زهرة🌸

الحلقة مئة و الثانية عشر

🔸️حلقة 112
🔸️محمد_يحكي:
اول ما نزلت مريم...تكيت لتالي...و نفخت بقوة...حتى الدقايق لي طمعت إني نشوفها فيهم...مخرجتش...مع إني نعرف لي اليوم عطلة و متقراش...اما زادة عاملة فيا الفرخة...من آخر مرة و هي هازة خشمها عليا....اصلا هاذي اول مرة تاخو بخاطرها لهدرجة...نعرف لي عندها حق...و يمكن تسرعت في كلامي نهارتها...اما لتوا معرفتش نصلح لي عملتو...لتوا منجمتش نقعد معاها كي العباد و نفهمها كلشي من الاول...اسبوعين او اكثر...خلاتني حاير في امري...حتى من فتحية حست عليا...عديت يدي على شعري...و حطيت تليفون من يدي...نعرف لي ماهيش باش تهز عليا...آخر حاجة جات في بالي اني نكلم عم أحمد اما زادة...منجمش نتصرف قبل ما نرضيها...و قبل ما ناخو إذن حسام...من غير شي لتوا علاقتو موترة معاه لتوا...ساعة اخرى تعدات و انا في نفس البقعة...حتى خدمتي سلمت فيها...حتى اليمات لي فاتو ممشاتش للفاك...من شيرة خايف على نفسيتها...و من شيرة خايفة علاقتي معاها تتوتر في الوقت لي بدات تاخو في ثنية جديدة...عديت يدي على شعري و خدمت الكرهبة...يمكن احسن حاجة اني نمشي توا...احسن ما يخرج بوها و يلقاني كي العساس في وجهو...اول ما خدمت الكرهبة...تحل باب دارهم...عينيا وساعو و انا نغزرلها...متوقعتش لي باش تخرجلي في آخر لحظة...جمدت في بقعتي و معرفتش شنية نعمل بالظبط...قحرتلي و حطت الكابيش على راسها...عرفتها لي مخرجتش على خاطري...بقيت نتبع فيها بعينيا...كي عرفتها باش تبعد...هزيت تليفوني و نزلت من الكرهبة....سكرت الباب...و خلطت عليها...منعرفش كيفاش وصلت بحذاها...قربت منها نحكي
أنا:رنيييييم
كملت تمشي من غير ما تتلفتلي...خذيت نفس و كملت نمشي وراها...و نحكي فرد وقت
انا:رنيييم...نحكي معاك راني
حبست في بلاصتها...و هزت راسها قحرتلي...تحكي
رنيم:هاني نسمع فيك
انا:ميزيتش من هبالك يااخي ؟
رنيم:حبستني على هاذي انت ؟
انا:حبستك على برشا حاجات...ديجا قبل هذا الكل...شنية الحالة لي انتي فيها ؟
رنيم:شنووة ؟
انا:استغفر الله...ياااخي هكا...خارجة من داركم باش تجلطني ؟
رنيم:شعملتلك ؟
انا:ياخي نورمال خارجة تتكعبر بالبيجامة هاذي ؟
رنيم:اول شي ماشية للعطار لي بجنبنا...ثاني شي...شمدخلك انت ؟
انا:رنيييييييم...متكملش على ¤¤¤¤ و سكررررر ¤¤¤¤¤¤ كبوطك...أحسن ما نفقد اعصابي
رنيم:امووري...اصلا علاش واقفة معاك منعرفش
انا:الصبر يا ربي...رنيييم متهبلنيش...سكرو و لا ارجع لدااار توا...متخلينيش نهبل عليك في نص الشارع
رنيم:منحبش...و مانيش باش نرجع
جيت باش نحكي...نوقز تليفوني بالوقت...كبست عليه و نفخت بقوة...كي لقيتهم من الخدمة...علقت عليهم...و هزيت راسي باش نحكي معاها...قحرتلي تحكي
رنيم:تعرف حاااجة...أوامرك هذوما قولهم لصحبتك...هي أحق بيهم عليا
غمضت عينيا بالقاوي...و خذيت نفس باش نحكي قصت عليا كي خلاتني واقف و مشات...كبست عالبونية متاعي و خلطت عليها...جبدتها من يدها...دورتها عندي نحكي
