حلقة 62
🔸️مراد يحكي:
هزيت روحي وقفت بحذا شباك...نغزر لهند و هي تمشي وراها...كأنو تحب ترضيها...بقيت نتبع فيهم بعينيا...لين دخلو...خذيت نفس و خرجت من البيرو...نغزرلها واقفة في الكلوار وحدها...تنفخ و تعاود...طلعت راسها غزرتلي هزيتلها براسي باش تخلط عليا...و دخلت...شوية و دخلت ورايا...تحكي
هند:من غير ما تعاركني عالصباح امانك
انا:اقعد ساعة...مجنون باش نعارك و انتي في الحالة هاذي
هند:تفرك فيهم عليا انت ؟
انا:لا...اما منحبكش تدخل للحصة و انتي في الحالة هاذي
هند:لباس عليا...جيست تقلقت شوية و كهو
انا:شصاار ؟
هند:حتى شي مهم
انا:نسمع فيك ؟
هند:من بكري و انا نرضي فيها...اما لتوا مزالت ماخذة بخاطرها مني
انا:فاش قام ترضيها ؟
هند:منعرفش...حسيت روحي غلطت معاها و كهو
انا:في رايك الغلطة متاعك...تستهل هذا الكل
هند:سلمى كيما اختي...و غاضتها الفازة...خاطرني وقفت مع مرت خويا و كهو
عينيا وساعو مع اخر كلمة...دخلت بعضي للحظة...اما فيسع ما تداركت الوضع...خذيت نفس نحكي
انا:و شمدخلها فيكم هي ؟
هند:حكاية طويلة...مانيش باش نتعبك بيها
انا:نحب نسمعها...بلكشي نجم نعاونك
هند:الحكاية الكل...انو الزوز ميحبوش بعضهم...و انا وحلت بينهم
انا:اكيد السبب خوك
هند:تنجم تقول ايه...مانيش باش نعطلك برشا...مرسي خاطرك سمعتني
قربت منها...وقفت قدامها...حطيت يديا الزوز...على كتافها نحكي
انا:ماكش مجبورة تبرر تصرفاتك لحد...لا سلمى و لا اي حد غيرها...برا للكور متاعك...و ما تخمم في حتى حد باهي
هند:باهي عيشك
عديت عينيا على وجها...و جبدت روحي لتالي...نحكي
انا:هيا فيسع
دوب تبسمتلي...و خرجت تجري...ترميت عالكرسي...و هزيت دبوزة الدوا في يدي نغزرلها...دخل المدير بالوقت غزرتلو نحكي
انا:خلي الاستاذة سلمى...جيني لهوني
هو:نظن تقري ت
سكت كيف قحرتلو...هزلي براسو ايه...يحكي
هو:باهي سي فرات
تلفت بالكرسي لشباك...و تكيت راسي لتالي...لي عرفتو على بنت خالتو...ما يجي حتى شي...قدام لي قالتو هند توا...حسيت بالباب تحل...تبسمت على جنب...قربت شوية تحكي
سلمى:تفضل مسيو
تلفت بالكرسي عندها شوية شوية...هزيتها و حطيتها نحكي
انا:تفضل مدموزال سلمى
سلمى:نجم نعرف علاه طلبتني ؟
انا:تفضل اقعد
قعدت عالكرسي مقابلتني...غزرتلي ندرا كيف تحكي
سلمى:عندي كور توا...و منعرفش شكون حضرتك و لا علاه طلبتني
انا:عندك حق...شرايك نبداو من الاول ؟
سلمى:شقصدك ؟
انا:زعمة شنية لي يخلي سلمى المالك...تخلي دارها...و املاك بوها...و فلوس تنجم تخرجك من البقعة لانتي فيها لاخر دنيا...و تفضل تعيش...مع عيلة بن قاسم ؟ لي في الاصل هي بنت خالتهم مش اكثر
سلمى:فاش تحكي انت ؟ و شيعرفك لانا نملك هذا الكل...شكونك انت ؟
انا:خليني نخبرك انا احسن...انتي اخترت تبقى في القصر متاعهم...على خاطر ولدهم...عمر بن قاسم...انتي ستنيت السنين هذوما الكل على امل باش يرجع على خاطرك...ضحيت بعام و لا عامين...و لا خلينا نقولو عشر سنين كاملين...اما كي رجع...مرجعش وحدو...رجع مع مرتو...زهرة الحسيني...لي سلم في خطيبتو و فيك...و في دنيا على خاطرها
سلمى:شكونك انت ؟
هزيت روحي وقفت...قربت منها...وقفت وراها...نحكي
انا: وسط هذا الكل...لقيت روحك داخلة في حرب خاسرة...حاولت اكثر من مرة تثبت روحك قدامو...اما عينو بقات على مرتو
