زهرة🌸

الحلقة مئة و الواحدة و الثلاثون

حلقة 131
عمر يحكي:
حليت عينيا على صوت التليفون...هزيتو في يدي إستغربت كي لقيتها هند...تطلب فيا الوقت هذا...أصلا بعد ليلة البارح...منعرفش كيفاه غفيت...هزيت راسي من صدرها...و عديت عينيا على وجها...بستها من خدها و جبدت روحي منها...كبست عالتليفون في يدي...و خرجت من البيت...دخلت لصالة...ضو نهار خلاني نصحصح شوية...خذيت نفس و عاودت طلبتها...هزت عليا بالوقت تحكي
هند:عممر
انا:صباح الخير عزيزتي
هند:صباح الخير
انا:لباس عزيزتي ؟ صارت حاجة ؟
هند:كان تنجم ايجا للكلينيك توا
انا:شنية لي صار ؟
هند:بابا
انا:شبيه زادة ؟ شنية اللعبة الجديدة
هند:في رايي كان تجي أحسن عمر...اماانك...ايجار المرة هاذي على خاطري انا
كبست عالتليفون في يدي و نزلتو بالوقت...منعرفش كيفاش نجم نعمل الخطوة هاذي...اصلا عطيت وعد لروحي معادش باش نخليه يشوف وجهي مرة أخرى دورت راسي على غفلة...لقيتها واقفة ورايا بالظبط قربت مني...و حطت يدها على يدي تحكي
زهرة:عممر يا روحي...لباس ماهو ؟
عديت عينيا على وجها...منجمتش ننسى لي سمعتو امس...و منجمتش نتعدا لي صار...لتوا نحس في روحي ناقم عليه...و على كلشي يربطني بيه...خذيت نفس نحكي
انا:هند طلبتني
زهرة:عمر متكونش صارتلها حاجة جرايرنا
انا:طمن...اما سي عثمان راقد في الكلينيك
زهرة:ان شاء الله لباس ؟
انا:زهررة بربي...ياخي مزلت تخمم اذا هو مليح و لا لا
زهرة:عمر...هدي روحك...نعرف لي عملو معانا خايب اما في الاخير يبقى بوك...خلينا نمشو للكلينيك...و بعد ما تطمن عليه...معادش تمشي عندو كان تحب...جيست منحبكش تعيش بتأنيب الضمير يا روحي
قربت منها شوية...حضنتها من غير حتى كلمة...اصلا منعرفش شنية كنت نعمل من غيرها...عدات يدها على ظهري...تحكي
زهرة:كلشي باش يكون مليح...و انا باش نكون معاك ديما
جبدت روحي شوية...و حاوطت وجها بيديا زوز...نحكي
انا:اكا لي يهمني يا روحي...انا من غيرك ما نجم نعمل حتى شي
زهرة:كي هكا...هيا برا حضر روحك...و انا هاني باش نبدل دبشي...بعدها من الكلينيك...نمشيو نجيبو ريحان باهي
انا:متأكدة تحب تمشي معايا ؟
زهرة:مانيش باش نخليك وحدك
بستها من جبينها...و جبدت روحي منها...تبسيمتها خلات أفكاري تهدا شوية...دخلت معاها للبيت...بدلت دبشي كيما جا...و دورت راسي نغزرلها...تلبس في مريولها...تبسمت نحكي
انا:متحبش تفطر ساعة ؟
زهرة:لا عزيزي ميسالش...من غير ما نخلو هند تستنى أكثر
انا:باهي
زهرة:حاضرة
انا:خلينا نمشو ملا...نحس في روحي توحشت بنتي عاللخر
زهرة:حتى انا
انا:هيا ملا
زهرة:باهي يا روحي
مديتلها يدي...شدتني بالوقت...خرجت من دار و عقلي بعيد...معينيش باش نقابلهم مرة أخرى...عديت ثنية ساكت...من غير حتى كلمة...يمكن احسن شي أنها بجنبي توا...و لا مكنتش باش نقدم عالخطوة  هاذي وحدي...اول ما وصلت...قربت مني شدتني من يدي تحكي
زهرة:عمر...انسى لي صار البارح...و متخليش هند تتأثر اكثر باللي صار باهي
انا:باهي يا روحي
كبست على يدها...و دخلت...هزيت راسي نغزر لهند قربت مني بالوقت...ترمات في حضني...عديت يدي على ظهرها مستغرب من حالتها...خذيت نفس نحكي
انا:لباس يا روحي ؟
هزت راسها شوية...غزرتلي ندرا كيف...تحكي
هند:ب..بابا
انا:شبيه زادة ؟
هند:ع..عمر...انت بعد ما مشيت البارح...بابا...نقصد انو بعد اللي صار...بابا تجلط و طلع ظغطو...فرد وقت
انا:شبيك مكلمتنيش البارح
هند:خ..خفت عليك...انت البارح...مكنتش في حالة تخليني نطلبك و نخبرك باللي صار
انا:و شنية قال الطبيب ؟
هند:م..منعرفش لتوا مفما حتى خبر عليه...و منجمتش نخبر مصطفى زادة...منحبش آسيا تتفجع جرايرنا...و هي حبلة
انا:باهي عزيزتي...انا باش نكلموو مبعد...هدي روحك توا
زهرة:ان شاء الله لباس يا روحي
هند:عيشك زهرة
هزيت راسي نغزر لامي لي قربت مني...خذيت نفس نحكي
انا:خلينا نبعدو من هوني
امي:ع..عمر ولدي...اسمعني مرة وحدة امانك
انا:ايجا زهرة
