🔸️حلقة 47
🔸️زهرة تحكي:
حليت عينيا بالسيف...نحس في بدني مدقدق عاللخر حاولت نتحرك...اما وجيعة في حزامي منعتني...اول حاجة ريتها وجهو...متكي على يدو...و يغزرلي...تبسمت بالسيف...نحكي
انا:ب بونجور
مد يدو...حطها على خدي...يبعدلي في خصلات شعري و يحكي فرد وقت
عمر:صباح النور
انا:امتى فقت انت ؟
عمر:من بكري
تبسمتلو بالوقت...و قربت منو شوية...كبست على شفايفي...من الوجيعة لي حسيتها...غرس يدو في شعري يحكي
عمر:شبيك ؟
انا:شي...تاعبة عاللخر
نزل عليا شوية...باسني من خدي...و قرب يحكي في وذني
عمر:مزلت باش تتعب اكثر عزيزتي
قربتلو اكثر...خبيت وجهي في صدرو...نحكي
انا:عممر يزززي...امانك
عمر:هههههه باهي اغزرلي
انا:م منحبش
نزل بصوابعو لظهري...دخلت بعضي اكثر...طلعت راسي شوية غزرتلو...تبسم يحكي
عمر:تعرف لهذا احلى صباح في الدنيا...انا نحب نفيق على وجهك ديما...مهما صار...نحب نراك اول وحدة ديما
هزيت يدي بالسيف...حطيتها على خدو...نعدي في صوابعي على لحيتو و نحكي
انا:عمر
عمر:مممم
انا:شي...انت احلى شي في حياتي
عمر:تغري فيا معناها
انا:ممممم نقول في الحقيقة انا...نحبك برشا...منجمش نستخايل حياتي من غيرك
عمر:و لا انا يا روحي...على هذاكا معادش نحبك تخمم في حتى شي خايب...ممكن انو يصير باهي
هزيتلو براسي ايه...و كبست على خدو اكثر...قربت منو شوية بستو...نحكي
انا:طول ما انت معايا...حتى شي ماهو باش يصير...لي يهمني انت و كهو
نزل عليا...باسني من شفايفي...و فرد وقت يبعدلي في شعري...غزرلي في عينيا يحكي
عمر:عيش صغرونتي
انا:عيش أستاذي
عمر:ماكش باش تبطلها الكلمة هاذي
انا:مممم لا...مش هذيكا الحقيقة...يعني أنا عرست بأستاذي
عمر:صااار
انا:مممم أكثر بروف مضروب في روحو...و أكثر حد معروف في الفاك...و أكثر حد متناقض زادة
عمر:مزال فما ؟
انا:مممم برشا...أكثر حد تطردت من عندو...و كي تبدا ساعتك...منعرفش علاه نوصل روطار...لين ستانست بالنبز متاعك...و معادش يهمني...مع اني كنت نكره الموديل خاطر ياسر صعيب...و انت صعيب...اما كنت ندخل على خاطرك...و نظن شطر لبنات لي غادي كانو يعملو نفس الشي
عوجت فمي على اخر كلمة...كبس على جنبي اكثر جبدني عندو...و نزل عليا اكثر...يحكي
عمر:و انا تضربت فيك انتي...و تو نوريك شنعمل فيك
انا:شنننوة ؟
عمر:مضروب في روحي...و متناقض...و ندرا شنوة زادة...زعمة هذوما الكل...شنية حقهم
انا:ع عمر...انا...انا
قص عليا الكلام...كي نزل على شفايفي...دوب نجمت ناخو نفس منو...عضني...عضة خفيفة يحكي
عمر:انتي شنوة
انا:ا انا مزلت م موجوعة...والله
بقى يغزرلي...كبس على جنبي...و جبدني عندو...لين معادش فما مسافة بينا...تبسم يحكي
عمر:ملا قتلي موجوعة ؟
هزيتلو براسي ايه...من غير ما نزل عينيا منو...نعرف و متأكدة لماهوش باش يضرني...باسني من راسي يحكي
عمر:بوزينها مريتي...نعرف لي مزلت موجوعة...على هذاكا نحبك ترتاح توا
انا:عيشك يا روحي
جبد روحو شوية باش يقوم...شديتو من يدو...نحكي
انا:وين ماشي ؟
عمر:اكيد...مناش باش نعيدو نهار هوني عزيزتي