سلمى:فاش تحكي ياخي ؟
انا:قاعدة تموت بالعرق...و انتي ترا فيهم مع بعض...اكثر من مرة تمنيت انتي تكون في بلاصتها
جات باش تقوم...كبست بيديا زوز على كتافها...رجعتها و نزلت عليها شوية...نحكي في وذنها
انا:ريت لي تحس فيه توا...انا عايش فيه من عام...ريت كل مرة يحط يدو عليها...انا نموت من داخل الف مرة لي قاعد يصير فيك...صار فيا قبلك
سلمى:شتحب مني ؟
انا:مش منك...منا الزوز
سلمى:لااا انت باز هبلت على روحك...ابعد خليني نخرج
وخرت خطوة لتالي...هزت روحها وقفت...جا وجها مع وجهي...قحرتلي...و قربت من الباب باش تخرج..تبسمت نحكي
انا:هاذي باش تكون اخر فرصة ليك...و الا باش تعيش طول عمرك...تتحصر على حبك لي ضاع
وقفت في بلاصتها...و تلفتت عندي...غزرتلي ندرا كيف و قربت مني تحكي
سلمى:شتحب انت بالظبط ؟
انا:زهرة
سلمى:زهرة ؟ ياخي عمر فكها منك بالسهولة هاذي ؟
انا:مفما حتى حد في دنيا...يفكلي حاجتي من بين يديا اللي ميعرفوش عمر متاعك...انو مرااد ديما سابقو بخطوة...اطلع مليح...اغزر بالقدا...المعهد لي واقفة فيه متاعي...الاراضي متاع راجل خالتك ولات ملكي...و القصر القديم متاعي زادة...و على قريب باش نفك منهم المعمل و القصر لي عايشين فيه زادة...و الاهم من هذا الكل...لي عمر ميعرفش شكون قاعد يسحب في البساط من تحتو
سلمى:مستحيل
انا:مفما حتى شي مستحيل...اما ينجم هذا الكل يوفا كان انا خذيت لي حاجتي بيه
سلمى:تقصدها هي ؟
انا:بالظبط...و فرد وقت عمر راح يكون ليك...حتى هو يحتاج شكون يداويه بعد مرتو
سلمى:اكيد مانيش باش ندخل في اللعبة هاذي معاك...و انا اصلا منعرفش عليك شكون
انا:ميهمش برشا تعرف شكون انا...المهم النتيجة في الاخير...خمم بالقدا...خاطر انا في الحالتين...باش نرجع كلشي منو...اما اكيد باش نظطر نضرو بعدها
سلمى:شنية المطلوب مني ؟
تبسمت على جنب...متأكد لهي ماهيش باش تضيع الفرصة هاذي من يدها...خذيت نفس نحكي
انا:اقعد ساعة
قربت من الكرسي قعدت مترددة...تنهدت بالقاوي...و قربت منها نحكي
انا:نحبك ترجع زهرة للماضي متاعها
طلعت راسها...غزرتلي ندرا كيف...عوجت فمها تحكي
سلمى:شقصدك ؟
قربت منها اكثر...استندت بيدي عالكرسي...و نزلت عليها شوية...حطيت دبوزة الدوا عالبيرو...نحكي
انا:هذا قصدي
جبدت روحي لتالي...و ترميت عالكرسي مقابلها...هزتها في يدها تحكي
سلمى:شنية هذا ؟
انا:مهدئات...كانت تاخوهم زهرة...و اللي تخلصت منهم بفضل عمر
سلمى:و شنية تحبني نعمل ؟
انا:واضح
سلمى:اكيد هبلت...مستحيل...ياخي نورمال تحبني نخليها تاخو الدوا هذا و هي
انا:شنوة ؟
كانت باش تحكي...اما بلعت كلامها في اخر لحظة تنهدت بالقاوي تحكي
سلمى:حتى شي...اما مش على اساس تحبها...كيفاش تحبني نأذيها بطريقة هاذي
انا:تعديت مرحلة الحب عزيزتي...و مقلتش بالحرف الواحد خليها تاخو دوا هذا مرة اخرى
سلمى:ملا شنية ؟
انا:خليها تاخو عالاقل مرة وحدة...و من غير ما تقوي دوزة...و اكيد وقت تبدا مع عمر...و خلي دبوزة متاع الدوا على عينو...و الباقي تو يتصرف فيه وحدو
سلمى:تقصد لعمر
انا:بالظبط...انتي كهو اعمل لي قتلك عليه...الماضي متاع زهرة...هو الوحيد لي باش يفرقهم...خاطر بالنسبة ليهم الزوز...مراد ميت من اول نهار عرسو فيه
سلمى:كيفاش ؟
انا:الامور الصغيرة...متهمكش برشا...اعمل لي قتلك عليه و كهو
