زهرة🌸

الحلقة الثالثة و الثمانون

🔸️حلقة 83
🔸️زهرة_تحكي:
مديت يدي نزلت البلار...و تكيت عالشباك...نغزر لثنية منعرفش وين ماشيين بالظبط...كل لي يهمني اني نرا امي مرة اخرى و كهو...منعرفش كيفاه عديت ليلة البارح...لتوا نحس اللي صار الكل حلمة...منحبش حتى نذكر لهو قاعد بجمبي...نزلت راسي نغزر لخاتمي لتوا مغزلة منو السخطة...منعرفش كيفاه خلاها تعنقو بالطريقة هاذي...اما اكيد مانيش باش نعديلو الفازة...الا ما نخليه يندم عليها...و نوريه شمعنى يحل يديه و يحضنها...هذيكا بلاصتي انا و كهو...لا سلمى و لا حتى وحدة غيرها عندها حق فيه...غيري انا و كهو تبسمت كي تذكرت الليلة لي رجعلي فيها الخاتم...و لا مرة توقعت باش نوصلو لهوني جملة...غمضت عينيا و أنا نتحسس في النسمة لي قاعدة تضرب على وجهي..برغم لي ثنية طوالت..أما عندي امل باش نرجع لهوني و باش نعيش مع عمر و بنتي...حتى كان هذا الكل مصارش...تو يبقى في أحلامي...و مستحيل نقطع طرف امل يربطني بيه مرة اخرى...مستحيل نفرط في حبو...لاخر نفس في حياتي...و مهما كان الثمن مبعد...جبدت روحي شوية تكيت لتالي...منحبش نغزرلو...و منحبش حتى نحكي معاه...و لا نسمع صوتو...خذيت نفس و غزرت لاشرف في المرايا نحكي
أنا:مزال برشا باش نوصلو ؟
أشرف:ساعة أخرى و ندخلو للبلاد
أنا:شقصدك ؟
هز راسو شوية غزر لمراد...تلفت عندو بالوقت قحرتلو نحكي
انا:شيقصد هذا ؟
مراد:وقف الكرهبة
اشرف:باهي سي مراد
شد الفران على جنب...و نزل من الكرهبة...منعرفش علاه دخلني الشك...انو باش نمشو لنفس البلاصة لي فيها عيلة عمر...نفخت بالقاوي نحكي
انا:هاني نستنى في توضيحك
مراد:اخر مرة تسأل حد غيري و انا معاك
انا:يزي من المقدمات متاعك مراد...و جاوبني
مراد:كانو لسانك طوال زيادة ؟
انا:و انت تخمم كيفاه باش تقصو
مراد:اسمعني توا بالظبط...مخلي خدمتي و أموري و نعملك في خاطرك...على هذاكا مانيش ناقص تفوريخك
انا:انت تعمل في واجبك مش اكثر...حرمتني من امي عام و نص...كان مش اكثر...على هذاكا مجبور تهزني باش نقابلها...مش مزية منك...باهي
مراد:هذا لي راني نعمل فيه...اما الاحسن تقعد رايضة
انا:ملا جاوبني مراد...احنا ماشيين للبلاد وين عيلة عمر ؟
مراد:بالظبط
انا:تقصد لامي غديكا ؟
هزلي براسو ايه...ضحكت...ضحكت باستهزاء و انا نغزرلو...اخر شي توقعت انو امي كانت قريبة ليا لهدرجة و محسيتش بيها...عديت يديا زوز على وجهي ورجعت شعري لتالي نحكي
انا:علاه اخترت البلاصة هذيكا مرة اخرى....على شنية ناوي انت ؟
مراد:مانيش مظطر باش نجاوبك على كلشي عزيزتي
غمضت عينيا بالقاوي و عاودت حليتهم...قحرتلو و نزلت من الكرهبة...بعدت عليه شوية نرد في نفس...معادش نعرف وين يحب يوصل بالظبط...شيحب عند امي و عيلة عمر...مرة اخرى...حسيت بيه واقف ورايا...تلفت عندو نهز فيه و نحط...قحرلي يحكي
مراد:كان تحب تو نرجعو منين جينا...معنديش وقت نضيعو معاك هوني
بقيت نغزرلو من غير حتى كلمة...نفخ بالقاوي و عدا يدو على شعرو يحكي
مراد:شقولك ؟
