زهرة🌸

الحلقة مئة و واحد

🔸️حلقة 101
🔸️مصطفى_يحكي:
شديت الفران بالقاوي و نزلت...دنيا ظلامت و المطر غطات الارض...قربت بخطوة ووقفت قدام دارهم بالظبط...دقيقتين تعداو...خلاو الماضي يتعاود قدامي صغري مع علاء...ضحكنا...هبلتنا...تخطيطاتنا للمستقبل مع بعضنا...حاجاات ضيعتها...بعد ما خسرت صاحبي و عشير عمري...قربت بخطوات رزينة...من غير ما نخمم في شنوة باش يصير الداخل...و لا كيفاه نقنع عم حسن...و لا حتى شنية لازم نقولو...و لا في الموقف متاعي قدامهم...كلشي قاعد نخمم فيه...انو الطفلة لي موجودة هوني...هي متاعي انا و كهو...خذيت نفس طويل...و مديت يدي...دقيت مرتين ورا بعضهم...و هزيت راسي نغزر لامها لي حطت الفولار على راسها و حلتلي الباب...غزرتلي مصدومة تحكي
كلثوم:مصطفى ؟
انا:اهلا خالتي...عم حسن هوني ؟
هزتلي براسها لا...استغربت من كمية الصدمة لي ريتها في وجها...ضيقت عينيا نحكي
انا:لباس ماهو...صارت حاجة خالتي كلثوم ؟
كلثوم:امشي من هوني عيش ولدي...امشي و معادش ترجع جملة
جات باش تسكر الباب...شديتها بيدي...من غير ما نخمم مرتين...و قربت خطوة نحكي
انا:آسيااا وينها ؟
كلثوم:امشي من هوني مصطفى امااانك
انا:مش قبل ما نشوفها و نحكي معاها...اصلا جيت لهوني على خاطرها...جيت باش نطلبها من عند عم حسن
حلت الباب شوية...و هزت راسها غزرتلي ندرا كيف...تحكي
كلثوم:يااا ريتك جيت قبل توا
انا؛ش..شنية لي صار ؟
كلثوم:حسن مد كلمتو فيها للبروف متاعها...و انت اكثر حد تعرف لهو مستحيل يرجع في كلمتو على قطع رقبتو
ان:كيفاااش يعمل هكا من غير موااافقتها ؟
كلثوم:سمع كلامها مع هند صباح...و عرف لهي تحبك...و انت تعرف بالقدا بعد موت علاء شنية صار فيه
انا:موت علاااء كااان حاادث...حتى هو كان خويا و عشيري...اما معندوش حق باش يلومني عاللي صار...و يحقد علينا عيلة كاملة
عديت يدي على وجهي...و خذيت نفس نهدي في روحي...عاودت غزرتلها نحكي
انا:مجيتش باش نحكي عالماضي...انا نحب نطمن على آسيا...بعدها نستناه و نحل الموضوع معاه
كلثوم:يزززي عيش ولدي...عالمعدل هذا باش يقتلها
انا:شقصدك ؟
نزلت راسها بالوقت...فهمت و استوعبت لهو هز يدو عليها و ضربها...خذيت نفس نحكي
انا:خالتي كلثوم...خليني نشوفها اماانك
كلثوم:باهي...تفضل قبل ما يخرجو من الجامع
هزيتلها براسي ايه...و دخلت وراها...تعدات سنين طويلة من اخر مرة دخلت فيها لهوني...مدت يدها شاورتلي لبيتها...تقويت على روحي و قربت منها...شهر او اكثر تعدا على آخر مرة ريتها...و بعد آخر عركة و الكلام لي قلتو...منعرفش كيفاش باش نواجها متوقعتش لي الامور توصل لهوني...و انو بالرسمي بوها ينجم يعرسلها...بالبساطة هاذي...كبست عالبواني لقيت الباب مسكر...ضيقت عينيا مستغرب و انا نغزر للمفتاح متوقعتش باش يوصل يسكر عليها الباب من برا...تلفت لامها لواقفة بحذا شباك...حتى هي حليلتها مع راجل لي عرست بيه...دورت المفتاح...وكبست عالكوبة...و حليت الباب...هزيت راسي نغزرلها...قاعدة في وسط السرير...و غارسة راسها بين ساقيها...اول ما حست بصوت الباب تلكمت على روحها أكثر...المنظر لي خلى قلبي يعصر عليا...سكرت الباب و قربت منها...قعدت بجنبها...و مديت يدي بالسيف...حطيتها على شعرها...نحكي