حطيت يدي على ظهرها من تالي و سبقتها قبلي...بعدت عليها...اصلا معادش نجم نغزرلها بعد اللي صار الكل متوقعتش لهي باش تتصرف بنفس الطريقة متاع عثمان...و تكون أنانية لهدرجة...غزرتلي...تحكي
زهرة:عمر...نظن لهي بحاجتك توا
انا:حتى إنتي كنت بحاجتها قبل...أما ما عملت حتى شي على خاطرك
زهرة:عممر
أنا:يزززي عزيزتي أماانك
هزتلي براسها ايه...و كبست على يدي...بيديها زوز هزيت عينيا نغزر لهند لي واقفة معاها...و سلمى لي تغزرلهم من بعيد...لتوا مستغرب في حنيتها..من صغرتها تخمم في غيرها قبل روحها...كان مش أختي...مكنتش باش نرجع جملة...دورت راسي على صوت الباب...نغزر لطبيب لي خرج من عندو...منجمتش حتى نقرب منو و لا نسأل عليه...باقي نتبع فيهم بعينيا...من غير حتى كلمة...نسمع فيه يحكي
هو:صراحة...الاخبار لي عندي خايبة...و مطمنش
هند:شنية لي صار ؟
هو:المريض تعرض لازمة قلبية و ارتفاع ضغط الدم فرد وقت...و عالاغلب هذا الكل صار جراير صدمة...و لا حاجة متقبلهاش عقلو...و نتيجة هذا الكل باش يخليه عاجز على الحركة و النطق فرد وقت...ينجم يواصل العلاج...اما منظنش باش يلقى تحسن كبير...غير هكا منجمش نفيدكم أكثر
بقيت نسمع فيه من غير حتى كلمة...الغريبة حتى شي ما تحرك داخلي...زعمة ربي قاعد يعاقب فيه عاللي عملو فينا و في الناس لي ظلمها ؟ ساعة بقيت عاجز لاش نجم نفسر شنية لي قاعد يصير...فقت من سرحتي على هند لي عاودت ترمات في حضني تحكي
هند:سمعتو عمر
عديت يدي على ظهرها...و تنهدت بالقاوي...نحكي
انا:سمعت
كبست عليها أكثر...خايف عليها اكثر من اي شي آخر...خذيت نفس نحكي
انا:ايجا معايا
جبدت روحي شوية...كبست على يدها...قعدتها عالكرسي و قعدت بجنبها نحكي
انا:صغرونتي...نعرف لي صار خايب...اما نحبك قوية ديما...مفهوم كلامي
هند:و لا مرة عنقني قبل...حتى عمرو ما قالي كلمة باهية خلاني نحس بوجودو جنبي...و بعد توا ماهوش باش يقول زادة يا عمر
انا:هند...تعرف شنية لي خلاني نرجع بعد سنين طويلة ؟ هزت راسها غزرتلي ندرا كيف...بعدتلها خصلات شعرها...و تبسمت نحكي
انا:انتي...انا رجعت على خاطرك...رجعت خاطرني نعرف انو الكل ينجم يستغل طيبة قلبك...اما صار العكس...و ضريتك أكثر من اني نحميك...بعد توا نحبك تخمم في روحك و كهو...لا في عثمان و لا فيا...و لا في اي حد آخر...عيش لروحك هند...و انا باش نبقى وراك ديما...في كل خطوة و في كل قرار...نعرف لهو باش يفيدك
هند:م..منجمش نخليهم وحدهم بعد اللي صار عمر
عديت يدي على وجهي...مستحيل نخليها ترجع للبلاد بعد توا...خاصة قبل ما تكمل قرايتها...و اللي قاعدة تسعى عليه...غزرتلها نحكي
انا:باهي يا روحي...لي تحب عليه باش يصير...حتى باش نخليهم هوني في تونس...و نكلف شكون يتلهى بيه...المهم عندي انك...تحط راسك و تنجح باهي
هند:بالرسمي باش تعمل هكا على خاطري ؟
انا:عندي غيرك ؟
هند:لا
تبسمت و جبدتها عندي...حضنتها...هزيت راسي نغزر لزهرة... تبسمتلي بالوقت...نزلت عليها شوية بستها من جبينها...نحكي
انا:هيا توا...شقولك تمشي ترتاح شوية
هند:ميسالش نقعد معاهم شوية
هزيتلها براسي ايه...جبدت روحها مني شوية...غزرتلي ندرا كيف...تحكي
هند:ماكش باش تدخل تشوفو
انا:لا...يلزمني نمشي باش نجيب ريحان توا
هند:مانيش باش نظغط عليك عمر...نعرف لي مزلت مجروح من اللي صار...اما شي ماهو باش يتبدل توا...برا طمن على بنتك...و وقت تحس روحك هديت...تنجم تقابلو
انا:باهي عيش اختي
هزيت روحي وقفت في جرتها...كبست على يدي...و باستني من خدي...بقيت نغزرلها...لين قربت من البيت...دوب نجمت نلمحو...مع حلة الباب...اما لتوا معنديش جرأة باش نقابلو و لا نغزر لوجهو...تلفت لزهرة...نحكي
انا:هيا عزيزتي
قربت مني من غير حتى كلمة...كملت الإجراءات...خلصت الفاتورة و خرجت...الغريبة في الحكاية...اني محسيتش بالذنب...و لا حتى تأنيب الضمير...حليتلها الباب ركبت...و خلطت عليها...حطت يدها على صدري...تحكي
زهرة:انت مليح مش هكا ؟
كبست على يدها...قربتها مني بستها منها...و تبسمتلها نحكي
انا:لباس يا عمري
