🔸️حلقة 66
🔸️زهرة تحكي:
حليت الباب و جيت باش ننزل...خلط عليا بالوقت مدلي يدو...خذيت نفس...و تقويت على روحي...نزلت وحدي...بقى واقف في بلاصتو...غمضت عينيا بالقاوي منحبش نضعف قدامو مرة اخرى...يمكن من اللي صار فيا الكل...تعلمت انو حتى هو ينجم يخليني...وقت نبدا بحاجتو...حتى هو ينجم يعيطيني بظهرو...اول مرة نحس لي عمر ينجم يخليني...و انو الماضي متاعي باش يبقى حاجز بيناتنا...برغم اكثر حد يعرف لي تعديت بيه...كيما يعرف لي مراد باللي عملو فيا الكل
اما عمرو ما حط يدو عليا...هو يعرف هذا الكل...للحظة صدقت لي الدنيا ضحكتلي...و انو اللي عشتو وفى و معادش يرجع...انو عمر يحبني حتى اكثر من روحو...اما بين يوم و ليلة...خلاني نشك في هذا الكل...خلاني نشك في حبو ليا...حتى يمكن عبيت الفراغ لي كان في حياتو و كهو...يمكن بدا يستوعب حجم الغلطة لي عملها يمكن بالرسمي تسرع في قرارو...وقت عرس بيا...توا برك حسيت بهذا الكل...و معادش نجم حتى نغزر لوجهو مرة اخرى...برغم اني باش نموت و نحضنو و نشم ريحتو...اما شي داخلي يخليني نبعد...شي داخلي يقول لأنا في البلاصة الغالطة...بين عباد منعرفهمش...بكري حتى بالكذب كان عندي عيلة...امي كانت موجودة...امي لي انا كنت السبب في موتها...امي لي ملحقتش حتى باش نودعها...و في الاخير ما ربحت شي...مراد مزال في وجهي...و عمر انسحب من هذا الكل...من غير ما يحس...مستحيل مزلت نطلب منو حاجة...و لا حتى نستناه ياقف معايا ضد مراد...بعد توا الحرب باش تكون بيني و بينو اكهو...و ميهمش برشا شنية العواقب مبعد مانيش باش نسامحو عاللي عملو فيا...و لا في امي...و حتى في هند لي ما عندها حتى ذنب في الحكاية حطيت يدي على كرشي...و جبدت روحي منو...نعمل في الخطوة بالسيف...قرب مني...من غير حتى كلمة حط يدو على كتفي...و غزرلي يحكي
عمر:يزي من عنادك توا...عيش حبي...كان مش على خاطرك...على خاطر لي في كرشك
حضنت روحي بالجيلي متاعي أكثر...من غير ما نرد عليه...أول ما دخلنا...خلطو علينا الجماعة من تالي دورت عينيا عالقصر...هاذي اخر بلاصة...نحب نكون فيها توا...غريبة قد ماهو كبير...قد ما نفسي تضيق فيه و حتى بلاصة فيه ما تحب توسعني...غزر لأمو يحكي
عمر:باش نطلعو توا...خبر مليكة تحضرلها شي...قبل ما تاخو الدوا
فاطمة:باهي يا روحي...لي تحب عليه باش يصير
تبسمت على جنب...شنية الكرم لي طاح عليهم من السما...ياخي لهدرجة...الصغير لي في كرشي...اهم مني توا...حتى حماتي من بكري توصي عليه و تعاود...لي لازم يفهموه و باش يفهموه مبعد...انو صغير هذا متاعي انا و كهو...و عمري ما حبلت باش نرضي حد فيهم...لا عمر و لا حتى عيلتو...جبدت روحي شوية منو و طلعت راسي...غزرت لهند نحكي
انا:هند
هند:شنية عزيزتي
انا:ميسالش نبقى معاك في بيتك
غزرتلي مستغربة...و طلعت راسها...غزرت لعمر...هزلها براسو ايه...قربت مني...شدتني من يدي...تنهد بالقاوي يحكي
عمر:هزها لبيتي...غديكا ترتاح اكثر
هند:باهي
مشيت معاها...من غير ما نتلفتلو مرة اخرى...نحب نبعد عليه و كهو...طلعت الدروج وحدة وحدة...مزال فما وجيعة صغيرة مقلقتني...اول ما دخلنا للبيت...عاونتني تسطحت...و حطت الغطا عليا...غزرتلها نحكي
انا:هند...لباس عليا والله
هند:يزي عيش اختي...مانيش نعمل في مزية عليك...و زادة كان انتي خبرت عمر من قبل...ماكنش باش يصير فيك هذا الكل
