زهرة🌸

الحلقة مئة

حلقة 100
عمر يحكي:
سكرت الباب...و هزيت راسي نغزر لسوسيتي متاعو...و لا مرة مشى في بالي باش نكون شريك عبد كيفو...و لا ندخل في حرب باردة معاه...يمكن نخرج من رابح و لا خاسر...اما في الحالتين...باش نربح مرتي و بنتي...باش نعيش لي تحرمت منو سنين...و شهور...عشت عمري الكل وحدي...مشى في بالي الحياة المثالية بعد العرس...مع سرين ولا غيرها...هذا كان حد مخي...بعد الفراغ لي عشت فيه سنين طويلة...اما لاول لحظة ريتها...اول مرة جات عيني في عينها...اول مرة سمعت صوتها...برشا حاجات تبدلت في حياتي...لدرجة معادش نعرف اذا انا بالحق عمر و لا لا...اذا صحيح لي نعمل فيه و لا لا...كلشي كان يهمني...اني نشوفها و كهو...من اللي كنت نهرب منها...وليت نتنفسها...وليت نحب نرقد و نفيق على صوتها و ريحتها...كان فما ادمان من نوع اخر...بالنسبة ليا هو زهرتي...دورت راسي على صوتها تحكي
ملك:ندخلو ؟
هزيتلها براسي ايه...و هزيت يدي شوية...نحكي
انا:تفضل
ملك:عيشك
دورت يدها في يدي...دوب غزرتلها...و مديت الخطوة...دخلنا مع بعضنا...لقيت المشرف متاعهم قدامنا...خلطنا عليه لقاعة الاجتماعات...اول ما حل الباب...خليتها دخلت و دخلت وراها...جبدتلها الكرسي قعدت...و قعدت بجمبها...خلط حسام و نادر بالوقت...و بقية المساهمين في المشروع...حتى شراز...لي ندرا شنية حكايتها...و شتحب منو لتوا...تعداو دقايق على بعضهم...كل حد يتناقش مع لي بجنبو...كان انا عينيا تركزو في الباب...نستنى في طلتها عليا...اول ما تحل الباب...كبست على ستيلو في يدي...و انا نغزرلها...اسبوع كامل تعدا.. على اخر مرة ريتها...و اخر مرة شميت ريحتها...و سمعت صوتها...حتى ريحان دوب تجي تشوفها و تمشي و في الوقت لي نبدا فيه برا...و مش بعيد تكون هند لي تنقللها في الاخبار...بدني تكبس و العصب بدا يركبني...و نفس الاحساس سيطر عليا...نهارت لي ريتها معاه في الحفلة...عديت عينيا عالروبة الروج لي مسنترة على بدنها...لحد ركبتها بالظبط...و خلي الكعب لي صوتو واصل لوذني...هزيت راسي شوية نغزر لوجها...لخصلات شعرها لي طايحين على وجها...شفايفها لي بالروج الغامق...كانها جاية سبيسيال باش تقهرني و كهو...كبست عالستيلو اكثر...و انا نغزر ليدو لي تحطت على ظهرها...قداش باش نتحمل اكثر...اصلا اكا ليلة عديتها بطلوع الروح...عديتها و انا نصبر في روحي انو الكابوس هذا باش يوفا...و مهما استفزني بالتصرفات هذوما...مانيش باش نخليه يغلبني...متأكد بالقدا...انو ليلتها...كان يحب يخليني نخرج من سينتي و نفسد الحفلة...ووقتها يوفا المشروع قبل ما يبدا...بالطبيعة مكانش يستنى انو نكون في بلاصة ملك...و اللي كان مخططلو لازملو plan جديد...بقيت نتبع فيهم بعينيا...لي قعدها...و قعد مقابلني بالظبط...هزيت راسي شوية...جات عيني في عينو...نفس التحدي يغزرلي بيه...اما المرة هاذي...ما عندو حتى شي يخسرني بيه...حتى زهرة لي كان يهددني بيها...هي بجمبو توا...تكيت لتالي...نغزر لسكرتيرة متاعو...و هي تحط في دوسيات لكل واحد فينا...طلعت راسي شوية...على صوتو يحكي
مراد:الاتفاقيات متاع المشروعين تلقاوها عندكم...اقراوها بالقدا...و كل حد فيكم يقدم رايو بخصوص الحكاية...بالاخص انت سي عمر
