بكري
انا:عادي عمر
عمر:مدامك بكيت مااهوش عادي بالنسبة ليا...انا جيست خفت نخسرك مرة أخرى
أنا:معناها ماكش مغشش مني ؟
عمر:مستحيل نتغشش منك...جيست كنت على اعصابي شوية
انا:معاادش تصيح عليا
نزل عليا اكثر...عضني من شفتي...و رجع بيا لتالي...يحكي
عمر:و إنتي معاادش تعمل حاجة من غير علمي
حطيت يدي على صدرو...و قربتلو أكثر...رغم انو ما صار حتى شي بيناتنا لتوا...اما حسيت روحي توحشتو غير العادة...شفايفو لي غرقت في شفايفي...خلاني نكبس عليه أكثر...حتى انا كنت بحاجتو...الفازة متاعو توا...خلات اعصابي تهدا...جبدت روحي شوية...نحكي
انا:م..مكنتش معاها مش هكا ؟
عمر:متقوليش هذا لي كان في بالك من الصباح
انا:مدامك مزلت تخدم معاها اي
عمر:مجنونة...كنت مع حسااام...حتى فما لمة غدوة...و يحبنا نكونو موجودين فيها
انا:نعرف...مريم كلمتني بكري
عمر:بااهي برشا...و شنية عملت في غيابي ؟
انا:حتى شي...عديت الوقت مع ريحان
عمر:متعبتش معاها ؟
انا:ماهيش باش تعبني...اصلا ستانست بيا احسن من قبل
عمر:على خاطر حست بامها...احنا زوز كنا بحاجتك زهرة
انا:حتى انا كنت بحاجتكم
عمر:ششش...علاش الدموع هذوما زادة
عدا صوابعو تحت عينيا...و ضيق عينيه شوية...يحكي
عمر:ساعة معرفتش شكون لازمني نسكت انتي و لا الفرخة لاخرى
ضحكت على كلامو...اصلا...بعد ما شافتو ماهيش باش ترتاح...حتى يهزها و يخليها عندو...تنهد بالقاوي...و كبس على اجنابي اكثر...لصقني فيه...نزل راسو شوية...عدا شفايفو على رقبتي...يحكي
عمر:معاادش نحب نلقاك في الحالة هاذي
انا:و انت معاادش طول علينا
عمر:باش نعوضك على نهار اليوم وعد
انا:تنجم تعوضني توا
هز حاجبو مستغرب...كبست على سوريتو اكثر...و عديت عينيا على وجهو...نحكي
انا:نتفرجو فيلم مع بعضنا
عمر:و الفرخة بنتك ؟
انا:مممم انت ترقدها...و انا نحضر القعدة...اصلا من بكري تلعب...و مرقدتش لتوا
عمر:تدلل يا روحي...اما خليني نشوف شنية حضرت للعشا...نحس في روحي باش نموت من الجوع
انا:لطف عليك...هاني باش نمشي توا
عمر:لحظة
رجعني عندو...جيت باش نحكي...حروفي ضاعت بين شفايفو مرة اخرى...دقات قلبي قوات...و كبسة يديه...رجعتني شهور لتالي...بدني تكبس...خايفة من خيال مراد...لي هد عليا...و لي صار ليلتها تعاود بين عينيا...كي الحلمة...خفت من ردة فعلي...و خفت نجبد بيه...يكره الوضع لاحنا فيه اكثر...ريحان لي بدات تبكي...خلاتو يبعد عليا بالوقت...خذيت نفس بالسيف...و تبسمتلو نحكي
انا:ت..تنجم تشوفها ؟
نزل بصوابعو لشفايفي...لي حسيتهم حرقوني اكثر...و تبسم يحكي
عمر:هاني باش نشوف شبيها
انا:ب..باهي
جبدت روحي منو...و خرجت من البيت...منعرفش كيفاش نجمت نوصل للكوجينة...تكيت بيديا زوز عالرخامة...نحكي مع روحي
انا:لباااس زهررة...كلشي باش يكوون لبااس...ليلة هذيكا مجرد كااابوس...و ماهيش باش تتعاود معاك...هدي رووحك
رجعت شعري بيديا زوز...و خذيت نفس طويل...نعرف لكلشي وفا...و عمر مستحيل يكون كيما مراد...حتى رغم كلشي صار...مزاال صاابر عليا لتوا...و ماهوش مقلق من الحكاية...عديت يديا على رقبتي...نهدي في روحي...تنهدت بالقاوي...و هزيت الصحون...نحضر في الطاولة...تبسمت كي ريتو...دخل و هي في حملتو...اصلا الفرخة...كي تولي عندو...ما تمشي لحد...قربت منهم...و نزلت عليها...بستها من خدها...نحكي
انا:شبيها بنوتي...تبكي ؟
عمر:ضيعت اللعبة لي كانت في يدها
انا:ممممم باهي
عمر:طالعة ليك عزيزتي
انا:شقصدك ؟
عمر:حبي ماك...انتي تبكي بسبب و من غير سبب
انا:بربي عممر
عمر:والله
انا:مش انت لي غششتني ؟
عمر:ساعة نعرف كيفاش نرضيك
ضحكت بالوقت...ساعة دلالو ليا...يخليني نرضى ديما...ريحان عملت جو عالطاولة كي العادة...حضرت البيبرون متاعها و خليتو يرضعها...لميت الطاولة...و حضرت pop_corne طليت عليهم...لقيتو باش يغطيها...باسها من جبينها...و قرب مني...يحكي
عمر:شعرة لا رقدت جرايرها
انا:هههههههه باهي...ايجا
كبست على يدو...و خرجتو معايا...دخلنا لصالة...تبسم يحكي
عمر:امتى حضرت هذا الكل ؟
انا:مممم حضرت...اما...معرفتش نختار الفيلم
عمر:باهي ايجا...تو نختاروه مع بعضنا
انا:باهي
حط الفيلم...بعد ما خليتو يفد و هو يلوج...ترمى بجنبي...يحكي
عمر:ايجا عندي ساعة
قربت منو...حطيت راسي على صدرو...و هزيت ساقيا فوق الفوتاي...غرس يدو في شعري...تركيزي كان مع احساسي قبيل...اكثر من الفيلم...فكرة انو نجم نتعرض لنفس الصدمة خوفتني...و فرد وقت منجمتش نحل الحكاية معاه...و لا حتى نقولو لي صار معايا...منحبش نقص عليه فرحتو...و لا نخليه...يعيش نفس اللي صار آخر مرة...كابوس مراد وفا و ماهوش باش يرجع...ماهوش باش يكون حاجز بيناتنا...و هذا لي باش نحاول نعملو...كبست على صدرو اكثر...و غمضت عينيا...منجمتش نركز مع الفيلم اكثر...اصلا ما صدقت رجع باش نجم نرتاح...و نرقد مرتاحة...بعد اللي تعدا عليا الكل

#سمر💜💜💜