🔸️حلقة 123
🔸️عمر يحكي:
تكيت لتالي نغزرلها...نغزر لتفاصيل وجها...ملامحها لي قد ما بعدت عليا مغابوش على عيني...ضحكتها لريحان خلات دقات قلبي تقوا اكثر...ربي يعلم باللي صار فيا في غيابها...أصلا معادش نجم نستخايل بعدها عليا مرة اخرى...مكنتش نعرف كيفاه باش نعيش من غيرها...و لتوا منعرفش كيفاش نتعامل معاها...فقت من سرحتي على صوت ريحان لي بدات تبكي و هي تغزرلي...تحبني نحملها...هزيت راسي شوية نغزرلها...تنهدت بالقاوي تحكي
زهرة:خليها عندك شوية...نطلع باش نبدل دبشي و نرجع
حطتها في يدي و تلفتت من غير ما تزيد معايا كلمة أخرى و من غير ما تسمعني حتى...فاهم و عاذر تصرفاتها معايا...أما فرد وقت خايف كان تبعد عليا أكثر خايف معادش تنجم تحبني بنفس الطريقة...لي تعدا عليها...خلاني نخاف على مستقبلنا أكثر...و خايف على نفسيتها من أي شي آخر...نعرف مهما كانت القوة لي خرجت بيها...مزالت ضعيفة من داخل...و متعداتش لي صار معاها...نزلت راسي على يد ريحان لي تحطت على خدي...ضحكتلي بالوقت...تفركح بساقيها زوز...بعد المشاكل لي تعدات علينا...محسيتش بيها إمتى بدات تكبر...أصواتها علات و هي تحاول تلعب معايا...قربتها ليا أكثر...نشم في ريحة أمها لي تخلطت بريحتها..بستها من خدها نحكي
أنا:شبي حبي عاملة جو ؟
مدت يديها زوز...شدتني من شعري...ضحكت بالوقت...و جبدتها شوية نحكي
أنا:صغرونتي باش تقعد بحذا عمها لين نرجع
تلفت نغزر لحسام...لي داخل لصالة..هزيت روحي وقفت و قربت منو حطيتها في يدو نحكي
أنا:شد اتلهى بيها...يلزمني نشوف زهرة
حسام:وينها مريم ؟
أنا:ماهيش حاجة تخوف...أصلا لازمك تتعود من توا
حسام:باهي هات عليك
شدها عليا متردد...منعرفش كيفاه باش يتلهى بصغارو نهار آخر...اول ما قربها ليه...حطت فمها على خدو...و تجبد في شعرو...ضحكت بالوقت...خليتو واحل معاها يفك في روحو و يتكرم...و خلطت عليها...هزيت راسي نغزر لمريم...لي نازلة في الدروج...خذيت نفس نحكي
أنا:وينها ؟
مريم:بيت الضيوف
انا:باهي عيشك
خذيت نفس و كملت طلعت...منعرفش كيفاه وصلت للبيت...يدي رزنت عالبواني...خذيت نفس و حليتها هزيت راسي نغزرلها...واقفة بحذا المرايا تغزر لروحها هزت راسها غزرتلي ندرا كيف...خذيت نفس و قربت منها شوية...وقفت وراها بالظبط...نعدي في عينيا عليها من المرايا...نزلت عينيها من وجهي تحكي
زهرة:ع..عمر...علاش جيت هوني ؟
تنهدت بالقاوي...نثبت في انعاكسها من المرايا...و نحكي فرد وقت
أنا:منعرفش زهرة
زهرة:نبدل دبشي و نخلط عليكم
جات باش تمشي..حطيت يدي على زندها...حبستها قبل ما تمد خطوة وحدة...و مديت يدي لأخرى...كبست على زندها الثاني...و قربتلها أكثر...نزلت عليها شوية نحكي في وذنها
أنا:معاادش تتهرب مني...و أهرب لعندي يا زهرة
زهرة:ع..عمر أماانك...تاعبة و نحب نرتاح