خدمت الكرهبة...و شديت الثنية لعند حسام...منعرفش على روحي كيفاه وصلت...حلي الباب يحكي
حسام:اهلا صاحبي
انا:عيشك حسام
دخلت وراه...خليت زهرة مع مريم...و تلفت لحسام...نحكي
انا:وينها ريحان ؟
حسام:في بيت فرح
هزيتلو براسي ايه...و خلطت عليه...حليت الباب و قربتلها...طليت عليها من فوق...تلعب بساقيها...تبسمت بالوقت...شوفتها خلاتني نحس براحة غريبة...اول ما غزرتلي...عوجت فمها باش تبكي...و مدتلي يديها...ضحكت نحكي
انا:ايجا يا روحي...ايجا عندي
نزلت عليها...حملتها بين يديا...نبوس فيها و نشم في ريحتها فرد وقت...بعدتها شوية نحكي معاها
انا:شبي صغرونتي...شبي بنوتي المزيانة...ياخي حسام قاعد يحقر فيك
حسام:صااار...و الله انا لي وليت محقور...حتى مرتي سلمت فيا
انا:هههههههه كي يجو صغارك...تفهم اللعب بالقدا صاحبي
حسام:هاني وليت خايف على روحي من توا
قربتها ليا أكثر...نستحلى في قربها...و في يديها...لي يمشو و يجو على وجهي...تلفت على صوتو...يحكي
حسام:عمر شنية لي صار ؟
انا:حكاية طويلة
حسام:عرفت من مريم...لي انت سمعت حديثهم
انا:لتوا مصدوم من اللي سمعتو حسام
حسام:فما حاجة أخرى يلزمك تعرفها
انا:شنوة زادة ؟
حسام:بعد ما دخلت للحبس...مشيت باش نطمن عليها ياخي لقيت بوك عندها في دار...و لحقت بيه كي طردها...حاولت معاها...باش تبقى عند امي...اما مراد دخل وقتها و منعرفش بشنية هددها بالظبط...اكا لي خلاها تعيش عندو وقتها...يعني بعد ما سي عثمان فكلها دارها...خلاها عاجزة
بقيت نغزرلو...من غير حتى كلمة...معرفتش شنية نعمل بالظبط...منجمتش نعرف كيفاه يخمم...تي الدار باسمها كيفاش يخرجها منها...كل مرة نحس روحي كرهتو أكثر من قبل...خذيت نفس...نحكي
انا:علاش مخبرتنيش قبل ؟
حسام:خاطرني وعدت زهرة...و حتى حالتك ماكنتش تسمحلك باش تعرف لي قاعد يصير برا
انا:تعرف شنية الغريب في الموضوع...انو اليوم سي عثمان فقد الطاقة على الحركة و النطق فرد مرة
حسام:شنوووة ؟
انا:و الأغرب...منجمتش حتى نحس بالشفقة عليه...زهرة ماهيش الضحية الوحيدة...انا و مصطفى و هند...و أكثر من واحد خدم تحت رحمتو قبل...كان ضحية لتكبر و الجبروت متاعو...عالاقل توا ينجم يحس بالعجز لي خلى كل فرد منا يعيشو قبل
حسام:عممر...يمكن لي صار خايب...اما في رايي وقيت باش تبدا من جديد...زهرة مزالت بحاجتك لتوا
انا:نعرف...اما قبل هكا نحب نقابل سي يعقوب ساعة
حسام:امتى ؟
انا:اليوم...من غير ما نضيع وقت أكثر...و كان تعمل فيا مزية...وصي شكون يفركسلي على دار جديدة...تكون قريبة من المعهد
حسام:فاش تخمم ؟
انا:نحب نرجع الفيلا لسي يعقوب...و مدام هند تحب تبقى معاهم...مظطر باش نكري دار قريبة للمعهد
حسام:باهي تهنى
انا:عيش خويا
كبست على ريحان في يدي...و نزلت اللوطة...بستها و حطيتها في يدها نحكي
انا:خليك هوني جنب مريم...كي نكمل الخدمة نتعدالك...باهي عزيزتي
زهرة:كلشي لباس مش هكا
انا:طمن
نزلت عليها شوية...بستها من جبينها...و جبدت روحي منها...خرجت مع حسام...خليتو شد الثنية لشريكة...و مشيتلو...لبلاصة العادة...دخلت للقهوة...و منها للبيرو متاعو...حط كاسة التاي...من يدو...يحكي
يعقوب:اهلا بيك
انا:عيشك
يعقوب:تفضل
جبدت الكرسي و قعدت مقابلو بالظبط...منعرفش من وين نبدا...و لا حتى كيفاه نحل معاه الموضوع...اما بعد توا...نحب نعيش حياة هادية و كهو...غزرلي يحكي
يعقوب:شنية الغيبة هاذي ؟
انا:سي يعقوب...نظن تعرف تفاصيل حياتي احسن مني
يعقوب:صحيح...اما جيتك لهوني...منعرفش عليها
انا:جيتي لهوني...على زوز حاجات كهو
يعقوب:تفضل
انا:اول شي نحب نعرف السر اللي خلاك تاقف ورايا لتوا
يعقوب:و ثاني حاجة
انا:نحب نرجع الوكالة لي عطيتهالي شهور لتالي
يعقوب:تحبني نجاوبك على سؤالك...و لا نقبل الطلب متاعك
انا:شقصدك ؟
يعقوب:اختار واحد من زوز هذوما
انا:للاسف منجمش نختار
يعقوب:باهي...خليني نختار في بلاصتك
بقيت نغزرلو من غير حتى كلمة...منجمتش نعرف...وين يحب يوصل...ضحك كي عادتو يحكي