كبست عالدبوزة في يدها...و طلعت راسها غزرتلي ندرا كيف...تحكي
سلمى:بااهي...لي تحب عليه باش يصير...اما عندي شرط واحد عندك
انا:نسمع فيك
سلمى:رد بالك تقرب من عمر...و لا حتى من عيلتو...و خاصة هند...اعمل لي تحب عليه...لي يهمني انو زهرة تخرج من حياتنا و كهو...نوعدك باش نعمل لي نجم عليه...اما قبل ما تمشي من هوني...رجع كلشي كيما كان كيف الاول...باهي
انا:باهي مدموزال سلمى
سلمى:عيشك سي مراد...كان ميقلقكش...نحب نرجع للكور متاعي
انا:اكيد تفضل
دوب تبسمتلي...و هزت روحها وقفت...تكيت لتالي نحكي
انا:مدموزال سلمى...امانك كي تخرج من هوني...انسى لي كنت تحكي مع مراد...برا الباب هذا...اسمي السي فرات...باهي
سلمى:مممم باهي سي فرات
هزيتلها براسي باهي...عطاتني بظهرها و خرجت..تنهدت بالقاوي...و تكيت راسي لتالي...نحكي
انا:وفات يا روحي...المرة هاذي كلشي باش يرجع لبلاصتو...و انتي بلاصتك عندي انا و كهو
فقت من سرحتي...على صوت تليفوني...مديت يدي هزيتو...تبسمت و هزيت عليه بالوقت...نحكي
انا:حمد الله تذكرت لي فما شكون تسال عليه
كريم:ربي يسامحك...ياخي مستانس...ننساك
انا:هاك كبرت و تعلمت تحكي من فوق
كريم:ميزيتش توا
انا:باهي خبرني ساعة...امي كيفها ؟
كريم:لباس...كي العادة...وينك انت شبيك غبرت
انا:خدمة...و بالعمل احسن شي طلبتني
كريم:شنية لي صار ؟
انا:محتاجك جنبي الفترة هاذي
كريم:شصار ؟
انا:حتى شي مهم...اما نحبك تحضر اجتماع في بلاصتي
كريم:اما تعرف لمانيش بالخبرة متاعك
انا:ما تخاف من شي...متنساش انت شكون...و كل خطوة تعملها انا وراك
كريم:اكيد...عيش خويا
انا:رد بالك على روحك...و نقص لي تعمل فيه
كريم:مش على اساس شي ماهو باش يصير عليا
انا:بالطبيعة...اما نحبك تنقص السباقات هذوما...مفهوم
كريم:اكيد طمن
انا:عيش خويا
كريم:هاني باش ندخل الاجتماع توا...و كان صار جديد تو نعلمك بيه
انا:باهي...بون كوراج
كريم:عيشك
نزلت تليفون و هزيت روحي...خرجت من البيرو...وقيت باش تبدا اللعبة...و الليلة باش تكون اكبر خطوة...في حياتهم زوز...الليلة بالظبط...باش نخليها تعيش نفس الليلة لي عاشتها من سنين...باش ترا روحها في هند...و تفهم و تستوعب بالقدا...انو مراد لي حبها و عشقها...و رباها على يدو...مزال موجود...و باش يبقى في حياتها لاخر لحظة...لي لازم تفهمو الليلة...انو قدرها انا لي نحطو بيدي....و انو ديما كانت تمشي على قوانيني و كهو...هي لتوا شافت حب عمر و عاشت فيه كهو...اما بعد الليلة...باش ترا جحيم عمر...باش تعرف انو الحب مش كلشي في دنيا...و انو حتى هو باش يجيه نهار و يخليها...وقتها ترجع لعندي بساقيها...عمر لانا باش نخليه...ياخو ثنية لي نحب عليها...اتو نخليه...يتمنى الموت كل لحظة...و يندم على الساعة لي سمح لروحو يدخل زهرة لحياتو...حب زهرة ليه..من توا باش يتحول لجحيم...جحيم يرزيه...في كلشي يملكو...فلوسو...عيلتو و اهم شي روحو هو...توا برك بدات اللعبة...و المرة هاذي مانيش باش نرحم حتى حد فيهم...زعمة قداش ينجم يستحمل...و لامتى يبقى صامد قدام حبو...و قداش مزال يضحي على خاطر زهرة...البداية كانت ليهم....اما وقيت باش ننهي كلشي...و نحط حد للحكاية هاذي...و نخلي الكل...يعرف و يستوعب انو زهرة ليا انا...ملكي انا و كهو.
