زهرة🌸

الحلقة الرابعة و السبعون

🔸️حلقة 74
🔸️زهرة تحكي:
فقت الصباح...نحل في عينيا بالسيف...ياسر تعبني معاه ليلة البارح...منعرفش علاه حسيتو مرتاح...كانو مفما حتى مشكلة تستنى فينا و كلشي تحل...فرد وقت خوف ندرا كيف كان مسيطر على قلبي...خاصة كي حسيتو حنين معايا عاللخر...في تصرفاتو و كلامو زادة...هزيت روحي شوية...استغربت كي مريتوش بحذايا...بالعادة نفيق قبلو ديما...أما اليوم بالظبط رقدت و محسيتش بالوقت...يمكن خاطر رقدت مرتاحة...بعد اللي تعدا علينا الكل...مديت يدي شوية...دورت راسي بالوقت...كي لقيت جواب صغير...قلبي دق بالقاوي مش قايلي خير...تقعدت بالقدا...و حليتو...قلبي رعش مع اول حروف قريتها منو...منعرفش كيفاش باش نكملو الكل <<صباح النور يا روحي...متعرفش قداش تمنيت نفيق على صوتك كي العادة...مع انو ياسر تخرنن عالصباح...أما ستانست و معادش نجم نفيق كان بالطريقة هذيكا...صحيح معادش تفرق برشا...خاطرو تحفر في راسي...و باش نسمعو كل صباح...زهرة يا روحي...انتي متعرفش شنية عملت فيا...ساعات منعرفش شنية لي نحسو بالظبط و انا معاك...نكذب كان نقول لأنا نحبك...خاطر اللي عشتو معاك اكبر ببرشا من الحب...مكنتش نعرف شنية كان باش يصير فيا...من غيرك...من اول نهار ريتك فيه حبيتك...اما منجمتش حتى نعترف لروحي...مرة ريتك و انتي تبكي في الكلاصة وحدك...مكنتش نعرف سبب لخلاك مقهورة اكاكا...قد ما كنت نحب اني نقرب منك نحضنك و كهو منعرفش علاه ساعتها حسيتك لانتي متاعي...و حتى حد ما عندو الحق في دموعك...تعرف كل مرة كنت نغزرلك فيها...نحس انو الدنيا عطاتني فرصة أخرى باش نعيش...ساعات نحس لي صار الكل حلمة...قاعد نتمسك بيها باش متوفاش...تعرف شنية اكتشفت هذا الصباح زادة...انو بنتي بدات تكبر...الحاجة الوحيدة لي باش طمني اني مخليتكش وحدك...و انو باش نبقى معاك ديما...زهرة...مرتي الغالية...روحي...انتي كهو عندك الحق تقول انك عطيتني فرصة أخرى...و سبب باش نحارب على خاطرو لاخر نفس في حياتي...على هذاكا نحبك تبقى قوية مهما صار...و مهما تعدا عليك...في اللحظة لي تحس فيها انك ضعفت و معادش تنجم تكمل...في اللحظة اللي تيأس فيها و باش تسلم...حط يدك على كرشك و غمض عينيك...تو تلقاني بحذاك قتلك لي باش يجي نهار...نكون مجبور فيه اني نبعد عليك...اما مستحيل اني نخليك...نحبك تبقى قوية ديما و ما تخلي حتى حد يهدك...كان صار...و منجمتش نرجعلكم مرة أخرى...نحبك تعيش انتي و ريحان على خاطري...نعرف مخذيتش رايك في اسم بنتنا...اما نحبو مشتق من اسمك انتي...نحبك تعيش حياتك كيما كنت معايا بالظبط...مقتلكش الكلام هذا الكل في وجهك خاطرني منجمش نرا دموعك...منجمش نمشي و نخليك مقهورة ورايا...نعرف باش نضعف و نضرك معايا...نحبك تبقى قوية على خاطري...على خاطر بنتنا لي في الثنية و تذكر ديما...انو انا نحبك...و باش نبقى نحبك لاخر نهار في حياتي يا زهرة >>
دمعة نزلت من عيني...مع آخر كلمة قالها...بدني رعش الكل...آخر حاجة توقعتها اني باش نقرا جواب منو أسئلة هدت عليا...ملقيتش جواب عليها...شنية لي صاار ؟ البارح كهو كان معايا...البارح برك كان يتصرف كأنو مفما حتى شي...زعمة كانت آخر ليلة بيناتنا...زعمة على هذاكا تصرف معايا بالطريقة هذيكا...منعرفش كيفاش قمت من بلاصتي...هزيت تليفوني نكلم فيه لقيتو مسكر...دخلت بعضي أكثر...نحكي وحدي
