🔸️حلقة 49
🔸️زهرة تحكي:
حطيت الفطور...و رجعت للبيت...نغزرلو مزال غاطس في النوم لتوا...من وقت رجعنا البارح عشية من الفيرما و هو تاعب...ماخو برد جرايري...فقت قبلو...لميت الدار و حضرت الفطور...لازمني نمشي للفاك ليوم...و الا باش نوحل اكثر...قربت منو قعدت على طرف السرير و نزلت عليه...نعدي في صوابعي على خدو...نغزر لتفاصيل وجهو...حل عينيه شوية شوية...تبسمتلو بالوقت نحكي
انا:صباح الخير
هز يدو...رجعلي خصلات شعري لتالي...يحكي
عمر:بونجور عزيزتي...شبيك فقت بكري اليوم
انا:هكا برك
عمر:مممم باهي
انا:كيفاش تحس في روحك توا ؟
عمر:احسن
انا:كلو جرايري...مكنتش نعرف باش تاخو برد
عمر:زهرة لباس عليا...برا حضر روحك...نعمل دوش و نوصلك
انا:مش لازم...انت ارتاح و انا تو نمشي وحدي
عمر:هيا فيسع...متعبنيش اكثر
انا:باهي عزيزي
دوب تبسملي...نزلت عليه شوية...بستو من خدو...و هزيت روحي قمت...خلط عليا...باسني و مشى لبيت البانو...لميت السرير...و رجعت للكوجينة...مزال فما وقت عالكور...حتى مريم تكون مزال موصلتش...نسمع فيه يعيطلي من البيت...حطيت من يدي...و مشيت عندو...لقيتو واقف في كاب دو بان...بحذا القارد روب غزرتلو نحكي
انا:شفما ؟
عمر:زهرة وينو دبشي بربي...بالعادة نحطو هوني
قربت منو...حليت الجيهة الثانية...و غزرتلو نحكي
انا:حطيتو هوني
عمر:علاه ؟
انا:مظطر تقسم معايا القارد روب عزيزي...من اليوم باش تكون هاذي جيهتي و هاذي جيهتك انت
عمر:باهي و باقي الدبش وينو
انا:هوكا في الجيهة الثالثة
عمر:امتى لحقت تقلب هذوما الكل
انا:الصباح...اما كان معجبكش...نجم نحط دبشي في البيت لاخرى...عادي ميقلقنيش
عمر:منقصدش...اما جيست انا
انا:فهمت عليك...تو كي نرجع عشية نرد كلشي لبلاصتو
جيت باش نمشي...جبدني من يدي...حضني من تالي يحكي
عمر:شبيك تغششت
انا:لا و اصلا الفطور باش يبرد...و وخرت برشا
نحكي و نجبد في روحي منو...كبس عليا اكثر...يحكي
عمر:منقصدش...جسيت تبدل عليا الريتم متاع العادة سنين و انا نحط دبشي بالطريقة هذيكا...استغربت كي ملقيتوش...و كان تحب تنجم تاخوها وحدك
انا:و انت وين تحط دبشك ؟
عمر:هههههههه ملا ناوية ترزيني فيها يا فرخة
انا:لا مش هكا
عمر:ملا
انا:يعني انت متقلقتش من الفازة
عمر:لا...مفما حتى شي يخليني نتقلق منك...اللي هوني الكل متاعك انتي
انا:مممم و انت متاعي زادة
عمر:مممم...و توا امشي من قدامي...خاطر كان بقيت هوني...مكاش باش تمشي اليوم زادة
تلفت عندو شوية...قربت بستو من خدو...نحكي
انا:مطولش برشا
هزلي براسو ايه...جبدت روحي منو...و رجعت للكوجينة شوية و خلط عليا...فطرنا مع بعض و نزلنا...بقيت طول الثنية...نقلب في الدروس لي بعثتهملي مريم في تليفون...منعرفش منين نبدا هذوما الكل...و بقى شهر واحد عالكنترولات...و يوفى العام...الفصل الاول عمر عاوني باش خرجتو...اما توا منعرفش شنوة باش يصير محسيتش بالثنية كيفاش وصلنا...ركا الكرهبة و غزرلي يحكي
عمر:متخممش برشا...كان شديت روحك تنجم تخلط عليهم
أنا:إن شاء الله...أنا لازمني نمشي توا
عمر:أستنى لحظة