انا:آسيا
هزت راسها شوية...شوية...دوب تغزرلي...و انا من الصدمة لي كليتها بعد ما ريت وجها...ما نجمت نقول حتى حرف بعدها...شطر الوقت ضاع و انا نغزرلها
شعرة و قلبي يسكت من اللي نشوف و نحس فيه مديت يدي بالسيف...عديتها على عينيها لي تغمضت من قوة الضربة...على شفايفها لي مفلوقين...على البقع الزرقا لي توزعت على وجها...قد ما توقعت انو يوصل يضرها...متوقعتش انو يعمل فيها هكا...لدرجة معادش تبان ملامح وجها جملة...و زيد يمد فيها الكلمة من غير ما ياخو موافقتها...دمعتها لي نزلت من عينيها لي دوب محلولين...خلاتني نجبدها عندي بالوقت...حضنتها من غير ما نسألها...كبست يديها على اجنابي...وصلتلي قداش كانت بحاجتي...و شنية تعدا على راسها في الوقت لأنا لاهي في زبل الدنيا...كبست على راسها من تالي نحكي
انا:سااامحني...سااامحني يااا رووح قلبي...سااامحني
جبدت روحي شوية منها...عاودت غزرتلها...نزلت راسها بالوقت...متحبنيش نغزرلها...خذيت نفس...نمنع في دموعي لباش تنزل على الحالة لي وصلت ليها جرايري و كبست على وجها...نحكي
انا:اغزرلي يا رووحي...اغزرلي هووني
آسيا:م..مصطفى
انا:يا عمري...هاني معاك توا
آسيا:ك..كان باش يقتلني يا مصطفى...كان مش أمي كنت باش نموت بين يديه
انا:مش بعد توا يا روحي...مش بعد توا
آسيا:ش..شنية باش يصير ؟
قربت منها شوية بستها من راسها...و كبست على يديها زوز نحكي
انا:في رايي مش لازم ناخو راي بوك بعد توا
آسيا:ش..شقصدك ؟
انا:باش نمشو من هوني مع بعضنا و توا
آسيا:مستحيل مصطفى...فاش تحكي انت ؟
انا:تحب تبقى هوني ؟ تحبو يزيد يمد يدو عليك ؟
آسيا:بلكشي تو يقتنع بينا
انا:آسيا...بوك مد كلمتو فيك...و انتي تعرف بالقدا لي مستحيل يتراجع...و لا يدور في كلمتو...اما كان انتي مقتنعة براي بوك...وقتها بالرسمي باش تخليني عاجز نعمل اي حاجة
هزتلي براسها لا...و كبست على يدي...بعد لي ريتو توا...مستحيل نخليها ورايا و نمشي...حتى إني مخممتش درجين في اللي باش نعملو...غزرت لعينيها نحكي
انا:تمشي معايا لتونس ؟
آسيا؛ك...كيفاش ؟
انا:جااوبني آسيا...مستعدة تمشي معايا ؟
آسيا:وين باش نمشو مصطفى ؟ كيفاه نقابل حد بالمنظر هذا ؟
انا:انتي جاوبني و كهو...بعد ما نمشو من هوني...تو نرجع نصلح الوضع مع عم محسن...اما اني نخليك بين يديه مستحيل...هيا عزيزتي ؟ انتي وافق و ما تخمم في حتى شي مبعد...نوعدك لي كلشي باش يكون مليح
آسيا:ب..باهي
تبسمتلها نطمن فيها...و غزرت لمنقالتي...نحكي
