زهرة🌸

الحلقة السادسة و السبعون

حلقة 76
🔸️مريم تحكي:
حليت عينيا شوية شوية...نحس روحي في بلاصة بعيدة برشا...صوت البكى متاع بيبي صغير خلاني نهز روحي بالوقت تقعدت...دورت عينيا عالغابة لي لقيت روحي ملوحة فيها...هزيت روحي وقفت...الصوت ماشي و يقوى...نزلت راسي نغزر لروحي شبيني لابسة الروبة البيضة...شنية لي قاعد يصير بالظبط...حطيت يديا زوز على كرشي...شبيها معادش خارجة كيما قبل ويني بنتي ؟ وين فرح ؟ درت في بلاصتي مفما حتى حد...كان الشجر لي يهز فيها الريح...كبست على كرشي أكثر...علاه مفما حتى حد معايا...حسام وينو ؟ هذا لي سألتو و انا نفركس عليه بعينيا من بعيد...شبيه خلاني هوني...هزيت يديا شوية نغزر لدم...نزلت راسي نغزر لكرشي...اسمها خرج بين شفايفي فررح بنتي ؟ شبيني مانيش نحس بيها كيما قبل...الصوت لي ماشي و يبعد هو صوت بنتي اكيد...كبست عالروبة من جنابها هزيتها شوية...نمشي و نتبع في صوت...نمشي و قلبي بين يديا...فما احساس خلاني نتاكد انو هذا صوت بنتي علاه احنا هوني منعرفش...علاه فكوها مني بالطريقة هاذي...حسام شبيه معادش موجود...أسئلة قاعدة دور في مخي...خلاتني دوب نجم نركز...زربت في خطواتي أكثر...نعيط باسمها على طول صوتي...مفماش حد يسمعني...حد من اللي نعرفهم انا...حبست كي ريت مرا واقفة بحذا البحيرة...خذيت نفس بالسيف...نحكي
انا:لحظة
بقيت نغزرلها و هي عاطية بظهرها...تقريبا لابسة كيفي شعرها في لون شعري و في طولو زادة...زوز بقينا واقفين...دقات قلبي نسمع فيهم في وذني...صوت أنفاسي مع صوت البكا متاع البيبي لي في يدها...كسرو حاجز صمت...مديت يدي بالسيف...نحكي
انا:رجعلي بنتي امانك
تلفت عندي شوية شوية...هزيت راسي بالسيف نغزرلها نثبت في تفاصيل وجها الرقيقة...جمدت في بقعتي دوب نجمت نحكي
انا: ا..امي
نزلت عينيا شوية نغزر لبنتي...لي ملفوفة في الأبيض وجها أبيض مش نورمال...تبسمت و انا نغزرلها...اول ما غزرتلي سكتت...عاودت غزرت لامي نحكي
انا:امي رجعلي بنتي امانك
مديت يدي...من غير خوف...خاطر متأكدة انو امي مستحيل تضرني...تبسمت تحكي
امي:بعد توا باش تبقى معايا
انا:شقصدك ؟
امي:ارجع منين جيت عزيزتي...البلاصة هاذي مش متاعك انتي
انا:نحب على بنتي...مانيش باش نرجع من غيرها
امي:لازمك ترجع يا روحي...مجبورة انك ترجع
هزيتلها برأسي لا...و قربت منها شوية...خذيت نفس نحكي
انا:ماكش باش تحرمني منها هي زادة
امي:فرح معندهاش بلاصة معاكم...طمن ماهيش باش تكون وحدها...هاني انا معاها
انا:لااا...هزني معاك انا زادة...حتى انا منحبش نبقى معاهم امي
امي:منجمش
انا:علاه ؟
امي:مريم...انتي ما عشت حتى شي لتوا...فما برشا حاجات تستنى فيك
انا:ب..باهي...رجعلي بنتي...خليلي سبب باش نعيش امانك
امي:رد بالك على روحك عزيزتي
انا:لاااا اقف...متمشيش
كبست على بنتي أكثر...باستها و تلفتت...دخلت للبحيرة قربت منها بالزربة نحكي
انا:اممممي...لاااا متمشيش...امااانك رجعلي بنتي
قربت أكثر على صوت بكاها...صوتها لي حرقلي قلبي مديت يدي بالسيف نحكي
انا:فرررح...ياااا امي...امانك رجعها...فرررح
حبست كي حسيت بالما مس ساقيا...خطواتي رزنت و منجمتش ندخل أكثر...صوتي تخنق و انا نغزرلها في وسط الما...شبيها متحبش تسمعني...متحبش ترجعلي بنتي...نعرف لامي متنجمش تضرني...علاه حتى تفكلي بنتي...بدني رزن عليا و منجمتش نخلط عليهم...كانو فما حد يجبد فيا لتالي...اول ما تخفات صورتها..خرجت مني صيحة قوية...صيحة خلاتني...نحل عينيا مروهجة الدنيا الكل بيضة قدامي...صوت الماكينات قوي برشا لدرجة منجمتش نسمع لي قدامي...وجيعة قوية في راسي...خلاتني نعاود نسكر عينيا بالوقت...منعرفش وين كنت و وين وليت...اللي متأكدة منو اني قابلت امي في الحلمة...نحس في بدني رزين برشا...نسمع في اصوات فوق راسي...اما ما فهمت منها شي...يدي كانو فما شكون كابس عليها...مديت يدي لأخرى بالسيف حطيتها على كرشي...لتوا مخدرة و مش حاسة على شي...أما حسيت ببنتي...بنتي لي معادش موجودة في كرشي...منعرفش شكون معايا...و لا وين انا بالظبط...أما سألت...سألت سؤال واحد كهو...حتى الحروف منعرفش كيفاه نجمت نخرجها من فمي...غمضت عينيا بالقاوي و عاودت حليتهم...نحكي
انا:ب..بنتي...ف..فرح
حسيت بيد تحطت على وجهي...يحلي في عينيا يتفحص فيهم بضو قوي...و يحكي فرد وقت
هو:مدام تسمع فيا ياخي ؟
دوب تحسست كرشي مرة أخرى...و عاودت حليت عينيا...صورتو ضباب قدامي...خرج صوتي رزين مرة أخرى...نسأل فيه حتى بلا ما نعرفو
انا:ب..بنتي و..وين ؟
هو:مدام جاوبني...تعرف شنية صارلك قبل ما تجي لهوني ؟
انا:ط..طحت
هو:باهي قولي شنية تحس في روحك توا ؟
انا:ب..بنتي وين ؟
هو:معناها تعرف لي كنت حبلة ؟
انا:ممممم...ش..شنية صار في بنتي ؟
هو:باهي قولي شنية يوجع فيك
انا:ك..كلشي
هو:باهي اعطيها مهدئ توا...بعد ساعة...تفيق بالقدا
هي:لباس عليها توا ؟
هو:منجمش نعرف...أما احسن شي توا تعدات مرحلة الخطر
هي:حمد الله
هو:هاني باش نخبر الجماعة...و انتي اعمل معاها لازم
هي:باهي
الحوار هذا الكل سمعتو...سمعتو اما منجمت نفهم منو شي...غمضت عينيا مرة أخرى..لي ريتو كان حلمة..باهي بنتي وين توا...مستحيل تكون امي هزتها معاها...امي مشات ليها برشا...و ماهيش باش ترجع...دمعة خفيفة لقات طريقها على وجهي...منعرفش حتى كيفاش لقيت جهد باش نقاوم اكا الحلمة...حسيت بيدها لي تحطت على يدي...جبدتها من فوق كرشي...حليت عينيا...نثبت فيها بالسيف...توا بديت نعقل لهي طبيبة و لا فرملية منعرفش...خذيت نفس بالسيف...نحكي
انا:ب..بنتي...ن..نحب نرا بنتي
هي:اهدا مدام...متعبش روحك عيشك
انا:ب..بنتي لباس ؟
هي:لباس متخافش...حطوها في الحاضنة
انا:ب..برا جيبها...نحب نراها
هي:منجمش توا...سامحني
انا:ح..حسام...خلي حسام يجيبها عندي
هي:مدام حاول تهدى توا امانك
انا:ن..نحب ع..على بنتي
هي:متعبش روحك...تو كي تفيق بالقدا نجيبها عندك
قربت مني أكثر...تنحيلي في خيوط المكينة...و ندرا شنية...دوب حسيت بيها و هي دور قدامي...حتى كي زرقتلي محسيتش عليها...دايخة و بدني يوجع فيا عدلت سيروم...و عاودت فحصتني...غمضت عينيا أكثر موجوعة من بلاصة العملية لي في كرشي...حاولت نتحرك اما منجمتش...حطت يدها على كتفي تحكي
