زهرة🌸

الحلقة التاسعة و الستون

حلقة 69
🔸️عمر يحكي:
طلعت راسي نغزر لحسام...حتى هو داخل بعضو معادش نجم نفكر اكثر من هكا...منعرفش من وين خرجت الحكاية هاذي توا...سكرت البيسي و تكيت لتالي...نحكي
انا:شنية الحل توا ؟
حسام:منعرفش...يعني من وين خرجت حكاية توقيف المشروع منعرفش
انا:المشكلة في الناس لي حطت فلوسها فيه...تعرف شمعناها تعويض كيما هذا
حسام:نعرف...نعرف
انا:انت بيدك قلت لي تعاملت مع شريكة المواد من قبل هذا لي خلاني نوقع عقد معاهم
حسام:أكيد
انا:ملا فاش قام يعطونا سلعة مغشوشة
حسام:هذا لي لازم نعرفوه توا...هيا قوم
هزيت الفاست متاعي...و خلطت عليه...الأمور دخلت بعضها اكثر من قبل...و مشروع كيما هذا...مستحيل يبقى نص...و الا باش تكون الضربة القاضية لشريكة...و منحبش نكون السبب المباشر في هذا الكل...ثنية كاملة و افكار تهز فيا و جيب اول ما وصلنا...غزرتلو نحكي
انا:شنية الحالة هاذي بربي ؟
حسام:طول بالك...أكيد باش تتحل
هزيتلو براسي ايه...و دخلت وراه...نستنى في المشرف متاعهم...حتى حسام مش قد بعضو...و احسن شي خذينا موعد مع المدير العام...حليت الفاست...و قعدت عالكرسي...نغزر لحسام يحكي
حسام:مسيو ناجي...نظن تعاملنا مع بعض من قبل...و اكثر من مرة زادة...تنجم تفهمني اصل المشكلة شنية...و نقصد بكلامي السلعة المغشوشة
ناجي:سي حسام...متأكد للعقد توقع معانا
دور راسو غزرلي بالوقت...عقدت حواجبي مستغرب نحكي
انا:شقصدك ؟
ناجي:احنا ما تلقينا حتى طلب منكم لتوا...و ما وقعنا معاكم حتى عقد
حسام:تعرف الكلام لي قاعد تقول فيه انت...انا بيدي قابلتو المسؤول على السلعة...و مش اول مرة نتعامل معاه و نعرف لهو من طرفكم...و العقد باسم الشريكة متاعكم
ناجي:ميسالش تعطيني العقد
هزيت في يدي...حطيتو عالبيرو...نغزر لحسام لي باش يطرشق...خذيت نفس نحكي
انا:مدام المسؤول تابعكم...و العقد باسم الشريكة متاعكم...شنية المشكلة بالظبط
ناجي:المسؤول متاعنا تبدل ليه خمس شهور
حسام:شنننننوة ؟
ناجي:و العقد هذا مش صادر من عندنا...و ما بعثنا حتى سلعة للموقع..كان تحب ايجا معايا تو تتأكد من الطلبات لي خرجت من هوني
انا:تحب تفهمنا لي العقد مزور
ناجي:يمكن
غزرت لحسام بالوقت...ظاهر الحكاية اكبر ببرشا من اللي توقعت...ضيقت عينيا نحكي
انا:شنية لي يخلي المسؤول لي كان يخدم عندكم يتصرف بالطريقة هاذي
ناجي:منعرفش...اما تنجم تحول القضية لتحقيق...و أكيد باش ناقف معاكم
حسام:شنعمل بوقفتك معااايا...تعرف خسارة كيما هاذي شنية تعني...احنا وثقنا فيكم...على هذاكا معملناش كنترول عالسلعة
انا:حساام اهدا
حسام:عممر...كيفاش تحبني نهدا...انا قبل ما نتعامل معاه...عطيتهم خبر من قبل
انا:سي ناجي...مزلت مستعد باش تعاونا
ناجي:أكيد
انا:نحبك تسلملي المسؤول لي كان عندكم هوني خدمتنا معاه هو
غزرلي حسام مستغرب...هزيت روحي وقفت...نحكي
