🔸️حلقة 35
🔸️مريم تحكي:
حليت باب الكرهبة و ركبت...خلط عليا و طار بيها من غير حتى كلمة...المطر ماشية و تقوى...الدنيا داخلة بعضها...حطيت يدي على خاتم أمي...نحاول نهدي روحي كي العادة...الجو هذا يوترني برشا...نقص في الفيتاس...يحكي
حسام:لباس ماهو ؟
أنا:مممم مليحة
حسام:باهي
هزيت يدي غزرت لساعة...عينيا وساعو...غزرتلو نحكي
انا:حسام
حسام:أشكي
أنا:أمانك أزرب شوية
حسام:منجمش نسوق أكثر من هكا
أنا:أمانك...لازمني نوصل قبل ما يخرج بابا من الجامع
حسام:يا بنتي اهدا...كان نزيد في الفيتاس...تتقلب بينا الكرهبة...أصلا ماك ترا ممنوع نسوق في طريق هاذي
أنا:كي ممنوع شبيك جيت منها ؟
حسام:خاطر الثنية لأخرى مسكرة عزيزتي...و توا تنجم تسكت
أنا:على أساس كي نسكت باش تسوق كي العباد
شد الفران بالقاوي...و فك الحزام...تكى لتالي...يحكي
حسام:إيجا سوق إنتي ملا
أنا:حسااام مش وقت تفدليكك توا...لازمني نوصل قبل بابا
حسام:شيهمني فيك أنا ؟
أنا:أسمعني مانيش ناقصة هبالك...قتلك لازمني نوصل قبل بابا
حسام:أمورك
انا:باهي...عيشك
كبست على صاكي...و حليت الباب نزلت...دوب حطيت ساقي تبليت بكلي...خاصة و دنيا ضلمة...خذيت نفس و نطرت الباب ورايا...نمشي بالزربة...محاولتش نتلفتلو مرة أخرى...منعرفش علاه ساعتها حسيت بقهرة...أما ما نجمت نعمل شي...أصلا معادش ينفع الكلام معاه حليت صاكي...و مديت يدي نفركس...عالبخاخة متاعي ياسر وليت على أعصابي الفترة هاذي...أصلا بديت نفد من الوضع هذا...و من كلشي قاعد يدور بيا...أول ما لقيتها خذيت نفس منها...وقفت في بلاصتي...نرد في نفس منعرفش كيفاش باش نكمل...مش مستانسة نجي منها طريق هاذي...حسيت روحي بعدت برشا تلفت شوية...ما لقيت حتى حد...حتى كرهبتو مفماش كبست عليها في يدي نهدي في روحي...جيت باش نمشي...أما أصوات الكلاب حبسني...جمدت في بلاصتي نحاول نثبت في الطريق...لعنت روحي ألف مرة خاطرني جيت معاه...و خاطرني نزلت من الكرهبة...مع الاصوات لي قوات وخرت لتالي بلا ما نحس...الدم جمد في عروقي...و معادش نعرف كيفاش نتصرف...حسيت ببرودة غريبة كي ضربت في شكون...فلت الصاك من يدي...تهزيت و تحطيت في بلاصتي...جبدت روحي شوية...بلعت ريقي منجمتش حتى نتلفت...جيت باش نهرب...أما سبقني كي جبدني من كرشي...كبس عليا كنت باش نقاومو أما في لحظة هديت...ريحتو نعرفها بالقدا حتى كبست يدو نعرفها...تنهدت بالقاوي...حطيت يديا زوز على يدو بعدتها عليا...و تلفت عندو...نحكي
أنا:شنية تستخايل في روحك تعمل اه ؟
باقي واقف يغزرلي...نحس في ساقيا رخفو من الخوف اللي حسيتو...هزيت يديا زوز...نضرب و ندز فيه لتالي و نصيح فرد وقت
أنا:شنية لي تعمل فيه أنت...ياخي نورماال في مخك شبيك مخالط عليا
شدني من يديا...كبس عليا و جبدني عندو بالوقت يحكي
حسام:ششش اهدااا...اهدااا
حطيت راسي على صدرو...نحس في بدني الكل يرقل من الخوف لي حسيتو...نزل بيدو لظهري...يحكي
حسام:لباس ماهو ؟
هزيتلو براسي لا...محسيتش بالمطر لي قاعدة تصب فوقنا...كل تفكيري انو الخوف لي حسيتو وفا و كهو طلعت راسي شوية نحكي
أنا:ك كلو منك...كلو جرايرك
حسام:باهي...إنتي اهدا و كهو
أنا:أبعد عليا...لازمني نمشي
حسام:وين عندك تمشي ؟
أنا:شيهمك فياااا ؟
حسام:أموورك...من شوية كنت باش تموت من الرعبة اما لسانك الله غالب عليه
نزلت هزيت صاكي...و جيت باش نمشي...سمعت نفس الأصوات مرة أخرى...قربت منو وقفت قدامو...هز يدو عداها على وجهو...يمسح في الما و يحكي
حسام:باش نبقاو برشا هوني