انا:لاا...لا...مستحيل...نعرف لهو مستحيل يمشي...باز قاعد يفدلك
باقي نكلم فيه و نطلب في ربي يهز عليا مرة وحدة برك...نحب نسمع صوتو و كهو...منعرفش قداش من مرة عاودت طلبتو و في كل مرة...نقول تو يفتح تليفونو و يكلمني...قعدت على طرف سرير...نرد في نفس...تنهدت بالقاوي و كلمت حساام...مرة و اثنين حتى هو ميحبش يهز عليا...مسحت دموعي...تقويت على روحي و قمت بدلت دبشي كيما جا و خرجت من دار...الدنيا مغيمة و الطقس بارد...زعمة حتى نهار حزن معايا المرة هاذي وين ماشية ؟ منعرفش...كلشي نخمم فيه اني نقابلو مرة أخرى...نحب نرجع معاه لدارنا...و لحياتنا...كانو شي ما صار...منعرفش كيفاش وصلت لدار حسام...يمكن البلاصة الوحيدة لي باش توصلني ليه توا...دقيت الباب أكثر من مرة...حلتلي خالتي نعيمة مفجوعة...تحكي
نعيمة:زهررة
انا:حسااام هوني ؟
نعيمة:لاا اما
مستنيتهاش تكمل...دخلت نجري...وقفت امي فاطمة بالوقت...و مريم نازلة وحدة وحدة في الدروج...قربت من امي فتحية...شديتها من يديها زوز...كبست عليها نحكي
انا:امي فتحية امانك...قولي عمر وينو...هاني من بكري نكلم في حسام ميحبش يهز عليا
فتحية:زهرة عزيزتي...اهدا ساعة و فهمني بالشوية
ان:امانك كلم حسام...خليه يخبرني عمر وينو امانك
مريم:زهرة عزيزتي شفما ؟
تلفت عندها بالوقت..تغزرلي مفجوعة...قربت منها شديتها من بدها نحكي
انا:انتي كلمو مريم...باز يسمعلك...من بكري ميحبش يهز عليا...امان عيش اختي
مريم:اهدا ساعة
انا:مااانيش باش نهدا...حد فيكم يفهمني...صارت حاجة لعمر...و انا منجمش نوصل...من غير حسام...يا مريم عيش اختي...والله ما عاد نطلب منك حاجة اخرى..امي فتحية...كلمو انتي...باز يهز عليك
مريم:باهي...باهي هاني باش نكلمو انا...حاول تهدا يا روحي
هزيتلها براسي ايه...نغزرلها و هي تطلب فيه...نحس في قلبي يخض بالقاوي...باش يخرج من بقعتو...كانو قاعدة نستنى في المصير متاعي...كبست على كرشها تحكي
مريم:حساام...وينك ياخي ؟
فكيت تليفون من يدها...و قربتو من وذني...نسمع فيه يحكي
حسام:مريم منجمش نحكي معاك توا...مبعد نكلمك باهي عزيزتي
انا:انا زهرة
حسام:زهرررة ؟
انا:نعرف لأنت متحبش تكلمني...و مخبي عليا حاجة زادة...اما براس لي يعز عليك يا حسام...ماني اختك قلي شنية لي قاعد يصير...و عمر وينو...هاني من بكري نطلب فيه تليفونو مسكر...توا نص نهار...و حد فيكم ما يحب يكلمني...والله نحس في روحي باش نهبل
حسام:باهي...باهي..حاول تهدا توا عيش اختي...و هاني انا في الثنية...مسافة طريق و نكون عندك باهي
انا:عمر باش يكون معاك ؟
حسام:زهرة...ابقى غديكا هاني جاي...مفهوم كلامي ؟
انا:باهي...هاني نستنى فيك
حسام:باهي
قعدت عالفوتاي لي ورايا بالظبط...منجمتش ناقف اكثر قربت مني مريم...قعدت بجنبي تحكي
مريم:زهرة شفما ياخي ؟ صارت حاجة ؟
فتحية:تكلم عيش بنتي...وين عندو يمشي عمر و يخليك
انا:منعرفش...كلشي نعرفو...انو مراد هو السبب في اللي قاعد يصير و كهو
فتحية:نعيمة عيش اختي...هات كاس ما معاك
نعيمة:باهي
مريم:سبق الخير...بلكشي واحلين في الخدمة...على هذاكا محبش يهز عليك
انا:المرة هاذي عمر معادش باش يرجع...المرة هاذي مراد ربح يا مريم
