زهرة🌸

الحلقة الثانية

حلقة 2
🔸️عمر يحكي:
شديت الفران بالقاوي و نزلت...نمشي و نفركس عليها بعينيا...تبسمت كيف ريتها تغزر لساعة و فادة عاللخر...حتى انا بطيت عليها و خليتها تستنى برشااا...قربت منها شوية...اول ما لمحتني...نطرت من الطاولة جات واقفة...قربت مني بالزربة...تغزرلي ندرا كيف...عوجت فمها تحكي
سيرين:عمر وينك لتوا...ياخي مش على اساس جي بكري..شبيك طولت عليا
بقيت نغزرلها...تبسمت على جنب...نشيخ عليها كي تبدا متغشة مني بالطريقة هاذي...خاصة شفافها لي تقلبهم بالطريقة هاذي...هزيت يدي...قرصتها منهم...نحكي
انا:و راس حبي خدمة...ماك تعرف منجمش نخرج حتى نجاوب عالاسئلة متاعهم الكل
سيرين:مممم باهي...اما مزلت مغشة راو
انا:نعرف...على هذاكا باقي نهار على حسابك
سيرين:معناها باش تعدي باقي نهار معايا
انا:مممم
سيرين:عمر تحكي بجدك و لا تفدلك
انا:كان متحبش...اخطانا منها...حتى انا تاعب
سيرين:تييي شبيك فيسع تقلقت
انا:سيرين يزي عزيزتي
سيرين:باهي حبي...اول شي باش تعمل معايا قهوة...مبعد باش نمشو نشوفو المابل مع بعض
انا:فكنا منها الحكاية توا...مش وقتو جملة
سيرين:امااان...امااانك عيش حبي...مش قتلي باش نبدلو ديكور دار
انا:مزال الحال عالكلام هذا...اصلا العرس مزال عليه برشا عزيزتي
سيرين؛نحب نختارو اليوم انا
انا:باهي لالة كيما تحب
سيرين:عييييش حبي محلاك...نموت عليك راني
انا:هيا برك
قربت معاها قعدت مقابلها...نغزرلها...تكيت لتالي...ندقق في تفاصيل وجها...تبسمت على جنب كيف ذكرت اول مرة قابلتها قبل 3 سنين في الاجونس...منعرفش شنية شدني ليها بالظبط...لون عينيها...لي يتسكرو كي تضحك...و لا لون شعراتها...عديت عينيا عليها...يمكن تصرفاتها و ربثتها كيف نغزرلها خلاتني نتعلق بيها...منعرفش كيفاه و امتى دخلت لحياتي...اما ستانست بيها و بهبالها...مع انو مش جوي...نتعلق باي طفلة...حتى كي كنت برا...مهتميتش بالحكايات هذوما...منعرفش كيفاه توا باش نربط حياتي بيها...اما كل مرة نرا ضحكتها...نطمن اكثر...و نعرف لي لحق الوقت باش نعمل عيلة جديدة...عالاقل نعوض السنين لي تحرمت فيهم من عيلتي...قصت عليا سرحتي تحكي
سيرين:حبي
انا:مممم
طلعت راسي شوية...لقيتها تغزرلي بلهفة...و دور في عينيها على وجها...رجعت شعرها لتالي تحكي
سيرين:نمشيو نشوفو المابل
انا:ممم قوم هيا
نطرت من بلاصتها وقفت قبلي...هزت صاكها...تحكي
سيرين:باهي...هيا هيا
ضحكت على هبالها...ديما مستعجلة...هزيت روحي وقفت...حطيت الفلوس عالطاولة...قربت مني..شدتني من يدي تحكي
سيرين:عمرر
انا:شنوة زادة
سيرين:ياخي بالرسمي احنا باش نعرسو
انا:علاه سؤال هذا توا
سيرين:تو بالرسمي انا باش نولي مرتك
انا:علاه متحبش
سيرين:تي مش هكا قصدي...يعني اونفان حلمتنا باش تولي حقيقة
انا:تنجم تقول بعد ست شهور...و احنا من توا باش نختارو المابل
سيرين:عممممر يزي امانك...كان متحبش تو نمشي وحدي...ميسالش ماو
انا:سيرييين...شنية هاذي تمشي وحدك
سيرين:باهي باهي متصيحش
انا:هيا اركب
سيرين:باهي