دورت راسي نغزرلو...جبد فلوس...حطهم في يدي يحكي
عمر:هذا مصروفك
انا:مانيش بحاجتو
عمر:مانيش نعمل في مزية معاك زهرة...نعمل في واجبي معاك
انا:اما هذوما برشا
عمر:مش برشا عليك...و هذا الكارت متاعي...كان تحب برا اعمل دورة مع مريم بدل جو...و كي تكمل...كلمني نجي نهزك
مديت يدي بالسيف...شديتهم عليه...و هزيتلو براسي ايه...نحكي
انا:باهي عيشك
عمر:كان احتجت شي كلمني
انا:وين باش تمشي انت توا
عمر:باش نقابل حسام
انا:باهي
عمر:رد بالك على روحك
انا:و انت زادة
قربت منو بستو من خدو...هزيت صاكي و نزلت..مشيت شوية...و تلفت عندو شاورتلو بيدي....هزلي براسو باهي خذيت نفس و كملت دخلت لفاك...شهرين حسيتها مدة طويلة...يمكن اكثر بلاصة نحبها...خاطر جمعتني بعمر جبدت تليفوني...كلمت مريم...هزت عليا بالوقت..عوجت فمي نحكي
انا:وينك انتي ؟
مريم:اول شي صباح الخير...و ثاني شي هاني وراك
تلفت نغزرلها...ماشية و تقرب مني...ضيقت عينيا مستغربة...حسيتها حلات اكثر الفرخة...ضحكت نحكي
انا:شنوة هذا الكل عزيزتي
مريم:والله حتى انا معادش نعرف روحي
عنقتني...و جبدت روحها شوية لتالي...غزرتلي تحكي
مريم:توحشتك برشا
انا:حتى انا يا روحي
مريم:نحب نحكيلك شي
انا:مممم شصار
مريم:مش توا
انا:لحظة برك...الشال هذا منين جبتو انتي ؟ و شبيني وصلت قبلك انا مع انو عمر وصلني روتار
مريم:اه...صراحة
انا:شنوة ؟
مريم:حسام لي جابو
انا:تحكي بجدك
مريم:و فما برشا كدوات معاه...لحظة برك
حلت صاكها...جبدت باكو شكلاطة...حطاتو في يدي تحكي
مريم:هذا ليك
انا:شنوة هذا ؟
مريم:مش قتلك حسام وقت رجع جابهم معاه
انا:جابهالك ليك عزيزتي
مريم:متخافش مزال اربعة غيرها
انا:هههههههه صار يطلع منو حسام
مريم:طلب مني حاجة
انا:شنوة زادة ؟
مريم:طلب يعرس بيا
انا:شنننننوة ؟
منعرفش كيفاش خرج صوتي...دورت راسي على العباد و رجعت غزرتلها نحكي
انا:ايه و انتي شنية جاوبتو ؟
مريم:منعرفش...لتوا ما عندي حتى جواب...صحيح نحبو و تعلقت بيه...اما مزلت خايفة من الفكرة...و خايفة من ردة فعل بابا...ما نحب نخسر حتى حد فيهم
انا:وافق مريم...ماكش باش تلقى احسن منو...و مدام وصل يطلب يعرس بيك...معناها يحبك و حاجتو بيك
مريم:ملا شبيه ما قاليش انو يحبني ؟
انا:انتي قتلو ؟
مريم:لا
انا:ريت...كان كل حد فيكم ينقص من الغرور متاعو...تو تتحل الحكاية وحدها
مريم:منعرفش...اخطاك مني توا...و قولي كيفك انتي
انا:لباس عزيزتي...اما مجبورة باش تفهمني كلشي فاتني
مريم:اكيد يا روحي...هيا توا...باز مدام شراز تكون دخلت
انا:ظاهر فيك تعلقت بيها برشا
مريم:منعرفش...اما نحب نولي كيفها...مرا واثقة من روحها برشا...و شخصيتها حلوة...يعني بعد القراية هاذي الكل...يحقلنا نولو اكاكا
انا:عندك حق عزيزتي
تبسمتلها بالوقت...مريم اكثر وحدة...متعلقة بقرايتها يمكن الحاجة الوحيدة لي تحاول تهرب بيها من الماضي و تبني روحها من جديد...منعرفش كيفاش تعدا الكور خاصة كي فاتتني برشا دروس...حسيت شراز مركزة برشا مع مريم...حتى غزرتها حسيتها غريبة...محبيتش نشلق و لا نحكي مع مريم في الحكاية...اول ما خرجنا...شدتني من يدي تحكي