هي:متتحركش برشا...جرحك مزال جديد...حاول تسايس على روحك شوية
منجمتش نرجعلها...كملت خدمتها و خرجت...بقيت وحدي بين اربع حيوط...غمضت عينيا نذكر في آخر عركة بيناتنا...الكلام لي قالو و لي قلتو...شراز لي ظهرت في ساحة...الميساج متاعها لي جا على غفلة و خلاني نفقد أعصابي الكل...حليت عينيا مروهجة كي ذكرت الطيحة هذيكا...منعرفش شكون الغالط في اللي صار...انا و لا هو...أما نتيجة تبقى وحدة...بنتي لي معادش موجودة في كرشي...منجمتش نطمن عليها و هي بعيدة عليا...الحلمة الخايبة لي ريتها...حرقتلي قلبي قبل ما نحل عينيا و رغم هذا الكل...تمنيت نفيق و نلقاه بجنبي...ياقف قدامي و يقولي لي بنتي بخير و ما صار عليها شي...اكيد كنت باش نصدق كلامو...من ساعة تعداو ساعتين و ثلاثة...المخدر وفى مفعولو...الوجيعة قوات في راسي و كرشي...حتى يدي لي بالجبيرة توجع فيا...دورت راسي بالسيف نغزر للباب...نستنى فيه...ايه برغم لي صار فيا الكل...كنت نستنى فيه هو و كهو كنت نستنى فيه يرجع و بنتي في يدو...غمضت عينيا من الوجيعة لي حسيتها...منعرفش كيفاش نجمت نتحمل لتوا...حليتهم على صوت الباب...دخل الطبيب...و وراه زهرة...نجمت ناخو نفس كي ريتها...تبسمت بالوقت دوب عاودت تبسمتلي...ملامحها حزينة عاللخر...حتى كان تحاول تخبي...متنجمش...أكثر وحدة نعرفها بعد روحي هي زهرة...قرب مني الطبيب يحكي
هو:لباس توا ؟
انا:مممم...ل..لباس...نجم نرا بنتي توا ؟
هو:معندكش برشا من اللي فقت حاول ترتاح ساعة مبعد كلشي ساهل...اكيد مانيش باش نخليك تقوم توا
انا:جيبوها لعندي...زهرة تجيبها...و لا حسام
هو:هدي روحك توا...منجمش نخرجها من الحاضنة توا كي ترتاح انتي تمشي عندها
غزر لزهرة...هزتلو براسها ايه...دورت راسي بيناتهم نحكي
انا:ش..شفما...ص..صارت حاجة ؟
هو:مفما شي...متعبش روحك برشا...باش نخليك بحذاها شوية...بعدها تخرج...لازمك راحة توا
اول ما خرج...مديت يدي لزهرة...قربت مني بالوقت شدتني...و قعدت بجنبي تحكي
زهرة:خوفتنا عليك...كيفك توا ؟
انا:ل..لباس...زهرة ياخي فما حاجة ؟
زهرة:لا طمن يا روحي
انا:ع..علاه مفما حتى حد غيرك هوني...حسام وينو ؟
زهرة:ح..حسام...حسام
انا:ص..صارتلو حاجة تكلم ؟
حاولت نهز روحي...الوجيعة لي نحس فيها منعتني وقفتني تحكي
زهرة:لباس عليه...اهدى
انا:م..ملا شبيه مش هوني...اكيد ماهوش باش ياخو فرح و يمشي...اكيد ماهوش باش يعملها
زهرة:مريم اهدى...حسام مستحيل يعمل حاجة هكا شنية الأفكار هاذي لي صبت عليك ؟
انا:ز..زهرة...برحمة أمك جاوبني...حسام وينو...و بنتي وينها ؟
زهرة:اوعدني...تبقى هادية
هزيتلها براسي ايه...الوجيعة لي في كرشي قوات أكثر خايفة من اللي باش نسمعو...بقات تغزرلي...فرد وقت تلم في الكلام لي باش تقولو...خذيت نفس نحكي
انا:تكلم زهرة
زهرة:ح..حسام هزوه البوليسية
بقيت نغزرلها...فرد وقت نستوعب في كلامها...حاولت ناخو نفس نحكي
انا:ش..شنية سبب ؟
زهرة:اعترف انو هو سبب في اللي صار...يعني هو لي دزك
انا:طحت وحدي...علاه حتى يتحمل حاجة معملهاش
زهرة:يمكن خاطر حس بالذنب
انا:في رايو كي يبعد...باش ينجم يصلح لي صار ؟
زهرة:حتى هو حالتو تاعبة...و موجوع زادة
انا:مانيش باش نخليه..يشد الحبس في حاجة معندوش ذنب فيها...اللي يهمني توا بنتي و ك..كهو
زهرة:انتي كيفاش تحس في روحك ؟
انا:منعرفش...ع..علاه حتى حد ما جا عندي غيرك ؟
زهرة:الكل برا...محمد و امي فتحية...و خالتي نعيمة...و رنيم زادة
انا:ر..رنيم هوني ؟
زهرة:مممم...و زادة كان مش اختك...مانيش نحكي معاك توا
انا:و بابا ؟
سكتت بالوقت...و تبسيمتها لي تحاول ترسمها تخفات غزرتلها نحكي
انا:فهمت عليك...اصلا مانيش باش نتفاجئ
زهرة:ما تحط شي في بالك توا
انا:زهرة
زهرة:مممم
انا:ياخي ريت بنتي ؟
زهرة:ر..ريتها
انا:احكيلي عليها امانك
زهرة:تشبهلك برشا...برغم قد الطرف...أما تحسها كيفك بالظبط...لون عينيها كيما حسام...ياسر صغرونة...و أكثر وحدة بكاية بينهم...يمكن حست عليك على هذاكا
بقيت نغزرلها...نغزر لدموعها لي تحاول تخبيهم و هي تحكي...نعرف لبنتي بيها حاجة...و نعرف وقت زهرة تحاول تخبي عليا زادة...حبيت الوصف متاعها لبنتي...و تمنيت حتى انا نرا لون عينيها زادة...خذيت نفس نحكي
انا:زهرة من غير ما تخبي عليا امانك
زهرة:ش..شقصدك ؟
انا:عينيك فاضحينك...خبرني الحقيقة...شنية لي صار لبنتي ؟
زهرة:حتى شي...في الحضانة هي توا...و زادة لازم نخليك ترتاح شوية...اتو نكلم الطبيب يطمن عليك مبعد نهزك تشوفها
انا:ز..زهررة...متخبيش عليا امانك
زهرة:مريم يزي عيش اختي
انا:شنية لي صار لبنتي زهرة ؟
دخل الطبيب بالوقت...غزرتلو و عاودت غزرتلها...نحكي
انا:دكتور...نعرف لي صارت حاجة خايبة لبنتي...قلبي محسسني لهي مش بخير...من غير ما تخبي عليا امانك
هو:تعبت روحك برشا...و حكيت أكثر من لازم...حاول ترتاح توا...مبعد ساهل
انا:زهرة بنتي ماتت مش هكا ؟
بقات تغزرلي من غير حتى كلمة...حطت يدها على فمها بالوقت...و دموعها نزلت...غزرت لطبيب نزل راسو بلا ما يقول حرف آخر...هزيت يدي بالسيف...حطيتها على كرشي...معاد حاسة بحتى وجيعة...قد الوجيعةو الحرقة لي حسيتهم في قلبي توا...من دمعة ولات دموع...حاولت نلم طرف القوة...لي نحس فيها بالسيف غزرتلها نحكي
انا:ا..امتى صار هذا الشي ؟
وخرت خطوة لتالي متحبش جاوبني...دورت راسي لطبيب...تنهد بالقاوي يحكي
هو:اليوم الصباح...في الوقت لي فقت فيه انتي
غمضت عينيا بالقاوي...نتذكر في الحلمة لي حلمتها ساعات لتالي...البكا لي سمعتو كان صوت بنتي بالحق بنتي لي ملحقتش باش نرا حتى لون عينيها...و مسمعتش حتى صوتها...و منجمتش حتى نحضنها مرة وحدة و نشم ريحتها...كمل كلامو يحكي
هو:للأسف منجمتش تقاوم برشا...بدنها ضعيف برشا...و الأكسجين ميوصلش لرئتين...زادة بعد الحادثة صرات عليها مضاعفات...و كان فما احتمال كبير انها تموت حتى قبل ما تولد...و نفس الخطر كان عليك انتي زادة...حاول ترتاح توا...شد روحك...مزلت صغيرة و اكيد ربي باش يعوضك...و تو بقية العيلة يكملو إجراءات الدفن...هاني باش نوصي الفرملية تحطلك مهدئ...يزيك توا...جرحك مزال جديد...حاول تاخو بالك أكثر