انا:شنية كان باش يتبدل...باش يخليها...و يجي لعندي يجري ؟
هند:زهرة...الحكاية مش كيما انتي فهمت
أنا:معادش يهم هند...مش أول مرة عمر يعمل فيا هكا ديما أنا الغالطة...و ديما أنا لي منفهمش...ديما لازمني نعدي و نسكت...مش من توا حتى من قبل...ديما كان يعمل نفس الشي...كي يهدا و ياخو قرار يريحو يتذكرني...و ندرا شنية كان باش يكون قرارو المرة هاذي...كان معرفش بالصغير لي في كرشي
قعدت بجنبي...غزرتلي ندرا كيف...و تنهدت بقوة تحكي
هند:نعرف لهو غلط...و برشا زادة...أما زهرة عيش أختي فكر مرة أخرى...متأكدة لعمر يحبك...و هذا واضح لناس الكل...متخسروش بعضكم أماانك
انا:تأكدت انو فما برشا حاجات اهم من الحب...و توا بالنسبة ليا...حتى حد ماهو اهم من ولدي...منحبش نخسر صغيري هند...و مانيش منجمة نسامح عمر عالفجعة لي كليتها...هو خلاني في اصعب ليلة في حياتي...حتى منحبش نفكر في هذا الكل...انا الغالطة المرة هاذي زادة ميسالش...و كان يحب حتى هو ميسامحنيش...معادش يهمني شنية القرار لي باش ياخو...و لا شنية باش يعمل...مانيش باش نجري وراه المرة هاذي زادة
هند:زهرة...اكيد كلشي باش يتحسن مبعد...خاصة و ولدكم في الثنية...خمم بالقدا امانك...ميسالش عصب منو و متسامحوش اذ حبيت...اما رد بالك تسلم فيه باهي
هزيتلها براسي ايه...و تكيت لتالي...تبسمتلي تحكي
هند:هاني باش نخليك ترتاح توا...نرجعلك مبعد
انا:باهي عيش اختي
اول ما خرجت...عديت يدي على كرشي...و تبسمت خفت برشا...اني نخسرو...نخسر الحاجة الوحيدة لي لقيت سبب باش نحارب عليها...و ما نخلي حد يفكها مني...و لا يبعدني عليها...مستحيل كنت نغزر لعمر مرة اخرى...كان انا خسرت ولدي...دورت وجهي شوية...نغزر لصورتو مع مصطفى...هزيتها من التابل دونوي...نغزرلو سنين لتالي كيفاش كان...متبدلش برشا على قبل
عديت صوابعي على صورتو...يا ريت ما جينا لهوني جملة...يا ريت بقى عمر لي حبيتو...عمر لي عمرو ما جرحني...و كنت نجري لعندو اول حد...و ننسى كلشي تعدا عليا...لتوا نحس في روحي موجوعة منو...حاجة داخلي تكسرت و صعيب برشا انها تتصلح...و لا ترجع كيما قبل...عمر كسرها بيدو...كل كلمة قالها تحفرت فيا و خلاتني نشك في روحي...لدرجة ولى حاشم بيا قدام عيلتو...و موليتش نشرفو كيما قبل...تبسمت على قهرتي منو...رجعت تصويرة و قلبتها على وجها...منحبش نرا وجهو...خاصة توا...طلعت راسي على صوت الباب...نغزر لمليكة داخلة...تبسمتلها بالوقت...قربت مني تحكي
مليكة:حمد الله على سلامتك
انا:عيشك مليكة
مليكة:باش تاكول توا...و ماكش باش تعمل كيما ليلة البارح
أنا:أكيد
مليكة:هيا تفضل
حطت صينية في حجري...و ركحت المخدة ورا ظهري ياسر باهية الطفلة هاذي...تبسمت نحكي
انا:مليكة عزيزتي...والله لباس عليا...متعبش روحك عيش اختي
مليكة:والله حاسة بالذنب...حبيت نخليك على راحتك و كهو...متوقعتش لانتي باش تتعب
انا:ما عندك حتى ذنب في اللي صار...حمد الله ولدي مزال عايش
مليكة:الف مبروك عزيزتي
انا:عيشك
مليكة:وقيت باش تخمم في روحك و في ولدك...و كان نجمت ابعد من هوني...ارجع انتي و عمر لتونس عالاقل لين حبالتك تركح
انا:شنية لي صار مليكة ؟
مليكة:انتي شربت حاجة قبل ليلة البارح ؟
انا:منتذكرش...يعني كليت معاهم...صحيح و تيزانة لإنتي حضرتها
مليكة:مش أنا حضرتها