مريم:باش نفطرو مع بعض...و ماكش باش ترفض
انا:اكيد عزيزتي هيا
نحب نعدي بقية نهار معاها...فديت من جو الدار...و عمر باز يكون مزال مشغول...نسمع فيها تحكي
مريم:بعد الفطور...نقراو شوية...قبل ما تمشي لدار عالاقل باش تلحق علينا
انا:اكيد
مريم:زهرة ياخي مرتاحة مع عمر انتي ؟
جيت باش نحكي...اما سكت كي ريتها ماشية و تقرب مني...متوقعتش باش نراها مرة اخرى...و زادة من اكا النهار معادش لتهيت بحكايتها...و عمر معادش جاب سيرتها...غزرتلي مريم تحكي
مريم:شبيك شفما ؟
منجمتش نرجعلها...باقي نغزر لسيرين...لي بقات واقفة قريبة منا...تلفتت غزرتلها تحكي
مريم:شتعمل هوني هاذي؟
انا:منعرفش
مريم:خلينا نمشيو
هزيتلها براسي ايه...اول ما مشيت...وقفتني تحكي
سيرين:زهرة
خذيت نفس و تلفت عندها شوية...هزيتها و حطيتها نحكي
انا:تفضل
سيرين:نحب نحكي معاك
انا:نظن مفما حتى شي نحكيو فيه
سيرين:مرة وحدة كهو
مريم:اكيد ماكش باش تسمعها
غزرت لمريم...لي قحرتلي...منعرفش علاه حبيت نسمعها عالاقل باش معادش نحس بتأنيب الضمير انو انا السبب باش عمر خلاها...خذيت نفس نحكي
انا:نسمع فيك
سيرين:نحكيو في بلاصة هادية ووحدنا
مريم:بربي باش نموت عليك انا
انا:خلينا ندخلو للكافي ملا
سبرين:باهي تفضل
مريم:نستناك هوني انا
انا:باهي عزيزتي
شدتني من يدي...و قربت مني اكثر...تحكي في وذني
مريم:رد بالك منها...و متحطش كلامها في مخك
انا:اكيد مريم...تو نرجع
مريم:باهي
خلطت عليها للكافي...جبدت الكرسي...و قعدت مقابلتها طلبت زوز قهوة...غزرتلها نحكي
انا:نسمع فيك
سيرين:مبروك عرسكم
انا:عيشك
سيرين:مرتاحة معاه
انا:عاللخر
سيرين:اكاكا الظاهر...نتوما زوز بنيتو حياتكم على حسابي
انا:اكا لي ترا فيه انتي سيرين
سيرين:قاعدة تعيش في حياتي
انا:جبتني هوني...باش تقولي الكلام هذا
سيرين:لا...جبتك هوني...باش نقلك مانيش باش نسلم في عمر...مش معناها كي عرست بيه...ربحت
انا:اعمل لي تحب عليه سيرين...اخر شي يهمني لي تفكر فيه انتي
سيرين:تعرف شنية اكثر حاجة تمنيتها في حياتي...انك و انتي مراد مدخلتوش لحياتنا
عينيا وساعو بالوقت...كنت نعرف لي فما حاجة بينهم من الصورة لي وراهالي محمد...اما اعترافها توا واضح حطيت يديا زوز عالطاولة...نحكي
انا:شنية علاقتك بمراد ؟
سيرين:تحب برشا تعرف...مش على اساس راجل امك...و كان يتحرش بيك...و لا هي حكاية باش توصل لهوني
انا:فاش تحكي انتي ؟
سيرين:مراد مستحيل يكون بالطريقة لي وصفتها انتي و كان هو عمل اكاكا انتي لي وصلتو
انا:متكونش حبيتو لالة سيرين
سيرين:مراد دخل لحياتي بسببك انتي...باش ينتقم من عمر...و نجح في هذا شي...عمر كان مراش الصور هذوكا...مستحيل كان يعرس بيك
انا:شقصدك ؟
سيرين:قصدي واضح...عمر عرس بيك...باش ينتقم مني و من مراد كهو...ياخي لهدرجة متنجمش ترا الحقيقة انتي...كيفاش بين ليلة و نهار عمر بطل مني و اختارك انتي...خمم مليح في الحكاية زهرة...توا مراد مات...و مش بعيد على قريب توفا حكايتكم نتوما زادة...و صدقني باش نعمل المستحيل...اني نخلي عمر يصدقني و يرجعلي...باش ناخو منك...كيما عملت انتي بالظبط