بقيت نغزرلو من غير حتى كلمة...و كل كلمة يقولها دموعي تنزل أكثر...هوما ماهمش باش يدفنو بنتي كهو باش يدفنو كلشي حلمت بيه معاها...باش يدفنو قوتي معاها زادة...انا تحملت برشا على خاطرها...و مستعدة نتحمل أكثر...علاه خلاتني هي زادة...وخر بخطوات رزينة و خرج من البيت...دورت راسي غزرت لزهرة...لي دموعها نازلة من غير حتى كلمة...خذيت نفس نحكي
انا:زهرة...انت ريت بنتي و سمعت صوتها زادة...بلكشي مزالت عايشة لتوا...برا اتأكد امانك...بلكشي صارت غلطة...خاصة كي يحطو برشا صغار الداخل...اكيد مزالت عايشة مش هكا
زهرة:م..مريم يزي عزيزتي...متعملش في روحك هكا اماانك
انا:كلم البوليسية...خلي حسام يجي لهوني...تو يتأكد بنفسو...هو وعدني قبل...لي حتى شي ماهو باش يصير
زهرة:مرريم عيش اختي يزي
مريم:باهي ميسالش...هاني باش نقوم وحدي...و باش نهز بنتي من هوني و نمشي
هزيت روحي بالسيف تقعدت...مديت يدي نحيت السيروم بسناني...قربت مني تشد فيا...دزيتها بيدي نحكي
انا:ااابعد عليا
زهرة:مريم يزي امانك...باش تقتل روحك ياخي
كبست على طرف السرير بيدي...و وقفت...وجيعة قوية حسيتها في كرشي...خلاتني نطيح بالوقت...حلت الباب تعيط لطبيب بالوقت...منجمتش نتحكم في أعصابي أكثر...دموعي ولا شهقات ورا بعضها...دخل محمد يجري...نزل قدامي...شدني من كتافي يحكي
محمد:هااني معاك...اهدى عزيزتي
مديت يدي بالسيف...كبست على مريولو...و غزرتلو نحكي
انا:م..محمد رجعلي بنتي امانك...نعرف لهي ماهيش باش تموت...امانك اعمل حاجة...و رجعلي بنتي
محمد:باهي..باهي...قوم معايا توا
كبست عليه أكثر...نزل راسو شوية...و عاود غزرلي يحكي
محمد:مريم...قاعدة تنزف ياخي
انا:محمد بنتي حية مش هكا
كبس عليا أكثر...وقفني و رجعني لسريري..دخل الطبيب و الفراملة معاه...كبست على محمد نحكي
انا:محممد أمانك رجعلي بنتي...اماانك
محمد:اهدى عيش اختي اهدى توا...كلشي باش يكون مليح باهي
انا:نحب على بنتي
منجمتش نثبت في حد فيهم...لا في محمد و لا زهرة و لا حتى طبيب...لساني رزن بطريقة غريبة...منعرفش اذا تخدرت من الوجيعة و لا من الزريقة...نرا فيهم خيال طبيب يخرج فيهم...و هوما دايرين بيا...صوت بكاها واصل عندي...بنتي لتوا تبكي...علاه حتى تمشي و تخليني...علاه محاولتش تتحمل حتى شوية على خاطري...انا مخسرتش بنتي و كهو...خسرت روحي و السبب لي خلاني عايشة لتوا...لي خلاني نتحمل العيشة لي فرضها عليا حسام...و حتى السبب لي خلاني نعطي فرصة لعلاقتنا...انا عملت كلشي على خاطرها...فكرت فيها قبل ما نفكر في روحي...تمنيت تاخو بلاصتي و تعيش هي...علاه بعدت عليا...علاه خلاتني...كيفاش باش نعيش بعد توا...كيفاش باش نتحمل الوجيعة هاذي الكل...كيفاش باش نتقبل انو بنتي معادش موجودة زعمة هاذي آخر ثنية ؟ هذا ثمن لي دفعتو انا في آخر المطاف...زعمة نستهل هذا الكل...و لا انا و بنتي كنا اكبر ضحية في لعبة الانتقام متاعهم...ملخص هذا الكل...انو كل حد نحبو يغدرني بطريقتين الأولى....يخلوني نكره وجودي في دنيا هاذي...و الثانية يختارو ثنية صعيب اني نجم نخلط عليهم فيها.
🌸🌸🌸🌸🌸🌸🌸🌸🌸🌸🌸🌸🌸🌸
🔸️بعد_ساعتين:
حليت عينيا نغزر لسقف...حاسة روحي فارغة من كلشي...و قداش صعيبة كي تلقى روحك في حلقة فارغة...قاعدة نغرق من غير ما يحس بيا حد...نحب نعيط...نحب نخرج كلشي نحس فيه و نرتاح...اما معادش عندي جهد...معادش عندي قوة نكمل بيها بقية الثنية...لهوني و كهو...المخدر لي تسرب في بدني خلاني هادية بالنسبة ليهم الكل...اما حتى حد ما نجم يرى صياحي...و لا دموعي...سمعت الباب لي تحلت بالوقت...دخل طبيب و وراه زوز من العون...دورت راسي شوية نغزرلهم...قرب مني شوية يحكي
طبيب:لباس توا ؟
مرجعتلوش...هزيت عينيا فيهم...فهمت بالقدا علاه هوما...عاود غزرلي يحكي
طبيب:كان تحب نخليهم يرجعو مبعد
انا:ميسالش
العون:تنجم تعاونا مدام
انا:مممم
العون:اول شي حمد الله على سلامتك
انا:عيشك
العون:حسام الماجري يكون راجلك...و فما اعتراف منو انو هو سبب في اللي صار...تحب تأكد على كلامو ؟
بقيت نغزرلو...تعدات بين عينيا اللحظة لي فلت فيها يدو...شكون فينا السبب في اللي صار انا و لا هو ؟ يستهل البلاصة لي هو فيها ؟ بالطريقة هاذي هو باش يتحاسب...انا نجم نمنعو من بنتو و مينجمش يراها آخر مرة...خذيت نفس نحكي
انا:حسام ما عندو حتى ذنب
العون:شقصدك ؟
انا:طحت وحدي
العون:اما اعتراف حسام عكس كلامك توا
انا:صحيح تعاركنا...على هذاكا يحمل في روحو ذنب معندوش فيه...حسام بريء و انا لباس عليا
العون:متأكدة ؟
انا:مممم
العون:باهي
انا:ميسالش لحظة ؟
العون:تفضل
انا:يا ريت تخليه يجي في اقرب وقت...عالاقل يدفن بنتو بيدو
غزر لطبيب...هزلو براسو ايه...عاود غزرلي...و نزل راسو يحكي
العون:ربي يعوضك مدام
انا:عيشك
اول ما خرجو...غزرت لطبيب لي قاعد يعدل في سيروم...خذيت نفس نحكي
انا:نحب نرا بنتي
هو:اما
انا:امانك مرة وحدة كهو
هو:قبل ما يهزها بوها...نخليهم يجيبوها بحذاك شوية
غمضت عينيا و دورت راسي...اول ما خرج...تنهدت بالقاوي...منعرفش شنية مزال مخبي لتوا...حسيت بالباب تحلت...دوب نجمت نحكي
انا:م..ما نحب نقابل حد
تقلقت أكثر...كي حسيت بخطوات ماشية و تقرب مني دورت راسي بالوقت...باش نحكي...أما الكلام وحل في حلقي...آخر حد توقعت نشوفو توا...آخر حد توقعت يفوت من الباب هذا...هزيت روحي من غير ما نحس منعرفش شنية لي حسيتو بالظبط...حتى الكلام رزن في لساني...عديت عينيا على وجهو من غير حتى كلمة ياسر ضعف على اخر مرة ريتو فيها...برشا اسئلة دارت في مخي...ملقيتش جواب عليها...مديت يدي بالسيف كبست على كرشي...و هزيت روحي بالسيف باش نقعد قرب مني بالوقت...كبس على كتفي يحكي
بابا:خليك
انا:ع..علاه جيت ؟
مد يدو عداها على شعري...و غزرلي ندرا كيف...كيف اول مرة خسرت فيها امي...تنهد بالسيف يحكي
بابا:سامحني خاطرمي طولت عليك