حلت الباب و ركبت بغزول...تنهدت بالقاوي...و خلطت عليها...باقي نسوق عالساكت لين وصلنا...تلفت نغزرلها مزالت متغشة...هزيت يدي...بعدتلها خصلات شعرها نحكي
انا:سريين عزيزتي...سامحني...تعرف نهار الكل على اعصابي...مش قصدي نغشش حبي
سيرين:مممم باهي
قربت منها شوية...بستها من خدها...و جبدت روحي نحكي
انا:فكها عااد...و لا معادش تحب ترا المابل
سيرين:لا لا نحب هيا
حلت الباب و نزلت نجري...خالطت عليها بالزربة نحكي
انا:استنى يا مجنونة
رجعت عندي بالزربة...شدتني من يدي...بقيت ندور معاها...ختارت كلشي على ذوقها هي...اصلا دوب خذات رايي...باقي نتبع فيها لين كملت...خذيت رونديفو من عندهم باش يوصلوهم...منحبش ناخوهم من توا...خاطر مزال الحال عليهم...محبيتش نكسر بخاطرها...خاصة كيف حسيت روحي هملتها شوية الفترة هاذي...بقيت طول الثنية نسمع فيها كيفاه تحب ديكور متاع دار...اول ما وصلت...تلفتتلي تحكي
سيرين:عمر يا روحي
انا:تفضل لالة
سيرين:ايجا تعمل عندنا قهوة...باش يفرحو بيك برشا
انا:اعفيني ليلة عيش حبي...تاعب و نحب نرتاح
سيرين:باهي عزيزي على راحتك
تبسمتلها...و قربت بستها من خدها..لزت ليا اكثر حضنتني...تحكي
سيرين:تمشيش تنساني..نحب نراك ديما
انا:باهي يا روحي...طمني عليك...و كان عملت اي شي اعلمني من قبل مفهوم
سيرين:مفهوم سي عمر
جبدت روحي منها...بستها من راسها...تبسمتلي و نزلت...بقيت نشيع فيها لين دخلت لدار...خذيت نفس و خدمت الكرهبة...و دريكسيون لدار...منعرفش كيفاه وصلت...رميت مفاتحي و التليفون عالطاولة...نحيت الفاست طيشتها على جنب...و ترميت عالفوتاي...تكيت راسي لتالي...و غمضت عينيا بالوقت...نحس في راسي باش يطرشق...رجعت بذاكرة سنين لتالي...نذكر في بابا لواقف مقابلني و يصيح
بابا:اسسمعنييي انت باش تشد الارض هوني..كيفك كيف خوك...وولاد عمك...بلاصتك هوني فهمت
انا:مستحيييل...انت اكثر حد تعرف قداش تعبت باش كملت قرايتي...و شنوة تعدا عليا...مستحيل نبقى هوني بابا
بابا:باااااش تبقى يا عمممر...انت الكبير هوني...و مجبور تسمع كلامي
انا:مش المرة هااااذي...كان يمشي في بالك انك تجبرني كيفهم مستحيل...تحبني نضيع كلشي...تحبني ندفن كلشي نحلم بيه...نشد الارض و نعرس بوحدة من هوني...هذا لي تحب عليه...هاذي الحياة اللي قاعد تحكي عليها انت
بابا:مااااكش احسن منهم يا عمر...مش بزوز حروف لي قريتهم...تنفخ صدرك علينا...كلامي قلتو و باش يتنفذ...من غدوة تبدا خدمتك في الارض
انا:لاااا بابااا سااامحني...اما مانيش باش نتخلى على كلشي حبيت نوصلو...و مش باش نتراجع بعد ما وصلت لهوني جملة
بابا:معناها ؟
انا:باش نسافر...باش نبعد من هوني...و نبني حياتي من اول و جديد
بابا:وريني كيفاه باش تبدا...شعندك انت اه...ذكر يا عمر انت من غيري حتى شي
انا:هذا في رايك انت...للاسف مانيش باش نخليك تجبرني اكثر من هكا...انا نحب نتحرر منكم
بابا:كان مشيت من هوني يا ولدي الغالي...رد بالك تحط ساقك في ارضي مرة اخرى...و تنسى انو عندك عيلة خليتها وراك...لا تكلمنا و لا ترجع لهوني...و كل حد هوني يكسر كلمتي...ينجم يمشي معاه من توا