يعقوب:اول حاجة يلزمك تعرفها...انو الماضي متاعي لي حكيتلك عليه قبل صحيح...اما ثاني جزء كان كذبة
انا:شقصدك بثاني جزء ؟
يعقوب:انا كنت بحاجة شكون يمشي الخدمة في غيابي...ناثق في ملاك...اما مناثقش في العباد لي دايريين بيها
انا:شنية الحقيقة سي يعقوب ؟
يعقوب:انت مرة سألتني...شنية الجريمة لي خلاتني نكون معاك في الحبس
انا:صحيح
يعقوب:مفماش جريمة
انا:شقصدك ؟
يعقوب:انا كنت بحاجة حد كيفك بالظبط...باش نخلي الشريكة تشد روحها من اول و جديد...و الأهم...كنت بحاجة شكون يغلب مراد في السوق...على خاطرو كان منافس قوي بالنسبة لينا
انا:يعني ؟
يعقوب:الصدفة جمعتنا بطريقة غريبة...سمعت قصتك...من عند خويا...و عرفت لي باش يعملو فيك مراد...من مصادري...و بطريقتي...اكا لي خلاني ندخل قبلك للحبس بايامات قليلة...الغضب لي داخلك...كان كافي باش يخليني نطيح مراد
انا:نعتبر هذا اعتراف منك...على انك استغليتني...باش تغلب مراد
يعقوب:انا عطيتك الفرصة لي تستحقها...و فرد وقت حققت لي سعيت على خاطرو
انا:اما على حد علمي مراد كان شريكك...علاش حتى تخمم طيحو في السوق
يعقوب:انا ما نشارك حتى حد...مراد كان يلعب عالحبلين...و متاكد كان باش يسحب الأسهم ليه...بالمعنى الصحيح...باش ياخو 70% من المشروع و هكا يطلع المستفيد الأول
انا:الاسهم رجعت لكريم...قولك ماهوش باش يعمل كيما خوه
يعقوب:مراد نجح في حاجة وحدة...انو يخلي خوه العكس متاعو في كلشي...شراكتك مع كريم...باش تكون تجربة حلوة
انا:انا نستقيل من عندك
يعقوب:متنجمش
انا:شقصدك ؟
يعقوب:العقد يقول ماكش باش تتنازل على الوصية قبل خمس سنين من توا...و اكيد ماكش ناوي...تخلص تعويض كبير جراير الصفقة هاذي
انا:وين تحب توصل سي يعقوب ؟
يعقوب:خدمتك تخليني ناخو التقاعد متاعي و انا مرتاح...ماك تعرف جو الفيرما و الأحصنة...نحب ناخو فترة نقاهة
انا:على حد علمي...بنتك باش تكون مؤهلة للمنصب هذا احسن مني
يعقوب:للأسف بنتي ولات تحبك...على هذاكا...تحب ترجع لحياتها قبل في أمريكا...منحبش نجبرها تبقى في تونس اكثر...و انت تنجم تشد المشاريع لي تساعدك...60 % من الأرباح باش تكون ليك...و 40 % تبقى تابعة لسوسيتي...لي يهمني انو الارباح تكون طالعة ديما...و كان تحب تشد خدمة أخرى امورك زادة...حتى تنجم تحب مشروع حر من ارباحك...حاجة ترجعلك...بعد ما يوفى العقد...تنجم تنسحب...و لا تكمل معانا...مع اني نتمنى تكون يدي اليمين ديما
انا:منجمش نقبل هذا الكل سي يعقوب
يعقوب:و انا مانيش باش نستغنى عليك...و ملك...متحبش تتربط بالخدمة هاذي الكل...يعني كلشي تنجم تعملو انها تقدم التصاميم في كل موسم...غير هكا هي تحب تعيش حرة...من غير ما حد يفرض عليها شي...يعني خدمتك معاها باش تكملها في اجتماع واحد
انا:متحطنيش تحت امر الواقع
يعقوب:قداش ساعة توا ؟
خذيت نفس طويل...و نزلت راسي غزرت لساعة...نحكي
انا:14:00
يعقوب:طاهر يستنى فيا...صحيح...كان تحب...جيب زهرة و ريحان يبدلو جو...و منها تتفقد حصانك زادة
انا:معناها مفماش مخرج
يعقوب:قبل خمس سنين لا
انا:و مفماش معلوب آخر منك ؟ و مانيش باش نتعرض لمشاكل جراير بنتك
يعقوب:وعد رجال...اعتبر كلشي ملكك...و حااسبني بالارباح
انا:الأرباح باش تكون 50% لكل حد فينا...معناها مانيش باش ناخو فوق حقي
يعقوب:انت ادرى...السوسيتي في امانتك...و انا نجم ناخو تقاعد لخمس سنين و يمكن أكثر
تبسمت على جنب و هزيت روحي وقفت...حطيت المفتاح لي عطاهملي قبل...نحكي
انا:و محاجتيش بهذوما بعد توا
يعقوب:الديور هذوما تابعين لسوسيتي...ملك ماهيش هوني...و انا نحب نرجع للفيرما...و نعيش وسط الطبيعة...تنجم تحتفظ بيهم و ترجعهم مع الوكالة كي يلحق الوقت
انا:بالرسمي مانيش بحاجتهم سي يعقوب
يعقوب:خليهم في سوسيتي...كي نحتاجهم...نجي ناخوهم من عندك باهي هكا
كبست عليهم في يدي و هزيتلو براسي ايه...وخرت خطوة لتالي...نحكي
انا:نشوفك مرة أخرى
يعقوب:بالتوفيق
انا:عيشك