أنا:و أنا زادة تاااعب...تاعب من بعدك عليا...من غزرتك من كلامك...تاعب عاللخر...أما منجمش نرتاح و إنتي بعيدة عليا يا رووحي
نزلت راسها مرة أخرى...دموعها لي نزلو...هدوني من داخل...كيما بعدها عليا بالظبط...أول مرة نخاف من مشاعرها ليا...أول مرة نخاف نكون خذلتها بلا ما نحس و ماهيش باش تنجم تسامحني و تغزرلي مرة أخرى خذيت نفس و دورتها عندي...مديت يدي شوية...عديت صوابعي على خدودها...و نزلت عليها شوية...حطيت جبيني على جبينها...أنفاسها لي ضربت في وجهي قواتني...أصلا معاد نحب حتى شي...من غير قربها ليا...من غير صوتها و ضحكتها...نحب نلقى روحي داخلها مرة أخرى...نحب نرجع للوطن متاعي يزي ما تغربت عليه...نحب نوصل لبر الأمان...لي ضيعتو...أما معرفتش منين نبدا...شنوة نعمل و كيفاش نتصرف هزيت يديا لوجها...كبست عليها نحكي
أنا:منحبش نضيع أكثر...منحبش نغرق أكثر يا زهرة معادش عندي قوة أكثر من هكا...بيك إنتي نجم نحارب بيك إنتي نجم ناقف من أول و جديد متخلينيش بعد توا...و متبعدنيش عليك مرة أخرى
حطت يديها زوز...فوق يديا...كبست عليهم و نزلتهم من وجها...فازة خلات دقات قلبي تقوا...و انفاسي تضيق فرد وقت...هزت راسها غزرتلي ندرا كيف...قوتها تمثلت في كبسة يديها...تنفست بعمق...تمنع في رعشة صوتها لي حسيت بيها قبل ما تنطق حرف واحد...غمضت عينيها بالقاوي و عاودت حلتهم...تحكي
زهرة:ششش...يززي كهو...معاادش نحبك تحس بالذنب أكثر...معادش نحبك تتوجع جرايري أكثر من هكا...أنت ما عندك حتى ذنب...أنا جيست بحاجة شوية وقت عمر...مانيش عارفة كيفاش نبدا من جديد...و لا شنوة نعمل بالظبط...على هذاكا معادش نحبك تتعب جرايري اكثر...أنا منستهلش هذا الكل منك
كبست على يديها زوز...و قربتهم لشفايفي...طبعت على كل وحدة منهم بوسة...و غزرت لعينيها نحكي
انا:مانيش باش نطلب منك حتى شي...و مانيش باش نتعبك أكثر من هكا...أما خليني معااك و بجنبك
زهرة:م..ماهوش باش يكون عندك مانع...كان ريحان بقات معايا ؟
أنا:خلينا نرجعو لدارنا مع بعضنا...يزيك ما بعدت عليا لتوا...ريحان بحاجة أمها و بوها مع بعضهم
جبدت يديها زوز مني...رجعت شعرها لتالي...و غزرتلي ندرا كيف تحكي
زهرة:ع..عمر...أنا هوني نرتاح أكثر...عالأقل لين نلقى حل
أنا:شقصدك ؟
زهرة:أنا و أنت...مطلقين عمر...معناها المجتمع باش يرفضني مرة ثانية...و في رايي يزي ما هزيت نظرة خايبة قبل...من عيلتك...و من عيلة حسام زادة...الفترة لي تعدات عليا كنت مسيرة...منجمتش نختار...و معرفتش نختار من أصلو...أما توا...نحب نلقى روحي نحب ناخو قراراتي وحدي...نحب نعرف الصحيح من الغالط...و معادش نحب نخسر أكثر من هكا