خذيت نفس و حليتو...دوب ريت اول ورقة...و جبدتها على جنب...عينيا وساعو و انا نقرا في الورقة لي بعدها...نفس الورقة...لي وقعت عليها شهور لتالي...و لي كانت سبب في اللي صار الكل...نفس الورقة لي خلاني نختار بيها حريتي و لا حرية زهرة...هزيت راسي شوية...لقيتو لاهي يقرا في دوسي...غزرتلها بالوقت...من غزرتها فهمت كلشي...فهمت لهي حطت الورقة في الدوسي متاعي...الورقة لي كان ينجم يستغلها في حاجات اخرى...و ندرا على شنية كان ناوي...اما السؤال الاهم توا...وين لقاتها و كيفاش وصلت ليها...ساعتين عديتهم و انا مخي يهز فيا و يجيب...مسمعت حتى كلمة من اللي تقالت لتوا...هزيت راسي على صوتو مرة اخرى
مراد:شنية رايك بالنسبة للبوند لي قدامك
انا:للاسف مش كلشي قلت عليه يناسبنا
ملك:عممر
انا:باش نقراهم مرة اخرى...و اكيد باش تكون عندنا مناقشة اخرى
حطيت يديا زوز عالطاولة...و غزرتلو مرة اخرى نحكي
انا:النسخة هاذي باش تبقى عندي...كان ميقلقكش اكيد
مراد:بالطبيعة
دورت راسي شوية غزرتلها...تلعب بالستيلو...كانها مش معانا جملة...نزلت عينيا شوية نغزر للكوليي لي حطيتو على رقبتها...ليلة عرسنا...حسيت روحي تفرهدت شوية عد فازة الخاتم...لي قعدت تحرق فيا أسبوع كامل الخاتم لي وليت نحتفظ فيه داخل مكتوبي...جنب البراصلي متاعها...يمكن وقتها برك استوعبت لي عملتو فيها...و الطريقة لي جرحتها بيها...فقت أنو غيرتي خلاتني نهرد الدنيا من غير ما نحس على روحي...فكرة لهو كان يتحسس في كل بقعة منها بيديه...خلاتني نخرج من عقلي...منجمتش نتحمل قربو منها لأكا الدرجة...حتى اسمها منحبش نسمعو من فمو...أول ما رجعتلي الفكرة...و تذكرت لي صار ليلتها...بدني فور من أول و جديد...كأنو الحكاية تعاودت قدامي مرة أخرى رجعت بالكرسي لتالي...و هزيت روحي وقفت...وقفت ملك في جرتي...و حسام زادة...ستنيت الباقي وقف...و غزرتلو نحكي
أنا:نستناوك باش تشرفنا
مراد:اكيد
تبسمت على جنب...كبست على دوسي في يدي و هزيت روحي خرجت...نزلنا مع بعضنا للبرا...خلطو علينا بالوقت...حليت الباب ركبت...نغزرلهم من بعيد و هو يوصي في اشرف عليها...اول ما رجع الداخل...تلفت لملك نحكي
انا:ملك...خلي حسام يوصلك
ملك:صارت حاجة ياخي ؟
انا:نحكيو مبعد
ملك:باهي
نزلت البلار...و شاورت لحسام من تالي...أول ما طمنت لهي ركبت معاه...طرت بالكرهبة و شديت ثنيتهم منعرفش كيفاه خلطت عليهم...زمرتلو بالقاوي...باش ياقف...عملتلو سينيال باش يحبس...شد الفران على جنب...ركيت وراه...و نزلت...قربت منهم و حليت الباب هزت راسها غزرتلي مصدومة...تحكي
زهرة:ع..عمر...فاش تعمل ؟
كبست على يدها و نزلتها من الكرهبة...سكرت الباب بالقاوي...و تلفت نغزر لاشرف لواقف يغزرلنا مزهبل يحكي
أشرف:س..سي عمر...فاش تعمل ياخي ؟
انا:زهرة باش تبقى معايا
زهرة:عمممر...فاش تعمل ياخي ؟
أنا:سكر فمك إنتي
أشرف:كان يسمع...سي مراد...ماهوش باش يعدي الفازة
انا:أنت وصلت زهرة باش تشوف بنتها....باش تجاوبو بالطريقة هاذي
أشرف:أما
أنا:نعرفك باش دبرها
زهرة:يدبر شنية ؟ اشرف شفما ياااخي ؟
أشرف:باش نهزك من الفيلا مدام زهرة
أنا:صحيتك أشرف
اشرف:تأمر سي عمر
