زهرة🌸

الحلقة مئة و الرابعة عشر

🔸️حلقة 114
🔸️هند_تحكي:
هزيت الفاست متاعي في يدي...و نزلت اللوطة...من وقت مشى عمر و هز ريحان معاه...وليت على اعصابي اكثر...و معادش نطيق الفيلا هاذي جملة...معادش نجم نتحمل الوضع هذا اكثر من هكا...معادش نجم نبقى من غيرهم...لا عمر و لا حتى مصطفى...يمكن الحاجة الوحيدة لي خلاتني نرتاح انو آسيا باش ترجع تقرا معايا...عالأقل معادش نحس بالوحدة لي أنا فيها..غزرت لساعة و نزلت الدروج نجري...عرفت روحي باش نوخر عليه...اصلا مش مصدقة لي هو ماخو على قد عقلي و يعلم فيا في التصوير...برغم انها حاجة مكانتش في بالي من قبل...اما مع الوقت لقيت روحي بديت نتعلق بيها...من قبل مكانش عندي اصحاب من غير آسيا...و مش بالعادة نقبل صحبة حد...خاصة بعد الحكاية لي تعدات عليا مع مراد...و اني لتوا منجمتش نتخلص من الوجيعة هذيكا...اما كريم علاقتي بيه مختلفة..منعرفش شنية الحاجة لي تربطني بيه...اما لي نعرفو اني مرتاحة معاه...عالاقل بعد اللي تعدا عليا الكل...نجمت نلقى حد نجم نحكي معاه بعيد على مشاكلي و الظغط لأنا فيه أول ما وصلت للباب...وقفتني أمي تحكي
أمي:وين على الصباح ؟
أنا:باش نبدل جو و نرجع
أمي:مش على أساس اليوم عطلة ؟
أنا:و أنا قتلك باش نبدل جو و نرجع
أمي:باش تمشي بحذا آسيا ؟ مزال عندكم مفاجآت أخرى
أنا:مانيش ماشية عندها...و ما عندي حتى شي ليكم نظن وقيت باش تراجع روحك انتي و بابا
أمي:هننند...انتبه لكلامك أحسنلك
أنا:تعرف حاجة امي...يا ريت نجم نمشي كيما عمر و مصطفى...و لا عالاقل واحد منهم يهزني معاه...على خاطر معادش نجم نتحمل العيشة معااكم
أمي:برااا أرجع لبيييتك فييسع
انا:انتي خسرت بنتك زادة...حط هذا في حسابك
أمي:هننند
خذيت نفس و حليت الباب...من غير ما نعاود نجاوبها من اللي كنت نزرب في خطواتي وليت نجري...و من دمعة ولات دموع...عمري ما توقعت انو امي تكون هكا...و لا عندها نفس تفكير بابا...طول عمري كنت نستخايلها تخمم فينا قبل روحها...لتوا منعرفش علاش عملت في زهرة اكاكا...و توا آسيا...الطفلة لي تربات معايا و عاشت معايا زادة...و تعرف بالقدا انها ماهيش باش تلقى أحسن منها لولدها...اما رغم هكا قعدت تغزر للعباد بحقرة...تقدر لي كيفها و تحقر لي تحتها...يمكن هذا اكثر شي وجعني في الحكاية...انها طلعت كيما بابا بالظبط...و الاهم امو حبها لعمر عماها...و لتوا مفكرة انو زهرة فكتها منها...حبست بعد ما حسيت اني بعدت على دار...و مديت يديا زوز...مسحت دموعي...و خذيت نفس طويل...نهدي بيه في روحي...و جبدت تليفوني غزرت للوقت...و للمكالمات لي فاتتني...قربت لطريق حبست طاكسي...و بعثتلو ميساج بالوقت...تكيت لتالي...و نزلت البلار...نحس في روحي تاعبة و نفسيتي اكثر...معاد عيني في حتى شي...كنت نعرف من قبل اني مكنتش عايشة حياة مثالية رغم اني البنت الوحيدة لعثمان بن قاسم...اما توا تأكدت انو كل بلاصة يتواجد فيها بابا...يبدا هو الجلاد و الناس لي تحتو هوما الضحية...و رغم انو قرار عمر و مصطفى يظهر غالط لناس...اما هو اكثر حل خلصهم من لعنة بابا...