دورت عينيا عليهم بالواحد...و تركزت في عينين امي.. لي تترجا فيا نرجع لتالي...دموعها و رغم السنين لي تعدات منسيتهمش...مستنيتش الجواب من حد...تلفت عطيتهم بظهري...وقفت كيف حضنتني من تالي تحكي
امي:عمممر اقعد في خاطري...في خاطر امك...عيش ولدي...راني امك يا روحي...اسمع كلام بوك...و ابقى معانا
تلفت عندها حضنتها بيديا زوز...طول عمري نحس انو امي دعمتني اكثر شي باش نوصل لهوني...كانت ديما تقولي عمر انت ماكش كيفهم...انت باش تقرا و تخرج من البقعة هاذي...كبست عليها بيدي...و خذيت نفس نحكي
انا:متمنعنيش يا امي...انا منجمش نعيش هوني اكثر...مش هذا كلامك...انا ملزمش نبقى هوني
امي:منجمش يا عمر...منجمش نعيش من غيرك
بابا:معادش تعجبو عيشتنا...بعد ما كبرتو و حليتلو عينيه...كره العيشة هاذي...و نكر الارض لولد و كبر فيها
انا:سامحني امي...امااانك سامحني...و ادعيلي معاك ديما...ادعيلي باش نكمل لي بديتو
بستها من راسها و جبدت روحي منها...غزرتلهم بالواحد...اول ما وصلت للباب وقفني يحكي
بابا:من اليوم ولدي عمر ماااات
امي:لااااا امااانك...راهو ولدك
بابا:كان تحب تمشي معاه...انت محرمة عليا ليوم دين يا فاطمة
تبسمت على جنب...اصلا مستغربتهاش منو...كبست على يدي و خرجت...خرجت من غير ما نرجع نتلفت ورايا...ونغزر لحد فيهم...كانت اول مرة نعفس على كلام بابا و منسمعوش...اخترت الطريق لي لازم نكون فيها...لي حبيت انا نعيشها...صحيح موصلتش وين لازم نكون...اما لي عملتو لتوا...و في السنين هذوما...عمري ما ندمت عليه...ساعات كي نحب نطمن عليهم...نكلم هند اختي...اصلا هي كهو لي نحسها اقرب وحدة ليا...خليتها وقت عمرها 11 سنة...تبسمت على جنب...كان مش تصاور لي تبعثهملي من مدة لمدة...منعرفش عليها كيفاه ولات...و لي حارقني اكثر شي...انو سنين تعدات و مسمعتش صوت امي...امي لكنت كي نبدا مخنوق و فادد تحط يدها عاى شعري...و تخفف عليا...امي وقت كنت ندخل روطار لدار تغطي عليا باش بابا ميشلقش و نوحل معاه...في هذا الكل غايضتني عيلتي لي فارقتها سنين...و منعرفش اذا باش يجي نهار و نرجعلهم...فقت من سرحتي على صوت تليفوني...رميت يدي هزيت من غير ما نغزر شكون...نسمع فيه يحكي
حسام:وينك يا راجل...مش تفاهمنا على سهرية
انا:فكني ليلة عيش خويا...تاعب و نحب نرتاح
حسام:عمر لباس ماهو ؟
انا:لباس لباس...جيست تاعب
حسام:باهي...نراك صباح عالفطور...رد بالك مجيش
انا:باهي باهي
علقت عليه و رميت تليفون عالطاولة...تبسمت على جنب...متأكد لماهوش باش يسهر من غيري...حسام عشرة سنين...من ايام الجامعة...كلشي تعديناه مع بعض باش وصلنا لهوني...تكيت راسي لتالي...اول ما غمضت عينيا تعدات صورتها بين عينيا...غزرتها...كلامها لي كانت تخرج فيه بالجهد...ربثتها و هي واقفة قدامي...بعد سنين قريت فيهم هوني و في فرنسا...اول مرة نركز مع طفلة لهدرجة...ديما روطار...ديما سارحة و لا تحكي مع صحبتها...ديما نحاول نتلفها...و نتعدا الفازات لي تعملهم...منعرفش علاه اليوم بالظبط...هنتلتها و حكيت معاها اكاكا...