بقات تغزرلي من غير حتى كلمة...حطيت يديا زوز على كرشي...نحب نلقى قوة و جهد...باش نستوعب اللي قاعد يصير فيا...الكل بقى ساكت و يغزرلي...اصلا معادش فما شي يتحكى بعد اللي صار...صورتو بين عينيا...كلشي نحب عليه توا...اني نفيق من الحلمة الخايبة هاذي...و كهو...فقت من سرحتي على صوت الباب...دخل حسام وحدو..منجمتش نتحرك من بلاصتي للحظة تمنيت يكون معاه كي العادة...و يوفا كلشي غزرتلو مريم تحكي
مريم:حسام شفما ياخي...و عمر وينو ؟
فتحية:قول حاجة عيش ولدي
حسام:مفما حتى شي يخوف...هيا امي هز مريم و امشي...باش نقعد شوية مع زهرة وحدنا
مريم:باهي
قرب منها...عاونها تاقف...باسها من راسها...يحكي
حسام:متعبش روحك
مريم:رد بالك عليها
حسام:باهي عزيزتي
قعد بجنبي...زوز بقينا ساكتين مدة...لين تكلم هو يحكي
حسام:عمر مليح
هزيت راسي غزرتلو...جات عيني في عينو...دوب تبسم يحكي
حسام:يمكن هذا احسن حل عملو توا
انا:و..وين مشى ؟
حسام:سلم روحو
بقيت نغزرلو...من غير حتى كلمة...نزلو دموعي بالوقت اخر حاجة توقعتو يعملها...منجمتش حتى نسألو علاه عمل هكا...و شنية سبب لي خلاه يسلم روحو...كمل كلامو يحكي
حسام:الأمور تعقدت في الشريكة...تلز باش يتصرف من غير ما يعلمنا...و بالطريقة هاذي مدة الحكم تو تنقص و يخرج في اقرب وقت
انا:قداش باش يبقى غديكا ؟
حسام:لتوا مفماش خبر صحيح...اما المدة من ست شهور لعام...و اكيد المحامي معاه...و انا معاه زادة
انا:نجم نقابلو ؟
حسام:الفترة هاذي صعيب برشا
انا:باهي
هزيت روحي وقفت بالسيف...وقف في جرتي يحكي
حسام:ابقى هوني بحذا مريم الفترة هاذي...ميجيش تبقى وحدك غديكا
انا:مرسي حسام...اما انا نفضل نبقى في داري...عيشك
خرجت من غير ما نستنى منو كلمة أخرى...نمشي بدن من غير روح...خلط عليا لبرا...يحكي
حسام:زهرة عيش اختي...هيا معايا توا...و نوعدك نخليك تقابلو في اول فرصة
انا:عيشك حسام...اما نحب نمشي و كهو
حسام:خليني نوصلك ملا
انا:لا عيشك
حسام:مانيش نسأل فيك...بعد توا انتي أمانة عمر عندي و اللي نقولو هو اللي باش يصير...مفهوم كلامي
هزيتلو براسي ايه...معادش نجم نحكي أكثر...قرب مني حضني يحكي
حسام:و راس اختي كلشي تو يتحل..نعرف لعمر مخطط لكلشي و زادة ينجم يخرج في اقرب فرصة...يعني لتوا حتى شي ماهو واضح باهي
انا:باهي
كبس على يدي...و حل باب الكرهبة...ركبني و خلط عليا بقيت ساكتة ثنية كاملة...منعرفش اصلا فاش كنت نخمم بالظبط...دورت راسي على صوتو يحكي
حسام:وصلنا
هزيتلو براسي ايه...و مديت يدي حليت الباب...وقفني يحكي
حسام:كان احتجت شي كلمني...و ما معادش تخرج من دار بلا ما تعطيني خبر باهي
انا:باهي
حسام:رد بالك على روحك
نزلت من غير حتى كلمة أخرى...كل خطوة نقرب بيها نحس ساقيا رزنت أكثر...حليت الباب...و دخلت...غريبة معادش فيها روح كيما قبل...نحيت كبوطي...و ترميت عالفوتاي...منعرفش قداش تعدا وقت بالظبط...باقي نستنى فيه و لتوا مرجعش...جبدت تليفوني...كلمتو مرة أخرى...باقي تليفونو مسكر...وقتها استوعبت...لهو ماهوش باش يرجع...و انو لي قاعد يصير حقيقة مش حلمة...مديت يدي رميت كلشي كان في طاولة عالارض كسرت كلشي...جا على يدي...كلشي يمكن يخلي الشي لي نحس فيه ينقص...طحت على ساقيا زوز...الدموع لي حاولت نمنعهم نزلو...نزلو أكثر من قبل...