🔸️حلقة 48
🔸️مريم تحكي:
غزرت لساعة و نفخت بالقاوي...محبش يوفا الكور المحنون...حسيت روحي فديت عاللخر...أصلا منعرفش كيفاش عديت شهرين في لفاك هاذي وحدي...معنديش صحاب غير زهرة...و وائل مرة معايا...مرة مع جماعتو لي مصبرني لهي باش تولي غدوة....أصلا مش مصدقة كيفاش نجمت تتعدا لي صار...و لا أنو مراد مات...يمكن أنا برك لي منجمتش نقتنع بفكرة موتو...الأحداث الكل تخلطت على مخي...طلعت راسي نغزر للعباد خارجة هزيت كراستي و صاكي...و خرجت...نسمع في وائل يعيط من بعيد...وقفت نستنى فيه يوصل...قرب مني بالزربة...يحكي
وائل:شبيك مزروبة ؟
أنا:لا جيست كنت باش نتعدا عالمكتبة...و باش ناخو أوراق جديدة
وائل:تحب نوصلك ؟
أنا:لا متعبش روحك...تعرفني منحبش نركب مع حد
وائل:حتى أنا
أنا:حتى أنت وائل...في تالي أنت طفل...و كان وصلت ركبت معاك...خاطر فما ظروف لزتني
وائل:نعرف مريم...من غير ما تظطر تفسرلي...و عالمعدل هذا...باش نمشيو على ساقينا...ماكش باش ترفض زادة
بقيت نغزرلو...ضيق عينيه...هزيتلو براسي إيه و تبسمت نحكي
أنا:أكيد هيا ملا
وائل:لحظة برك...نحط هذوما في الكرهبة
أنا:باهي على راحتك
بقيت نغزرلو و هو ماشي للبركينغ...على تلفيتي...جات عيني في عينو...قاعد في كرهبتو يغزرلنا...قلبي دق بالوقت...أحاسيسي دخلت بعضها...منعرفش شنية لي حسيتو بالظبط...مشى في بالي بعد الوقت لي تعدا اني نسيتو...و لا حاولت ننساه منعرفش...بعد حادثة الليلة هذيكا...معادش ريتو و لا سمعت صوتو...و منجمتش حتى نطلبو...و لا نسأل أي حد عليه...منعرفش شنوة لي صار...و منحبش نعرف...يمكن أحسن شي صار هو بعد عليا...و نجمت نعرف شنوة نحب عليه...و حتى بابا معادش تعاركت معاه جملة...أصلا كلشي نحب عليه توا...إني نكمل قرايتي و كهو...أما توا منعرفش شبيني شي داخلي...يحبني نقرب منو...و نسألو سؤال واحد كهو...علاه قاعد تعمل هكا ؟ فرد وقت مش أنا لي نطيح من روحي...حتى كان خسرت كلشي...فقت من سرحتي على صوت وائل يحكي
وائل:سيبون...تفضل لالة
أنا:آه
وائل:شبيك لباس ماهو ؟
أنا:ل لباس...وقيت باش نمشيو
هزيت يدي رجعت شعري لتالي...نسمع فيه يحكي
وائل:توا فهمت شبيك
أنا:وائل أمان خلينا نمشيو من هوني أمانك
وائل:شنوة لي قاعد يصير بالظبط ؟
أنا:شقصدك ؟
وائل:مريم إنتي تحب راجل هذا ؟
بقيت نغزرلو...منعرفش علاه كنت نستنى في شكون يسألني نفس السؤال...مريم إنتي تحب الراجل هذا ؟ نحب نفهم روحي...و شنوة نحب بالظبط...خذيت نفس بالسيف نحكي
أنا:لا منحبوش...و ما يربطني بيه حتى شي
وائل:تكذب...غزرتك...كلامك...تصرفاتك تقول لإنتي تحبو
أنا:وائل يزززي...من غير ما نحكيو فيه الموضوع هذا توا
وائل:تعرف لإنتي قاعدة تغلط...قاعدة تغرق يا مريم الراجل هذا باش يضيعك معاه...أصلا كيفاش نجمت تحب واحد أكبر منك لهدرجة
أنا:قتلك ما نحب حتى حد...كان جيت نحبو نحكي من غير ما نخاف من حتى حد...و توا تحب تجي معايا...و لا نمشي على روحي
بقى واقف يغزرلي من حتى كلمة..عروق رقبتو مكبوسة عينيه لخضر غماق لونهم أكثر...عدا يدو على وجهو يحكي
وائل:ياخي لتوا مفهمتش إنتي ؟
أنا:نفهم شنية ؟
وائل:ياخي تتبهلل عليا ؟
