زهرة🌸

الحلقة مئة و الثامنة عشر

حلقة 118
كريم يحكي:
شديت الفران على جنب...منجمتش نسوق اكثر من هكا...نحس في بدني مش مطاوعني...نحيت الفاست متاعي...حطيتها فوقها...و تكيت راسي لتالي...نغزرلها غاطسة في نوم...اليومين لي تعدات كانت اسوء كابوس في حياتي...و الاسوء انو مراد كان هو المسؤول عليه...لتوا منجمتش نستوعب كيفاش نجم يعمل فينا هذا الكل...فرد وقت...نحس في حاجة كابسة على صدري...غصة ندرا كيف وحلت في حلقي...لا نجمت نخرجها و لا نبلعها...منجمتش و لا منحبش نصدق...انو الراجل لي كان في حياتها قبل...الراجل لي كانت تسرح بافكارها و هي تخمم فيه...هو مراد...خويااا انا...للحظات مشى في بالي اني نجم نسيها فيه...و نخليها تكون معايا...لي صار يومين لتالي مندمتش عليه و مانيش باش نندم عليه حياتي كاملة...مانيش باش نندم على حاجة صادقة عشتها مرة وحدة في حياتي...مديت يدي شوية...عديت صوابعي عالجرح لي في خدها وقت طاحت...لتوا منعرفش شنية سر تأثيرها عليا...كلشي نعرفو و متأكد منو...انو الطفلة لي ضربتها اول مرة بالموتور...الطفلة لي صاحت في وجهي اول مرة...و لي سمعتني كلام ورا بعضو...قعدت في ذاكرتي و في مخيلتي...بالنسبة ليا اول مرة تصير معايا حاجة هكا...اول مرة نحس اني تعلقت بطفلة من اللحظة الاولى...اصلا وقت سمعتها تحكي في تليفون على بيبي...حسيت بحاجة تحركت داخلي...رغم اني ما نعرف عليها شي...يمكن اكثر حاجة فرحتني و خلاتني نرتاح...اني عرفت انو مفما حتى حد في حياتها و اعتقادي قبل كان غالط...اما لي متوقعتوش مبعد...اني باش نخسرها بالطريقة هاذي...اصلا لتوا مش مصدق انها نجمت تمنع روحها و تهرب منو...في الوقت لي كنت نخمم في طريقة ندخل بيها لدار...لقيتها بين يديا...حالتها كانت تعكس الخوف لي هي فيه...و لي عاشتو لداخل...و مش بعيد يخليها تحطني واحد من رجال مراد...حاجة ما استغربتهاش بعد ما ريت الخوف لي في عينيها...و صوتها لي كان يتقطع و هي تحكي معايا...حاجات وجعتني اكثر من انها فرحتني لي هي لباس عليها و نجمت تهرب...بعدتلها خصلات شعرها اكثر...و تبسمت بوجيعة...نفس الوجيعة لي نحس فيها من داخل...متوقعتش لي حكايتي معاها باش توفى قبل ما تبدى...و تشوف النور...اني نبقى في حياتها حاجة مستحيلة بعد اللي عملو مراد فيها و الله اعلم شنية عمل في عيلتها زادة...فكرة اني معادش باش نشوفها و لا نقابلها مرة اخرى...حرقتني من داخل...غصة وحلت في حلقي...لا نجمت نخرجها و لا حتى نبلعها...القهرة لي قاعد نعيش فيها عكس الهدوء متاعي...فرد وقت نخمم في طريقة...باش نخبرها الحقيقة الكل...حقيقة انو مراد خوويااا...و انو ما عندي حتى ذنب في لي صار...و مستحيل نخمم اني ناذيها و لا حتى نكون سبب في انها تتأذى جرايري...رغم انها آخر ليلة نشوفها فيها...اما نحب صورتي تبقى نظيفة في مخيلتها...كانت و باش تبقى الايمات لي جمعتنا احلى ذكرى بيناتنا و لا بالنسبة ليا انا كهو...متاكد مهما بعدت مستحيل ننساها...دوب تحركت شوية...جبدت يدي بالوقت...دورت راسها حلت عينيها شوية...و عاودت سكرتهم...تعدلت في قعدتها تحكي