جبدت روحي...وخرت لتالي...و خرجت من عندو...مش مصدق لي قاعد يصير معايا...و منعرفش كيفاش نجم نتحمل المسؤولية هاذي الكل وحدي...فرد وقت نحب نأسس حياة خاصة لينا...نحب مرتي و بنتي يكونو مرتاحين...اللي تعدا عليا كافي باش يخليني نسكر كل ثغرة...ممكن انها تبعدني عليهم لحظة وحدة...فرد وقت نحب اختي تكون مرتاحة...نحب مصطفى يعيش حياة ثابتة...من غير ما يأثر عليه الماضي متاعو مرة أخرى...تنهدت بالقاوي...و حليت الباب ركبت...اللي صار بين ليلة و نهار...خلاني نرد بالي على برشا حاجات يمكن خسرت عيلتي مرة أخرى...اما مانيش غالط في حقهم...يمكن يجي نهار و نجم نسامحهم عاللي عملوه فيا...عالاقل بعد ما يبرد الجرح لي فيا...و الأهم عندي توا...هند متتأثرش باللي قاعد يصير...عالاقل لين تكمل آخر شهر ليها...و في العطلة...نخليلها قرار أنها تبقى في الفيلا...و لا تعيش معايا...و لا حتى نخليها تختار دار أخرى على راحتها...اما اليوم بالظبط...منحب نخمم في حتى شي...من غير اني نحمل بنتي مرة أخرى و نشم ريحتها...و الأهم...اني نحس بجو العيلة لي تحرمت منو ديما...و لي حسيت بيه...وقت دخلت زهرة لحياتي...و عطاتني امل في كل خطوة نعملها لتوا...و معنديش استعداد...اني نخسرها مرة أخرى...مهما كان السبب...حياتي باش تكون معاها و ليها كهو
🌸🌸🌸🌸🌸🌸🌸🌸🌸🌸🌸🌸🌸
🔸️زهرة_تحكي:
حضرت الطاولة...و رجعتلها...هزيتها في حملتي...نبوس فيها...هزيت راسي غزرت لساعة...عوجت فمي...على خاطرني حسيتو بطى غير العادة...توا اسبوعين تعدات بعد اكا الليلة...هاذي اول مرة يطول لهدرجة...و احتمال لهو معاها توا...خلاني على أعصابي...قعدت عالفوتاي نلعب معاها...هزت راسها تضحك...كأنها تهدي فيا..حبيت نطلبو...أما تراجعت...على خاطر حتى هو مسألش علينا هزيت روحي وقفت كي بدات تبكي...اما شي...قربتها لحضني نحكي
انا:شبي صغرونتي...علاش تبكي توا انتي ؟
عديت يدي على ظهرها...نهدي فيها...اما شي...عاودت غزرت لساعة...دخلت بعضي أكثر...حسيتو طول اكثر غير العادة...دورت راسي نفركس على تليفوني...حتى هو نسيت عليه وين حطيتو...خذيت نفس على صوت الباب...كبست على ريحان...لي قوات في البكا أكثر هزيت عينيا في وجهو...حط لي في يدو عالطاولة...و قرب مني...باسني من خدي و هزها من حملتي يحكي
عمر:شبيها صغرونتي ؟
أنا:منعرفش
قربها ليه يبوس فيها...سكتت و هي تغزرلو...تبسم يحكي
عمر:رضعتها ؟
انا:إي
عمر:يمكن مقلقة من أسنانها
انا:مزال مخرجتهمش لتوا
عمر:تلقاهم يحكو فيها أكا علاش...فترة أخرى و تبدا تخرج فيهم
انا:يمكن...مخممتش فيها الحكاية
عمر:ملا بنتي باش تكبر...و تخرج اسنان
انا:شبيك لتوا ؟
عمر:خدمة
انا:لهذا الوقت ؟
عمر:زهرة...شبيك عزيزتي ؟
أنا:شي...هاذي أول مرة طول هكا...تحيرت عليك عمر
عمر:لباس يا روحي طمن
انا:اكيد مكنتش في سوسيتي لتوا ؟
عمر:باهي...كنت مع ملك
انا:ش..شقصدك ؟
عمر:وصلتها للمطار...فرد وقت...كملت معاها أمور تخص الخدمة
انا:اكا علاش قعدت لتوا ؟
عمر:زهرة
انا:كأنو إهتمامك بيها ولى واضح برشا الايامات هذوما
عمر:مش حكينا فيه الموضوع هذا ؟
انا:حكينا ؟ ملا سامحني...انا الغالطة على خاطرني حكيت عليها
خليتو واقف...و خرجت من الصالة...منعرفش كيفاش وصلت للكوجينة...نلم في الصحون ورا بعضو...خلط عليا...يحكي
عمر:فااش تعمل ياخي ؟
انا:مدامك بقيت معاها لتوا...اكيد كليتو مع بعضكم
عمر:مكليتش...أكيد مانيش باش نخليك تتعشى وحدك
انا:هاك خممت فيا شوية
عمر:الصبر يا ربي
انا:ماكش مظطر تقلق روحك و تفسرلي
عمر:اقعد
انا:منحبش
عمر:زهررررة قتلك اقعععد
جبدت الكرسي و قعدت...صوتو خلى ريحان تتفجع...و تفحم بالبكا أكثر...قحرلي...قربها ليه يهدي فيها...قعد مقابلني يحكي
عمر:باهي كيما تحب...مانيش باش نفسرلك شي...كمل عشاتك توا...و امشي رقد بنتك
انا:قتلك منحبش...ماكش باش تجبرني على حتى شي
عمر:مانيش باش نعاود كلامي مرتين