أنا:برا على روحك...حد ماهو شادك بالسيف عليك
حسام:زايد معاك الكلام
شدني من يدي جبدني عندو...يكركر فيا وراه و يحكي
حسام:أمشي قدامي
أنا:سييبني...كلو جرايرك
كبس على يدي أكثر...يمشي بالزربة...منعرفش كيفاش وصلنا للكرهبة...حل الباب...ركبني...و خلط عليا...يحكي
حسام:ماكش باش تبطلها العادة هاذي...ياخي متكبرش إنتي...شنية حكايتك بالظبط...وين باش توصل بيهم التصرفات هذوما...كان متعبتش منهم...باز باش تعب العباد معاك...ياخي حتى داركم تتعامل معاهم هكا إنتي مخممتش فيهم...مخممتش في مرضك...في رايك كي تمشي تحت المطر هذا و في الجو هذا باش توصل لباس عليك
نزلت راسي بالوقت...غزرت للخاتم متاع أمي...حسيت بغصة واحلة في حلقي...أما كي العادة منجمش نبكي خذيت نفس نحكي
أنا:ميهمكش فيهم دارنا و مرضي تعودت عليه...معادش يقلقني...طمن
هز يدو ضربها عالفولون بقوة...منعرفش علاه عصب مني لهدرجة...تلفت عندي...قحرلي يحكي
حسام:باهي...باهي أعمل لي تحب عليه...كان تحب برا أمشي على روحك...أستنى لحظة
هز البخاخة لي طاحت من يدي وقت ركبت...حطها في يدي...يحكي
حسام:مش هاذي لي تسلكك ديما...باهي خليها معاك نظن باش تنفعك...في الحالة هاذي...مفماش تموت في الثنية...هيا أنزل فاش تستنى
كبست عليها أكثر...أول مرة ننقم على روحي...خاطرني نستعمل فيها...عندو حق منجمش نعيش بلا بيها...أصلا كان مت شكون عندو يسأل عليا من غير بابا...خذيت نفس نحكي
أنا:نحب نمشي لدار
حسام:باهي...باهي
قالها بغزول...مفهمتش تصرفو...و منحبش نفهم...مديت يدي حليت كبوطي نحيتو...خاطرني تبليت بكلي..تكيت راسي عالبلار من غير حتى كلمة اخرى حسيت بيه كي قرب مني شوية...حط عليا الفاست متاعو...و خدم الكرهبة...خذيت نفس...ريحتو دخلت خشمي...بقيت طول الثنية ساكتة كلامو يتعاود في مخي...منعرفش كيفاش وصلنا...هزيت روحي شوية نحكي
أنا:أقف هوني
ركا الكرهبة على جنب...نحيت الفاست متاعو من فوقي حطيتها في يدو...و هزيت كبوطي نلبس فيه...جيت باش ننزل شدني من يدي...غزرتلو بالوقت...كبس عليا يحكي
حسام:تصالح مع روحك مريم...مفما حتى شي يخليك تتصرف بالطريقة هاذي...إنتي تأذي في روحك و كهو
جبدت يدي منو...حليت الباب...و خذيت نفس نحكي
أنا:حتى حد ما عندو دخل في حياتي...لا أنت و لا أي حد آخر...نعيش كيما نحب أنا و كهو
هزلي براسو إيه...نزلت و خليتو...لقيت بابا في وجهي يغزر لكرهبة حسام...منعرفش علاه حسيتو يثبت فيه كأنو يعرفو من قبل...قرب مني يحكي
بابا:شنوووة هذا ؟
انا:نحكيو في دار بابا
بابا:أمشي قدامي
كبست على صاكي و سبقتو لدار...أول ما دخلت...نحيت كبوطي علقتو...و نحيت البوت متاعي...خلط عليا سكر الباب يحكي
بابا:مرييييم شننننية لي ريتو برا ؟
جيت باش نحكي...قصت علييا مرتو كي هدت علينا كي العادة...تحكي
حياة:أحمد شفما يا راجل ؟
أنا:شمممدخلك إنتي ؟
بابا:مرييييييم...أغزرلي هوني...تحل فمك و تفسرلي لي ريتو أحسنلك...شنية لي كنت تعمل فيه مع واحد كيفو
أنا:شتقصد بكلاامك ؟
بابا:فهمت قصصصدي بالقدا...و تعرف على شكون نحكي زادة
أنا:وصلني و كهو...مفما حتى شي بينا..كان مصدقتنيش برا اسأل وحدك
حياة:حد فيكم يفهمني
بابا:حيااااة الموضوع بيني و بين بنتي...خليك برا الحكاية
أنا:سمعتو...هيا برا اتلهى ببنتك
بابا:مريم أسمعني عيش بنتي...متخلينيش نندم خاطر خليتك تمشي بحذا صحبتك...قولي وين تعرفو سيد هذا
انا:بابا يزي أمانك...يززززي....زهرة عايشة عندهم و انت تعرف الحكاية...كان متلزيتش مكنتش باش نجي معاه