انا:نعرف اما
رجع عندي شوية...باسني من خدي...يحكي
عمر:باش نتأكد اذا وصل الدبش...و نحضر الفطور...و إنتي تنجم تعمل دوش تتفرهد بيه باهي
انا:عمر...امانك متخرجش من الدار باهي
عمر:متخافش...انا هوني معاك
هزيتلو براسي ايه...تبسملي و جبد روحو مني...يلبس في دبشو...غمضت عينيا بالقاوي...احساس خايب سيطر عليا في لحظة...يمكن من الحلمة الخايبة لي حلمتها صحيح وجود عمر يخليني اسعد وحدة...اول مرة نفيق من غير خوف...خاطر نعرف لهو معايا...اما فرد وقت خايفة من اللي باش يصير...دورت راسي شوية غزرتلو لبس دبشو كيما جا...من غير ما يلبس سوريتو...عديت عينيا عليه...منعرفش شنوة لي قاعد يصير بالظبط حاسة روحي في حلمة...لتوا مش مصدقة لانا وليت مرتو بالفم و الملا...أصلا منعرفش كيفاش سلمتلو متوقعتش لهو باش يخاف عليا لاكا الدرجة...خايف عليا من روحو...عدا يدو على شعرو تبسملي...و خرج من البيت...تبسمت بالوقت...هزيت روحي بالسيف تقعدت غمضت عينيا بالقاوي...و رجعت حليتهم...مديت يدي شوية...هزيت سوريتو...قربتها من خشمي...خذيت نفس من ريحتو...توا فهمت علاه ملبسهاش...تقويت على روحي وقمت من السرير...لفيت الغطا على بدني و دخلت لبيت البانو...حليت الما...و دخلت تحتو...حسيتو فرهدني...و بدني ترخف...عديت يديا زوز على بدني لتوا نحس بلمساتو و شفايفو..برغم لي صار...و برغم عملت مراد...اما تعدات احلى ليلة في عمري...تمنيت لو امي كانت موجودة...يمكن هذا لي كان ناقصني...مهما عملت...مستحيل نجم نكرها...مزال فما جزء مني يحب عليها...خذيت نفس نهدي في روحي سكرت السبالة نشفت بدني...و لبست سوريتو...قربت من المرايا نسكر فيها...نغزر لرقبتي...و صدري...عديت صوابعي على كل بقعة...تبسمت بالوقت...هزيت المنشفة وخرجت نشيح في شعري...نسمع في تليفونو ينوقز قربت منو شوية قلبي دق بالقاوي...و انا نغزرلها تطلب فيه...و ظاهر مش اول مكالمة...فقت من سرحتي على صوت خطواتو قرب مني...نزل عليا...باسني من راسي يحكي
عمر:صحة عزيزتي
أنا:عيشك
عمر:شبيك ؟
انا:شي...ج جيست كنت نخمم في الدبش إذا وصل
عمر:زهرررة...قتلك شفما ؟
نزلت راسي...منحبش نغزرلو...رجع نوقز تليفونو بالوقت هزو يحكي
عمر:هذا السبب ؟
أنا:لا...كان تحب أحكي معاها...نستنى فيك لوطة
جيت باش نمشي...شدني من يدي...رجعني قدامو...و هز يدو طلعلي راسي يحكي
عمر:مفماش علاه نهز عليها...و لا فما شي نحكيو فيه...و منعرفش اصلا علاه طلبت و ميهمنيش نعرف..منحبكش تتغشش...و لا تحط الحكاية في بالك...انا ما حاجتي بحتى حد غيرك انتي...مفهوم كلامي
هزيتلو براسي ايه...علق عليها و طيش تليفون عالفوتاي قربلي اكثر...جبدني عندو حضني بالقاوي...هزيت يديا زوز...دورتهم على ظهرو...كبست على ظهرو...من غير حتى كلمة...جبد روحو شوية يحكي
عمر:شششش...شنية الدموع هذوما ؟
انا:م منعرفش...هكا برك
عمر:زهرة...نعرفك راني...قولي شصار ؟ حكيت مع سيرين ؟
هزيتلو براسي لا...عدا يديه زوز على وجهي...يمسح في دموعي و يحكي