جبد الصحن بيدو...و كبس على ريحان...ياكل عالساكت كأنو ما صار حتى شي...دوب عديت لقمة...منحبش ندخل معاه في نقاش...و هو في الحالة هاذي...و يمكن لي خلاني نسكت أكثر شي...هو الوضع لاحنا فيه...و لي جبرتو يتعايش معاه هو زادة...حتى ساعات نحسو باش يسلم آخر شي..على خاطر علاقتنا لتوا مسدودة..خذيت نفس و قربت منو...هزيت ريحان من حملتو...دوب غفات...قربتها ليا و خرجت من الكوجينة...بعد ما حسيتها رقدت بالقدا...حطيتها في وسط سريرها..هزيت دبشي...و دخلت لبيت البانو...عملت دوش خفيف..لبست روبة خفيفة...شيحت شعري و خرجت...نحس في روحي باش نطرشق...فكرة قربو منها...منجمتش نتحملها...فرد وقت خايفة يتعلق بيها...دخلت للبيت...و هزيت راسي نغزرلو...بدل دبشو و ترمى عالسرير...قربت من ريحان...نطل عليها...أحسن شي رقدت...حتى هي عدات النهار الكل تلعب...عديت عينيا على وجها..تبسمت بالوقت...فقت من سرحتي على صوتو يحكي
عمر:باش تبقى برشا و إنتي تتفرج عليها ؟
أنا:هاني باش نمشي لصالة...تصبح على خير
خرجت من غير ما نتلفت ورايا...ترميت عالفوتاي...خلط عليا بالوقت...قعد بجنبي يحكي
عمر:شنية تصرفات هذوما ؟
أنا:نحب نقعد وحدي
عمر:باهي...نعرف روحي تسرعت...أما
أنا:اما شنوة ؟ ياخي الكلام عليها ولى يقلق لهدرجة ؟ بديت تتعلق بيها ؟ و معادش تحب فيها ؟
عمر:زهرة ياخي ناوية تهبلني انتي ؟
انا:نعرف لهي تحبك...و انت تعرف هذا زادة...و ك..كان حسيت لانت بديت تتعلق بيها
عمر:شنعمل ؟
انا:منعرفش...انت حر في حياتك عمر...يمكن مانيش باش نجم نتعدا اللي صار معايا...و انت متنجمش تصبر أكثر...نقصد ماكش مجبور تبقى في علاقة فاشلة معايا
عمر:متأكدة ؟
بقيت نغزرلو...من غير حتى كلمة...الحروف وحلت على طرف لساني...الغصة لي حسيتها في حلقي...خلات دموعي تنزل بالوقت...مديت يدي...عديتها على خدي نحكي
انا:تعلقت بيها عمر ؟
عمر:منعرفش...انتي قولي ؟
انا:ت..تحب تبدا حياتك...بعيد علينا ؟
عمر:في رايك ؟
انا:منجمش نجاوب على أسئلتك...اما زادة ب..بعد لي صار معايا...معادش عندي الحق فيك كيما قبل
عمر:ش..شقصدك ؟
نزلت بيديا زوز على طرف الفوتاي...ليلة هذيكا قعدت حاجز بيني و بينو...منجمتش نكسرو...و لا معادش عندي قوة باش نعمل هكا...مسحت دموعي...نحكي
انا:م..مانيش باش نجم نتعدا ليلة هذيكا...ه..هذا لي خلاني بعيدة عليك ديما...على هذاكا مانيش باش نمنعك...كان حسيت انو حياتك معاها...باش تكون احسن...يمكن مزلت باش تتعب معايا أكثر
قربلي شوية...عدا صوابعو على خدي...و تنهد بالقاوي يحكي
عمر:علاش تعب في روحك...و تخمم بطريقة هاذي...ياخي جدت عليك لانا نجم نغزر لغيرك ؟
انا:يززي عممر...يززي امانك
بعدت يدو من وجهي...و هزيت روحي وقفت...رجعت شعري لتالي...نحكي
انا:انا و انت نعرفو لي صار اكا ليلة...تعرف بالقدا لمراد كشف على شطر بدني...و شاخ بيه زادة...حتى يمكن صدقت انو كمل لي بداه معايا...تعرفشي...نظن حتى رجوعنا لبعض غالط من الاول
هد عليا في لحظة...كبس على وجهي بيدو...و غزرلي ندرا كيف يحكي
عمر:اغزرلي هوني...رد بالك زهرة...رد بالك مزلت تعاود الكلام هذا...و لا حتى نسمعو منك صدفة...على خاطر وقتها باش يكون عندي تصرف آخر معاك
كبست على يدو...و جبدت روحي منو فرد وقت...نحكي
انا:سيبني...وجعتني
عمر:يزززي زهرررة
انا:متحاولش تتصرف معايا على اساس انو ما صار حتى شي...و انك تعديت لي صار الكل
عمر:هاذي الحقيقة...تعرف بالقدا لي مانيش باش نصدق كلام الكلب هذاكا...و عمري ما خليت ليلة هاذيكا تكون حاجز بيناتنا
انا:صدقت سلمى قبل هكا
عمر:مصدقتهاش...انا كنت نستنى في تبرير منك...كنت نحب نسمع لي صار منك انتي...ياخي لهدرجة معادش تنجم تاثق فيا
أنا:ماكش مجبور تفسرلي لي صار...و مانيش نلوم فيك زادة..أما زادة مانيش باش نتحمل علاقتكم ببعض..مهما كان لي يجمعكم...و كان تحس لي أنت باش ترتاح معاها...مستعدة باش نبعد من غير حتى مشاكل
عديت يديا زوز على وجهي...نرد في نفس فرد وقت محاولة مني باش نخبي الغصة لي خنقتني...نزلت بيهم لرقبتي...و تلفت باش نمشي...جبدني من يدي...يحكي
عمر:إيجا...إيجا هوني...إيجا
أنا:سيبني...يزي كهو
عمر:أنا لي نقول يزي
أنا:نظن كلامنا وفا هوني