انا:علاه توا ؟
جبد الكرسي...و قعد بجنبي...حط يدي بين يديه زوز يحكي
بابا:خاطرني اول مرة حسيت اني خنت الامانة متاع فرح...خنت الوعد...لي قطعتو عليها و على روحي
انا:و..وعد شنية ؟
بابا:اني ما نخلي حتى حد في دنيا يقهرك...و لا يبكيك اني منخليكش تحس بالوحدة بعد امك...وعدت و وعدت برشا...اما كنت اول حد نضرك...في لحظة غش سلمتك بيديا زوز...خليتك بين ناس ما تعرف عليهم حتى شي
سكت شوية...كانو يعمل في مجهود قوي...باش يحكي محبيتش نقاطعو...يمكن المرة هاذي محتاجة نسمع كلامو لتالي...حط يدو على قلبو...غمض عينيه بالقاوي و عاود حلهم يحكي
بابا:مريم يا روح قلبي...وقت ريتك اول مرة...عرفت انو الدنيا عطاتني فرصة جديدة...اول مرة غزرتلي...عرفت انو فرح عطاتني اكبر هدية في الدنيا...الخوف لي كنت نعيش فيه قبل ما جي انتي...وفى في اللحظة لي هزيتك فيها...وقتها فهمت انو انا منجمش نعيش من غيركم
انا:ع..علاه خليتها تموت كي هكا ؟
بابا:فرح خبات عليا مرضها...كيما انا حاولت نخبي حبي ليها و نهرب منو...وصلت مأخر برشا...لدرجة كل يوم و كل ليلة...من سنين نموت الف مرة
انا:نعرف لانت كنت و مزلت تحب حياة و كهو
بابا:صحيح انا نحب حياة...اما عشقت مرة وحدة كهو علاقتي بحياة تنجم تكون حب...احترام...صداقة زادة أما ماهيش عشق يا مريم
انا:انت عرست بأمي...جيست باش تنتقم...هذا زادة مش صحيح ؟
بابا:مش صحيح...عمري ما خممت اني نستغلها...فرح علمتني كيفاش نبدا من جديد...خلاتني نعرف شمعنى الواحد انو يحب...كانت مختلفة برشا...تضحك برغم انها موجوعة...ديما ناشطة...حتى المرض مبانش عليها...بعد 18 سنة...مزلت نتذكر كلشي عشتو معاها...يمكن انتي و ذكرياتها...خلاتني نقاوم السنين هذوما الكل
انا:علاه عرست بحياة ملا ؟
بابا:باش نقهر امي بيها...أما لقيت روحي نظلم فيها مع الوقت...حياة أكثر وحدة تعرف اني مزلت نحب فرح حتى ساعات كنت ناديها باسمها...اما عمرها...ما شتكات عمرها ما قالت حرف في حقها...حتى كي كانت تقسى عليك ساعات...تخاف تصيرلك حاجة و انا بعيد..صدقني رغم لي صار الكل...أما عمرها ما حاولت تشوه صورتك قدامي...اغزرلي بالقدا يا روحي دنيا هاذي مزالت باش تعلمك برشا...اللي خسرتو اليوم باش تعوضو غدوة مزلت صغيرة...و مزلت باش تعيش برشا حاجات أخرى باش تفرح و باش تحزن زادة...تنجم تربح كيما تنجم تخسر...اما وسط هذا الكل...نحبك قوية كيما نعرفك...رد بالك تخسر روحك عيش بنتي
انا:انا خسرت بنتي بابا...ميكفيش هذا ؟
بابا:يكفيك لي عشتو لتوا يا روحي...يكفيك لي ريتو منا الكل...بعد توا عيش لروحك و كهو...و ما تحاول ترضي حتى حد فينا...نحبك تسامحني زادة
انا:علاه تعمل في هذا الكل...مدامني مش بنتك ؟ و تبرأت مني في اول فرصة ؟
بابا:يمكن على خاطر معادش فما برشا وقت يجمعنا مع بعض...كان جات ليا...راني كل دقيقة تعدات من حياتي عديتها بجنبك و جنب امك
انا:ش..شقصدك ؟
كبس على يدي أكثر...و نزل شوية باسني منها...و تبسملي يحكي
بابا:بعد توا باش تلقاني بجنبك ديما...حتى كان رفضتني مانيش باش نخليك...لين نتهنى عليك...قبل
انا:من غير ما تكملها...يكفيني لي خسرتو لتوا امانك
تحل الباب بالوقت...دخلت رنيم...حالتها مش احسن منا...قربت منو تحكي
رنيم:هيا توا
بابا:رد بالك على روحك
قرب مني باسني من راسي...و هز روحو وقف...يمد في الخطوة بالسيف...قربت مني باستني من خدي تحكي
رنيم:متعبش روحك عزيزتي...حاول ترتاح تو نرجع
هزيتلها براسي ايه...من غير ما نزل عينيا عليه...قداش ضعف...قداش ظهر عليه المرض...زعمة شنية لي صار ؟ و شبيني محسيتش عليه جملة ؟ هاني قابلتو قبل في سبيطار...معناها وقتها ؟ قص عليا حبل أفكاري...زهرة كي دخلت...تحكي
زهرة:لباس توا يا روحي ؟
انا:ممممم
زهرة:يوجع فيك شي ؟
انا:لا
زهرة:سامحني عاللي صار قبيل
انا:جاوبني المرة هاذي ملا
زهرة:شفما عزيزتي
انا:شنية صار مع بابا ؟
زهرة:بعد آخر مرة...وقت عرف لانتي في العمليات تعرض لنوبة قلبية...كان مش طاطا حياة لحقت عليه و كلمت الاسعاف...وقتها
انا:كان هوني في نفس الكلينيك ؟
زهرة:كان في السبيطار...لي نجمت نعرفو انو حالتو تاعبة برشا...منعرفش اصلا كيفاش نجم يجي لهوني
انا:حتى هو يحب يمشي زادة
زهرة:ششش يزي...حتى حد ماهو باش يمشي باهي
انا:شنية صار في بنتي ؟ فاتت ساعة و انا نستنى فيه ياخي ماهوش باش يخليني نراها ؟
زهرة:مدامك سمحت لحسام...لازم يحضر باش يوقع الأوراق...و يكمل الإجراءات اللازمة قبل الدفن
انا:كيفاش ينجمو يدفنوها وحدها غديكا...مزالت صغيرة برشا...حتى لتوا نحس بخبطاتها في كرشي
زهرة:قوي روحك عيش اختي
انا:بيتها حاضرة...و سريرها زادة...علاه حتى يدفنوها وحدها
قربت مني قعدت بجنبي...كبست على يدي...و غزرتلي تحكي
زهرة:مريم حاول تكون قوية المرة هاذي زادة...فرح معادش موجودة...و متنجمش تكون معاك بعد توا صحيح توجع برشا...أما باش تستانس مع الوقت...مزال باش تجيب صغار...و باش تفرح بيهم زادة...باهي
انا:ماكش باش تفهمني زهرة...انا ما نحب على حتى شي...كان على بنتي و كهو
زهرة:يزيي عيش اختي
انا:نجم نمشي معاهم ؟
زهرة:انتي اليوم وين فقت...كان تبقى عالحالة هاذي تظطر لعملية أخرى
انا:معادش يهمني
كبست على يدي أكثر...دخلت امي فتحية...و رنيم و حياة معاهم...حتى هي تاعبة...و حسيت لي عندها برشا كلام تحب تقولو...اول ما دورت راسي...قلبي خض بالقاوي...لدرجة حسيتو باش ياقف...استندت بيدي على زهرة و تقعدت حتى الوجيعة لي في كرشي محسيتش بيها...كلشي نرا فيه بنتي لي ملفوفة في الأبيض...ثواني يفصلوني عليها حسيتهم دهر...قربت مني تحكي
هي:تنجم تشدها في يدك ؟
هزيتلها براسي ايه...حطتها في حملتي...بدني رعش بالوقت...كل حاجة فيا تحركت...دموعي تحصرت اما مهبطتش المرة هاذي...مانيش باش نخليها تغمني اني نرا بنتي...لأول و لاخر مرة...برغم الجبيرة لي في يدي اما نجمت نحضنها...مديت يدي بالسيف...عريت وجها شوية...هاي طلعت راقدة...كلشي فيها صغرون...عينيها و خشمها...و فمها زادة...عديت صوابعي على وجها نحكي