انا:يمكن عشر دقايق...و يكون هوني...هذا هو الوقت بين الجامع و الدار
آسيا:خايفة عاللخر
انا:هدي روحك...و قولي اوراقك وينهم ؟
آسيا:غديكا في القجر الثاني
هزيت روحي بالزربة...حليت القجر...جبدتهم في يدي و حطيتهم في صاكها لي فوق البيرو...و هزيت كبوطها لي معلق...قربت منها...عاونتها تاقف...حطيتو فوق كتافها دخلت امها بالوقت...غزرتلنا مصدومة تحكي
كلثوم:آسيااا فاش تعمل ياخي ؟
نزلت راسها بالوقت...حتى هي مش في حالة تسمحلها تفسر أي حاجة...قربت من البيرو...هزيت صاك في يدي نحكي
انا:بنتك باش تكون في أمان معايا...خالتي كلثوم...أما كان نخليها ورايا توا...تعرف بالقدا شنية ممكن يصير فيها
كلثوم:آسيا بنتي...جاوبني انتي....مستعدة للخطوة هاذي ؟
اسيا:ا..امي...انا منحبش نعرس بحمزة...و خبرتو بهذا قبل ما يجي لبابا...نعرف لهو عمل هكا بلعاني...افهمني امانك
قربت مني وقفت قدامي بالظبط...و هزت راسها غزرتلي...نفس الغزرة لي غزرتهالي من سنين...نهارات موت علاء...تحكي
كثلوم:قبل سنين من توا...قتلك لي ربي هزلي ولدي...و خلالي ولد آخر في دنيا...و مزلت نعتبرك في مقام علاء ولدي...آسيا امانة في رقبتك...رد بالك عليها...رد بالك تبكيها...مهما كان سبب...رد بالك تجرحها و لا توجعها بكلمة...و اهم حاجة رد بالك تهز يدك عليها...مهما وصلت بيناتكم...اعتبرها امانة علاء عندك...و امانتي انا...نعرف كان نخلي بنتي لمحسن...باش يدمرلها حياتها و ماهوش باش يخليكم تكونو لبعضكم
آسيا:ك..كان يعملك حاجة في غيابي ؟
قربت منها...و حاوطت وجها بيديها زوز...و تبسمت تحكي
كلثوم:يزززيني ما سكت لتوا...يزيني ما خليتو يتحكم في حياتي و حياتك...برا عيش على روحك...و متخممش عليا...ما عندو ما يعملي
آسيا:ا..امي اماانك
حضنتها بالوقت...غمضت عينيا بالقاوي...متوقعتش الامور توصل لهوني...خذيت نفس نحكي
انا:ايجا معانا...خالتي كلثوم
كلثوم:لا...نتوما امشو توا...قبل ما يرجع...و اول ما توصل كلمني...و رد بالك على روحك عزيزتي...و انت مصطفى...حاول تخليها تكمل تعليمها في اي معهد قريب...و ما تحرمها من حتى شي...عيش ولدي
انا:طمن خالتي وعد...هيا توا
بستها من راسها...و تلفت لآسيا عطيتها يدي...شدتني بالوقت...كبست عليها...و خرجتها من البيت...تمد في الخطوة بالسيف...اول ما وصلت للكرهبة...حطيت صاك من تالي...و ركبتها بجمبي...ودعت خالتي كلثوم...و خلطت عليها ركبت بمجمها...كبست عالفيتاس...و طرت بيها...جات عيني عليه من بعيد...على شعرة كان باش يلحقنا...هزيت تليفوني...و كلمت محمود...هز عليا يحكي
محمود:س..سي مصطفى...اهلا بيك
أنا:اسمعني محمود...توا تهز روحك...و تمشي لدار عم محسن...نحبك تطمن على خالتي كلثوم...و كان صار و مد يدو عليها...كلم الحاكم
محمود:شنية لي صاار ؟
انا:مش وقت اسئلتك تصرف فيسع...و اعطيني خبر في أقرب وقت
