🔸️حلقة 26
كبست على تليفون اكثر...و انا نغزرلو...وقف قدامي بالظبط يحكي
عمر:لباس ماهو ؟
انا:م..مليحة
عمر:خلينا نمشيو ملا
أنا:لا...تو نمشي وحدي
عمر:زهرة شفما ؟
أنا:حتى شي...أنا باش نتنازل عالقضية
مريم:شننننوة ؟
بقى يغزرلي من غير حتى كلمة...خذيت نفس بالسيف نحكي
أنا:عمر...ا أنا
هز يدو...كبس على يدي...و جرني معاه...باقي مريم مخالطة علينا...أول ما وصلنا للكرهبة...جبدت يدي منو بالقاوي...نحكي
أنا:عممر سييبني
عمر:زهرة أركب
أنا:س..سامحني عمر...اما م..منجمش...معادش نجم نكمل لتالي
خفت من غزرتو ليا...أما مش قد خوفي عليه...منحبش مراد يقرب منو...و لا يأذيه جرايري...قرب مني أكثر شدني من زندي و دزني عالكرهبة...غزرلي بغش يحكي
عمر:مستغربتهاش منك تعرف علاه...خاطرك وحدة ضعيفة زهرة...على هذاكا مراد باش يعمل فيك أكثر من هكا...تحب تنسحب من القضية...باهي أعمل لي تحب عليه...معادش يهمني فيك...و كان تحب أرجع لدارو زادة...هذا أحسن حل تعملو...مفماش يسامحك...و مياخوش من عندك تعويض...حق ما اتهمتو...أصلا عندك حق...شكون باش يصدقك توا...حتى محامي مفماش...و إنتي مش واثقة من اللي تعمل فيه...و لا حتى وثقت فيا...برا على روحك...و رد بالك تهرب لعندي مرة أخرى ولا حتى تفكر لأنا باش نعاونك...خاطر مستحيل كان مزلت نغزرلك
بقيت جامدة في بلاصتي...نغزرلو مصدومة...جيت باش نحكي...بعدني بيدو لتالي و ركب...طار بالكرهبة منجمتش حتى نتحرك من بلاصتي...في لحظة بعد عليا جملة...أنو بقيت وحدي مرة أخرى...أنو معادش باش يكون معايا...خلات قلبي يدق بالقاوي...لدرجة نحس فيه باش يخرج من بقعتو...هزيت براسي لا...مستحيل نكون خسرتو...مستحيل يكون خلاني...تي صباح كهو وعدني لي باش يبقى معايا مهما صار...ذكرياتي مع مراد...تعدات قدامي بالوحدة...حطيت يدي على قلبي نرد في نفس...قربت مني مريم...تحكي
مريم:زهررررة
أنا:ع..عمر مشى مريم
مريم:لتوا مستوعبتش لي قاعد يصير...عندو الحق يمشي زهرة...اغزر شنوة لي عملو على خاطرك لتوا ياخي نورمال إنتي تقولو منجمش نكمل القضية...و شمعناها المحامي عمل حادث...آخر الدنيا هي...تي باز كان باش يلقى حل معاك...اما عندو حق...تعرف علاه ؟ خاطرك ستانست بالسيطرة متاع مراد...من زوز كلمات خلاك تتراجع...قولي كيفاش باش تتصرف توا إنتي آه وين باش تمشي...باش ترجع عندو...هيا ايجا خليني نوصلك أنا...أما حط في بالك...المرة هاذي بالرسمي مفماش مهرب منو
بقيت نغزرلها...متوقعتش لهي زادة باش تلومني بالطريقة هاذي...مخي حبس و معادش نجم نفكر منحبش نصدق لهو مشى و خلاني...قربت خطوة من مريم...وخرت لتالي تحكي
مريم:يزييي زهرة...كان بالرسمي إنتي باش تتنازل عالقضية...انساني حتى انا...المرة هاذي لي تعمل فيه ماهوش باش يبررلك شي...كان انتي اخترت مراد علينا تفضل
قربت مني...حطتلي صاكي في يدي...و تلفتت باش تمشي...قربت منها بالزربة...شديتها من يدها...و وقفت في وجها نحكي
أنا:متمشيش مريم...أمانك متخلينيش وحدي
مريم:كي تخدم مخك تعرف وين تلقاني
أنا:مريييم امااانك يزي...مانيش بااااش نتحمل أكثر شتحببنييي نعمل..نخلييييه يقتلو...مراد هو ورا الحادث و متأكدة لهو باش يعمل نفس شي في عمر...و أنا مستحيل نسمحلو فهمتني...مستحيل نخليه يتأذى كان تصيرلو حاجة نموت...منعرفش اذا لي نعمل في صحيح و لا لا...اما منجمش نخاطر بيه..أما هاك حتى إنتي باش تخليني...و تعاود في كلامو بالظبط...تحبوني نرجع لمراد مش هكا...خاطر معنديش وين نمشي...باهي برا اخلط عليه...كل حد فيكم يمشي على روحو...اصلا انا ستانست نبقى وحدي...و كل حد نحبو...يتعمد يخليني مش حاجة جديدة
