زهرة🌸

الحلقة الثالثة و الخمسون

🔸️حلقة 53
🔸️عمر يحكي:
فقت الصباح...نحل في عينيا بالسيف...نزلت راسي نغزرلها...باقي غاطسة في النوم...تبسمت بالوقت...حتى اليوم عطلة...لازمها ترتاح شوية...هزيت يدي...نعدي فيها على شعرها...و تفكيري في اللي صار البارح منعرفش شنوة باش يصير...للحظة سرحت في أول مرة ريتها...و وقت هربت منو لعندي...كلشي عشتو معاها لتوا...تعدا بين عينيا...وسط هذا الكل...لقيت روحي منجمش نعيش من غيرها...منجمش نسلم فيها...و لا نخلي شي يضرها...ساعات لي نحسو معاها...يكون اكبر من الحب...نعرف و متأكد لي حياتي ما تسوا شي قدامها..بالعادة نتخلى على كلشي يقيدني...كلشي ياقف في طريقي...اما هي لا...نجم نضحي بكلشي بحياتي كان لزم...اما مش بزهرة..مش بمرتي...فقت من سرحتي كي بدات تتحرك...باش تفيق...تحل في عينيها بالسيف كبست على شعرها اكثر...طلعت راسها شوية غزرتلي تبسمت نحكي
أنا:صباح الخير
زهرة:صباح النور
أنا:رقدت مليح ؟
زهرة:مممم و أنت ؟
أنا:المهم صغرونتي مرتاحة
زهرة:عمر
أنا:مممم
زهرة:ص..صراحة جعت
شدني ضحك...تو وين فاقت الفرخة...تخمم في كرشها هزيت يديا زوز...كبست عليها...و نزلتها لتالي...جبدتها عندي شوية نحكي
انا:ملا جعت
زهرة:مممم برشا
أنا:مشكلة
زهرة:علااه ؟
أنا:أنا نحب عليك توا
زهرة:مجنون
هزت يدها حطتها على خدي...و تبسمت تحكي
زهرة:مممم نحب نطلب حاجة
أنا:دلل
زهرة:ميسالش نفطرو اليوم برا
انا:كهو
زهرة:كهو
أنا:باهي و شعملنا في موضوعنا ؟
زهرة:عمممر أماانك
نزلت عليها أكثر...عديت عينيا على ملامحها...و تبسمت تحكي
انا:متأكدة ياخي ؟
زهرة:لي متأكدة منو اني نحبك برشا...و
انا:و شنية
زهرة:و جعت برشا
انا:باش تجيب آخرتي يا فرخة
زهرة:لطف عليك
نزلت عليها أكثر...ساعة نهبل من تصرفاتها...في لحظة غطست في شفايفها...منحبش نفلت حتى دقيقة تجمعني بيها...جبدت روحي منها شوية...نحكي
انا:متغزرليش هكا...و قوم حضر روحك أحسنلك
زهرة:مش حتى تخليني نقوم ساعة
أنا:شنعمل كي منجمش نبعد
هزت يدها...حطتها على راسي من تالي...جبدتني ليها أكثر...تحكي
زهرة:على أساس أنا نجم نبعد عليك
انا:ياخي تستفز فيا...و لا شنية الحكاية ؟
زهرة:لا...نقول في الحقيقة
أنا:الحقيقة ملا
زهرة:مممم
انا:إنتي الحقيقة الوحيدة زهرة
زهرة:و أنت كيف الحلم عمر
أنا:هيا قوم توا
باستني من خدي...و جبدت روحها...تكيت لتالي...و تنهدت بقوة...نغزرلها و هي تلم في شعرها...عديت عينيا على تفاصيلها الصغيرة...تبسمت على جنب...مش وقتو حتى طرف لي قاعد نخمم فيه توا...منعرفش شبيني معادش نجم نبعد عليها...هزيت روحي...خلطت عليها عملت دوش...تفرهدت بيه على الصباح...لقيتها تبدل في دبشها...تبسمت نحكي
انا:شنوة عزيزتي منجمتش تصبر على كرشك ؟
زهرة:مممم هيا فيسع
أنا:باهي لالة
زهرة:باش تلبس لي حطيتهم عالسرير