انا:زيارتنا وفات...نتقابلو مرة اخرى
حسام:اكيد باش نتقابلو
انا:هيا حسام
هزيت روحي خرجت من عندو...و حسام في جرتي فكيت المفتاح من يدو نحكي
انا:انا نسوق
حسام:شنية الحل توا ؟
انا:أكيد فما حل...اركب ساعة
خدمت الكرهبة و طرت بيها...نحس في راسي باش يطرشق...كبست عالفولون نحكي
انا:باز فما ملعوب في الحكاية
حسام:شقصدك ؟
انا:العقد مزور...معناها السلعة...جات من شريكة اخرى و تنجم تكون شريكة وهمية
حسام:شكون من مصلحتو يعمل هذا الكل
انا:منعرفش...اما أحسن شي المشروع مزال في أولو
حسام:مشكلة اذا مكملش قبل وقتو
انا:أكيد باش يكون فما حل...طول بالك
حسام:المشروع لازم يتسلم في وقتو...و اذا عرفو الناس المساهمين...مشكلة و طاحت على راسنا
انا:المشروع باش يكون حاضر...بعد عامين من توا...و شي ماهو باش يصير...و كان لزم تو نوقعو معاهم عقد رسمي...يضمن الكلام هذا...و من غير شي انا لي باش نتحمل المسؤولية...خاطرني انا المسؤول الاول على المشروع
حسام:مستحيل نخليك تتحمل المسؤولية وحدك..الفترة هاذي خلي نادر يشد امور الشريكة...لين نلقى الساقط هذاكا
انا:و انت قلتها...اول شي لازمنا نعرفو أصل الحكاية قبل اي تصرف غالط
حسام:ناقصني مشاكل اخرى توا
انا:شفما زادة ؟
حسام:حتى شي مهم
انا:مريم مرة اخرى
حسام:معادش نعرف شنية نعمل...الذنب لي نحس فيه اكبر من اني نجم ناقف قدامها و نواجها
انا:مش قتلك رد بالك تتسرع...هاك كليتها على راسك
حسام:معادش نعرف شنية نعمل بالظبط...نعرف لي ماهيش باش تسامحني...و الدليل تحب تبقى مع أمي
انا:اغزر من الجانب المليح...يعني هي تاعبة شوية...و من الاحسن تبقى مع فتحية في دار...ميجيش تعدي نهار وحدها
انا:بعد المشاكل لي طاحت على راسي...منجمتش نقابل خالتها...و الاسوء قابلتها مرة اخرى...و تعبت نفسيتها اكثر...لازمني نحكي معاها...و مع عم احمد زادة
انا:في رايك باش يسمعك ؟
حسام:منحبش نخسر مرتي اكثر من هكا...مجبور باش يسمعني...حتى انا تعبت من الوضع هذا...و نحب نعيش نهار كيما العباد...يا ديني 7 شهور ممسيتش فيهم مرتي بسبب بهامتي...و تفكيري كنت باش نقضي على حياتي و حياتها فرد وقت...كان هي سامحتني...مانيش باش نسامح روحي عاللي عملتو فيها
انا:مدامك عرفت الغلطة متاعك...أكيد باش تسامحك اما احسن شي خلي شراز بعيدة عليك
حسام:شراز اخر همي بعد اللي صار...اهم شي عندي توا مريم تسامحني...صحيح علاقتنا هدات على قبل...اما شي ما تبدل فيها
انا:معادش تغلط معاها حسام و أكيد كلشي يرجع كيما قبل و احسن
حسام:ان شاء الله
انا:شرايك نقابلو المحامي توا...عالاقل نربحو الوقت
حسام:أكيد