انا:يزززي كهو...متخرجنيش من عقلي في هالنهار الاحرف
رنيم:سيبني...منحبش نحكي معاك...اصلااا مزلت على اعصابي لتوا
انا:مش حكينا آخر مرة...مش قتلك اعطيني فرصة نفهمك لي صار ؟
رنيم:شنية تفهمني محمد ؟ باش تعاودلي نفس الحكاية مرة أخرى...منحبش نسمعك...و منحبكش تحكيلي عليها مرة أخرى...مدام مزالت تطلب فيك...معناها مزال فما علاقة بينكم...برا عندها و اخطاني أنا
انا:يااخي تحب تهبلني إنتي...كان مزلت معاها...كنت باش نجيب ثنيتك ؟ و نجري وراك ؟
رنيم:ماكش مجبور تجري ورايا بعد توااا
غزرتلي ندرا كيف...جبدت يدها مني...و كملت تمشي نعرف و متأكد من الصراع لي قاعد يدور داخلها...نعرف كلامي وجعها...و مكانش لازم نقولو من اصلو...اما هذيكا حياتي قبل...و ما نجم نخبي منها شي...نعرف لي الماضي ينجم يخرجلي في اي لحظة...و انا معاها حاجات اكبر مني منجمش نتخلص منها فيسع...و منحبهاش تتاثر و لا تتوجع جرايري...خذيت نفس و خلطت عليها...نمشي وراها...منعرفش شنية لازم نعمل أما مستحيل نمشي من هوني قبل ما نحل الحكاية هاذي...دخلت وراها للعطار...وقفت وراها...نغزرلها و هي تطلب في القضية من عندو...تلفتت عندي تحكي
رنيم:أبعد من قدامي
انا:نعرف روحي غلطت في حقك...أما وعدتني باش تعطيني فرصة أخرى
رنيم:محمد أبعد خليني نكمل نقضي
أنا:ماهيش صحبتي...و معادش عندي علاقة بيها و لا بغيرها
رنيم:أعطيني باكو سكر لي وراك
تلفت شوية...و جبدتو من فوق...فكاتو من يدي...و عطاتني بظهرها...أصلا و لا مرة في حياتي توقعت لي فرخة قدها تجريني هكا...تلفت على صوت طفلة اخرى دخلت...تبسمتلي بالوقت..دوب تبسمتلها و تلفت..نغزرلها و هي تطلب في باقي القضية...جيت باش نحكي...قص عليا صوت الطفلة...كي قربتلي تحكي
هي:ميسالش تعطيني هذاكا على يدك
تلفتت عندنا بالوقت...مديت يدي جبدت لي حاجتها بيه...من غير ما نشوف شنية...أصلا مخي مش فوقي جملة...غزرتلها نحكي
انا:هذا ؟
هي:ممممم
قربت مني رنيم في لحظة...فكاتو من يدي...و حطاتو في يدها...تحكي
رنيم:لياال...شد هذا و ارزن
ليال:و إنتي شنية لي حارقك ؟ ساعة من إمتى تدخل في شؤون غيرك إنتي ؟
رنيم:على خاطر لي قاعدة تحكي معاه تابعني...على هذاكا اتلم احسنلك
ليال:هاو ولى عندك علاقات
رنيم:الصبر يا ربي...عم صالح قداش جات القضية
قحرتلي و تلفتت عندو...تخلص في القضية...بقيت واقف في بلاصتي...مستغرب فيها...هاذي اول مرة نحضر عليها و هي متغشة لهدرجة...عرفت روحي وحلت...و مانيش باش نجم نقنعها...كبست عالقضيات في يدها...و تلفتت عندي...تحكي
رنيم:ابعد من ثنيتي انت زاادة
انا:شنية عملتلك زاادة ؟
ضربتني بيدها و تعدات...خذيت نفس و خلطت عليها...قطعت عليها الثنية نحكي
انا:رنيييم...ياخي باش نبقى نجري في جرتك هكا
رنيم:قتلك لي منحبش نحكي معاك...هاك دخلت دقيقة للعطار...لحمت شكون
انا:ريتني حكيت معاها ؟ اصلا شيعرفني عليها شكون
رنيم:اه صاااار...تحب تعرف عليها شكون الطفلة هذيكا...متحبش نعطيك اسمها و عنوانها ؟
انا:اسمها ليال
رنيم:محمممممد
انا:باهي...باهي...منعرفهاش و ميهمنيش اني نعرفها
