زهرة🌸

الحلقة العشرون

🔸️حلقة 20
🔸️زهرة تحكي:
حليت عينيا مروهجة...أصلا منعرفش كيفاش غفيت نسمع في المطر لي ماشي ويقوى...نحس في خواطري دايرة و قلبي يدق بالقاوي...وجيعة في كرشي..مفهمتش منين...يمكن من الخوف اللي باش يصير في الجلسة قد ما ستنيت النهار هذا..متوقعتش نحس بهذا الكل..هزيت روحي بالسيف...مشيت لبيت البانو...ظاهر فيهم الكل مزالو راقدين...غسلت وجهي اكثر من مرة...بليت رقبتي و غزرت لروحي...لازمني نكون مليحة...مهما صار...هذا اللي كنت نقول في سري...خذيت نفس و رجعت لبيتي بدلت دبشي...و خليت شعري على كتافي...حطيت يدي على قلبي...نهدي في روحي...فقت من سرحتي...على دقان الباب...دورت راسي نغزر لخالتي نعيمة...تحكي
نعيمة:زهرة بنتي...عمر يستنى فيك اللوطة
انا:باهي خالتي...تو ننزل
تبسمتلي و خرجت...غزرت لروحي اخر مرة...هزيت صاكي...خذيت نفس و نزلت اللوطة...لقيتو يحكي مع حسام...طلع راسو غزرلي...يحكي
عمر:حاضرة
هزيتلو براسي ايه...غزر لحسام ندرا كيف...يحكي
عمر:نحكيو مبعد
حسام:باهي
قربت منهم شوية...صبحت على حسام...تبسملي بالوقت تلفت لعمر و مشيت قبل ما يقول حتى كلمة...سبقتو للكرهبة...خادلط عليا بالوقت...أصلا من آخر مرة مقابلتوش برشا...و لا حتى حكينا في اللي باش يصير بقينا طول الثنية ساكتين...تفكيري الكل...كيفاش باش نقابل مراد و امي...و شنوة اللي باش يصير توا...فقت من سرحتي...كان وقت شد الفران بالقاوي..طلعت راسي نغزر للمحكمة...غمضت عينيا بالقاوي...حسيت بيدو لي تحطت على يدي...يحكي
عمر:متخافش...أنا معاك
الكلمة هاذي...خلاتني...نحل عينيا شوية شوية...و نغزرلو...نحب الخوف اللي داخلي الكل يوفا في لحظة تبسمتلو...و هزيتلو براسي ايه...عدا عينيه على وجهي يحكي
عمر:هيا ملا
انا:باهي
جبد يدو من يدي و نزل...خذيت نفس و حليت الباب أول ما نزلت...جات عيني عالكرهبة متاع مراد...قلبي دق بالوقت..كبست بيدي عالباب نغزرلو..نزل من الكرهبة جات عيني في عينو...هزني و حطني...و تبسم على جنب...تبسيمتو دخلتني بعضي اكثر...منعرفش علاه حسيتو يخبرني انو باش نطلع خاسرة في الاخير...تلفت لامي لي نزلت معاه...قحرتلي...و قربت منو دخلت معاه كبست بيدي عالباب اكثر نوازن في روحي...خايفة عاللخر من اللي باش يصير الداخل...فقت من سرحتي على يدين عمر اللي تحطو على كتافي يحكي
عمر:هيا زهرة
خذيت نفس...نحاول ناخو القوة منو...باش نجم نواجه مراد...رخفت يدي و بعدت لتالي...سكر الباب...و قرب مني...دخلت معاه...لقيت مراد يحكي مع المحامي...و امي واقفة على جنب...حاولت نتلفها...اما في لحظة هدت عليا...لقيتها واقفة قدامي...دزتني بيدها تحكي
امي:ماهوش باش يتعدالك لي عملتو يا زهرة...هذا لي حبيت توصلو انتي...جرجرنا في المحاكم...و تمسخ في سمعتنا...باهي...انا نوريك شنعمل فيك