محمود:باهي طمن
علقت عليه...و حطيت تليفون على جنب...دورت راسي غزرتلها...منزلة راسها من غير حتى كلمة...منعرفش اذا لي عملتو صحيح و لا غالط...اما حالتها هاذي...خلاتني نتصرف من غير وعي...منجمش نرجع منين جيت و نخليها هكا...مستحيل نخليها تواجه كلشي وحدها...اول ما خرجت لطريق...شديت الفران...و تلفت عندها نحكي
انا:ك..كيفاه تحس في روحك ؟
آسيا؛ل..لباس...احسن
انا:باهي استنى لحظة
قربت منها شوية...و مديت يدي...نزلت الكرسي لتالي...و غزرتلها نحكي
انا:هكا ترتاح اكثر...لين نوصلو لاقرب كلينيك
آسيا:م..منحبش نمشي لكلينيك
أنا:باهي ارتاح
حطيت يدي على جبينها...حسيتها باش تتطرشق من السخانة...ضيقت عينيا نحكي
انا:آسيا عزيزتي...شبيك ؟
اسيا؛منعرفش...اما كأنو البرد هوني برشا
انا:باهي اهدا ساعة
نحيت كبوطي و حطيتو فوقها...نزلت عليها شوية...بستها من راسها نحكي
انا:هيا ارقد شوية...و ما تخمم في حتى شي باهي...بعد توا مستحيل نخليها بيك...طمن يا روحي
دوب تبسمتلي و غمضت عينيها...خذيت نفس و شديت الثنية...برغم نحس في بدني مهدود عاللخر...أما معنديش حل آخر...عالاقل نوصل لتونس مع الصباح كل نص ساعة ناقف باش نتأكد من حالتها...و احسن شي تليفون محمود لي طمني انو خالتي كلثوم لباس...خفت تصرالها حاجة جرايري...نهار بدا يطلع علينا...ركيت على جنب...باش نعبي بنزين...تكيت لتالي نغزرلها..متوقعتش باش تتحمل هذا الكل جرايري...و رغم لي صار...خلات كلشي وراها و حطت يدها في يدي...منعرفش شنية مخبيتلنا الأيام الجاية...و اذا كانو باش يتقبلو علاقتنا و لا لا.. اما لي يهمني انو هي باش تكون ليا و معايا...و الباقي...اكيد باش يتحل وحدو...عديت يدي على وجها نتحسس في سخانتها...محبيتش نفيقها و نحيرها معايا...خذيت نفس و نزلت من الكرهبة...عبيت بنزين...و شريت شوية حاجات...و حليب سخون من distributeur ورجعت للكرهبة...لقيتها فاقت...غزرتلي مستغرية تحكي
آسيا:وين مشيت ؟
انا:هاني رجعت عزيزتي...هيا شد هذا
آسيا:شنية ؟
أنا:حليب
آسيا:منحبوش
انا:نعرف لي متحبوش...أما مجبورة تشربو توا...عالاقل باش تنجم تشد روحك لين نوصل...هيا يا روحي
آسيا:باهي
حطيتو في يدها...و حطيت الكيس في حجرها...و خدمت الكرهبة...عديت بقية الثنية ساكت...منحبش نتعبها بأسئلتي...اول ما دخلت لتونس...هزيت تليفوني و كلمت عمر...هز عليا يحكي
عمر:مصطفى...وينك لتواا ياااخي...وين اختفيت من البارح ؟
انا:نحب نشوفك توا ؟
عمر:وينك توا ؟
انا:باش نوصل للفيلا بعد نص ساعة تقريبا...نستناك برا
عمر:لباس ماهو ؟ صارت حاجة
انا:مبعد نحكو
علقت عليه...و دورت الكرهبة...غزرتلي بالوقت تحكي
آسيا:مكانش لازم...تحط روحك في موقف هكا جرايري يا مصطفى
مديت يدي...غرستها في شعرها...و تبسمت نحكي
انا؛شنية قتلك انا...نحي الافكار هذوما من مخك...و ما تخمم في حتى شي باهي