نزلو من الوجيعة لي نحس فيها...منجمش نستخايل حياتي من غيرو...مزال ما عشت معاه حتى شي لتوا...الفترة لي حسيتها اكبر ببرشا من اني نجم نحكي عليها لحد..حتى لروحي...خرجت مني صيحة تهد جبال...كلو بسببي كلشي صار كنت انا سبب فيه...عمر في الحبس جرايري مستحيل نغفر لمراد لعملو فيا...و لي خلاني نعيشو ضربة بيدي عالارض...نحاول نحي الوجيعة لي نحس فيها...اما مع كل دمعة قاعدة تقوى أكثر...كل دمعة نحس فيها دم...متوقعتش باش نخسر عمر بالطريقة هاذي..متوقعتش باش يجي نهار و يمشي عليا بالطريقة هاذي...برغم لي تعدا علينا الكل...اما كل ليلة كنت نراه كل يوم نحس لهو قريب مني...وينو توا...شبيه مرجعش لتوا...مش مستانس يوخر برشا...يعرفني نخاف كي نبقى وحدي في دار...علاه عمل فيا و في روحو هكا اكيد كنا باش نلقاو حل مع بعض...حليت عينيا على وجيعة قوية في كرشي...حطيت يدي عليها نحكي
انا:متخافش يا روحي...مستحيل نفرط فيك...وعد مني
مسحت دموعي...و تقويت على روحي وقفت...نعمل في الخطوة بالسيف...منعرفش كيفاش وصلت لبيت البانو...استندت بيديا زوز عالرخامة...غسلت وجهي مرتين...و طلعت راسي غزرت للمرايا...نحكي
انا:والله ما ندمك يا مراد...مهما عملت ماكش باش تفرقني على عمر...لا راني باش نسامحك و لا نسمحلك تقرب مني
غمضت عينيا بالقاوي و عاودت حليتهم...نحس في وجيعة تشد فيا و تطلق...حاولت نهدي روحي قد ما نجم...انا وعدتو...و مانيش باش نخسر صغيري...مهما صار...خذيت نفس...و مشيت للكوجينة...تبسمت كي ريتو حضر طاولة الفطور الصباح...انتبهت لورقة صغيرة محطوطة في الوسط...هزيتها في يدي نقرا فيها
عمر:بونجور حبي...نعرف لباش ترا الطاولة هاذي روطار اما نحب نبه عليك...لازمك تاكل بالقدا...و تشرب دواك في وقتو...متنساش لانتي وعدتني...نحبك
تبسمت بالوقت...حسيت لهو معايا بالرسمي...عديت عينيا عالطاولة...طلع محضر كلشي كيما نحبو...حتى من الغلة...قعدت عالكرسي و تلفت نغزر لبلاصتو...نحس فيه قريب مني عاللخر...اما شبيني منجمتش نشوفو الغصة لي حسيتها في حلقي...مرارة و تعدات...زعمة علاه انا...شنية عملت في حياتي...باش نعيش هذا الكل علاه مراد اختارني انا...والله عزيتو بكري كي خويا و أكثر...شبيه جبد بيا في لحظة...علاه مصر انو يحطم كلشي باهي في حياتي...اما كلشي في دنيا وحدة بوحدة...و رجعت عمر هي اللي باش تقهرو...دوب كليت اصلا ما سخنت شي منو...الكل على خاطر وعدتو...و على خاطر بنتي زادة...شربت دوايا...هزيت الورقة في يدي و رجعت لبيتي...ترميت عالفرش...مزالت ريحتو فيه لتوا...مديت يدي...جبدت مخدتو لعندي خذيت نفس منها...و حطيت يدي على كرشي...نحكي
انا:ريحان...ياسر حبيت الاسم هذا يا روحي...و متأكدة لانتي باش تكون طفلة...هذا لي نحب عليه انا زادة نوعدك لماكش باش تعيش حتى شي من اللي ريتو انا من هوني لي يرجع بوك...ماني باش نخلي حتى حد يقرب منك...و لا يحط يدو عليك...لا مراد و لا حتى حد غيرو
كبست بيدي على مخدتو...و غمضت عينيا...منعرفش علاه نحس فيه قريب مني عاللخر..كانو بجنبي منحبش نحل عينيا...منحبش نفيق من الحلمة لي غطست فيها نعرف باش نفيق على واقع خايب برشا.....واقع مفيهش عمر...واقع باش نتعلم نعيش فيه وحدي و نواجه كلشي يعرضني بالسيف عليا...بعد توا باش نحارب على عمر و بنتي كهو.