هزيتلها براسي ايه...وجودها في حياتي بدل برشا حاجات...أولها انو معادش نحس بالوحدة...لي غمتني سنين طويلة...حضرت روحي...و خلطت عليها...طول الثنية تحكي في موضوع جديد...حسيتها تفرهدت برشا عالبارح...طلبت فطور على ذوقها...باقي نغزرلها...و هي غاطسة في الصحن...مش لاهية بحاجة أخرى..قص عليا صوت تليفوني...لقيتو رياض يطلب...خذيت نفس و هزيت عليه نحكي
أنا:أهلا رياض
رياض:تأكدت من الموضوع
أنا:وينك توا ؟
رياض:في المركز
أنا:باهي تو نجيك
رياض:نستنى فيك
أنا:باهي
علقت عليه...و تكيت لتالي...غزرتلي مستغربة...تحكي
زهرة:شفما ؟
أنا:كمل فطورك...عندنا وين نمشيو
زهرة:وين ؟
أنا:مبعد تعرف
زهرة:باهي
عديت يدي على وجهي...منعرفش شنوة لي باش يصير اما نحبها تعرف كلشي...و مهما يصير انا باش نكون معاها...أول ما كملت...حطيت الفلوس عالطاولة...و شديتها من يدها...طول الثنية و هي تسأل فيا...ركيت الكرهبة بحذا المركز...غزرتلي مستغربة تحكي
زهرة:ع عمر...شتعمل هوني أنت ؟
فكيت الحزام...و تلفت عندها...حطيت يديا زوز على وجها...و غزرت لعينيها نحكي
انا:اغزرلي زهرة...لي باش تسمعو الداخل مهم برشا منعرفش شنوة باش يصير بالظبط...و لا شنوة حكاية الكرهبة...أما نحبك تعرف...أنو مهما صار...أنا معاك ما نحبك تخاف من شي و لا حتى تدخل بعضك...طول ما انا معاك...حد ماهو باش يقرب منك ولا يضرك...مفهوم كلامي
زهرة:ب..باهي
بستها من راسها...و نزلت...خلطت عليا...شدتني من يدي كبست عليا...منعرفش علاه كل خطوة نقرب بيها للبيرو متاعو...نخاف عليها اكثر...أول ما دخلنا...هز روحو قرب منا...صافحني...يحكي
رياض:أهلا صاحبي
أنا:عيشك
رياض:مدام لباس ؟
هزتلو براسها ايه...كبست على يدي اكثر من الأول خذيت نفس نحكي
أنا:رياض...لي عرفتو على الحكاية...نحبك تخبرنا بيه توا...من غير ما تخبي حتى شي يخص مراد
رياض:أكيد تفضلو
هزيتلو براسي...قعدت بجنبها عالفوتاي...غزرتلي ندرا كيف...حاولت نطمنها...و تلفت عندو...حط الدوسي على الطاولة...و قعد مقابلنا يحكي
رياض:أول شي نحب نقلك أنو المدام عندها حق الكرهبة لي ريتها البارح...هي متاع مراد
غزرتلها بالوقت...الخوف تسلل لملامحها في لحظة خذيت نفس نحكي
أنا:لباس عزيزتي ؟
زهرة:مممم
رياض:اهدا مدام...صحيح متاع مراد...أما هذا قبل الحادثة لي عملها
أنا:شتقصد ؟
رياض:مراد عطى الكرهبة هاذي للمحامي متاعو قبل ما يموت
انا:و السبب ؟
رياض:السبب واضح...كانت هدية...خاطر تاريخ التسليم يتوافق مع قضية زهرة
زهرة:مستحيل...م مراد يحب الكرهبة هذيكا برشا...انا متأكدة
رياض:الوثائق لهوني تثبت كلامي...و بالعلامة...المحامي عطى الكرهبة لولدو...يعني المالك الرسمي ليها...هو ولدو
انا:كيفاش تأكدت من الحكاية ؟
رياض:رقم الكرهبة عاونا برشا
زهرة:نجم نسألك ؟
رياض:أكيد
زهرة:شكون المسؤول على سوسيتي متاع مراد...و شنوة باش يصير في أملاكو...على حد علمي ماهوش باش يتبرع بهذا الكل...و معندوش صغار...و زادة نظن معندوش صلة بعيلتو توا...و كان فما...يا ترا شكونهم