قربت مني شوية...غزرتلي ندرا كيف...و تنهدت بالقاوي تحكي
مريم:حتى حد ماهو باش يخليك...أما إنتي قاعدة تتخلى على روحك زهرة...كيفاش تحبو يبقى معاك...و إنتي تتصرف بالطريقة هاذي...ياخي عمر صغير باش تحميه إنتي...شبيك متخممش...مدام وصل و عاونك معناها حتى هو ماهوش خايف من مراد...اعمل عقلك زهرة...اعمل عقلك...و لا راك باش تخسر كلشي...و اذا خسرت عمر...صدقني باش تندم حياتك الكل
بقيت نغزرلها...منعرفش علاه حسيت روحي ياسر تسرعت...خوفي من مراد خلاني نعمل حاجات بلا ما نخمم...الكلام وحل في حلقي...و انا نغزرلها...تستنى فيا نجاوبها...دورت راسي على صوت وائل يحكي
وائل:زهرة لباس ماهو...بالصدفة سمعت صياحك شصصاار ؟
انا:م..مفما حتى شي...جيست تقلقت و كهو
غزرتلي ندرا كيف...مفهمتش قصدها...تلفتت عندو تحكي
مريم:وائل نحب نسألك ؟
وائل:بالطبيعة تفضل
مريم:ياخي مش أمك محامية ؟
وائل:إيه
مريم:باهي برشا
انا:م..مريم فاش تعمل ياخي ؟
مريم:لي لازم يصير زهرة...مفماش وقت
وائل:شفما ياخي ؟
مريم:وائل...تنجم تعاونا...معندناش حل اخر غيرك...و مفماش وقت...الجلسة بعد غدوة...يعني كان تحكي مع امك توا...يمكن تقبل تسمعنا
وائل:بالطبيعة مريم
هز يدو غزر لمنقالتو...و رجع غزرلها...يحكي
وائل:مزالت في بيروها...هيا نوصلكم عندها
مريم:باهي
تلفتت غزرتلي...باقي واقفة في بلاصتي...معادش نجم نستوعب لي قاعد يصير..نحس في راسي باش يطرشق هزتلي براسها باش نمشي...تلفت غزرت لكرهبتو منعرفش علاه جا عمر بين عينيا...و ردة فعلو منعرفش علاش خممت فيه...و ما نجمت نعمل حتى شي من غير ما نخبرو...اما زادة يمكن مجينيش فرصة هكا...كبست على تليفوني...حتى الجرأة معنديش باش نكلمو بعد اللي صار قبيل...خلطت عليهم بالسيف
ركبت مع مريم من تالي...طول الطريق...و احنا ساكتين نسمع في وائل يحكي مع امو في تليفون
وائل:أمي متخرجش من البيرو...مسافة الطريق و نكون عندك...لا لا لباس عليا...أما فما حاجة مهمة...منعرفش كي نجي نحكيو...باهي
علق عليها و كمل يسوق...تلفت للبلار...نغزر للمطر لي ماشية و تقوى...خذيت نفس بالسيف...نحب ننسى لي صار صباح جملة...محسيتش بالوقت...كيفاش وصلنا نزل قبلنا...غزرتلي مريم تحكي
مريم:معندناش حل اخر
انا:مريم منين باش نجيب الفلوس...ياخي هاذي عملة تعملها ؟
مريم:منعرفش زهرة منعرفش...نحكسو معاها توا...و كان لزم...نخدمو مع بعضنا و نخلصو حقها
تبسمتلها بالوقت...منعرفش من غيرها شنوة كان باش يصير فيا...رغم عصبيتها الكل...اما متأكدة لهي ماهيش باش تخليها بيا جملة...قربت منها حضنتها...و جبدت روحي نحكي
انا:ماكش باش تخليني مش هكا
مريم:مزال مقررتش هيا اهبط فيسع
انا:باهي
خلطت عليها...قربنا من وائل دخلنا معاه...عرفنا على أمو...صافحتها...و وخرت لتالي...نسمع فيها تحكي
هي:شكون منكم عندها مشكلة ؟
وائل:مريم
أنا:ا أنا مش مريم
هي:تفضل عزيزتي
تلفت غزرت لوائل منعرفش علاه حشمت منو...تبسم يحكي
وائل:نستنى فيكم لبرا
تبسمتلو...و قربت قعدت عالكرسي...بحذا مريم...اول ما خرج غزرتلي تحكي
هي:نسمع فيك
أنا:الجلسة متاعي بعد يومين...و المحامي عمل حادث كان صار و محضرتش الجلسة...باش نخسرها و نخسر كلشي معاها
هي:باهي أحكي نسمع فيك