بقيت نغزرلها من غير حتى كلمة...نعرف و فاهم الصراع لي داخلها...نعرف فاش قاعدة تخمم و وين هزها مخها بالظبط...يمكن هاذي أكبر غلطة عملتها اني اخترت الإنفصال في سبيل إني نحميها...أما لقيت روحي في دوامة أخرى منجمتش نخرج منها...و منجمتش نصلح لي عملتو...و لي كسرتو داخلها بعملة ماهيش مقصودة و الأهم تماديت معاها بعد طلاقنا...و هاذي ثاني أكبر غلطة...إني منجمتش نصبر عليها...و معملتش حساب لمشاعرها...و لا لتأنيب الضمير لي باش تولي عايشة فيه مبعد...كلامها صحيح...هي ديما كانت مسيرة و مش مخيرة...و مش مراد الوحيد...لي استغل النقطة هاذي حتى أنا بطريقة و لا أخرى...عملت نفس الشي معاها محاولتش نعطيها فرصة...محاولتش نفهمها بالطريقة لي هي تحب توصلهالي...خوفها من إني نبعد عليها و نختار غيرها...خلاها ترضيني بالطريقة لي نحب عليها أنا...و من غير ما تعمل حسابها لصورتها قدام المجتمع يمكن توا بالظبط استوعبت كمية الوجيعة لي داخلها و لي غفلت عليها أنا...و كنت نقول سببها مراد...و في الأخير طلعنا نفس الشي...المهم شكون يربح في الأخير و نسيت هي شنية تحب...و كيفاه تحب تعيش...لهدرجة كنت أناني في حبي ليها ؟ لهدرجة حبيت نربح الحرب و نرجعها لحياتي...من غير ما نعمل حساب للي تحس فيه...حتى شوية...توا بالظبط كلامها خلاني نحل عينيا على برشا حاجات كنت غافل عليها...حاجات منجمتش حتى نعتذر منها...و لا نرد على كلامها لي قالتو...عديت عينيا على وجها...مدت يدها تمسح في دموعها...و ترد في النفس فرد وقت...منعرفش كيفاش رميت يدي جبدتها من زندها...ضربت في صدري...مديت يدي لأخرى حطيتها على ظهرها...كبست عليها في حضني من غير حتى مسافة تفصلنا...الكلام لي كنت باش نقولو لخصتو في تعنيقة...هبطت دمعة من عيني و تغلغلت في وسط شعرها...دقايق تعدات...لا هي تحركت و لا أنا نجمت نبعدها عليا...خذيت نفس طويل و جبدت روحي منها شوية...كبست على يدها نحكي
أنا:إيجا معايا
غزرتلي ندرا كيف...هزيتلها براسي إيه...قربت معايا بخطوات رزينة...قعدتها و قعدت بجنبها...من غير ما نفلت يدها...بعدتلها خصلات شعرها لتالي...نحكي
أنا:مانيش باش نجبرك على حاجة إنتي متحبش تعملها و تذكر لأنا معاك ديما في أي قرار يكون في مصلحتك أما قبل هذا الكل...نحبك تحط في بالك...أنو عمري ما اعتبرتك طليقتي زهرة...و عمري ما صدقت الورقة لي وقعتها...يمكن هذا السبب لي خلاني نتمادى معاك...و منحسبش الخطوة...و مزلت نغلط لتوا...تعرف علاش ؟
كبست على يدها أكثر...و عديت عينيا على وجها...على تفاصيلها لي توحشت نغرق فيهم....تنهدت بالقاوي...و كملت كلامي نحكي
أنا:على خاطر الأيامات لي رفضتني فيهم..معادش لقيت روحي مرة اخرى...معرفتش شنية نعمل و لا وين نمشي و نفس الخوف هذا...خلاني منجمش نخليك تغيب على عيني لحظة...يمكن باش نتسرع في طلبي المرة هاذي أنا نحبك ترجعلي زهرة...نحب نعيش من أول و جديد لتوا نحس في روحي ضايع...حتى ريحان معرفتش نربيها وحدي...و حتى كان غلطت معاك عاقبني و إنتي معايا...يزينا من البعد يا روحي