رياض:هذا في رايك انتي...اما هو حاسبها بالقدا...فما شكون قاعد يسير في الخدمة...يعني فما مالك غيرو
اما منجمش نعرف هذا الكل...تبقى أمورهم الخاصة المالك الخاص ميحبش يظهر روحو
زهرة:و لا واحد لقى الجثة متاعو ؟
رياض:الإرتفاع لي طاحت منو الكرهبة...عالي برشا...و صعيب برشا...يطلع الواحد منو عايش...يعني لازم تكون معجزة...و مراد بعد الحادث مستحيل يعيش...على هذاكا طمن...مراد مستحيل يرجع بعد توا
زهرة:باهي عيشك
أنا:مرسي رياض...مزيتك دين عليا
رياض:مبيناتناش صاحبي
أنا:عيشك لازمني نمشي توا
رياض:أكيد
أنا:نشوفك في ساعة أخرى
هزيت روحي وقفت صافحتو...و كبست على يدها...أول ما خرجنا...حليت فلس سوريتي...جيت باش نحكي أما سبقتني...كي نطرت عليا عنقتني بقوة...تحكي
زهرة:مرسي برشا عمر...مرسي يا روحي
هزيت يدي حطيتها على ظهرها...و بستها من راسها نحكي
انا:هيا توا
جبدت روحها مني...غزرتلي مستغربة...مخليتهاش تحكي...شديتها من يدها و خرجت...حليتلها الباب ركبت خلطت عليها...و خدمت الكرهبة بالوقت...سكتت شوية و تلفتتلي تحكي
زهرة:عمر شفما ؟
مرجعتلهاش...باقي سؤالها يدور في مخي...متوقعتش باش يجي السؤال هذاكا لمخها...حطت يدها على كتفي تحكي
زهرة:شنية لي صار ؟
شديت الفران بقوة...و تلفت عندها...قحرتلها نحكي
أنا:يهمك برشا تعرف...وين مشات أملاك مراد ؟
زهرة:شنوة ؟
أنا:أنا لي قاعد نسأل فيك ؟
زهرة:أنا جيست
انا:إنتي شنننوة زهرررة...ياخي نورمال لي عملتو إنتي
شيهمك في ¤¤¤¤¤¤¤ أملاكو وين تمشي...و لا لشكون باش يتبرع بيها...متحبش يتذكرك و يخليلك حصة...و لا يخليك الوريثة الشرعية...ماهو يحبك عاد
زهرة:ع..عمر
انا:برحمة أمك أسكت...منحبش نغلط معاك توا
جبدت روحها لتالي...و نزلت راسها...ضربت الفولون بيدي...تهزت و تحطت فرد وقت...خدمت الكرهبة و طرت بيها...منعرفش كيفاش وصلت لدار...شديت الفران و تلفتلها نحكي
انا:أطلع لدار توا
زهرة:و وين ماشي أنت ؟
أنا:زهرة أطلع...متنرفزنيش أكثر
زهرة:منقصدش لي فهمتو أنت...أنا جيست
أنا:أطلع لدار توا
زهرة:أما
انا:زهرررررة
حلت الباب و نزلت بالوقت...كبست على يدي...باش منخلطش عليها...أول ما دخلت...دورت الكرهبة و طرت بيها...مديت يدي نزلت البلار...خذيت نفس...و تنهدت بالقاوي...ما نحب حتى شي يجمعها بيه...حتى أسئلتها حي و لا ميت...ميهمنيش...المهم عندي أنها تنسى حد إسمو مراد...حتى بعد الفترة لي تعدات علينا منجمتش تنساه...و لا حتى تتعدا لي صار فيها...مزال إسمو برك يوترها و يخوفها...عديت يدي على وجهي...منعرفش قداش مزال باش يبقى بيناتنا...و لا شنوة مزال باش يصير أكثر...نفخت بقوة...نعرف لوعدتها باش نعديو الويكاند في الفيرما...أما ساعات منجمش نتحكم في غشي...خاصة كي يبدا الموضوع متعلق بيها...تعديت لسوسيتي...كملت بقية الخدمة...عديت بقية نهار غديكا و باقي مهديتش...حتى حسام غاطس في حبك درباني و رمى عليا كلشي الساقط...غزرت لساعة...ياسر تأخرت بالعادة نرجع أبكر من هكا...منحبش نخليها وحدها هزيت تليفوني و مفاتحي و خرجت...أول ما ركبت نوقز تليفوني بالوقت...إستغربت كي معرفش النومرو...هزيت بالوقت...نسمع في هند تحكي