ضربتو بيدي لكتفو...و كبست على يدها...جبدتها معايا لكرهبتي...حليت الباب...ركبتها و خلطت عليها...كبست عالفيتاس...و طرت بالكرهبة...غزرتلي تحكي
زهرة:ميساالش تفهمني لي قاعد يصيير...كان معندكش مشكلة اكيد
انا:مش قتلك نحب نحكي معاك قبل ؟
زهرة:مش بالطريقة هاذي...كأنك خاطفني
دورت راسي غزرتلها...عديت عينيا على وجها و تبسمت نحكي
انا:بالظبط عزيزتي
زهرة:شقصدك ؟
انا:نقصد لي قاعد يدور في مخك
زهرة:لحظة...لحظة...ياخي أنت تعرف أشرف من قبل ؟
انا:شبيك مستغربة ؟
زهرة:يعني ؟
انا:بالظبط..أشرف كان يعرف لانتي معايا في دار نهارتها و هو لي عطل مراد باش يلقاك...و كل مرة تقابلنا فيها كان يقول العكس لعرفو...بالظبط كيما توا
زهرة:ك..كيفاه هكا ؟ و كيفاه تنجم تاثق فيه ؟
انا:أشرف كان يقرا عندي
زهرة:شننووة ؟
انا:كيفك بالظبط يا روحي
زهرة:مانيش روحك...و شقصدك بكان يقرا عندي...و امتى قرا عندك ياخي و شبيني اخر من يعلم بيها الحكاية هاذي ؟
انا:هاك عرفت توا
زهرة:باااهي...وين باش تهزني توا...ميسالش تخبرني ؟
انا:انتي اليوم متاعي عزيزتي
زهرة:شو على اكا ثقة لي عندك...كان معندكش مانع هزني عند بنتي و كهو
انا:قتلك باش تبقى معايا...و مش باش نعاود كلامي مرة اخرى
زهرة:في رايي عندك حاجات اهم مني...لازمك تتلهى بيها
انا:مفما حتى شي اهم منك انتي في دنيا
غزرتلي ندرا كيف...و تكات لتالي...ربعت يديها...تهز و تنفض وحدها...اما ملقيتش حل اخر غير هذا...اصلا مصدقتش لهي خرجت معانا فرد وقت...و مع اشرف زادة...طفل هذا بالظبط حبيت كان كمل قرايتو...و مقصش عليها وقتها...نعرف لظروف لزاتو باش يحبس على بكري...اما لي متوقعتوش اني باش نرجع نقابلو مرة اخرى...و في ظروف اخرى...و لهو باش يخدمني على حساب حياتو...يمكن الحاجة لي مريحتني...انو فما شكون في الفيلا هذيكا قريب منها و يطمني عليها في كل لحظة...حتى مدام فضيلة...لهي عمتو...تخليني نعرف كلشي قاعد يصير داخل الفيلا...و الاهم معاملتو معاها...ثنية كاملة و هي تقحرلي...مش عاجبها...شديت الفران في بلاصة كالم...ما فيها حتى حد غيرنا...فكيت الحزام و تكيت لتالي...نفخت بالقاوي تحكي
زهرة:نسمع فيك...علاش جبتني لهوني ؟
دورت راسي شوية نغزرلها...تفرك في يديها بعصب مديت يدي حطيتها عليهم....جبدت روحها بالوقت تحكي
زهرة:متمسنيش
انا:باهي اهدا
زهرة:كان مفما شي تحكي فيه...روح بيا توا
تكيت راسي لتالي...و تنهدت بالقاوي...نحكي
انا:توا بالظبط منجمش نروح بيك
زهرة:علاش ؟
دورت راسي شوية...غزرت لعينيها بالظبط...و خذيت نفس نحكي
انا:على خاطر...حاجتي بجرعة جديدة باش نجم نتنفس كيما العباد...و الجرعة هاذي...ناخوها منك انتي و كهو
مديت يدي شوية...بعدت خصلات شعرها لي لصقت على وجها...حسيت بنفسها لي ضياق اكثر...غزرتلي ندرا كيف تحكي
زهرة:أنت...معادش عندك الحق في الكلام هذا...على خاطر وحدة كيفي قاعدة تموت...متنجمش تعطيك حياة جديدة يا عمر
جيت باش نحكي...سبقتني كي حلت الباب و نزلت خذيت نفس و خلطت عليها...وقفت عالحافة بالظبط النسمة الباردة...خلات شعرها يرجع لتالي...قربت منها وقفت وراها بالظبط...نسمع فيها تحكي
زهرة:شووف...غديكا...الحافة لأخرى