رنيم:واااضح برشا...هاك في دقيقة شديت اسمها
انا:ميزيتش تواا ؟
رنيم:هياااا برا ارجع بحذاها و كمل عاونها...ميجيش تخليها وحدها...على خاطر حضرتك gentleman
انا:رنييم يززي ياا روحي...حرام عليك لي قاعد تعمل فيه...هاك فرجت فيا حومة كاملة
رنيم:انا لتوا منسيتش كلامك نهارتها...و متستنانيش نسامحك عليه
انا:وفينا معناها ؟
رنيم:احنا مبديناش اصلا
انا:باهي...كان هذا باش يريحك...هاني باش ننسحب من حياتك
رنيم:ربي معاك
غزرتلي ندرا كيف...غصتها وصلتني في كلامها تالي نعرف لي قاعدة تكابر و كهو...اصلا ديما نحسها على نياتها...و ديما تتصرف بعفوية...اكا لي يخليني نتنازل على برشا حاجات و انا معاهاi...و الاهم اني نحاول ناخوها على قد عقلها...على خاطرني متأكد من حبها ليا...نعرف لي حتى هي تحبني الفرخة...اما المرة هاذي شفعتني على قاعدة...جبدت روحي لتالي...خليتها تتعدا...و تنهدت بقوة...اكيد باش نحاول نلقى حل آخر غير هذا...و في اقرب وقت زادة...على خاطر كان نكمل معاها في عنادها...منعرفش وين باش ترصيلنا نهار آخر...هزيت حاجبي مستغرب...و تلفت على صوت وقعة...عينيا وساعو و انا نغزرلها...منعرفش كيفاش دعثرت و طاحت...قربت منها بالزربة...القضية جات كلها عالارض...نزلت عليها شوية...شديتها من يدها...نحكي
انا:رنيييم...لباااس ماهو ؟
هزت راسها...و غزرتلي ندرا كيف...من ملامحها لي تبدلت عرفتها باش تبكي...كبست على يدها اكثر نحكي
انا:باهي قوم معايا...هيااا
هزيتها شوية وقفتها...و نزلت هزيت القضية في يدي...و تلفت باش نحكي معاها...اما سكت كي ريتها تبكي...من دمعة و لات دموع...لين ولات تشهق...جمدت في بقعتي و معرفتش شنية نعمل معاها...معرفتش لهي باش تفحم من جرد طيحة...خذيت نفس و قربتلها شوية...نحكي
انا:رنيم يززي كهو...متستهلش هذا الكل
حلت يدها بالوقت...جات عيني عالجرح...طلعت تستهل الطيحة...فوق هذا الكل نعرفها قداش حساسة...حطيت يدي على خدها...و عديت صباعي تحت عينها بالظبط نحكي
انا:باهي...ايجا معايا توا...هيا متخافش
نزلت يدي شوية...شديتها نمشي فيها معايا...تمد في الخطوة بالسيف...صوت بكاها ماشي و يقوا...فضحتنا في الحومة الفرخة...لي يشوفنا يقحرلي...على اساس عامللها حاجة...منعرفش كيفاه وصلت للكرهبة...غزرتلي تحكي
مريم:ه..هاني باش ندخل لدار انا
انا:سي احمد هوني
هزتلي براسها لا...كبست على يدها اكثر...و حليت الباب...نحكي
انا:اركب ملا
رنيم:م..منحبش
انا:رنييم متهبلنيش...اركب و تو نعطي خبر لمريم لانتي معايا
هزتلي براسها ايه...و ركبت...حطيت القضية متاعها من تالي...و خلطت عليها ركبت بجنبها...هزيت بابيي في يدي...و كبست على يدها...حلتها شوية موجوعة مسحتلها طراف الجرح...و هزيت راسي نغزرلها...مغمضة عينيها و كابسة على شفايفها...منعرفش كيفاش نجمت نكبس روحي و نفاوم المنظر هذا...خصلات شعرها لي لصقو مع دموعها...اغراوني اكثر...مديت يدي مروهج عديت صوابعي على خدها...نحكي
انا:وفاات...هاني باش نشوف فرماسي قريب...تحمل شوية