بقيت نغزرلها...كلامها دخلني بعضي شوية..اما محبيتش نبين...خذيت نفس و غزرتلها نحكي
انا:تعرف شنوة الفرق بينا سيرين...انا نخمم في غيري قبل ما نخمم في روحي...كان جيت انتي تحب عمر بالحق...عمرك ما كنت غزرت لمراد...و لا تغريت بيه و بفلوسو...انا عشت شطر حياتي تحت رحمتو...اما و لا مرة تغريت بيه...تحب تاخو عمر...باهي...هوكا قدامك كان نجمت خليه يحبك...خليه يهتم بيك كيما كان يعمل من قبل...اما ماكش باش تقدر...تعرف علاه...خاطرك وحدة انانية...تحب روحك و كهو...اما انا نحبو هو...و مستعدة نحارب لاخر نفس في حياتي...باش نبقى معاه و ليه...على هذاكا وفر كلامك هذا ليك...خاطر مستحيل تخوفني بيه
بقات تغزرلي من غير حتى كلمة...كبست على صاكي...و غزرت لكاسة القهوة نحكي
انا:صحة ليك...وقت غذاء توا...و صحبتي تستنى فيا منحبش نوخر عليها..و نضيع وقتي معاك
هزيت روحي...وخرجت من الكافي...من غير ما نزيد نسمع حتى كلمة اخرى منها...اول ما لمحتني...قربت مني بالزربة تحكي
مريم:شصار ؟
انا:حطيتها عند حدها
مريم:يعني ؟
أنا:تحب تفك عمر مني
مريم:فاش تحكي ؟
انا:والله هي هكا قالت...و صراحة أنا عندي ثقة في عمر...على هذاكا ميهمنيش جملة لي قاعدة تخمم فيه
مريم:صحيتك هذاكا لي لازم يصير
انا:إيه مش على أساس باش نفطرو مع بعض
مريم:متكونش راحتلك الشهية بعد كأس القهوة
انا:صدقت باش نشرب معاها ياخي
مريم:هههههههه اكيد لا هيا ملا
غمضت عينيا بالقاوي...و رجعت حليتهم...منحبش نفكر فيها الحكاية...و ننسى جملة اني قابلتها و حكيت معاها عديت شطر نهار مع مريم..كل مرة الحديث على شكون أكثر شي فرحت لحسام و مريم...خاطر زوز يستهلو حياة جديدة...نعرف لهي صعيب باش تتقبل الحكاية أما لازمها تحاول...خاطر ماهيش باش تلقى أحسن منو...و حتى هو نفس الشي...مريم رغم قوتها الكل...اما ياسر حنينة و دافية...تخمم في غيرها قبل روحها الظروف كهو لي خلات كل حد فينا...يعيش حاجة ميحبهاش...الدنيا تعبتنا برشا...على هذاكا نحب نطمن عليها حتى هي...فقت من سرحتي...على صوت تليفوني هزيت عليه بالوقت...نحكي
أنا:ألو
عمر:أهلا حبي...وينك كملت ؟
أنا:إي عزيزي من بكري...هوكا قاعدة في الجنينة مع مريم
عمر:تحب نهزك توا ولا مزال تحب تقعد معاها
دورت راسي غزرتلها...لقيتها لاهية في تليفونها...قربت شوية نقرا في الميساج لي بعثو حسام...<< نستنى فيك...و رد بالك نلقى أكا الساقط معاك >> جيت باش نحكي قص عليا عمر
عمر:زهرة تسمع فيا ؟
انا:إيجا نستنى فيك يا روحي
عمر:باهي...عشر دقايق و نكون عندك
انا:باهي
نزلت تليفوني...و تلفت غزرتلها...تكتب في الميساج بغزول << نمشي وحدي >> ضيقت عينيا نحكي
انا:شبيك قتلو هكا...و زادة شكون يقصد بالساقط هذاكا
مريم:يقصد في وائل
انا:صحيح شبيني مريتوش اليوم ؟
مريم:تعارك البارح مع حسام...و كي العادة ضربو من غير ما يخمم
انا:لا عاااد فاش تحكي انتي ؟
مريم:والله كيما نحكيلك
انا:فاش قام يضرب فيه ؟
مريم:والله وائل اعترفلي لهو يحبني...و بالصدفة سمعو سي حسام