هزيت راسي...نغزر لوين قاعدة تشاور بصبعها...فرد وقت نسمع فيها تحكي
زهرة:الفرق بيني و بين الزهرة هذيكا...أنو لي يوصل ليها...تعطيه حياة جديدة
تلفت عندي بالوقت...غزرتلي في عينيا بالظبط...و كملت كلامها تحكي
زهرة:و انا زهرة مسمومة...كل حد منكم يقرب مني اكيد باش يدفع حياتو في المقابل
قربتلي اكثر...هزت روحها شوية...و قربت لوذني تحكي
زهرة:السم متاعي قاتل يا عمر...قاتل لدرجة...حتى الناس لي نحبها...ماهيش باش تسلم منو
قبل ما تجبد روحها...حطيت يدي على ظهرها من تالي لصقتها فيا أكثر...و عديت خدي على خدها نحكي
انا:شكون قلك لانا مانيش نموت في كل دقيقة و في كل لحظة نعديها و انا بعيد عليك...انا تجرعت سمك من اول لحظة ريتك فيها يا زهرة...من اول لحظة غزرتلي فيها...اما الغريب...اني وليت بحاجتك باش نجم نعيش
جبدت روحي شوية...حطيت يدي على خدها...و غزرتلها نحكي
انا:أغزرلي هوني...اغزر لعينيا زهرة...انا وليت مدمن عليك...مدمن على قربك...على ريحتك...على صوتك على بدنك...إنتي ملكتني...و مخليتش فيا...ياخي تستخايل ساهل لي قاعد نعدي فيه...ساهل عليا و انا نغزر لبنتي...لي نحسها حتى هي تلوم فيا
هزيت يدي لاخرى...و كبست على وجها بيديا زوز..نزلت عليها اكثر و كملت كلامي نحكي
أنا:منجمش نتحمل قربو منك...غزرتو ليك تحرقني تسمع فيا...تحرقني يا زهرة...توجعني بطريقة غريبة قداش لازمني نتحمل أكثر ؟ هاني شديت روحي مرة و زوز...و ثلاثة...و في كل مرة إنتي تحبسني...قداش لازمني نصبر...إنتي خبرني...قداش لازمني نتحمل بعدك عليا و قربك منو...قداش لازمني نستنى اكثر...تكللم ؟
كبست على وجها اكثر...لين ولات عيني مع عينها تبسمت نحكي
أنا:ميسالش...باش نصبر لاخر لحظة...باش نصبر على خاطرك إنتي...اما..أقسم بالله يا زهرة و راس بنتي...كان حاول يعملك شي...كان يحط يدو عليك...و لا يجبرك على حاجة...و الله العظيم...ما نقتلو بيدي...و صدقني مانيش باش نتراجع المرة هاذي
جبدت روحها مني في لحظة...رجعت شعرها لتالي...و غزرتلي ندرا كيف تحكي
زهرة:كملت كلامك...هذا كلشي تخمم فيه...أنك تقتلو و تخسر حيااتك...نسيتني انا...باهي خليك مني...ريحان شنية ذنبها ؟ شكون عندها غيرك هي...أنت ماكش باش تقتل مراد يا عمر...على خاطر بنتنا ماكش باش تقتلو تحب تكمل في انتقامك...باش نبقى معاك لاخر لحظة و باش نقعد عند وعدي...هذا اقل شي نجم نعملو مقابل لي عملتو أنت على خاطري
جبدتها من يدها في لحظة...قربتها ليا...و غزرت لعينيها لي حمارو بالوقت...كبست عليها اكثر نحكي
انا:ما نحبك تعمل حتى شي على خاطري...تسمع فيا خليك بعيدة عليه الكلب هذاكا...و الفازة متاع الورقة باش نتفاهمو فيها مبعد
زهرة:كان باش يخليك تشد الحبس مرة اخرى...تحبني نقعد نتفرج عليك و أنت بين أربع حيوط مرة اخرى
انا:زهررررة...كان لزم نعدي حياتي الكل غديكا...انتي خليك بعيدة عليه...متنجمش تتوقع ردة فعل واحد بسيكوبات كيفو...و شنية ينجم يعمل فيك...ياااخي مصممة باش تجلطني على بكري...و لا شنية حكايتك...علاه متسمعش الكلاام ياااخي ؟
نطرت يدها مني...وخرت لتالي...و هزت راسها قحرتلي تحكي
زهرة:الحق عليا...على خاطرني خممت فيك...كارني مخممتش في طليقي...كان خليت صحبتك تحل الحكاية