هند:ش..شبيك حبست هوني ؟
انا:قولي كيفاش تحس في روحك ساعة
هند:منعرفش كيفاه غفيت
انا:باهي...كان تحب ارجع ترقد
هند:ل..لا...نحب نكلم عمر
هزيتلها براسي ايه...و خدمت الكرهبة...منجمتش نغزرلها اكثر...و لا حتى نحكي معاها...منحبش نقرا غزرة الخوف مني في عينيها...و منحبش نوترها اكثر...غزرت لطريق و عاودت غزرتلي تحكي
هند:و..وين باش تهزني ؟
انا:الثنية لتونس طويلة...حالتك متسمحش باش نرجعك توا
هند:ش..شقصدك ماكش باش ترجعني
انا:متخاافش هند...مدامك معايا...صدقني باش تكون بخير
هند:انا مليحة ك..كريم...خلينا نمشو توا
انا:هدي روحك...اول شي باش نخليك تكلم خوك و نحكي معاه انا و هكا من غدوة نسلمك بيدي...ارتحت توا
هزتلي براسها ايه...و عاودت تكات لتالي...كبست عالفولون و كملت طريقي...دخلت للمنطقة...و شديت ثنية لاوتيل صغير...في اخر الدورة...ركيت الكرهبة...و تلفتلها نحكي
انا:هيا ايجا
هند:وين ؟
انا:لازمك ترتاح الليلة و من غدوة نقصدو ربي...باهي
هند:باهي
خذيت نفس و هزيت روحي نزلت...مشيت من جيهتها حليتلها الباب...عاونتها باش تنزل...كبست على يدي بالوقت موجوعة...ضيقت عينيا نحكي
انا:شبيك ؟
هند:س..ساقي توجع فيا
انا:باهي سايس روحك...متخافش
كبست عليها اكثر...نسايس فيها...تمد في الخطوة بالسيف...وجها اصفر و حالتها داخلة بعضها...تنهدت بالقاوي و دخلت معاها...قربت من رسيبسيون...نحكي
انا:فما بيوت فارغة
غزرلها و عاود غزرلي...يثبت في حالتها...تنهدت بالقاوي نحكي
انا:مسيو...كان فما مجال جاوبني
هو:المدموزال لباس عليها ؟
جيت باش نحكي...كبس على يدي بالوقت...نزلت راسي نغزرلها...قربتلي شوية تحكي
هند:ع..عندو تليفون...ن..نحب نحكي مع عمر
دورت راسها تغزر لتليفون متاع البيرو...خذيت نفس نحكي
انا:نجمو نعملو تليفون ضروري ؟
هو:اكيد تفضل
انا:هيا ايجا
ضحكتلي بالوقت...متوقعتش باش نشوف ضحكتها بعد اللي صار...سبقتني...تمد في الخطوة بالسيف...خلطت عليها...قعدت عالكرسي...و هزت السماعة...تطلب فيها...مرة و زوز و ثلاثة اما شي...هزت راسها غزرتلي بحصرة تحكي
هند:م..محبش يهز عليا
انا:باهي هدي روحك...و عاود طلبو مرة اخرى...اكيد باش يهز
هند:ب..باهي
مدت يدها لي ترعش...تطلب فيه مرة اخرى...حتى انا توترت في بلاصتها...نعرف كان متحكيش معاه توا...تتعب نفسيتها اكثر من قبل...نزلت عليها شوية...باش نحكي معاها...اما سكت على صوتها...لي خرج يرعش
هند:ع..عممر
مديت كبست على زر HP بالوقت...نسمع فيه...يحكي
عمر:ه..هند...هند هاذي انتي ؟
غزرتلي بالوقت...هزيتلها براسي ايه...تبسمت...تحكي
هند:عممر...ايجا هزني من هوني اماانك
عمر:وينك عزيزتي ؟ و شنية عمل فيك الكلب هذاكا ؟
هند:ا..انا بحااجتك...ا..يجا عندي اماانك
انا:هدي روحك...عيش اختي...و خبرني وينك انتي...شحاالك ؟ و من وين قاعدة تكلم فيا ؟
دوعها لي نزلو منعوها باش تجاوب...خذيت نفس و فكيت سماعة من يدها...نحكي
انا:متخاافش عليها...هي معايا توا
عمر؛شكونك انت ؟
انا:كريم...كريم بن عيسى
عمر:شننننوة...فاااش تعمل اختي معاك ؟
