زهرة🌸

الحلقة الواحدة و الستون

حلقة 61
🔸️زهرة تحكي:
عدلت الفرش...و دخلت لبيت البانو...عملت دوش تفرهدت بيه...تعدات تقريبا شهرين اخرى هوني...بقى تقريب اسبوعين و تبدا القراية...هذا اكثر شي مصبرني بدلت دبشي و شيحت شعري...قص عليا صوت تليفوني ضيقت عينيا نغزر لنومرو جديد...هزيت بالوقت...نحكي
انا:الووو...الووو...شكوون معايا ؟
نزلت تليفون شوية...كي حد ما رد عليا...علق بالوقت طيشتو عالسرير...و خرجت...بما انو الويكاند اليوم باز هند في بيتها...عالاقل نهز من عندها سيشوار...احسن شي ما لقيت حد برا...طلعت لبيتها...قبل ما نوصل ضيقت عينيا كي حسيت بحركة في بيت عمر القديمة قربت شوية...و مديت يدي كملت حليت الباب...غزرتلها مستغربة...نحكي
انا:فاش تعمل ياخي ؟
سلمى:انا لي باش نسألك...شتعمل هوني ؟
انا:كان نسيت خليني نذكرك عزيزتي سلمى...البيت هاذي متاع عمر...و عمر راجلي انا...معناها سؤالك ماهوش في محلو جملة
سلمى:ميسالش خليني نذكرك...انك مجرد ضيفة عندنا معناها من غير ما تتعدا حدودك
انا:حدودي نعرفها بالقدا...و نعرف وين انا بالظبط...اللي لازم تحطو في مخك...انو حتى حد احسن من حد في القصر هذا...كيما قاعدة نحترم فيك...مجبورة تحترمني انتي زادة...باهي
كبست عالمنشفة...و جيت باش نخرج...اول ما وصلت للباب...وقفت على صوتها تحكي
سلمى:اخرج منها عاد...لي كيفك معروفين...اما صراحة برافو...عرفت كيفاش تخلي عمر يتعلق بيك...و يخلي خطيبتو...كيما عرفت توصل و تعيش في بلاصة متحلمش بيها...اما زادة ينجم كلشي يطير من يدك في لحظة عزيزتي...و انتي هوني مجرد كنة و كهو
تبسمت على جنب...و تلفت عندها...جات عيني في عينها...خذيت نفس و قربت منها...وقفت قدامها بالظبط نحكي
انا:هذا لي هامك انتي...القصر و الفلوس...حط في بالك لالة سلمى...القصر لي عشت فيه انا و الكراهب لي ركبتهم...و الفلوس لي كنت عافسة عليهم...انتي متنجمش حتى تحلم بيهم...اما هذا الكل عمرو ما فرحني بالعكس...انا فرحت كي لقيت حب حياتي...لهو عمر ولد خالتك...و ماهوش ذنبي كي هو منجمش يحبك سلمى...يزززي عاد...انا شالقة بالحكاية من اول مرة جيت لهوني...كان سكتلك توا...على خاطر عمر و كهو...متلزنيش نخسر صورتك قدامو...هو مرجعش لعندك...رجع لعيلتو...و انا فرد من العيلة هاذي زادة...و مهما عملت و مهما قلت...ماكش باش تبدل حقيقة انو عمر يحبني انا و كهو...و مدامنا عايشين فرد دار...انتي لي التزم حدودك...و ابعد على عمر...خاطر صدقني ماهوش باش ينجم يغزر لحتى وحدة غيري...لا انتي و لا سيرين خطيبتو لي فكيتو منها
هزيتها و حطيتها...و تلفت عطيتها بظهري...بقات ساكتة من غير حتى كلمة...وصلت لباب...و كملت كلامي نحكي
انا:في رايي معادش ينفع تبقى في البيت هاذي...فما برشا بيوت اخرى تنجم تاخو راحتك فيها عزيزتي
خرجت و خليتها...تنهدت بالقاوي...توا ارتحت بالقدا اصلا كنت متأكدة لهي تحبو...و لي مطمني اكثر...انو هو معطهاش وجه لتوا...اما مستحيل نخليها تتعدا حدودها معايا اكثر من هكا...كهو لازم تفهم لانا مانيش باش نسكتلها اكثر من هكا...هديت على هند للبيت...رميت المنشفة عالفوتاي...هزت روحها مروهجة تحكي
هند:زهرة...لباس ماهو ؟
انا:توا وليت لباس
هند:شصار ؟
انا:ياخي بنت خالتك هذيكا من امتى تحب عمر ؟
هند:شنننوة ؟
انا:متلفنيش هند امانك...هاني شالقة بالحكاية من الاول و ريت كيفاش تغزرلو زادة
هند:باهي اقعد
انا:مانيش باش نقعد...على اعصابي راني...و من غير ما تشتكي لحد مني...خاطرني قتلها لي لازم تسمعو
هند:لاا عاد
انا:والله لي سمعتو...تحملتها شهرين...مانيش مجبورة نتحملها اكثر
هند:شنية لي صار ؟
انا:لازمها تفهم لانا مرت عمر...معناها مجيتش لهوني على كيفي
هند:زهرة عزيزتي...اعذرها...هي كانت متعلقة بعمر برشا...و لتوا منجمتش تتقبل حكاية لهو عرس و بدا من جديد...على هذاكا قاعدة تتصرف بطريقة هاذي
انا:هند...عمر راجلي انا...مانيش باش نسمح لحتى وحدة تدخل لحياتو غيري...و هي لازمها تفهم...انو لي تخمم فيه مستحيل
هزت روحها قربت مني...شدتني من يديا زوز...تحكي
هند:زهرة الكل هوني يعرف لي عمر...يحبك انتي و كهو و سلمى مع الوقت تستوعب لي تعمل فيه زايد..معادش تقلق روحك بحكايات فارغين...و احكيلي شنية قتلها
انا:مش على اساس حكاية فارغة ؟
هند:تي احكيلي
انا:شي قتلها تبعد على عمر و كهو
هند:الله الله...طلعت مرت خويا تقد روحها...و تعرف دافع على راجلها
انا:زيد افركهم عليا
هند:هههههه و راسك نفدلك
انا:صحيح قبل ما ننسى...نجم نتسلف عليك سيشوارك
هند:اكيد...لازم عمر يلقى عروستو حاضرة
انا:هنند
هند:باهي باهي...هاني سكت
اول ما تلفتت جات عيني على boite de musique لي محطوطة عالكوافوز...قربت منها مترددة...هزيتها في يدي...بدني رعش بالوقت...كبست عالزر...و رجعت بذاكرة لنفس ليلة...ليلة عرسي...نفس البوات...نفس العروسة لي قاعدة دور داخلها...و نفس الموسيقى...اما كيفاش ؟ البوات هاذي كانت هدية مراد...و انا خليتها غديكا ليلتها...كيفاش وصلت لبيت هند...بعد الشهور هذوما...قلبي خض بالقاوي...و انا نحاول نستوعب...اللي نرا فيه...فقت من سرحتي على صوتها تحكي
هند:عجباتك ؟
تلفت عندها بالوقت...من غير حتى كلمة...كبست عليها في يدي...تبسمت تحكي
هند:فرات عطهالي
غزرتلها مستغربة...اول مرة تقول اسمو...بالطريقة هاذي و نعرف طبيعتها...مستحيل تقبل هدية منو بالسهولة هاذي...و لا زعمة انا طلعت غالطة فيها...خذيت نفس بالسيف نحكي
انا:هدية حلوة
هند:لا ماهيش هدية
انا:ملا ؟
هند:شي...صحيح هي هدية...اما انا منعتبرهاش اكاكا
هزيتلها براسي ايه...كبست عالزر مرة اخرى...سكرت الموسيقى...حطيتها في بلاصتها...شديت عليها سيشوار نحكي
انا:لازمني نمشي توا
هند:باهي عزيزتي
كبست عليه في يدي و خرجت من البيت...نزلت الدروج نجري...قربت مني البون باش تحكي معايا...خليتها و كملت...منعرفش كيفاش وصلت لداري...سكرت الباب بالقاوي...و تكيت عليه...نرد في النفس...تعدات الاحداث في مخي وحدة وحدة...اول شي كرهبة مراد لي ريتها وقت خرجت من البوتيك...بعدها الكرهبة لي جاتني في نص الليل...ريحتو لي شميتها في ال conservatoire و توا boite de musique مستحيل هذا الكل يكون صدفة...قلبي غم عليا..حطيت يدي على فمي...و زربت لبيت البانو...حطيت سيشوار و استندت بيديا الزوز عالرخامة...رجعت كلشي كليتو عالفطور...غسلت وجهي...و وخرت لتالي مروهجة
رجعت لبيتي...تسطحت لتالي...و حطيت يدي على كرشي...منعرفش شبيني من البارح و انا عالحالة هاذي حسيت بالباب تحل...من ريحتو عرفتو هو...قرب مني قعد بجنبي...مد يدو...عداها على خدي يحكي
عمر:زهرة عزيزتي...لباس ماهو ؟
هزيت روحي تقعدت...قربت منو اكثر...دخلت في حضنو...نحكي
انا:لباس يا روحي
عمر:ملا شبي حالتك هكا ؟
انا:منعرفش...حاسة روحي تاعبة و كهو
عمر:مدام اليوم عطلة...شرايك نعديو النهار هذا برا...فما برشا حاجات حلوين نحبك تتعرف عليهم
انا:اغزر لحالتي عمر...حتى شعري مزال مبلول
عمر:مممم حالتك تشهي يا روحي
انا:عمممر اماان
عمر:باهي...استناني هوني
انا:وين ماشي ؟
عمر:ناخو سيشوار من عند هند
انا:خليتو في بيت البانو
عمر:مممم باهي برشا
قام من قدامي...و رجع في يدو سيشوار...يحكي
عمر:هيا ايجا لهوني
انا:شنوة باش تعمل ؟
عمر:هيا عزيزتي معادش وقت
انا:انت باش تشيحلي شعري
عمر:مممم
انا:جوووو
هزيت روحي قعدت قدامو...نستحلى في لمسة يدو على شعري...اول ما كمل...حطو من يدو يحكي
عمر:هيا قوم...بدل دبشك فيسع
انا:باهي عزيزي
بدلت دبشي بالزربة...لميت شعري...و خلطت عليه نحكي
انا:حااضرة
عمر:هيا ملا
خرجت وراه..جات عيني في عينها خارجة من الكوجينة قربت منو...شديتو من يدو نحكي
انا:حبي وين ماشيين احنا ؟
عمر:ايجا تو تعرف
انا:باهي
قربت منو اكثر...قحرتلها و تلفت...طلعت راسي لقيتو يغزرلها...كبست على يدو نحكي
انا:هيا
هزلي براسو ايه...اول ما خرجنا جبدت يدي منو...و قربت حليت الباب ركبت...خلط عليا...غزرلي ندرا كيف يحكي
عمر:شبيك تقلبت ؟
انا:حتى شي...اما انت لي حسيتك مقلق على بنت خالتك عزيزي...محقكش مشيت و خليتها
عمر:فاش قام الكلام هذا ؟
انا:مش مهم
عمر:زايد الكلام معاك
دورت وجهي للبلار و سكت...خدم الكرهبة و طار بيها محسيتش بالثنية...كان كي وقفها...طلعت راسي...نغزر لساقية...حليت الباب و نزلت من غير حتى كلمة...قعدت عالكرسي لي مقابلها...شوية و خلط عليا...قعد قدامي يحكي
عمر:نعرف للغش هذا مش من غيرتك على سلمى
انا:مغرتش منها
عمر:باهي...ملا شبيك على اعصابك
انا:منعرفش
عمر:نسمع فيك
انا:نحب نحكيلك حاجة
ضيق عينيه مستغرب...يستنى فيا نكمل كلامي...خذيت نفس بالسيف نحكي
انا:تذكرها علبة الموسيقى...ل لي وصلتني من عند مراد ليلة عرسنا
عمر:فاش قام تذكر فيها توا ؟
انا:ريتها اليوم في بيت هند
طلع راسو غزرلي ندرا كيف...عدا يدو على وجهو يحكي
عمر:زهرة شنية قاعدة تقول انتي ؟
انا:عمر متفهمنيش بالغالط...اما ما نجم نحكي لحتى حد غيرك...بلكشي تكون صدفة و كهو
عمر:و من وين جابتها هند ؟
انا:هدية
ﻋﻤﺮ:ﺷﻘﺼﺪﻙ ؟
ﻣﺪﻳﺖ ﻳﺪﻱ ﻛﺒﺴﺖ ﻋﻠﻰ ﻳﺪﻭ ...و ﺧﺬﻳﺖ ﻧﻔﺲ ﻧﺤﻜﻲ
ﺍﻧﺎ:ﻋﻤﺮ ﺍﻧﺎ ﺩﺍﺧﻠﺔ ﺑﻌﻀﻲ...ﻭما نجم...ﻧﺤﻜﻲ ﻣﻊ ﺣﺘﻰ ﺣﺪ ﻏﻴﺮﻙ...ﻣﻨﺤﺒﻜﺶ ﺗﻔﻬﻤﻨﻲ ﻭ ﻻ ﺗﻔﻬﻢ ﻫﻨﺪ ﺑﺎﻟﻐﺎﻟﻂ...ﺍﻟﻬﺪﻳﺔ ﺧﺬﺍﺗﻬﺎ ﻣﻦ...ﺍﻟﻤﻌﻬﺪ...ﺍﻣﺎ
ﻋﻤﺮ: اما ﺷﻨﻴﺔ ؟
ﺟﺒﺪﺕ ﻳﺪﻱ ﻣﻨﻮ...ﺩﻭﺏ ﺣﺴﻴﺖ...ﻣﻼﻣﺢ ﻭﺟﻬﻮ ﺗﺒﺪﻟﺖ ﻣﻨﺤﺒﺶ...ﻧﺪﺧﻞ ﻫﻨﺪ ﻓﻲ ﻫﺬﺍ ﺍﻟﻜﻞ...ﻫﺰﻳﺖ ﺭﻭﺣﻲ ﻭﻗﻔﺖ ﻧﺤﻜﻲ
ﺍﻧﺎ:ﻣﺤﻼﻫﺎ ﺍﻟﺒﻼﺻﺔ ﻫﻮﻧﻲ...ياسر هادية
ﻭﻗﻒ ﻓﻲ ﺟﺮﺗﻲ...ﺟﺒﺪﻧﻲ ﻣﻦ ﻳﺪﻱ...ﺩﻭﺭﻧﻲ...ﺟﺎﺕ ﻋﻴﻨﻲ ﻓﻲ ﻋﻴﻨﻮ...ﻏﺰﺭﻟﻲ ﻧﺪﺭﺍ ﻛﻴﻒ ﻳﺤﻜﻲ
ﻋﻤﺮ:ﻣﺘﺒﺪﻟﺶ ﺍﻟﻤﻮﺿﻮﻉ
ﺍﻧﺎ: ﻉ ﻋﻤﺮ ﺍﻧﺎ...