عمر:ملا شبيك...ياخي لهدرجة تقلقت منها الحكاية انتي هوكا كلشي على عينك
انا:خ خايفة برشا عمر
عمر:من شنوة عزيزتي ؟
انا:م منعرفش...من بكري نحس في حاجة خايبة باش تصير...و توا سيرين تطلب فيك...و ندرا شنوة باش يصير زادة
عمر:شي ماهو باش يصير...نحي الافكار هذوما من مخك توا...منحبش نرا مريتي في الحالة هاذي
انا:ع..عمر
عمر:ممممم اشكي
انا:اوعدني لي ماكش باش تحكي معاها...و لا حتى تقابلها امانك
عمر:باهي يا فرخة...وعد...اصلا حكاية سيرين وفات...و مستحيل مزلت نخمم فيها مرة اخرى
انا:باهي كان هكا
عمر:هات من يدك
فكلي المنشفة من يدي...و كمل شيحلي شعري...بقيت ساكتة...منعرفش علاه تطلب فيه اليوم بالظبط...تنهدت بالقاوي نحكي
انا:ع عمر
عمر:مممم
انا:ميسالش نكلم مريم
عمر:توا ؟
انا:مممم...من بارح نخمم فيها...نحب نطمن عليها باش نرتاح
عمر:باهي عزيزتي
نزل هز تليفونو...طلبها مهزتش...بقيت نغزرلو...خذيت نفس نحكي
انا:شفما ؟
عمر:احسن شي نطلب حسام توا
انا:باهي
بقيت واقفة في بلاصتي...نفرك في يديا زوز...عدا يدو على شعرو...يحكي
عمر:حتى حسام تليفونو مسكر
انا:باز صار شي...اطلب امي فتحية و لا اي حد اخر امانك عمر
عمر:باهي اهدا
هزيتلو براسي ايه...نوقز تليفونو بالوقت...مشى في بالي سيرين طلباتو مرة اخرى...هز بالوقت يحكي
عمر:وينك انت من بارح نطلب فيك
حسام:شنوة صاحبي...لهدرجة منجمتش تصبر عليا
عمر:نعرفك ساقط...اما تو نفضالك...قولي وين مريم ساعة ؟
حسام:هوكا معايا...علاه ؟
عمر:عديهالي...زهرة تحب تحكي معاها
حسام:باهي...هاني باش نعطيها تليفون
عمر:باهي
دوب نجمت نسمعو و هو يحكي معاه...شديت تليفون عليه نحكي
انا:الو مريم
مريم:بونجور يا روحي
انا:مريم انتي لباس مش هكا...طمني عليك عيش اختي
مريم:شبيك هديت عليا عالصباح...هوكا لباس عليا و قاعدة نفطر....محلاني...انتي شنوة حوالك يا عروسة
انا:لباس...لباس...تو وين ارتحت
تنهدت بالقاوي...حسيت روحي ارتحت...بعد ما سمعت صوتها و طمنت عليها...على تلفيتي...جات عيني عالسرير..عينيا وساعو بالوقت...منعرفش كيفاش..نسيت الفرش أكاكا...غمضت عينيا بالقاوي و رجعت حليتهم نسمع فيها تحكي
مريم:عيش أختي...نحي عالأفكار الخايبة هذوما من مخك...و خمم في روحك و كهو...باهي
دوب سمعت كلامها...تفكيري في التبهديلة لي باش ناخوها قدامو...باقي نسمع فيها تحكي
مريم:زهرررة...لباس ماهو ؟
أنا:مممم ل لباس...لازمني نعلق توا...نحكيو مبعد عزيزتي
مريم:باهي...رد بالك على روحك
انا:وانتي زادة
اول ما علقت عليها...حضني من تالي...حسيت بالنفس متاعو في رقبتي...و يديه لي دارو على كرشي...باسني من رقبتي يحكي
عمر:طمنت عليها توا
انا:ممممم
عمر:ملا باش تلتهى بيا شوية
تبسمت بالوقت...هزيت يدي...حطيتها على يدو نحكي
انا:غاير من مريم انت ؟
نزل عليا...و لزني ليه اكثر...لين معادش مسافة بينا يحكي
عمر:ممممم ما نحبك تتلهى بحتى حد غيري...و لا تحب حد اكثر مني...نحبك ليا و كهو
تكيت راسي على صدرو...و كبست على يدو...نحكي
انا:و انت باش تكون متاعي انا و كهو