هزتلي براسها ايه...و دورت وجها للبلار...متحبنيش نغزرلها...فهمتها و فهمت تفكيرها...و منجمش نظغط عليها اكثر من هكا...اول ما وصلت...شديت الفران...و غزرتلها نحكي
انا:استناني هوني...تو نرجع
آسيا:ب..باهي
كبست على يدها...بستها من يدها...و هزيت روحي نزلت من الكرهبة...لقيت عمر يستنى فيا بالوقت...قربلي يحكي
عمر؛مصطفى...شفما يااخي ؟
انا:ع..عمر انا
هز راسو شوية...غزر للكرهبة...و عاود غزرلي مصدوم يحكي
عمر:آسيااا ؟
انا:عمر
عمر:شتعمل معااك الطفلة ؟
انا:خطفتها
عمر:شنووووة ؟
انا:امها عندها علم باللي صار
عمر:واااعي للكلااام لي تقووول فيه ؟ ياااخي نورمال انت ؟
انا:مكاانش عندي حل آخر...كان ريت حالتها...اكيد باش تعذرني...و اسمعني عمر...مانيش مستعد نخسرها جملة...مهما كان رايك و لا راي اي حد فيكم...انا مانيش باش نسلم فيها...مهما صار...و مدامني جيتك توا...على خاطر منجمش ندخلها للفيلا و هي في الحالة هاذي
عمر:شبيها ؟
انا:بوها ضربها بطريقة خايبة...لدرجة ملامح وجها معادش باينة
عمر:شنننوة...شبيك مهزيتهاش للكلينيك لتوا ؟
انا:متحبش...و منجمش نجبرها على حتى شي
جبد مفاتحو بالوقت...و حط واحد منهم في يدي يحكي
عمر:شد هذوما توا
انا:شنية هذا ؟
عمر:تو نبعثلك الموقع في تليفون...تمشي لدار هاذي...و تبقاو فيها يامات...و تو نخلي طبيب يخلط عليكم
انا:يعني
عمر:هيا توا...بعدها نحلو الموضوع هذا مع بعضنا...اما اول شي نحبك توعدني بحاجة
انا:شنوة ؟
عمر:رد بالك تمس الطفلة...قبل ما يكون بينكم حاجة رسمية...و قبل ما نحلو الموضوع مع دارهم...رغم كلشي هي امانة عندك
انا:طمن عمر...مستحيل نعمل حاجة هكا
انا:عيش خويا...هيا امشي توا
كبست عالمفتاح في يدي...ورجعت للكرهبة...ركبت بحذاها نحكي
انا:سااايي تحلت
دوب تبسمتلي...عديت عينيا على وجها...تمنيت كان لقيتها في حالة احسن من هكا...و الامور تعدات احسن زادة...كان جا موضوع آخر...يمكن منتسرعش لهدرجة...اما اني نخليه يعرسلها و عيني تشوف...مستحيل...اول ما وصلني الموقع من عندو دورت الكرهبة و شديت ثنية...محسيتش كيفاه وصلنا ركيت على جنب...و تلفت عندها نحكي
انا:هيا عزيزتي
آسيا:وين احنا ؟
انا:بلاصة ترتاح فيها اكثر
هزتلي براسها ايه...خذيت نفس و نزلت...مشيت من جيهتها...حليت الباب...و عطيتها يدي...كبست عليا و هزت روحها...نزلت بالسيف...عرفتها موجوعة...اول ما دخلنا...قعدتها عالفوتاي...و مشيت نفركس عالكوجينة عبيت كاسة ما ورجعتلها...قعدت بجمبها نحكي
انا:باش نبقاو هوني ايامات
آسيا:ت..تبقى معايا انت ؟
انا:اكيد يا روحي...اول ما يطمن عليك الطبيب...نحبك ترتاح و ما تخمم في حتى شي...بعدها ربي يعمل دليل
آسيا:مصطفى
انا:يا عمري
آسيا:أمي لباس ؟
انا:لباس عزيزتي...كان تحب طمن عليها بنفسك
آسيا:عيشك خاطرك جيت عندي