🌸🌸🌸🌸🌸🌸🌸🌸🌸🌸🌸
🔸️زهرة تحكي:
هزيت يدي...حطيت شعري على جنب...و طلعت راسي نغزرلو من المرايا...قرب مني...وقف ورايا بالظبط...عدا صوابعو على ظهري...و قربلي اكثر...نزل عليا شوية يحكي في وذني
عمر:شنية هذا الكل..مش حرام عليك تعمل فيا هكا ؟
تلفت عندو...قربت منو اكثر...هزيت يديا زوز...حاوطتو بيهم نحكي
انا:شعندي عملتلك ؟
عمر:قول شنية لي معملتوش فيا ؟
انا:عممر امااان ؟
عمر:ميساعدنيش تخرج هكا
انا:بربي ؟
عمر:مرتي و انا حر فيك
انا:فاش قام تعمل هكا...مش حرام عليك عاد
عمر:شوو كيفاش تحكي معايا...يا طفلة تحب تقتلني انتي
انا:مممم باهي اسمعني...انا عندي مفاجأة حلوة برشا...و باش تفرحك عاللخر...اما
عمر:اما شنية ؟
انا:باش نخبرك...اما بعد الحفلة
عمر:معناها تحبني نصبر...لبعد سهرية
هزيتلو براسي ايه...كبس عليا...و وخر بيا لتالي...نزل عليا اكثر...خطف بوسة من شفايفي...يحكي
عمر:تحبني نصبر على شفايفك زادة ؟
عدا يديه زوز على ظهري...يشم في ريحتي...تبسم ندرا كيف يحكي
عمر:متاكدة تحبني نصبر عليك لبعد السهرية انتي ؟
حطيت يدي على خدو...نغزرلو...حسيت بيه مش قد بعضو...خاصة كي الفترة هاذي الكل مقربش مني تبسمت نحكي
انا:اصبر ليلة هاذي زادة...مش انا صغرونتك...والله مزلت تاعبة لتوا
عمر:باااهي...هاني مصدقك لتوا...اما منجمش نظمنلك اني نجم نشد روحي اكثر
انا:اي نعرف يا روحي
عمر:متستفزنيش امانك
كبست على اجنابو اكثر...و طلعت راسي غزرتلو...نحكي
انا:الجماعة يستناو فينا
دور يديه زوز على ظهري...و نزل عليا اكثر...غطس في شفايفي...حسيت بيدو...طلعلي في شركة...سكر الروبة...و جبد روحو شوية يحكي
عمر:هيا كمل حضر روحك...نستنى فيك لوطة
انا:باهي عزيزي
جبد روحو مني...هزني و حطني مرة اخرى...تنهد بالقاوي...عدا يدو على وجهو...و خرج يجري...تبسمت بالوقت...و تلفت للمرايا...نغزر لروحي...حطيت يديا زوز على كرشي...نحكي
انا:زعمة شنية ردة فعلو كي يعرف بيك يا روحي..تعرف لانت باش تكون احلى حاجة بعد عمر في حياتي
تبسمت و انا نحكي معاه...خذيت نفس طويل...و كملت عدلت روحي...لبست الفاست متاعي من فوق...خاطر الجو بارد شوية برا...هزيت سطوشتي و نزلت...احسن شي عملو عيد الميلاد في ريسترون...عالاقل نجم نبدل جو شوية...حليت الباب و نزلت اللوطة...استغربت كي ما لقيت حتى حد...سمعت الحس في الصالة اللوطانية قربت باش ندق عالباب و ندخل...اما حبست في اخر لحظة...و انا نسمع في كلامها
فاطمة:عمممر...ولدي مش قصدي لي فهمتو...نعرف لانت تحبها...و حتى زهرة كيما بنتي و اكثر...اما نحب نرا صغارك...نحب نفرح بيك قبل ما ربي يهز امانتو...هاك في العام معرس بيها...و لتوا لا فرج ربي بصغير
عمر:امممي...الطفلة مزالت صغيرة و تو تحبل...و انا مانيش مقلق عالصغار...يكفي لهي معايا...و ما حاجتي بحتى شي اخر
فاطمة:نعرف و فهمت بالقدا لانت تحبها...و هذا واضح و نعرف لهي مزالت صغيرة...اما هاك داخل للاربعين و لتوا معندكش صغير يحمل اسمك
عمر:امي و شنية المطلوب مني...ياخي بيدي الحكاية هي ؟
امي:عمرر...انت برا هزها لطبيب...خليه يعرف شبيها محبلتش لتوا...مبعد ربي يعمل حل
عمر:حل شنية يا امي...مستحيل نهز مرتي لطبيب...و لا نحطها في هكا موقف...على خاطر الصغار...اكيد باش ربي يعمل حل...اما مش بالطريقة لي تخليني نهين مرتي...و بلكشي المشكلة مش منها...فك علينا عد امانك خلي السهرية توفا على خير
فاطمة:باهي...احسبني انا الغالطة...اما تو يجيك وقت تندم عالكلام هذا
عمر:باهي...كانك حاضرة ايجا نهزك معانا
فاطمة:برا اسبقني...هاني باش نجي مع بوك تو شوية
انا:باهي