هند:عمر
أنا:هند ؟
هند:حمد الله نجمت نوصلك
انا:لباس عزيزتي ؟
هند:مش لباس عمر مش لباس
أنا:شبيك...شنوة لي صار ؟
هند:بابا شد صحيح في حكاية علي...و أمي تاعبة برشا عمر...كان مرجعتش على خاطري...أرجع على خاطرها امانك
انا:هند يا روحي
هند:عمر كان تحب...تو نحط شرط لبابا...تو نقلو نقبل العرس بمقابل أنو يسامحك
أنا:تقبل شنية يا بنتي...ياخي هبلت إنتي...نورمال أنا نمد أختي لواحد اكاكا
هند:أمي بحاجتك عمر...أرجع أماانك
انا:باااهي اهدا...و خبرني ساعة وينك إنتي ؟
هند:آسيا صحبتي باش تعدي ليلة عندي...كان لازمها تجي...باش نجم نحكي معاك
انا:هند عزيزتي...أسمعني بالقدا...رد بالك تعمل حاجة تندم عليها مبعد
هند:شنوة باش يصير ملا...حتى مصطفى منجمش يبدل راي بابا في الحكاية
انا:أسمعني...ماكش باش تعرس بيه...متخافش منها الحكاية...و هو ما عندو ما يعمل...رد بالك توافق...و تو نلقى حل بطريقتي
هند:توعدني
انا:وعد يا روحي
هند:باهي...باش نعلق توا...قبل ما يجي حد
انا:باهي عزيزتي...رد بالك على روحك
هند:و أنت زادة...و رد بالك على زهرة زادة
أنا:باهي عزيزتي
خذيت نفس و نزلت تليفون...كبست بيديا زوز عالفولون الامور دخلت بعضها أكثر...خدمت الكرهبة بالوقت تذكرت لي صار صباح...حسيت روحي كثرتلها...خذيت باكو شكولاطة في ثنيتي..نعرفها تحبها الفرخة منعرفش كيفاش وصلت لدار...حليت الباب...حسيتها هادية غير العادة...خذيت نفس و دخلت لصالة...جات عيني عليها حاطة راسها على الأوراق...و غاطسة في النوم...ظاهر فيها كانت تقرا...حطيت البوات عالطاولة و قربت منها نزلت عليها شوية...و هزيت يدي...نبعد في شعرها لتالي نزلت بصوابعي لخدها...حلت عينيها شوية شوية...دوب شافتني...هزت روحها مفجوعة...ترمات عليا قبل ما نحكي دورت يديها زوز على رقبتي..كبست على ظهرها نحكي
انا:ششش اهدا...اهدا عزيزتي
زهرة:وينك لتوا عمر ؟
أنا:هاني معاك
جبدت روحها شوية...غزرتلي ندرا كيف...تحكي
زهرة:شبيك بطيت ؟
أنا:كنت في السوسيتي
زهرة:مش ويكاند
أنا:تلزيت نكمل الخدمة
زهرة:باهي...أنا زادة لازمني نكمل
جبدت يدها مني و تلفتت...عرفتها تغشت مني...أصلا عندها حق...محقنيش نتصرف معاها أكاكا...خاصة بعد اللي صار البارح...عديت يدي على وجهي...و قربت منها لميت الأوراق حطيتهم على جنب...قحرتلي تحكي
زهرة:فاش تعمل ياخي ؟
أنا:يززي كهو
زهرة:شمدخلك فيا أنت ؟
انا:زهررة
زهرة:شننوة...مش أنت لي متحبش تسمعني...و متحبش تحكي معايا...ملا باش نخليك على راحتك
نزلت راسها...و مدت يدها...باش تجبد الأوراق ليها كبست على الكرسي...و جبدتها لتالي...نحكي