قربت مني بالوقت...تكات عليا...عديت يدي على شعرها نحكي
انا:حتى حد ما عندو الحق يبعدني عليك...و نحبك تسامحني عاللي قلتو ليلتها...مكنتش في وعيي
آسيا:ميسالش
كبست عليها اكثر...من غير حتى كلمة اخرى...جبدت روحي منها كي سمعت صوت الباب...غزرتلها نحكي
انا:لحظة تو نرجع
هزتلي براسها ايه...بستها من خدها و قمت حليت الباب...من شكلو عرفتو الطبيب...وخرت لتالي شوية نحكي
انا:تفضل
دخلت وراه...و مديت يدي شاورتلو ليها...قرب منها قعد بجمبها...غزرتلها نطمن فيها...بقيت واقف على جنب...و خليتو يعدي عليها...من غير ما نقول حرف...هزيت راسي على صوتو يحكي
هو:باش نعطيك زريقة توا...ترتاح عليها باهي ؟
قربت منها بالوقت...قعدت بجمبها...و غزرتلها نحكي
انا:هيا عزيزتي...هاني معاك...متخافش
هزيتلو براسي باش يكمل خدمتو...اول ما زرقلها..كتبلها دواها...خلطت عليه للباب...غزرلي يحكي
هو:الاعتداء الجسدي واضح عليها...حالتها تاعبة برشا و نفسيتها اكثر...في رايي هزها للكلينيك و طمن لي معندهاش ضربات اخرى في بدنها...و الدوا لي وصفتهولها...باش يخليها ترتاح شوية
انا:باهي عيشك
رجعت بجنبها...و مديت يدي عديت صوابعي على خدها نحكي
انا:آسيا عزيزتي
آسيا:مممم
انا:هيا معايا توا
كبست على يدها...و وقفتها معايا...حسيت بيها دايخة و مش قد بعضها...كبست عليها اكثر...و هزيتها في حملتي حطت راسها على صدري مروهجة...طلعت الدروج لي معارضني...من غير ما نخمم...و دخلت لاول بيت جات على عيني...حطيتها عالسرير...و نحيتلها البوت متاعها و كبوطها...غطيتها بالقدا نحكي
انا:خليك هوني لين نرجع باهي
دوب رجعتلي و غطست في نوم...عرفتها مخدرة من الزريقة متاع قبيل...خذيت نفس و خرجت من عندها لأقرب فرماسي...شريت الدوا لي في الوصفة...و كلمت هند...هزت عليا بالوقت تحكي
هند:مصطفى...لباس ماهو ؟ تحيرت عليك...وينك توا ؟
انا:هدي روحك ساعة
هند:باهي نسمع فيك
انا:باهي...وينك توا ؟
هند:في دار
انا:باهي برشا...نحبك تحضرلي دبشي و شوية دبش من عندك
هند:علااش ؟
انا:اعمل لي قتلك عليه عيش اختي...ا٦نتي تعرف آسيا شنية تحتاج بالظبط...قابلني برا و من غير ما يعرف حد
هند:باهي باهي
كملت قضيات لي تخص الدار...و مشيت لهند...اول ما وصلت لقيتها تستنى فيا...شديت عليها الكابة متاعها و متاعي...غزرتلي مستغربة تحكي
هند:كيفاش جات معاك لهوني ؟ و وين قاعدين توا ؟
انا:باش نحكيلك كلشي مع الوقت باهي
هند:نحب نشوفها
انا:مش اليوم
هن:أما
انا:هند عزيزتي من غير ما تكبش فيا...صحبتك لباس...و على قريب نهزك ليها باهي...و حتى أني باش نخليك تكلمها مبعد
هند:باهي
انا:و رد بالك يعرف بالحكاية غيرك انتي و عمر
هند:عمر يعرف ؟
انا:مممم
هند:باهي برشا ملا