وخرت لتالي مروهجة...نحس في نفس تسكر عليا متوقعتش باش نسمع الكلام هذا منها...كانت تنجم تسألني انا...باهي كان منجمتش نحبل...زعمة باش تطلب منو يعرس مرة اخرى...جرد فكرة دخلتني بعضي برغم كلامو معاها فرهدني...و حبيت وقفتو في صفي اما خوف غريب تسلسل داخلي...نجمت نتوقع منو...انو العيلة هاذي تنجم تبدل حياتي في لحظة...فقت من سرحتي...كي حط يدو على ظهري من تالي يحكي
عمر:حاضرة حبي
طلعت راسي غزرتلو في عينيه...مد يدو لاخر...بعدلي شعري شوية...يحكي
عمر:لباس ماهو ؟
انا:مممم لباس
عمر:اما مش كأنك كثرت لي في فمك
مديت يدي حطيتها على شفايفي...و غزرتلو...نحكي
انا:هكا شتهيتو
عمر:انا لي تشهيتو توا
نزل عليا اكثر باش يبوسني...عديت عينيا على وجهو نحكي
انا:عممر حبي...تو يشوفنا حد
عمر:باهي...باهي...امشي برك
كبس على ظهري...خرجنا مع بعض...فتحلي الباب يحكي
عمر:تفضل لالة
انا:عيشك
خذيت نفس و ركبت...نحاول نحط الحزام لي وحل خلط عليا...و قرب مني...فكهالي...تلفت باش نحكي قص عليا...كي خطف بوسة من شفايفي...يحكي
عمر:هكا نجم نكمل في راحتي
انا:زايد مجنون
عمر:صاار
قربت منو بالوقت...ترميت في حضنو...خذيت نفس نحكي
انا:نحب نبقى عندك
تبسم...و خدم الكرهبة...عديت يدي على صدرو...نحكي
انا:عممر
عمر:مممم
انا:نحب نسألك ؟
عمر:شنية يا روحي
انا:ك كان صار...و منجمتش نحبل...شنية باش يصير يعني
عمر:فاش قام سؤال هذا توا ؟
انا:منعرفش...هكا برك
عمر:فكنا من الموضوع هذا توا
انا:العيلة الكل تستنى في صغار منك
عمر:ميزيتش توا...شيهمني فيهم انا
انا:باهي...منقصدش
عمر:صغرونتي...اخاطنا من الموضوع هذا توا امانك
انا:سامحني
عمر:شبي حالتك هكا ؟
انا:شي حبي
عمر:باهي ما تخمم في حتى شي توا
انا:باهي
طلعت راسي شوية...بستو من رقبتو...منحبوش يحس لي فما شي...و لا انا سمعت كلامهم قبيل...كبس عليا يحكي
عمر: زهرة يزززي امانك...حرام عليك تعمل فيا هكا
انا:مممم باهي
حسيتو تكبس اكثر...وصلنا لرستورون بالسيف...لقينا مصطفى و سلمى و اسيا...و صحابها متاع المعهد زادة حاضرين...وقفت بجنب عمر...اصلا نحس في روحي تاعبة...و ريحتو كهو لي تنجم تهديني توا...كبست على يدو كي طفاو ضو...عرفت لهي وصلت...كبست على يدو بالوقت...اول ما تحل الباب و دخلت...صفقنا الكل فرد مرة...اما اول ما ولى الضو...يديا رزنو...قلبي خض بالقاوي...نغزرلها...و مش فاهمة لي قاعد يصير....الحس متاعهم نسمع فيه بعيد برشا...مخي وقف...و معادش نجم نتحرك...وجيعة صغيرة...حسيت بيها في كرشي لا...لا...مستحيل لي نرا فيه...رجعت بيا الذاكرة سنين لتالي...و انا نرا فيها لابسة نفس الروبة...لي لبستها انا سنين لتالي في الحفلة...نفس الروبة...لي شراهالي مراد وقتها...اما كيفاش ؟ وقتها قطعة وحدة...و غالية برشا يمكن صدفة...اكيد صدفة اخرى...فقت من سرحتي كي دور يدو على جنبي يحكي
عمر:وين سرحت ؟
طلعت راسي غزرتلو...و عاودت غزرتلها...نثبت فيها خذيت نفس بالسيف نحكي
انا:ح حتى شي
عمر:متأكدة ؟
هزيتلو براسي ايه...بقى واقف بجنبي...من غير حتى كلمة...تعدا الوقت...و انا نتبع فيها بعينيا...لاهية مع صحابها...دورت راسي لامو...قاعدة بحذا سلمى...تهز فيا و تحط...دوب تبسمتلي...هاذي لي حطيتها في بلاصة امي...قلت اكيد باش تحبني كيما ولدها...و بنتها...اما اذا امي لي جابتني لدنيا...محبتنيش...كيفاش باش تحبني هي...برشا افكار هدت عليا...خوف غريب سيطر عليا منعرفش علاه عندي احساس لمراد موجود هوني...و انو الليلة هاذي...باش تبدل برشا حاجات...فقت من سرحتي كي قربت منا...هازة في يديها زوز كيسان..حطت وحدة في يد عمر...و وحدة في يدي...تحكي
سلمى:طول السهرية ما شربتو شي
عمر:عيشك
كنت باش نرجع الكاسة...اما حسيت روحي شتهيتها تبسمتلها بالسيف...كبست عليها في يدي...خذيت رشفة منها...اصلا نحس في روحي تاعبة مش نورمال...و داخلة بعضي...غزرتلو تحكي