انا:فيق يا روحي...هاني معاك انا توا...مانيش باش نخليك مرة أخرى نوعدك...هيا حل عينيك...قلهم لانتي مزلت حية و باش تبقى معايا ديما...هيا يا روحي
نزلت عليها شوية...دوب بستها...و جبدت يدها...بستها منها زادة نحكي
انا:فررح...هيا قوم عيش بنتي...انتي تحملت برشا معايا قبل...ماكش باش تخليني توا...امانك
هي:مدام يزي كهو...وقيت باش ناخوها
انا:لاااا...رد بالك تمسها
كبست عليها أكثر...حسيت بالدفا متاعها في حضني قربتلي زهرة باش تهزها...تحكي
زهرة:مريم...يزي عزيزتي...وقيت باش تهزها
انا:ماانيش باش نعطي بنتي لحد...نعرف لهي باش تفيق امانك زهرة احكي معاها
رنيم:مريم امانك...متعملش في روحك هكا
انا:امي فتحية...خرجهم عليا امانك...قلهم لبنتي باش تعيش
قربت مني قعدت قدامي...تهدي فيا...كبست على بنتي أكثر...و كان لزم باش نكبش فيها لاخر لحظة...و مانيش باش نسلم فيها...مانيش باش نخسرها مرة أخرى
🔸️حسام يحكي:
الاحساس بالذنب...يخليك تموت بالعرق...بالعرق...لدرجة متعرفش شنية تلم في روحك بالظبط...و لا كيفاش تبدا من جديد...انك تخسر قطعة منك...قبل ما تشوف النور توجع...انك تكون السبب في وجيعة اللي تحبو توجع انك تاقف عاجز قدام لي تحبو توجع برشا..توجع عاللخر هذاكا لي ريتو في عينيها اول ما حليت الباب...نظرة انكسار...حزن...قاعدة تستنجد بكل حد تغزرلو...انو يخلصها و يخلص لي في يدها...ثواني خلاتني نرا فيهم الوجيعة و القهرة...ثواني غزرتلي فيهم بعينيها لي يرمشو...خلاتني نكره روحي...و نكره عجزي قدامها كسر حاجز الصمت...صوتها لي خرج مخنوق تحكي
مريم:ح..حسااام امانك...بعدهم عليا...قلهم يخلوني مع بنتي وحدنا...قلهم انت يسمعوك...اماانك اعمل حاجة متخليهمش يفكوها مني
خذيت نفس طويل...باش نجم نقربلها..باش نجم نخليها تستوعب لي قاعد يصير...مش حتى نستوعب انا قبل ؟ ميسالش اهم شي توا مرتك يا حسام...قربت بخطوات رزينة...امي بعدت عليها بالوقت...قعدت بجنبها...على طرف السرير...و نزلت راسي نغزرلها...لي يراها للحظة يستخايل لي هي راقدة...ملايكة على حالها...غزرتلي تحكي
مريم:ريتها محلاها ؟
هزيتلها براسي ايه...و مديت يدي بالسيف...شديت يدها الصغرونة...باردة ثلج...غمضت عينيا بالقاوي و عاودت حليتهم...تبسمتلي تحكي
مريم:زهرة قاتلي لهي تشبهني برشا...اما لون عينيها كيفك انت
انا:صحيح يا روحي
مريم:باهي...تو كي تحلهم مبعد و نتأكد وحدي
انا:م..مريم
مريم:باش تكون فرحانة في بيتها...نعرف لهي باش تعجبها
انا:مريم عزيزتي...يزي كهو
مريم:ماكش باش تخليهم يفكوها مني مش هكا...انت وعدتني من قبل حسام
انا:و مزلت عند وعدي...حتى حد ما عندو الحق يفكها منك...اما توا لازمها تمشي
مريم:قلهم يرجعوها للحضانة...اماانك...نعرف لهي باش تعيش...و ماهيش باش تخليني
انا:باهي يا روحي...هيا هات عليك توا
مريم:منحبش
انا:هيا عزيزتي...حتى انا نحب نهزها زادة
مريم:باش ترجعهالي مش هكا
هزيتلها براسي ايه...غزرتلي ندرا كيف...و نزلت عليها أكثر...تبوس فيها بحرقة...تودع فيها من غير ما تحس نعرف لمش قد بعضها توا...قربت منها هزيتها عليها...و قربتها عندي بستها من جبينها...و حطيتها في يد الفرملية...و شاورتلها بيدي باش تخرج...ضربتني بيدها تحكي
مريم:شنننية لي عملتو حسام...شنيية لي عملتووو انت علاه حتى تعمل فيا هكا ؟
خذيت نفس بالسيف...و هزيت راسي غزرت لمحمد لي دخل معايا قبيل...نحكي
انا:محمد خرج الجماعة معاك عيشك
اول ما خرجو...ضربتني بيدها مرة أخرى...و غزرتلي بحرقة تحكي
مريم:وثقت فيك مرة أخرى يا حسام...كيفاش نجمت تعطيهم بنتك...كيفاش نجمت تعمل هكا ؟
جبدتها عندي...وقت حاولت باش تقوم تخلط عليها كبست عليها في حضني...الكلام وحل بين شفايفي و دموعي لي نزلت تحرق...منعرفش على شنية قاعد نبكي بالظبط على بنتي و لا على حالتها هي...بستها من راسها نحكي
انا:يززي يا روحي...يزي اماانك
هزت راسها شوية...غزرتلي ندرا كيف...حسيت بوجيعتها في عينيها...كبست على يدي تحكي
مريم:علاه عملت فيا هكا...علاه خليتها تهزها ؟
مديت يدي نمسح في دموعها بالسيف...اصلا مش مصدق لانا قاعد بجنبها و محملها...خذيت نفس نحكي
انا:متعملش في روحك هكا...متحرقنيش أكثر من هكا اماانك
مريم:نحب نمشي معاها...منجمش نخليها وحدها غديكا
انا:مانيش باش نخليها وحدها...حاول تهدا ساعة باش نجم نمشي معاها
مريم:حسام اعمل حاجة...رجعلي بنتي امانك...انت وعدتني من قبل و انا صدقتك
كبست عليها أكثر...نعدي في يدي على شعرها..معنديش جواب لكلامها...بقات تحكي لين بدات تهدا وحدها دخلت الفرملية...باش تزرقلها...هزيتلها براسي لا..رجعت حطت زريقة في السيروم...ما نجمت نقولها حتى كلمة صوت أنفاسها ماشية و تهدا...نزلت راسي لقيتها غفات بستها من خدها نحكي
انا:سامحني يا روحي
جبدتها من حملتي...عدلتها في بلاصتها...و نزلت راسي نغزر لدم لي في كرشها...غزرت للفرملية بالوقت...قربت منها تحكي
هي:باش نطلب طبيب يعدي عليها...و احسن شي ما يدخل عندها حد...لين ترتاح باهي
انا:باهي
غزرتلها مرة أخرى...نعرف لي ماهيش باش تسامحني المرة هاذي...هذا كان نجمت نسامح روحي قبل...عديت يدي على وجهي...خذيت نفس و خرجت...الكل واقف يغزرلي...في الحالة لانا فيها...نحب نحط راسي عند امي و نرتاح كهو...نحب ننسى لي عملتو بيديا زوز نحب ننسى لانا قتلت بنتي و قتلت كلشي حلو كان يجمعنا...هزيت راسي نغزر لطبيب...و الفراملة لي وراه حط يدو على كتفي يحكي
طبيب:ربي يعوضك...مدامك كملت الإجراءات تنجم تهزها
محمد:حسام كلشي حاضر...وقيت باش نمشيو توا
ما نجمت نجاوب على حتى حد فيهم...كل تركيزي كان في بنتي لي ملفوفة في لحاف ابيض...بين يدين الفرملية...قربت مني بخطوات ثابتة...مديت يديا زوز كبست عليها...كأني نحاول نحميها من كلشي قاعد يدور بيها و من كل حد يحاول يقربلها...الوجيعة لي قاعد نحس فيها توا...حد ما ينجم يفهمها كان لي جربها...انك تهز صغيرك بين يديك و هو ميت...اصعب ببرشا من اللي عشتو الكل في حياتي...كل لي نعرفو توا...اني باش نلم طرف القوة لي عندي...و ندفن بنتي بيديا زوز...و ندفن كلشي حلمت بيه قبل ما تجي...لتوا كلام محمد يرن في وذني