غزرتلو بحقرة...و تعديت من قدامو رجعت للكرهبة قحرت لاشرف لي باش يحل الباب...ركبت وحدي و سكرتها بالقاوي...خالط عليا...و هو يمشي على راحتو منعرفش من فين يجيب فيها برودة الدم لي عندو..مش طبيعية جملة...كبست على كرشي نهدي في روحي عديت بقية الثنية ساكتة...منعرفش كيفاه باش نقابل هند و حماتي بعد اللي صار...هذا كان مزال باش يغزرولي مرة أخرى...تكيت راسي لتالي...منحب نخمم في حتى شي توا...كان امي و كهو...غمضت عينيا على ريحة الارض...منعرفش شنية تذكرت بالظبط...الباهي و لا الخايب اللي صرا فيا...اما لي نعرفو و لي حسيتو انو انا تذكرت كل لحظة عشتها معاه هوني...خايبة و لا باهية...المهم هو كان معايا و بجنبي...كبست على كرشي اكثر...اول ما تعدينا عالقصر متاعهم...تبسم يحكي
مراد:متحبش تنزل تسلم على حماتك ؟
قحرتلو و دورت وجهي عليه...أحسن شي معادش نعطيه قيمة أكثر من حجمو...و ندخل معاه في جدال فاشل...و ماهوش باش يوصلنا لحتى ثنية...نعرف لقاعد يستفز فيا...و يتعمد يذكر فيا باللي صار هوني...على هذاكا نحب نتلفو كانو ماهوش معايا جملة...اول ما وصلنا...حليت الباب و نزلت...هزيت راسي نغزر للقصر متاعو باهتة...اخر شي توقعتو يشري بلاصة هكا...اصلا نحس في روحي قاعدة مع عبد غير مراد...قرب مني حط يدو على جنبي...جبدني عندو...و نزل راسو شوية...يحكي
مراد:عجبك ؟
جبدت روحي منو بالسياسة...و هزيت راسي قحرتلو نحكي
أنا:أنا هوني على خاطر امي و كهو
تبسم ندرا كيف...كبست على كرشي...و قربت من الباب من غير حتى كلمة أخرى..قرب مني يمشي ورايا..دخلت مترددة..إحساس ندرا كيف سيطر عليا منجمتش نصدق لامي موجودة هوني...خذيت نفس و غزرتلو نحكي
انا:أمي وينها ؟
مراد:إرتاح ساعة عزيزتي
انا:مراااد...أمي وينهاااا ؟
قرب مني شوية...بعدلي خصلات شعري لتالي و هز يدو شاور للبون لي واقفة على جنب تغزرلنا...يحكي
مراد:هز السيدة الصغيرة تقابل أمها
بعدت وجهي منو...و وخرت لتالي...نمشي وراها من غير حتى كلمة...كل خطوة نعملها...نحس في قلبي باش يخرج من بقعتو...مدت يدها تشاور للبيت...تحكي
هي:من هوني مدام...تفضل
قربت بالسيف...وقفت بحذا الباب...مديت يدي مترددة باش نحلها...اما في لحظة وخرت لتالي...شي اقوى مني...خلاني منجمش ندخل عندها...حطيت يدي على فمي...و لاخرى على قلبي...نهدي في روحي...توا بالظبط منحبش نضعف مهما صار الداخل...خذيت نفس اكثر من مرة...و عاودت قربت من الباب...لميت طرف القوة لي عندي...و حليتها شوية شوية...نمد في الخطوة بالسيف...هزيت راسي غزرتلها...اول ما بعدت الفرملية من وجها...حسيت بدوخة قوية...استندت عالحيط بيدي مش مصدقة لأنا بالرسمي قاعدة نرا في امي...و انو هي عايشة لتوا...منعرفش قداش بقيت نغزرلها بالظبط حتى الفرملية..لي قربت مني بالزربة محسيتش بيها...كبست على يدي...تحكي
هي:لباس مدام ؟
انا:ل...لباس
هي:شكونك انتي...و شتعمل هوني ؟