سلمى:عمر ياخي تذكرت اخر حفلة هوني ؟
عمر:بالطبيعة
سلمى:كانت اخر حفلة...و اخر ليلة حلوة زادة
انا:هذاكا في رايك انتي عزيزتي
نزل راسو شوية غزرلي ندرا كيف...و تبسم على جنب يحكي
عمر:اخر حفلة هوني...كانت حفلتك انتي و مصطفى
انا:و السبب ؟
عمر:حفلة الباك متاعهم عزيزتي
انا:مممم باهي
هند:ويييينكم...تلمو هوني فيسع
حطيت الكاسة من يدي...و قربت منو...شديتو من يدو...نحكي
انا:هيا حبي
تبسملي...و كبس على يدي اكثر...قربت معاه...و خليتها ورانا...فرد وقت منحبش نقرب من هند اكثر...اول ما طفات الشموع...قربت من عمر بالوقت...باش توكلو جبدت يدي منو...من غير ما نحس...هزيت براسي لا قربت مني...حطت قطعة في فمي...بلعتها بالسيف قربت مني اكثر...باش تسلم عليا...ريحتها خنقتني...لي هي ريحتي بالاصل...اما كيفاش ؟ قبل ما توصل عندي دزيتها بيديا زوز...وخرت لتالي مروهجة...طلعت راسها غزرتلي...مصدومة...و مش كان هي...الكل يغزرلي مصدوم...نسمع فيه يحكي
عمر:زهرررة...شبيك...لباس ماهو ؟
طلعت راسي غزرتلو...وجهو تكبس بالوقت...اصواتهم قوات في وذني اكثر...يستناو فيا نحكي...ريحتها ماشية و تخنق فيا...جات باش تقرب مني مرة اخرى جبدت روحي منها...طيشت الشال من يدي...بعدتها بيدي...و خرجت نجري...ساقي اعلى من راسي...نجري بكل قوتي...حتى نسيت لانا حبلة...و نجم نضيع ولدي حبست كي حسيت نفس تسكر عليا...البرودة لي برا الكل...ما جات شي...قدام لي قاعدة نحس فيه توا استندت بيديا عالحيط...نرد في النفس...بدني الكل يرعش...الاحداث الكل دور في مخي...نفس الروبة
نفس الريحة...مستحيل تكون صدفة...متأكدة لي مراد عايش...و مزال موجود...مراد هوني...اما وينو...فقت من سرحتي...كي جبدني من يدي بالقاوي...جات عيني في عينو...وجهو مكبوس...لدرجة...معادش نجم نعرف ملامحو...غزرلي...غزرة ترعب يحكي
عمر:زهررة...هاني باش نطول بالي معاك و نسألك...شنية لي صار...شبيك تصرفت مع هند بالطريقة هذيكا شفما ؟
انا:م م...مراد
عمر:شنننية ؟
انا:م...مراد عايش...مراد هوني عمر
عمر:لا انتي باز هبلت...شمدخل مراد توا...شبيك تخلوض...زهرة شبيك ؟
جبدت روحي منو...وخرت لتالي و رجعت شعري...بيديا زوز...غزرتلو في عينيه نحكي
انا:م...مراد مزال عايش عمر
عمر:زهررة...مش على اساس سكرنا عليها الحكاية ياخي يجي منو لي عملتو الداخل...شذنبها هند...باش تعمللها اكاكا قدام العباد
انا:عممر...اسمعني امانك...متأكدة لي هند قاعدة تقابل في مراد
غزرلي ندرا كيف...ضحك باستهزاء...و عدا يدو على وجهو يحكي
عمر:تعرف روحك فاش قاعدة تقول ؟
انا:باهي اسمعني...الروبة...الروبة لي كانت لابستها هند
عمر:كانت هدية منك
انا:شنننوة ؟
عمر:هذا لي قالتو...كي سألتها امي...من وين شراتها
انا:عمممر...انا ما عطيت هند حتى الشي...الروبة هذيكا
كانت هدية مراد...وقت حضرت الحفلة متاع صحبتي
عمر:زهررررة....يزززي....يزي من التخلويض هذا...وين تحب توصل ياخي...تحب تفهمني لانتي مزلت مخبيتها الروبة متاع سي مراد...و في تالي عطيتها لهند باش تعمل دراما هاذي
انا:عمممر...انا ما عطيتها حتى شي...قالت اكاكا...باش متقولش لهي جاتها هدية...انا وقت خرجت من دار مراد ما هزيت معايا حتى شي...كان دبشي لي جيت لابساتو و انت بيدك شريتلي دبش جديد...و الروبة لي لابستها هند...كانت اخر قطعة في البوتيك نهارتها...الروبة غالية برشا...متاع مصمم معروف...و متوقعتش لهو ينجم يشريها نهارتها...صدقني مش اي حد ينجم يشري حاجة اكاكا...بااهي...باهي...كان مصدقتنيش عالروبة...ريحة البرفان متاعها...نفسها البرفان لي كنت نحطها...اكيد مزلت متذكرها مش هكا...حتى البرفان هذيكا...كان مراد يطلبها من برا...خاطرها سبيسيال برشا...و صعيب برشا تلقى منها...و بوات الموسيقى لي حكيتلك عليها قبل...يااا عمر والله لا راني نخلوض...مستحيل تكون صدفة مستحيل...متأكدة لي مراد قريب مني...و منا الكل...امانك صدقني المرة هاذي كهو...امانك