أنا:كيفاش ؟
مليكة:سلمى قالت لانتي وصيت عليها و كي عطيتهالك قدام خالتي فاطمة...منجمتش نقلك متشربهاش منعرفش اذا هي السبب في اللي صارلك...و مكنتش نعرف لانتي حبلة
أنا:متأكدة من اللي تقول فيه ؟
مليكة:بالطبيعة...اما امانك مدام زهرة...ما تخبر حد والله نمشي فيها...و كان تحب تنقذ روحك و صغيرك
برا من هوني...صدقني سلمى ماهيش باش تبقى راكحة
أنا:خليها عليا...انا نوريك فيها...و مفما حتى شي تخاف منو باهي
مليكة:سي عمر قاعد يعارك فيها لوطة...منعرفش شنية السبب...اما اكيد باش تخرج منها الحكاية...كانو ما صار شي
انا:اصلا طول برشا
مليكة:سامحني...لازمني نمشي توا
انا:اكيد
مليكة:كمل صحنك الكل باهي
انا:باهي عزيزتي
أول ما خرجت...كبست عالشوكة في يدي...خذيت نفس نهدي في روحي...أكيد مانيش باش نعديلها الفازة هاذي زادة...عديت عينيا عالصينية...غصبت روحي عالماكلة برغم معنديش نفس...أما كلشي يهون على خاطر صغروني...حطيت الصينية على جنب...و هزيت روحي بالسيف...دخلت لبيت البانو...ركحت أموري...و غسلت وجهي...استندت بيدي عالحيط...نعمل في الخطوة بالسيف...أول ما خرجت لقيتو في وجهي...قرب مني مصدوم يحكي
عمر:فاش تعمل ياخي ؟
نزلت راسي...منحبش نحكي معاه...و لا حتى نغزرلو شدني من يدي...كبست عليه بالوقت...حتى أنا بحاجتو توا...أول ما وصلت لسرير...جبدت يدي منو...و قعدت نزل عندي...قعد مقابلني على ركبة و نص...كبس على يديا زوز يحكي
عمر:زهررة متعملش فيا هكا أمانك عصب...صيح و أوجعني كيما وجعتك...أما متسكتش هكا...متعاقبنيش بالطريقة هاذي...متبعدنيش عليك و على و لدي...عيش حبي...أغزرلي هوني تراه
نزلت راسي بالسيف...جات عيني في عينو...أول مرة نراه تاعب بالطريقة هاذي...أول مرة يلحلح بيا باش نسامحو...كبس على يديا اكثر...يحكي
عمر:صدقني...مستحيل نسامح روحي...عاللي صار فيك و لي ريتو جراريري...اما نوعدك لي كلشي باش يتصلح اعطيني فرصة وحدة كهو
نزل باسني من يدي...و عدا يدو على كرشي...بدني رعش بالوقت...توحشت لمستو هاذي...توحشت صوتو و كلشي فيه...حتى ريحتو...أما شي أقوى مني...خلاني نجبد روحي منو...وخرت شوية لتالي نحكي
أنا:نحب نرقد...تاعبة عاللخر...سكر الباب معاك كي تخرج
تسطحت لتالي...و عطيتو بظهري...لتوا منسيتش الكلام لي قالو ليلتها...الفجعة و الوجيعة لي عشتهم البارح...و هو لاهي في حاجات أخرى...متأكدة...أنو تصرفاتو هذوما الكل على خاطر الصغير لي في كرشي و كهو ضيقت عينيا...كي سمعتو يحل في القارد روب...تلفت عندو...و هزيت روحي تقعدت...نغزرلو مستغربة...كبست على طرف السرير نحكي
أنا:فاش تعمل ياخي ؟
عمر:باش نبدل دبشي
أنا:دبشك ؟
عمر:نسيت لإنتي في بيتي ؟
غمزني و عاود تلفت...جبد شورت و كهو...و دار عندي ينحي في حوايجو...عامل مولا دار مش هوني...خلاني نغزرلو مبهمة...نتبع في حركاتو من غير حتى كلمة..قرب مني...ترما عالسرير بجنبي...غزرتلو نحكي
أنا:قتلك لأنا نحب نرقد ؟
عمر:ارقد شكون شدك
أنا:و أكيد أنت مش بجنبي
عمر:أمورك
أنا:عمر قوم من هوني...يزي من اللعب هذا...شنية تستخايل في روحك تعمل ؟
عمر:حتى شي...نحب نرقد بحذا مرتي...كي العادة و كهو
انا:معادش مرتك من توا...هاني باش نطلقك و نرتاح
عمر:بربي ؟
انا:والله
عمر:متحبش نكلملك المحامي ؟
انا:لا من غير ما تعب روحك...تو نتصرف وحدي
عمر:باهي...كيما تحب