بستها من راسها و رجعت للكرهبة...شديت ثنية الدار مرة اخرى...لدرجة منعرفش كيفاه وصلت..دخلت كلشي هزيت الدوا و الدبش في يدي و طلعت عندها...ضيقت عينيا كي ملقيتهاش في بلاصتها...حطيتهم من يدي...و تلفت لبيت البانو...الباب محلول شوية...قربت شوية شوية...و دقيت عليه نحكي
انا:آسيااا...لباس عزيزتي ؟
استغربت كي مردتليش...كملت حليتها و دخلت...نغزرلها...مهبطة الغطا متاع تواليت و قاعدة عليه...قربت منها...و نزلت بجمبها نحكي
انا:شتعمل هوني ؟
دوب غزرتلي..و عاودت نزلت راسها...مدت يدها بالسيف مسحت دمعتها تحكي
آسيا:نحب نقعد وحدي مصطفى
انا:اغزرلي و انتي تحكي
آسيا:منحبش
خذيت نفس و هزيتلها راسها شوية...حاولت دور وجها متحبنيش نغزرلها...كبست عليها نحكي
انا:مفما حتى شي تحشم منو
آسيا:منحبكش تشفقوعلى حالتي...اصلا ريت وجهي كيفاه...من غير ما تغزرلي امانك
انا:آسيا...ايامات و تولي احسن من قبل...خليك قوية عزيزتي
آسيا:و كان ميرجعش...كان يبقى وجهي هكا...باش تبقى تغزرلي ؟ باش تبقى تحبني ياخي ؟
انا:هذا حد عقلك...اسمعني يا عمري...انتي باش تكون لباس...هذا وعد مني...من غدوة باش نقيدك في المعهد مع هند...على هذاكا نحبك تتحسن فيسع باش تدخل معاها
آسيا:بالحق ؟
انا:مممم فما حاجة اخرى
آسيا:شنية ؟
انا:ايمات اخرى و نكتبو صداقنا
آسيا:مصطفى
انا:مستحيل نخلي حد يحكي عليك...لا في البلاد و لا هوني...هذا احسن حل لينا زوز...حتى بوك مينجمش يهزك مبعد
ترمات عليا بالوقت حضنتني...كبست على ظهرها حسيتها توجعت من كبست يديها على رقبتي...جبدت روحي منها نحكي
أنا:لباس عزيزتي ؟
آسيا:موجوعة شوية
انا:باهي...ايجا معايا لحظة
كبست على يدها...و هزيتها للبيت...حطيت الكابة عالسرير نحكي
انا:وصيت هند على الدبش...نظن هي الوحيدة لي تعرف شنية تلبس
آسيا:في بالها لانا هوني ؟
انا:مممم...هيا بدل دبشك...و ايجا اشرب دواك
هزتها في يدها و دخلت لبيت البانو مرة اخرى...تنهدت بالقاوي...خايف من حالتها تسوء اكثر...بقيت نغزرلها لين خرجت...في بيجامة اخرى...مغطية بدنها الكل...قربت منها...كبست على وجها...و بستها من راسها نحكي
انا:هيا ايجا
قعدتها و قعدت بجمبها على طرف السرير...هزيت الدوا في يدي نحكي
انا:اشرب هذا ساعة
حطيتو في يدها و هزيت كاسة الما من تابل دونوي أول ما كملت تبسمت نحكي
انا:بالشفا يا روحي
آسيا:عيشك
انا:توا تدهن هذا على وجهك
آسيا:باهي
انا:خلي عليك يا روحي
مديت يدي بالسيف...نعدي في المرهم على كل بقعة في وجها بالسياسة...رغم اني حسيتها توجعت...اما كملت لتالي...جبدت يدي منها نحكي
انا:آسيا
آسيا:مممم
انا:قولي عزيزتي...وين ضربك زادة ؟
آسيا:منعرفش...بدني الكل يوجع فيا
انا:إمتى ضربك ؟
آسيا:ليلة لي كلمتك فيها بعد ما رفضت حمزة...و البارح بعد ما كلمت هند و عرف لأنا عندي علاقة بيك...حسيتو هبل و فقد أعصابو...كان مش أمي...كنت باش نموت أكيد
انا:ششش...يززي...معادش نحب نسمع الكلام هذا منك مرة اخرى...انتي توا بأمان...و امك باش تكون مليحة زادة...ريت المرهم هذا...حطو على اي بقعة توجعك...و ارتاح...لين نحضرلك حاجة تاكلها