يمكن خاطر تحاول تستفزني بتصرفتها كاني مش موجود...خاصة اني منحبش نسمع صوت وقت نبدا نحكي و منعرفش زادة شبيني نخمم فيها توا...و لا علاه ضربت في راسي...ناقصني كان هي...هزيت روحي شوية...نفخت بالقاوي...عديت يديا زوز على شعري...و قمت لبيت البانو...عملت دوش...فرهدت روحي بيه وخرجت للبيت...بدلت دبشي...و ترميت عالسرير...باقي نظرتها بين عينيا...منعرفش علاه حسيتها خايفة من حاجة...نعرف محكيتش معاها لاكا درجة...باش تخاف مني و من كلامي...يمكن الحكاية اكبر ببرشا...خاصة كيف ولى مرة ريتها مهتمة...هزيت راسي شوية...نحب نحيها من مخي...منعرفش شبيني لتهيت بالحكاية اكثر من لازم...خذيت نفس نحكي مع روحي < يزززي عمر يزززي شبيك لتهيت بالطفلة...اصلا تستهل لي حكيتو معاها > غمضت عينيا بالقاوي...منحب نفكر في حتى شي اخر احسن شي نغم على راسي و نرقد
🔸️مراد يحكي:
هزيت روحي شوية تقعدت...نغزرلها كيفاه حاطة راسها على صدري...و مكبشة فيا بيديها...باقي نثبت فيها...رغم السنين لي تعدات...اما باقي نفسها انتصار...منعرفش علاه كل مرة نغزرلها نحس بالذنب اكثر...مش هذا لي حبيت عليه...مش انتصار...لي عملت المستحيل على خاطرها...نفسها لي وقفت في وجه عيلتي...باش ناخوها...رغم ظروفها...رغم انو عندها طفلة و اكبر مني بعامين...لي ولى مرة تقلقت من فارق العمر لي بينا بالعكس...حبيت المرا لي كانت تخدم عندي...و خسرت كلشي على خاطرها...اما بعد السنين لي تعدات...وليت نسال في روحي...على خاطرها انا قاعد نخسر و لا على خاطر زهرة...زهرة لمنعرفش امتى و كيفاه حبيتها...زهرة لي كي نغزرلها برك...مبادئي الكل طيح قدامها...زهرة لاول ما طلعت لليسي حسيت اني باش نخسرها...و انا نرا في صحابعا لي دايرين بيها...عمري ما توقعت اني باش نوصل نغير عليها...زهرة لطول عمري حاولت نتعامل معاها كيف اختي مش اكثر...اما لقيت روحي نعشق فيها...نفخت بالقاوي..جبدت روحي شوية منها...خرجت من البيت...نغزر لبيتها..منعرفش على روحي كيفاه وصلت لباب...حطيت يدي عليه...و سكرت عينيا بالقاوي...ورجعت حليتهم...تبسمت باستهزاء...مسكرة الباب خاطرها خايفة مني...خايفة لا نضرها...كاني نجم نعملها انا...نحملها فيها...تي دموعها برك...يخلوني نكره روحي اكثر...تقويت على روحي و نزلت اللوطة...دخلت لصالة...جات عيني عالفاست متاعها لي محطوطة فوق الفوتاي...رميت يدي هزيتها...كبست عليها و قربتها لخشمي...نشم في ريحتها...لي كل مرة تخدرني...تنهدت بالقاوي نحكي مع روحي...<< امتى باش تفهمني يا زهرة...امتى تحس بيا...تعبت و تعبتك معايا >> طيشت الفاست على جنب و ترميت عالفوتاي...تكيت راسي لتالي...غمضت عينيا نذكر في نهار لمشيت باش نهزها...نستنى فيها باش تخرج...كانت اول مرة نتصدم من اللي حسيتو و انا نرا فيها خارجة و تضحك مع طفل...و عاملة جو.. ساعتها...كل قطعة في بدني تكبست...النفس تسكر عليا...منعرفش كيفاه لقيت روحي واقف في وجها...غزرتلي مستغربة تحكي
زهرة:مراااد
انا:امشي قدامي
زهرة:علاه شفمااا...اصلا ماشية مع لبنات توا...مش خبرتكم الصباح
