🔸️حلقة 16
🔸️حسام يحكي:
جبدت الكرسي...و قعدت مقابلو...تكيت لتالي نغزرلو أصلا طول الثنية و هو ساكت...منعرفش فاش قاعد يخمم بالظبط...طلبت قهوة...سارح مع البحر...مش هوني جملة...غزرتلو نحكي
أنا:شنوة سي شباب...جبتني باش نبقى نغزرلك ؟
عمر:مانيش ناقصك عالصباح
أنا:نسمع فيك...علاه جايبني لهوني
عمر:حسااام...لي باش نقولو لازمك تفهمو و طبقو زادة
أنا:باهي أستاذ نسمع فيك
قحرلي...و حط يديه زوز عالطاولة...تنهد بالقاوي يحكي
عمر:حسام...زهرة أمانة عندك
أنا:شتقصد ؟
عمر:نعرف لي في داركم باش تكون لباس...أما هاني قتلك من قبل...لهي ولات مدمنة عالحبوب...يعني تنجم جيها كريز...خاصة اذا تقلقت
أنا:شنننوة ؟
عمر:لي سمعتو...نحبك تتلهى بيها...متتقلقش منها مهما صار...متصيحش عليها...و كان حسيتها مش قد بعضها أسألها و لا كلمني أنا نجيها...خاطر مستحيل تحكي و لا تشتكي لحد باهي
بقيت نغزرلو...نحاول نستوعب كلامو...و كيفاش قاعد يحكي عليها...كيفاش خايف عليها لهدرجة...و إمتى لحق أنو يفهمها و يعرف طبيعتها...خذيت نفس نحكي
أنا:باهي طمن...اللي تحب عليه باش يصير
عمر:فما حاجة أهم
أنا:شنوة ؟
عمر:منحبش زهرة تعرف لأنا حكيتلك...لا أنت سمعتني و لا أنا قلت شي...منحبش الحكاية هاذي تأثر عليها في حياتها و لا قرايتها...منحبهاش تتلز باش تاخو حبوب مرة أخرى مفهوم كلامي حسام رد بالك...الطفلة أمنتك عليها خاطرك خويا و عشيري
أنا:عمممر...طمن عليها...كيف وصلت و دخلت لداري على العين و الراس...و مقامها من مقامك
عمر:عيش خويا...و أهم شي متخليهاش تخرج وحدها منحبوش يلقى فرصة باش يقربلها و لا يحكي معاها
أنا:باهي...و زعمة باش تربح القضية هاذي ؟
عمر:منعرفش...الحكاية أصعب من اللي توقعت
أنا:سيرين في بالها بالحكاية ؟
عمر:لااا و ماهيش باش تعرف
أنا:باهي...كان احتجت شي أنا في الخدمة ديما
عمر:عيشك حسام
كملنا القهوة عالساكت...طلع راسو غزرلي...يحكي
عمر:أنا باش نمشي...مبقاش للخدمة
أنا:مش على أساس عطلة
عمر:أسبوع آخر...هيا قوم نوصلك في طريقي
أنا:لا نحب نمشي شوية...برا على روحك...باش متوخرش أكثر
عمر:باهي...مبعد ملا
أنا:باهي
بقيت نغزرلو...لين خرج...تنهدت بالقاوي...و تلفت نغزر للبحر...رجعت بيا ذاكرة سنين لتالي...غمضت عينيا بالقاوي...و حليتهم...ما نحب نتذكر حتى شي...أهم شي توا الحكاية الجديدة لي خرجلنا بيها عمر...هزيت روحي خرجت...نحاول ناخو نفس...أول مرة نرا عمر مهتم بوحدة لهدرجة...حتى سيرين و لا مرة جبدلي عليها صحيح نعرفها من قبل...و نعرف طبيعة علاقتهم...اصلا بعد السنين هذوما لي تعداو...من حقو يبدا حياة جديدة و يبني عيلة...العيلة لي ضيعها من وقت طويل...يمكن على هذاكا خفت من حكاية زهرة...خفت على عشيري يهد كلشي بناه من سنين في لحظة...ما نحب حتى شي يأثر عليه...خاصة كي ريتو مهتم بيها اكثر شي...أصلا منعرفش كيفاش باش نتعامل معاها الطفلة...عديت شطر نهار في نادي...محسيتش بالوقت كيفاش تعدا يمكن نحاول نهرب...من الماضي لي هد على مخي فرد مرة...اول ما وصلت لدار...طلعت لبيتي...حتى أمي منجمتش نحكي معاها..دخلت لبيت البانو..نحيت دبشي و دخلت تحت الما...استندت بيدي عالحيط...غمضت عينيا...تعدات صورتها بين عينيا...نتذكر في آخر مرة ريتها فيها...كلامها لتوا يتعاود في راسي
شراز:حسام سامحني أمانك...أما منجمش نكمل معاك منجمش نستناك حتى تكون روحك...أنت طريق قدامك طويلة...صحيح حبيتك...أما منجمش ندفن أحلامي معاك...أنا باش نسافر مع بابا...باش نبعد من تونس...و نحاول ننساك جملة
خطفتها عندي...كبست على زندها بيدي...نزلت عليها أكثر نحكي
أنا:تكذب...لي تقول فيه توا كلو كذب يا شراز...ماكش باش تخليني...معندكش الحق هذا...مانيش باش نسمحلك...دمر اللي بنيناه مع بعض
شراز:مفمااا حتى شي اسمو مع بعض...لازمك تفهم الكلام هذا...صحيح عشنا مع بعض برشا حاجات باهيين أما الوقت الحلو يوفا...و إحنا وفينا يا حسام
انا:بوك ورا الحكاية مش هكا ؟