شديت الثنية لشريكة...خليت حسام مع المحامي...و دخلت للبيرو...هزيت الدوسيات متاع المشروع الكل...و أرقام العمال لي فيه...احسن شي يحبسو البناء فترة ما نحب حتى خسارة مادية و لا بشرية في الحكاية...تعدا نهار طويل و رزين عاللخر...ملحقتش حتى باش نطلبها و نطمن عليها...أحسن شي مقراتش اليوم...و الا كنت باش نعدي نهار على أعصابي...هزيت بقية الدوسيات...و قصدت ربي لدار...خذيت قضية في ثنيتي...و طلعت اول ما حليت الباب...ضربتني ريحة الماكلة...تنهدت بالقاوي...و دخلت للكوجينة...نغزرلها غاطسة مع العشا حطيت القضية عالطاولة...و قربت منها...خطفت بوسة من خدها نحكي
انا:لباس اليوم ؟
زهرة:لباس...انت شبيك طولت ؟
انا:خدمة
زهرة:ساعة اخرى...و العشا يكون حاضر
انا:باهي
جبدت روحي منها...نحيت الفاست طيشتها عالفوتاي في صالة...و دخلت لبيت البانو...عملت دوش...تفرهدت برشا...تعبت برشا من الوضع لأنا فيه...شهر تعدا علينا شي ما تبدل فيه لتوا...لا انا نجمت نقربلها بعد اكا ليلة لي رفضتني فيها...و حتى هي نفسيتها تعبت اكثر من قبل...و اللي قاهرني اكثر...ولات تخبي كلشي داخلها عكس قبل...بدلت دبشي...و قعدت معاها عالعشا...دوب نجمت ناكول لقمة على بعضها...غزرتلي تحكي
زهرة:معجبكش ؟
انا:يعطيك صحة عزيزتي
زهرة:لباس ماهو ؟
انا:لباس...لباس...كمل عشاتك انتي...عندي خدمة توا
زهرة:باهي
هزيت روحي...رجعت لصالة...غطست في الدوسيات ساعة...زوز...اما ما وصلت لحتى حل...اعصابي تحرقت و معادش نجم نخمم اكثر...هزيت يدي رميت الاوراق الكل عالارض...طلعت راسي نغزرلها...داخلة عندي...تفرك في يديها...استغربت خاطرها لتوا قاعدة...اما فرد وقت سرحت فيها...الحبالة وتاتها عاللخر...و هزت صحتها شوية...بعد ما جينا لهوني...خذيت نفس نحكي
انا:ايجا اقعد
قربت مني...قعدت بجنبي...دور في عينيها عالصالة غزرتلي ندرا كيف تحكي
زهرة:عمر...شفما ياخي ؟
انا:حتى شي...انتي شبيك لتوا ؟
زهرة:اه...اناا...حتى شي...هاني باش ندخل نرقد توا...منحبش نقلقك اكثر
حطيت يدي على يدها...كبست عليها...و تنهدت بالقاوي نحكي
انا:شاهية حاجة ياخي ؟
هزتلي براسها لا...تهرب في عينيها مني...مديت يدي لاخرى...حطيتها على خدها نحكي
انا:اغزرلي هوني...حط كلشي على جنب توا...و قولي شنية تحب ؟
زهرة:متأكد ؟
هزيتلها براسي ايه...نزلت راسها شوية...دوب سمعتها تحكي
زهرة:خ..خوخ...نحب على خوخ
انا:خوخ ؟ و توا ؟
زهرة:مممم
انا:ياخي الصغرون هذا...مصمم يمرمدني قبل ما يجي
زهرة:ميسالش...مش لازم منو
انا:اذا قدر ربي...تو نلقى شي حد مزال محلول بعد نص ليل...و ان شاء الله نلقى الخوخ...في عز البرد
جيت باش نقوم...كبست على يدي بالوقت...غزرتلي ندرا كيف تحكي
زهرة:مش لازم
انا:بدلت رايك
زهرة:خليك هوني
انا:زهرة لباس ماهو ؟
قربت مني حضنتني بالوقت...دورت يديها زوز على رقبتي و كبست عليا أكثر...جمدت في بقعتي...أكثر من شهرين محضنتنيش بالطريقة هاذي...تقريب 3 اشهر حسيت روحي فقدتها فيهم...هزيت يدي بالسيف حطيتها على ظهرها نحكي
أنا:زهرة...شبي حبي
زهرة:خليك معايا و كهو