محبيتش نحكي معاها اكثر...شديتها من يدها و كركرتها للكرهبة...حليت الباب و دزيتها الداخل...اول مرة منعقلش على تصرفاتي...و لا علاه قاعد نعمل هكا...نسوق و مطفيها...نسمع فيها تحكي
زهرة:فاااش تعمل ياخي...والله نحب نمشي معاهم...وييين مهزني انت
شديت الفران بالقاوي...و تلفتلها...ندور في عينيا على وجها...اول مرة نراها مرعوبة مني لهدرجة...ضربت يدي عالفولون نحكي
انا:شكووووونو لي كنت معاه
زهرة:ع علاه
انا:سألتك جاوبني احسنلك
زهرة:يقرا معايا
انا؛يقرا معاه...¤¤¤¤¤¤ و تقولي يقرا معاك
زهرة:تيييي فاش تحكي انت...و علاه تحاسب فيا..ياخي عملت حاجة غالطة و مافيباليش
بقيت نغزرلها...مغلطتش ايه مغلطتش...هذا لي منجمتش نقتنع بيه انا...منعرفش كيفاه هزيت يدي شديتها من شعرها...كبست عليها نحكي
انا:والله ياااا زهرة...ورحمة بابا.. كان مزلت نلقاك تحكي مع طفل...الا ما نوريك شنعمل فيك
زهرة:مرااااد سييبني...هبلت ياخي...فاش تعمل
مراد:فههههمت و لالا
تغزرلي مبهمة مش فاهمة لقاعد يصير...انا بيدي منعرفش شبيني...اول مرة نهز يدي عليها...رخفتها شوية شوية على شعرها...و خدمت الكرهبة من غير حتى كلمة اخرى...دوب نجمت نركز مع ثنية و انا نستوعب في اللي عملتو...مصدوم...تي الكلمة هاذي ما جي شي قدام اللي قاعد نحس فيه...نسوق و مخي يعاود في كلمة وحدة كهو...غرت عليها...قلبي لي دقاتو ماشية و تقوا مع صوت شهقاتها...خلاتني نتاكد انو زهرة...مش بنت انتصار كهو...ماهيش اختي و ماناش صحاب...هي اكبر من هكا ببرشا...لي قاعد ننكر فيه سنين...لقيت روحي نواجه فيه...لي هربت منو وليت نجري وراه...فكرة انو هي باش تكون لحد اخر...انو فما شكون ياخوها مني و يبعدها عليا...انو يوصل حد يمسها غيري...تخليني نهبل...و نخرج من عقلي...حب...عشق...جنون...منعرفش شنوة...لي يهمني انو زهرة مستحيل تكون لحد اخر...كان نعرف اني نقتلها و نقتل روحي بعدها...اما مانيش باش نسلم فيها...مانيش باش نسلم في الطفلة لي ربيتها على يدي...و لي كبرت قدام عيني...ميهمنيش لي يقولوه ناس...ميهمنيش الحرام و الحلال...مستعد نحرق لي فوقي و لي تحتي على خاطرها...منعرفش وين باش توفة حكايتنا...اما لمتأكد منو انو زهرة مستحيل تكون لحد غيري...طلعت راسي على صوت خطواتها...بقيت نغزرلها ماشية و تقرب...تغزرلي باستغراب...قعدت قدامي من غير حتى كلمة...حطت راسها على صدري...و كبست بيدها على مريولي...تحكي
انتصار:مراااد عزيزي شبيك مش قد بعضك اليمات هذوما
كبست على يدي...و هزيت روحي شوية...نحكي
انا:شي...تاعب من الخدمة
تقعدت و هزت يدها...حطتها على خدي...كبست عليا...دورت راسي شوية نغزرلها...عقدت حواجبها تحكي
انتصار:متأكد مفماش حاجة اخرى
هزيت يدي...بعدت يدها من وجهي...نفخت بالقاوي...و هزيت روحي وقفت نحكي
انا:انتصاااار قتلك تاااعب...فك عليا ليلة هاذي
وقفت في جرتي...و قربت مني...حطت يديها زوز على يديا...كبست عليا...و غزرتلي في عينيا تحكي
انتصار:مراااد يا روحي كان فما حاجة احكيلي...عيش حبي