أنا:وائل شبيك تحكي معايا بالطريقة هاذي...و شنية حكايتك أنت زادة ؟
وائل:أنا نحبك مريم
عينيا وساعو و انا نغزرلو...آخر شي توقعتو...نسمع الكلام هذا من وائل...كبس بيدو على شعرو...تلفت شوية نغزر لحسام لي واقف بيناتنا...عرفتو لحق بكلامو تالي...جيت باش نحكي...قص عليا هو يحكي
حسام:صار ملا الحكاية ولات فيها حب
وائل:و أنت شمدخلك في ¤¤¤¤¤¤ الحكاية
هز يدو ضربو ببونية على وجهو...وخر لتالي مروهج حطيت يديا زوز على فمي...قرب منو...شدو من الفاست متاعو...يحكي
حسام:خمم مرتين قبل ما تاقف في وجهي و تحل فمك متخلينيش نعلمك تحترم لأكبر منك بطريقة أخرى
أنا:سيبو...حسام أبعد عليه
وائل:هاك قلتها سي حسام...و أنت معندكش حق تحب لي أصغر منك...أخطانا و أخرج من حياتنا...ريتها الطفلة هاذي...أنا حاجتي بيها...ماكش مظطر تظهر من شهر لشهر...باش تعمل عركة بعدها تختفي...ساهلة أنك تعمل بطل علينا...أما متنجمش تاخو لي تحب عليه بنفس الطريقة
كبس عليه أكثر...عرفتو معادش ينجم يتحكم في أعصابو...و مش بعيد تكبر الحكاية اكثر...قربت منو حطيت يدي على يدو نحكي
انا:حسام يززززي
حسام:أغزرلي هوني...الكلام لي تقول فيه أكبر منك...و تذكرني بالقدا...أي شي نحب عليه ناخو بالسياسة و لا بالقوة...على هذاكا أبقى بعيد أحسنلك
وائل:شرايك نخليو القرار هذا لمريم...مش هكا مريم
طلعت راسي غزرتلو...مفهمتش قصدو...جبد روحو لتالي و عدا يدو على خشمو...مسح دم لي نزل منو يحكي
وائل:من شوية...كنت تقولي لإنتي متحبوش...و ما يربطك بيه حتى شي...عاود قولو نفس الكلام هذا في وجهو...خليه يفرقنا
دورت راسي شوية جات عيني في عينو...غزرلي ندرا كيف...يستنى فيا نحكي...في لحظة تعدا بين عينيا كلشي عشتو معاه...لآخر ليلة في الكلينيك...و كلامو نهارت العرس و قبل ما يمشي من الكلينيك زادة...كلشي كان أمل كاذب...ضيعتو أول ما بعد عليا...متغشة منو عاللخر.. فرد وقت ما نجم نلومو على حتى شي منجمش نقولو علاه مشيت...علاه بعدت...و علاه رجعت توا...لي عشتو في حياتي...أكبر من كلشي...أكبر من إني نتحمل خسارة أخرى...إيه أنا نحبو...أما منجمش نعترف حتى لروحي...منجمش نغزر لفوق برشا...خاطر الطيحة باش تكون قوية برشا..هذا لي كان يقولو بابا ديما الناس هذوما ماهمش كيفنا...و كان حبك اليوم...غدوة يمل منك...يمكن هذا لي قاعد يصير توا...منعرفش إمتى يكون موجود...و إمتى يبعد...الكلام وحل في حلقي كلشي فيا يحب عليه و يرفض فيه فرد وقت...نحب نعنقو و فرد وقت نحب نخرج غشي الكل فيه...أما من بكري ما نحب نلوم حتى حد عالشي لي نحسو و نعيشو ما نحب حد اكثر من أمي...ما نحب حتى حد يدخل لحياتي...منحبش نبعد على بابا...اما توا هذا الكل قاعد يطيح في الما...الشهرين لي تعدات...خلاتني نعرف اني ستانست بيه في حياتي...و اني حبيتو...أما شبيني منجمش حتى نبكي...في المواقف هذوما...نحس في النفس ماشي و يتسكر عليا...قاعدة نتخنق و أنا نغزرلو خذيت نفس بالسيف نحكي
أنا:أخرج من حياتي حسام
قرب مني...في لحظة خطفني من يدي...كبس عليا يحكي
حسام:مش إنتي لي تقرر هذا شي
وائل:ظاهر فيك مفهمتش كلامها
حسام:أنت سكر ¤¤¤ فمك أحسنلك
وائل:سيبها و أحكي معايا