انا:هدي روحك سي عمر...ما عندي حتى نية خايبة...اختك امانة عندي...طمن
عمر:و شنية المقابل ؟
نزلت راسي نغزرلها...نغزر لتفاصيل وجها...لون عينيها الاخضر...و لمعتهم...شفايفها لي شاحو من البكا زادة...تنهدت بالقاوي...نحكي
انا:حتى شي...من غدوة اختك تكون عندك
عمر:و شنية لي يخليني ناثق فيك ؟
انا:منعرفش شنية لي بينك و بين مراد...اما عالاقل مبادئي متخلينيش نأذي وحدة ما عندها حتى ذنب...هند في امان...وعد رجال سي عمر
عمر:خوك وينو ؟
سكت شوية...آخر حاجة نخمم فيها اني ندخل بيناتهم...اصلا لي متاكد منو انو مراد في طريقو ليهم...هذا لي تاكدت منو من آخر مكالمة جاتني من المزرعة...من البون بالتحديد...خذيت نفس نحكي
انا:لي بينك و بين مراد...امور خاصة بيكم...اما خليني نفيدك...مدامك تحب عليه...حتى كان تحب من غير ما تعب روحك و تفركس عليه
عمر:شقصدك ؟
انا:مراد في طريقو لعندك سي عمر...للمزرعة...كان فما وقت خرج مرتك و اخرج توا...مدامني خذيت الورقة الرابحة لي كانت عندو...اكيد باش يفركس على غيرها...و طمن عليها هند هوكا معايا...و اكيد باش نوصلو لتونس فرد وقت غدوة
عمر:رد بالك عليها
انا:تهنى
هند:ن..نحب نحكي معاه
انا:تفضل
هند:عمر...انت مليح مش هكا ؟
عمر:لباس عليا يا روحي متخافش...نعرف صغرونتي قوية...و من غدوة باش نكون مع بعضنا و باش يوفى الكابوس هذا باهي
هند:توعدني ؟
عمر:وعد...رد بالك على روحك
هند:و انت زادة عمر
نزلتها من يدها و علقت عليه...تنهدت بالقاوي...و مديتلها يدي...نحكي
انا:هيا قوم
استندت عليا ووقفت...قربت من رسيبسيون مرة اخرى...نحكي
انا:يعطيك صحة
هو:قداش تحجز من بيت ؟
انا:زوز
هند:م..منحبش نبقى وحدي...ا..اكيد باش يرجع عندي
انا:هدي روحد متخافش
هند:ا..اماانك كرييم...مش وعدت عمر انت
انا:باهي...ميسالش...باش ناخو مفتاح واحد
حطيت الكارت متاعي...و الفلوس...و غزرتلو...نحكي
انا:بمعرفتك ابعثلنا شكون يجيبلنا عشا معاه...بونداج و معقم و قطن زادة...من عند اقرب فرماسي هوني
هو:كهو ؟
انا:كان فما مرهم يخفف وجيعة ساقها جيبلي منو عيشك
هو:باهي
انا:تحب حاجة اخرى ؟
هند:ل..لا
انا:باهي ملا...خلينا نطلعو توا
هزيت المفتاح و اكدتلو عالقضية...عاونتها تطلع الدروج...ساقها تنفخت اكثر...حليت الباب و خليتها دخلت...شعلت الضو و عديت عينيا عليها...بيت صغيرة...في قلبها صالدوبان صغير...كبست على يدها و قعدتها على طرف السرير...نحات الفاست متاعي من فوقها و تكات لتالي...ضيقت عينيا نحكي
انا:ل..لباس ماهو ؟
هند:ت..تاعبة عاللخر
انا:باهي تسطح هوني
هند:منحبش
انا:هكا باش تعب روحك اكثر
هند:ش..شنية لي قاعد يصير مع عمر ؟
انا:متخاافش...خوك قوي...مش بحاجة تخمم فيه انتي
هند:ا..اصلا مراد...هو سبب في كلشي قاعد يصير معانا
انا:شقصدك ؟
هند:ن..نحب نشرب كريم
عرفتها تتهرب من الموضوع...عديت يدي على شعري...و تنهدت بالقاوي...نحكي
انا:اصبر شوية...لين توصل القضية...و كان تحب ننزل انا هند:ل..لا...متخلينيش وحدي هوني
انا:باهي...ارتاح