محمد:مريم لباس طمن...أما
انا:اما شنية محمد...قول لي جيت على خاطرو...مدام مريم لباس شبي حالتك هكا ؟
محمد:ف...فرح
انا:شبيها بنتي ؟
محمد:منجمتش تتحمل أكثر...من قبل كانت ضعيفة و بعد الطيحة هذيكا
انا:اسكت متكملش
محمد:حسام
انا:قتلك اسسكت
محمد:مريم وحدها...و حتى حد ما ينجم يهديها غيرك...حاول تشد روحك عيش خويا
فقت من سرحتي كي قرب مني...حط يدو على كتفي يحكي
محمد:هيا توا...معادش فما وقت
هزيتلو براسي ايه...و خالطت عليه...لقيت معارفي الكل برا...دوب نجمت نرجع على تعازي متاعهم...حل محمد الباب ركبت بالوقت...نكذب كان نقول مستعد للي نعمل فيه...نكذب كان نقول اقتنعت انو بنتي لي بين يديا توا ماتت و ماهيش باش تكون موجودة بعد توا...ثنية كاملة عديتها...و هي في حضني و بين يديا...صورتها و هي تتحرك...لتوا صوتها في وذني...كيفاه باش نجم نسلم فيها...كيفاه باش نواجه مريم بعد توا...كيفاش باش نتحمل هذا الكل...شكون باش يحس بيا...و انا حرقت روحي و المرا لي حبيتها...كلشي تعدى قدام عينيا كي الحلمة...لتوا مش مش مستوعب كيفاه نجمت نحط بنتي تحت التراب...كيفاه نجمت نعمل هذا الكل...نزلت عندها...عديت يدي على ترابها...مزال بارد...دمعتي طاحت عليه بالوقت...ساقيا خانوني و منجمتش ناقف مرة أخرى...بقيت ساكت...كل مرة نحس بيد تحطت على كتفي...المقبرة فرغت...و الدنيا بدات تظلام...أما منجمتش نتحرك من بلاصتي...منجمتش نهز يدي من قبرها...قرب مني محمد يحكي
محمد:حسام...هيا قوم توا ؟
انا:اغزر محمد...انا قتلت بنتي بيدي...و دفنتها من غير ما نخمم مرتين...دفنتها و دفنت روحي معاها
محمد:انت ما عندك حتى ذنب في اللي صار
انا:شكون المذنب ملا...انا خسرت بنتي و مرتي فرد نهار...و خسرت روحي زادة
محمد:هيا قوم...مريم بحاجتك توا
انا:وعدتها لي مانيش باش نخلي بنتنا وحدها
محمد:هيا حسام...هيا عيش خويا
كبس على يدي...وقفني...نمشي معاه و مخي مش فوقي...معاد نجم نستوعب شي من اللي قاعد يصير...بعد توا باش نعيش على خاطر مريم و كهو...نعرف لي ثنية باش تكون طويلة المرة هاذي...نعرف لي ماهيش باش تسامحني زادة...أما مستحيل نجم نبرا من هذا الكل وحدي...مستحيل نجم نقدم خطوة وحدة من غيرها...طرف القوة لي عندي...باش تكون على خاطرها هي و كهو
🌸🌸🌸🌸🌸🌸🌸🌸🌸🌸🌸🌸🌸🌸
🔸️زهرة تحكي:
حطيت يديا زوز على كرشي...نسمة باردة تلعب بشعري متوقعتش باش نعيش هذا الكل فرد مرة...عمر و مريم مع بعض...الخوف لي عشتو و لي حسيتو...كبير برشا من اني نجم نوصفو لحد...كبست على كرشي اكثر...لتوا بين عينيا فرح اللي ما شافت حتى شي من دنيا...خفت نخسر بنتي بالطريقة هذيكا...زادة توحشت عمر اكثر من اي مرة...3 ايام كنت بحاجتو هو و كهو...بحاجة اني نحط راسي على صدرو و ننسى كلشي قاعد يصير
برشا أسئلة قاعدة تدور في مخي...و حتى حد ما ينجم يجاوبني عليها...نطمن عليه كان كي نراه و نحضنو..فرد وقت حتى حد ماهو لاهي باش يفكر فيه...خاصة بعد اللي صار...حسام مشى لجنازة بنتو...و مريم لي لتوا مش متقبلة لي صار...تنهدت بالقاوي...اصلا بعد ما زرقولها معاد حاسة على شي...هزيت روحي...و خرجت من الكلينيك...نحب نقابلو حتى مرة وحدة...نحب نفهمو انو الظروف لزتنا باش خليناه وحدو...نحبو يفهم انو انا معاه ديما و مانيش باش نخليه...وقفت طاكسي و ركبت...حتى منجمتش نرجع باش نخبرهم...كلشي يهمني توا اني نشوفو و كهو...منعرفش كيفاش وصلت للمركز...خلصتو و نزلت...دخلت مترددة...طلبت امين بالاسم...شوية و دخلت عندو...هز يدو يحكي
امين:تفضل اقعد
قعدت على طرف الكرسي...نفرك في يديا زوز..منعرفش من وين نبدا الكلام...غزرلي يحكي
امين:لباس مدام زهرة ؟
انا:س..سي امين...انا...نحب نقابل عمر امانك
امين:عمر مش هوني
انا:ش..شقصدك ؟
امين:مدام زهرة هدي روحك ساعة
انا:عمر وينو ؟ شنية لي قاعد يصير...متخبيش عليا سي امين عيشك
امين:عمر في الحبس توا
منعرفش على روحي كيفاش وقفت...حسيت روحي غرقت اكثر...خذيت نفس بالسيف نحكي
انا:ح..حبس شنية...نعرف لهو موقوف...كيفاش تهزوه للحبس في اقل من اسبوع...حتى من غير محاكمة
امين:مدام زهرة حاول تهدا عيشك
انا:نحب نشوفو...ياخي صعيبة لهدرجة
امين:للاسف ايه...الفترة هاذي ممنوع زيارة...عالاقل لين تتوضح الامور اكثر
انا:الحبس بعيد برشا على هوني ؟
امين:في منطقة ¤¤¤¤¤¤¤¤ هكا باش يكون قريب لينا
انا:باهي عيشك
امين:وين ماشية ؟
انا:نقابل راجلي سي امين
مخليتوش يكمل يحكي...حليت الباب و خرجت...ساقي اعلى من راسي...كلشي يهمني توا...اني نكون معاه و كهو...نحب نطمن لهو مليح...نحب نشوفو باش نرتاح شديت طاكسي مرة اخرى...طول الثنية و انا على اعصابي...حتى بنتي حسيتها مش مرتاحة...اول ما وصلت...نزلت نجري...وقفت مقابلة الحبس بالظبط نغزر للباب الكبيرة...للحرس لي في كل بلاصة...حطيت يدي على كرشي...نقوي في روحي...قربت بخطوات رزينة وقفت قدام الحرس...نغزر فيهم بعينين ضايعة...قربلي واحد منهم يحكي
هو:لباس مدام ؟
انا:نحب نقابل راجلي
هو:هوني ؟
انا:نجم ندخل ؟
هو:عندك إذن زيارة ؟
انا:تو ناخو من عند المدير هوني
غزر لصاحبو و ضحك بالوقت...ضعت بيناتهم و انا نغزرلهم...قرب مني يحكي
هو:ماكش جايا لاوتيل...هوني حبس يا مدام...برا على روحك توا
انا:نحب نقابل المدير هوني
هو:ياخي قاعد نلعب معاك هوني...برا جيب اذن و تو ندخلك بيدي عند سي راجلك
قحرتلو...قحرة متاع موت...قرب مني باش يبعدني وخرت خطوة لتالي
انا:رد بالك تحط يدك عليا...رد بالك
هو:باهي برا على روحك توا...المنطقة هوني خطيرة برشا...الجمعة الجاية...الزيارة مسموحة...تنجم تدخل من غير مشاكل
انا:نحب نقابلو توا
هو:ديزولي مدام...منجمش نعمل حاجة فوق خدمتي تفضل توا