رخف يدو على زندي...و تلفت عندو...رجع ضربو مرة أخرى...صورتهم ضبت بين عينيا...طاحت الكراسة من يدي...حاولت نجبد البخاخة من صاكي...أما شي...ساقيا رخفو...كنت باش نطيح...أما لقفني في لحظة...يحكي
حسام:مرييم...تسمع فيا ياخي...مريم
حليت عينيا...أول ما خذيت نفس من البخاخة متاعي بقيت نستوعب وين أنا...لقيت روحي داخل كرهبتو دورت راسي نغزرلو...غزرلي ندرا كيف يحكي
حسام:لباس توا ؟
أنا:مممم لازمني نمشي
كبست على صاكي...و مديت يدي باش نحل الباب سكرها من عندو يحكي
حسام:أركحي
أنا:فاش تعمل ؟
حسام:عندنا ما نحكيو
أنا:مفما حتى شي نحكيو فيه...حل الباب...خليني ننزل
خدم الكرهبة من غير حتى كلمة...ركبني العصب أكثر من تصرفاتو...قحرتلو نحكي
أنا:شنوة هذا لي تعمل فيه أنت ؟
حسام:ظاهر فما برشا حاجات لازمنا نحكيو فيهم
أنا:غالط سي حسام...مفما حتى شي...و من غير ما تعب روحك...زايد
حسام:صار...تحب تفهمني لي سمعتو صحيح
أنا:بالظبط...مفما حتى شي يربطنا...و ماهوش باش يكون
حسام:تصرفاتك تقول العكس
أنا:تقول شنية...أنت شتحب مني بالظبط حسام ؟
منعرفش كيفاش نجمت نسألو...أما حسيت روحي تعبت من المد و الجزر لي لقيت روحي فيه معاه...نحب نرتاح من هذا الكل...نحبو يختار طريق وحدة...شد الفران بالقاوي...و تلفت عندي غزرلي ندرا كيف...يحكي
حسام:نفس السؤال قاعد يدور في راسي من أول ما ريتك...أنا شنحب منك مريم...شبيني منجمش نحيك من مخي..شبيني كل يوم نتعلق بيك أكثر...شبيني وقت نقول كهو..نلقى روحي مزلت في نفس الطريق هذا الكل عندو تفسير واحد...أنا حاجتي بيك يا بنت الناس..قتلك من قبل و باش نعاودلك نفس الكلام توا...حبيت و لا كرهت إنتي متاعي
أنا:وين كنت ؟
لقيت روحي نسأل في نفس السؤال لي هربت منو شهرين كاملة...نحب نرتاح من الدوامة لي عايشة فيها تنهد بالقاوي يحكي
حسام:فرنسا
أنا:فرنسا...ملا
حسام:ظطريت نمشي بين ليلة و نهار
أنا:علاه رجعت...شنوة تستخايل في روحك أنت...في بالك باش تلقاني نستنى فيك ؟
حسام:كنت تستنى فيا
أنا:ياسر عاطي ثقة في روحك
قرب مني أكثر...حاوط وجهي بيديه الزوز...حسيت بالنفس متاعو على وجهي...يحكي
حسام:عاللخر
أنا:سيبني
حسام:إنتي زادة توحشتني...كيما توحشتك أنا بالظبط
أنا:لا
حسام:تكذب
انا:علاه مكلمتنيش ؟
حسام:باش إنتي تفهم روحك زادة
أنا:نفهم شنوة...لأنت واحد أناني ؟
حسام:باش تفهم لإنتي زادة متنجمش تعيش من غيري
أنا:مسكين والله...هذا تفكيرك أنت
حسام:و لإنتي تحبني زادة
أنا:إحتمال بعيد برشا
تبسم بالوقت...أول ما قرب لشفايفي...جبدت روحي منو نحكي
أنا:يزي حسام...نعرف لأنت عملت هذا على خاطرك مكلمتنيش...خاطرك مكنتش متأكد من اللي تعمل فيه خفت تربط روحك بيا...أنت لي لازمك تفهم...مانيش لعبة عندك...تقرب مني وقت ما تحب و تبعد وقت ما تحب...ماكش مظطر تفسرلي...و لا حتى تبرر موقفك كلشي واضح من الأول...لي قاعد يصير زايد...انت اليوم معايا و غدوة بعيد...مانيش باش نتهرب من اللي نحس فيه...صحيح أنا زادة تعلقت بيك و برشا زادة...أما مستحيل نخليك توجعني...البعد هذا خلاني نفهم شي واحد و كهو...انو كل حد فينا عندو حياتو يا حسام...و بالرسمي نحبك تعيش حياة مزيانة...من غير ما تربط روحك بطفلة معقدة...و تعاني من الظغوطات النفسية متاعي و لا مرضي...نعرف روحي مانيش متاع حب...و منحبكش تقرب مني باش تبعد مبعد...و توا أمانك حل الباب خليني ننزل