أنا:قتلك يزيك توا
زهرة:أبعدني عمر...منحبش نحكي معاك
نزلت عليها أكثر...هزيتها في حملتي...كبشت فيا تحكي
زهرة:نزلني فاش تعمل ؟
أنا:ماكش باش تسكت
زهرة:عمر نزلني أماانك
أنا:تنجم تفهمني شبيك كنت تبكي ؟
زهرة:مكنتش نبكي...سيبني أماانك
أنا:و دموع اخرى في ثنية
زهرة:يززي عاد
أنا:منقصدش لي صار صباح
زهرة:عندك حق...و توا نزلني
أنا:رد بالك تنزل دمعة أخرى...رد بالك
زهرة:عمر نزلني
عديت عينيا على وجها...نزلو دموعها بالوقت...تنهدت بالقاوي...نحكي
انا:فاش قاعد نحكي أنا ؟
رجعت حضنتني بالوقت...حسيت بدموعها على رقبتي تحكي فرد وقت
زهرة:أنا سألتو جيست باش نعرف لهو بالرسمي معادش موجود...حبيت نتأكد لي معاد فما حتى شي يربطني بيه...مش لي فهمتو أنت...انا ما نحب حتى شي منو عمر...و لا شي...حتى إسمو منحبش نسمعو...كيفاش تفسر كلامي بأكا الطريقة
كبست عليها أكثر...منحبش نشوفها في الحالة هاذي خذيت نفس نحكي
انا:ششش يززي...قتلك منقصدش لي صار...أما كي يتعلق الموضوع بيه و لا بأي حد غيرو...منجمش نتحكم في أعصابي اكثر...سامحني يا روحي
زهرة:ملا شبيك خليتني وحدي ؟
أنا:مخليتكش...جيست حبيت نبقى وحدي
جبدت روحها شوية...غزرتلي ندرا كيف...تحكي
زهرة:و أنا توا نحب نبقى وحدي
أنا:مش حتى نزلك قبل
زهرة:أنت واحد أناني عمر
أنا:خاصة كي يتعلق الموضوع بيك إنتي
زهرة:يعني قاعد تعترف توا
أنا:مممم تنجم تقول لي وليت ملكية خاصة توا...و حتى حد ما عندو الحق فيك غيري
زهرة:و أنت نفس الشي...على هذاكا كان خليتني مرة اخرى مستحيل نسامحك
أنا:بو زينها مريتي
زهرة:أنت وعدتني باش تعدي نهار معايا
أنا:باش نعوضك عليه
زهرة:توعدني
أنا:أكيد يا روحي
زهرة:العشا حاضر...أما أكيد برد...خاطرك طولت برشا
أنا:عيش صغرونتي
نزلتها حطيتها عالارض...و نزلت عليها شوية...هزيت يدي مسحت دموعها نحكي
انا:آخر مرة مفهوم
زهرة:باهي...شنوة هذا ؟
انا:برا شوف وحدك
جبدت روحها لتالي...هزت البوات في يدها...و تلفتتلي تحكي
زهرة:ياااا وحدة أخرى
انا:مممم
زهرة:جووو
قربت منها شوية...فكيتها من يدها حطيتها على الطاولة و نزلت عليها...بستها نحكي
أنا:معادش نحب نشوفك في الحالة هذيكا مفهوم كلامي
زهرة:مزال مسامحتكش
أنا:ميسالش...نعرف كيفاش نرضيك أنا
زهرة:مش المرة هاذي...العشا باش يبرد أكثر
جبدت روحها...و مشات للكوجينة...تنهدت بقوة نحيت الفاست و خلطت عليها...لحقت تحضر العشا الفرخة قعدت مقابلها...تفكيري في كلام هند...نحس في راسي باش يطرشق من التفكير...عديت يدي على وجهي غزرتلي تحكي
زهرة:شبيك معجبكش ياخي ؟
أنا:صحة عزيزتي
هزيت روحي...بستها من راسها و خرجت...دخلت لبيت البانو عملت دوش...فرد وقت نخمم شنوة لازم نعمل مستحيل نخليه يدمر حياتها...مستحيل نخليه يدمرها بحجة العادات و التقاليد...لي كلات مخو...و خلاتو يفرض علينا حاجات بالسيف علينا...مستعد نتمرد عليه اكثر من مرة...اما مستحيل نخليه يلعب بحياة أختي بدلت دبشي و ترميت على السرير...نغزرلها دخلت و قعدت على الكرسي...تلم في شعرها من غير حتى كلمة باقي نتبع فيها بعينيا و هي تبدل في دبشها...قربت مني تسطحت قدامي...و عطاتني بظهرها تحكي