عمر:احترم روحك مدام...نظن نبهت عليك من قبل...و قتلك معادش تقربلها...و لا تحكي معاها...خاصة كي نبدا معاها انا
غزرتلو ندرا كيف...و جات باش تحكي...حبستها بيدي نحكي
انا:اعمل لي تحب عليه امي...معادش يهمني فيك لا انتي و لا راجلك...لحق الوقت باش تفهم لهو ميحبكش...و عمرو ما حبك
هزت يدها باش تضربني...منعرفش كيفاش شديتها قبل ما تحطها على خدي...كبست عليها نحكي
انا:رد بالك تحط يدك عليا مرة اخرى...تصرفاتك هذوما ماهمش باش يخلوني نرجع لتالي...كان وقت نحط مراد في الحبس
نطرت يدها...و خليتها واقفة تغزرلي...تلفت لعمر نحكي
انا:ميسالش نبعدو من هوني...تخنقت برشا
هزلي براسو ايه...قربت منو شوية...بعدت عليها و على مراد...وصل المحامي بالوقت...قرب من عمر يحكي معاه...تكيت لتالي...ضربة زوز نغزر لمراد...لي قاعد يحكي مع امي...و ظاهر فيه مغشش منها...فقت من سرحتي...كي طلبونا بالاسم...هزيت روحي وقفت غزرت لعمر...غزرلي يطمن فيا...هزيتلو براسي إيه...قبل ما ندخل...لمحت مريم جاية تجري...غزرتلها نحكي
انا:مريم
مريم:حمد الله لحقت...سامحني عزيزتي
انا:باهي...احسن انك جيت
عمر:هيا توا
قربت من مريم شديتها من يدها و دخلت...قربتلي تحكي
مريم:متخافش زهرة...احنا معاك ديما
هزيتلها براسي باهي...و جبدت يدي من يدها...قربت من المحامي...وقفت قدامو...طلعت راسي نغزر لمراد هزني و حطني...نفس النظرة ديما...رغم كلشي...اما حسيت لهو مراد نفسو...محبيتش نوصل معاه لهوني أما هو مخلاش طريقة اخرى...طلعت راسي شوية نغزر للقاضي و هو يحكي
القاضي:محكمممة
غمضت عينيا بالقاوي...و رجعت حليتهم...من الكلمة هاذي...تأكدت انو صراع مع مراد بدا توا...و ندرا وين باش يوفا...كبست على يدي و انا نسمع فيه يحكي
القاضي:يتقدم محامي الدفاع و المدعي
ريتهم كيفاش وقفو الزوز...غزرلهم...ورجع كمل كلامو يحكي
القاضي: ﺑﺘﻘﺮﻳﺮ ﺍﻟﻤﺪﻭﻻﺕ في ﻤﺠﻠﺲ ﺍﻟﻘﻀﺎء
ﺗﻢ ﻗﺒﻮﻝ ﻗﻀﻴﺔ ﺯﻫﺮﺓ الحسيني...و هي قضية ﺍﻟﺘﺤﺮﺵ من طرف زوج ﺃﻣﻬﺎ ﻣﺮﺍﺩ بن عيسى...ﻭﻗﺪ ﻋﻘﺪﺕ ﺃﻭﻝ ﺟﻠﺴﺔ ﻟﻼﺳﺘﻤﺎﻉ...ﻭﺍﻟﻨﻄﻖ ﺑﺎﻟﺤﻜﻢ...ﻭﺍﻟﺬﻱ ﺳﻴﺘﻘﺮﺭ
ﺑﺤﺴﺐ ﺍﻟﻤﺮﺍﻓﻌﺔ ﺑﺘﺎﺭﻳﺦ 17/12/2016...بدأت الجلسة
قرب ماتر عبد النور لنص...شكرو...و تلفت عندي يطمن فيا بعينيه...هزيتلو براسي ايه...نسمع فيه يحكي
عبد النور: ﺳﻴﺎﺩﺓ ﺍﻟﻘﺎﺿﻲ...ﺗﻘﺪﻣﻨﺎ ﻟﺤﻀﺮﺗﻜﻢ
ﺑﻄﻠﺐ ﻣﻦ ﻣﻮﻛﻠﺘﻲ ﺍﻵﻧﺴﺔ ﺯﻫﺮﺓ الحسيني...التي تقر انها تعرضت لي تحرش و الاعتداء بالضرب من طرف المدعو مراد بن عامر...الذي يفترض انو راجل امها...لم يكتفي المدعو عليه بمراد بالتحرش فقط
هو:اعتراض سيادة القاضي
القاضي:اعتراض مرفوض
عبد النور:زهرة تعرضت لضرب من راجل امها...و فوق هذا الكل السيد مراد كان يجبرها تاخو دوا...عبارة عن مهدئات باش ينجم يحبسها في الدار...و باش ينجم يقرب منها و يعمل لي يحب عليه بلا حتى مقاومة منها
غزرت لمراد بالوقت...متكي لتالي...و يغزرلي...كانو مش في محكمة جملة...اصلا توقعت لي الكلام هذا ماهوش باش يأثر فيه...باقي نسمع في ماتر عبد النور يحكي