لي مزلت مربوطة بيها لتوا...حتى اني قبل ستخايلت وجود مراد في حياتي صدفة حلوة...اما حتى هو طلع اكبر كذبة زادة...و آخر حاجة توقعتها اني نكون مجرد طعم بالنسبة ليه...باش يرجع المرا لي يحبها...تنهدت بقوة نحاول نطرد افكار الماضي لي هدت عليا...و حاجات منحبش نسترجعهم في ذاكرتي...و لا حتى نخليهم يأثرو على حياتي اكثر...محسيتش بالوقت كيفاه تعدا و لا حتى امتى وصل...حطيت الفلوس في يدو و نزلت هزيت راسي نغزرلو...واقف بحذا الكافي متاع عم لطيف...اصلا البلاصة الوحيدة لي نتلاقى معاه فيها خذيت نفس...كبست على صاكي و قربت منو...تبسمت برغم نحس في روحي مش قد بعضي...نحكي
انا:سامحني طولت عليك
كريم:لباس ماهو ؟ صارت معاك حاجة ؟
هزيتلو براسي لا...سؤال هذا بالظبط...يمكن يدخلني في حالة اكثر من اللي انا فيها...يمكن على خاطر نحب شكون يسمعني...كيما كانت آسيا قبل...اما حتى هي لاهية في مشاكلها و في حياتها...تبسملي يحكي
كريم:هيا ايجا نشربو حاجة قبل ما نمشو
انا:مش لازم
كريم:عم لطيف يستنى فيك...اونفان حالتك متسمحش باش نمشو توا
هزيتلو براسي ايه...من غير ما نزيد كلمة اخرى...بالرسمي حالتي متسمحش حتى باش ناقف اكثر...حلي الباب دخلت...دوب سلمت على عم لطيف...و قعدت في طاولة العادة...جبد الكرسي و قعد مقابلني دقايق و احنا ساكتين...حتى الكلام نحسو رزن على لساني...نحس في روحي ضايعة و مش قد بعضي مشى في بالي باش نتفرهد بيها الخرجة...ياخي حرمتها عليه و على روحي...غزرلي ندرا كيف يحكي
كريم:هند...شنية لي صار ؟ و شبي حالتك هكا
انا:حتى شي...لباس عليا
كريم:متأكدة ؟
هزيتلو براسي ايه...و الغصة لي كانت واحلة في حلقي...خلات دموعي تنزل مرة اخرى...بالسيف عليا...اصلا منعرفش شبيني اليوم...و لا علاش منجمتش نكبس روحي قدامو...مسحت دموعي...و هزيت روحي وقفت نحكي
انا:لازمني نمشي توا
وقف في وجهي...قبل ما نعمل الخطوة...هزيت راسي شوية...غزرتلو...تنهد بالقاوي يحكي
كريم:ارجع لبلاصتك
انا:ك..كريم...خليني نمشي امانك
كريم:اقعد هند
جبدلي الكرسي شوية...منعرفش كيفاش استسلمت لكلامو و قعدت...جبد الكرسي لاخر...و قعد مقابلني بالظبط...دورت وجهي شوية...منحبش نغزرلو...رغم اني نعرفو من شهرين او اكثر...اما منعرفش علاش الايمات هذوما حسيت روحي تعلقت بيه اكثر...هزيت راسي شوية على صوتو يحكي
كريم:شنية لي مقلقك ؟
انا:كريم
كريم:نسمع فيك ؟
انا:ياخي انت زادة تشوف فيا طفلة خايبة ؟
كريم:علاش سؤال هذا ؟
انا:منعرفش...جاوبني و كهو
كريم:محسيتش لانتي قاعدة تظلم في روحك ؟
انا:هذا رايك انت ؟
كريم:سمعت العكس انتي ؟
هزيتلو براسي ايه...و خذيت نفس طويل...نحكي
انا:م..مسمعتش...اما حسيت
كريم:شنية عملك باش خلاك تحس هكا ؟
عديت عينيا على وجهو...مستغربة من سؤال متاعو...تنهد بالقاوي يحكي
كريم:منقصدش نقلقك بسؤالي...اما نحب نطمنك انو احساسك بروحك غالط
انا:انت هكا رايك
كريم:ممم...اما كان تحب تحكي من شنية موجوعة و سبب دموع هذوما...هاني نسمع فيك
انا:نحس في روحي وحدي...و تاعبة من فكرة اني نبقى وحدي في الاخير
كريم:شنية سبب لي خلاك تحس هكا