باسني من راسي...و كبس على جنابي...دورني عندو طلعت راسي...نغزر لصدرو...هزيت يدي بالسيف حطيتها عليه...و طلعت راسي...غزرتلو...غزرلي ندرا كيف يحكي
عمر:فاش تخمم ؟
انا:شي
عمر:زهرررة
انا:قاعدة نثبت انو حلمتي تحقت...و اني نجم نمسك من غير خوف...من غير ما نخمم في حتى حد...و لا في شكون باش يفرقنا
عمر:ايجا تراه
قربت منو اكثر...حاوطني بيديه زوز...حضني...يحكي
عمر:مكنتش نعرف كيفاش باش نكمل حياتي من غيرك
انا:اما كنت باش تسافر و تخليني
عمر:أكيد كنت باش نرجع...كنت باش نرجع على خاطرك خاطر كان مشيت لاخر الدنيا...قلبي باش يبقى عندك
انا:معادش تعاودها عمر...مهما صار معادش تبعد عليا...و حتى كي نتصرف ساعات من راسي...منحبكش تتغشش مني...و تاخو بخاطرك مني...تعرفني مرات منجمش نخمم و نقلب دنيا...ببهامتي كنت باش نخسرك منجمش نعيش من غيرك مرة أخرى
عمر:شششش مش سكرنا عالحكاية...جيست كلشي يصير معاك خبرني بيه...و كلشي باش يكون مليح
انا:باهي يا روحي
عمر:متحبش تفطر صغرونتي
جبدت روحي شوية...طلعت راسي نغزرلو...نحكي
انا:جيعانة عاللخر
عمر:هيا ملا
انا:ا اه...برا انزل انت تو نخلط عليك
عمر:شفما زادة ؟
انا:ع عمر ميجيش نخلي البيت هكا
طلع راسو شوية...غزر للفرش...و تبسم على جنب...هز يدو عداها على وجهو يحكي
عمر:و انتي علاه مقلقة ؟
انا:ل لا...اما جيست
هز يدو...حط صوابعو على شفايفي...و غزرلي يحكي
عمر:انتي البارح...عطيتني احلى شي في الدنيا...و منحبكش تحشم من اللي صار جملة...باهي
هزيتلو براسي ايه...جيت باش نحكي...قص عليا صوت تليفونو في يدي...لقيتها سيرين تطلب فيه مرة اخرى غزرتلو بالوقت...حسيتو حتى هو تقلق...علقت عليها...و طيشت تليفون عالفوتاي نحكي
انا:باز مكنتش ناوي تحكي معاها
هزني و حطني...غزرلي ندرا كيف...ضيقت عينيا مستغربة...جيت باش نحكي...قص عليا...كي هزني في حملتو...يحكي
عمر:ايجا هوني...ايجا
دورت يديا زوز على رقبتو...و قربتلو شوية...نحكي
انا:تو تاخو برد هكا
عمر:كان تبقى تحكي معايا بالطريقة هاذي...بالرسمي تو نمرض
انا:لطف عليك يا روحي
عمر:الفطور برد
كبست عليه اكثر...نشم في ريحتو..هو كهو لي يخيليني نحس بالامان...أحسن شي طمنت على مريم و حسام عالاقل حد فيهم ما تضرر جرايري...طلعت راسي...نغزر لطاولة...لحق يبدل الماكلة لي خليناها البارح...غزرتلو نحكي
أنا:صحة حبي
عمر:عيش مريتي
باسني من خدي...و نزلني عالارض...قربت من الكرسي باش نقعد...شدني من يدي يحكي
عمر:خليك
قعد عالكرسي و جبدني معاه...حتى هو حسيتو مش قد بعضو...يمكن بعد مكالمة سيرين...تنهدت بالقاوي نحكي
انا:عمر...منقصدش الفازة متاع قبيل
عمر:فازة شنوة ؟
أنا:إني نعلق على سيرين بأكا الطريقة...نعرف مكانش لازم نتصرف من راسي
عدا عينيه على وجهي...و تكا لتالي...قلبي دق بالوقت هز يدو...بعدلي خصلات شعري يحكي
عمر:سيرين اخر وحدة نخمم فيها و انتي معايا...رد بالك مزلت تعتذر على حاجة انتي معندكش ذنب فيها...باهي
انا:باهي...انا