انا:ماكش باش تقوم معناها
عمر:لا
انا:السرير ميوسعناش زوز
عمر:يوسع حبيبتي...طمن
غمضت عينيا بالقاوي...كرزني السخطة و هو يجبد بالمرتاح...قربت منو شوية...جبدت المخدة من جنبو حطيتها بيناتنا...غزرلي يحكي
عمر:فاش تعمل ؟
انا:رد بالك تتعدا الحدود متاعك
عمر:من امتى كان بينا حدود ؟
انا:من توا يا روحي
جبدت الغطا لعندي...و تلفت عطيتو بظهري...الوجيعة نقصت برشا على قبل...عالاقل طمنت على ولدي شوية حسيت بالمخدة لي نحاها...طيشها عالارض...جيت باش نحكي...جبدني عندو بالوقت...كبس عليا يحكي
عمر:باهي متسامحنيش إذا حبيت...عندك حق...أما خليك عندي هكا...كيما كل ليلة...ارقد عندي توا...و كي تفيق الصباح عاركني ميسالش
أنا:نحب نطلق
عمر:و أنا لشكون باش تخليني ؟
أنا:شيهمني فيك...سيبني نحب نرقد
عمر:ارقد ساعة شكون شدك
قحرتلو...قرب مني باش يبوسني...دورت وجهي بالوقت معادش نحب نسلملو مرة أخرى...و ننسى لي تعدا بالساهل...شي داخلي أقوى مني...مخلانيش نسامحو المرة هاذي...و لا حتى نجم نغزرلو كيما قبل...نعرف روحي مزلت نحبو و حتى أكثر من الأول...أما زادة منجمش ننسى لي صار فيا جرايرو...و الكلام لي قالو و ولدي لي شعرة خسرتو...خاطر محاولش يصدقني
مزلت موجوعة منو...و حتى أكثر من قبل...منعرفش شنية مزال باش يصير فينا...اما الغل لي داخلي مزال موفاش...و مستحيل نعدي لسلمى لي عملاتو فيا...و مانيش باش نرجع على ثنية مراد...الا ما نخليه يعترف بكلشي عملو فيا...لحق الوقت باش نوجهو انا المرة هاذي...باش نخليه يعيش...لي عيشني فيه سنين طويلة مستحيل نخليه يتحكم في حياتي مرة اخرى و لا حتى يقرب من عمر و خاصة ولدي...كان هو فكر برك...المرة هاذي باش نقتلو بيديا الزوز...و نرتح الدنيا من شرو غمضت عينيا و مخي يهز فيا و يجيب كبست يدو على كرشي...ريحتو...انفاسو...خلاتني نتأكد اني مستحيل نجم نعيش من غيرو...اما نعرف كيفاش ناخو حقي منو و نخليه يندم على كل كلمة قالها...و وجعني بيها...اما مستحيل نعطي فرصة لسلمى...انها تفك بلاصتي...و غصبا عليها...و على عيلتو الكل...باش يبقى متاعي و يحبني...أنا و كهو.
🌸🌸🌸🌸🌸🌸🌸🌸🌸
🔸️مراد يحكي:
حطيت فنجان القهوة من يدي...و هزيت تليفوني تبسمت على جنب...متوقعتهاش تطلب عالصباح...خاصة و البارح منجمتش نوصللها...هزيت روحي وقفت...قربت من البلار...نغزر للجنينة...تنهدت بالقاوي...و رديت عليها نسمع فيها تحكي
هند:صباح الخير
انا:صباح النور
هند:سامحني...منجمتش نكلمك البارح
انا:عادي ما صار شي
هند:فراات
انا:مممم
هند:حتى شي...نحب نتأكد لأنت ماكش متغشش مني
انا:نحب نشوفك ؟ و توا زادة
هند:صراحة اليوم منجمش
انا:و السبب ؟
هند:باش نبقى في الدار مع زهرة
قلبي دق بالوقت...خذيت نفس...نهدي في روحي كبست على تليفون نحكي
انا:مرت خوك ؟
هند:ايه...صراحة تاعبة شوية
انا:شبيها ؟ لباس ماهو ؟
هند:لباس لباس...جيست تاعبة من الحبالة و كهو
انا:ك..كيفاش ؟
هند:زهرة حبلة...و تاعبة شوية لازمني نبقى معاها...اما أكيد باش نتقابلو غدوة باهي
حسيت الارض وقفت تحتي...نسمع في صوتها بعيد برشااا...و زوز كلمات يتعاودو كأنهم صدى في وذني منعرفش كيفاش طاح تليفون من يدي...قلبي لي يخض بالقاوي...نحس فيه باش ياقف...دمعة نزلت من عيني و لقات طريقها على خدي...تقهرت...و حاجة قوية تكسرت داخلي...البيبي هذاكا من حقي...كان باش يولي متاعي انا...علاه عملت فيا هكا...صحت فرد صيحة...و نضرب في يدي عالبلار فرد وقت