انا:شكون صحبتي ؟
زهرة:عيب عليك والله...هكا نكرت فيها من اول لحظة و لا صاايي بعد ما عرفت لأنت كنت معرس و عندك طفلة...خلاتك ترجع لعندي...سامحني والله منقصدش نحكي على علاقتنا قبل قدامها
انا:فاااش تخرم يااخي ؟
زهرة:نقول في اللي ريتو...سي عمر...مش هذا لي صار في الحفلة...انا مريتش غيرتك عليا...قد ما كنت تحاول تثبتلي...أنك تنجم تلقى الأحسن مني
انا:هذا حد مخك معاناها ؟
زهرة:شيهمك في مخي...أصلا أنا الغالطة خاطرني جيت معااك...كان ماكش باش تروح بيا...كلم أشرف يجي يهزني...لي أصلا معادش نعرف في شكون قاعد يخدم هو...و خدمتو الكل...أنو يعس على زهرة...على أساس قنبلة موقوتة...و باش ننفجر في أي لحظة
بقيت نغزرلها...كيفاه تحكي و تحرك في يديها زوز شدني ضحك...و منجمتش نحبسها...متأكد لي مزالت غايرة من ملك...أما طريقة كلامها...خلاتني نشيخ عليه و ما نجم نقول حرف...قحرتلي تحكي
زهرة:شنية يضحك فيك بربي ؟
جيت باش نحكي...قصت عليا كي عاودت قحرتلي و تلفتت باش تمشي...قربت منها بالزربة...دورت يدي على كرشها...و جبدتها عندي...حضنتها من تالي...و كبست عليها بيديا زوز...شليت كل حركة تحاول تعملها باش تبعد...نزلت راسي شوية...خذيت نفس من ريحتها...لي خلاتني نغمض عينيا بالوقت...ريحتها كهو...كافية باش تهزني لعالم آخر...ما نمشي ليه كان و هي بجنبي و بين يديا...تنهدت بالقاوي نحكي
انا:يزززي كههو
زهرة:س..سيبني عمر
انا:ششش...يززي ما تعبتني لتوا...يززي ما بعدت عليا توحشتك و توحشت قربك...يا روحي
كبست عليها اكثر...و تعديت بشفايفي من خدها لرقبتها لي خلات يديها زوز يكبسو على يدي...دوب نسمع فيها تحكي
زهرة:ع..عمر...يززي أمانك
انا:توحشتني كيما توحشتك بالظبط
زهرة:لا
انا:و مزلت تحبني...حتى أنك تحبني أكثر من قبل
زهرة:لاا
انا:لتوا قلبك يناادي بإسمي
زهرة:م..مش صحيح
كبست على اجنابها...و دورتها عندي...غزرت لوجها و تبسمت نحكي
انا:تحبني نصدقك توا ؟
زهرة:ا..أنت قاعد تكذب على روحك
انا:و كيفاش عرفت إنتي ؟
زهرة:أنا معادش
انا:شنوة ؟
زهرة:م..معادش نحس بحبك كيما قبل...معادش نهمك كيما قبل زادة
أنا:سمعت مني الكلام هذا إنتي ؟
زهرة:يكفي إني حسيت بيه
جبدتها عندي شوية...و نزلت عليها...بستها من جبينها...و كبست على يدها...هزيتها شوية...و حطيتها على قلبي نحكي
أنا:ريت هذا...معندوش الحق يحب وحدة غيرك
كبست على صدري...و قربتلي اكثر...مع هزت راسها غزرت لشفايفها بالوقت...شفايفها لي عندهم اغراء سبيسيال برشا...ما ريتو عند حتى وحدة غيرها..غزرتلي ندرا كيف تحكي
زهرة:عممر
مديت يدي شوية...عديت صوابعي على خدها...لي باش يطرشق من السخانة..برغم الدنيا باردة عاللخر و خذيت نفس نحكي
انا:ياا روح عممر
قربتلي اكثر...لين حسيت بالنفس متاعها على رقبتي سكرت عينيا بالقاوي و انا نسمع فيها تحكي
زهرة:متعملش فيا هكا أماانك
خذيت نفس بالقاوي...رعشتها...روهجتني...حطيت يديا زوز...على رقبتها...و هزيتلها راسها نحكي
انا:من شنية خايفة خبرني ؟
زهرة:منك أنت
أنا:مني ؟