ﻋﻤﺮ: ﺯﻫﺮﺓ...ﻗﺪﺍﺵ ﻣﻦ ﻣﺮﺓ ﻗﺘﻠﻚ...ﻣﻌﺎﺩﺵ ﺗﺘﻮﺗﺮ ﻫﻜﺎ ﻭ ﺍﻧﺘﻲ ﻣﻌﺎﻳﺎ...ﻭ ﻣﻬﻤﺎ ﻛﺎﻥ ﻟﻲ ﺑﺎﺵ ﺗﺤﻜﻴﻪ...ﺍﻧﺎ ﻣﻌﺎﻙ باهي
هزيتلو براسي ايه...خايفة من ردة فعلو...خاصة و الحكاية تعدا عليها برشا...غزرتلو نحكي
ﺍﻧﺎ: ﺍﺧﺮ ﻣﺮﺓ ﻣﺸﻴﺖ ﻣﻊ ﻫﻨﺪ.. للمعهد...ﻑ ﻓﻲ ﺻﺎﻟﺔ ﺍﻟﺒﻴﺎﻧﻮ...ﺣﺴﻴﺖ ﺑﺤﺎﺟﺔ ﻏﺮﻳﺒﺔ
ﻋﻤﺮ: ﺷﺼﺎﺍﺍﺭ ؟
ﺍﻧﺎ:ﺡ ﺣﺴﻴﺖ ﻟﻲ ﻫﻮ ﻗﺮﻳﺐ ﻣﻨﻲ...ﻣﺮﺓ ﺃﺧﺮﻯ
ﻋﻤﺮ:ﻣﺮﺍﺍﺩ ؟
تبسم باستهزاء...ﻧﺰﻟﺖ ﺭﺍﺳﻲ ﺑﺎﻟﻮﻗﺖ...ﻣﻨﺤﺒﺶ ﻧﻐﺰﺭ ﻟﻠﻐﻴﺮﺓ ﻓﻲ ﻋﻴﻨﻴﻪ...ﻧﻌﺮﻑ...ﺑﺎﻟﻘﺪﺍ ﻗﺪﺍﺵ ﻳﻔﺪ منو و من ﺳﻴﺮﺗﻮ...ﺧﺬﻳﺖ ﻧﻔﺲ ﺑﺎﻟﺴﻴﻒ ﻧﺤﻜﻲ
ﺍﻧﺎ: ﺭﻳﺤﺔ ﺑﺮﻓﺎﻧﺘﻮ ﻛﺎﻧﺖ ﻓﻲ ﻛﻞ ﺑﻼﺻﺔ...ﺍﻧﺎ
ﻋﻤﺮ:ﻳﺰﺯﺯﻱ ﺍﺳﻜﺖ
ﺍﻧﺎ: ﺣﺎﻭﻟﺖ ﻧﺨﻟﻂ ﻋﻠﻰ ﺍﻟﻤﺪﻳﺮ ﺍﻣﺎ...ﻭﻗﺘﻬﺎ ﺳﻠﻤﻰ ﻭﻗﻔﺘﻨﻲ ﻭﺍﻟﻠﻪ ﻛﺎﻧﺖ ﻧﻔﺲ ﺭﻳﺤﺘﻮ...ﻣﺴﺘﺤﻴﻞ ﻧﻨﺴﺎﻫﺎ
عمر:قتلك اسسكت
انا:في الاول كرهبتو...بعد الحادثة اول ما وصلنا لهوني بعدها ريحتو...و توا علبة الموسيقى...والله نحس في روحي باش نهبل يا عمر...نعرف ميجيش نقول هذا الكل...اما قاعدة نحس لهو قريب منا
عمر:قريب ؟ زهرة تعرف روحك فاش قاعدة تحكي
هزيتلو براسي ايه...و مديت يدي حطيتها على كرشي حاسة روحي مقلقة مش نورمال...قربت منو شوية نحكي
انا:ع...عمر...منقصدش لي فهمتو...والله انا
قص عليا كي قرب مني...جبدني عندو...حضني بالوقت...يمكن هذا لي كنت بحاجتو توا...مديت يديا زوز...كبست على سوريتو...عدا يدو على ظهري يحكي
عمر:بااهي اهدااا...منقصدش...اما زادة هذا الكل ما عندو وين يوصلك عزيزتي...مرااد مات...و معادش باش يرجع بعد توا...معادش تربط الاحداث بيه بعد توا...اللي صار الكل صدفة...معادش تعب روحك بالحكاية هاذي عيش حبي...مراد كان مزال عايش لتوا...راهو رجع...و انتي تعرف هذا بالقدا...فكر في حياتنا كيفاش باش تكون...في صغارنا لي باش نربوهم مع بعض...انا نحب نعيش معاك التفاصيل هذوما زهرة...نحب ندفنو الماضي مع بعضنا...نحبك تنسى كلشي صار...باهي
انا:بااهي
باقي يعدي في يدو على ظهرو...حسيت روحي تفرهدت اكثر...و انا نشم في ريحتو...حاول يجبد روحو...كبشت فيه...نحكي
انا:خليك هكا
عمر:متحبش تاكول ياخي ؟
انا:مبنها ريحتك عمر
عمر:زهرررة...ياخي اول مرة تشمها انتي
انا:منعرفش...اما توا بالظبط...نحب نعمل حاجة و كهو
عمر:شنية لالة تفضل ؟
انا:نبوسك
عمر:صاار
انا:ممممم امانك
دور راسو...ما لقى حتى حد...تبسم ندرا كيف...و نزل عليا...يحكي
عمر:ملا تحب تبوس يا فرخة
مديت يدي شوية...عديت صوابعي على شفايفو...و نزلت بيهم لرقبتو نحكي
انا:انت متحبش
عمر:نعمبو عمري...كان مزلت منحبش
هد عليا في لحظة....غطس في شفايفي...اما مش هذا لي نحب عليه بالظبط...جبدت روحي شوية...خذيت نفس...كبست عليه بيديا زوز...جبدتو عندي اكثر...عديت شفايفي على رقبتو...دوب كبس على ظهري...غرست سناني فيه...عضيتو بكل قوتي...كيما حبيت و تشهيت من كبستو لي قوات...عرفت روحي وجعتو...اما منجمتش نبعد...قربت من شفايفو...طبعت بوسة على شفايفو...و وخرت شوية لتالي...كبس على ظهري اكثر عاود رجعني عندو...جا وجهي مع وجهو...غزرلي ندرا كيف يحكي
عمر:تعمل عملتك و تهرب...بالساهل هو ؟
انا:سييبني عمر...فاش تعمل ؟
عمر:لي كنت تعمل فيه انتي توا
عينيا وساعو...مديت يدي حطيتها على تراص العضة نحكي
انا:تعمل شنية...اصلا شوف معادش توجع فيك...سيبني امانك
عمر:ششش اهدا...شبيك دخلت بعضك...هاني انا تحملتها منك
انا:لا امانك...والله شتهيتها و كهو...ماكش باش تعضني مش هكا
عمر:و شعملنا فيها الحكاية ؟
انا:شنوة ؟
عمر:ماكش باش تعوضني معناها
انا:مش هوني
عمر:ملا نرجعو لدار
انا:عمممر...مش على اساس...نعديو نهار برا امانك...مبعد نعوضك وعد
عمر:باش تعوضني
هزيتلو براسي ايه...تبسم بخبث...و نزل عليا شوية يحكي
عمر:من غير ما تعوضني...نعرف كيفاش ناخو حقي...و بالدوبل زادة
انا:عممر يزي...شبيك تهدد فيا...هبلت ياخي
عمر:باهي...بلا تخرنينك توا...امشي
انا:اماان
عمر:هيا برك...تحرك
تنهدت بالقاوي...و عاودت قربت منو...نحب نحي الافكار هذوما الكل من مخي...و خاصة نهار هذا...مرجتو و انا كل مرة نطلعلو بطلعة...و لا بفازة...رجعنا لدار...لقيت العيلة الكل ملمومة...ترميت بجنبو من غير حتى كلمة غزرتلو امو تحكي
فاطمة:تعشيت عزيزي ؟
عمر:تعشينا برا امي عيشك
هند:عمممر...مش باش ترجعو قبل ما تحضرو عيد ميلادي مش هكا
عمر:طمن صغرون
مصطفى:يا ولدي اخطاك منها...كل عام تعملنا نفس سيناريو على عيد الميلاد متاع وذني
هند:حد ما سألك على رايك انت
عمر:ميزيتوش زوز
هند:شوف معاه هو
مصطفى:باهي اسسسكت
سلمى:متخافش عزيزتي...المرة هاذي...باش يكون عيد ميلادك احلى من المرة لي فاتت
هند:عيش اختي
فاطمة:هاني باش نخليكم انا توا...ليلة سعيدة
اول ما خرجت...جات عيني في عينها...تبسمت ندرا كيف تحكي
سلمى:زهررة
انا:شننوة ؟
سلمى:انتي هاك تعرفت علينا...و عشت معانا...اما احنا لتوا...ما نعرفو عليك حتى شي
انا:و شنية لي مزال معرفتوش ياخي ؟
عمر:زهررة ؟
سلمى:شبيك تغششت...انتي من وقت جيت هوني ما حكيت حتى شي على عيلتك
تلفت لعمر بالظبط...نعرف لي تحاول تستفزني بسؤالها كان باش يحكي...اما قصيت عليه...نحكي
انا:بابا توفا و انا صغيرة...و بالنسبة لامي و راجلها عندهم تقريب عام ماتو في اكسيدون...عندك اسئلة اخرى
سلمى:ربي يرحمهم...و معندكش خوات ياخي
انا:لا معنديش
سلمى:معناها بقيت بلا عيلة
انا:شكون قلك ؟
غزرتلي مستغربة...مديت يدي كبست على يدو...و غزرتلو نحكي
انا:عمر هو عيلتي
سلمى:اما رغم هذا الكل...مفماش كيما لمة العيلة
انا:صحيح...اما على حد علمي...حتى اني معندكش عيلة...و لقيت لي تفركس عليه هوني...و انا نفس شي
سلمى:لا ماهوش نفس الشي
هزت روحها و خرجت من صالة...غزرتلنا هند...تحكي
هند:تو نراها انا
عمر:خلي عليك...تو نراها انا
جبد يدو من يدي...بدني رعش بالوقت...اول ما خرج من الصالة...قلبي غم عليا...منعرفش علاه متوقعتهاش الفازة منو...خذيت نفس نحكي
انا:تصبحو على خير
مصطفى:لباس ماهو ؟
انا:لباس عيشك
هند:زهرة اتو نجي معاك
انا:متعبش روحك...و منقصدش لي صار بكري
هند:ما صار شي...متقلقش روحك
انا:عيشك
خرجت و خليتهم...منعرفش كيفاش وصلت لبيتي قعدت على طرف السرير...نرد في نفس...قص عليا صوت تليفوني...نفس الرقم مرة اخرى...علقت عليه...و سكرت تليفون...طيشتو عالفوتاي...حطيت يدي على كرشي...وجيعة قلقتني...بدلت دبشي بالسيف...شي من العصب لي راكبني...و شي من الوجيعة لي محبتش تقص...بقيت ندادي في بلاصتي رايحة جاية...منعرفش قداش تعدا وقت و انا نستنى فيه...لين يأست...هزيت الغطا باش نشد بلاصتي...دخل بالوقت...حط الفاست على جنب...يحكي
عمر:شنية لي صار الصباح ؟
انا:شننوة ؟
عمر:منعرفش انتي خبرني
انا:فاش تحكي ياخي ؟
عمر:زهرة...تعرف على شنية نحكي
انا:هههههههههه باز تفدلك انت...ياخي جاي تحاسب فيا على خاطر لالة سلمى