جبدت روحي منها...و قربت من امي...نغزرلها مصدومة عديت يدي على رقبتي...و نزلت قعدت بجمبها عالسرير منعرفش قداش بقيت نغزرلها بالظبط...الكلام وحل في حلقي...حتى بدني غلب عليا...دوب نجمت نشد روحي مديت يدي مترددة...نعدي في صوابعي على كل بلاصة في وجها...على شعرها لي مسيب عالمخدة...مفما حتى تراص على وجها...جيست تراص قديمة شوية على جبينها...خذيت نفس نحكي
انا:ا...امي...انا جيت...هاني معاك توا...هيا فيق امانك
بقيت نعدي في يدي على وجها...كبست على يدها نحكي
انا:أمي كان تسمع فيا أمانك...فيق و حل عينيك...احكي معايا...قولي لانتي مزلت حية...قوم عاتبني على خاطر انا سبب في اللي صارلك الكل...هيا فيق...و تو نمشيو من هوني مع بعضنا
مسحت دموعي...و تلفت للفرملية لي واقفة ورايا نحكي
انا:شبيها متحبش تفيق ؟ حتى ماهيش تتحرك جملة
هي:مدام إنتصار عندها عام و نص و هي في غيبوبة
انا:شننننوووة ؟؟
بقيت نغزرلها مصدومة من اللي سمعتو...تلفت لأمي كأني نحاول نستوعب كلامها...لي كملاتو فرد وقت
هي:يمكن قاعدة تسمع فيك توا...اما مستحيل تعمل ردة فعل...حالتها صعيبة برشا...و كان باش تبقى هكا
انا:لااا أسكت...متكملش...امي باش تفيق...اكيد فما حل
هي:إن شاء الله مدام...هذا لي نتوقعوه احنا
انا:قداش عندكم و نتوما هوني ؟
هي:تقريب 9 شهور
معناها كان هوني قبلنا...غمضت عينيا بالقاوي...نحكي
انا:باهي عيشك
هي:مطولش معاها برشا...مظطرة نكمل نعدي عليها...و سامحني كان قلقتك
منجمتش نرجعلها...نزلت على امي أكثر...بستها من خدها و جبينها اكثر من مرة...و نحكي فرد وقت
انا:خليك قوية ديما...كيما نعرفك أمي...متخلينيش نخسرك بعد ما لقيتك مرة أخرى...انا بحاجتك توا..نحبك تقوم و تواجه مراد معايا...نحبك تصدقني مرة وحدة كهو أمانك امي
حسيت بالباب تحلت...من ريحتو عرفتو هو لي دخل عديت يدي على خدو و هزيت روحي بالزربة قربت منو...دزيتو لتالي...نصيح
أنا:اننت سببب في هذاااا الكل...امي هوني جرايرك يا مجرررم...يااا ساااقط
شدني من يديا زوز...كبس عليا...و قحرلي يحكي
مراد:أمشي معايا توا
أنا:سييييني...ما نمشي معاك لحتى بلاصة...مجرم كيفك بلاصتك في الحبس
مراد:أخرج إنتي
هزتلو براسها ايه...و خرجت تجري...فلتني...وخرت لتالي مروهجة...قربلي أكثر...حصرني مع الحيط...و حط يدو بحذا راسي يحكي
مراد:اسمعني يا فرخة...موسع بالي معاك...خاطرني نعرف لي وجعتك و ضريتك برشا...أما رد بالك تختبر صبري معاك اكثر من هكا...مفهوم كلامي
انا:ماهوش مفهوم ياا مراااد...أنت وجعتني اكثر من اللي تتوقع...فكيت مني حياتي...و توا أمي...تعرررف انت شنية لي عديتو...وقت سمعت بالحااادث
دزيتو بيديا زوز لتالي...فقدت اعصابي...كي تذكرت اكا النهار...كبست عالفاست متاعو نحكي
انا:انت عملتها بلعاااني...انت قصدت الحادث هذا يا مرااد...تعمدت تعمل هكا باش تفسد عرسي...و تخليني نحس بالذنب...حتى أنت حسيت روحي ظلمتك...برغم لي عملتو فيا الكل...أنت حتى الشفقة حرام فيك...علااه هكاااا...علاااه عملت فيها هكا...تي كانت تحبك أكثر مني علاه حرمتني منها السنين هذوما الكل يا مراد...أنت فكيت مني امي اول ما دخلت لحياتنا...تي تكلم...حلل فمممك
جبدني من يدي في لحظة...لين حسيت بالنفس متاعو في وجهي...كبس عليا يحكي