انا:عيلتي السبب الاول
كريم:و الثاني ؟
نزلت عينيا من وجهو...منحبش نتذكر لي صار مع مراد...قد ما حسيت روحي نحبو...لقيت روحي نكره سيرتو...حتى اسمو...كان و باش يبقى اكبر ضربة في حياتي...و اقوى وجيعة احتلت قلبي...عديت يدي على خدي نحكي
انا:السبب الثاني ؟
كريم:مانيش باش نجبرك تحكيلي...اما مهما كان السبب و مهما كان الشخص هذا لي وجعك...هو الخاسر في الاخير
وحل الكلام في لساني...بعد لي سمعتو منو...منعرفش علاش حبيت طريقة كلامو معايا...حتى منعرفش علاش موسع بالو معايا و يسمع فيا...دوب تبسمت نحكي
انا:هذا رايك انت ؟
كريم:ممم و في راايي زادة...حتى حد ما يستهل الدموع هذوما
انا:حتى عيلتي ؟
كريم:هند اسمعني...منعرفش شنية مشكلتك مع عيلتك...اما في الاخير باش تتحل صدقني
انا:بابا فرقنا...من بكري مش من توا...كل مرة نقول لي لحق الوقت باش نعيش مع خواتي زوز...نلقى روحي وحدي
كريم:باش تحافظ على عيلتك...تلقى روحك خسرت برشا حاجات
انا:ميكفيش لي خسرتو لتوا ؟
كريم:انتي ما عندك حتى ذنب في اللي صار...و ماكش مظطرة تحاسب روحك على حتى شي
انا:و انت وين عيلتك ؟
كريم:انا فقدت العيلة لي تحكي عليها...ليا سنين
انا:تقصد لانت معندكش عيلة ؟
كريم:عندي...فما خويا و امي زادة
انا:وينهم...و شبيك قتلي خسرتهم ؟
تعدلت في قعدتي و تلفت عندو...منعرفش اصلا علاش سألتو...و لا حتى علاش نحب نسمع جوابو...تبسم على جنب يحكي
كريم:امي...مشلولة...يعني لا تتحرك و لا تتكلم زادة
انا:س..سامحني...كريم...ا..انا
كريم:عادي...امي ليها سنين و هي عالحالة هاذي
انا:باهي و خوك وينو ؟
كريم:تنجم تقول انو خويا رباني...اما مع الوقت...معادش نحس بوجودو في حياتي برشا...يعني امور الخدمة و الدنيا لهاتنا على بعضنا ؟
انا:اما مزلت تحب خوك مش هكا ؟
ضحك...ضحكة خفيفة...و غزرلي ندرا كيف...يحكي
كريم:اكيد يا صغرونة...اللي بيني و بينو...اكثر من علاقة اخوة
انا:باهي برشا...حتى انا مع خواتي نفس شي
كريم:ريت مدام علاقتك باهية معاهم...معادش تقلق روحك بحاجات فارغة...اصلا منظنش فما شكون ينجم يستغنى عليك
انا:ههههههههه مش لهدرجة
كريم:عندك حق...لي يراك و انتي مستلمتني نهارتها...باش ياخو فكرة غالطة عليك
انا:بربي سي كريم ؟
كريم:هاذي الحقيقة عزيزتي
قحرتلو و دورت وجهي...ضحك بالقاوي...و عدا يدو على شعري يحكي
كريم:شنية تحب تشرب ؟
انا:مانيش نحكي معاك...كي يجي عم لطيف تو نطلب منو وحدي
كريم:بربي
انا:مش انت ماخو عليا فكرة غالطة ؟
كريم:باش تقلب عليا الطرح يا فرخة...اونفان اذا بقيت متغشة باش تفوت عليك التصوير اليوم
انا:مش لازم نحكي معاك...يعني تنجم تعلمني و انت متحكيش معايا
كريم:بااهي منقصدش لي قلتو...اما زادة كلامي صحيح
انا:كرييم...ياخي فما شكون يعتذر بالطريقة هاذي
كريم:باهي سامحني
انا:باهي...اما نحب على نفس كاسة الشكولاطة كي العادة
كريم:مش على اساس باش تاخو من عند عم لطيف
ضحكت بالوقت...منعرفش علاش حسيت روحي تفرهدت بعد ما حكيت معاه...و حتى في محاولاتو باش يرضيني...بلبز دنيا...تكيت لتالي نحكي