رنيم:ت..تو نداوي روحي وحدي
انا:مدامك طلعت معايا...ماكش باش تنزل عزيزتي
رنيم:ش..شقصدك ؟
خدمت الكرهبة...قبل ما نعطيها فرصة تخمم في حاجة اخرى...قحرتلي و نزلو دموعها اكثر...يمكن الطيحة جات في صالحي...و باش تخدمني...على خاطرني متأكد لي ماهيش باش تركب معايا و لا باش تسمعني بعد توا...شديت ثنية...و غزرتلها...نحكي
انا:ياخي الجرح هذا...يستهل الدموع هذوما الكل
رنيم:ش..شمدخلك انت...نبكي كيما نحب...و ديجا شكون قلك لانا نحب نجي معاك...ووين باش تهزني ياخي ؟
انا:هدي روحك ساعة
رنيم:م..منحبش
دورت الكرهبة...و شديت ثنية لاقرب فرماسي...من غير ما نزيد معاها كلمة اخرى...ركيت على جنب...و غزرتلها نحكي
انا:خليك هوني تو نرجع
مسحت دموعها بكف يدها...و هزتلي براسها ايه...فازة ضحكتني...اما تلزيت نسكت...على خاطر نعرفها باش تفحم اكثر...خذيت نفس و نزلت...شريت معقم و pansement و رجعت بحذاها...قحرتلي و دورت وجها...تبسمت نحكي
انا:يززي من تفوريخك و اغزرلي
رنيم:رجعني لدارنا توا
انا:نرجعك كي نحب انا
رنيم:شتحب مني توا ؟
كبست على يدها و جبدتها عندي...تهزت و تحطت على المعقم لي تحط في الجرح...قحرتلي تحكي
رنيم:ع..علاااش هكا
انا:اسكت شوية
رنيم:تحرق
انا:تحمل شوية...ماكش صغيرة
رنيم:شكون قلك دااويني
انا:رنيييييم....يززززي كهووو...معادش نسمع حسك
صوت شهقاتها تبص مع صياحي...حاولت تجبد يدها...كبست عليها و قحرتلها...غزرتلي ندرا كيف تحكي
رنيم:م..متصيحش عليا
انا:اركح
رنيم:يززي كهو...قاعدة تحرق فيا
قحرتلها...و حطيت ال pansement فوق الجرح مسحت دموعها و غزرتلي تحكي
رنيم:س..ساقي زادة مجروحة
انا:وين ؟
هزت سروال بيجامتها شوية...جات عيني عالجرح في ركبتها...هزيت حاجبي مستغرب...نعرف لقاعدة تسيب في دلول متاعها...على خاطر الجرح صغير...اما ظطريت ناخوها على قد عقلها...خذيت نفس نحكي
انا:باهي...قرب هوني تراه
تلفتت عندي شوية...قربتلي ساقها...و دورت وجها متحبش تغزرلي...منعرفش علاش فازاتها خلاوني نخمم في برشا حاجات...تنهدت بالقاوي...و عديت القطن فوق الجرح...غمضت عينيها بالوقت...معرفتش اذا نركز مع الجرح و لا مع تفاصيل وجها...اول ما كملت حطيتهم من يدي...و غزرتلها...تعدلت في قعدتها...تحكي
رنيم:تنجم توصلني توا
انا:ماكش باش تشكرني عالاقل ؟
رنيم:لااا...انا طحت بسببك انت
انا:علاش انا دزيتك ؟
رنيم:منحبش نحكي معاك محمد...رجعني لدار توا
تنهدت بالقاوي...و مديت يدي...كبست على يديها زوز...و دورتها عندي نحكي
انا:يزززي كهو...و اغزرلي هوني
رنيم:م..منحبش
انا:ياخي بالرسمي...تحب علاقتنا توفا ؟
غزرتلي ندرا كيف...دموعها تحصرو مرة اخرى...نعرف روحي وجعتها...و بكيتها...نعرف لي صعيب برشا تصدقني بعد توا...اما مستحيل نجم نسلم فيها...لي نحسو معاها...حاجة اقوى مني...حبيتها و حبيت تفاصيلها الصغيرة زادة...حبيت طفولتها و عفويتها نعرف روحي منستهلهاش...اما نجم نكون عبد آخر على خاطرها...مدامني نجمت نتبدل على خاطرها...معناها نجم نعمل اكثر...نجم نحرق الماضي متاعي و معادش نفكر فيه مرة اخرى...خذيت نفس نحكي