انا:علااااااااه يا زهررة علااااه
خرجت اللي حسيتو الكل في اللي جا على يدي...كسرت كلشي...هبلت في مخي...و حتى حد ما ينجم يفهم اللي قاعد نعيش فيه...منجمش نراها و هي حبلة منو...اسمي لي خرج من شفايفها اخر مرة و انا نكلم فيها...كمل على ما بيا...ساعة ندمت لي كلمتها من أصلو..منحبش نحنلها أكثر من هكا...منحبش نضعف من صوتها حرقتني ليلة عرسها بيه...و حرقتني الدوبل توا...دزيت الطاولة بساقي...و طلعت الدروج...نحل في سوريتي فرد وقت...نحس في روحي تخنقت و معادش نجم نتنفس...منعرفش كيفاش وصلت للبيت هذيكا...مديت يدي كبست عالبواني...حليتها و دخلت...قربت خطوتين نغزرلها...نثبت في تفاصيلها...لي تقريبا نفس تفاصيل بنتها...نفس تفاصيل زهرتي...قربت منها اكثر...عديت صوابعي على خدها...نزلت عليها اكثر...استندت بيديا على حروف السرير...و قربت نحكي
انا:فرحانة توا...هاك ربحتني مرة اخرى يا انتصار
الطفلة لي حبيتها و عشقتها...لي خسرت كلشي على خاطرها...بنتك زهرة...حبلة...حبلة من عمر...بنتك حرقتني مرة اخرى...و انا باش نحرق اللي معاها الكل هي متاعي انا و كهو...و اللي في كرشها باش يكون ولدي انا تسمع فيا
هزيت روحي شوية...شديتها من وجها...كبست عليها نحكي
أنا:إنتي السبب...إنتي السبب في كلشي...انتي لي خليتيني نحبها...و إنتي السبب فأنو هي متنجمش تكون معايا زادة...اما كيما بعدتها عليا باش ترجعها....تسمع فيا باش ترجعلي زهرة...و باش تكون ليا انا و كهو
سرحت في وجها...و رجعت بذاكرتي شهور لتالي
هو:سي مراد...الامور الكل تحت السيطرة
انا:فما حد شلق بالحكاية ؟
هو:حتى حد...الحروق لي في الجثة من الدرجة الثالثة يعني حتى حد ما ينجم يتعرف على وجها...و بالصدفة هي و مدام انتصار يشبهو لبعضهم في كلشي...و الخاتم لي حطيناه في يدها...ما خلى حتى حد يشلق بالحكاية
انا:باهي برشا
هو:شنية المطلوب توا ؟
انا:تعدات شهرين توا...و ظاهر انتصار مطولة في غيبوبتها
هو:كان تبقى في الكلينيك...الحكاية تتكشف في اي لحظة
انا:باش نخرجها من هوني
هو:كيفاش ؟
انا:باش نحضر كلشي تحتاجو في القصر الجديد
هو:تقصد باش تهزها للبلاد ؟
انا:بالظبط...غديكا باش تكون في امان اكثر...و نحب ممرضة تكون قد الواجب...و يبقى فمها مسكر
هو:اكيد سي مراد
انا:الدوسيات متاع انتصار...و تقريرها الطبي...نحبهم الكل عندي...و ما يبقى حتى شي يخصها هوني
هو:مدام انتصار...مقيدة باسم اخر...معناها حتى حد ماهو باش يشلق لهي مزالت عايشة لتوا
انا:باهي برشا...انا باش نمشي توا...و انت حضر لوصيتك عليه الكل...باش نهزها من هوني في اقرب وقت
هو:باهي سي مراد...لي تحب عليه باش يصير
هزيتلو براسي ايه...و خرجت من غديكا...يمكن احسن حاجة...الحظ كان في صفي المرة هاذي زادة...و انتصار قعدت عايشة لتوا...الطريق باش يكون اسرع ببرشا من اللي توقعتو...فقت من سرحتي بالوقت و وخرت لتالي نحكي
انا:باش ترجع يا زهرة...انتي باش ترجعلي...خاطر حياة امك بيدك انتي
خرجت من البيت و صورتها هي كهو بين عينيا...وخرت برشا...الوقت لي خذيتو كان كافي لتوا...مانيش باش نسمح لحد يفكها مني...و الصغير متاعها باش يكون ولدي انا و كهو...خذيت نفس نهدي في روحي...نزلت اللوطة...لقيت البون تلم في الدنيا...قحرتلها نحكي