عمر:مش إنتي لي تقرر
مديت يدي حطيتها على صدرو...نبعد فيه...فكرة إني نجم نخسرو...خلات دموعي تنزل أكثر...كل كلمة قلتها مكنتش نقصدها...و نحب نسمع العكس متاعها منو مستحيل نجم نستخايلو معاها و لا مع غيرها رخف يدو على زندي يحكي
عمر:باهي...منقصدش نخوفك مني...هدي روحك و خلينا نحكيو على كلشي من الأول
أنا:منحبش نحكي معاك...و منحبش نسمع سيرتها بعد توا...لي تختارو أنت...أنا موافقة عليه...المهم إني منتحرمش من بنتي...و كهو
مسحت دموعي...و عديت عينيا على وجهو...نستنى في قرارو...خذيت نفس باش نحكي...أما يدو لي تغرست في شعري...و شفايفو لي تحطت فوق  شفايفي بالظبط كان عندها رأي آخر...كبست على مريولو بالوقت...هذا لي كنت بحاجتو...بحاجة قربو...بحاجة فعل منو ينفي كلامي...حط يدو لأخرى على خدي...و جبد روحو شوية يحكي
عمر:فيسع قررت تسلم فيا
أنا:ع..عمر
عمر:محسيتش لإنتي غايرة منها من غير سبب
أنا:أنت السبب
عمر:أنا جيست وصلتها للمطار...و كملت معاها بقية الخدمة في الثنية
أنا:وين سافرت ؟
عمر:أمريكا
أنا:و إمتى ترجع ؟
عمر:ماهيش باش ترجع
أنا:شقصدك ؟
عمر:باش تستقر غادي
أنا:معناها معادش باش تخدم معاها بعد توا عمر
عمر:مممم...كان عطيتني فرصة كنت نوضحلك قبل ما تستلمني
أنا:بالحق ؟
عمر:للأسف
عديت يدي على شعري...نرتب في أفكاري...حسيت روحي تسرعت باللي عملتو...خذيت نفس نحكي
انا:ر..ريحان فاقت...نمشي نشوفها
عمر:مسمعتش صوتها
انا:نحب نطمن عليها
عمر:خليك
انا:باهي...اسمعني...صحيح انا غرت منها...و عاللخر زادة...على خاطرني نعرف لهي تحبك زادة...و نعرف تصرفاتها معاك...فرد وقت منجمتش نتعدا لي صار معايا قبل...و منحبكش تحس بالنقص لانا عايشة بيه توا
مد يدو شوية...حطلي شعري على جنب و نزل بصوابعو لرقبتي يحكي
عمر:إنتي عمرك ما كنت ناقصة بالنسبة ليا
عديت عينيا على وجهو...من غير حتى كلمة...نزل بيدو لشيرة قلبي...يحكي
عمر:إنتي كملت النقص لي كان فيا زهرة
أنا:حتى بعد اللي صار
عمر:لي صار مجرد كابوس...حلمة خايبة...توفى كان انتي عطيتني يدك مرة اخرى
انا:منجمش نسحب يدي منك...حتى كان أنت فلتني
هزلي راسي شوية...و قرب مني اكثر...باسني من جبيني...يحكي
عمر:مانيش باش نفلت يدك مرة اخرى...وعد يا عمري
تبسمت بالوقت...كلامو...كان مهدىء كافي لحرب الأحاسيس و الغيرة لي حلت فيا...باسني من عيني يحكي
عمر:معادش نحب نشوف دموعك مرة أخرى...مفهوم كلامي
هزيتلو براسي ايه...رجعلي خصلات شعري لتالي...و باسني من خدي...يحكي
عمر:و معادش نحب نسمع الكلام متاع قبيل مرة أخرى
انا:و انت معادش تكش عليا بالطريقة هذيكا
عمر:مانيش باش نكش بعد توا طمن
أنا:و باش تبقى تحبني بالطريقة هاذي ديما
عمر:لآخر لحظة في عمري
هزيت عينيا في وجهو...غزرلي ندرا كيف و نزل على شفايفي بالوقت...لزيت ليه أكثر...جبد روحو شوية...عدا عينيه على وجهي...و نزل بيديه لاجنابي...دورني بالوقت...غمضت عينيا...و انفاسي ضاقت...مع صوابعو لي جبدت سيول الروبة في لحظة...انفاسو ضربت في رقبتي بالوقت...نزل بشفايفو...من أول رقبتي...لكتفي لكل شبر يظهر من بدني مع الروبة لي تهبط...أول ما طاحت عالارض...تلفت عندو...فرد وقت نهرب في الذكريات لي هدت عليا...عدا صوابعو على رقبتي يحكي
عمر:توا بالظبط...منحبكش تخمم في حتى شي آخر..من غيرنا إحنا
انا:قاعدة نحاول
عمر:ايجا عندي تراه
جبدني عندو أكثر...حط يدو على آخر ظهري...و نزل يحكي في وذني
عمر:توحشتك...اكثر من اللي تتوقع
أنا:حتى أنا
حطيت يديا زوز على أجنابو...تحت مريولو بالظبط...من غير ما نزل عينيا من وجهو...تبسم بالوقت...كبست على شفتي...هزيت يديا شوية...و لزيت ليه أكثر...نحى مريولو...طيشو عالارض...و عدا خشمو على رقبتي عديت صوابعي على صدرو...نستحضر في الايامات لي جمعتنا قبل في نفس البقعة هاذي...نحب ننسى كلشي خايب تعدا عليا...مقابل اني نعيش معاه كلشي تحرمت منو...قربتلو شوية...بستو تحت كتفو بالظبط...عدا يدو على شعري...و نزل عليا...هزني في حملتو...دورت يديا زوز على رقبتو...و بستو بالوقت...تبسم يحكي