عمر:زهرررة...انا جيست منحبكش تعلق معاها...و زادة علاه طردتها من البيت صباح...و بكلامك قبيل...خليتها تحس لهي حمل عليهم هوني
انا:ما عندي حتى تفسير لكلامك...و مانيش باش نطلب منها السماح زادة
عمر:ماكش مجبورة باش تطلب السماح من حد...و مانيش نحاسب فيك زادة...اما
انا:اما قاعد تحذر فيا...اما تحب صراحة...عندها حق...انا ما عندي حتى عيلة...و هذا لي تحاول تثبتو انت زادة باهي مدامني انا ضيفة هوني...باش نلتزم حدودي اكثر و كان تحب تو نسبقك انا لتونس...و ابقى انت بحذا العيلة الكبيرة لي عندك
خذيت نفس طويل...و قربت منو...حط يدو على زندي باش يحكي...قصيت عليه نحكي
أنا:أنا زادة عندي عيلة عمر...مع أنك مسألتنيش من قبل أما أنا كيفك عندي خالتي...و عندي عمومي...و عمتي زادة...اما انا هربت عندك انت...وثقت فيك انت...عمري ما فكرت نمشي عند حد فيهم...كنت نقول مدام مفكروش فيا السنين هذوما...مانيش باش نلقاهم توا
أنا اعتبرتك عيلتي الكل...اما ظاهر هذا الكل ميكفيش و دوماج فهمت هذا مأخر برشا
عمر:يززي من تخلويض...مقصدتش لي قاعد يدور في مخك
مديت يدي...كبست على يدو...نزلتها من زندي و غزرتلو نحكي
انا:نحب نبقى وحدي
مخليتوش يكمل كلامو...خرجت و خليتو...دخلت لبيت البانو...و سكرت الباب من داخل...عديت يدي على وجهي...أول مرة نحس الوضع توتر بينا...و لا مرة حاسبني على حاجة و لا كلمة من قبل...بالطريقة هاذي منعرفش علاه حسيت بغشو...في نبرة صوتو...نزلت الغطا متاع توالات...و قعدت عليها...نحس في بدني مهدود...أول مرة نحس لي عمر معادش يفهمني كيما قبل...بخلاف الحاجات لي صارت...يستخايلني نتوهم فيها...و توا سلمى لي طلعت من الحيط...طلعت راسي شوية...نسمع فيه يدق عالباب...و يحكي فرد وقت
عمر:زهرة حل الباب...تسمع فيا ياخي...حل الباب هذا...و أخرج خلينا نحكيو
حطيت يدي على كرشي...كبست عليها...الوجيعة نقصت شوية على قبيل...أما نحس في بدني مهدود...مش نورمال...كبس عالبواني يحكي
عمر:زهرررة...حل الباب هذا...احسن ما نكسرو
هزيت روحي...قربت من الباب...دورت المفتاح...حلها بالوقت و دخل...وقف قدامي...جبدني من يدي يحكي
عمر:هبلت ياخي...شنية اللي تعمل فيه إنتي ؟
انا:تاعبة...و نحب نرقد
عمر:ناوية تجهلني في هالليلة الكلبة...واعية للكلام لي قلتو قبيل...ياخي نورمال...يمشي في بالك...لأنا نخمم بالطريقة هاذي...اسمعني بالقدا...العيلة لي تحكي عليها انا خليتها عشر سنين...عشر سنين متلفتش ورايا لحظة اما انتي منجمش نسلم فيك عشر دقايق...ريت الفرق توا...هذا هو..إني حبيتك أكثر من العيلة لي تحكي عليها إنتي...لا سلمى لي كانت تستفز فيك و إنتي مقصرتش معاها...و لا اي حد غيرها...ينجم يبدل الحقيقة هاذي...مفهوم كلامي
حط يديه زوز على وجهي...باسني من راسي...و نزل عليا أكثر...أول ما وصل لشفايفي...قلبي غم عليا أكثر دوخة قوية روهجتني...و جيت بين يديه...حملني مفجوع...و رجع بيا للبيت...حطني عالسرير...و قعد بجنبي يحكي
عمر:زهررة شبيك...توا كنت لباس...شصاار ؟
حليت عينيا بالسيف...نثبت فيه...كابس على يدي...و يحاول يفيقني فرد وقت...تنهد بالقاوي يحكي
عمر:شنية تحس في روحك...اتو لحظة...خليني نكلم أمي...و لا تو نهزك للكلينيك أحسن...هيا عزيزتي
كبست على يدو أكثر...حسيت بيه دخل بعضو...و معادش عارف شنية يعمل...خذيت نفس نحكي
انا:ع عمر...اهدا
عمر:باهي...شنية تحس في روحك توا
انا:لباس عليا...والله
عمر:نعرف روحي قلقتك...حقك عليا عزيزتي...سامحني
انا:عممر يزززي...من بكري تاعبة...أنت ما عندك حتى ذنب
عمر:ك كيفاش من بكري...فاش تحكي إنتي ؟
انا:ياخي باش نعديو ليلة اسئلة...والله جيست تاعبة و كهو...مفما حتى شي يخوف
عمر:طوال لسانك الفترة هاذي
انا:لااا...اما أنت لي معادش تحبني كيما قبل
تلفت عطيتو بظهري...قبل ما يحكي حتى كلمة...تنهد بالقاوي...و تمد بجنبي...مد يدو...غرسها في شعري يحكي
عمر:صحيح...معادش نحبك كيما قبل
دور يدو على كرشي...كبس عليا و دورني عندو...غزرلي ندرا كيف يحكي
عمر:توا وليت نحبك اكثر من قبل...يا روح قلبي
غمضت عينيا بالقاوي...أول ما باسني...قربتلو أكثر...في لحظة حسيت غشي وفا منو...و ريحتو هداتني بصيفة غريبة...مع اني مزلت مغلغلة من الجاست لي عملو...عدا صوابعو على خدي يحكي
عمر:كيفاش تحس في روحك توا
انا:خليك هكا...و كهو
عمر:زهرة...يا روحي...والله معادش نعرف شبيك دخلتني بعضي راك
انا:حتى انا منعرفش شبيني...خليك هكا برك...توا حسيت روحي ارتحت
عمر:باهي...ارتاح توا
انا:منجمتش تاخو حقك
تبسمت و انا نحكي...اول ما تذكرت لي صار معانا بحذا ساقية...نزل عليا شوية...عدا خشمو على خشمي يحكي
عمر:انتي ارتاح توا...مبعد نعرف كيفاش ناخو منك
انا:سلمى شنية بالنسبة ليك عمر ؟
غزرلي ندرا كيف...بعدلي شعري لتالي...يحكي
عمر:حتى شي...سلمى بنت خالتي و اختي...و مفماش حقيقة اخرى غير هاذي...لا توا و لا قبل...منحبش الغيرة توجعك...و تردك في الحالة هاذي...اصلا يامات اخرى...و نرجعو لدارنا...هوكا امورك مريقلة في الفاك...و القراية تبدا بعد اسبوعين...و اليامات الاولى مفماش قراية برشا...على هذاكا اول ما نرجعو...نمشيو نعدو يامات في الفيرما...باهي
انا:و ماكش باش تجي لهوني من غيري...و ماكش باش تقابلها و نتوما وحدكم زادة
عمر:شو المغيارة...باهي لالة طمن...معادش تعبي راسك بحاجات تافهة
انا:معناها ترا في سلمى تافهة ؟
عمر:مقصدتش اكاكا...اما
انا:شنننوة ؟
عمر:باهي...باهي...لي يغلبك يجي يحاسبني...هاني سكت...و كان حبني ربي معادش حتى نراها...طمنت توا
انا:ايييه...و معادش تقرب منها جملة...و لا حتى تحاول تواسيها...اصلا تستهل لي سمعاتو الكل
عمر:باهي حبي...اهدا و معادش تخمم فيها توا...باهي
انا:نحي سوريتك
عمر:شنوة ؟
انا:مستانس ترقد بيها انت...هيا نحيها
مديت يدي نحل فيها...بقى يغزرلي مبهم...طيشها عالارض...و تبسم على جنب...يحكي
عمر:متحبش نحي الباقي
انا:زايد متحشمش...انا نحب نرقد توا...و كان حبيت تنحي الباقي مبعد...امورك
عمر:والله مزلت تحل فمك...نبات عريس...و فكها انتي مبعد
عديت يدي على صدرو...و قربتلو اكثر...غمضت عينيا نحكي
انا:توا نجم نرقد مرتاحة
عمر:ارقد برك...ارقد امانك
انا:قاعد تخمم فيا انت
عمر:ملا في شكون تحبني نخمم
انا:حتى حد
غفيت من غير ما نخمم في شي اخر...اول مرة نحب على ريحتو بالطريقة هاذي...نحبو يبقى بجنبي و كهو و معاد يهمني حتى شي اخر في دنيا...اما رغم هذا الكل فما احساس داخلي...احساس بعيد برشا...يقول لي مراد مزال موجود...و اني باش نخسر كلشي بنيتو مع عمر على هذاكا مستحيل نخلي حد يبعدني عليه مهما صار و مهما اللي باش يتعدا علينا...حبنا مستحيل يموت...و حد ما هو باش يبدل الحقيقة هاذي...انو عمر ليا انا و كهو.