عبد النور:بلا ما ننسى الظغط النفسي لي كانت تعيشو موكلتي زهرة...من طرف مراد...و التهديد لي كانت تسمعو منو كل يوم و كل ليلة...و طول السنين هذوما هو تعمد يخليها ساكتة...تحت ظغط الخوف و التهديد المستمر
هو:اعتراض سيادة القاضي
القاضي:اعتراض مقبول
غزرت لمحامي مراد...كي هز روحو وقف...غزرلي و قرب وقف في نص...يحكي
هو:ﺳﻴﺎﺩﺓ ﺍﻟﻘﺎﺿﻲ...المدعي زهرة الحسيني تصر ﻋﻠﻰ
ﺇﺩﺍﻧﺔ ﻣﻮﻛﻠﻲ ﺍﻟﺴﻴﺪ ﻣﺮﺍﺩ بن عامر ﺑﻘﻀﻴﺔ
ﺍﻟﺘﺤﺮﺵ ﺭﻏﻢ ﺃنو مفماش ﺩﻟﻴﻞ قاطع...ﻳﺜﺒﺖ ﺍﻟﺘﻬﻤﺔ ﺍﻟﻤﻮﺟﻬﺔ اليه...و كلها مجرد ادعاءات كاذبة...تحاول بيها تشويه سمعة سيد مراد...لعدة اسباب لا نعلمها...و بما انو المدعي...ﻣﺴﺘﻤﺮ ﻋﻠﻰ ﺗﻮﺭﻳﻂ ﻣﻮﻛﻠﻲ...تنجم تسمحلي ﺑﺎﺳﺘﺪﻋﺎء شاهد واحد...كافي باش تعرف صحة القضية
القاضي:تفضل
هو:مدام انتصار...زوجة مراد و ام زهرة
هز يدو شاور لامي باش تقرب...دورت راسي نغزرلها باقي نتبع فيها بعينيا لين وصلت...غزرتلي ندرا كيف...و تلفتت للقاضي تحكي
امي:الكلام لي يقول فيه المحامي صحيح...انا ولا مرة ريت مراد قرب منها...و لا حتى صار شي من الكلام اللي تحكي فيه...بالعكس...طول الفترة لي عشنا فيها مع بعض...مراد كان يهتم بزهرة كيما اختو و اكثر...الادعاء هذا كاذب...منعرفش علاه بنتي قاعدة تتصرف هكا...و لا شنية سبب ورا هذا الكل...منعرفش علاه تحب تتهم راجلي...اما لي متاكدة منو...انو مراد بريء من تهمة هاذي
بقيت نغزرلها مصدومة...حسيت بدموعي باش تنزل خذيت نفس بالقاوي...نمنع فيهم...تلفت شوية...غزرت لعمر...لقيتو مركز معايا...هزلي براسو لا...فهمتو ميحبنيش نبكي...تنهدت بالقاوي...و تبسمتلو بالسيف نغزر لماتر عبد النور وقف يحكي
عبد النور:عندي أسئلة...لمدام انتصار
القاضي:تفضل
عبد النور:مدام انتصار...نفترضو كلامك صحيح...تنكر انو مراد مضربش زهرة من قبل ؟
تلفتت غزرتلي بالوقت...دورت راسي بالوقت...منحبش عيني تجي في عينها...نسمع فيها تحكي
امي:كلامك صحيح
عبد النور:شنية سبب ؟ باش يخلي راجل امها يضربها و هي في العمر هذا
عبد النور:عدات ليلة برا...من خوفو عليها عمل هكا
عبد النور:ملا قتلي من خوفو...بعد الاعتداء هذا نحب نذكرك انو بنتك مخرجتش اسبوع من بيتها...محاولتش تفهم الحكاية...زعمة علاه مكانتش تفيق و لا تحكي معاك...ميكونش بسبب الحرابش لي كان راجلك يعطيهملها
هو:اعتراض
القاضي:تفضل
هو:مفما حتى دليل يثبت كلامو...و انو هي كانت تاخو دوا من قبل
عبد النور:تفضل سيادة القاضي التقرير الطبي...اللي يثبت انو هي كانت تاخو مهدئات من قبل...و تقرير يثبت انو هي تعرضت لضرب زادة...و انو حالتها النفسية ولات مظطربة
حط نفس التقرير في يد محامي متاع مراد...لأول ما غزرتلو تبسملي...اصلا متحركش من بلاصتو...كانو يتفرج عالعرض...نسمع في المحامي متاعو يحكي