انا:برا اخرج
هي:باهي
نزلت هزيت تليفوني...تنهدت بالقاوي...و عاودت طلبتها...هزت عليا تحكي
هند:فرات لباس ماهو ؟
انا:لباس...طاحت شارج على هذاكا
هند:فرات صارت حاجة ياخي ؟
انا:حتى شي مهم...اما نحب نراك في اقرب وقت
هند:نتقابلو غدوة في المعهد
انا:لا...اشرف باش يجيبك عندي كي العادة...ما عندي خلق باش نقابل حد اخر
هند:باهي ان شاء الله
انا:رد بالك على روحك
هند:عيشك
علقت عليها...و ترميت عالفوتاي...تكيت راسي لتالي...و نسمع في صوت ضحكتها...صوت بكاها زادة...و كل لحظة صغيرة و كبيرة...عداتها بقربي...و معايا...يمكن بالطريقة هاذي برك...نجم نهدا كي العادة...ذكرياتها هي لي خلاتني...متحكم في روحي لتوا...اما مش بعد توا...مانيش باش نلعب من البعيد...باش نثبت للكل انو زهرة متاعي انا و كهو
🔸️زهرة تحكي:
حليت عينيا بالسيف...نحس في بدني مكبوس...لتوا مكبش فيا السخطة...تلفت عندو نغزرلو...غاطس في النوم...صوت أنفاسو على رقبتي...روهجني...تلفت عندو بالسيف...عديت عينيا على تفاصيل وجهو...حسيت روحي توحشتو عاللخر...غزرت لشفايفو...و سكرتهم بالقاوي...منحبش نضعف...مش توا...مزلت ماخذة بخاطري منو...مزلت منسيتش اللي صار...اما زادة نحس في روحي باش نهبل عليه...دخلت في صراع مع روحي حل عينيه بالوقت...غزرلي ندرا كيف يحكي
عمر:صباح النور
انا:صباح الخير...نجم نقوم توا ؟
عمر:خليك مزال بكري
انا:لازمني نقوم
عمر:قتلك خليك
كبس عليا اكثر...و قرب لشفايفي...خذيت نفس بالسيف نحكي
انا:عممر يززي...أمانك
عمر:شششش
أنا:عممر
عمر:يا روح عمر
انا:مانيش روحك...ابعدني...شبيك كبشت فيا ياخي ؟
عمر:و إنتي شمدخلك فيا شنعمل ؟
أنا:اففف منك...سيبني زح...علاه تقلق فيا أنت ؟
عمر:إنتي تحب تبعد ؟
أنا:ايه
عمر:مستعدة تخليني زادة ؟
هزيتلو براسي ايه...كبس على ظهري أكثر...و غزرلي في عينيا يحكي
عمر:تنجم تعيش من غيري ؟
وحل الكلام في حلقي...و منجمتش نرد عليه...يعرف لانا منجمش نعيش من غيرو...يعرف حبي ليه اكبر من كلشي...لزني ليه اكثر...قرب شفايفو...لشفايفي يحكي
عمر:متنجمش...انتي و اللي هوني متاعي انا و كهو
انا:مانيش متاعك...و مانيش باش نسامحك...سيبني توا
عمر:وين ماشية ؟
أنا:أموري
عمر:ملا ماكش باش تقوم
أنا:شنية لي صار...مستانس كي يطلع الضو...تخرج من البيت...توا ولى فيا العسل...كي عرفت لي ولدك مزال في كرشي ؟
هز روحو شوية...كبس عليا أكثر و جبدني تحتو...غزرلي ندرا كيف يحكي
عمر:أغزرلي هوني...قتلك من قبل و باش نعاودلك...شك في كلشي...اما حبي ليك واضح...نعرف روحي غلطت تسرعت...و قلت كلام...ندمت عليه...اما عمري ما خممت اني نسلم فيك باهي...إنتي أكثر وحدة تعرف طبيعتي و تعرفني كي نعصب...منجمش نتحكم في روحي...اما اكيد كنت باش نبرد...كانك عالصغير لي في كرشك متغششتش خاطر قتلي طيحتو...اما للحظة خفت...لي إنتي متحبش صغار مني...رغم كلشي صار...كنت نخمم فيك إنتي و كهو...تحب تلومني...تعصب...تاخو بحقك أنا معاك...عاقبني كيما تحب...أما مش بيك إنتي...و لا بالصغير لي في كرشك...رد بالك زهرة...رد بالك تخمم برك...جرد فكرة...أنك تبعد عليا...وقتها صدقني...باش ترا عمر آخر
بقيت نغزرلو...أول مرة يهددني بالطريقة هاذي...اول مرة نحسو بالرسمي خايف...إني نبعد و نخليه...خذيت نفس بالسيف نحكي