انا:باهي سي كريم...اما كان مفماش مانع...تنجم تطلب في بلاصتي
كريم:تدلل...اصلا هوكا جايبها من غير ما نطب
تبسمت و انا نغزر لعم لطيف و هو جاي لعندنا...حط الكاسة عالطاولة...و غزرلي يحكي
لطيف:خليك ديما تضحك عزيزتي
انا:عيشك عم لطيف
كريم:هاك فكيت بلاصتي لالة
انا:غااير مني ياخي ؟
كريم:لا اما خايف المرة الجاية ميخلينيش ندخل من غيرك
لطيف:فكرة حلوة...باش متبقاش وحدك ديما
كريم:عم لطيف
لطيف:صحة و بالشفا
انا:عيشك
اول ما مشى...كبست عالكاسة في يدي...و تلفت عندو نحكي
انا:شيقصد بكلامو ؟
كريم:شنوة ؟
انا:تعرف شنية نقصد
كريم:انتي اول وحدة نجي معاها لهوني
انا:بالرسمي ؟
كريم:مممم هيا كمل شكولاطة متاعك...عندنا وين نمشو
انا:وين ؟
كريم:مفاجأة
انا:نحب نعرف توا
كريم:من غير ما تكبش...و كمل لي في يدك ساعة
انا:بااهي
عوجت و فمي...و كبست عالكاسة اكثر...منعرفش شنية السر ورا البنة هاذي...اما ديما نحسو يحضرلي كاستي بطريقة سبيسيال...ضربة زوز نهز راسي نغزرلو...لاهي في تليفون...منعرفش مع شكون...فرد وقت مروهجة من فكرة اني اول وحدة يجي معاها لهوني...اصلا آخر حاجة توقعت اني نسمعها من عم لطيف...خاصة حد كيف كريم...منعرفش كيفاش كملت شكولاطة متاعي...هزيت راسي غزرتلو نحكي
انا:هاني كملت
هز راسو غزرلي و ضحك...ضيقت عينيا مستغربة...مد يدو هز بابيي من الطاولة...و عداه على شفايفي...فازة روهجتني...و خلاتني نحشم على روحي اكثر...حطها من يدو يحكي
كريم:هيا قوم ملا
انا:وين الكاميرا متاعك ؟
كريم:في الكرهبة
انا:باهي
هزيت روحي خلطت عليه لبرا...بعد ما ودعنا عم لطيف...تلفت عندي يحكي
كريم:اركب
انا:ب..بلاصة بعيدة لهدرجة ؟ نقصد لازم نمشو بالكرهبة
كريم:كان تحب نشدو طاكسي
انا:لا عادي
حليت الباب ركبت بجنبو...رغم اني منعرفش تفاصيلو بالقدا...اما بعد اللي عملو معايا الكل...مستحيل نشك لي هو ينجم يضرني...بقيت طول الثنية ساكتة...كاني نحب نكتشف تونس اكثر...اما آخر شي توقعتو بعد ما نزلت من الكرهبة انو يجيبني للبلاصة لي عجبتني في تصاور نهارتها...تلفت عندو...نحكي
انا:كريم...شنية لي قاعد يصير ياخي ؟
كريم:حبيتك تشوف البلاصة بعينيك
سيبت الباب...و قربت بالزربة نغزر للبحر من فوق...اصلا نسيت حكاية التصوير جملة...دورت راسي نغزرلو...نحكي
انا:نحب ننزل لوطة
كريم:باهي تفضل
تبسمت بالوقت...و هزيت روحي نمشي بالزربة...خليتو ورايا...منعرفش على روحي كيفاه وصلت اللوطة...نحيت الكونفارس متاعي...و هزيت سروالي شوية...و قربت لشط...النسمة الخفيفة لي ضربت على وجهي فرهدتني...الما لي حسيتو وصل لساقيا...عطاني قوة جديدة...يمكن هذا لي كنت نحتاجو من قبل...لحظة صفا بيني و بين روحي...تلفت باش ناديلو...لقيت الكاميرا في وجهي...منعرفش قداش من مرة صورني...اصلا اول ما تلفت خذا تصويرة اخرى بالوقت...قربت منو...نحكي
انا:نحب نشوفهم
كريم:مش توا
انا:امااان
كريم:من غير ما تشد صحيح