خذيت نفس...و نزلت بيديا زوز لجنابها...جبدتها شوية من عندي...نغزرلها...مش قد بعضها جملة...كبست عليها نحكي
أنا:شصار ؟ شبي حالتك هكا
زهرة:حلمت حلمة خايبة...على هذاكا منحبكش تخرج و أنت في الحالة هاذي
انا:هاك قلتها...مجرد حلمة...معناها مفما حتى شي يخوف
زهرة:لااا
أنا:و شعملنا في الخوخ...تحب تخلي البيبي اكاكا
زهرة:معادش عيني فيه
قربت مني اكثر...حطت راسها على صدري...و حاوطتني بيديها زوز...هديت بصفة غريبة على قبل...يمكن هذا لي كنت محتاجو...وسط الظغط لي طاح عليا...كبست عليا تحكي
زهرة:كان تحب كمل خدمتك...مانيش باش نقلقك
أنا:خليك هوني زهرة...أنا محتاجك توا...اكثر من قبل
زهرة:شصار ياخي ؟
انا:مشاكل في الخدمة
زهرة:باش تتحل ؟
انا:أكيد يا روحي
زهرة:كلمتني هند صباح...تسأل اذا باش نكونو معاهم في الويكاند
انا:منجمش...الفترة هاذي حساسة برشا...و إنتي مزلت تاعبة
زهرة:علاه مجيش هي بحذانا ملا ؟
انا:مبعد نحكي معاها
زهرة:باهي
انا:انتي شعاملة في قرايتك ؟
زهرة:نحاول نخلط عالدروس الكل...حتى مريم ضايعة كيفي
انا:مبعد نفهمك في الدروس لي فاتت...و انتي ركز في الباقي...باهي
زهرة:عممر
انا:مممم
زهرة:متوحشتنيش أنت ؟
طلعت راسها...جات عيني في عينها...غزرتلي ندرا كيف متوقعش السؤال هذا منها...غرست يدي في شعرها نحكي
انا:في رايك انتي ؟
زهرة:منعرفش...انت قولي
انا:كلشي قاعد يصير...كيما تحب انتي و كهو
زهرة:معناها متوحشتنيش
انا:باش نموت عليك زهرة
دوب تبسمتلي...و قربت مني اكثر...باستني من رقبتي غمضت عينيا بالوقت...و عاودت حليتهم نحكي
انا:ناوية تجلطني ياخي ؟
زهرة:اما شاهية حاجة اخرى انا
انا:بربي
زهرة:صراحة مش انا...البيبي يحب
انا:يحب مني انا ؟
هزتلي براسها...ضيقت عينيا...و تبسمت على جنب نحكي
انا:و شنية يحب مني ؟
زهرة:ماكش باش تتغشش كان نقلك
انا:لا متخافش...نسمع فيك
تبسمت بخبث...أصلا ستانست بيهم الفازات هذوما...من نهار حبلت فيه...جيت باش نحكي...اما سكتتني بعضة قوية...روهجتني بيها الفرخة...كبست عليها بالوقت...و باقي مكبشة...جبدت روحها شوية...حضنتني بالوقت ترد في النفس...تبسمت نحكي
انا:نورمالمون انا لي نرد النفس بعد العضة هاذي يا فرخة
هزت يدها...تعدي في صوابعها على رقبتي...لتوا تحرق فيا العضة...غزرتلي ندرا كيف تحكي
زهرة:تستهل العضة هاذي
انا:بربي
زهرة:اكثر من مرة رقدت بحصرتي...خاطرني منجمتش نعملها
انا:و شنية لي منعك ؟
زهرة:برشا حاجات...اولها علاقتنا مولاتش كيما قبل
غرست يدي في شعرها...و تنهدت بالقاوي...نحكي
انا:انتي تحبها ترجع كيما قبل ؟
زهرة:كان انت توعدني...معادش تجرحني مرة اخرى...و معادش تحسسني لأنت عملت فيا مزية...وقتها برك باش ترجع
أنا:زهررة...أنا عمري ما عملت فيك مزية..كان أنا اعتبرت مساعدتي ليك مزية...مكنتش باش نعرس بيك و نربط حياتي معاك...قتلك و باش نعاودلك...شك في كلشي أما مش في حبي ليك