أنا:متهددنيش عمر...انت قلتها مرة...أنا في تالي بنت انتصار...و نجم نعمل اي شي...في اي لحظة...مش هذا كلامك
عمر:كان إنتي مجيتش بنت انتصار...مكنتش باش تملكني يا زهرة
انا:تكذب...أنت عمرك ما كنت ملكي
نزل عليا اكثر...عدا خشمو على رقبتي...يحكي
عمر:تو يجيك وقت و تفهم...إني حبيتك من أول مرة ريتك فيها تغسل في وجهك...من اول مرة سمعت فيها صوتك...و اول مرة شميت فيها ريحتك...لقيت روحي نعشق فيك...و مانيش باش نسلم...مهما صار
نزل بيديه زوز...حطهم على جنابي...طلعلي مريولي غزرلي ندرا كيف...يحكي
عمر:و مانيش باش نسلم في ولدي زادة
قبل ما نحل فمي...حسيت بشفايفو على كرشي...بدني رعش بالوقت...كأنو متعمد يخيليني نضعف...نزلت بيدي كبست على شعرو...طلع راسو بالوقت...و قرب لشفايفي وقفتو نحكي
انا:نحب نتقيا
عمر:شننوة ؟
انا:ك...كان متسيبنيش توا..تو نرد كلشي كليتو هوني
دزيتو بيدا زوز لتالي...و هزيت روحي نجري...لبيت البانو...استندت بيديا زوز عالرخامة...بدني الكل يرعش من قربو...نعرف كان بقيت معاه...باش نضعف مرة اخرى...على هذاكا مستحيل نسلملو قبل ما نعذبو خواطري دارت...اول ما خلط عليا...رديت كلشي...كبس عليا يحكي
عمر:ز...زهرة شبيك...هاك قبيل كنت لباس ؟
غسلت وجهي...و تلفت عندو...شديت المنشفة من يدو نحكي
انا:لباس متخافش...حاجة عادية في الوحم
عمر:الوحم ؟
انا:عممر...شبيك تغزرلي هكا...متخافش شي ما هو باش يصير للبيبي
حسيت بدوخة قوية...خطفني من يدي بالوقت...حضني يحكي
عمر:نعمبوه البيبي...اذا كان باش يعمل فيك هكا
غمضت عينيا بالوقت...ريحتو هداتني بصفة غريبة حسيت روحي تفرهدت برشا...رجعني لبلاصتي...و عدا يدو على شعري يحكي
عمر:خليك هوني...تو نوصي مليكة تحضرلك فطورك...باش تشرب دواك باهي
انا:قلها تعملي عصير ليمون زادة
عمر:تدلل يا روحي
باسني من راسي و خرج...تنهدت بالقاوي...معادش نعرف شنية لازم نعمل بالظبط...كان نبقى في القصر هذا...اكيد باش نجن...اكثر بلاصة حسيت روحي مش مرغوبة فيها...اول مرة صدقت لأمو باش تعاملني كيفو و لا عالاقل تكون كيما امي فتحية...اما ديما الواقع يعكس كلشي...تكيت راسي لتالي...نفكر في لي عملاتو سلمى...اكيد مانيش باش نعديها المرة هاذي...و لي باش يصير خليه يصير...رجع عندي و الصينية في يدو...و حوايجي في يدو لاخرى...قرب مني يحكي
عمر:هيا عزيزتي...افطر و بدل دبشك
انا:باش نعدي النهار هوني زادة ؟
عمر:منجمش نرجعك لتونس و انتي في الحالة هاذي
انا:و قرايتي ؟
عمر:متخافش...تو ندبرها من عندي
انا:باهي برشا
عمر:هيا توا
انا:تو ناكول وحدي
عمر:هاني باش نعمل دوش و نرجعلك
هزيتلو براسي إيه...أول ما دخل...كليت شوية و بدلت دبشي...هزيت راسي...نغزرلو مروهجة...ضيق عينيه يحكي
عمر:شبيك مكملتش فطورك
أنا:منجمتش
عمر:باهي أرجع لبلاصتك توا
أنا:باش نمشي بحذا هند
عمر:تو جيك هي
أنا:اليامات لي تعداو...كنت تعاملني على أساس مانيش موجودة...كمل في اللي كنت تعمل فيه...مانيش صغيرة عمر...معادش تقولي شنعمل و لا وين نمشي...منحبش نكون في بلاصة وحدة معاك...و ميهمنيش الموقف لي باش تاخو مني...و مستحيل نتعبك معايا بعد توا...لا بحكاية مراد الفارغة...و لا حتى بالبيبي...أنا وثقت فيك لدرجة مكنتش حتى نخمم خاطرك واقف ورايا...أما توا معادش نجم ناثق فيك مرة أخرى...و ما نجم نصدق حتى كلمة منك...انا مقارنة باللي موجودين هوني حتى شي...عبيت الفراغ لي منجمتش سيرين تعبيه في حياتك...كنت نعرف لأنت موليتش تحبني كيما قبل...أما توا تأكدت...و القرار لي باش تاخو...أنا معاك فيه مهما كان