نفخت بالقاوي...و تلفت باش تمشي...اما كبسة يدو على يدي منعتني...و رجعتني لتالي...دورت راسي غزرتلو...تروهجت من قربو و من المسافة القليلة لي تفصلنا...من غزرتو لي تركزت في وجهي...حاولت نحكي...اما حسيت الكلام هرب مني...و الحروف وحلت على طرف لساني...بلعت ريقي و بلعت معاه اللي باش نقولو...حتى باش نجبد روحي منو...بدني مش مطاوعني...و للحظة لقيت روحي سارحة في تفاصيل وجهو...لون عينيه لي مش مفهوم...لحيتو لي هايجة غير العادة...ملامحو تقول انو هو زادة مقلق من حاجة و يمكن عندو مشاكلو الخاصة...اما رغم هكا قعد معايا سمعني و ضحكني زادة...جيت باش نحكي...اما سبقني كي تبسم يحكي
كريم:مش تحب تتعلم...و لا معادش لازم ؟
انا:نحب
كريم:باهي شد عليا ملا
مديت يديا زوز...شديت الكاميرا من يدو...و تلفت عطيتو بظهري...نسمع فيه يحكي
كريم:باش تحاول تاخو صورة للمنظر بأبعاد ثلاثية
انا:شقصدك ؟
كريم:نقصد باش تاخو تصويرة للبحر و السما...و لليوت لي في الوسط غديكا
انا:كيفاش هكا ؟
كريم:اقف هوني...و ركز لبعيد
وقف ورايا بالظبط...و مد يدو شوية...حط صوابعو تحت دقنونتي و هزلي راسي شوية يحكي
كريم:ركز توا
انا:هاني نشوف كيما طلبت مني
كريم:صحيت
جيت باش نحكي...اما سكت بعد ما حسيت بيديه زوز لي تحطو فوق يديا...كبستهم و قربو مني من تالي...خلاني نفقد تركيزي...نزل عليا شوية يحكي
كريم:توا تنجم تاخو تصويرة كيما تصورتها في مخك
رخف يديه عليا...و جبد روحو شوية...غمضت عينيا بالقاوي و عاودت حليتهم...كبست روحي...و خذيت تصويرة لي قالي عليها...نزلت الكاميرا شوية نغزرلها...هوكا طلعت كيما حبيت عليها بالظبط...ضحكت بالوقت و تلفت عندو...نحكي
انا:شووووف....طلعت كيما متاااعك
نزل راسو شوية يغزر لتصويرة...هزيت عينيا في وجهو...نستنى في ردة فعلو...عوجت فمي نحكي
انا:مش كيما متاعك...ميسالش نعاودها مرة اخرى ؟ يا كريم قول حاجة شبيك
كريم:سافا تعدي روحها
انا:امااان...شناقصها هي ؟
هزيت راسي باش نفهم شيقصد بكلامو...اما غزرتو خلاتني نسكت مرة اخرى...يدو لي تمدت و بعدتلي خصلات شعري لي مقلقتني لتالي...خلاتني نكبس عالكاميرا اكثر...و نزلت على شفتي شوية...نحكي
انا:ميسالش نعاودها ياخي ؟
خصلات شعري لي قعدو بين صوابعو...و المسافة القليلة لي تفصلنا...انفاسو لي بديت نحس بيها على وجهي...حاجات خلاتني نفقد تركيزي...و منجمش نستوعب لي قاعد يصير...لميت طرف القوة لي عندي...و خذيت نفس نحكي
انا:ك..كريم...تسمع فيا ياخي...نحب ن..ناخو..ت
سكت كي حسيت بشفايفو لي كسرت الحاجز لي بيناتنا و تحطت فوق شفايفي...عينيا وساعو...و بدني رزن عليا...دقات قلبي قوات اكثر...و مفهمتش شنية لي قاعد يصير معايا...في الحالة العادية نورمالمون ندزو و نبعدو عليا...اما حاجة اقوى مني خلاتني مسلمة...و جزء مني يستنى في كمالة اللي باش يصير...يدو لاخرى لي زادت تحطت على خدي...و شفايفو لي كانو دوب محطوطين احتلو شفايفي في لحظة...طاحت الكاميرا من يدي عالرمل...غمضت عينيا و استسلمت لاحساسي معاه رغم انو ولا مرة توقعت انو الامور باش توصل بيناتنا لهوني اصلا عمري ما توقعت انو اول بوسة في حياتي باش تكون بالطريقة هاذي...على غفلة...من شخص منعرفش شكون بالنسبة ليا...و لي كل مرة نكون معاه نقاوم احساسي...