انا:روحت عليا المشهد ملا
مريم:يا بنتي مشهد شنية...من غير شي الكل يجنبني خلي بعد اللي صار البارح...حتى وائل معادش باش يكون معايا
انا:انا معاك عزيزتي...حسام معاك...صدقني ماكش باش تحتاج لحد...كان جا كل حد فيهم يعرفك و يفهمك مستحيل يخلوك
مريم:انا مش خايبة برشا مش هكا
انا:كان جيت خايبة كيما قاعدة تقول...حسام ميحبكش و وائل ميحبكش..انتي اكثر من اختي مريم و مستحيل يجي نهار نسلم فيك
مريم:عيشك زهرة
تبسمتلها بالوقت...قص علينا صوت تليفونها...حسام يطلب...علقت عليه...غزرتلها نحكي
انا:فاش تعمل ياخي
مريم:اكاكا...مش انا معاك توا...خليه يستنى ملا
انا:عزيزتي عمر باش يوصل لهوني...من غير ما تخليه يستنى فيك برشا...ميجيش طير الراجل من توا
مريم:شيعرفني انا...ياخي مجبورة نتحمل هذا الكل انتي اكثر وحدة تعرفني...ما نحب حتى حد يتحكم في حياتي...و نحس في حسام يعمل في هذا الشي
انا:مريم يا روحي...حاول تتصرف على طبيعتك و كهو ماكش مجبورة...تخليه يتحكم فيك...و حسام مش من النوع لي تخاف منو...هاني عشت معاه فرد دار...هوما زادة عيلتي
مريم:باهي باهي...هوكا بعث ميساج اخر
انا:هات نقراه تراه
شديت عليها تليفون...و حليت الميساج...نقرا فيه
انا:كان متخرجش توا...انا نجيك
مريم:محسوب باش نخاف منو
انا:ههههههههههههههههه
مريم:شبيك تضحك
انا:خاطر بالرسمي جا...طلع
باقي نضحك و انا نغزرلو و هو يقرب منا...يطلع منو مكملتش قريت الميساج و هو جا...قرب منا يحكي
حسام:اهلا زهرة لباس ؟
انا:لباس حسام عيشك...انت كيفك ؟
حسام:لتوا لباس...مبعد منعرفش
انا:علاه ؟
حسام:اسأل صحبتك
مريم:كان تعرف روحك...تولي مش لباس...ماكش مجبور تحكي معايا سي حسام
حسام:قوم باش نمشيو
مريم:ما نمشي معاك لحتى بلاصة...مش وصلتني الصباح يكثر خيرك...تو نرجع وحدي
حسام:مريم...مش وقت هبالك توا
انا:صارت حاجة منعرفش بيها
مريم:جاوبها...قلها بعد ما وصلتني...عجباتك البروف لي تقرينا
انا:شراز ؟
حسام:مررريم...فاش تخرف ياخي ؟
مريم:نكذب...مش انا نكلم فيك و انت مركز معاها...يا سيدي مدام عجباتك لهدرجة...برا كلمها...فاش قام تعمل معايا هكا
حسام:مررريم يززززي
انا:مريم شبيك كبرت الحكاية ياخي
غزرتلي ندرا كيف...فهمتها بالقدا...نعرف لي مدام شراز مرا مضخمة برشا...و مش بعيد تعجب اي حد...تي حتى مريم تحبها...حتى انا نحسها مرا راقية برشا في تعاملها معانا...و طريقة كلامها...قص علينا صوت حسام...يحكي
حسام:استغفر الله...اغزرلي هوني...امشي قدامي...قبل ما نفقد اعصابي
مريم:على أساس باش نخاف منك...مانيش باش نمشي معاك...و ماكش باش توصلني لحتى بلاصة بعد توا
حسام:زايد الكلام معاك...زهرة نظن عمر وصل...خاطر ريتو داخل بالكرهبة...و سامحني خاطر باش نهز الفرخة هاذي معايا توا
هزيتلو براسي ايه...جبدها من يدها يمشي فيها غزرتلي تحكي
مريم:زهرة كيفاش توافقو انتي ؟
هزيتلها بكتافي الله غالب...قحرتلي...و تلفتت عندو تجبد في يدها منو...شدني الضحك عالفازة...خلطت عليهم...نمشي وراهم...لقيت عمر نزل من الكرهبة يغزرلهم مصدوم...قربت منو...وقفت قدامو...غزرلي يحكي