هو:شنية يثبت انو هي مكانتش تاخو الدوا هذا من قبل...و اصلا من تسريح امها...انو عدات ليلة برا...هذا الكل يثبت لهي وحدة مدمنة
بقيت نغزرلو مصدومة...كلامو روهجني...نحس في راسي باش يطرشق...كبست بيدي عالكرسي...نسمع في عمر يحكي
عمر:يااااخي نورمال انت...شنية الكلام لي تحكي فيه...كيفاش تسمح لروحك تحكي عليها هكا
القاضي:هدددددوء
تصدمت من ردة فعلو...متوقعتش باش يعصب لهدرجة...عدا يدو على وجهو...ورجع قعد...يرقل من الغش...نسمع في ماتر عبد النور يحكي
عبد النور:مدام انتصار...انت ريت زهرة تاخو دوا من قبل ؟ و لا شكيت فيها
امي:لا
عبد النور:تأكد كلام المحامي هذا ضد بنتك ؟
امي:لا
عبد النور:سيادة القاضي...الادلة هاذي تثبت انو زهرة كانت تاخو الدوا هذا في الفترة لي كانت محبوسة في دار...و انو هي تعرضت لضرب من مراد زادة
هو:و الادلة هاذي ماهيش كافية...باش تثبت تهمة على موكلي
القاضي:هدوووء
وقفو الكل يغزرلو...رجعت امي لتالي...تلفت لعمر غزرتلو...كابس عالبونية متاعو...نسمع في القاضي يحكي
القاضي: بعد النظر في قضية زهرة الحسيني...و مراد بن عيسى بتهمة التحرش...و لي عدم توفر الأدلة الكافية و الشهود...المحكمة تقدم فرصة اخرى لكل من المدعي و المدعى عليه...و يؤجل نطق بالحكم الى غاية 28/01/2017
استندت بيدي...حسيت بدوخة قوية...مش نورمال متوقعتش للباش يتأجل لاكثر من شهر...طلعت راسي غزرت لمراد...لي هز روحو وقف...عدل الفاست متاعو و هو يتبسم...كانو مش هوني جملة...أول ما خرج القاضي قرب مني عمر يحكي
عمر:زهررة...لباس ماهو ؟
هزيتلو براسي لا...قربت منو اكثر...منعرفش كيفاش لقيت روحي بين يديه...حط يدو على ظهري يحكي
عمر:هدي روحك...كلشي باش يكون مليح...اصلا هذا لي كان لازم يصير
انا:ب..باهي
مريم:زهرة...لازمك تبقى قوية عزيزتي باهي
هزيتلها براسي باهي...من غير ما نبعد عليه...غزرت لمراد...لوجهو تكبس بالوقت...نغزر لامي لي قربت منو تواسي فيه...و هو مش معبرها جملة...فقت من سرحتي كي عمر جبد روحو مني يحكي
عمر:اسبقني للكرهبة مع مريم
انا:ع..علاه ؟
عمر:مريم متخليهاش وحدها...تو نخلط عليكم
مريم:باهي
جبدت روحي منو مروهجة...قربت من مريم...شديتها...و خرجت معاها...من غير حتى كلمة اخرى...اصلا منحبش نرا مراد و لا نقابلو...تفكيري الكل...في اللي باش يصير...و شنوة الادلة لي لازم نقدمها...باش نثبت القضية هاذي...الحالة دخلت بعضها اكثر...و لقيت روحي تايهة...برغم عمر و مريم معايا...اما حسيت شي ناقص..وقت امي حكات اكاكا قدام القاضي تكيت عالكرهبة...نغزر للعباد لي خارجين...نحس في روحي ضايعة عاللخر...استندت على مريم...نحب ننسى لي صار الداخل...كلام امي و القاضي و المحامي زادة منحب نفكر في حتى شي اخر
🔸️عمر يحكي:
بقيت نغزرلها...لين خرجت من القاعة...تلفت عندو نغزرلو...خذيت نفس و قربت منو...غزرت لامها...لي قاعدة تقحرلي...نسمع فيه يحكي
مراد:انتصار برا للكرهبة
انتصار:اما