زهرة:معادش نجم نتحمل المد و الجزر متاعك يا عمر معادش نعرف اذا لازمني نقربلك و لا نبعد...خايفة نقربلك و تكون نسيتني...و خايفة نبعد عليك و نخسرك حتى ساعات وليت نطمن روحي بريحان...و نقول على خاطرها باش نبقاو مع بعضنا...بعد الأحداث لي صارت الكل...معادش نعرف شنية نعمل...معادش نعرف اذا مزال عندي حق فيك و لا لا...على هذاكا أمانك متعملش فيا هكا...كان باش تبعد...أبعد من توا...قتلك و باش نعاودلك أنا مستحيل ناقف في حياتك يا عمر..مستحيل نخليك تعاني جرايري اكثر...على هذاكا...ا..انا و اا..انت ا..حنا
كليت بقية الكلام من شفايفها كي نزلت عليهم..منعرفش إذا باش نسكتها...و لا نطفي الوحش لي غلبني عليها يدها لي تحطت على خدي في لحظة...خلاتني نكبس عليها...و لا بالأحرى قاعد ناخو في الجرعة متاعي منها جبدت روحي شوية...و حاوطت وجها بيديا زوز نحكي
انا:على هذاكا احنا...مناش باش نستسلمو...و مناش باش نخسرو بعضنا مهما صار زهررة...قتلك و باش نعاودلك للمرة الألف...أنا مانيش باش نخليك...و مانيش باش نسمح فيك...كان على جثتي...خلينا نعتبرو لي قاعد يصير إمتحان اخر...بالنسبة لينا...صدقني يا عمري مراااد ضعيف برشا...باش يكسر الرابط لي يجمعنا...و لا حتى باش يفكك مني...باهي نستعرف لأنا غلطت ليلتها و محقنيش نقول الكلام هذاكا...اما
زهرة:شنية ؟
انا:ملك كانت شريكة مراد قبل...و برغم واثق فيها و في خدمتها...أما منجمش ناثق فيها برشا...و نقول لهي ماهيش باش تغدرني...صدقني منجمش نخاطر بيك طول ما انتي معاه...قاعدة تلز فيا باش نتنازل بالسيف على خاطرك و على خاطر أمك زادة
غزرتلي ندرا كيف...تمنع في دموعها لي تحصرو...عرفت لي مخها باقي يهز فيها و يجيب...تبسمت نحكي
أنا:اسأل يا روحي
زهرة:ل..ليتها...علاش قربتلها بالطريقة هذيكا ؟
انا:غرت ؟
زهرة:جاوبني
انا:لي حسيتو إنتي يا زهرة...ميجيش شطر في اللي عشتو و اللي حسيتو...و إنتي بين يديه...متوقعش يجي نهار و نلقى روحي وسط النار هذيكا...الوجيعة لي في قلبي ماهيش باش توفى كان بعد ما نشوف نهايتو بعينيا...الا بعد ما نشوف استسلامو قدامي
زهرة:أما أنت خليتني نعلن استسلامي انا يا عمر...لي عملتو انت بارادتك...انا عملتو بالغصب...و الا مستحيل كنت نخليه يحط يدو عليا
بدني تكبس...من رعشت صوتها...و من غزرتها...خذيت نفس...و عديت يدي على خدها نحكي
انا:سامحني يا روحي...و صدقني انا باش نخرجك من غديكا و باش نخليه يخلص حق كل شي عملو فينا
زهرة:شنية باش تعمل ؟
انا:باش ناخو منو كلشي
زهرة:ش..شقصدك ؟
انا:باش نخليه يفلس
زهرة:ع..عمر...كان يصيرلك شي
سكتها كي حطيت صوابعي على شفايفها...و غزرتلها نحكي
انا:ماهو باش يصير شي يا روحي...قولي ساعة ؟
زهرة:شنية ؟
انا:تاثق فيا ؟
عدات عينيها على وجهي...و هزتلي براسها ايه...تحكي
زهرة:لآخر لحظة في عمري
بستها من راسها و حضنتها بالوقت...غمضت عينيا كي حست بيديها زوز...دارو على ظهري...تنهدت براحة بعد الوقت هذا الكل...كبست على ظهرها نحكي
أنا:سؤال آخر
هزت راسها شوية...غزرتلي...خذيت نفس...نحكي
انا:مزلت تحبني ؟
زهرة:أكثر من اللي تتصور
أنا:مممم باهي
زهرة:شنية لي باهي ؟
انا:شي
زهرة:بربيي ؟
أنا:قولي ساعة وين تحب نمشيو
زهرة:ما نحب نمشي معاك لحتى بلاصة
انا:ساعة انا محضرلك سوربريز حلوة
زهرة:كيما شنية ؟
انا:إسمها مفاجأة عزيزتي