زهرة:معناها مزلت تحبني ؟
انا:مممم
زهرة:كيما قبل ؟
انا:و اكثر زادة
زهرة:باهي...و سلمى حبيتها بكري ؟
انا:و انتي قلتها...بكري
جبدت روحها مني...تغزرلي مصدومة...وجها تبدل بالوقت...قحرتلي تحكي
زهرة:شقصدك ؟
انا:انتي سألت و انا جاوبتك
زهرة:عمر شنية لي تقول فيه انت...على هذاكا صدقتها على هذاكا عملت فيا اكاكا ؟
جات باش تقوم...كبست على يدها...و قربتلها...اكثر نحكي
انا:لي صار...ما عندو حتى علاقة بسلمى...انا غلطت صحيح...اما عمري ما خليت حد يحكي عليك...و لا ياخو قرار في بلاصتي...خاصة اذا كان قرار يتعلق بيك انتي
زهرة:اما كنت تحبها ؟
انا:زايد مجنونة...يا بنتي انا و سلمى محسوب خوات كان جا عيني فيها...مانيش قدامك توا...سلمى بالنسبة ليا كيما هند بالظبط...عمري ما غزرتلها بطريقة اخرى...و لا حتى خممت فيها...تي حتى سيرين...لي كنت خاطبها و عديت معاها سنين...منجمتش نحبها...حاجة فيا كانت ناقصة ديما...و إنتي كملتها زهرة
زهرة:معناها ما حبيت حتى وحدة فيهم
انا:حبيتك انتي...و وحلت
زهرة:بربي ؟
انا:هاني صابر شعندي نعمل
زهرة:ماكش مظطر تصبر بعد توا
عديت عينيا على وجها...غزرتلي ندرا كيف...عديت صوابعي على شفايفها نحكي
انا:على شنية تحبني منصبرش ؟
زهرة:كلشي
قربت منها اكثر...خطفت بوسة من شفايفها...و جبدت روحي شوية...تبسمت على جنب...حسيت روحي اول مرة نبوسها..ياسر توحشتها...توحشت قربها...تخرنينها متاع العادة...حتى شهاويها عمري ما تقلقت منهم..نعرف روحي وجعتها برشا...و بكيتها برشا...منحبش نتعبها اكثر من هكا...ضيقت عينيا نحكي
انا:منعستش ياخي ؟
زهرة:لا و انت ؟
انا:عندي خدمة
زهرة:توااا
انا:مممم...هيا اسبقني توا
زهرة:منحبش
انا:مش باهي تسهر لتوا...معادش وحدك توا
زهرة:نعرف لأنا حبلة عمر...و مانيش صغيرة زادة
انا:عيش الصغرون..هيا توا
زهرة:الحق عليا...لي جيت عندك
هزت روحها وقفت...تغزرلي...قحرتلي...قحرة موت تحكي
زهرة:ماكش باش تقول شي
انا:علاه...فما شي ؟
زهرة:لا..مفما حتى شي...تصبح على خير
ضربت ساقها عالأرض...بغزول...و دخلت للبيت...تبسمت بالوقت...عديت يدي على شعري...و هزيت روحي وقفت لميت الاوراق من الارض...حطيتهم على جنب...كملت بعثت الايميلات لي لازمة...نعرف لباش تبقى سهرانة على هذاكا نحب كي ندخل ليها...نخلي مشاكلي الكل برا...نحب الليلة هاذي تكون متاعنا احنا و كهو...من غير ما نخمم في حتى شي اخر...و لا في اللي باش يصير مبعد...حليت الباب...و دخلت...عطاتني بظهرها الفرخة من وقت حبلت تعملت برشا فازات...منعرفش الصغير هذا شبيه معايا انا بالظبط...قعدت بجنبها...نحي في منقالتي...و نحكي فرد وقت
أنا:نعرف لي مزلت قاعدة
مرجعتليش..تبسمت على جنب...و قربت منها اكثر..نزلت عليها بستها من خدها...نحكي
أنا:باش تبقى متغشة مني هكا ؟
زهرة:نحب نرقد