شراز:ايه بابا...و عندو حق في كلشي...انا منجمش نضحي على خاطرك اكثر...يمكن الوقت لي توصل باش تحقق احلامك...ترميني على جنب...و تبدا من جديد مزلنا صغار يا حسام...حبيتك صحيح...اما الحب مش كلشي...أنا نحب نعيش...نحب نرا الدنيا من زاوية أخرى تمنيت كان وافقت عالخدمة عند بابا...عالاقل وقتها كان باش يتنازل و يسمحلنا نكملو مع بعض...و وقتها انت
قصيت عليها...كيف دزيتها لتالي...و هزيت يدي في وجها نحكي
انا:سكر فمك شراز...كلمة أخرى لا...تحب تمشي...برا أمشي...عيش حياتك كيما تحب...و أعمل لي تحب عليه أما وسط هذا الكل...نحبك تنساني جملة...تنساني كيما باش ننساك بالظبط...رد بالك تطلع في حياتي مرة أخرى أنسى كلشي عشناه مع بعض...معادش نحب نراك في حياتي جملة
شراز:ح..حسام أنا
أنا:إنتي ولا شي بعد اليوم
عطيتها بظهري...بلا ما نزيد معاها حتى كلمة أخرى عديت ايامات طويلة و أنا نحاول نفهم تصرفاتها...اما مكنتش نتوقع باش نتصدم بكلامها لهدرجة...متوقعتش شراز لي حبيتها سنين...توفا الحكاية بينا بالطريقة هاذي...عندها حق...علاه باش تستناني...هذا لي كنت نقولو ديما...كيفاش تسناني و انا لتوا ملقيتش خدمة لتوا منجمتش نعمل على روحي...كملت قراية و قعدت من شريكة لشريكة نفركس على خدمة...نحب نخدم و نعمل على روحي...باش نجم نكون معاها في أقرب وقت...أما لي نسيتو...أنو شراز تحب روحها أكثر شي هذا لي لاحظتو ديما في علاقتنا...كلامها تالي...خلاني نتنازل على كلشي...و نقطع اخر خيط بينا...مستحيل كنت نسمحلها تنقص مني اكثر من هكا...و لا نكون تحت رحمة بوها...يمكن انا وصلت لهوني توا...بعد ما خليتها هذاكا نهار كان فاصل في حياتي...وقتها تأكدت أنو مستحيل يكون فما حب...نسيت حكايتها و نسيت روحي معاها...حتى بعد سنين لي تعدات...ما نذكر حتى شي عشتو معاها...ساعات حتى الوقت لي نعديه مع لبنات نحس روحي نضيع في وقتي...مش اكثر من هكا...حتى فكرة اني نحب مرة اخرى و لا نخلي اي وحدة اخرى تدخل لحياتي...نحيتها من راسي جملة حتى بعد اكثر من عشر سنين...مديت يدي قصيت الما و خرجت...تبسمت على جنب...منعرفش علاه اليوم بالظبط...الحكاية تعاودت في مخي...نفخت بفدة...و نزلت للعشا...لقيت امي وحدها...قعدت بحذاها نحكي
أنا:أمي وينو ؟
امي:لتوا ما جا
انا:ماهوش باش يقص عليهم سهريات هذوما
فتحية:أنت حليتلو عينو...قتلك ألف مرة معادش تعطيلو الكرهبة
أنا:باهي أمي باهي...تو مبعد نحكي معاه
فتحية:نعيمة...نعيييمة برا عيط لزهرة...طفلة من صباح ما كلات شي
أنا:خلي عليك خالتي...أنا باش نطلعلها
نعيمة:باهي
هزيت روحي...طلعت عندها...اول ما وصلت لبيتها دقيت الباب و دخلت...قاعدة على حرف سرير...اول ما شافتني...نطرت من بلاصتها جات واقفة...حسيتها تربثت و دخلت بعضها...خذيت نفس نحكي
انا:هيا باش تتعشى معانا
زهرة؛ب..باهي
بقات واقفة في بلاصتها...تفرك في يديها...جيت باش نخرج...اما في لحظة رجعت تلفتلها...نحكي
انا:زهرة
أول مرة ننطق إسمها...طلعت راسها غزرتلي ندرا كيف خايفة مني...حسيت بذنب بعد اللي حكيتو معاها آخر مرة...كان عرفت حكايتها من الأول...مستحيل كنت نتصرف معاها بالطريقة هذيكا...يمكن تصرفت أكاكا خاطر خفت تكون كيما شيراز بالظبط...و لا تحاول تستغل عمر لصالحها...تنهدت بالقاوي نحكي
أنا:منقصدش لي قلتو آخر مرة...كنت على أعصابي سامحني
زهرة:م..ما صار شي
انا:هيا ملا...فتحية متحبش تستنى برشا...تمشيش تحط لوم عليا و تنبزني
دوب تبسمت و هزتلي براسها ايه...تلفت و خليتها مخالطة عليا...نزلنا مع بعض...نغزر لأمي لي فرحت بيها حطت يدها عالكرسي تحكي
أمي:ايجا...ايجا أقعد بحذايا
غزرتلي..هزيتلها براسي ايه...قربت قعدت قدامها..قعدت مقابلها...نثبت في ملامحها...أول مرة نغزرلها بالقدا نغزرلها و كلام عمر يتعاود في راسي...منعرفش كيفاش نجم يحفظ طبيعتها في وقت قصير...خوفو عليها واضح من كلامو...منعرفش كيفاش و لا علاش يعمل في هذا الكل...مع انو هو مش من ناس لي يحب يدخل في حياة غيرو...اما لي متأكد منو...انو زهرة باش تخلق فرق كبير في حياة كل حد فينا.
أنت تقرأ
زهرة🌸
Rastgele🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