بابا:خليك بعيدة عليه و اخر مرة نراك معاه...و الا والله ما نعديهالك...نعرفو بالقدا و نعرف كيفاه يخمم
أنا:شتقصد بأن تعرفو ؟
بابا:ميهمش كيفاش و وين نعرفو...أسمع كلامي و كهو
انا:باهي
بابا:و آخر مرة تخرج في الجو هذا...يمشيش يزيد عليك الحال...و تمرض اكثر...تو تصرالك كيما اخر مرة الله لا يقدر
انا:لباس عليا...مش كل حد فيكم يذكرني بمرضي...و توا تصبح على خير بابا
خليتو و طلعت نجري لبيتي...سكرت الباب ورايا...نحس في روحي باش نطرشق...حتى كلام بابا مركزتش معاه برشا...حليت يدي نغزرلها...اول مرة ننقم...خاطرني بحاجتها لهدرجة...تذكرت كلامو متاع قبيل...و كلام بابا زادة...يعني الكل يحاول يتصرف معايا بلطف خاطرني مريضة...الكل يظطر يسكت باش ما يصيرلي شي رميتها عالأرض...بكل قوتي...كأني نحب ننسى الحكاية جملة...قربت من القارد روب بالزربة...جبدت دبشي...و مشيت لبيت البانو...عملت دوش طويل...نحاول نفرهد بيه روحي...بدلت و رجعت لبيتي...قعدت عالكوافوز نمشط في شعري...طلعت راسي نغزر للمرايا...و كلامو تالي تتعاود في مخي << تصالح مع روحك مريم...مفما حتى شي يخليك تتصرف بالطريقة هاذي...إنتي تأذي في روحك و كهو >> حطيت المشطة من يدي..و سيبت شعري على كتافي...نغزر لروحي...مديت يدي حطيت من القلوس...و تبسمت بالوقت...عندي برشا على روحي هكا...برشا مغزرتش للمرايا بالطريقة هاذي...نحس في روحي أول مرة نثبت في تفاصيل وجهي زعمة لهدرجة مش متصالحة مع روحي...لهدرجة أنا خايبة...شبيني منجمش نكون كيما زهرة هادية...شبيني ما نتأثر بحتى شي...علاه حتى في الوقت لي لازم نبكي فيه...نبقى ساكتة...كأنو شي ما صار...علاه انا هكا...زعمة كان جات أمي معايا...كان عشت معاها كيما لبنات الكل..كنت باش نعيش الإحساس هذا توا...مقهووورة و برشا زادة نحس في الدنيا الكل ضدي...أما منجمش نبكي كي العادة نفخت بالقاوي...نحب نحي كلامو من مخي نحب ننسى لي قالو و كهو..هزيت يدي بالسيف عديت صوابعي على شفايفي...تعدات الفازات الكل بين عينيا و كل بوسة صارت بينا...غمضت عينيا بالوقت...و نفس الإحساس تغلغل داخلي مرة أخرى...حليت عينيا مروهجة...نغزر لروحي...هزيت براسي لا...إنتي و هو من طبقة مختلفة مريم...و كلشي فينا مختلف...حياتنا و تفكيرنا و حتى المظهر...لا هو يحبني و لا أنا نجم نتحمل عبد كيفو منعرفش شنية لي قاعدة نحس فيه بالظبط...ساعات نحس روحي تعودت على وجودو في حياتي...تعودت على عركنا و الكلام هذاكا...حتى الفازات متاعو معادش نستغرب منها...اما ساعات اخرى نحس روحي نكرهو و برشا زادة...خاصة كي كل مرة يثبتلي انو انا هكا خاطرني مخذيتش دروس في التربية...يذكرني في الدنيا لي كتبتلي نعيش من غير امي...حتى ساعات نكرهو وقت يشفق عليا...و لا يهدا كي يراني تقلقت نكره روحي وقت كل حد فيهم يثبتلي لأنا مريضة..على هذاكا يخلوني نعارك روحي جات عيني على تراص صوابعو لي تغرسو في يدي دوب مسيتهم توجعت...أما مش قد الوجيعة لي نحس فيها الداخل...الوجيعة لي مغروسة في قلبي...تنهدت بحسرة...حسرة و قهرة مغروسين فيا من سنين...و تعودت عليهم...الافكار هذوما...مستحيل نجم نواجه بيهم حد...حتى روحي هزيت الشكال لميت شعري...و هزيت روحي...دخلت لفرشي...غمضت عينيا بالوقت...و عملت لي نعملو ديما هربت من الواقع متاعي لنوم الحاجة الوحيدة لي تخليني نرتاح...من كلشي قاعد يصير فيا...حتى الافكار اللي نحسها تسيطر عليا...نتخلص منها وقت نبدا راقدة و كهو.
أنت تقرأ
زهرة🌸
Aléatoire🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
