🔸️حلقة 41
🔸️زهرة تحكي:
مديت يدي حطيتها عالبلار...نغزر للمطر ماشية و تقوى دنيا باردة عاللخر...و خوف تزرع داخلي...خايفة معادش نراه مرة أخرى...معادش باش نحضنو و نشم ريحتو معادش باش نسمع صوتو...خسرت برشا و منحبش نخسرو توا...متوقعتش باش يمشي بعد آخر كلام قلتو أنا السبب في كلشي قاعد يصير...نحس في قلبي باش ياقف...نحس روحي في حلمة و منجمتش نفيق منها صورتو قعدت محصورة بين عينيا...فقت من سرحتي كي شد الفران...طلعت راسي...نغزر للكراهب لي قبلنا خذيت نفس نحكي
أنا:محمد معادش فما وقت راهو
محمد:تقريب وصلنا...أما ريت سيركيلاسيون منجمش نتحرك
بقيت نغزرلو...تهزيت و تحطيت على صوت الطيارة فكيت الحزام...غزرلي ندرا كيف يحكي
محمد:فاش تعمل ؟
أنا:لازم نخلط عليه...مستحيل نخليه يسافر
مريم:فيسع زهرة
خليت الباب...و نزلت...نجري بين الكراهب...و مش عاملة حساب لحد...لي يهمني اني نخلط عليه و كهو منعرفش كيفاش وصلت...وقفت بحذا الباب...نرد في النفس بالسيف...وقفني البوليسي بيدو يحكي
هو:لباس مدموزال ؟
أنا:لازمني ندخل...أمانك
هو:باهي اهدا ساعة
انا:باش يسافر لازمني نخلط عليه...أمانك...كان تحب اسألني مبعد
هو:باهي...تفضل
انا:عيشك
دخلت نجري...جاب ربي مكبش فيا برشا...وقفت في النص...ندور في عينيا بين الناس...نسمع في النداء الاخير...<< النداء الاخير لرحلة ¤¤¤ الموجهة من مطار قرطاج تونس الى فرنسا...نعتذر على تأخير >> جمدت في بلاصتي...و انا نسمع فيها...لا مستحيل يمشي و يخليني...ندور في راسي في كل بلاصة نحاول نلمحو بين العباد هذوما الكل...باقي النداء يتعاود اكثر من مرة عديت يديا زوز على وجهي...نحس في روحي ضايعة وسط هذا الكل...خذيت نفس نهدي في روحي...لازمني نلحقو...لازمني نخلط عليه قبل ما يمشي...نغزر لناس لي يودعو في بعضهم...منعرفش كيفاش قربت منهم نغزرلو...كيفاش شد باسبورو عليهم و باش يدخل منعرفش كيفاش خرج صوتي...نصيح في وسطهم
أنا:عممممممر
تلفت ليا اخر واحد...جات عيني في عينو...يغزرلي مش مصدق...باقي واقف في بلاصتو من غير حتى كلمة قربت منو بالزربة...وقفت قدامو نحكي
أنا:متمشيش...عمر أمانك...متخلينيش وحدي...نعرف روحي غلطت برشا...أما متمشيش...أسمعني مرة وحدة
هزني و حطني...من غير حتى كلمة...قربت منو أكثر حطيت يدي على يدو...ياسر باردة...زادت بردتني أكثر تنهدت بالقاوي نحكي
أنا:متمشيش عمر
جبد يدو مني...جيت باش نحكي قص عليا صوت الراجل لي وراه يحكي
هو:تفضل مسيو...معادش فما وقت
هزيتلو براسي لا...منعرفش شنوة نقول...منعرفش كيفاش باش نمنعو...القوة لي جيت بيها...حسيتها تبخرت و انا نغزرلو...غزرلي ندرا كيف يحكي
عمر:أمشي من هوني زهرة...هذا أحسن حل لينا زوز
أنا:لااا...لا ماكش باش تمشي...ماكش باش تخليني عمر
عمر:تأخرت برشا
تلفت من غير ما يزيد حرف اخر...قربت منو شوية نحكي
أنا:أما نحبك عمر...أمانك متمشيش...متخلينيش وحدي باش نضيع بعدك
حبس في بلاصتو...للحظة توقعت لهو باش يرجع...باش يتلفت...اما لا...كمل مشى و خذا كلشي معاه...حاولت نخلط عليه...اما وقفوني...منجمتش حتى نصيح...و لا حتى نمنعو...دورت راسي نغزرلو من البلار...ماشي و يبعد...توا برك بديت نستوعب...لي باش تكون اخر مرة نراه فيها...و اخر مرة نسمع صوتو...اخر مرة لكلشي بينا هو اختار ثنية بعيدة عليا...اختار يمشي من هوني من غير حتى ما يغزرلي اخر مرة...الشهور و لا السنين هي لي باش تفرقنا منعرفش...كل لي وليت متأكدة منو اني خسرت عمر...و المرة هاذي لا هو باش يرجع و لا أنا باش نسامحو...وخرت لتالي مروهجة...قعدت على أول كرسي عارضني...نزلت دمعتي أول ما سمعت صوت الطيارة...أول مرة حسيتو بعد عليا برشا...لدرجة...حتى شي ماهو باش يرجع كيما الأول...و لاحتى هو باش يرجع بعد توا
أنت تقرأ
زهرة🌸
Acak🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