بقيت نغزرلها...نحس في راسي باش يطرشق...خاصة و انا نغزر لعينيها...نعرف لقاعد نظلم فيها حتى هي...اما معادش نتحكم في روحي...مهما حاولت منجمش نبعدها عليا...زهرة راسخة فيا...في كل قطعة من بدني وروحي...كيفاه و امتى حبيتها منعرفش...كل لي نعرفو...انو حياتي معدومة من غيرها...جبدت يدي منها...حطيتها على خدها نحكي
انا:برا ترقد عزيزتي
انتصار:لاااا مانيش باش نرقد...حتى تفهمني لي قاعد يصير...مراااد انت معادش تحبني
بقيت ساكت...منعرفش كيفاه نجاوبها...و لا شنية نقولها...كبست على يدي اكثر...تحكي
انتصار:بسبب صغير لي خسرتو مش هكا...تعرف لمش ذنبي راو...كان تحب نجيبو صغير اخر
هزيتلها براسي لا...اخر شي نخمم فيه...اني نجيب صغير من انتصار...و نوحل اكثر من هكا...قربت منها شوية...حضنتها...حطيت يدي على ظهرها نحكي
انا:انتصار نحي الافكار هذوما من مخك توا
انتصار:شتقصد
انا:منحبش على صغار توا
انتصار:علااه
انا:خاطر عندي مشاكل في الخدمة...و برشا حاجات اخرى...معادش تكبش في الحكاية...و زيد مش مشكلتي صغار...كان عيني راني قتلك
انتصار:اما
انا:يزززي انتصار عيشك
هزتلي براسها ايه...و كبشت فيا اكثر...خذيت نفس طويل...و غزرت للباب...جات عيني في عينها...هازة دبوزة ما في يدها...واقفة تغزرلنا...لابسة بيجامة مغطية تفاصيل بدنها الكل...شعرها لاماتو كي العادة...بقيت نركز فيها...حسيت بوخزة في قلبي...من نظراتها...غزرتها لي كلها نقمة...تحب توصلي بيها برشااا حاجات...تحب تقولهم...اما من خوفها ساكتة...خايفة مني انا...شي لي قاهرني اكثر...زهرة لي كانت كل مرة تتعرض لمشكلة...جيني اول واحد...تمنيت ساعتها كان نجم نحضنها...من غير خوف...و تهديد...من غير ما حد يقولي لي تعمل فيه حرام و ميجيش...من غير ما تكون الحواجز هاذي الكل بينا...غمضت عينيا بالقاوي...ورجعت حليتهم...تبسمت بوجيعة كي معادش ريتها...وجيعة حسيتها و استطعمتها بمرارة في حلقي...فقت من سرحتي...كان وقت جبدت روحها مني تحكي
انتصار:مراد ايجا نطلعو لبيتنا
انا:اطلع انت انتصار...انا عندي خدمة
انتصار:توااا في نص الليل
انا:مممم...باش نعاود الحسابات
انتصار:نجم نعاونك
انا:لااا برا ارتاح انت
انتصار:اما
انا:هيااا عزيزتي
هزتلي براسها ايه...و قربت مني اكثر...طلعت شوية...باستني من شفافي...تحكي
انتصار:مطولش برشا...تعرفني منجمش نرقد من غيرك
هزيتلها براسي ايه...تبسمتلي...وتلفتت عطاتني بظهرها...بقيت نغزرلها لين بعدت...تنهدت بالقاوي...حتى انتصار ظلمتها معايا برشا...ساعات نحسها بريئة على لي قاعد يصير...حاولت قد ما نجم ننفي لي قاعد نخمم فيه اما منجمتش...شي اقوى مني...و اقوى من اني نتخلى عليه...عديت يدي على وجهي بغزول...و ترميت عالفوتاي...تكيت راسي لتالي...و غمضت عينيا...كلشي قاعد نرا فيه وجها...تفاصيلها الصغيرة...لي محفورة في ذهني...كلما نسكر عينيا...تعبت من الحكاية هاذي...و تعبتهم معايا اكثر...افكار تهز فيا و جيب...نحاول نلقى مخرج للحكاية...و نرتاح جملة...منعرفش كيفاه هزني نوم و غفيت...غفيت و في راسي كان زهرة...و شنوة اللي باش يصير مبعد