🔸️حلقة 29
🔸️زهرة تحكي:
فقت الصباح بالسيف...نحس في راسي باش يطرشق من البكا لي بكيتو البارح...أصلا منعرفش كيفاش هزني نوم و غفيت...حليت القارد روب...و مديت يدي...لبست روبة في الأبيض...عند الركبة...رجعت شعري لتالي...و قعدت على حرف السرير...نحس في قلبي باش يخرج من بقعتو...النهار اللي هربت منو لقيت روحي فيه تهزيت و تحطيت على صوت تليفوني...مديت يدي بالسيف...هزيتو...كبست عليه و انا نغزر لنومروه..خذيت نفس و هزيت عليه...نسمع فيه يحكي
مراد:ز..زهرة...نعرف لإنتي تسمع فيا...كيما نعرف لمش بعيد...قاعدة تبكي توا...اما صدقني كلشي عملتو على خاطرك...سامحني يا روحي...سامحني على كل دمعة و سامحني على لي باش يصير زادة...كان فهمتني مرة وحدة برك...مستحيل كنا وصلنا لهوني...كان فهمت حبي ليك مرة وحدة...كان كبشت في يدي كي عادتك مستحيل كنت نوجعك هكا...و مهما صار صدقني باش نبقى نحبك لآخر نهار في عمري
غمضت عينيا بالقاوي...نزلو دموعي بالوقت...هزيت يدي بالسيف...عديتها على خدي نحكي
انا:ا انت اكثر حد تعرفني...انت ربيتني مراد..رغم كلشي كنت نقول هو مستحيل يأذيني...مستحيل يتعمد يوجعني..كان عندي أمل صغير أنو حبك ليا باش يمنعك تعمل هذا الكل...تعرف حاجة مراد...نحمد ربي إني محبيتكش...و إني مخنتش أمي على خاطرك و إلا كنت باش نندم حياتي الكل...حتى صورتك المليحة لي كانت في بالي...بدات تتمحى...حتى معادش نجم نذكر اسمك على لساني
مراد:ز زهرة...يا روحي...أسمعني
انا:مرسي برشا على كلشي عملتو معايا من قبل...و مرسي على لي باش يصير اليوم زادة...عالاقل المحامي متاعك يكون راضي...و تطمن انت لي ما صار بيني و بين عمر شي...يمكن الورقة هذيكا باش ترضيك...و ترضي غرورك
جا باش يحكي علقت عليه...و نزلت تليفون...دموعي نزلو اكثر...منعرفش على شنوة نبكي بالظبط...تخنقت و خايفة من اللي باش يصير...كبست بيديا على حرف الفرش...معادش نعرف شنوة نعمل بالظبط...حتى عمر حسيتو بعد عليا برشا بعد اخر ليلة جا فيها لهوني
حتى لفاك معادش نمشي...و عرفت من مريم انو فما شكون قاعد يقري في بلاصتو...و هوني معادش يجي برشا...دوب يسألني و يسكت...معادش نعرف علاه تبدل لهدرجة...تي حتى دوب يغزرلي...حتى الدات متاع اليوم عرفتها من مدام نورهان ام وائل...و عرفت منها انو حاولت تمنع الحكاية...اما شي اقوى منها...قالت لي باش نلقاها في الكلينيك...اصلا محبيتش نكلمو...و لا حتى نتعبو بالحكاية هاذي اكثر...مسحت دموعي
لبست كبوطي...هزيت تليفوني و فلوسي و نزلت...حتى حسام حسيتو متوتر...و ميحبش يغزرلي...مش فاهمة شبيه يتصرف بالطريقة هاذي...إعتذرت منهم و خرجت سكرت كبوطي...حسيت بيه كي شد الفران بالقاوي طلعت راسي نغزرلو...زمرلي باش نركب حسيت بغصة قوية تملكتني...اما منجمت نعمل شي قربت من الكرهبة بالسيف...حليت الباب و ركبت...يحكي بلا ما يغزرلي
عمر:بونجور
انا:صباح الخير