زهرة:كنت مخطط باش تخطفني من الكرهبة ؟
انا:مش من الكرهبة...أما كنت مخطط باش نعدي نهار معاك
زهرة:باهي و خدمتك ؟
انا:مفما حتى شي أهم منك في دنيا
زهرة:حتى شي ؟
انا:حتى شي يا عمري...حتى شي
قربتلي مرة اخرى...عنقتني مرة...كبست عليها نحكي
انا:مستعدة باش تمشي
زهرة:مممم مستعدة
جبدت روحي منها شوية...و عطيتها يدي...تبسمتلي بالوقت...ابتسامة زعمت اني نسيتها و معادش باش نشوفها على وجها...مدت يدها حطتها في يدي...كبست عليها...و بستها منها نحكي
انا:هيا ايجا
رجعت للكرهبة...حليتلها الباب ركبت...خلطت عليها...و شديت ثنية...و تلفت غزرتلها...مديت يدي كبست على يدها...و جبدتها عندي...حطيت راسها على صدري نحكي
انا:اليوم بالظبط...خليك قريبة مني و متبعدش حتى لحظة وحدة
زهرة:وين مهزني توا ؟
انا:خلي عندك شوية صبر عزيزتي
زهرة:عديت عمري الكل و انا صابرة
انا:مبقاش برشا يا روحي
تنهدت بالقاوي و مديت يدي شوية كبست على ظهرها و شديت ثنية للبلاصة لي هزيتها ليها مرة قبل المحكمة متاعها...حطت يدها على صدري تحكي
زهرة:عمر نحب نخبرك حاجة انا
انا:تكلم عزيزتي
زهرة:مراد...طلع عندو خوه
انا:تقصد في كريم بن عيسى ؟
هزت راسها شوية...غزرتلي مستغربة...تحكي
زهرة:تعرفوو ؟
انا:مممم معرفة سطحية...يعني شوية معلومات عليه و كهو...انتي وين قابلتو ؟
زهرة:قاعد معانا في الفيلا...اما دوب نشوفو...حتى منعرفش امتى يخرج و يرجع
أنا:و أمك ؟
زهرة:بعد الحفلة طلبت منو يجيبها بحذايا...ليها يومين بحذايا هي و الممرضة متاعها
انا:باهي برشا
زهرة:فما البون زادة...فضيلة
انا:شبيها ؟
زهرة:منعرفش...اما نحسها تبعني خطوة بخطوة...حتى ساعات تجي لبيتي من غير سبب
كنت باش نقولها لهي تابعتني...اما منحبش نزرع شك عند مراد...منحبهاش تغلط قدامو و يكشفها...احسن شي انها متعرفش لهي عمة اشرف...نزلت شوية بستها من خدها نحكي
أنا:أهم شي متبقاش وحدك في دار هذيكا
زهرة:عندك حق
خذيت نفس و كملت طريقي...ثنية كاملة و انا نعدي في يدي على شعرها...لين وصلنا...هزت راسها تحكي
زهرة:عمممر...كيفاه خممت فيها البلاصة هاذي انت
انا:مممم مش انتي طلبت ترجع مرة أخرى ؟
زهرة:صحيح...أما وقتها تشهيت الحوت لي يتعمل هوني...جيست على خاطر الوحم و كهو
انا:بالظبط...انا وقتها منجمتش نجيبك لهوني...بعد الأحداث لي صارت...على هذا قررت نعوضك...خاطرني وعدتك من قبل
زهرة:مزلت متذكر ياخي؟
انا:و انا نجم ننسى تفصيلة و لا كلمة منك
زهرة:تعرف حاجة...والله مزلت شاهياتو لتوا
انا:هيا ملا
حلت الباب و سبقتني...تبسمت بالوقت...و خلطت عليها...نمشي وراها.. ليا برشا مريتهاش شايخة هكا تلفتت عندي تحكي
زهرة:نحب نقعد هوني
انا:لا عزيزتي...المرة هاذي باش نقعدو الداخل
زهرة:علااش ؟
انا:هيا تو تعرف
قحرتلي و عطاتني بظهرها...سبقتها بخطوة حليتلها الباب دخلت...و دخلت وراها...هزيت راسي نغزر لريحان في البوسات...هدى و يونس بجنبها...وقفت في بلاصتها عرفتها متوقعتش باش تشوفها هوني..قربت منها شوية و نزلت نحكي في وذنها
انا:شقولك في المفاجأة هاذي
تلفتت عندي بالوقت...غزرتلي ندرا كيف...نزلت عليها شوية...بستها من خدها نحكي
انا:اليوم باش يكون متاعنا احنا و كهو