جبدت يدها مني شوية...دقات قلبي قوات و هدات فرد وقت كي دورت يديها زوز على رقبتي...كبست على ظهرها و لزيتها ليا أكثر...كبسة يدها على شعري من تالي...و أنفاسها لي قوات في رقبتي...خلاوني ناخو نفس...من وسط الخنقة لي مزروعة داخلي...هذا لأنا بحاجتو ديما...بحاجة شحنة ايجابية من عندها في كل مرة باش نجم نكمل حياتي...جبدت روحها شوية تحكي
زهرة:أنت ما غلطت في حتى شي عمر...انت ديما كنت اليد لي تخرجني من الوحل لي غرقت فيه...انا بعدتك عليا...على خاطر كان فما إحتمال معادش باش نشوفك مرة أخرى...و معادش نحبك تتجرح جرايري مرة أخرى و لا تعيش لي عشتو...مدامك أنت مليح أنا باش نكون مليحة يا عمر...أنت قبل ما تحاول ترجعني...فما حاجات لازمك تاخوهم بعين الاعتبار و معادش تتسرع بقرارتك أنت بعملتك باش تتحدا عيلتك مرة أخرى
أنا:و الدنيا الكل كان لزم...المهم انتي باش تكون معايا يا زهرتي
زهرة:عمرر...افهمني أماانك...كان نحس أنو علاقتي بيك باش تخسرك مرة أخرى...مانيش باش نرجعلك
كبست على يدها أكثر...منعرفش علاش حسيت لي فما حكاية أكبر من هكا...لي متأكد منو أنو حتى هي تحبني و تموت عليا زادة...أما فما حلقة مفقودة غابت عليا غزرت لعينيها...لي تحاول تهربهم مني...طلعتلها راسها نحكي
انا:أغزرلي هووني زهرة
هزت عينيها في وجهي...غزرتها ضايعة و هاربة مني فرد وقت...تنهدت بالقاوي نحكي
انا:فما حاجة انا منعرفش بيها ؟
زهرة:لاا...أما أنت أكثر حد تعرف علاقتي بعيلتك
أنا:و من إمتى نخلو شكون يتحكم في علاقتنا احنا و حياتنا...يمكن وقيت باش نخمو في ريحان أكثر من عيلتي
أنا:عمر أنا بحاجة شوية وقت...بحاجة إني نقعد وحدي أكثر...و نلم روحي من أول و جديد...منعرفش من وين نبدا...و لا وين لازمني نمد أول خطوة...حتى بنتي منجمش نهزها في يدي...خايفة منها تنفرني أكثر منحبش ندخل في دوامة جديدة...منحبش نعيش تحت الظغط...و لا بين إحتمالات...أنك في نهار من نهارات تظطر باش تختار عيلتك عليا...و لا حتى تحت هاجس إني باش نخسرك...أنا بحاجتك عمر...اما منعرفش شنعمل بالظبط...خليك معايا و كهو
قربتلي أكثر...حطت راسها على صدري...تنهدت بالقاوي و غرست يدي في شعرها...منحبش نجبرها على حاجة و لا نشوش تفكيرها اكثر من هكا...نعرف لي تعدات بيه مش ساهل..و قعدتها الأيامات هذوما الكل وحدها أثرت على نفسيتها..فرد وقت حاجة غايبة عليا...أما منجمتش نستجوبها اكثر...اهم شي عندي توا...انها ترتاح...و نفسيتها ترتاح شوية...منحبش نتعبها اكثر...و مانيش باش نخليها زادة...يكفي انها رجعتلي و بين يديا...بقية الامور تو نحلها بطريقتي...و من غير نتعبها اكثر...هزيت راسي على صوت الباب لي تحل...نغزر لأمي فتحية جبدت روحها مني شوية...غزرتلنا تحكي
فتحية:سامحوني...مكنتش نعرف لأنت هوني
أنا:نعقد في مؤتمر الصلح يا فتحية
فتحية:هاني نعرفك قدها...و متضيعش الوقت
أنا:تعرفني منجمش نعيش من غيرها
زهرة:ع..عمر يززي
فتحية:هيا قومو للعشا توا...الجماعة تستنى فيكم