انا:جاوبني رنيم
رنيم:ا..انت...انت
انا:شنية ؟
رنيم:ا..انت قتلي باش ننسحب من حياتك
انا:انتي طلبت
رنيم:ب..باش ترجعلها ؟
انا:شكون ؟
رنيم:نفسها الطفلة لي كانت صحبتك
انا:تحبني نرجعلها انتي ؟
هزتلي براسها لا...تمنع في دموعها...و تحكي معايا فرد وقت
رنيم:ح..حبيتها انت ؟
انا:مش حكينا فيه الموضوع هذا قبل ؟
رنيم:ق..قداش عندكم و نتوما مع بعضكم
انا:منعرفش
رنيم:جاوبني محمد
انا:نعرفها ليا سنين...منذكرش قداش
رنيم:م..معناها لي صار بيناتكم...قاعد يتعاود السنين هذوما الكل ؟
بقيت ساكت من غير حتى كلمة...منجمتش نجاوب على سؤالها و منجمتش نرفض زادة...صحيح الطفلة نعرفها ليا سنين...و كل مرة كنت نمشيلو البار تصير بيناتنا فازات و ساعات توصل لعلاقة كاملة...اما الوقت هذاكا الكل...و لا مرة جا لبالي باش نتحط في موقف هكا...و لا باش نظطر نفسر عمايلي...لاي حد و هاني لقيت روحي نواجه في حب حياتي...مع اني نعرف...لي كلامي باش يوجعها...كيما نعرف يمكن اني نخسرها جملة...اما معنديش حل آخر...نحبها تفهم و تستوعب انو اللي صار ماهوش باش يتعاود...و مدامني وصلت حبيتها مستحيل يجي نهار و نخونها فيه...و لا حتى باش نتلفت للماضي متاعي مرة اخرى...كبست على يديها اكثر...و غزرت لعينيها نحكي
انا:رنيم...انا لتوا ما كذبت عليك في حتى شي...قتلك لي الماضي متاعي اسود...يمكن الخايب لي عملتو...اكثر من الباهي...بعد موت ريم...وليت عبد آخر...كلشي كان يهمني وقتها...اني ننسى و كهو...وليت مدمن...على الشراب و النسا فرد وقت...مانيش باش نكذب عليك و نبرأ روحي...و معرفتش وحدة و لا زوز بعد ريم...هاذي حياتي قبل ما نعرفك...و قبل ما ناخو قرار اني ندخل لحياتك...سكرت ابواب الماضي الكل...فقت على وضعي و عالكذبة لي صدقتها و عشت فيها سنين...مانيش نبررلك و لا حتى نبرأ في روحي...اما مزلت نحب منك فرصة اخرى...و نوعدك باش تكون اخر مرة تتعرض لموقف هكا
عديت عينيا على وجها مرة اخرى...نحب ناخو ردة الفعل متاعها من غزرتها...من ملامحها...دقايق تعدات و هي تغزرلي من غير حتى كلمة...و ترد في نفس لي وحل مع غصتها...جبدت يديها مني...و رجعت شعرها لتالي تحكي
رنيم:ا..انت حبيتها...ن..نقصد بعد اللي صار...محسيتش روحك تحبها
انا:رنيييم...يااخي فاش كنت نحكي من بكري
رنيم:جااوبني...متتهربش
انا:محبيتهاش...ارتحت تواا ؟
رنيم:لا
انا:شنية زادة ؟
رنيم:ش..شبيها مزالت تكلم فيك لتوا ؟
انا:تليفون الصباح من الخدمة
رنيم:باهي
انا:شنية تحب تسأل آخر
رنيم:م..مزالت تكلم فيك هي ؟
انا:رنيم...ياخي باش نبقاو نحكو عليها احنا ؟
رنيم:بااااش نحكو يااا محممد...مدامكم كنتو تقريبا كيما زوز معرسين
انا:باهي عزيزتي...هاني نسمع فيك
غزرتلي ندرا كيف...و نزلت على شفايفها شوية...غمضت عينيا بالوقت...و عاودت حليتهم نحكي
انا:رنيييم...كان مزال فما كلام...احكيه من غير الفازات هذوما
رنيم:شيهمك في فازاتي انت ؟
انا:الصبر يا ربي