مراد:تحب تلقى جواب لأسئلتك...ايجا هوني تراه
جبدني اكثر...وقفني مقابلة أمي بالظبط...حاوطني من تالي...و حط يدو على وجهي...كبس عليا يحكي
مراد:اغزرلها...هاذي انتصاار أمك...هاذي نفسها لي قبل سنين من توا...دخلت عليك راجل...و قاتلك باش تعرس بيه...و انتي عمرك 12 سنة كهو...حطاتك قدام أمر الواقع...و حتى مخذاتش رايك في الحكاية...نفسها المرا هاذي عاشت حياتها كانو معندهاش طفلة...تحب نزيدلك يا زهرة...المرا هاذي هي لي خلاتنا في الحالة اللي احنا فيها توا...هي لي خلاتني نحبك بالسيف عليا...اغزرلها بالقدا...تذكر وقت تقلها امي باش نخرج تقلك اسئل مراد...وقت تطلب منها تعاونك في قرايتك...تقلك أمشي عند مراد...اغزرلها زهرة...المرا هاذي حطاتك بين يديا زوز و مسألتش عليك..خوفي عليك تحول غيرة..حاولت نقنع روحي أنو اللي نعمل فيه غالط أما منجمتش حاولت نبعد باش منضركش أما زادة منجمتش...كان نقلك نحبك نكون نكذب...كان نقول لأنا عشقتك زادة كذب...اللي نحس فيه أكثر من هكا...مستعد نتخلى على كلشي...المهم انك معايا و بجمبي يا زهرة...و السبب في هذا الكل هي إنتصار أمك...أمك لي عمرها مع اعتبرتك بنتها...بالعكس كانت ترا فيك عقبة في طريقها...بقيت نغزرلها من غير حتى كلمة...دموعي نزلو أكثر...منعرفش على شنوة بالظبط...كلامو الكل صحيح...هي عمرها ما اعتبرتني كيف بنتها...و كلشي كان واضح من الأول كانت ديما تختار مراد عليا في كلشي...حتى كانت السبب الرئيسي في اللي عشتو الكل...جبدت روحي منو بالسيف...و تلفت عندو نحكي
انا:أما تبقى أمي
مراد:إمتى ضحكت معاك اخر مرة ؟ امتى اخر مرة سهرت بجنبك و إنتي مريضة....امتى اختارت معاك دبشك ؟ إمتى مسحت دموعك وقت بكيت اخر مرة باهي تتذكر نهار سألتك فيه كان كليت و لا لا...كانك متقلقة و لا لا...نجحت و لا لا...جاوبني هااني نسمع فيك...تذكر وحدة من هذوما انتي ؟؟؟
هزيت يديا زوز...كبست على وذنيا...بكل قوتي..ما نحب نسمع حتى شي من كلامو...نزلت راسي...نحكي
انا:يزززي اسكككت...اسسكت مراد...معااادش نحب نسمعك
قرب مني اكثر...دور يديه زوز على ظهري و حضني بالقاوي يحكي
مراد:هاذي هي انتصار يا زهررة..مهما كذبت على روحك ماكش باش تبدل الحقيقة هاذي جملة...معادش تحمل روحك ذنب معندكش علاقة بيه..معادش تبكي بالطريقة هاذي...انتي اعطيني فرصة وحدة كهو...و تو نعوضك على كلشي...حس بيا مرة وحدة يا زهرة...مرة وحدة و كهو
رخفت يديا شوية شوية...نحس في بدني مهدود...نحب ننفي الكلام لي قالو الكل...اما منجمش...و زدت تأكدت لي معادش فما امل يقتنع انو اللي يعمل فيه حرام و ميجيش...ساعات نحس حبو هذا مرض...و قاعد يضر فيه حتى هو زادة...جبدت روحي منو بالسياسة...عديت يديا زوز على وجهي...نمسح في دموعي و نحكي فرد وقت
انا:معادش نجم ناقف اكثر من هكا...كان فما بيت حاضرة...خليني نرتاح
مراد:باهي إيجا معايا