🌸🌸🌸🌸🌸🌸🌸🌸🌸🌸🌸
🔸️هند تحكي:
بدلت دبشي...و نزلت اللوطة...احسن شي منقراش الصباح اليوم...عالاقل نمشي في راحتي...لقيت امي تحضر في روحها باش تخرج...سلمى مشات للمعهد...و الباقي للمعمل...دورت عينيا نحكي
انا:صباح الخير
امي:صباح الخير بنتي...هوكا 8:30...ياخي متقراش
انا:نقرا بعد ساعتين
امي:هيا باهي
انا:امي ياخي وينها زهرة ؟
امي:باز في بيتها...برا طمن عليها عيش بنتي
انا:باهي
خذيت نفس...و طلعت عندها...استغربت كي ملقيتهاش في الصالة...قربت من بيتها...دقيت الباب...نحكي
انا:زهرة انتي هوني ؟
زهرة:ادخل هند
حليت الباب و دخلت...نغزرلها مسطحة...قربت منها قعدت بحذاها نحكي
انا:لباس ماهو ؟
زهرة:لباس...جيست وجيعة في كرشي...مقلقتني من بارح
انا:شبيك مقلتش لعمر يهزك...للمستوصف...و لا للكلينيك
زهرة:هند عزيزتي...مفما حتى شي يخوف...بلكشي الوجيعة متاع العادة كهو
انا:متأكدة...شرايك نكلم عمر...اصلا مفما حتى حد هوني...الكل خرجو...منجمش نخليك وحدك
زهرة:والله لباس عليا...تو ننزل لوطة نشم شوية هوا بلكشي نرتاح
انا:باهي
هزت الغطا...و قامت...عينيا وساعو...و انا نغزر لبقعة الدم لي كانت تحتها...خرج الكلام مني بالسيف...نحكي
انا:ز زهرة
تلفتت عندي بالوقت...نزلت راسها تغزر للفرش...حطت يدها على كرشها موجوعة...منعرفش كيفاش وقفت نحكي
انا:زهرة...شنية هذا ؟
زهرة:م منعرفش...اصلا اول مرة تشدني وجيعة هكا
قربت منها شديتها من يدها...كبست عليها...نحكي
انا:ايجا اقعد...تو نطلب عمر
زهرة:لا...رد بالك...اصلا خرج كان بالسيف...من غير ما نتعبو بحكاية فارغة توا
انا:ملا باش نمشيو للمستوصف مع بعض لا...لا..للكلينيك غديكا...ممنوع يخرجو اي معلومة...هيا قوم...و لا استنى نعاونك تلبس
زهرة:ه هند اهدا ساعة...متخافش...لباس والله
انا:زهرة هيا قوم عيش اختي...من غير عنادك توا عالاقل تطمن مفما حتى شي
زهرة:باهي...اما توعدني توا...انو مهما يصير غديكا يبقى سر بينا
انا:والله ما نقول لحد
زهرة:ع عيشك
نطرت من بلاصتي...مديتلها حوايجها...عاونتها لبستهم نحكي
انا:تنجم تمشي ؟
زهرة:مممم
انا:باهي ان شاء الله نلقاو طاكسي
زهرة:متنساش صاكي امانك
هزيتو في يدي...و عاونتها...طليت من فوق لقيت امي خرجت...مع طاطا مليكة...تنهدت بالقاوي...هبطنا الدروج وحدة وحدة...حسيت بيها تاعبة...مش كي العادة...خاصة توا...هزيت صاكي لي خليتو عالكرسي لوطة...و خرجنا لطريق...بطلوع روح...باش تعدات طاكسي...بقيت كابسة على يدها...لين وصلنا...اول ما دخلنا...قربت من الريسيبسيون نحكي
انا:مفماش طبيب متاع نسا هوني ؟
هي:اكيد...تفضل...هوكا الفرملية توصلكم
زهرة:مفماش طبيبة ؟
هي:ديزيولي مدام...اما لتوا موصلتش
زهرة:نستناها
انا:زهرة هبلت ياخي....اصلا مش بالضرورة...يعدي عليك...خبرو شنية صار و كهو...هيا عيش اختي
زهرة:لااا هند...امانك...منحبش طبيب يعدي عليا
استغربت حالتها...و الخوف لي ريتو في عينيها مستحيل تكون خافت من عمر لهدرجة...اكيد ماهوش باش يتغشش منها و هي في الحالة هاذي...كبست على كرشها...عرفتها باش طيح...شديتها بالوقت نحكي
انا:اماانك عاوني فييسع...زهرررة
شدوها عليا بالوقت...قربت من الريسيبسيون مفجوعة نحكي
انا:خلي طبيب يعدي عليها
هي:باهي
قربت من البيت باش ندخل...حبستني الفرملية...بقيت نمشي و نجي في بلاصتي...بين نخبر عمر و لا لا...أكيد كان يسمع...مانيش باش نسلك منو...اما زادة انا وعدتها قص عليا سرحتي...كي خرج الطبيب...وقفت في وجهو نحكي
هو:المريضة فاقت...اما نحب لي نحكيه...تسمعوه مع بعض...تفضل
دخلت بعضي من كلامو...بلعت ريقي...و خلطت عليه قربت منها...نحكي
انا:زهرة عزيزتي...كيفاش تحس في روحك توا ؟
زهرة:لباس يا روحي عيشك
طلعت راسها...غزرت لطبيب...و تنهدت بالقاوي...تحكي
زهرة:شفما دكتور شبيني ؟
هو:من امتى تعاني منها الوجيعة هاذي
زهرة:تقريب 3 ايام...م مش مستانسة بالوجيعة هاذي خاصة...ب بعد ما عرست
هو:احم...مدام الوجيعة لي تحس فيها...ماهيش من العادة
دورت راسها غزرتلي مستغربة...حسيت برعشت يدها خذيت نفس و حكيت في بلاصتها
انا:ملا شنية لي صار دكتور ؟
هو:نزيف
زهرة:نزييف ؟
هزت روحها شوية تقعدت...غزرتلو مستغربة...تحكي
زهرة:ن نزيف شنية دكتور ؟ شقصدك ؟
دخلت الفرملية بالوقت...حطت الدوسي في يدو و خرجت...قراه...و رجع غزرلها يحكي
هو:نقصد لي صار معاك...إجهاض...مش وجيعة العادة كيما مشى في بالك
وجها مشى الوان...و انا اكثر منها...دخلت بعضي...و معرفتش شنية نحكي...حسيت بشكون واقف ورا الباب لي بقات محلولة شطر...غزرت لدمعتها لي نزلت و هي تغزرلو...جبدت يدي منها نحكي
انا:لحظة دكتور
قربت من الباب بالزربة...طليت...ما لقيت حد...عاودت سكرتها بالقدا و دخلت...تنهدت بالقاوي تحكي
زهرة:م معناها انا...كنت حبلة ؟
هو:صحيح...و لي صار معاك اجهاض
زهرة:خ خسرت ولدي معناها
انا:زهرة اهدا عيش اختي
هو:اهدا مدام...الجنين لباس عليه
انا:شقصدك ؟
زهرة:ك كيفاش...ش شقصدك ؟ معناها انا مزلت حبلة مش هكا
هو:بالظبط...ولدك بخير
زهرة:هند سمعتوو...ولدي عايش...معناها انا حبلة...مش هكا
تبكي و تضحك فرد وقت...تنهدت بالقاوي...و انا نغزرلها للحظة خفت كان بالحق تكون خسرت ولدها...و مزال مفرحتش بيه...عدات يدها على خدها تحكي
زهرة:ش..شنية سبب الاجهاض...نقصد النزيف ؟
هو:حبالتك حساسة برشا...خاصة الفترة هاذي..الستراس و العصب لا...و لازملك راحة تامة...معناها حاول فترة متقومش من الفرش...و متعبش روحك...و حاول تفهم راجلك زادة
نزلت راسها بالوقت...عرفتها حشمت...قربت منو نحكي
انا:باهي دكتور...تو انا نتلهى بيها...عينيا عليها...طمن
هو:باهي...رد بالك تقوم قبل ما يوفى سيروم...و تو نقيدلك الدوا...و لازمك تاخو بالوقت
زهرة:باهي دكتور عيشك
اول ما خرج...حطت يدها على كرشها...تضحك و دموعها نازلة...غزرتلي تحكي
زهرة:سمعتو شنية قال...انا حبلة يا هند...اونفان حبلت مش مصدقة...لانا باش نجيب صغير من عمر
قربت منها...قعدت قدامها...كبست على يدها نحكي
انا:مبروك عزيزتي...اكيد عمر باش يفرح برشا
قربت مني حضنتني...حطيت يدي على ظهرها...نحكي
انا:يزي من البكا توا
زهرة:مش بيدي...والله
جبدت روحي منها...كبست على يديها زوز...نحكي
انا:يززي...مش باهيلك راهو...تو يتغشش البمبينو منك
زهرة:والله مش مصدقة يا هند...مش مصدقة لي انا حبلة...و باش نولي ام
انا:صدق عزيزتي...مدامك طلعت لباس...خليني نكلم عمر...يجي يسمع الخبر حتى هو
كبست على يدي...و هزتلي براسها لا...تحكي
زهرة:مش توا...نحب نخبرو بطريقتي...مش في الكلينيك
انا:يا عيني عالرومانسية
زهرة:هههههه بالظبط...نحب نعملو مفاجأة...بلكشي ليلة عيد ميلادك...مبعد نخبرو العيلة مع بعض
انا:باهي عزيزتي كيما تحب
زهرة:اوعدني...ماكش باش تحكي لحد
انا:باهي وعد لالة طمن
جبدت روحي وقفت...و هزيت صاكي...نحكي
انا:تو نرجع
زهرة:وين ماشية ؟
انا:ارتاح توا...انا نمشي نخلص...و نرجعلك
زهرة:هوكا فما فلوس في صاكي...تنجم تخلص بيهم
انا:تو هذا كلام يتقال بين زوز خوات
زهرة:عيشك عزيزتي
خرجت و خليتها...خلصت الكلينيك...و شديت الوصفة عالطبيب...و رجع معايا...عدا عليها مرة اخرى...طلبت طاكسي...رجعنا مع بعض لدار...احسن شي...حد ما رجع لتوا...دخلتها لبيتها...بدلت الفرش...و عاونتها تسطحت نحكي
انا:تحب حاجة اخرى
زهرة:مدلي تليفوني عيشك
حطيتو في يدها...و هو نوقز بالوقت...عرفتو عمر يطلب فيها...غزرت لساعة...بدات الحصة...معناها اكيد مانيش باش نخلط عليها...بعد ساعتين لي عديناهم في الكلينيك...تلفت نغزرلها و هي طمن فيه..تبسمت بالوقت اول مرة نرا حب بطريقة هاذي...حتى وقت نكونو مع بعض...مينزلش عينيه عليها...كانو يرا فيها لاول مرة علقت عليه...و حطت تليفون...خذيت نفس نحكي
انا:تحب نطيبلك حاجة تاكلها
زهرة:متعبش روحك...كان مزال وقت...برا اخلط عالدرس متاعك
انا:منظنش لانا باش نخلط
زهرة:لازمك تمشي...من غير ما يشلقو الجماعة لي فما حاجة
انا: و نخليك وحدك ؟
زهرة:يا بنتي...والله لباس عليا طمن
انا:متأكدة
زهرة:مانيش باش نقوم والله...و الجماعة اكيد تو يرجعو
انا:باهي ملا باش نخرج...قبل ما يجي حد
زهرة:باهي يا روحي...ربي يخليك ليا
انا:عيش اختي
هزيت صاكي...و خرجت...دريكسيون للمعهد...اول ما وصلت...حبست في اول درجة...كي نوقز تليفوني..قلبي دق بالوقت...خفت تكون جراتلها حاجة...اول ما خليتها ضيقت عينيا...كيف لقيتو يطلب فيا...خذيت نفس و هزيت عليه...نحكي
انا:صباح الخير
مراد:يعني في كل الحالات...روطار
انا:تراقب فيا سي فرات ؟
مراد:صحيح
انا:مممم في بالك لي قاعد تعطل فيا اكثر
مراد:ماكش باش تدخل توا
انا:و السبب ؟