مراد:هيا فيسع
انتصار:باهي
هزتني و حطتني و خرجت...تلفت شوية نغزرلها و عاودت غزرتلو...تبسمت على جنب...و حطيت يديا زوز داخل مكاتبي...نحكي
انا:مراد بن عيسى
مراد:الاستاذ المحترم
انا:غريبة كيفاش مزال فما عباد كيفك
مراد:زعمة شنية الفرق بينا سي عمر
انا:الفرق هذا مينجمش واحد كيفك يحطو
مراد:انا عملت هذا الكل خاطرني حبيتها...اما بالنسبة لواحد كيفك...و فما شكون في حياتو...شنوة لي يخليك تجري وراها
تبسمت على جنب...هزيت يدي عديتها على شعري...نحكي
انا:واحد كيفك ماهوش باش يفهم شنية بينا...و صدقني كان تموت مانيش باش نخليك تقرب منها
مراد:و انت حط في بالك انو زهرة لمراد و كهو...كان حبيت...القضية هاذي توفا قبل ما تبدا...اما اللي لازم تفهمو انت و زهرة و الناس الكل...انو كلشي يمشي كيما نحب انا و كهو
انا:ياسر واثق من روحك...اعمل لي تحب عليه...اما باش تلقاني في وجهك ديما...تذكر كلامي بالقدا
عديت عينيا على وجهو...تلفت عطيتو بظهري و خرجت...قد ما عصبت عليه...بردت دمي عاللخر منعرفش كيفاش نجمت نشد روحي و انا نسمع فيه يحكي بالطريقة هذيكا عليها...اصلا متأكد لي هو حب يوصل القضية لهوني...و ينجم يعمل اكثر من هكا...و انو لازم اكثر من دليل...و الا كلشي يطيح في الما...اول ما خرجت...غزرتلها متكية على صحبتها...ظاهر فيها تاعبة...قربت منها نحكي
انا:كيفاش تحس في روحك توا ؟
زهرة:منعرفش
انا:مش قتلك كلشي باش يكون مليح
زهرة:انا باش نخسر القضية هاذي مش هكا
انا:مازلنا كي بدينا...ياخي باش تسلم من توا
زهرة:لااا
مريم:هذا لي باش يصير عزيزتي...كلشي باش يكون مليح مش هكا مسيو عمر
انا:مممم بالظبط
زهرة:عيشك
انا:شرايكم في فطور...قبل ما نمشيو لدار ؟
زهرة:باهي موافقة
مريم:يعني انا باش نفطر معاكم ؟
انا:مممم
مريم:لااا سامحني مسيو منجمش ناكول معاك فرد طاولة
انا:علااه ؟
مريم:يعني مش انت البروف متاعي ميجيش راو
زهرة:زايد مجنونة...هيا نمشيو
تبسمت على هبالها...و غزرت لزهرة لي حسيتها تفرهدت شوية...اما في لحظة ملامحها تكبست...تلفت نغزر لمراد لي خارج...خذيت نفس نحكي
انا:هيا خلونا نمشيو
ركبو بالوقت...خلطت عليهم...و خدمت الكرهبة...اهم حاجة انو هي ترتاح من احداث اليوم...و شهر باش يكون كافي انو نوصلو فيه لبرشا حاجات تثبت لهو متهم...و من هوني لاكا الوقت مستحيل نخليه يقربلها...و لا حتى يحاول يأذيها...مهما صار...زادة مجبور باش نخليها شهر اخر بحذا امي فتحية...لين نلقى حل يناسبنا الكل 
♤♤♤♤♤♤♤♤♤♤
ركيت الكرهبة...و تلفتلها...حسيتها تفرهدت بعد الفطور...اصلا دوب كلات...خذيت نفس و نزلت...خلطو عليا بالوقت...اول ما دقيت الباب...حلي حسام...غزرلي كانو يسأل فيا...طمنتو بعينيا...منحبهاش تحس لهو يعرف بالحكاية...دور راسو شوية...يغزر لمريم...يهز فيها و يحط...نسمع فيها تحكي
مريم:لباس ماهو...شبيك تغزرلي هكا انت ؟