زهرة:مانيش باش ننسى لي عملتو معايا جملة
انا:يكفيني حبك عزيزتي...هيا توا...ريحان تستنى فيك
باستني على غفلة...لدرجة مكنتش متوقع الفازة منها...و تلفتت بالوقت...خليتني دقيقتين ورا بعضهم...باش نجمت نلم روحي...خذيت نفس و هزيت راسي...شاورت ليونس باش يهز هدى و يخرج...خلطت عليها...قعدت مقابلها...نغزرلها كيفاه هزتها في يدها...تلعب فيها و تحكي معاها فرد وقت...المنظر هذا بالظبط...منحب نفلت منو حتى لحظة...هزت راسها غزرتلي تحكي
زهرة:ريتها كيفاش قاعدة تكبر
هزيتلها براسي...و نفس السؤال متاع كل مرة جا لمخي شنية سبب لي يخلي زهرة تتخلى على بنتها...و تحرم روحها من قربها...حتى أنو الحكاية أكبر من أنو يكون فيها مراد...خذيت نفس نحكي
انا:زهرتي
زهرة:مممم
انا:باش نسألك...و نحبك تجاوبني بصراحة
زهرة:باهي
انا:شنية صار ليلة ولادتك بريحان ؟
هزت راسها غزرتلي ندرا كيف...حسيت بيها تصدمت من سؤالي...نزلت عينيها من وجهي تحكي
زهرة:حتى شي...يعني ريحان بأمان أكثر عندك
انا:وقتها كنت في الحبس
زهرة:اه..علاش حتى نحكو في الموضوع هذا توا...مش على أساس باش تفطرني
هزيتلها براسي ايه...محبيتش نظغط عليها اكثر...اما اكيد باش يجي وقت و نعرف كلشي صار بطريقتي طلبت الاكل و حطيت مشاكلنا و كلشي على جنب...و استغليت جو الاسرة الصغيرة لي لقيت روحي فيه حتى اني نجم نقول لي نعيش من أهم اللحظات الحلوة لي عديتها في حياتي...حتى ريحان لي عمرها ميتعداش شهرين...حلات الجو اكثر...تكيت لتالي و سرحت في تفاصيل وجها مرة اخرى...تفاصيل خلاتني نتمنى نحبس الوقت في اللحظة هاذي بالظبط...و معادش نخرج منها جملة...لحظة لي تخليني نغزر لحياتي بعينيا زوز...حياتي و روحي...لي هوما مرتي و بنتي كهو جبدت خاتمها من الفاست و هزيت روحي قربت منها قعدت على ركبة و نص...بست ريحان لي قاعدة تغزرلي و تبسمت نحكي
انا:بنوتي المزيانة...ساعة انا باش نطلب من أمك حاجة و انتي باش تكون شاهدة موافقة ؟
حركت يدها شوية...تبسمت بالوقت...و هزيت راسي نغزرلها...خذيت نفس نحكي
انا:منعرفش من وين باش نبدا...هيا يمكن باش تكون غريبة شوية...اما توا باش نعاود نطلب يدك قدام بنتنا
بقات تغزرلي من غير حتى كلمة...تنهدت بالقاوي نحكي
انا:مانيش باش نصلح لي عملتو بالطريقة هاذي...اما يكفيني انك باش تبقى لابسة خاتمي...مهما صار و مهما تعدا علينا...انتي وعدتني معادش تنحيه...و هاذي ثاني مرة خلفت بالوعد متاعك
زهرة:ع..عمر أنا
قصيت عليها الكلام...كي كبست على يدها...و عاودت لبستهولها...بستها من و هزيت راسي غزرتلها
أنا:أكيد مانيش باش نستنى موافقتك...أنا خذيتها من عند بنتي
ضحكتلي بالوقت...مديت يدي...حطيتها على خدها نحكي
أنا:خليك ديما هكا...و في كل مرة تسكر عينيك تذكر لأنا وراك و باش نحميك منو حتى كان يحصرك في قلعة مش فيلا...كنت و باش تبقى أحلى حاجة صارت في حياتي...نحبك و نموت عليك
زهرة:و أنا نحبك يا عمر...اللي مصبرني لتوا...وجودك أنت و بنتي في حياتي
قربتلها اكثر...بستها من راسها...بوسة معزة قبل ما تكون بوسة حب...نحب نطمنها و نطمن روحي انو مهما عصفت بينا الدنيا...في الاخير باش نكون لبعضنا و كهو...بنفس الطريقة لاحنا ملمومين بيها...توا بالظبط.