خدم الكرهبة و رجع لتالي...دورت راسي للبلار...بقينا ساكتين طول الثنية...كلما نقرب أكثر...خوفي يقوى أكثر مش خايفة من اللي باش يصير...خاطر نعرف لي ما صار حتى شي من اللي يحكي فيه مراد و المحامي متاعو...اما زادة متوقعتش باش يجي نهار و نتحط في موقف هكا...خاصة قدام عمر...حشمت من اللي قاعد يصير...حتى مريم مخبرتهاش عالنهار هذا...فقت من سرحتي...كي شد الفران بالقاوي...حسيت ببرودة في بدني الكل...كنت باش ننزل أما حبست...كي حط يدو على يدي...كبس عليا يحكي
عمر:حاولت نمنع الحكاية...اما منجمتش...حتى مدام نورهان ما نجمت تعمل شي
جبدت يدي منو...و غزرتلو في عينيه...تبسمت بالسيف نحكي
انا:عادي ما صار شي...دقيقة و تفوت
عمر:زهرة
انا:مسيو عمر...معادش فما وقت
هزلي براسو ايه...حليت الباب و نزلت...معادش نجم حتى نغزرلو...تي حتى هو حسيتو مش قد بعضو...يمكن بدا يندم خاطرو وحل معايا...سبقتو دخلت للكلينيك ساق لقدام و عشرة لتالي...قلبي نحسو باش ياقف
لقيت مدام نورهان غديكا...قربتلي بالزربة تحكي
نور:لباس عزيزتي ؟
أنا:لباس
نور:هاك متأخرة شوية...لازمك تدخل توا...الطبيب يستنى فيك
عينيا وساعو...جبدت روحي لتالي...غزرتلها نحكي
انا:ش..شتقصد بالطبيب ؟
نور:زهرة عزيزتي شبيك...مش فهمتك في الحكاية
أنا:ن..نعرف...أما مش على أساس طبيبة...شنوة لي صار
نور:منعرفش في الورقة فما اسم الدكتور ¤¤¤¤¤¤
أنا:ل لا مستحيل...منحبش نعدي...امانك طاطا نورهان اعمل حاجة
جمدت في بلاصتي و انا نسمع في الفرملية تحكي هزيتلها براسي لا...كبست على يدها نحكي
أنا:طاطا نورهان امانك...منحبش...أمانك اعمل حاجة منحبش ندخل عندو
نور:اهدا عيش بنتي
فرملية:مدموزال لازمك تدخل توا...هيا فيسع
طلعت راسي غزرتلو...وصل بالوقت...يغزرلنا مش فاهم...عقد حواجبو يحكي
عمر:شفما ؟
قربت منو بالزربة...شديتو من يدو...و طلعت راسي غزرتلو نحكي
انا:ع..عمر منحبش ندخل عندو...أمان منحبش طبيب يعدي عليا
عمر:طبيب شنية...شنية الحكاية مدام نورهان ؟
نور:منعرفش في الورق مقيد إسم الطبيب هذا...يعني القرار من المحكمة
عمر:لاااا مستحييييل...وين الطبيبة هوني ؟
فرميلة:مدموزال زهرة لازمك تدخل توا
كبشت في يدو اكثر...طلع راسو غزرلها...قحرلها يحكي
عمر:شكونك انتي باش دخلها بالسيف عليها ؟
انا:عممر امانك...منحبش...اعمل حاجة...متخليهش يمسني امانك
عمر:زهررة اهدا...متخافش
انا:ب..باهي
عمر؛مدام نورهان...اتصرف فيسع...خاطر مستحيل نخلي الطبيب لي هوني يعدي عليها
نور:باهي...تو نرجع
عمر:باهي
حط يدو على ظهري...حضني بالوقت...كبس عليا يحكي
عمر:يزززي اهدا...مستحيل يصير شي انتي متحبش عليه
انا:م..مش على اساس فما طبيبة هوني...شنوة اللي قاعد يصير...باز فما غلطة...مستحيل مراد يخلي طبيب يعدي عليا
منعرفش كيفاش خرج اسمو بين شفايفي...اما متأكدة لي مش باش تفوتو الحكاية هاذي...طول عمرو يجن وقت يقربلي راجل...متوقعتش باش يخلي طبيب يعدي عليا...جبد روحو مني بالوقت...كبس على زندي و قحرلي يحكي