مديت يدي...نحاول نحلها...قلبي دق بالوقت...للحظة حبيتو يعنقني...و يقولي أنسى الكلام هذا الكل...أما لقيت روحي نازلة من الكرهبة من غير حتى كلمة أخرى منو...يمكن هاذي باش تكون آخر مواجهة بينا...صوت داخلي يقولي صيح ابكي...اما منجمتش كي العادة غصة واحلة في حلقي...مع انو دنيا باردة عاللخر...أما حاسة روحي باش نطرشق من سخانة دورت راسي نغزرلو كيفاش...طار بالكرهبة خذيت نفس و هزيت يدي وقفت طاكسي...ركبت من تالي...نحس في روحي مخنوقة عاللخر...مديت يدي نزلت البلار...مش مصدقة لأنا كنت معاه توا...ريحة برفانتو مزلت نشم فيها..كلامو باقي يتعاود في وذني...اما منجمش نكذب على روحي منجمش نوهم روحي بحاجات مستحيل تصير...حسام لي تعرفت عليه صدفة...لي لقيت روحي نحبو و نكرهو فرد وقت...مناش باش نكونو لبعض...نخاف يفد مني بعد شهور و لا عام...و نلقى روحي نواجه في الدنيا وحدي...منحبش نعيش في المد و الجزر متاعو...خايفة يصير فيا كيما امي...و ما نلقى معايا حتى حد...نخاف حبو ليا يكون مجرد كلام و كهو...فقت من سرحتي كي حبس...خلصتو و نزلت...نكركر في ساقيا بالسيف منجمتش حتى نجبد مفاتحي...مديت يدي ندق عالباب فتحتلي مرت بابا...غزرتلي ندرا كيف....بالعادة مندقش الباب...قربت مني تحكي
حياة:لباس ماهو ؟
هزيتلها براسي إيه...و كبست بيدي عالحيط...قربت مني شدتني تحكي
حياة:مريم شبي حالتك هكا...تحب نكلم أحمد
أنا:لا...لباس عليا
حياة:باهي...إيجا اقعد...تو نجيبلك كاسة ما
عاونتني دخلت لصالة...و مشات للكوجينة...رجعت بالوقت...تشرب فيا...أول مرة بعد سنين تتصرف معايا بالطريقة هاذي...للحظة حسيت روحي مع مرا أخرى منعرفش شنوة لي قاعد يصير بالظبط...خذيت نفس نحكي
أنا:عيشك
حياة:من غير مزية...هذا الكل من السهرات...القراية ماهيش باش تهرب...حاول تركز مع صحتك شوية
أنا:إنتي تنصح فيا ؟
حياة:مممم ننصح فيك...و توا هيا لبيتك...أرقد شوية لازمك ترتاح
أنا:باهي
بقيت نغزرلها مستغربة...هزيت صاكي...و قمت...أول ما وصلت لدروج...حبستني تحكي
حياة:تحب تاكول حاجة
انا:لا عيشك...كليت برا
حياة:باهي على راحتك
عوجت فمي...منعرفش شبيها المرا هاذي...متكونش تضربت على راسها...اصلا معاد نجم نفهم حتى حد حليت الباب...طيشت صاكي...نحيت الفاست حطيتها على جنب...و دخلت في فرشي...غمضت عينيا بالقاوي نحب ننسى كلشي صار اليوم...نحب نحيه من مخي اما شي...كانو عامل فيا بلعاني...مهما عملت نلقى روحي نخمم فيه...منعرفش اذا تصرفت بانانية و لالا...اما منجمش حتى نعطي الثقة في روحي...خايفة حتى انا نخذلو...خايفة حتى من روحي...نعرف روحي مزلت معقدة من الماضي...أما زادة منجمتش نتعدا لي صار...و مستحيل حد ينجم يفهمني...و لا يفهم لي قاعدة نحس فيه جملة...كان بابا منجمش يفهمني...مستحيل حسام ينجم يتحمل هذا الكل.
أنت تقرأ
زهرة🌸
Разное🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