مراد:انتي باش تجي عندي
انا:تفدلك ؟
مراد:مفاجأة
انا:للاسف منجمش نقبلها
مراد:اكيد ماكش باش تردني
انا:فرااات انا
مراد:خايفة مني انتي ؟
انا:خايفة ؟ اكيد لا
مراد:ملا نستنى فيك
انا:مستحيل نلقى طاكسي توا
مراد:اشرف يستنى فيك...ورا ال conservatoire
انا:ب..باهي
علقت عليه...و رجعت لتالي...اول ما وصلت للكرهبة حلي الباب يحكي
اشرف:تفضل
انا:عيشك
طلعت مستغربة...تكيت لتالي...و كبست على صاكي غمضت عينيا...نذكر في اخر لقاء بينا...وقت دخلت لبيروه...جات عيني عالبوات متاع الموسيقى...تبسم يحكي
مراد:عجباتك ؟
انا:برشا
هزها في يدو...كبس عالزر...تبسمت و انا نسمع في الموسيقى متاعها....قرب مني...حطها في يدي...يحكي
مراد:ولات متاعك
انا:باز تفدلك
فرات:لا...اما تليق بيك اكثر
انا:منجمش نقبلها
مراد:معندكش حل اخر
فقت من سرحتي كي وصلنا لدار...وقفت قدام الباب مترددة...تحلت قبل ما ندق...نغزر لسكينة في يدو
لابس بلوزة في نوار...غزرتلو مستغربة...تبسم يحكي
مراد:متخافش...مانيش ناوي نقتلك توا
انا:ملا جاية نقابل في سفاح انا
مراد:تفضل يا لالة
انا:عيشك سي سفاح
مراد:صحيتك
حطيت صاكي و خلطت عليه للكوجينة...تبسمت نحكي
انا:اوووه...وين كنت مخبي هذا الكل سي فرات...ساعة ميبانش عليك
مراد:انتي لتوا متعرفنيش
انا:في هاذي غلبتني
مراد:اكيد ماكش باش تبقى تتفرج فيا
انا:و مانيش باش نعاونك زادة...و الا ترصالك في الاستعجالي
مراد:هيا برك
انا:باهي لحظة نغسل يديا
متوقعتش باش نعدي وقيت معاه في الكوجينة...برغم هاذي ثاني مرة ندخل لهوني...حضرنا طاولة مع بعض قرب مني جبد الكرسي يحكي
مراد:تفضل اقعد
انا:مرسي
مديت يدي ذقت من ال plat لي حطو قدامي...و تبسمت نحكي
انا:مممم صراحة برافو
مراد:باهي برشا...كيف عجبك
انا:و شنية مناسبة الفطور هذا ؟
مراد:كمل تو تعرف
انا:باهي
طلعت راسي نغزرلو...نثبت في تفاصيل وجهو...و اكثر شي لون عينيه...لي مش مفهوم جملة...و لا الغزرة لي فيهم...تعدا الوقت فيسع...حط من يدو يحكي
مراد:هيا قوم معايا
انا:وين ؟
مراد:مش تحب تعرف السبب...لي خلاني نستدعاك هوني
انا:اكيد
مراد:هيا ملا
حطيت من يدي و خلطت عليه...نمشي وراه...نسمع في يحكي
مراد:اول شي...أمنيتك الصغرونة باش تتحقق
انا:شقصدك
مراد:تنجم تعمل دورة هوني...و في كل بقعة حبيت تراها من قبل
انا:ماهوش باش يقلقك
مراد:اكيد لا
انا:بااهي
بقيت نمشي وراه...نغزر لكل تركينة في القصر هذا...اكبر ببرشا من اللي نعيشو فيه احنا..برغم البلاد صغيرة هوني...اما البنايات لي فيها تميزها على كل بلدة في تونس...حسيت بيه واقف ورايا...تلفت عندو نحكي
انا:بالرسمي طلع مش نورمال...صحة ليك والله
مراد:عيشك مدموزال
انا:انتي لي يعيشك عالفطور سي فرات...و عالجولة هوني...اما وقيت باش نمشي
مراد:مزالت حاجة اخرى
انا:شنية
مراد:ايجا تو تعرف
ضيقت عينيا و خلطت عليه لصالة...نغزر لبوات محطوطة عالطاولة...هزها في يدو يحكي
مراد:لي هوني ليك انتي
انا:شنوة هذا ؟
مراد:هديتك
انا:هدية شنوة ؟
مراد:عيد ميلادك
انا:مزال بكري عليه
مراد:بعد غدوة
انا:و كيفاش عرفت حضرتك ؟
مراد:ماهيش حاجة صعيبة عليا
انا:اما صعيبة عليا...نقبل الهدية هاذي منك توا
مراد:صحيح منجمش نكون معاك...اما الكادو لي هوني تو يخليك تحس لانا بجنبك
انا:ش..شقصدك ؟
مراد:ليلة عيد ميلادك...نحبك احلى وحدة...و هكا و لا هكا مانيش باش نفوت المنظر متاع البرنساس عليا
انا:ش..شباش تعمل ؟
مراد:نراقبك من بعيد كي العادة
انا:علاه هذا الكل ؟
مراد:منعرفش...و ماكش باش تفهمني انتي زادة
انا:اما
مراد:هند...اقبلها امانك
انا:منجمش ندخل بيها لدار هكا...و زيد مفماش داعي لهذا الكل
هز يدو...حطها على خدي...بعدلي خصلات شعري بصوابعو...دخلت بعضي...و قلبي خض بالقاوي...غزرلي ندرا كيف يحكي
مراد:ششش...اسكت شوية...من اول مرة عرفتك فيها و لتوا لا حبيت تسكت
انا:و مانيش باش نسكت
مراد:متلزنيش نسكتك بطريقة اخرى
كبست عالبوات و وخرت خطوة لتالي...نغزرلو مستغربة دخلت بعضي...و معرفتش شنية نعمل...تبسم يحكي
مراد:مجنونة...هيا وقيت باش تمشي...أشرف تو يوصلك للمعهد...قبل ما توفا الحصة متاعك
انا:ب..باهي
كبست عالبوات و خرجت نجري...ساقي اعلى من راسي هاربة من الاحساس لي سيطر عليا جرايرو...اول ما حطني...عطيت على ساقي لدار...لقيت امي في وجهي...غزرتلي مستغربة...تحكي
امي:شنية لي في يدك ؟
انا:اه...حتى شي...شوية كتب خذيتها من المعهد
امي:حضر روحك...غدوة نمشيو مع محمود...تختار الروبة لي عجباتك...و ناخو بقية القضيات
انا:باهي امي
خليتها و طلعت لبيتي نجري...حطيت البوات عالسرير و حليتها بالوقت...جبدت الروبة...و حطيتها على بدني نغزر لروحي في المرايا...نحس في قلبي باش يخرج من بقعتو...كبست عليها...وقعدت على طرف سرير...نحكي
انا:شنية لي قاعد يصير هند ؟...شكون فرات هذا لي قاعدة تورط في روحك معاه...فاش تعمل يا هند
مديت يدي هزيت دبوزة البرفان...خذيت نفس منها...غمضت عينيا بالوقت...توا فهمت قصدو بالقدا وقت قال لباش يكون قريب مني...تسطحت لتالي...و سرحت في افكاري مرة اخرى.
🌸🌸🌸🌸🌸🌸🌸🌸🌸🌸
🔸️حسام يحكي:
طلعت راسي نغزرلها...قداش من مرة جمعتنا البقعة هاذي مع بعض...و في كل حالاتنا...كنت متأكد لي باش نلقاها هوني...خذيت نفس طويل...سكرت الباب...و قربت منها...قعدت بجنبها...من غير حتى كلمة..منعرفش قداش بقينا ساكتين...لا انا نجمت نواسيها...و لا هي قالت كلمة...دورت راسها شوية...غزرتلي...غزرة باردة عاللخر...تحكي
شراز:مش لازم تكون مع مرتك توا ؟
انا:قداش باش تبقى هكا ؟
شراز:ماهوش باش يهمك...حالتي متهمكش حسام
انا:غالطة
شراز:انا ديما غالطة...غالطة كي خليتك قبل سنين غالطة كي عرست براجل منحبوش...و عمري ما حبيتو غالطة كي رجعت زادة...و غالطة كي خليتك تعرس بطفلة تقرا عندي...انا عملت هذا الكل على خاطرو هو...اما في تالي مشى و خلاها بيا...خلاني وحدي وسط أغلاطي...لا نجم نقدم و لا نوخر...زعمة علاه يصير فيا هذا الكل...شنية ذنبي حسام...انت قولي
شنية ذنبي ؟
بقيت نغزرلها...نغزر لدموعها لي محصورين...ياسر تبدلت في شهر هذا...اول مرة نحس لهي تظلمت برشا وسط اللي صار الكل...خذيت نفس نحكي
انا:انتي ما عندك حتى ذنب في هذا الكل يا شراز...حتى حد فينا ماهو مذنب في اللي صار
شراز:ملا علاه خليتني...علاه محبيتش تسامحني ؟
انا:مفما حتى شي نسامحك عليه...انا عمري ما تغششت منك...قد ما تغششت على روحي...و فهمت هذا مأخر برشا
شراز:فهمت هذا الكل...وقت حبيتها هي...مش هكا
انا:شراااز...نعرفك اقوى من هكا
شراز:مانيش قوية حسام...موت بابا هدني عاللخر...باللي عملو فيا...اما عمل المستحيل زادة باش يعوضني...توا بقيت وحدي...معادش نجم نحكي لحد...و لا نشتكي لحد...معادش عندي سند في حياتي نتكا عليه كي نتعب...وفا كلشي يا حسام...كلشي
نزلت دمعتها بالوقت...مديت يدي...عديت صوابعي..على خدها...نحكي
انا:شششش يزززي
نزلت بيدي لكتفها...كي قوات في البكا...جبدتها عندي شوية...حطت راسها على صدري...طرشقت بالبكا اكثر فايت شهر و هي عالحالة هاذي...من وقت عرفت لبوها مات...حتى في الجنازة متاعو...مبكاتش بالطريقة هاذي غرست يدي في شعرها...و تنهدت بالقاوي...منعرفش لي نعمل فيه صحيح و لا غالط...اما منجمتش نخليها وحدها...خذيت نفس نحكي
انا:صدقني هذا الكل باش يتعدا...و الوجيعة هاذي...تو تولي ذكرى...صحيح ماكش باش تنسى...اما باش تتعود مع الوقت
شراز:مانيش قوية كيفك...باش نرمي ورايا كلشي في لحظة
انا:و شكون قالك لانا رميت كلشي في لحظة ؟
جبدت روحها شوية...غزرتلي ندرا كيف...سرحت في لون عينيها...لي كيف البحر لي مقابلنا...هذا لي كنت نعملو من سنين...كنت نغزرلها من غير ما نفد...كنت نسرح في عينيها ساعات...و ميهمنيش في الوقت...اما توا...مش كيما قبل...توا معادش فما نفس الاحساس القديم...انا هوني بصيفتي شنية منعرفش...فقت من سرحتي على صوتها تحكي
شراز:ش شقصدك ؟
انا:قصدي انو الوقت باش يداويك...و السنين باش داويك يا شراز...اكبر غلطة تعملها...انك تدفن روحك مع الماضي
هزتلي براسها ايه...و رجعت قربت مني...حطت راسها صدري مرة اخرى...بقات ساكتة لين هدات شوية...هزت يدها...و عدات صوابعها...على خاتمي...ضيقت عينيا مستغرب...تنفست بعمق تحكي
شراز:تعرف شنية اكثر حاجة نتمناها ترجع
انا:شنية ؟
شراز:اللحظة لي خليتك فيها...اللحظة لي قتلك فيها اني نحب نعيش حياتي...و معادش باش نرجع
انا:شنوة كنت باش تبدل فيها ؟
شراز:كنت باش نقلك
سكتت...و هزت روحها شوية...جات عيني في عينها تبسمت...و كملت كلامها تحكي