عمر:مستحيل مش هكا...تحب نذكرك شكون وصلك لهوني...تعرف شمعناها لي قاعد يصير...اصلا كان جا راجل...ميشكش فيك جملة...و ميخليكش توصل لهوني يحب على ورقة باش يثبت انك ما عملت شي معايا
جبدت يدي منو بالوقت...وخرت لتالي مروهجة...نحكي
انا:ماكش مظطر تذكرني...نعرف كلشي...و نعرف لانا ما عملت شي...مع حتى حد
عمر:و تعرف زادة...لهو ماهوش باش يخلي طبيب يعدي عليك
انا:خاطر طول عمرو يجن وقت يقربلي حد...انت تعرف بالقدا شنوة كان يصير فيا جراير الحكايات هذوما..حتى هو ضربني على خاطرك...على خاطر هربت عندك
هز يدو عداها على وجهو بعصب...قربلي شوية...يحكي
عمر:زهرة اغزرلي هوني...اهدا احسنلك...من عند ربي شاد روحي بالسيف...معادش تجبد ¤¤¤¤ سيرتو قدامي...يزززززي
تهزيت و تحطيت على صوت صياحو...وخرت لتالي اكثر...اصلا معادش نعرف شبيه...و لا شنية سبب لي خلاه يتصرف معايا بالطريقة هاذي...دورت راسي نغزر لمدام نورهان طالعة...قلبي طاح بين ضلوعي...اول ما وصلت عندي...تبسمتلي تحكي
نور:ارتاح...تو جي طبيبة
انا:باهي عيشك طاطا
تلفت عندو...عدا يدو على شعرو بغزول...يمشي و يجي...ظاهر فيه مقلق عاللخر...معادش نعرف في شنوة نركز بالظبط...حبيتو يسندني في نهار هذا...مش يتصرف معايا بالطريقة هاذي...كيف ريت الفرملية تعيطلي مرة اخرى...ساقيا رزنو...خوف كبير حسيت بيه...قربتلي تحكي
نور:متخافش عزيزتي...لازمك تكون قوية
هزيتلها براسي ايه و تلفت شوية غزرتلو...للحظة غزرتو تبدلت...منعرفش علاه حسيتو خاف عليا...تبسمتلو نطمن فيه و لا في روحي منعرفش...نغزر لطبيبة...لي واقفة قدامي...جمدت في بلاصتي...تهزيت و تحطيت وقت سكرت الباب ورايا...تحكي
هي:تفضل مدموزال
قربت من السرير بالسيف...منجمتش حتى نغزر في وجها...تسطحت لتالي...و سكرت عينيا...حليتهم كان وقت وفا كلشي...دمعة غلبتني و تغلغلت وسط شعري هزيت روحي بالسيف...ريقلت دبشي...و غزرتلها نحكي
انا:ل..لباس ؟
هزتلي براسها ايه...من غير حتى كلمة...قربت منها باش نهز الورقة...غزرتلي تحكي
هي:خلي المحامية متاعك تدخل
انا:ع..علاه ؟
هي:مدموزال قاعدة نتبع في القوانين و كهو...تنجم تخرج انتي
انا:باهي
خذيت نفس و حليت الباب...جات عيني في عينو..نزلت راسي بالوقت...حشمت منو عاللخر...قربت مني مدام نورهان...حطت يدها على خدي تحكي
نور:لباس عزيزتي ؟
هزيتلها براسي ايه...نحس الكلام وحل في حلقي غزرتلها نحكي
انا:ط..طبيبة تحب تشوفك توا
نور:باهي برا اقعد
عمر:لحظة انا باش ندخل معاك
نور:باهي تفضل
جبدت روحي منها...و قربت قعدت عالكرسي...نحس في بدني مهدود حتى النفس نجبد فيه بالسيف...غزرلي ندرا كيف و دخل...تكيت راسي لتالي...و سكرت عينيا نحب نفسخ النهار هذا من ذاكرتي...نحب ننساه جملة عالأقل هكا الكل باش يرتاح...مراد و عمر...و الناس الكل...اما الوجيعة و القهرة لي حاسة بيها توا...مستحيل حد ينجم يفهمها...و لا يحس بيا
أنت تقرأ
زهرة🌸
Aléatoire🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