هزتلي براسها ايه...قربت منها اكثر...بستها من عينها...و نزلت عليها شوية...بستها جنب شفايفها بالظبط...نحكي
أنا:نحبك
آسيا:و انا زادة نحبك مصطفى
تبسمتلها و هزيت روحي خرجت...وقفت بحذا الباب بالظبط...غزرتلها كيفاه هزت مريولها...عينيا وساعات من اللي ريتو...متوقعتش يكون وحش لهدرجة...كبست على يدي باش منرجعش لعندها...خذيت نفس و زوز...و نزلت اللوطة بالزربة...هارب من اللي ريتو و من اللي حسيتو زادة...منحبش نخليها تحس بضعفي و لا حتى تحس اني شفقت عليها...حضرتلها فطورها...و رجعت عندها...حطيتو بجمبها عالفرش...و قعدت مقابلها وكلتها بيدي...فرد وقت باقي نحكي معاها...نخرج فيها من الجو لي هي فيه...اول ما كملت غزرتلي تحكي
آسيا:مصطفى
انا:مممم
آسيا:نجم نطلب منك حاجة
انا:اكيد يا روحي
آسيا:خليك بجمبي...منجمتش نرقد وحدي هوني
هزيتلها براسي ايه...حطيت الصينية عالكوافوز...نحيت صباطي و الفاست متاعي...و طلعت بجمبها...قربتلي بالوقت...حطت راسها على صدري...غرست يدي في شعرها نحكي
انا:كيفاه تحس في روحك ؟
آسيا:تعرف حاجة ؟
انا:شنوة ؟
آسيا:لتوا نحس فيك حلمة مش حقيقة
انا:حتى انا يا روحي...حتى انا مش مصدق لانتي في حضني توا
آسيا:عيلتك زادة باش تكون ضد علاقتنا
انا:اخر همي...ناخو رايهم في علاقتي بيك...صدقني عثمان معادش عندو لا القوة و لا المال...حتى كلمتو معادش تفوت...مستحيل ينجم يفرقنا طمن
آسيا:مكنتش نحب نظغط عليك بالطريقة هاذي مصطفى...والله حكيت معاه و قتلو مش موافقة...اما حسيتو عملها بلعاني و حكى مع بابا...صدقني مكنتش نحب نوصلو لهوني
انا:ششش...انسى كلشي صار توا...الحق عليا...كان لازم نحكي مع بوك قبل ما نمشي...و مخليتش الامور توصل لهوني...و لا نخليه يوصلك للحالة هاذي جملة
آسيا:أنت معندكش ذنب في لي صار مصطفى...و مكنتش نحب نخليك تتمرمد جرايري أما
انا:يزززي عزيزتي...معادش نحبك تلوم روحك...جيست نحبك ترتاح بسرعة...فما برشا حاجات نعملوهم مع بعضنا...باهي
آسيا:باهي يا روحي
نزلت عليها شوية بستها من راسها...و غرست يدي في شعرها نحكي
انا:ارقد توا و ما تخمم في حتى شي باهي ؟
آسيا:باهي
يقيت نعدي في يدي على شعرها...لين غفات مرة اخرى...و غفيت معاها بالوقت...اصلا عديت ليلة البارح الكل فايق...و مصدقتش لنجم نحل الحكاية بالسرعة هاذي...كان مش عمر سهلها علينا بالدار...مستحيل كنت نهزها و نخليهم يشوفوها بالحالة هذيكا...و لا يشفق عليها...يكفيها لي عاشتو اليومين هذوما و لي تعدا على راسها لتوا...نعرف الايامات الجاية باش تكون صعيبة علينا زوز..من جيهة عيلتها و عيلتي زادة....أما مستحيل نخلي اي حد ياخو قرار...يخصها او يخصني...بعد توا...باش نكملو لي بديناها مع بعضنا...خطوة بخطوة لآخر لحظة.