باش منعاودش نغلط مرة اخرى...و لي صار عليا قبل منخليهش يتعاود...اما توا بالظبط...اعترفت باحساسي معاه...رغم اني منعرفش اذا لي صار بيناتنا صحيح و لا غالط...يجي و لا ميجيش...حتى منعرفش شنية طبيعة علاقتنا و لا حتى كيفاه باش تكون بعد اللي صار توا...دوب رخف على شفايفي شوية...يدي تمدت و كبس على طرف الفاست متاعو...محاولة مني باش نوازن روحي...على خاطر ياقيا رزنو و معادش نجم ناقف عليهم اكثر...فرد وقت منجمتش نهز عينيا في وجهو...و معرفتش شنية نعمل بالظبط...حسيت بيه كي تنهد بالقاوي...وين دخلت بعضي اكثر...صوابعو لي تغرست في وسط شعري...سكرت عليا النفس أكثر...نزل عليا شوية...باسني من جبيني يحكي
كريم:هند
غمضت عينيا بالقاوي...منحبش نسمعو...و منحبش نغزرلو زادة...طلعلي راسي شوية...يحكي
كريم:اغزرلي هوني
تقويت على روحي...و حليتي عينيا على وجهو و غزرة عينيه...رجعلي خصلات شعري مرة اخرى...و تنفس بقوة يحكي
كريم:متحشمش مني...نعرف لي صار توا ميجيش و مش وقتو...اما مانيش نادم عليه...و ماهوش استغلال...انا حبيتك من اول مرة ريتك فيها...منعرفش شنية لي قاعد يصير معايا بالظبط...اما نحبك تكون موجودة في حياتي
جبدت يدي منو و وخرت خطوة لتالي...خايفة منو يحس بدقات قلبي...لي نحس فيها باش تفضحني...نزلت راسي مروهجة...شي من اللي صار و شي من كلامو...و اكثر شي من اللي تعدا عليا في الماضي...و صورة مراد لي وقفت بيناتنا...هو زادة كان قريب مني برشا...هو زادة كان يحسسني اني غير لبنات الكل...اما ولى مرة كان كلامو صحيح...و لا مرة غزرلي...كنت مجرد طعم بالنسبة ليه...اصلا مستحيل ينجم حد يحبني...و اكيد باش يخليني هو زادة...حتى بابا كان يحاول يلقى فرصة و يستغلني...كان ينجم يعرسلي باي حد مقابل انو نفوذو تزيد أكثر...دموعي لي تحصرت نزلت بالسيف عليا...قربلي من غير ما يزيد معايا كلمة وحدة...و في لحظة لقيت روحي بين يديه...عنقني بالقاوي...يحكي
كريم:يززي كهو...منقصدش باش نوصلك للحالة هاذي...حتى تنجم تنسى الكلام لي قلتو الكل
انا:ر..روح بيا امانك
جبد روحو شوية...مسحلي دموعي...و غزرلي ندرا كيف يحكي
كريم:ماكش مجبورة على حتى شي...و كان فما شكون في حياتك...مانيش باش نقلقك مرة اخرى...و شي ماهو باش يتبدل في صحبتنا
خذيت نفس و نزلت عينيا من وجهو...منجمتش نجاوبو...و منجمتش نقولو لي مفما حتى حد في حياتي...اما موجوعة...فما شكون استغلني...على خاطرني كنت دغفة و تبعت احساسي معاه...و كنت نجم نغلط اكثر...كان هو مبعدش عليا في الوقت المناسب...يمكن راني خسرت روحي معاه...مع راجل يحب مرت خويا و عمرو ما غزرلي بشطر عين...برشا كلام نحس فيه خانقني...منجمش حتى نحكي فيه مع روحي...كلام قاعد يوجع فيا شهور...في كل مرة نغزر لعمر و لا لزهرة...نفسيتي ماشية و تتعب اكثر...و حتى كان جا كلامو صحيح...منحبوش يوحل في مشاكلي...و مع عيلتي...منحبش نخليه يعيش المد و الجزر متاعي...يمكن محتاجة اني نبرا من الوجيعة لي داخلي...قبل ما نبدا صفحة جديدة...عديت يدي على خدي و تنهدت بالقاوي نحكي
انا:ب..باهي كريم...اعتبر انو ما صار شي