عمر:شفما...شبيه حسام يجر في طفلة اكاكا ؟
انا:مممم حسام يحب يرضيها...و هي متحبش تسمعو
عمر:صار...يطلع منو...تو يتعب و هو يرضي
انا؛على أساس انت ماكش باش تتعب
عمر:بربي...شعملتلك انا ؟
انا:منعرفش...شوف انت
نزل عليا شوي...باسني من خدي...و جبد روحو شوية يحكي
عمر:مزلت متغشة لتوا مريتي
انا:مممم شوية
عمر:نرجعو لدار...و نرضيك على قاعدة
انا:عممممر
عمر:هههههههههههه هيا اطلع
جبدت روحي منو...حليت الباب وركبت...خلط عليا بالوقت...سبقنا حسام بالكرهبة و خرجنا وراه...غزرتلو نحكي
انا:عمر
عمر:مممم
انا:شصار في المشروع ؟
عمر:مبدئيا وافقت عليه
انا:تحكي بالرسمي ؟
عمر:مش هذا لي طلبتو انتي ؟
هزيتلو براسي ايه...و نطرت عليه...كبست على وجهو بيديا زوز...و بستو من خدو...بوسة مرصوصة نحكي
انا:مبروك حبي...نعرف لانت باش تنجح
عمر:عيش حبي
تلفت شوية...خطف بوسة من شفايفي...و رجع ركز مع ثنية...يحكي
عمر:تحب نتعشاو برا ليلة
انا:لا مزلت تاعب انت...عالاقل لين ترتاح
عمر:الدار ناقصة برشا قضيات
انا:ملا باش نشروهم في طريقنا
عمر:باهي يا روحي
نعرف لمزال تاعب...اصلا منعرفش كيفاش نجم يقضي معايا...خليتو يحط الاكياس في تالي...و حليت الباب نلقى تليفونو ينوقز...جيت باش نعيطلو...اما سكت كي ريتها هي تطلب...مديت يدي علقت عليها...و حليت لي ميساج متاعها...ما ردلها على حتى واحد فيهم...حسيت روحي ارتحت شوية...كنت باش نحطو اما جات عيني على رقم عندي برشا مريتوش..منعرفش شيعمل رقم مراد عندو...و لا شنية فيه الميساج...حليتو متردة...الدم جمد في عروقي...و انا نغزر لتصاور مراد مع سيرين و هو يبوس و يحضن فيها...منجمتش نراهم الكل...الدنيا دارت بيا...معناها بالرسمي...عمر يعرف لكان فما بينهم شي...و تاريخ الميساج مش بعيد على دات عرسهم لي كان عاملينها...اول ما سمعتو سكر الكرهبة من تالي خرجت من الصور...و حطيت تليفون...خلط عليا...ركب و سكر الباب يحكي
عمر:تحب على حاجات اخرى ؟
بقيت نغزرلو من غير حتى كلمة...كاني قاعدة نستوعب في اللي ريتو...شبيه محكاليش...زعمة بالرسمي كان ناوي يعاوني و كهو...زعمة حب سيرين...و خلاها على خاطر مراد...منحبش نشك فيه...خاطر تصرفاتو الكل تقول العكس...هو تحمل برشا على خاطري...اما علاه لتوا...مزال مخلي تصاور عندو...شبيه مفسخهمش...و علاه مراد اختار سيرين بالظبط...دخلت بعضي...و معرفتش شنية نعمل...باقي نغزرلو و كهو
فقت من سرحتي...كي ضيق عينيه و عاود سألني يحكي
عمر:زهرة شفما ؟
انا:اه...حتى شي
عمر:ملا شبيك مش قد بعضك ؟
انا:منعرفش...تعبت شوية كهو
عمر:باهي تو نمشيو لدار...و ارتاح شوية
انا:باهي
حطيت الحزام...و تكيت لتالي...نحاول ننسى لي ريتو نعرف لهو عندو تفسير للحكاية...اما منجمتش نسألو خايفة اكثر شي من ردة فعلو...على هذاكا...منحبش نفكر في الموضوع اكثر...منحبش نتعبو معايا اكثر
يمكن احسن ننسى لي صار...و معادش نفكر فيه جملة
أنت تقرأ
زهرة🌸
Diversos🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