انا:باهي أمي
أول ما خرجت...جبدتها من عندي شوية...عديت عينيا على وجها...نحكي
أنا:لباس توا يا روحي ؟
هزتلي براسها ايه...قصيت رعشة شفايفها...ببوسة خفيفة...و من غير ما نتعدا حدودي اكثر...تبسمت نحكي
أنا:هيا معايا توا
زهرة:نبدل دبشي ساعة
أنا:تبدلو مبعد...و زادة ريحان توحشت امها كيما بوها بالظبط
تفرهدت شوية كي ريت تبسيمتها لي ترسمت على وجها خذيت نفس و هزيت روحي وقفت...مديتلها يدي كبست عليا و وقفت...قربتلها شوية...بستها من جبينها نحكي
أنا:بعد توا كلشي باش يكون مليح...و باش تعيش لي تحرمت منو...و باش تكون أحسن أم زادة...و أنا أكثر حد محظوظ بيك إنتي
هزتلي براسها ايه...تبسيمتها وساعت أكثر...كبست على يدها...و قربتها ليا بستها منها نحكي
انا:هيا إيجا معايا توا
زهرة:باهي
غمضت عينيا بالقاوي...و عاودت حليتهم...رغم انو أمورنا لتوا معقدة...اما مرتاح بقربها و وجودها بجنبي نزلنا بحذا الجماعة...لي عاملين جو اللوطة...جبدت روحها مني و قربت لحسام...لي مزال يفك في روحو من ريحان...تبسمت بالوقت...غلباتو الفرخة و مرمدت بحالتو...ضيقت عينيا على صوت تليفوني...استغربت و انا نغزر لرقم ملك...منعرفش علاش تطلب فيا توا بالظبط...علقت عليها و سكرت تليفون...حضورها كان واضح في الأيامات لي تعدات...كمحاولة منها باش تساندني...أما نظن لحق الوقت باش ننهي علاقتي مع سي يعقوب...و كلشي يخص الخدمة...نحب نرجع لحياتي القديمة...نحب نعيش مع مرتي و بنتي...من غير حتى ظغط و من غير ما نخلي حتى جزء من الماضي يأثر علينا...هزيت راسي على صوت ريحان لي بدات تبكي أول ما شافتني...قربت منها شوية...و نزلت عليها شوية...من غير ما نهزها من عند زهرة...منحبهاش تبعد عليها أكثر....تبسمت نحكي
أنا:شبيك ؟ شكون حقرلي بنتي ؟
حسام:و الله سامحنا سي عمر...أما بنتك تقد روحها من توا
أنا:ملا بنت بوها هي...مش هكا يا روحي
حطت يديها زوز على وجهي...تضحك بالصوت...و تحب تجي عندي...غزرت لزهرة...لي مركزة معاها...و تبسمت بالوقت...كمية الشبه واضحة بيناتهم...جبدت يديها مني و غزرت لامها...مستغربة...دور في راسها بيناتنا...و تضحك...شدتها من شعرها...لين توجعت...فكيتلها يدها نحكي
أنا:ششش...ديما متضيعش الفرصة يا فرخة
حاولت نهزها...تخبات في حضنها...ضحكت بالوقت متوقعتش الفازة منها...غزرتلي تحكي
زهرة:خليها عندي
أنا:باهي يا روحي...إيجا تقعد
جبدتلها الكرسي قعدت...ترميت بجنبها...منجمتش نركز مع حديث الجماعة...تركيزي الكل كان معاها...مع تفاصيل وجها...مع ضحكاتها مع ريحان...حتى هي بدات تستانس بيها...و عاملة جو...يمكن هاذي احسن حاجة باش نفسيتها ترتاح شوية...هو تقبل ريحان لامها...تعدا الوقت فيسع...كبست عليها في يدها تحكي
زهرة:مريم...ميسالش تقولي وين دبشها...نحب نرضعها و نبدللها زادة
مريم:إيجا معايا عزيزتي