غمضت عينيا بالقاوي و عاودت حليتهم...قلبي غم عليا و خواطري دارت...وخرت مروهجة من غير حتى كلمة توا...نعرف كان نقعد لهوني لصباح ماهوش باش يدخلني عندو...كبست بيدي على كرشي...كل خطوة نعملها...دموعي تنزل اكثر...منجمتش نتحمل اكثر من هذا الكل...اللي يفصلني عليه جرد باب و كهو...نحب نحضنو حتى مرة وحدة...تكيت عالحيط نرد في نفس ياسر تعبت اليامات هذوما...فجعة ورا اختها...من عمر لمريم...لفرح الصغرونة لي مشات في لحظة...و خلات الكل محروق وراها...خاصة مريم...لي كانت تستنى فيها بالدقيقة و الدرج...غمضت عينيا بالقاوي...نحاول نهدي روحي قد ما نجم...حليتهم عالكرهبة...لي وقفت قدامي غزرتلها مستغربة...نزل البلار من تالي شوية شوية..جات عيني في عينو...مستغربتش برشا...كرهبة مضخمة كيفها اكيد باش تكون ليه هو...ثواني عديتهم و انا نغزرلو...كاني نغزر لحياتي كيفاش باش تكون مبعد...و شنية يستنى فيا بالظبط...قحرتلو و تلفت باش نمشي خلط عليا بالوقت...جبدني من يدي...نطرتها منو...و هزيت راسي...غزرت لعينيه...و هزيت صباعي في وجهو نحكي
انا:رد بااالك...تحط عليا كسرتك مرة اخرى
عدا عينيه على وجهي...و هز يدو كبس على يدي...نزلها حاولت نجبد روحي منو اما شي...كي العادة قوتو ديما تظهر كي نطيح في يدو...قربلي شوية...وخرت خطوة لتالي...ضربت في الحيط بالوقت...كبس على يدي اكثر و حط يدو لاخرى بحذا راسي...نزل عليا اكثر...لين حسيت بالنفس متاعو في وجهي...تبسم على جنب يحكي
مراد:قوتك هاذي مش عليا صغرونتي
انا:شنية تحب مني بالظبط...علاه لاحقني لهوني ؟
مراد:علاه انتي امتى غبت على عيني ؟
انا:زايد الحديث مع واحد مريض كيفك...سيبني احسن ما نلم عليك العباد الكل
مراد:و تهديدك زادة مينفعش معايا يا روحي
انا:ميزيتش لتوا...متعبتش و انت لاحقني من بقعة لبقعة...هاك فكيتلي حياتي شنية تحب اكثر ؟
مراد:تعرفني شنية نحب بالظبط...من غير ما تعمل فيها المرا المجروحة لي خلاها راجلها و دخل للحبس...ساعة هذيكا البلاصة تناسبو برشا...و انا وصيت عليه جماعتي طمن
انا:شنية نعتبرو هذا تهديد منك ؟
مراد:لا حبي...تعرفني منحبش فيك...و زيد انتي بروحين توا
مد يدو باش يحطها على كرشي...شديتها بالوقت...كبست عليه...منعرفش كيفاش لميت قوتي ساعتها...و هزيت راسي في وجهو مرة اخرى...لين نفسنا ولى واحد...قحرتلو نحكي
انا:الروح لي هوني متاع عمر و كهو...لا انت و لا حتى حد غيرك عندو الحق يحط يدو على بنتي...كان يمشي في بالك انك نجحت...خليني نقلك انك المرة هاذي زادة غلطت...ماكش باش تفرقني على عمر...حتى كان حبستو عشرين سنة...باش نبقى نحبو و نعشقو...اكثر من قبل زادة...و اللي تعمل فيه ماهوش باش يخوفني بعد توا...اما رد بالك تفكر تحط يدك عاللي في كرشي وقتها صدقني لا انا و لا عمر راح يرحمك من اللي جاي
تبسم ندرا كيف...و حصرني مع الحيط اكثر...قربو ليا خلاني نتقزز من روحي فرد وقت...غزرلي بنفس الغزرة متاع كل مرة...يحكي
مراد:زهرة...يا روح قلبي...قتلك رد بالك تخرج فيا الشيطان لي داخلي...خاطرني منجمش نشد روحي وقتها...تصرفاتك هذوما مش معايا...خاطر كلمة مني نمحيه راجلك لي قاعدة تتقوى بيه عزيزتي
انا:غريبة فيك انت لتوا منجمتش تفهم علاقتي بعمر...و ماكش باش تفهم حبنا زادة يا مراد...اعمل لي تحب عليه و كيما تحب...اما انا لعمر و كهو...منعرفش كيفاش اما حاول تستوعبها باهي
حاولت نجبد روحي منو...كبس عليا اكثر...و نزل يحكي في وذني
مراد:منجمتش نفهم دوماج...اما وقيت باش انتي تفهمني عزيزتي...وقيت باش تفهم حبي ليك
انا:مانيش مستعدة باش نفهم واحد مريض و بسيكوبات كيفك مراد...ابعددد علياااا
مراد:صدقني باش تجي لعندي بساقيك زوز...و باش ترجع لحضني وحدك يا زهرة
انا:ااابعددد عليااا
عدا خدو على خدي...يشم في ريحتي كي العادة..صوت انفاسو مسموعة مع صوت النسمة القوية...طريق خالية مفما حد غيرنا و شوفور متاعو لي يستنى فيه خواطري دارت اكثر...حطيت يدي على صدرو نحكي
انا:م..مراد ابععد علياا...ابععد
وخر خطوة لتالي...استندت بيدي عالحيط...دوخة قوية روهجتني...قرب مني باش يشدني جبدت روحي نحكي
انا:م..متمسنيش
مراد:مش وقت هبالك توا...ريت حالتك ياخي
انا:انت السبب في حالتي هاذي...من غير ما تعمل فيها المنقذ متاعي توا...ابعد عليا و كهو
مراد:زهررة
بعدت عليه...نعمل في الخطوة بالسيف...نحب نبعد من هوني و كهو...نحب نبعد من كل بقعة تجمعني بيه...ساقيا رزنت و معادش تهزني...دوب نجم نرا قدامي...حسيت بيديه لي حاوطوني من تالي...قبل ما نطيح...كبس عليا يحكي
مراد:زهرررة
كبس على راسي بالوقت...جات عيني في عينو...دوب نجمت نركز فيه...في ملامحو لي تبدلت لخوف في لحظة...تسكرو عينيا بالوقت...و معاد حاسة بحتى شي
🔸️مراد يحكي:
كبست عليها بيديا زوز...من شهور طويلة...مسرحتش في تفاصيل وجها كيما توا...عديت عينيا على عينيها خشمها...شفايفها...شي ما تبدل فيها لتوا...كان حبي ليها ماشي و يقوى...و معادش نعرف وين باش يوفى هذا الكل...عذابها يقتلني و يرتحني فرد وقت...يرتحني خاطر ماهوش باش يكون في حياتها مرة اخرى..خذيت نفس...و هزيتها بين يديا...نزل اشرف بالوقت...حل الباب من تالي...عدلتها في الكرسي...و خلطت عليها ركبت بجنبها...نحكي
انا:امشي ¤¤¤¤¤¤¤¤
اشرف: باهي سي مراد
تكيت لتالي...و غمضت عينيا بالقاوي...نكذب كان نقول كلامها ميأثرش فيا...بالعكس كل كلمة تخرج منها توجعني بطريقة غريبة...و تقويني زادة...اول ما وصلنا غزرتلو نحكي
انا:استنى برا
اشرف:باهي
اول ما نزل...تكيت راسي لتالي...نغزرلها...قداشها هادية كي عادتها...مديت يدي...عديت صوابعي على خدها نرجع في خصلات شعرها لتالي فرد وقت...تنهدت بالقاوي نحكي
انا:منقصدش لي صار يا روحي...منقصدش نحطك في الحالة هاذي...و نخليك تعيش الوجيعة هاذي الكل..انتي اخترت و انا تبعت ثنيتك...و مستعد نمشي معاك لاخر الدنيا زادة
نزلت بصوابعي لشفايفها...منحبش نستخايل لي هو ملكهم قبلي...قربتلها اكثر...لين انفاسنا تخلطت مع بعضها...غمضت عينيا بالوقت...نتحسس في قربها مديت يدي عديتها على كرشها...احساس ندرا كيف تملكني ساعتها...ميهمش شكون بوه...لي يهم انو قطعة منها هي...اول ما وصلت لشفايفها حليت عينيا بالوقت شي اقوى مني...منعني...منعني اني نستغلها...اني ناخو حاجة منها بالغصب...كلشي نحب عليه يكون بارادتها هي...يكفيني قربها لهدرجة ؟ معادش نعرف الجواب لي ينجم يقنعني...خاطر لي نحب عليه بالظبط...انو زهرة تحتويني بكلي...اني نغطس في حضنها بعيد على العالم هذا الكل...لتوا انا خسرت كلشي حتى مبادئي على خاطرها...مشيت في ثنية منجمش نرجع منها...ثنية بمفترقين...الاول فيه زهرة...و الثاني الموت...حلت عينيها شوية شوية...مزالت دايخة لتوا...تحاول تستوعب وين هي بالظبط...منجمتش نجبد روحي منها و لا حتى نبعد...غمضت عينيها بالقاوي و عاودت حلتهم جبدت روحها لتالي مروهجة...تحكي