شراز:شد يدي حسام...شدني و متفلتنيش امانك...كنت باش نقلك...ايجا خلينا نهربو مع بعض...نمشيو من هوني بلا ما نتلفتو ورانا...كنت باش نقلك لانا نحبك و نموت عليك...و حياتي ما تسوا شي من غير...كنت باش نقلك نحبك كيما عمري ما حبيت حد من قبل
بقيت مركز مع كلامها لتالي...حطت يدها على خدي...و قربتلي اكثر...تحكي
شراز:نحبك...و مزلت نحبك لتوا...مزلت نحبك...و نموت عليك كيما قبل و اكثر يا حسام
حسيت بنفس متاعها...ماشي و يقوا على وجهي دموعها...مزالت على خدها...قربتلي اكثر...و قبل ما تحط شفايفها...على شفايفي...جبدت روحي...منعرفش كيفاش و لا علاه...اما منجمتش نطاوعها...منجمش نعمل هكا في مريم...اكيد مانيش ساقط لهدرجة...اني نوصل نخون مرتي...مهما تعقدت الامور بينا...مهما لي كان بيني و بين شراز...حبي لمريم...مختلف على كلشي منعرفش وين باش توصل بينا...اما لي متأكد منو...اني منجمش نستخايل حياتي من غيرها...خذيت نفس نحكي
انا:هيا قوم روح بيك
شراز:زعمة تحبك كيما حبيتك انا ؟
هزيت روحي وقفت بالوقت...و كلامها ليلة عرسنا مع اختها...تعاود في وذني بالحرف...عديت يدي على وجهي نحكي
انا:هيا قوم...ماكش باش تنجم تسوق و انتي في الحالة هاذي
مسحت دموعها...و وقفت في جرتي...قربت مني شوية تحكي
شراز:شبيك متحبش جاوبني...و الا انت ماكش متأكد من حبها ليك ؟
انا:ميهمش اذا كانت تحبني و لا لا...انا لي متأكد منو اني نحبها...و مستحيل نجم نعيش من غيرها
شراز:كنت تحبني بنفس الطريقة قبل ؟
انا:مريم حاجة اخرى يا شراز...مريم ماهيش كيفك...و لا كيما اي طفلة عرفتها بعدك
شراز:مدامك تحبها لهدرجة...ملا لي كان بينا قبل...شنية تسميه ؟
انا:صداقة...عشرة...كلشي...اما مش حب...و متأكد باش يجي نهار...و تفهم كلامي هذا بالقدا
شراز:مش مهم برشا اني نفهم هذا الكل...اما اكيد باش يجيك نهار...و تفهم لي مريم...ماهيش باش تحبك كيفي
انا:اما ماهيش باش تمشي و تخليني اكيد...هيا نروح بيك توا
شراز:باهي
سبقتني للكرهبة...تنهدت بالقاوي...و خلطت عليها...بقينا طول الثنية ساكتين...لين وصلنا...تلفتتلي تحكي
شراز:مرسي عالتوصيلة
انا:من غير مزية
اول ما نزلت...بقيت نتبع فيها بعينيا...خدمت الكرهبة باش نمشي...اما عاودت حبست في بلاصتي...و انا نغزرلها واقفة قدام الباب مصدومة...فكيت الحزام و نزلت...قربت منها...نغزر لزوز رجال واقفين معاها و هي تصيح
شراز:فااش تعمل ياااخي...مش على اساس مزال وقت
هو:منجمش نعاونك اكثر من هكا مدام
انا:شفمااا هوني ؟
شراز:ح حسام...امانك اعمل حاجة...نحس في روحي باش نهبل
انا:اهدا...و فهمني الحكاية
شراز:ه هذوما متاع الحجز
هو:مسيو...الوقت المحدد وفا...و بخلاف هذوما الكل مظطرين نحجزو على الكرهبة متاع بوك...و حساباتو لي في البنك زادة
شراز:فااااش تحكي...انت هبلت ياااخي...قتلك اعطيني شوية وقت...علاه هكا
هو:الله غالب
انا:ميسالش نحكيو
هو:اكيد تفضل
انا:ميسالش نكلم المدير متاعكم
هو:اما
انا:2min كهو
هو:باهي لحظة
جبد تليفونو...كلمو...و حطو في يدي...جبدت روحي منهم...نسمع فيه يحكي
هو:تفضل مسيو
انا:معاك حسام الماجري
هو:اهلا بيك سي حسام...متوقعتش باش نحكي معاك انت
انا:عيشك
هو:كيفاش نجم نعاونك ؟
انا:شنية حكاية الحجز ؟
هو:للاسف السي طارق...دخل في مناقصة اخر مرة...و خسراتو في املاكو الكل...المدة الموثوقة 3 اشهر...و وفات ليها شهر...و تحسبا لموتو...ما نجمنا نعملو شي
انا:معناها حتى دارو خسرها ؟
هو:مش دارو كهو...املاكو لي في تونس الكل...و لي في امريكا...تابعين لراجل بنتو...تمنيت نجم نعاون مدام شراز...اكثر من هكا...اما الله غالب
انا:ميسالش تقدملي خدمة
هو:اكيد تفضل
انا:تنجم تأجل الحكاية متاع الحجز لغدوة...لين نلقاو حل مع بعض
هو:اكيد سي حسام
انا:عيشك
رجعت تليفون لراجل...كلمو...و نزل تليفون...يحكي
هو:معاك مهلة لغدوة مدام شراز...هيا جماعة رجعو كلشي لبلاصتو توا
رجعت شعرها لتالي و دخلت لدار...خلطت عليها بالوقت نغزر لصالة فارغة...كان الطاولة بقات في الوسط...و الاثاث لي ردوه كل قطعة وين...تبسمت باستهزاء تحكي
شراز:ريت اخرتها شنية يا حسام
انا:اكيد باش تلقى حل
شراز:انا خسرت كلشي
انا:كل مشكلة عندها حل
شراز:كهو معادش نجم نتحمل اكثر...نحس في روحي باش نهبل والله
انا:اكيد انا نجم نعاونك تسدد ديونك
شراز:حساام...تعرف الديون هذوما قداش...باش يكلفوك السوسيتي كاملة
انا:فما حل اخر اكيد
شراز:كيما شنية...انا بعد الليلة...معادش باش تولي عندي دار نرجعلها في اخر النهار
انا:شرايك اول حاجة تلم الحاجات لانتي بحاجتها...نظن هاذي اول خطوة...باش متخسرش كلشي في الحجز
شراز:ع عندك حق...ا اما من وين نبدا انا توا
انا:هاني باش نعاونك
شراز:بالحق ؟
انا:مممم...هيا معادش فما وقت نضيعوه
عديت الوقت معاها...كل كرذونة تسكرها...تنزل دمعتها معاها...اربع ساعات تعداو من غير ما نحس بيهم غزرتلي تحكي
شراز:قهوة و لا اتاي ؟
بقيت نغزرلها مستغرب...دوب تبسمتلي...تحكي
شراز:اكيد مزال عندي حاجة تتكل...ماهمش باش يحجزو عالماكلة زادة
انا:قهوة
شراز:باهي
اول ما خرجت...تنهدت بالقاوي...و قعدت عالطاولة شوية و رجعتلي...حطت الكاسة في يدي...و قعدت بجمبي تحكي
شراز:اكيد اول مرة حد يضيفك عالطاولة
انا:ميسالش عجبتني القعدة
شراز:مرسي برشا حسام
انا:على شنوة ؟
شراز:يزي من دك
انا:باهي...هاني سكت
شراز:لازمني نحجز في اوتيل...و نلقى حل لهذوما وين نحطهم
انا:تنجم تبقى في اوتيل انتي ؟
شراز:فترة لين نلقى دار صغيرة تناسبني...اول شي لازمني ندبر مستودع نحط فيه هذوما
انا:شرااز...ماكش مظطرة لهذا الكل
شراز:حسام...ياخي عندي حل اخر انا ؟
انا:تنجم تبقى عندي
شراز:شنننوة ؟
انا:لي سمعتو ؟
شراز:كيفاش؟ و مرتك...لي اصلا متعرفش شكون انا بخلاف استاذتها و كهو
انا:منقصدش لي فهمتو
شراز:ملا ؟
انا:عندي دار...في ¤¤¤¤¤¤ تنجم تبقي فيها فترة...و تحط دبشك فيها...لين تلقى دار تناسبك...يعني من غير ما تتمرمد في الاوتيلات
شراز:انت وين عايش ؟
انا:مع امي
شراز:مش معرسين جديد...شبيكم مسكنتوش وحدكم
انا:فتحية هكا حبت
شراز:منحبش نتعبك معايا اكثر
انا:معندكش حل اخر
شراز:كان تعرف مرتك بالحكاية ؟
انا:باش تتفهم اكيد
شراز:باهي
انا:هيا قوم ملا
شراز:من توا ؟
انا:من غير ما تظطر تقابلهم الصباح زادة
هزيت تليفوني...طلبت كميونة صغيرة من سوسيتي...و تلفتلها نحكي
انا:برا لم دبشك الكل...فيسع
شراز:باهي
حطت الكاسة من يدها...و هزت روحها وقفت باش تمشي...تلفتت عندي في لحظة...باستني من خدي...و خرجت تجري...بقيت نغزرلها لين بعدت...نفخت بالقاوي و هزيت روحي قربت من الشباك...حطيت يديا في مكاتبي...تعدات صورتها بين عينيا...تذكرت شهويها لي ينزلو عليا في نص الليل...تبسمت من غير ما نحس زعمة رقدت توا...و لا الكعبور متاعي...مزال مفيقها لتوا...منعرفش علاه حسيت روحي توحشتها برشا في الشهر هذا لي تعدا...يمكن خاطر معادش نقعد في الدار برشا...و معادش نراها برشا كيما قبل...ندخل نلقاها راقدة...و نخرج قبل ما تفيق...حتى كرشها...لتوا مريتهاش...فقت من سرحتي كي وصلو الجماعة حليتلهم الباب...غزرتلها نازلة...قربت منها شديت عليها الفاليز متاعها...ريقلنا بقية الامور...و شديت الثنية...اول ما وصلت...خليت الجماعة يهزو كلشي...للڨراج...حليت الباب...و دخلت...دخلت ورايا مترددة...شعلت الضو نحكي
انا:ان شاء الله تعجبك
شراز:يااسر محلاها...عيشك
انا:هيا باهي برشا...تنجم تختار البيت لي تعجبك...و هوكا الدوبل متاع المفاتح و ما تخاف من شي...البلاصة مأمنة هوني
شراز:مرررسي برشا حسام...على كلشي عملتو معايا لتوا مانيش باش ننسى وقفتك جنبي
انا:ما عملت شي...هيا برا ارتاح انتي...وقيت باش نمشي
شراز:خليك شوية
انا:قريب الفجر...لازمني نرتاح شوية قبل ما نمشي للخدمة...و انتي زادة...صحيح قبل ما نمشي...فما لي تحب عليه في الكوجينة...و كان احتجت شي كلمني
شراز:باهي عيشك
انا:تصبح على خير
شراز:و انت بخير
خرجت من عندها و شديت الثنية لدار...الصباح باش يطلع...الحكاية خذات منا ليلة كاملة...طلعت لبيتي حليت الباب بالشوية...جات عيني عليها...غاطسة في نوم...تبسمت بالوقت...بدلت دبشي...من غير ما نعمل حس...اول ما تسطحت...وصلني ميساج بالوقت...حليتو نقرا فيه << رغم لي صار الكل...اما اول مرة نحس روحي مرتاحة هكا...مرسي برشا حسام >> خذيت نفس و رديت عليها << ما تخمم في شي توا...ارتاح و كهو >>...حطيت تليفون على جنب...و تسطحت لتالي نغزرلها...محبيتش نمسها...و لا ندورها عندي...باش متفيقش...قربت منها اكثر....نشم في ريحة شعرها برك...بقيت اكاكا...لين حسيت روحي هديت...و هزني نوم
🌸🌸🌸🌸🌸🌸🌸🌸🌸🌸
🔸️مريم تحكي:
طيشت المنشفة على جنب...و حليت القارد روب...نفرت في الدبش...حطيتو عالسرير...و وقفت في نص نغزرلو حتى شي منهم معاد يجي قدي...حطيت يدي على كرشي...و تنهدت بالقاوي نحكي
انا:شنلبس انا توا...ريت لي عملتو فيا انتي...تصدق لانا نحبك تجي طفلة...هكا حاسة
تبسمت و انا نحكي معاها...فما شي داخلي يقولي انو اللي داخلي طفلة...و لا انا هكا نحب...تلفت نغزر لسوريتو...لي خلاها مطيشة عالفوتاي...هزيتها في يدي كبست عليها...حسيت بيه وقت دخل الفجاري...و خرج حتى قبل ما نفيق...زعمة هذا الكل...باش يتهرب مني كلشي قاعدة نعمل فيه...اني نتغلب عالوحم متاعي...و نبعد عليه حتى انا...يزي لي ريتو منو لتوا...خاصة اخر فترة...قربتها شوية لخشمي...ريحتو كهو...لي تخليني نرتاح...وقت يبدا بعيد...شي اقوى مني...يخليني متعلقة بيه...اما في لحظة...كل قطرة دم في بدني جمدت ساقيا حسيتهم رزنو...و معادش ينجمو يهزوني اكثر نزلتها شوية...و نزلت مني دمعة سخونة...خذيت نفس بالسيف و مديت يدي مسحتها حتى دمعة ميستهالهاش توا فهمت لي قاعد يصير بالظبط...ميساجات و مكالمات في نص الليل و سهرياتو برا لوجه الصباح و توا ريحتها لي لاصقة فيه...غمضت عينيا بالقاوي...و رجعت حليتهم شنية كنت تتوقع يا مريم...هذا كان واضح من اول ليلة نسيت شكون ماخذة انتي...حسام الماجري...كان هو ماخذك لعبة...فاش قام حتى ميكونش مع غيرك...قعدت على طرف السرير...نحس في روحي تخنقت...حتى الفونتولين متاعي وفات...رميت السورية من يدي و رجعت شعري لتالي...نحكي
انا:شنية الحالة لي وصلتلها انا...وين غرقت روحك يا مريم...كيفاش وقعت بالطريقة هاذي...شكون حسام لي رميت روحك عندو
حليت الكاب شوية...نحاول نهدي روحي...للحظة لقيت روحي نسأل شكون العبد هذا لانا عايشة معاه..مستحيل يكون حسام لي عرفتو...مستحيل...زعمة كان نمشي من هوني شنية باش يصير...بابا و رنيم شنية يصير فيهم و الصغير لي في كرشي...نعرف باش يتعمد يذلني بيه كان انا عطيتو الفرصة هاذي..هاذي اكثر لحظة معرفتش شنية نعمل...و لا وين نمشي بروحي...حتى بابا خسرتو و معادش باش يغزرلي مرة اخرى...تذكرت الموعد متاع الطبيبة...مش وقت ضعفك يا مريم...هذا لي قلتو لروحي...قبل ما ناقف...قد ما حاولت نلقى دبش يناسبني اما شي...اللي عندي الكل ضياق عليا...بعد ما سمنت و خاصة كرشي خرجت اكثر...برغم اربع شهور كهو...لبست لي جا على يدي...و غطيت كرشي بجيلي خفيفة...خاصة و الصيف بدا يخرج...عدلت شعري...و خرجت من البيت...ما لقيت حتى حد لوطة...كبست على صاكي و خرجت...احسن شي نمشي شوية...خاصة بعد الفترة لي عديتها في الدار...اول ما وصلت للكلينيك وقفت قبل ما ندخل...كي تذكرت لمفماش فلوس تحتي وخرت خطوة لتالي مروهجة...كيفاش باش ندخل للكلينيك هاذي مرة اخرى و نطلب نفس الطبيبة...نعرف لهو نسى الموعد هذا جملة...باز لاهي معاها توا...تنهدت بالقاوي و رجعت لتالي...قعدت على اول كرسي عارضني...نخمم في اللي لازم نعملو...و جنس الصغير لي نحب نتاكد منو...قداش باش نبقى لهكا منعرفش خذيت نفس و هزيت روحي...يمكن اذا حكيت معاها تو تتفهمني...اما زادة ميجيش هكا...تذكرت الكارت متاعو لي بقات في صاكي...تقويت على روحي و دخلت قعدت عالكرسي...نغزر في لي كوبل اللي مع بعضهم للحظة تمنيت كان جا معايا هو زادة...حتى بالكذب ميسالش...تعدا الوقت و انا غاطسة في افكاري...فقت من سرحتي على صوت الفرملية...هزيت روحي بالسيف دخلت عندها...اول ما شافتني تبسمتلي...تحكي
هي:تفضل مدام
انا:عيشك
هي:لباس عزيزتي...كيفاش تحس في روحك ؟
انا:لباس عيشك
هي:ملا اليوم باش نعرفو جنس الصغرون
تبسمت بالسيف...و طلعت راسي غزرتلها...نحكي
انا:نجم ندفع بالكارت ؟
هي:مفماش داعي
انا:شقصدك ؟
هي:سي حسام دافع الحقوق الكل من قبل...صحيح وينو علاه مجاش معاك...خاصة في لحظة كيما هاذي
انا:اه...مش هوني هو مسافر
هي:باهي تفضل
تسطحت لتالي...و دورت راسي...نغزرلو...نستنى فيها تحكي...قلبي خض بالقاوي...و انا نسمع في دقات قلبو مرة أخرى...تبسمتلي تحكي
هي:مممم قاعدة نرا البنوتة هاذي باش تطلع مزيانة كيما امها
انا:ت تقصد لأنا
هي:إنتي تستنى في بنوتة حلوة على قريب
نزلت مني دمعة أخرى...أما المرة هاذي...مش حزن...أول مرة نفرح بعد المدة هاذي لي تعدات عليا...تبسمت نحكي
انا:ص صحتها مليحة مش هكا
هي:متخافش...لباس عليها
انا:نجم نسمع دقات قلبها مرة أخرى
هي:اكيد عزيزتي
تبسمت مرة اخرى...و انا نسمع فيهم...حسيت روحي هديت اكثر...اول ما كملت...مسحت كرشي...و هزيت روحي...خذيت من عندها الايكو...غزرتلي تحكي
هي:مدام مريم...هذا الدوا لازم تاخو في وقتو
انا:م مش على أساس لباس عليها ؟
هي:صحيح...أما الدوا هذا ليك إنتي...شوية فيتامينات باش تعاونك
انا:باهي عيشك
خرجت من عندها...و تفكيري في كلامها...منعرفش كيفاش باش نشري دوا هذا توا...و مستحيل نطلب منو مهما صار...حتى الكارت متاعو...باش نرجعها...احسن شي ما صرفت منها فلس واحد...هزيت الورقة متاع دوا نقرا فيها...لعبت بيا ساقي في اخر درجة...قلبي خض بالقاوي...فقدت توازني...و جيت بين يديه...منجمتش حتى نهز راسي...و يا ريتني مهزيتوش...و لا ريت اكا الغزرة في عينيه...دم جمد في عروقي...و هو يهز فيا و يحط...يغزرلي مصدوم...كأنو يلوم فيا عالحالة لي وصلنا ليها الكل...تعدلت في وقفتي...جبد روحو مني نزل راسو غزر لكرشي...نزلت يدي بالوقت...غطيتها...و قربت منو شوية...نحكي
انا:ب...بابا...ب
قص عليا صوت من تالي...صوت نعرفو بالقدا...يحكي
صبري:عم احمد
تلفت بالسيف نغزرلو...جات عيني في عينو...حسيتو حتى هو تصدم...بدلها بضحكة يحكي
صبري:مريم...اهلا بيك
انا:ع عالسلامة
صبري:لباس ماهو...شتعمل هوني وحدك ؟
انا:تعديت لطبيبة متاعي
بابا:صبري ولدي...التحاليل حاضرة
صبري:اكيد عم احمد
بابا:تفضل اعطيهملي عيش ولدي
تلفت من غير ما يرجع يغزرلي مرة اخرى...بقيت نغزرلو و هو يحكي معاه...و يعطيه في التحاليل...حاولت نخلط عليه...اما متلفتش حتى باش يغزرلي اخر مرة تنهدت بالقاوي...و انا نشوف في صبري يقرب مني...غزر لكرشي بالوقت...حشمت منو حتى هو...منعرفش علاه تبسم يحكي
صبري:مبروك عليك
انا:ع عيشك
صبري:متعبش روحك برشا
هزيتلو براسي ايه...تبسملي و تلفت باش يمشي...قربت منو شوية نحكي
انا:صبرري
تلفت عندي بالوقت...تقويت على روحي...و قربت منو شوية...غزرلي يحكي
صبري:تفضل
انا:صبري أنا نحب...أنا كنت
صبري:لباس مريم ؟
انا:نحب نسألك على بابا
صبري:تفضل
انا:ت تحاليل شنية لي جا على خاطرها
صبري:طمن مفماش حاجة خطيرة
انا:نحب نعرف علاه عملهم
صبري:مرييم...متخافش...مفماش حاجة خطيرة...و متعبش روحك برشا بالحكايات هذوما...مش باهي ليك و لصغير زادة
انا:باهي...عيشك
صبري:من غير مزية...كان احتجت شي...انا موجود هوني
انا:عيشك
خرجت من غير حتى كلمة...نعمل في الخطوة بالسيف منعرفش وين هازيني ساقيا...وقت بحذا بوتيك متاع صغار...نغزر لدبش لي في روز...تنهدت بالقاوي...و كملت ثنيتي...منحبش نرجع لدار هذيكا مرة اخرى...قعدت في أول كرسي عارضني...و تكيت لتالي...نغزر للبحر منعرفش شنية لي قاعد يصير معايا...حطيت يديا زوز على كرشي...ملحقتش نفرح بيها كيما لازم...زعمة كرهني لهدرجة...انو مينجمش حتى يغزر لوجهي...شبيه مسألش عليا حتى شبيني...و لا شنعمل في كلينيك وحدي...مع انو مش مستانش يجي لبلاصة هكا...باز خاطر صبري موجود غديكا...برغم لي صار بينا الكل اما تصرف كانو ما صار شي...يمكن توا برك فهمت علاه بابا...كان يحبو لهدرجة...منعرفش قداش تعدا وقت بالظبط...عديت نهار الكل في نفس البقعة...لين حسيت روحي هديت...هزيت روحي بالسيف...و رجعت لدار لقيت الدنيا قايمة...الكل داخل بعضو...قربت مني خالتي فتحية تحكي
فتحية:مررريم...وينك لتوا عزيزتي...شبيك متهزش على تليفونك
قبل ما نجاوبها...دخل محمد يجري...أول ما شافني تنهد بالقاوي...يحكي
محمد:مريم وين كنت ؟
انا:لباس عليا...حبيت نقعد وحدي و كهو
فتحية:يا روحي تفجعت عليك
انا:متخافش خالتي هاني لباس عليا
فتحية:خليني نكلم حسام...من بكري يفركس عليك حتى هو
حسيت بدوخة قوية روهجتني...شدني محمد بالوقت حطت تليفون من يدها و قربتلي تحكي
فتحية:مرييم...شبي بنتي ؟ لباس ماهو ؟
انا:لباس خالتي...نحب نتسطح شوية
فتحية:محمد عاوني نطلعها لبيتها عيش ولدي
استندت عليه...و طلعنا دروج وحدة وحدة...أول ما وصلت لبيتي...تلفت عندها نحكي
انا:ميسالش نبقى معاك ؟
غزرتلي مستغربة...و قربت مني...شدتني من يدي تحكي
فتحية:ايجا عزيزتي
دخلت معاها لبيتها...تسطحت على سريرها...جات باش تغطيني...غزرتلها نحكي
انا:نحب نرقد عندك