كريم:باهي...خلينا نمشو ملا
هزيتلو براسي ايه...و دورت راسي نغزرل لشكون يبيع في غزل البنات...بعيد علينا...عينيا وساعو و نسيت لي صار معانا الكل...شاورتلو بيدي...نحكي
انا:كرييم شوووف
هز راسو يتبع فيا...غزرتلو و قربت منو شوية...نحكي
انا:نحب منها قبل ما نمشووو...امااانك
كريم:باهي لالة تفضل
انا:جووو
خليتو ورايا...هزيت الكونفارس متاعي في يدي...و قربت بالزربة...جاب ربي الشط فارغ...و الا منعرفش شنية كان باش يصير اكثر...حتى منعرفش اذا انا بالرسمي نحب على غزل البنات و لا نحب نهرب منو و من اللي صار...قربت منو و طلبت وحدة كبيرة...ضحك و هو يعمل فيها...تلفت نغزرلو ماشي و يقرب مني...ضيقت عينيا نحكي
انا:تحب انت زادة ؟
كريم:لا
انا:على راحتك...اصلا ماهيش باش تناسبك
كريم:صااار
انا:مممم
تلفت شديتها عليها...عاملة بيها جو...خليتو خلصها...و جبدت روحي لتالي نحكي
انا:متأكد متحبش تاكول
كريم:لا عزيزتي...صحة ليك
انا:باهي امورك
كريم:كملها و ايجا نفطرو في ريستو لي الفوق
انا:باهي
محبيتش نرفض...يمكن على خاطر حسيت روحي كثرتلها...و محقنيش نتصرف معاه اكاكا...باقي يمشي ورايا...من غير حتى كلمة...يمكن لي صار خلانا زوز نخمو بطريقة اخرى...رفضي ليه كان عندو سبب بالنسبة ليا...اما هو باقي يفركس على الاجابات لي تريحو...اما رغم هذا الكل...مزلت مروهجة من بوستو و من قربو مني...مزلت نحس في دقات قلبي باش تفضحني...و الغريبة انو حتى انا مانيش نادمة...اما منجمت نعترف بحتى شي في حضورو...فطرنا عالساكت...اصلا بعد لي صار...حسيتو مش قد بعضو...و حتى انا منجمتش نتصرف على طبيعتي اكثر من هكا...اول ما كملنا...غزرتلو نحكي
انا:هاني نستنى فيك برا
كريم:متبعدش
انا:باهي
حليت الباب و خرجت...قربت شوية نغزر للمنظر من فوق...فرد وقت نتذكر في لي صار معانا ساعتين لتالي...مديت يدي حطيتها على قلبي...يمكن انا زادة من حقي ناخو فرصة اخرى...من غير ما نخمم في الماضي...و لا في اللي صار معايا...بلكشي احساسو كان صادق معاايا و ماهوش باش يخليني...و كلام عم لطيف...اكدلي شوية من اللي نخمم فيه...صحيح منجم نحكي معاه حتى شي توا...اما المرة هاذي باش نحاول نتبع احساسي و كهو...ضيقت عينيا و تلفت على صوت فران قوي...نغزر لكرهبة كحلة حبست في وجهي...قبل ما نستوعب شنية لي قاعد يصير...تحل الباب...و لقيت زوز رجال في وجهي...يديهم القوية كبست عليا و جرتني لعندها...صحت فرد صيحة نعيط باسم كريم...و قبل ما يخرج لقيت روحي في نص الكرهبة...تلفت بالوقت نغزرلو من البلار...يجري ورا الكرهبة و ينادي باسمي...مديت يدي نستنجد فيه و نعيط بكل قوتي...دموعي نزلو بالوقت...وقت حسيت بالكرهبة بعدت اكثر...تلفت عندهم...ندز فيهم من الشيرتين و نصيح فرد وقت...بدني ترخف من البابيي لي تحط في خشمي...عينيا تسكرو...و كل قطعة في بدني تخدرت...و قبل ما نستوعب شكون خطفني و شنية اللي قاعد يصير...لقيت روحي في المجهول و اللامكان...بير غامق...ظلمة محاوطتني...و الله اعلم شنية باش يصير فيا...و على شنية باش نحل عينيا المرة هاذي