عمر:نمشيو لبيتنا ؟
هزيتلو براسي ايه...رغم داخلي مزلت خايفة...من اللي تعدا عليا قبل...و من اللي ممكن يصير...اما المرة هاذي تبعت قلبي...كيما كل مرة نكون معاه...غمضت عينيا وقت حطني في وسط السرير بالظبط...خذيت نفس نحكي
انا:ن..نحب ننسى لي صار ليلتها...نحب ننسى كل لحظة خايبة عمر
عدا صوابعو على خدي...لي خلاني نحل عينيا و نغزرلو ثواني تعدات...دقات قلبي قوات فيهم...تبسم يحكي
عمر:باش تنسى يا عمري...توا بالظبط...نحبك تعطيني وجيعتك الكل...و كان حسيت روحك ماكش مستعدة...نخلوها مرة أخرى
أنا:ا..انا نحب نتعدا العقدة هاذي عمر...عاوني باش ننسى بطريقتك أنت
عديت يدي على خدو...و استسلمت لاحساسي معاه كيما كل مرة...استسلمت لكل لحظة تجمعني بيه...كل بوسة و كل لمسة من يديه تعدات على بدني...كانت تغطي في الجروح لي ترسمت عليه من شهور...ريحتو كانت كافية باش تخليني نتعدا لي صار معايا...مجرد حلمة خايبة و وفات...هذا لي كنت نعاود فيه...كلامو لي بين لحظة و لحظة...كان مهدئ كافي بالنسبة ليا...و لي خلاني نسلم في بدني مرة أخرى...من غير ما نخمم..في فكرة الرفض...و لا نحس بالنقص لي خلاني بعيدة عليه لتوا...الوقت لي تعدا بيناتنا كان أكبر فاصل في حياتنا جبد روحو...مني يحكي
عمر:كان تعرف الحرب لي حليتها داخلي من اول مرة ريتك فيها...يا زهرة
انا:نفس الحرب هاذي...هي الامان لي زرعتو انت فيا
عمر:انتي مليحة مش هكا ؟
انا:أكثر من اي وقت...مكانش لازم نخاف من علاقتنا قبل...سامحني عمر
عمر:ششش...بعد توا معادش نحبك تخمم في الماضي
قربتلو أكثر...حطيت راسي على صدرو...مش مصدقة اني نجمت نسلملو من اول و جديد...من غير خوف و لا تردد...ضيقت عينيا على صوت ريحان...لي بدات تبكي عدا يدو على وجهو يحكي
عمر:حمد الله مفاقتش قبل توا
انا:عممر...يزززي اماانك
عمر:باهي باهي...هاني باش نمشي نشوفها
انا:تلقاها خافت وحدها...على خاطر مستحيل تجوع توا
جبدت روحي منو...لبس الشورت متاعو...و هز روحو وقف...جبدها من سريرها...يحكي
عمر:شبيها بنتي
انا:ماهيش باش تعاود ترقد
عمر:يظهرلي لا
انا:باهي...إيجا هوني بجنبي...تو نرقدها في حضني
عمر:و انا ؟
انا:شنوة ؟
عمر:باش تخليني نرقد وحدي
انا:عمر مش وقت غيرتك توا...انت لي خليتها تستانس ترقد في حضنك...أصلا هذا كان حبت تجي عندي
قعد بجنبي و حطها في حملتي من غير حتى كلمة تسطح لتالي...و حط يدو تحت راسو...بستها من خدها نحكي
انا:شبي صغرونتي ؟
مدت يديها شوية تضحك...و دورت راسها غزرتلو...رمات روحها عندو...جبدها يحكي
عمر:ايجا هوني
حطت راسها على صدرو...و تغزرلي فرد وقت...تبسمت نحكي
انا:يظهرلي انا لي تفكت بلاصتي
عمر:مش تحب ترقدها في حضنك
انا:اما مش في بلاصتي
عمر:حسيت بيا توا
عوجت فمي و انا و نغزرلو....مد يدو شوية...يحكي
عمر:باهي...ايجا هوني...حتى حد ما يفك بلاصتك
كبست عالغطا...و قربتلو بالوقت...حطيت راسي جنب ريحان كي العادة...غرس يدو في شعري...يحكي
عمر:زهرتي
أنا:مممم
عمر:هاذي آخر مرة...نلقاك في الحالة متاع قبيل باهي
انا:باهي...أما زادة...معادش تتعامل مع حتى طفلة...و معادش تبقى برا للوقت هذاكا
عمر:حقك عليا يا عمري
أنا:و أنا زادة منقصدش الكلام لي قلتو بكري...فكرة أنها تعجبك...خلاتني نفقد اعصابي من غير ما نحس
عمر:مفما حتى شي يخليك تغير يا روحي...صدقني عيني متغزرش لغيرك...نحبك تاثق فيا...و في حبي ليك
انا:ناثق...أما زادة منجمش نمنع غيرتي..سيرين..سلمى و توا السخطة ملك...ياخي ملقاوش غيرك هوما
عمر:هههههههههه باهي حبي...لي تحب عليه باش يصير مهم عندي إني معادش نشوف حالتك هاذي
أنا:باهي يا روحي...آخر مرة وعد
كبس عليا اكثر...غمضت عينيا بالوقت...نعدي في صوابعي على يدو لي كابس بيها على ريحان...فكرة اني تعديت لي صار معايا قبل...بالطريقة هاذي...خلاتني مرتاحة عاللخر...نحب نعيش حياتي كيما قبل...نحب نرقد و نفيق بجنبو و على صوتو...لآخر نهار في حياتي
#سمر💙💙💙