🔸️حلقة 9
حليت عينيا شوية...نحس في راسي رزين برشا منعرفش علاه...هزيت روحي بالسيف تقعدت...نحس في راسي باش يطرشق...بدني مزال يوجع فيا من طريحة هذيكا...منعرفش شبيني بالظبط...نهار الكل نعديه راقدة...حتى لفاك منجمش نمشيلها و لا حاولت نمشي...كلشي نحب عليه نشد فرشي و كهو...فقت من سرحتي على صوت الباب كي تحل...ريتو دخل في يدو صينية الفطور...من اسبوع يجيبلي هو فطوري لهوني أصلا المفاتح فكهملي...و حتى تليفوني زادة...من اسبوع مكلمتش مريم و لا حتى جاتني...نحس روحي في بلاصة اخرى...حطها عالتابل دونوي...و قعد قدامي قرب مني باسني من خدي...بقيت نغزرلو...لا نجم نبعد عليه و لا نحكي معاه...تبسم يحكي
مراد:لباس اليوم
هزيتلو براسي ايه...مد يدو...يعدي فيها على خصلات شعري...يغزرلي ندرا كيف...عدا صوابعو على شفايفي يحكي
مراد:سامحتني مش هكا
بقيت نغزرلو...منجمتش نحكي معاه...هز صينية في يدو وكلني بالسيف...حط كاسة العصير في يدي يحكي
مراد:اشربها توا
كبست عليها في يدي...شربتها بالسيف...تبسم كيف كملتها...خذيت نفس نحكي
انا:ن..نحب نرقد
قرب مني اكثر...حط يدو على خدي...نزل بيها لرقبتي حسيت بالنفس متاعو في وجهي...اما ما نجمت نعمل حتى شي...قلبي يدق بالقاوي...نفس تسكر عليا...كيف حسيت بشفايفو لي تحطو على شفايفي...غمضت عينيا بالوقت...نحب نبعد عليه...اما جبد روحو في آخر لحظة باسني من راسي وخرج...تركزت بيدي عالفرش...حسيت بدوخة قوية...متأكدة لفما حاجة مش نورمال...هزيت روحي بالسيف...وقفت قربت من القارد روب استندت عليها...حليت شباك شوية...ريتو كي مشى بالكرهبة..دنيا مغيمة و المطر تصب...خذيت نفس...نمشي بالسيف نحاول نشد في أي بلاصة باش منطيحش...وصلت لبيت البانو بطلوع الروح...استندت بيديا زوز على لافابو...قييت روحي...و غسلت وجهي...حسيت روحي احسن شوية...غزرت لروحي...حالتي داخلة بعضها متوقعتش نوصل للحالة هاذي...غمضت عينيا بالقاوي و رجعت حليتهم...وليت لبيتي قعدت على طرف السرير نرد في النفس...حطيت يدي على شفايفي...مش مصدقة لي كان باش يعملو...اصلا معادش نعرف شبيني وليت هكا...حتى الكلام منجمش نخرجو...شبيني بعد ما تقييت باش نجمت نفيق شوية...بالعادة أول ما نكمل ماكلتي...نرقد...معادش نتذكر وقت مليح بقيت فيه صاحية...طلعت راسي غزرت لساعة...عينيا وساعو معناها باز باش يرجع بعد شوية...خاطر ميخدمش مع العشية...تي باز مشى باش يجيب امي من الجمعية يمكن ماهيش باش جيني فرصة اخرى اني نخرج من هوني...لازمني نبعد...خاطر فما حاجة مش نورمال قاعدة تصير...من اللي صار قبيل...عرفت لهو باش يجي نهار و يوصل للي يحب عليه...اذا انا بقيت عالحالة هاذي...تقويت على روحي...جبدت جيلي لبستها فوق البيجامة...اصلا ملحقتش ناخو فاست...الدوخة عاملة فيا...حليت الباب و نزلت اللوطة...حاولت نحل الباب شي...عرفتو سكرها...ضربتها بيدي...نحس في روحي باش نطيح...مشيت للكوجينة بالزربة...عبيت كاسة ما شربتها فرد مرة...جات عيني على بوات صغيرة فيها حرابش...استغربت خاطر اول مرة نراها...محبيتش نركز برشا...دورت راسي نغزر لشباك...قربت من الرخامة شوية...حليتو...طلعت عالرخامة بالسيف...و خرجت منو...تكيت عالحيط نرد في نفس...نرا في دنيا ضباب تقويت على روحي و بعدت عالدار...دوب نعمل الخطوة صحيحة...تبليت بكلي...وقفت في تركينة...منجمتش نمشي اكثر...دنيا ظلامت...بدني رعش بالوقت...منجمش نبقى هوني اكثر...خاطر مستحيل نجم نبقى فايقة لصباح...تبليت بكلي...حبيت نمشي عند مريم...اما متأكدة باش يلقاني و يرجعني...عديت يديا زوز على وجهي نمسح عليه...غزرت لثنية...مفما حتى حد برا...نحس في راسي باش يطرشق...في لحظة جا في بالي...خرج اسمو من بين شفايفي...معنديش حل اخر غيرو...عالاقل الليلة...فركست بعينيا على طاكسي شي مفماش...منعرفش كيفاه نمشي حتى لغديكا...جاب ربي مزلت مذكرة طريق لي جيت منها اخر مرة...عديت تقريب ساعة نمشي...دوب مركزة في ثنية...دوخة قوية نحس بيها...كل شوية ناقف ناخو نفس...نتقوى بيه طلعت الدروج هذاكا بالسيف...مصدقتش لي وصلت لدارو...دقيت الباب اكثر من مرة...طلعت راسي نغزرلو كي حلها...لابس كان سروال كهو من غير مريول..يحكي في تليفون...غزرلي مستغرب...غمضت عينيا بالقاوي ورجعت حليتهم...نسمع فيه يحكي
عمر:زهررررة
صورتو ماشية و تبعد عليا...منجمتش ناقف اكثر...بدني ترخف...جيت باش نطيح...لقفني في اخر لحظة...جيت في حملتو...حط يدو على ظهري...غمضت عينيا و معاد حاسة بشي
أنت تقرأ
زهرة🌸
Aléatoire🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