تبسمتلي...و قربت قعدت قدامي...هزيت روحي شوية حطيت راسي على حجرها...اكثر وحدة نحسها تحبني بالحق...حطت يدها تعدي فيها على شعري...و تحكي
فتحية:شبي بنتي...شكون غششها ؟ حسام عملك حاجة ؟
انا:لا
فتحية:ملا شبي حالتك هكا ؟
انا:ميسالش نطلب منك حاجة ؟
فتحية:أكيد يا روحي
انا:نجم نقلك أمي
منعرفش علاه طلبت منها هكا...اما بالرسمي وليت نحس روحي وحدي...دورت راسي نغزرلها...اول مرة نرا دموعها محصورين بالطريقة هاذي...تبسمت تحكي
فتحية:تعرف وقت كنت حبلة بمحمد...تمنيت تطلع عندي بنية...نربيها و ندللها...برغم حسام كان يستنى انو يكون عندو خوه...أما داخلي تمنيت تطلع طفلة
انا:متخافش يسمعك توا ؟
فتحية:هههههههه شيهمني فيه...هوكا كبر و ولا راجل توا أما تعرف حاجة بعد السنين هذوما...عرفت علاه ربي معطانيش بنية
انا:علاه ؟
فتحية:خاطر في تالي عوضني بيك إنتي...إنتي يا مريم بنتي لي مجابتهاش كرشي...معزتك قد ولادي و أكثر منحبش نراك متغشة و لا مقلقة...إنتي توا متعرفش فرحتي بكلمة امي من شفايفك
نزلت عليا شوية باستني من خدي...تبسمت بالوقت...لي حسيتو اكبر ببرشا من اني نوصفو...بعدتلي شعري تحكي
فتحية:نحب نسمع كلمة أمي من عندك ديما
انا:أمي
فتحية:ممممم
انا:بنتي زادة محظوظة باش تكون عندها ام كيفك إنتي
فتحية:بنتك ؟
انا:مممم
فتحية:صحيح لي سمعتو ؟
انا:صحيح...تعرف علاه مش خايفة عليها...خاطرك انتي باش تكون موجودة معاها ديما
فتحية:شششش هي تحتاج أمها أكثر مني...و نعرف بنيتي قوية...و بنتك باش تطلع كيفك انتي زادة
انا:اليوم أنا ريت بابا في الكلينيك...تعرف لهو مطلعش في وجهي...نعرف روحي غلطت في حقو برشا...نعرف عملت حاجات...مكانش لازم تصير...اما حتى مكلفش روحو يسأل على حالتي...زعمة ماهوش باش يسامحني مرة أخرى ؟
فتحية:ماخو بخاطرو من بنتو الوحيدة...اما تو يجي نهار و يستوعب هذا الكل
انا:خايفة...ميجيش النهار هذا...خايفة منجمش نقولو سامحني...خايفة نخسر الفرصة هاذي زادة
فتحية:مريم عزيزتي...نحي الأفكار هذوما من مخك توا و إرتاح...هكا باش تعب روحك...و تنكد على بنتك زادة و بوك باش يسامحك صدقني
غمضت عينيا بالوقت...نستحلى في لمسة يدها على شعري...و حليتهم على ريحتو...على يدو هو...شنعمل أنا في حضنو توا ؟ ياخي قاعدة نحلم و لا شنية لي صار دورت راسي شوية نحكي
أنا:ش شتعمل هوني أنت ؟
حسام:أنا باش نسألك وين كنت ؟
أنا:أمي فتحية وينها ؟
هزيت روحي شوية...باش نقوم...عاود كبس عليا بيديه زوز رجعني عندو...قحرتلو نحكي
انا:سييبني فاش تعمل ؟
منعرفش كيفاش جا لهوني...و شبيها خلاتنا وحدنا اففف شيعرفها لي قاعد يصير...في بالها ولدها خايف عليا...غزرلي ندرا كيف يحكي
حسام:اهدا
انا:نحب نبقى وحدي
حسام:علاه جيت لهوني ؟
انا:حسام...تاعبة و نحب نرتاح...تنجم تخرج
قربلي أكثر...لين حسيت النفس تسكر عليا...حط يدو على كرشي...يحكي
حسام:نحب نبقى مع بنتي
طلعت راسي شوية...جات عيني في عينو...عندي برشا مغزرتش لوجهو هكا...و لا حسيت بقربو...شهر لي تعدا كانو مش موجود هوني...للحظة حسيت روحي باش نضعف...جبدت روحي منو نحكي
انا:فاش تعمل...و شكون قالك أصلا ؟
حسام:سمعتك و إنتي تحكي مع فتحية ؟
انا:على هذاكا انت هوني ؟
حسام:مريم اهدا أمانك...مش باهيلك الغش هذا الكل
انا:مانيش متغشة...و أنت آخر حد نتغشش منو...شنية تحب مني ياخي ؟
حسام:شنية لي صار...وين مشيت بعد ما خرجت من الكلينيك ؟
انا:شيهمك فيا...على أساس يهمك برشا الموعد متاعي
حسام:صدقني تشديت في الإجتماع...وقت وصلت خبرتني طبيبة لإنتي خرجت
انا:أثرت فيا برشا...من غير دراما هاذي الكل سي حسام مانيش بحاجتك أنت...تعرف حاجة أحسن شي منجمتش توصل...خاطر اللحظة هذيكا خاصة بيا انا و منحبش شكون يفسدها عليا
حسام:مررريم
انا:كههههو عاد...شنية مزلت تحب مني اكثر...هاني قاعدة في دارك و كافية شري عليك...لا سألتك وين روحت و لا من وين جيت...و انت أعمل نفس شي زادة متسألنيش...خاطرني مانيش باش نجاوبك...و أسئلتي ليك...معندهاش جواب زادة...يزززي أمانك...خليني رايضة...خلي الأيامات لي مزالت بيناتنا منكرهوش فيها بعضنا أكثر...أماان
شدلي وجهي بين يديه...جبدني عندو...قربلي اكثر يحكي
حسام:أيامات شنية...و كره شنية...ياخي مجنون أنا باش نكره أم بنتي...ياخي مهبولة...و لا تتبهلل...باهي نعرف روحي غلطت...أما مستحيل نسلم فيك...تسمع فيا
أنا:كذبة جديدة هاذي ؟
حسام:لااا...اللي نحسو معاك إنتي...عمرو ما كان كذب و مانيش مستعد نخليك جملة
انا:و شنية صار في اللعبة متاعك...و لا لقيت البديل ؟
حسام:يزززي اللي صار عمرو ما كان لعبة...معادش تبعدني عليك...و على بنتي أكثر أمانك
أنا:ماهيش بنتك...قداش من مرة نقلك لي صغير هذا متاعي أنا و كهو...مانيش باش ننسى لأنت حبيت تقتلو أول ما عرفت بيه...ماكش باش تكون بوها...قبل ما تتخلص من الأنانية متاعك
حسام:ششش صدقني مستحيل كنت نخليك تقتل اللي في كرشك...لحظة غش...و فقت منها مأخر
أنا:لااا ماهيش لحظة غش...أنت قلت لي حبيت أنو يصير...أصلا ستانست بردة فعل كل حد فيكم معادش يقلقني...و معادش نحب تبرير من حتى حد...نتوما الكل كيف بعضكم...أم بابا لي صورتها لتوا بين عينيا...و هي تبعد فيا على أمي...حتى مخلاتنيش نودعها كيما يلزم بعدها بابا لي فرض عليا نعيش مع مرا أخرى غير أمي بعدها أختي...لي كانت تحاول تفك بلاصتي...ستخايلت لأنت باش تكون أحسن منهم...أما حتى أنت ما قصرتش كملت خذيت لي بقى مني...و كنت باش تقتل بنتي زادة و في الأخير فرضت عليا نعيش معاك هوني...جيست باش ترضي غرورك...يزززي و معادش تضيع وقت أكثر مدامك تنجم تكون في بلاصة أخرى
جبدت روحي منو...لتوا قلبي معبي من جيهتو...خاصة بعد اللي صار صباح...أول ما وقفت...قرب مني هزني بين يديه...غزرتلو مستغربة...نحكي
أنا:فاش تعمل...نزلني
حسام:ششش اسكت
انا:حسااام
دخلت أمي فتحية بالوقت...نزلت راسي من الحشمة تبسمت تحكي
فتحية:شفما هوني ؟
حسام:سامحني فتحية...أما وقيت باش مرتي ترتاح في بيتها...و زادة وقت نومك توا...ميجيش نعطلوك أكثر
فتحية:برا ولدي رد بالك عليها...تصبحو بخير
حسام:و إنتي بخير
خرج من عندها...و دز الباب متاع بيتنا بساقو...و سكرها بنفس الطريقة...حطني عالسرير...و قعد بجنبي...جبدت روحي باش نحكي...عاود رجعني بقوة...ترميت في حضنو...كبس عليا بيدو يحكي
حسام:مفما حتى بلاصة نجم نمشيلها من غير مرتي و بنتي...و إنتي بلاصتك هوني...حبيت و لا كرهت
أنا:متتأملش برشا...فما حاجات أقوى من انو نتحكمو فيها
حسام:ميزيتش توا من الكلام الفارغ
أنا:ابعدني نحب نرتاح
حسام:منبعدش...و مانيش قاعد معاك إنتي...قاعد مع بنتي
انا:وين كنت وقت بنتك كانت بحاجتك ؟
حسام:كنت موجود ديما
انا:لا أنت عمرك ما كنت موجود...و اليوم تأكدت من هذا الكل
حسام:باش نرجعو لطبيبة مع بعض...نحب نراها و هي تتحرك داخلك
أنا:أما ماكش باش ترجع لي حسيتو...سيبني توا نحب نرقد
حسام:خلينا نبعدو فترة من هوني...نمشيو أنا و إنتي
أنا:بااز تفدلك...توا تذكرت باش تبعد...كان تعمل مزية أبعد عليا و رتحني
حسام:باهي...بعد غدوة نازل للبلاد بحذا عمر...نعدي الويكاند...هكا نرتحك مني شوية
أنا:و مع زهرة زادة ؟
حسام:مممم
انا:تحكي بالرسمي
حسام:شبيك كبشت ؟ مش تحبني نبعد
أنا:على أساس باش نموت عليك انا...توحشت صحبتي و كهو
حسام:صحبتك باش ترجع بعد أسبوع و لا زوز...تو تشبع منها
أنا:نحب نجي معاك
حسام:أما بشرط
انا:شنية زادة ؟
حسام:نحبك ترتاح...إرتاح و ما تخمم في شي...و أنا نوعدك باش نخلي عم أحمد...يرجعلك مرة أخرى
انا:متدخلش في عيلتي حسام...منحبش نخسرهم أكثر أنا راضية باللي اخترتو
حسام:أنا كسرت العيلة هاذي...و أكيد باش يجي نهار و نصلحها
جيت باش نحكي...قص عليا...كي باسني من راسي يحكي
حسام:هيا إرتاح بالقدا...غدوة باش نعملو دورة مع بعض و نتعداو لطبيبة...باش نطمن لإنتي تنجم تسافر...خاطر طريق بعيدة
أنا:فاش قام حتى نخرجو
حسام:هكا شاهي نعمل دورة مع مرتي
أنا:يزي قالو مرتي...هاذي أكثر كلمة كرهتها
حسام:و أنا وليت نعشقها
انا:شنية شربت قبل ما تهد عليا...فجأة نزلت الرومانسية عليك
حسام:هيا أرقد برك...لسانك باش يدخلك في حاجات أكبر منك
أنا:للأسف دخلني في متاهة...مانيش باش نخرج منها مدامني حية
حسام:مررريم يزززي امانك
جبدت روحي منو شوية...حطيت راسي عالمخدة...و غمضت عينيا...منحبش...نبقى في حضنو اكثر...حط يدو على شعري...يعدي فيها...لين هزني نوم...من اول تاعبة...و كمل عليا هو...اما رغم لي صار اليوم...بنتي كانت أحلى هدية...حسيتها جاتني...و عطاتني قوة جديدة...و أكيد مانيش باش نسلم فيها لآخر لحظة في حياتي.
#زهرة🌸
#سمر_القايد💌