بقى يغزرلي من غير حتى كلمة...خذيت نفس و خرجت من البيت...منحبش نوحل معاه أكثر...أما نحبو حتى هو يحس لي حسيتو...و هو يسمع فيا في الكلام...تبسمت كي ريت هند جاية عندي...صبحت عليا...و شدتني من يدي تحكي
هند:شبيك قمت من فرشك ؟
أنا:حبيت نبدل جو و كهو
هند:حكيت مع عمر ؟
انا:حكيت معاه
هند: و شنية قررت ؟
أنا:حتى شي...باش نكبسو شوية...و نرجعو لثنية كهو
هند:والله عالمعدل هذا باش تقتلو جملة
انا:لطف عليه
هند:هيا امشي برك...مش على أساس يستهل
انا:يستهل ملا
تبسمت و كبست على يدي...نزلت معاها لوطة...لقيتهم الكل عالطاولة...حتى سي عثمان...قربت مني حماتي تحكي
فاطمة:علاه نزلت عزيزتي...هاك مزلت تاعبة
انا:لباس عليا عيشك
بقيت نغزرلها...والله أحوال...قبل البارح...كانت تقول لازمني نكون عالفطور في الوقت...غزرلي عثمان يحكي
عثمان:حمد الله على سلامتك
انا:عيشك
دورت راسي شوية..نغزرلها خارجة من الكوجينة..هزتني و حطتني و قربت مني تحكي
سلمى:حمد الله على سلامتك...هاك فجعت اللي في القصر الكل عليك...أما هاك منعت...و باش جيبلهم حفيد زادة
تبسمت على جنب و هي تحكي...هزيت يدي ضربتها كف بكل قوتي...منعرفش كيفاش...و لا من وين جاتني الجرأة...خليت الكل مصدوم...حطت يدها على خدها...و هزت راسها شوية...جات عيني في عينها...وقف بوه من بلاصتو بالوقت...يحكي
عثمان:شنيية لي قاعد يصيير هووني ؟
عمر:زهررة
تلفت عندو بالوقت...واقف في آخر درجة...قرب عندي وقف قدامي...يحكي
عمر:زهرة شفما ؟
أنا:اسألها هي عاد ؟
هند:سلمى شنية لي صار ؟
سلمى:شيعرفني...زايد متحشمش على روحها
أنا:باهي شرايك تخبرهم إنتي بالحقيقة و لا أنا...وقتها ترا شكون لي لازم عليه يحشم
عمر:شفما ؟
أنا:بنت خالتك لي تغزرلها توا...هي كانت السبب في اللي صار الكل
هند:سلممى ؟
أنا:قلهم أنو تيزانة لي عطيتهالي...كانت سبيسيال...باش نزل الصغير...وقتها حتى خالتك كانت معانا
فاطمة:سلمى صحيح لي تحكي فيه ؟
أنا:تكلم عاااد...شبيك سكت ؟
سلمى:مش صحيح...متحاولش تمسح فيا الغلطة متاعك...مش أنا سبب في أنك خبيت حبالتك على عيلة كاملة
هند:سلللمى يزززي...كلنا نعرفو شكون الغالط في الحكاية
أنا:للأسف فما شكون مزال يصدقها
طلعت راسي قحرتلو...و خرجت من القصر جملة ميهمنيش شنية لي باش يصير ورايا...المهم حطيتها تحت أمر الواقع...و كشفت أول ورقة من اللعبة متاعها منعرفش على روحي...كيفاش وصلت لساقية...حتى كلام طبيب حطيتو على جنب...لي يهمني نبقى وحدي و كهو...بعيدة عليهم الكل...قعدت عالكرسي...و تكيت لتالي...النسمة الباردة فرهدتني شوية...ياسر هادية البلاصة...أما صوت خطوات من تالي...و اليد لي تحطت على كتافي...خلات قلبي يدق بالقاوي و وجيعة صغيرة حسيت بيها في كرشي...منعرفش علاه...يمكن خاطر اول مرة نجي لهوني وحدي...خاصة و البلاصة فارغة غمضت عينيا بالقاوي...و حطيت يديا زوز على كرشي نهدي في روحي...منعرفش علاه جيت هوني...و شنية باش يكون مصيري بعد توا
زهرة🌸
#سمر_القايد💌
أنت تقرأ
زهرة🌸
De Todo🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