أنا:ماكش باش ترقد ليلة
زهرة:عمر سيبني...امانك
أنا:متوحشتنيش إنتي ؟
زهرة:لا
انا:باهي...انا توحشتك...و عاللخر زادة...يزيك من اللي عملتو فيا لتوا...مش حرام عليك
تلفتت عندي بالوقت غزرتلي ندرا كيف...عديت صوابعي على خدها...عوجت فمها تحكي
زهرة:مش هذا كلامك بكري
انا:توا بدلت رايي
زهرة:و انا معادش عيني
انا:في شنوة ؟
زهرة:عممر ياخي مصمم تحرقلي اعصابي انت
انا:باهي مدام غدوة عطلة...باش تسهر مع رويجلك ليلة
زهرة:لا...ولدك تعبني...و نحب نرقد
مديت يدي...عديتها على كرشها...تبسمت نحكي
انا:منعرفش علاه عندي احساس...لهوني فما بنية
زهرة:و انا نحب على ولد
انا:ان شاء الله تكون بنية
زهرة: علاه تحبها بنية ؟
انا:منعرفش
زهرة:باهي...انشاء الله
هزت يدها...حطتها على خدي...دوب تبسمتلي...تحكي
زهرة:تعرف حاجة عمر...بنية و لا ولد...متفرقش برشا زوز باش يكون محظوظين بيك انت
انا:و انا محظوظ بيك انتي
جات باش تحكي...غطست في شفايفها...و جبدت روحي شوية نحكي
انا:مستعدة تخلص حق 3 شهور
زهرة:تي برا تلعب على روحك
انا:هههههههههه نلعب ملا لا
زهرة:عمممر
انا:باهي...باهي...ايجا هوني تراه
جبدتها عندي اكثر...حصرتها تحتي...و نزلت عليها اكثر نحكي
انا:توحشتني ملا
زهرة:والله ظاهر انت متوحشني اكثر شي
انا:تو نجاوبك بطريقتي
زهرة:عمر
انا:اشكي
زهرة:الخوخ
انا:توااا ؟
غزرتلها مفجوع...اخر شي نخمم فيه توا اني نخرج و نخليها...ضحكت بالوقت تحكي
زهرة:لا...اما نحبو موجود عالفطور صباح
انا:يا حبي...من وين جيب فيهم شهاوي هذوما
زهرة:مش انا...ولدك يحب عليه
انا:و ميحبش حاجة اخرى
زهرة:هههههههههه لا ميحبش
انا:بربي
زهرة:عمر متخلينيش مرة اخرى أمانك
انا:و انتي معادش تبعد عليا
هزتلي براسها ايه...قصيت عليها افكارها...ببوسة قوية منحبهاش تفكر في اللي صار...يكفي لي عشناه لتوا جراير سوء تفاهم...يكفي لي تعدا علينا...نحب حياتنا ترجع كيما قبل...خاصة الصغرون لي داخلها منحبوش يتأذى جرايري مرة اخرى...غطست في كرشها...لي دوب بدات تظهر...فرد وقت ما نحب نخمم في حتى شي اخر من غيرها توا...و اكثر شي...نحبها تنسى غيرتها الكل خاطر لا سلمى و لا سيرين...و لا حتى طفلة عرفتها من قبل...تنجم تاخو بلاصتها...الليلة هاذي باش تكون فاصل في حياتنا...برغم فما احساس داخلي...خلاني نخاف من اللي جاي...نخاف نخسرها...و معادش فما شي اسمو عمر و زهرة...على هذاكا لقيت روحي مكبش فيها...منحبهاش تبعد عليا لحظة...اصلا حسيت روحي توحشتها...و باش نموت على قربها...يزي لي عملاتو فيا الفرخة...صحة ليا ولدي رجعها لثنية...برغم نحس لهي باش تكون بنية...اما المهم عندي لباش يكون فما شي يربطني بيها لاخر عمري...بعدها أكيد كلشي يرجع كيما الاول و احسن...منحبش نخمم في حاجات خايبة ممكن تعرضنا...يكفي لهي معايا و بين يديا و معادش حاجتي بحتى شي اخر في دنيا.