قرب مني شدني من يدي...خايف عليا لا نطيح...تلفت غزرت لأمي مرة اخرة...و تنهدت بالقاوي...نعرف لي قالو الكل صحيح...أما نحب ننسى كلشي و نسامحها...نحبها ترجع مرة اخرى...و تعوضني على كلشي...حتى مرة وحدة...حضن واحد...المهم نحس لهي تحبني و كهو كلشي تعدا عليا كوم..و لي عشتو مع أمي كوم آخر..رغم حب عمر الكبير...رغم الحياة الجديدة لي عطاهالي...اما بقات ناقصة كلمة من أمي...خذيت في بلاصتها كف قدامو...هدتني بيه...و خلاتني من غير سند في دنيا حتى عيلتي حرمتني منها الكل...على خاطر عاودت عرست بمراد...نحب ننسى هذا الكل...و نحضنها مرة اخرى...من غير خوف...من غير تردد انها ترفض نكون بنتها...من غير مراد لي باش يكون بيناتنا...انا خسرت بابا قبل ما نشبع منو...أما خسرت امي من اول نهار جيت فيه لدنيا...منعرفش كيفاه نجمت نشد روحي و نكمل نمشي...حل الباب...و قرب معايا لسرير...قعدني...و قعد بجنبي...رجعلي شعري لتالي يحكي
مراد:حاول ترتاح توا...و ما تخمم في حتى شي باهي
جبدت روحي منو...و تسطحت على طرف السرير حطيت يدي تحت خدي...معادش عندي جهد باش نحكي معاه...و لا حتى نغزرلو...حط يدو على خدي يبعد في شعري لتالي و يحكي
مراد:سامحني يا روح قلبي...سامحني على كلشي...أكيد باش يجي نهار و تحاول تفهمني عاللي صار الكل
نزل عليا اكثر...باسني من راسي...غمضت عينيا بالوقت تقززت من روحي و من قربو ليا...كرهت كل لحظة تجمعني بيه...حليتهم كي حسيت بيه خرج من البيت دمعة أخرى لقات طريقها على خدي...منعرفش كيفاه خرج صوتي...قاعدة نلوم فيه كأنو قاعد بجنبي توا...و لا يمكن قاعدة نستخايل فيه بالرسمي
انا:يا ريتك صدقتني يا عمر...يا ريتك مكذبتنيش ليلتها و صدقت لمراد عايش...وقتها مكانش باش يعمل فينا هذا الكل...مكانش بعدنا على بعضنا...كيفاه باش نتحمل أكثر من هكا...شنية نعمل توا يا عمر
تنهدت بالقاوي...و حطيت يدي على كرشي...نتحسس في بنتي...لي قاعدة تتحرك من بكري...كأنها تقولي لهي هوني معايا...و ماهيش باش تخليها بيا...صورة أمي و الكلام لي قالتو الفرملية لتوا بين عينيا...معادش نجم نخمم في اللي باش يصير...آخر حاجة توقعتها انو نلقاها في الحالة هاذي...بعد ما عرفت لهي عايشة..يمكن جيت لهوني ببرشا أمل..أنو نحكي معاها و نفهمها كلشي صار في غيابها...كان عندي أمل لي هي باش تسمعني و تصدقني...و نلقاو حل مع بعضنا...أما لي نسيتو انو مراد يعمل حساب لكل خطوة باش يعملها...تعمد يوريني أمي و هي في الحالة هاذي باش يربطني معاه اكثر...و ما نجم نعمل حتى خطوة بعيد عليه...أما علاه اختار البلاصة هاذي...علاه شرا القصر هذا...و شنية كان يعمل نهارتها في المعهد لي تقرا فيه هند...كيفاه نجم يدخل لغديكا و بالظبط مكتب المدير...اذا كانو هو نفسو فرات لي كانت تحكي عليه قبل...معناها حتى المعهد متاعو زادة...و كيفاه نجم يشري كلشي بهوية اخرى...ساعات كي نفكر في اللي قاعد يعمل فيه...نحسو شي أبعد من انو يكون حقيقي...غمضت عينيا بالقاوي...معادش نجم نفكر في اللي صار اكثر من هكا...معادش نحب نخمم في الوضع لأنا فيه توا...منعرفش على روحي كيفاه غفيت...من تعب الثنية و جراير لي صار قبيل....الشي الوحيد لي خلاني نهدا و نرتاح شوية هي بنتي و كهو.