هزيت يدي...عديت صوابعي على رقبتو...و نزلت بيهم شوية لصدرو نحكي
انا:ن نحب نسألك حاجة
عمر:مممم
انا:ا انت في الاول...كنت باش تعرس بسيرين...نهارتها انا تقهرت برشا...خاصة بعد ما قتلي انك تحبني...اما متنجمش تخليها...ياسر خفت انك تعملها بالرسمي مكنتش نعرف وين باش نمشي بروحي...و لا كيفاش باش ننساك...كنت نعرف لي قاعد يصير غالط...و حتى سيرين ما عندها حتى ذنب...و انو انا سبب باش انت خليتها
عمر:ششش انتي ما كنت السبب في حتى شي...انا و سيرين مش لبعضنا...حاولت معاها...عطيتها اكثر من فرصة...اما
انا:اما...كان هي استغلت وحدة من الفرص هذوما...هي لي قاعدة في بلاصتي هوني
بقيت نغزرلو...دخلت بعضي و انا نستخايل فيهم مع بعض...منعرفش علاه قاعدة نخمم فيها توا...تنهدت بالقاوي نحكي
انا:ك كان مراد نجح انو يبعدنا...كنت باش تختارها هي اصلا ظاهر فيها مزالت تحبك...و الا مستحيل كانت تطلبك صباح عر...
شطر الكلام ضاع بين شفايفو...منعرفش كيفاش و امتى باسني...كبست على خدو اكثر...نزلو دموعي بالوقت...معادش نعرف شبيني...من بكري نحس لي حاجة خايبة باش تصير...اول ما جبد روحو مني حضنتو بالقاوي...بقوة الخوف لي قاعدة نحس فيه كبس على ظهري يحكي
عمر:شنوة قاعد نحكي من البارح...مش قتلك معادش تخمم بالطريقة هاذي...و فاش قام تذكر في سيرين و مراد توا...الزوز من الماضي...و عمري ماني باش نتخلى عليك على خاطر اي حد فيهم...و مفما حتى شي ينجم يبعدني عليك...منحبكش تلوم روحك...و لا تحكي بالطريقة هاذي مرة اخرى...عيش حياتك كيما تحب...و اعمل اي شي تحب عليه...انا باش نكون وراك ديما...ما تخمم في حتى شي...و ما تخاف من حتى شي
كبست عليه اكثر...عدا يدو على ظهري...و كمل يحكي
عمر:اغزرلي هوني
جبدت روحي منو شوية...خذيت نفس...و غزرتلو...هز يدو...مسحلي دموعي...يحكي
عمر:ريت دموعك هذوما انا منجمش نتحملهم...على هذاكا اخر مرة نراك تبكي بسبب اي حد فيهم...مفهوم كلامي
هزيتلو براسي ايه...كلامو هداني اكثر...عديت يدي على خدي نحكي
انا:ج جعت
طلع حاجبو مستغرب...غزرلي ندرا كيف...و تبسم على جنب يحكي
عمر:حمد الله يا ربي...هيا لالة تفضل ملا
انا:و انت ؟
عمر:شيهمك فيا...المهم انتي تشبع...لازمك تعوض عزيزتي
دورت وجهي بالوقت...عرفتو شنية يقصد...شاخ عالفازة منعرفش كيفاش تعدا الفطور هذاكا...حتى هو مرجتو باش فطر معايا...حسيت روحي تفرهدت شوية...قص علينا صوت الباب...غزرتلو نحكي
انا:شكون باش يجي توا ؟
عمر:منعرفش...انتي اطلع للبيت...تو نشوف شكون و نخلط عليك
هزيتلو براسي باهي...باسني من خدي...وقفني و وقف في جرتي...غزرتلو نحكي
انا:عمر متخرجش هكا...خاطر دنيا برد برا
عمر:باهي طمن يا فرخة
عوجت فمي...كي حسيتو يتمقصص عليا...عدا يدو على شعري يحكي
عمر:هيا فيسع
انا:باهي
خليتو...و طلعت للبيت...هزيت تليفونو...لقيتها طلباتو مرة اخرى...تنهدت بالقاوي...رجعت حطيتو في بلاصتو و خرجت من البيت...سمعت عمي طاهر...يحكي معاه لوطة...نزلت الدروج شوية...مبعد تذكرت لانا لابساتو ضربت يدي على راسي...و تلفت باش نرجع...اما حبست على اسم مراد...حسيت دم جمد في عروقي...وقفت في بلاصتي نسمع فيهم