زهرة:ف..فاش تعمل ياخي ؟ وين انا ؟ شنية لي صار هوني ؟
خذيت نفس...و هزيت راسي شوية نغزرلها...ترجع في شعرها لتالي...تصرفاتها الصغيرة...تخليني نسرح فيها من غير ما نحس على روحي...تبسمت نحكي
انا:حتى شي...جيست دخت و كهو
زهرة:دخت ؟ شبيني هوني ملا ؟
انا:تحبني نخليك ملوحة غديكا ؟
زهرة:احسن من انك تهزني بيديك المسخة
قحرتلي و جات باش تنزل...جبدتها لعندي...كبست على زنودها بيديا زوز...و قربتها ليا اكثر...لين جا وجها في وجهي...غزرتلها نحكي
انا:باش نعتبرك مريضة و مش قد بعضك توا...اما و راسك يا زهرة...كان مزلت تغلط في الكلام معايا ما تلوم كان روحك...تسمع فيا
زهرة:علاه قلت حاجة غالطة انا ؟
كبست على رقبتها بيدي...عينيها دمعو بالوقت...قحرتلها نحكي
انا:تحب تجرب الوسخ على اصولو ؟
زهرة:س..سيبني...م..مراد...س..سيب
انا:مجربش غشي زهرة...معادش تستفزني بعد توا...هذا احسن لينا الكل...مفهوم كلامي
كبست عليها اكثر...حطت يدها على يدي...و هزتلي براسها ايه تحكي بالسيف
زهرة:ب..باهي...س..سيبني توا
رخفت يدي عليها...حطت يدها على رقبتها تكح بالقاوي هزت راسها...غزرتلي نفس الغزرة متاع كل مرة...تحكي
زهرة:عمري ماني باش نغفرلك لي عملتو فيا مراد...و كل مرة يزيد حبك ليا...انا نزيد نكرهك اكثر...و مانيش باش نكون ليك...نهايتي باش تكون مع عمر...و لا مع الموت
عديت عينيا على وجها...كبست على يدي...نهدي في روحي...خذيت نفس نحكي
انا:انزل...و رد بالك تفكر تحط ساقك غديكا مرة اخرى
زهرة:والله انا من غير كلام راجلي ما نسمع لحتى حد
حلت الباب باش تنزل...عاودت تلفتت عندي بالوقت تحكي
زهرة:صحيح تذكرت...نظن انا مرة ربحتك في قضية التحرش...و في القانون ممنوع تقرب مني...و لا تجي في ثنيتي...كان مزلت دور بيا مراد...باش نخليك تخلط على عمر...و هو غديكا يعرف خدمتو معاك...ان شاء الله كلامي يكون مفهوم زادة
هزتني و حطتني...و نزلت من الكرهبة...ضربت الباب بالقاوي...منجمتش نرجعلها الفرخة...ساعات نشيخ على قوتها...لي تحاول تثبتها قدامي...تكيت راسي لتالي و تنهدت بالقاوي نحكي
انا:باش ترجعلي يا زهرة...باش ترجع وحدك المرة هاذي
مديت يدي نزلت البلار...تأكدت لي هي دخلت لدارها شاورت لأشرف باش يركب...نزلت راسي نغزر لشال متاعها لي بقى في الكرهبة...كبست عليه بيدي...نحكي
انا:امشي للفيلا
اشرف:باهي
منعرفش شنية مزال باش يصير بالظبط...اما لي متاكد منو انو اخر ضربة باش تكون قوية عليهم زوز محسيتش بالثنية كيفاش وصلت...كلشي كنت نخمم فيه...ملامحها لي كانت تاعبة...غشي لي منجمش نتحكم فيه و يخليني نضرها غصبا عليا...كبست عالشال اكثر و نزلت...اول ما حلت البون الباب...جات عيني على شراز لي قاعدة في صالة...تنهدت بالقاوي...ما عيني في حتى شي توا...غزرتلها تشرب في قهوتها...تعديت كانو مفما حد قاعد...وقفتني تحكي
شراز:مرااد...ايجا اقعد
انا:شتحب مني شراز ؟
شراز:يمكن عندنا ما نحكيو ؟
انا:في رايك انتي فما شي نحكيو فيه ؟
شراز:مراد امانك
خذيت نفس...و قربت منها...ترميت بجنبها و تكيت لتالي نحكي
انا:نسمع فيك
شراز:عرفت شنية لي صار في مريم ؟
انا:شنية لي صار ؟
شراز:مراااد...نعرف لي في بالك بكلشي...متلعبش على اعصابي عيشك
انا:شمدخلني فيها الحكاية انا ؟
شراز:بربي ؟
انا:انتي اخترت الطريقة لي ترتحك من الام و بنتها فرد وقت شراز...هوكا الثنية محلولة قدامك...شنية تحب مني توا ؟
شراز:مكنتش نعرف لي باش يصير هذا الكل...محبيتش حسام يخسر بنتو بالطريقة هاذي مراد
انا:شبيك مخممتش فيها الحكاية قبل ما تعمل هذا الكل
شراز:ما عملت شي...جيست حبيتها تبعد عليه و كهو
انا:و انا شعندي نعملك ؟
شراز:كان يعرف حسام لانا سبب ماهوش باش يسامحني جملة
انا:و كيفاه باش يعرف ؟
شراز:شنية تقصد ؟
انا:بالعكس نظن توا اكثر وقت تنجم تقرب فيه لحسام
شراز:كيفاش ؟
انا:شراز متسكرش مخك عيشك...انتي و انا نعرفو لي مريم ماهيش باش تسامحو بعد توا
شراز:يعني
انا:بالظبط لي جا في مخك شراز...حسام بحاجة حد يبقى قريب منو...يفهمو...و يعاونو باش يخرج من اللي هو فيه...و نظن وحدة كيفك مش باش يصعب عليها هذا الكل
شراز:باش يصدقني في رايك ؟
انا:والله يا شراز...اللعب يعتمد عليك توا...ماكش باش تكسرلي راسي بحسام زادة
شراز:شعملت مع زهرة ؟
انا:في رايي التهى بحكايتك مع حسام يكون احسن انتي من غير شي باش تهبل عزيزتي
كبست عالشال في يدي و قمت...خليتها قاعدة غاطسة في افكارها و طلعت لبيتي...خذيت نفس منو و طيشتو عالسرير...دخلت لصال الدوبان...غسلت وجهي اكثر من مرة...نحس في روحي باش نتخنق...استندت بيديا عالرخامة...و هزيت راسي نغزر لروحي...و لا بالاحرى نغزرلها ليها...لتوا صورتها بين عينيا...كلامها تالي..خلاني نرا كمية الكره لي في عينيها...شبيني انا منجمش نكرها شبيني منجمش نخرجها من مخي...قداش باش نبقى مريض بيها...لا نجمت نرتاح و لا نرتحها مني...كل يوم و كل ليلة تتعدا نلقى روحي تعلقت بيها و بكلشي يخصها اكثر من قبل...قص عليا صوت تليفوني...هزيت المنشفة في يدي و خرجت...مسحت و جهي...و طيشتها على جنب...لقيتو المحامي يطلب...نفخا بالقاوي...و هزيت عليه نحكي
انا:شفما ؟
هو:الاوراق لي طلبتها حاضرة سي مراد
انا:باهي برشا
هو:تحب نجيبهالك توا
انا:نستناك في السوسيتي غدوة
هو:باهي سي مراد
علقت عليه و ترميت عالسرير...حطيت يدي على عينيا زوز...مبقاش برشا و نرتاح من شي اسمو عمر و زهرة بعد توا باش تكون عندنا ثنية جديدة...ما فيها حد غيرنا...ميهمش شنية لي باش نخسرو و شنية لي باش نكسبو...لي يهمني انو زهرة باش تكون معايا و ليا انا كهو
#سمر🌸