رنيم:شبيك ؟
انا:ما بيااا شيي...ما بيا شي يا رنيم
رنيم:زيد كش عليا...اصلا انت ديما تعمل هكا
انا:ياخي ما تجي ترضى الا بعد ما تخرجني من ¤¤¤¤¤ عقلي انتي
رنيم:محمد
انا:مممم اشكي
رنيم:عندي سؤال أخير
انا:نسمع فيك
رجعت خصلات شعرها لتالي...و كبست على يديها زوز...غزرتلي ندرا كيف...و نزلت عينيها...تحكي
رنيم:ماكش باش تتغشش ؟
انا:باهي احكي
رنيم:ا..انت طلبت مني فرصة اخرى...و انا باش نعطيك...اما...انت باش تنجم...ت..تحبني كيما الطفلة لي حبيتها قبل...ن..نقصد ريم
بقيت نغزرلها من غير حتى كلمة...خذيت نفس...و مديت يدي شوية...كبست على يدها...لي رعشت...و غزرت لعينيها نحكي
انا:حكايتي مع ريم وفات قبل ما تبدا...حبيت حاجة مكانتش متاعي من اصلو...هي و اعز صاحب كان عندي...رماوني في كذبة و انا صدقتها...يمكن عشت بتانيب ضمير أكثر من اني عشت مع حبها...و يمكن الحقيقة لي عرفتها مأخر...خلاتني نتخلص من كل احساس يجمعني بيها...تأنيب ضمير و لا حب...صدقني ريم معادش عندها بلاصة في حياتي
رنيم:ب..باهي و انا شنية بالنسبة ليك ؟
انا:مش كأنو حكيت برشا انا...لتوا مزال مفهمتش انتي
رنيم:ا..اما انت و لا مرة قتلي..ن..ن
انا:شنية ؟
رنيم:ن..نقصد انت و لا مرة قتلي نحبك
تبسمت بالوقت...متوقعتش نسمعها منها...معناها لي صار الكل...حيرتها الكلمة هاذي كهو...باقي تغزرلي...حسيت بخوفها من ردة فعلي...من رعشة يدها...نزلت عليها شوية...بستها فوق الجرح...و عاودت غزرتلها نحكي
انا:تعرف حاجة...تصرفاتك هاذي...هي لي خلاتني نحبك يا فرخة
رنيم:مانيش فرخة...انا جيست نحب نعرف و كهو
انا:معناها هذا لي خلاك تجبد عليا تقريب شهر
رنيم:انا جيست خايفة و كهو
انا:نعرف لانتي خايفة...اما قبل كلشي نحبك تاثق فيا...و تاثق لانا مستحيل نخونك و لا نخليك في نهار من نهارات
غزرتلي ندرا كيف...و هزتلي براسها ايه...كبست على يدها اكثر و جبدتها عندي...حضنتها بقوة الوحش لي حسيتو اليمات هذوما الكل...حتى معادش تهمني ردة فعلها...قد ما يهمني اني نحس لي هي معايا...و بين يديا...غرست راسي في شعرها...و استنشقت ريحتها مرة اخرى...و بالطريقة لي نحب عليها...منعرفش علاش كل مرة نعنقها...نحس اني بحاجتها اكثر من قبل...بديها لي تمدو لي اجنابي...خلاوني نكبس عليها اكثر...اهم شي عندي انو امورنا تتحس بعد توا...و اول ما يرجع حسام...باش نحل معاه و مع امي الحكاية...و الاهم اني نحلها مع سي احمد...على خاطر نعرف لي ماهوش باش يعطيهالي بالسااهل...خاصة بعد لي صار مع مريم...و الاهم انو هي لتوا صغيرة...حتى تصرفاتها تقول انو كلشي قاعد يصير معاها معندهاش خبرة فيه...حتى بعد اللي حكيتو متاكد لهي مزال باش تخدم مخها برشا...خذيت نفس و جبدت روحي منها شوية...بستها من جبينها...و عديت عينيا على وجها...غزرتها دخلتني بعضي...نزلت بصوابعي شوية من خدها لشفايفها...فرد وقت نقاوم في روحي...باش منغلطش معاها...و باش مندخلهاش بعضها اكثر من هكا...قربتلها شوية...نحكي في وذنها