باقي يغزرلها مبهم...اصلا استغربت منو كيفاش...بقى هادي...مع انو ديما على اعصابو...طلع راسو غزرلي...يحكي
حسام:زهرة مثبتة تعرفها الطفلة هاذي ؟
مريم:شتقصد ياخي...زهرة فاش يحكي هذا
زهرة:مرييم هدي روحك
مريم:شنوة تستخايل في روحك انت اه ؟
حسام:ميكونش لسانك متبري منك يا طفلة ؟
مريم:افففف زهرة...خليني نمشي على روحي احسن
انا:لحظة وين باش تمشي...مش حكينا و قلت باش تبقى معاها
مريم:معناها باش نظطر نتحمل الهم هذا
حسام:على اساس انا باش نموت عليك
انا:حسام يزي هيا...عندنا ما نحكيو
زهرة:هيا مريم
انا:زهرة
زهرة:مممم
انا:كان احتجت شي كلمني
حسام:و انا فاش قاعد نعمل ؟
مريم:شكون حكى معاك انت...لطف يا ربي
حسام:مش كان تسكر فمك احسن
مريم:و كان منسكرش شباش تعمل ؟
حسام:شو كي تحب تركبهالي عالصباح
انا:حسااام يززي هيا
زهرة:مريييم خلينا نطلعو امانك
مريم:باهي
بقى يغزرلها لين طلعت..عرفتو غزل منها...اصلا شديت ضحك بالسيف..يطلع منها الفرخة...عرفت كيفاش تخليه يعصب...حطيت يدي على كتفو...نحكي
انا:هيا صاحبي...متحطش في بالك...الطفلة مزالت صغيرة
حسام:كان جات تقرى عندي هاذي نستجرم فيها
انا:لااا عاااد شعملت الطفلة...حتى انت يطلع منك راهو...نورمال تغزرلها بالطريقة هذيكا
حسام:شنعمل كي منجمش نتحملها...تي ناقص كان
¤¤¤¤¤¤ توا
انا:حساااام يزي امانك...اصلا بالسيف باش قبلت تعدي الليلة مع زهرة
حسام:شننننوة...ياخي باش نظطر نراها نهار الكل و لا شنية الحكاية ؟
انا:زهرة تاعبة...و نظن بحاجة صحبتها معاها...و ليلة وحدة ماهيش باش تضرك...اعتبرها مش موجودة
حسام:اما كان طلعت في طريق...متلومنيش مبعد...خاصة اكا اللسان باش نقصهولها...و لا منتسماش حسام
انا:باهي باهي...شبيك جنيت عليها الطفلة...و لا ستانست بالريتم الهادي
حسام:زيييد ¤¤¤¤¤¤ عليا توا...قولي شصار في القضية ؟
انا:تأجلت لشهر الجاي
حسام:تحكي بالرسمي ؟
أنا:مفماش أدلة كافية
حسام:شنوة باش يصير توا
أنا:منعرفش...اما باش نظطر نخلي زهرة الفترة هاذي زادة عندكم
حسام:تو هذا كلام...بالطبيعة باش تبقى...حتى احنا ستانسنا بيها
أنا:صااار
حسام:شقلت انا توا ؟
انا:شي...في رايي من غير ما تستانس برشا
حسام:كان مجيتش خاطب...نقول غاير عليها مني
قحرتلو و تكيت لتالي...منعرفش علاه منجمتش نرجعلو تنهدت بالقاوي...نحس في راسي باش يطرشق منعرفش علاه نحس في روحي تعلقت بيها برشا...كلام مراد زاد دخلني في حيط...وليت متأكد انو ماهوش باش يسلم فيها مهما صار و كان نغفل عليها شوية برك..باش يتعبها و اصلا ماهيش باش تكون عندو الفرصة هاذي...زادة مستغرب في كلام حسام...عديت يدي على وجهي...و هزيت روحي وقفت نحكي
انا:باش نمشي توا
حسام:وين ؟
انا:لدار...رد بالك على لبنات
حسام:باهي طمن
هزيت روحي خرجت...خدمت الكرهبة و طرت بيها نحب نبقى وحدي...باش نجم نخمم و نعرف شنوة اللي نحب عليه بالظبط