عمر:شقصدك...كيفاش نجم يحرقها ؟
طاهر:ظاهر فيه شرا سرفور و لا اي حد من المدعوين لتوا منعرفش الحكاية بالظبط...لحقنا باش نغطيو عالاضرار...و كرهبتك...يومين...ثلاثة تكون حاضرة
عمر:حد تضرر ورا الحريق ؟
طاهر:تعمد يأذي مريم...اما حسام لحق عليها
عمر:الساقط...كنت نعرف لي ماهوش باش يعدي الحكاية على خير...اما الا ما نخليه يهتري بيا الكلب
طاهر:عمر...فما شي اهم من هذا الكل
عمر:شنوة زادة عم طاهر...شعندو يعمل اكثر من هكا
طاهر:انا قدمت شكوى عليه
عمر:ايه...شصار
طاهر:اليوم الصباح...عرفت لهو عمل اكسيدون
عمر:شننننوة ؟
طاهر:مراد و انتصار...ماتو الزوز في الحادث
عمر:عم طاهر فاش تحكي انت ؟
حسيت الدنيا الكل دور بيا...كلامو يتعاود في مخي بالجملة...منعرفش كيفاش قعدت عالدرجة...نرد في النفس...دوب خرج اسم امي من شفايفي...اول مرة نحس لانا بالرسمي خسرت امي بالحق و ماهيش باش ترجع...باقي نسمع فيه يحكي
طاهر:الكرهبة طاحت من بلاصة عالية برشا...صعيب الواحد يسلك من حادث كبير اكاكا...الشرطة تقول لي مزال مواصلين في البحث...باش ينجمو يقدمو الجثث لعايلتها...يعني لازم يعرفو سبب الحادث و شكون وراه
عمر:و الكرهبة لقاوها ؟
طاهر:الكرهبة تحطمت...و ما قعد فيها شي...عرفو لهي متاع مراد من رقم متاعها...لي عرفتو انو لازم بنتها تمشي تتعرف عليها...هي في كلينيك قريبة للبلاصة هذيكا
عمر:و مراد
طاهر:تو نعرفو بقية الاخبار غديكا
عمر:كيفاش باش نخبرها توا...كيفاش نقلها امك ماتت عم طاهر صدقني منجمش نواجها
طاهر:باهي ولدي...ما تخبرها شي توا...هاني نستنى فيكم البرا...تو نحكي معاها انا
عمر:باهي...باهي
حسيتو تغوصر حتى هو...في لحظة لقيتو واقف في اخر دروج...يغزرلي مستغرب...بقيت نغزرلو...كاني نغزر لفراغ كبير قدامي...أصوات بابا و امي و مراد...كهو لي قاعدة نسمع فيها...كاني قاعدة نتفرج في حلمة...مراد معادش موجود...و امي اختارت تمشي معاه مرة اخرى باهي و انا لشكون بقيت توا...شبيها حرمتني منها..شبيها مشات من غير ما تسامحني...ياخي لهدرجة متحبنيش هيا...افكار قوية غمت عليا...لدرجة منجمتش حتى نبكي من اللي سمعتو...و لا حتى نقرب من عمر...لي نحسو هو السند متاعي...توا انا بحاجة امي...نحب نرا امي و كهو...مزال فما برشا حاجات لازمنا نحكيو فيهم لازمها تسمعني و تسامحني...المرة هاذي حد ماهو باش ينجم يمحي الوجيعة لي في قلبي...و لا نجم نفسر لي نحس فيه...المرة هاذي انا السبب في موت مراد و امي بسببي امي ماتت...هو اختار ياخو امي معاه باش يحرقني و نجح في عملتو...انتقم مني بطريقتو...طريقة باش يخليني نلوم بيها روحي...طول ما انا عايشة خلاني نندم خاطرني اخترت الثنية هاذي و بعدت عليهم...كانو حد قاعد يكبس على راسي...لدرجة معاد نجم نستوعب حتى شي من اللي قاعد يصير...نسمع في صوت امي و كهو
أنت تقرأ
زهرة🌸
Acak🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