غزرتلي...هزيتلها براسي إيه...بقيت نتبع فيها بعينيا لين طلعت...تنهدت بالقاوي و تلفت لحسام نحكي
انا:شنوة أحوال الخدمة ؟
حسام:المشروع القديم...قريب يوفى...و حتى أنو تصميمك ليه...خلى برشا يطلبك من عندنا
انا:باهي برشا...اما قبل هذا الكل...شنية عملت في موضوع عرسك
حسام:اهم شي توا انت و زهرة...و الباقي لاحقين عليه
انا:يزي ما عطلت لتوا...في رايي آخر الاسبوع مناسب برشا...عرسك باش يبدل الجو شوية...مش هكا فتحية
فتحية:انا لي يهمني...اني نشوفكم مرتاحين و كهو
انا:و حتى بعد عرسك نعملو خطبة رسمية للفرخ الصغير...خلي يرتاح شوية
حسام:هههههههه اصلا ماهوش يستنى فينا...كان نغفل عليه شوية...يعرس و يدخل علينا بصغير
فتحية:حتى هو طلع نسخة منك
انا:خليني ننسحب انا قبل ما يوصل القصف متاعك ليا
فتحية:وين ماشي انت ؟
انا:باش نعدي ليلة هوني فتحية
فتحية:تعرف لي قاعد تخمم فيه ميجيش
انا:مانيش باش نتعدا حدودي متخافش...و اكيد باش نعاود نكتب صداقي في اقرب فرصة...اما توا بالظبط...نحب نبقى بجنبهم
فتحية:باهي عمر ولدي...ربي يهدي سركم
انا:امين امي...هاني باش نعتذر منكم...تصبحو على خير
حسام: و انت بخير
هزيت روحي و خلطت عليها...دقيت عالباب و دخلت غزرت لمريم لي وقفت تحكي
مريم:انا نستأذن منكم...تصبحو على خير
انا:و انتي بخير مريم
اول ما خرجت قربت منها...قعدت عالسرير بجنبها...نغزر لريحان...لي مطلعة ساقيها و عاملة جو...تبسمت نحكي
انا:كيفاش تحس في روحك توا ؟
زهرة:لباس...مدامها معادش تبكي كيما بكري
انا:على خاطرها حست بيك يا روحي
زهرة:باش تستانس بيا مش هكا
انا:اكيد يا عمري
زهرة:خليها تعدي ليلة معايا ملا
انا:والله نحبك تعذرني عزيزتي...على خاطر حتى انا باش نعدي ليلة معاك
زهرة:عممر...شنية باش يقولو الجماعة توا
انا:متخافش...هوكا فتحية توصي فيا من بكري
زهرة:باهي
هزت روحها شوية...حطت دبش ريحان على جنب...و تمدت بجنبها...تلعب فيها...و تحكي فرد وقت
زهرة:امتى بدات تقعد وحدها ؟
انا:من اسبوع تقريبا...اما لتوا متشدش روحها بالقدا
زهرة:يظهرلي ضيعت برشا لحظات مع بنتي
انا:و احنا استفقدناك في كل لحظة
تبسمتلي و حطت راسها جنب ريحان...ترقد فيها...بقيت نغزرلها لين غفات...نزلت راسي نغزر لريحان...لي تلفتت عندي...نعرفها مترقدش لين ترقد الكل...تبسمت نحكي
انا:فرحانة صغرونتي ؟
قربتلي أكثر...دخلت في حضني...تحب تلعب معايا تكيت لتالي...و حطيتها فوق صدري...باقي تفركح...لين هدات و رقدت فوقي...هزيت الغطا فوقنا شوية...و مديت يدي لاخرى لزهرة...نبعد في خصلات شعرها سارح في تفاصيل وجها...توا بالظبط منحب حتى حد يقص عليا سرحتي...و لا خلوتي معاهم...كان فما حاجة اسمها الامان...هاني نحس بيها توا...بقربهم ليا...و بوجودهم معايا...و مهما كانت الظروف لي مزالت تعرضنا...هي باش تكون ليا أنا و كهو.
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