زهرة:ماهوش باش يخرج من حياتنا...حي و لا ميت معادش تفرق برشا...باش نبقى نعاني منو...مستحيل نجم نهرب من الماضي هذا...و أنت زادة مستحيل تنسى
تبسمت على جنب...و قربت منها...جبدتها عندي نحكي
انا:إيجا هوني تراه
زهرة:سيبني عمر
انا:ياخي أنا نجم نرقد...من غير ما نشم ريحتك
زهرة:أما تنجم تخليني وحدي
أنا:زهرتي...نعرف لي صار غالط...ساعات منجمش نتحكم في غشي...و تعرف بالقدا حساسية الموضوع بالنسبة ليا
زهرة:و باش تبقى تجاهلني ديما
انا:ما عندك حتى علاقة يا روحي...منحبكش تربط كلشي خايب بيك إنتي
تلفتت عندي بالوقت...و طلعت راسها غزرتلي ندرا كيف...و ضيقت عينيها تحكي
زهرة:ملا شبيك ؟
مديت يدي عديتها على ظهرها...جبدتها عندي أكثر نحكي
انا:قبيل كلمتني هند...قالت لي بابا شد صحيح في الحكاية
زهرة:حكاية العرس مرة أخرى
انا:مممم
زهرة:و شنية الحل توا ؟
أنا:منعرفش...صدقني منعرفش...و مستحيل نرجع لغديكا مرة أخرى
زهرة:عمر...صحيح خليت كلشي وراك...أما متنجمش تنسى لهوماا عيلتك زادة...كان شديت صحيح في قرارك...أختك باش تضيع في وسطهم
أنا:مانيش باش نخليها...أكيد فما حل
زهرة:و أمك عمر...ياخي مفكرتش فيها أنت...أمك أكيد بحاجتك...و بوك زادة...حتى كان غلط معاك...في بالو أكا الطريقة الصحيحة...خاطرو تربى عليها...كان أنت وقفت قدامو عمر...أكيد باش يسامحك...انسى غشك و ارجعلهم...متعرفش على الدنيا...سامحهم و أطلب سماح منهم...مدامهم حيين...أحسن ما تعيش بتأنيب ضمير طول عمرك كيفي انا
عديت عينيا على وجها...و تنهدت بقوة...نحكي
أنا:ششش إنتي ما عندك حتى ذنب في لي صار
زهرة:و أنت زادة ما عندك حتى ذنب
أنا:تهنى يا روحي...هند باش تكون مليحة
زهرة:مدامك أنت باش تكون معاها...أكيد باش تكون مليحة
أنا:و أنا نرتاح بيك إنتي كهو
كبست عليها اكثر...و قلبتها تحتي...قحرتلي تحكي
زهرة:فاش تعمل ؟
أنا:في رايك إنتي ؟
زهرة:مزلت متغشة منك
أنا:تو نرضيك بطريقتي
زهرة:منحبش
أنا:متأكدة
جات باش تحكي..قصيت عليها...كي نزلت على شفايفها جبدت روحها شوية تحكي
زهرة:باش تسمعني مرة أخرى قبل ما تحكم عليا منحبكش تبعد عليا مرة أخرى...مهما كان السبب
أنا:و في رايك نجم نبعد عليك أنا
تبسمت ندرا كيف...روهجتني الفرخة...و مرة أخرى لقيت روحي غاطس فيها...و في حبها...منعرفش شنوة كان باش يصير فيا من غيرها...احسن شي الحكاية تحلت من غير مشاكل...عالأقل نرتاح عليها كي تحب تخرج وحدها...و لا كي تمشي تقرا...و أحسن شي باش تاخو عطلة على قريب...هكا نطمن عليها أكثر...عالأقل وقتها نجم نتلهى بهند أكثر و نشوف الحكاية وين باش توصل و لا شنوة مزال باش يعمل فينا سي عثمان...مرة أخرى.