بقى يغزرلي...من غير حتى كلمة...كنت نستنى فيه يصدقني كي العادة...يقلي لي باش نتأكد من الحكاية قرب مني يحكي
عمر:زهرررة...يزززي كهو...مراااد مااات...و ماهوش باش يرجع...و انتي تاكدت بنفسك من الحكاية...كان مزال عايش لتوا...راهو رجع...الاوهام هذوما...يخلوك ترا في حاجات مصارتش...يمكن كنت نصدقك...كان جات اي طفلة اخرى...اما هند ؟ مستحيل تكون عندها علاقة بواحد كيفو...و اصلا وين باش تلقاه...زايد الحديث يمكن معطيتهاش الروبة هذيكا اما اكيد فما سوء تفاهم في الحكاية...يزززي توا...و خلينا نرجعو...احكي معاها و تو تفهمك اكيد
بقيت نغزرلو من غير حتى كلمة...ريقي شاح...مستحيل تكون اوهام...كان هو مصدقنيش...شكون باش يصدقني كيفاش نعمل...متأكدة لهو عايش لتوا...اما كيفاش باش نقنعو...نفخ بالقاوي...و تلفت عطاني بظهرو...نعرف كي يبدا هكا...ميوليش حامل حتى روحو...اما و انا ؟ كيفاش نجم نغزر لهند...كيفاش باش نراها اكاكا..كيفاش نعمل باش معادش نشم نفس البرفان هذيكا...بقينا ساكتين زوز...لا هو عاود تكلم...و لا انا نجمت نتحرك من بلاصتي...تلفت عندي باش يحكي...قص علينا صوت سلمى من تالي تحكي
سلمى:عممر لباس ماهو ؟
غمض عينيه بالقاوي...و عاود فتحهم...فد حتى منها تنهد بالقاوي يحكي
عمرلبااس...سوء تفاهم و كهو
سلمى:هيا باهي...مشى في بالي...تغششت من هند على خاطر حكاتلي...ما صار شي باهي...اعتبرني ما سمعت حتى كلمة زهرة
غزرتلها مصدومة...مش فاهمة قصدها...تروهجت...فوق ماني مروهجة...غزرلي ندرا كيف...كأنو يسأل فيا...و تلفت عندها يحكي
عمر:حكاية شنوة زادة ؟
سلمى:حكاية الصغير لي طيحاتو زهرة
عمر:شننننوة ؟
تلفت عندي بالوقت...هزيتلو براسي لا...اصلا منعرفش من وين خرجت بيها الحكاية...و هند تعرف لي صغير لباس عليه...و كنت باش نخبر عمر ليلة...علاه حتى تقول لأنا طيحتو...غزراتو دخلوني بعضي...هزيت يدي بالسيف حطيتها على كرشي...نحب نقولو...لهو هوني ولدنا مزال عايش...اما حسيت الكلام وحل في حلقي قربت منا شوية تحكي
سلمى:في بالي...لانت تعرف بالحكاية...افففف محقنيش حكيت توا...زدت بلبزتها اكثر...اما اكيد تو ربي يعوضكم متقلقش روحك عزيزتي...هاني باش نرجع بحذا هند انا توا...حرام لي صار فيها الليلة
بقى ساكت من غير حتى كلمة...يغزرلي و كهو..انسحبت من قدامنا...و رجعت منين جات...جيت باش نحكي...هز يدو في وجهي سكتني بيها يحكي
عممر:صحيح لي سمعتو ؟
انا:ل...لا...عمر انا
عمر:قتللللك صححححيح جااااوبني...انتي طيحت الصغير زهرررة ؟
صياحو كمل على ما بيا...دمعة هربت مني بلا ما نحس متوقعتش لهو باش يصدقها...و يسألني بالوقاحة هاذي كيفاش يجي لمخو لانا نعمل اكاكا...تبسم ندرا كيف يحكي
عمر:نحس في روحي باش نهبل يا ربي...لااا يزززي مرادد لعاود طلع في حياتنا...منعرفش من وين...و توا حكاية الصغيييير...زهررررة كيفاش تعمل فيا هكا جاوبني
انا:م ما عملت شي
عمر:ما عملت شي...تقتل ولدك...و تقول ما عملت شي
هزيتلو براسي لا...استوعبت انو فسر السكوت متاعي انو رضا على كلامو...هو مكانش هكا...كان يفهمني حتى كي نبدا ساكتة...اما توا ؟ قرب مني يحكي
عمر:قول حاجة...احكي...فسرلي لي صار و لي قالتو سلمى...راني باش نهبل
انا:مفما حتى شي...نجم نحكي فيه...يززي كهو
جيت باش نمشي...رجعني بيدو...كبس عليا يحكي