غزرت لمريم..هزتلي براسها ايه...خذيت نفس و حكيتلها كلشي من الأول...باقي تسمع فيا لتالي...تنهدت بالقاوي و غزرتلها...نحكي
انا:باش تعاوني مش هكا...أمانك...خايفة برشا من اللي باش يصير...و منحبش نرجع عندو
هي:اهدا بنتي...بالطبيعة باش نعاونك...وائل عمل مليح كي جابك لهوني...انا باش نستلم القضية عليك
تلفت لمريم...تبسمتلي مع الوقت...حطيت شعري ورا وذني...نحكي
أنا:عيشك طاطا...نقصد استاذة
هي:هههههه راك كيما وائل بالظبط
انا:باهي...بالنسبة للفلوس...ص..صراحة
هي:مش مشكلة...مش مهمة الفلوس توا...مدام وائل وصل جابك لهوني معناها انتي مهمة عندو برشا...اصلا مش مستانس يطلب مني شي...بالطبيعة مانيش باش نرفض توا
حسيتها تحكي بحزن منعرفش علاه...خذيت نفس نحكي
انا:و وائل ميعرفش بالحكاية...يمكن ما تخبرو شي
هي:مدامك قلت لهو تعارك مع وائل في لفاك...باز باش يعاونا...في رايي احكيلو...بلكشي يشهد معاك
انا:م..منعرفش...منجمش نحكي
هي:أنا نحكي معاه...يا ريت تجيب الأوراق لي حكيت عليهم الكل غدوة...و انا باش نبدا في الاجراءات من توا...و باش نشوف اذا القضية باش تتأجل و لا تكمل في وقتها
انا:باهي عيشك
تبسمتلي بالوقت...حسيت روحي ارتحت شوية...خرجت مع مريم لبرا...لقيت وائل غديكا...قرب منا يحكي
وائل:سيبون ؟
انا:مممم مرسي برشا وائل
وائل:من غير مزية
مريم:مزلنا في حاجتك
وائل:بالطبيعة...معاكم ديما
انا:وائل...لي باش تعرفو من امك...ي..ياريت يبقى سر بينا
بقى يغزرلي مستغرب...قربت من مريم...تحكي
مريم:كان الحكاية يسمعو بيها في لفاك...ترصالنا في مشكلة كبيرة...خاصة اللفعة متاع رانيا
وائل؛باهي تهنى...من غير ما توصي
انا:عيشك
وائل:هيا نوصلكم
مريم:لاا من غير ما تعب روحك...تو نشدو طاكسي
وائل:مستحيل تلقى طاكسي في الجو هذا...و زادة دنيا باش تظلم
مريم:باهي ملا...خلينا نمشيو فيسع
خرجت معاهم لبرا...المطر قوية برشا...الجو مقلوب الدنيا باردة عاللخر...قربت من الكرهبة...حطيت صاكي باش نركب...اما منجمتش...لازمني نقابلو توا...لازمني نحكي معاه...و الا مانيش باش نرتاح...غزرتلي مريم تحكي
مريم:زهرة أركب
أنا:لازمني نشوفو توا
مريم:شننننوة ؟
أنا:لازمني نقابل عمر
مريم:لااا انتي باز هبلت...زهرة الدنيا باش تظلام...و المطر ماهوش باش ياقف...ياخي تحب تهبلني...كيفاش باش توصل عندو...باز الطرق مسكرة
أنا:ميهمنيش...لازمني نمشيلو توا
مريم:يا ربي باش تهبلني الطفلة هاذي
انا:مريم برا مع وائل توا...منحبوش يشلق بيا ماشية عندو...متخافش عليا...تو كي نوصل عندو نكلمك
مريم:باااهي...رد بالك على روحك عيشك...أسمعني...كان صار شي كلمني نجيك فيسع
أنا:باهي
خذيت نفس...ووخرت لتالي...نغزر للكرهبة ماشية و تبعد...ضربت على راسي...خاطرني نسيت صاكي في الكرهبة...حطيت يديا زوز داخل مكاتبي...ياسر البرد غزرت لطريق...حاولت نلقى طاكسي اما شي...تنهدت بالقاوي...وشديت الثنية...نمشي بالسيف...محسيتش بالمطر لي قاعدة تصب عليا...و لا بالبرد...كلشي قاعد يدو في مخي الكلام لي قالو و كهو...حسيت بدموعي نزلو بالوقت...منعرفش كيفاش وصلت...جبدت يدي بالسيف...مش حاسة بيها من البرد...حليت الأصونصير دوب وصلت قربت من الباب مترددة...منعرفش شنوة نقولو...و لا شنوة اللي باش يصير...لي يهمني أنو هو يسمعني...و ميخلنيش مهما صار.
أنت تقرأ
زهرة🌸
Разное🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