انا:معادش تخدم مخك معايا صغرون...مدامني وصلت و حبيتك...مانيش باش نسلم فيك جملة
نزلت عليها شوية...بستها من خدها و جبدت روحي لتالي...باقي تغزرلي من غير حتى كلمة...تبسمت نحكي
انا:شبيك ؟
رنيم:ش..شي
انا:باهي قولي ساعة
رنيم:شنوة ؟
انا:القضية لي شريتها شنية حكايتها ؟
رنيم:م..منعرفش...اسأل مريم
انا:هاني وصلتها بيدي...شتعمل بيها قضية
رنيم:شيعرفني انا...اول ما دخلت قالت لامي لهي تحب تتعلم طيب و لا ندرا شنية...بلكشي خوك لي طلب منها تتعلم
انا:حسام ماهوش باش يطلب منها...كان تحطلو سم ياكلو هذاكا...نعرفو راني
رنيم:على خاطر يحبها
قحرتلي و دورت وجها...تبسمت بالوقت...و مديت يدي غرستها في شعرها...نحكي
انا:يزي بلا تفوريخ...حتى انا نحب صغرونتي
رنيم:وصلني توا...اكيد باش تقتلني عالقضية لي طولت عليها
انا:متخافش عزيزتي...مدامك معايا...حد ماهو باش يمسك
رنيم:انت جربت غش مريم من قبل ؟
انا:لا حبي...يكفيني غشك لتوا
رنيم:اصلا لتوا متغشة منك انا
انا:شبيك ماكش تمشي تقرا ؟
رنيم:احنا في فاكونس على هذاكا
انا:معناها استغليت الفاكونس يا فرخة
رنيم:انا كنت خايفة من اني نواجهك...كنت خايفة من الحقيقة و كهو
انا:معادش تخاف مني رنيم...صدقني مستحيل يجي نهار نخمم اني نضرك فيه...انتي اثق فيا...و انا نوعدك معادش باش نخذلك مرة اخرى...و لا حتى نخلي الماضي متاعي يحضر بيناتنا
رنيم:عندي ثقة فيك محمد
تبسمت بالوقت...متوقعتش باش تقول الكلام هذا في الاخير...نزلت بيدي من شعرها لكتفها جبدتها في حضني...و بستها من راسها...نحكي
انا:خليك عندي شوية
رنيم:و مريم ؟
انا:خليها تتعلم حاجة اخرى لين ترجع انتي...و هاني خليتلها ميساج باش متتحيرش عليك
رنيم:اما عالاقل نرجع قبل بابا
انا:باهي يا روحي...هاني باش نرجعك...اما باش تخليني نشوفك مرة اخرى...و باش ترد على تليفونك و اهم شي معادش تخرج و انتي في الحالة هاذي
رنيم:شبيها حالتي
انا:اسمع الكلام...من غير ما دخلني في سينة اخرى
رنيم:باهي...اصلا مفماش مجال لنقاش معاك
انا:بربي ؟
رنيم:باش نعاودو نتعاركو احنا ؟
انا:باهي...هاني باش نوصلك...اما مزال عندنا كلام آخر
رنيم:باهي
تنهدت بالقاوي و خدمت الكرهبة...من غير ما نبعدها عليا...اصلا لتوا مش مصدق اني نجمت نحكي معاها و نرضيها...و لي امورنا تحلت و ولات واضحة...نعرف لي باش تعرضنا برشا حاجات...و اولهم قرار سي احمد...اما مدامني متاكد من مشاعرها ليا...مستحيل نخليها و لا نسلم فيها...مهما كانت العائق لي باش ياقف في طريقنا...انا لتوا ضيعت برشا حاجات في حياتي...و معنديش استعداد نخسرها و لا نكمل حياتي من غيرها...و مانيش باش نظلمها...و لا نخليها تتضرر جرايري مهما صار...اللي حسيتو معاها و اللي خلاتني نعيشو...منعرفوش من قبل...اما كان كافي باش يعوضني على كل وجيعة...و كل كل قهرة تعديت بيها في حياتي لتوا...و كان جيت نعرف لانا باش نلقى الحب الحقيقي في آخر الثنية...مكنتش ظلمت روحي...و عشت في ظلام المدة هاذي الكل...و على خاطر النور لي لقيتو...مانيش باش نسلم فيه لآخر نهار في عمري