عمر:على هذاكا كنت مريضة...و كل مرة نقربلك فيها تلقى سبة...ياخي علاه هكا زهررة...فسرلي..قلي الحكاية كذب...و سلمى قاعدة تكذب...جاوبني...متسكتش هكا
انا:لي قالتو سلمى صحيح...مدامك صدقتها...مفماش عندي تفسير اخر
كبس عليا اكثر...لين حسيت يدي باش تطير من بلاصتها...دورني قدامو...و شدني من تالي...يحكي
عمر:تعرف شنية لي تأكدت منو توا...انتي نسخة من امك زهرة...مش في الزين كهو...انتي نسخة ثانية من انتصار...اغزر لروحك
طلعت راسي...نغزر لروحي...في بلار متاع شباك...كبس عليا اكثر و كمل كلامو يحكي
عمر:مراد لتوا مزال مسيطر على حياتك...لدرجة حبيت تفرض وجودو بينا مرة اخرى...انتي كيما امك بالظبط ماكش باش تتخلص من اللعنة متاعو جملة...و اللعنة متاعو وصلت لولدي زادة...منعرفش شنية سبب لي خلاك تعمل هكا...اما...متاكد انو امك كانت ارحم منك عالاقل هي خلاتك تجي لدنيا هاذي...و تو مع الوقت تستوعب اللي عملتو بالقدا
بقيت نغزر لروحي...انا مانيش كيما امي...و مستحيل نكون اكاكا...و هو يعرف هذا بالقدا...يعرف لانا مستحيل نعمل حاجة تضرو هو...اما صدقها هي...صدق بنت خالتو...و تلفت يسأل فيا كاني عاملة جريمة...للحظة حسيت روحي مع عبد اخر...جبدت روحي منو...خذيت نفس بالسيف...و تلفت عندو نحكي
انا:روح بيا
محاولتش حتى نغزرلو...مشيت و خليتو واقف في بلاصتو...زايد الحديث معاه...بعد اللي قالو...نعرفو بالقدا وقت يعصب يغلط في الكلام...و معادش يعرف شنية يقول...اما المرة هاذي...كان ميساجو واضح برشا واضح لدرجة...خلاني نعرف انو برغم حبنا الكبير...العيلة اهم شي في الدنيا...هذا لي فهمتو في الشهرين و نص لي عشتهم هوني...اني مستحيل نجم نكون فرد منهم مهما عملت...و عمر...عمر بكلامو...كسرلي ظهري و كسر السند لي نتكا عليه وقت نبدا بحاجتو...توا وقت باش نثبتلو لي مراد مزال عايش...برغم متأكدة باش نخسر برشا حاجات اخرى...اما اكيد مانيش مجنونة...و مانيش نتوهم...و تو يجي نهار يندم على كلامو هذا الكل...حليت باب الكرهبة...و تكيت لتالي...خلط عليا يسوق من غير حتى كلمة...حسيت بدوخة قوية...نعست مش نورمال...لدرجة منجمتش نحل عينيا...منعرفش شبيني...اول ما وصلنا...غزرلي يحكي
عمر:انزل
مديت يدي بالسيف حليت الباب...و نزلت...استندت بيدي عالحيط...نحاول نثبت في الطريق...خلط عليا بالوقت...شدني من يدي يحكي
عمر:شبيك ؟ لباس ماهو ؟
تلفت عندو...دوب نجمت نغزرلو....حاولت نجبد روحي...نحكي
انا:س سيب...سيبني
عمر:يا بنتي شبيك...ايجا اركب...نهزك للكلينيك احسن
طلعت راسي غزرتلو...فيسع ما تمحى غشو...و تفجع عليا...قربت منو اكثر...حطيت راسي على صدرو تفرهدت بريحتو اكثر...كبست عليه نحكي
انا:نعسسانة...مش نورمال...معادش نجم ناقف اكثر
تنهد بالقاوي...و نزل عليا هزني بين يديه...طالع بيا و يتشوحر...مزال مغشش...حتى انا مانيش باش نعديلو لي قالو...اما توا...حاسة روحي مخدرة...متعداتش ساعة عاللي صار الكل...اما هبط عليا النوم...لساني رزن...و هديت بطريقة غريبة...حسيت بيه كان كي حطني عالسرير...نحالي سباطي...و حلي الروبة من تالي يعرفني نتقلق من حاجة مكبوسة...كمل نحاهالي...من غير حتى كلمة...غطاني...و جا باش يخرج..شديتو من يدو نحكي بالسيف
انا:ع...عمر...ابقى معايا...خايفة برشا
عمر:باهي هاني معاك...ارتاح توا...مبعد ربي يعمل حل
رخفت يدي و غطست في نوم...لدرجة معاد نحس بحتى شي...و لا حتى حد...رقدت من غير ما نخمم في اللي صار جملة...اما لي متاكدة منو...باش تكون اخر ليلة نرقد فيها مرتاحة هكا....خاطر بعد الليلة هاذي باش يبدا جحيم جديد في حياتي انا و كهو.
أنت تقرأ
زهرة🌸
Aléatoire🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