خليتها و دخلت لبيت البانو...حليت السبالة و غسلت وجهي...مرتين ورا بعضو...و هزيت راسي نغزر للمرايا...نغزر لروحي ؟ لصغري لي تعدا في لحظة...لحياتي لي كانت فارغة...عالاقل انا لي كنت نحس هكا في كل مرة نواجه روحي...مراد عطاني كلشي...تحرمت منو...عوضني عاللي كان ناقصني الكل...تي حتى امي مكنتش نحس بمرضها...خاطرو ديما معايا...اما بقات حاجة داخلي...حلقة مفقودة...ماضي مجهول...قبل سنين من توا ما نتذكر حتى شي...كان الجنازة متاع بابا...وقت جيت من المدرسة الداخلية...جيست باش نحضرها...اما اليد لي تمدتلي منعتني باش نرجع للجحيم هذاكا مرة اخرى...منعتني...باش نعدي سنين اخرى...وحدي و من غير عيلتي...رغم اني كنت صغير وقتها...نتذكر لي نزلت مني حتى دمعة...تعبر على حزني...كلشي كنت متاكد منو...انو حكم بابا الطاغي وفى قبل ما يبدى بالنسبة ليا...و لي حرمني منو هو...مراد عوضني عليه دوبل...قريت وين و مع شكون نحب...تعلمت في اكبر المدارس...و لقيت فرصة في كل حاجة جديدة نحب نجربها...التصوير...السباقات...حتى الموتورات...كانت نشري احدث الموديلات رغم اني كنت نعرف لي ممكن المزانية تاثر عليه...اكثر من 23 سنة تعدات...لليوم كنت و مزلت ناخو الدعم متاعي من مراد...كان القدوة متاعي في كل خطوة يعملها...لنجاحات متاعو...تخطيطاتو...و اسمو البارز في سوق...اما بعد ما ريت حالة هند اليوم...تاكدت لانا مانيش مراد...مانيش نفس الشخص...و منحبش نكون...حتى كان جات طفلة اخرى في بلاصتها...متاكد لباش نكون في نفس الموقف لانا فيه...مستحيل نخلي حد بريء يعيش هذا الكل جراير حاجة معندوش ذنب فيها...كبست على لافابو و غمضت عينيا بالقاوي...نحب نفهم الحكاية من الاول...نفهم تصرف مراد و وين يحب يوصل...و الاهم اسئلة الماضي لي عاودت تحيرت داخلي...نحب نلقى جواب لكلشي...نحب نعرف شكون خويا...و شنية وراه...خذيت نفس طويل و حليت عينيا على صوت الباب...مسحت وجهي و خرجت...نغزرلها...متحركتش من بلاصتها..دوب غزرتلي و نزلت راسها...حليت الباب...شديت عليه القضية...حطيتها عالطاولة الصغيرة لي بجنبي...احسن شي لقيت دبوزة ما في وسطهم...هزيت المعقم مع القطن و البونداج في يدي...و قربت منها...قعدت بجنبها عالسرير...نحكي
انا:لازمك تعقم جروحك ساعة...و ساقك زادة...بعدها تاكول شوية و ترقد...متفاهمين احنا ؟
هزتلي براسها ايه...من غير حتى كلمة...كبست عليهم و قربت من شوية...اول ما حطيت القطن على خدها...هزت راسها ملسوعة...و دموعها تحصرو مرة اخرى...غزرتلها نحكي
انا:تحمل شوية...متخاافش
هند:ب..باهي
نزلت بيدي لخدها...مسحت عالجرح بالقطن...تراص صوابعو قعدت على اطراف وجها...هزيت راسي غزرت لعينيها بالوقت...نحكي
انا:هند
هند:مممم
انا:هز يدو عليك ياخي ؟
هزتلي براسها لا...تنهدت بالقاوي...و الافكار لي في مخي هدات شوية...نزلت على ركبتي...قعدت مقابلها...كبست على ساقها...باش نحي الكونفارس...حطت يدها على كتفي بالوقت تحكي
هند:م..ميسالش...تو نشوفها وحدي
انا:متخافش
جبدت يدها مني...نحيتلها الكونفارس...نغزر لساقها مستغرب...متوقعتش باش تولي هكا...عاودت غزرتلها نحكي
انا:هننند...تحب نهزك لمستوصف هوني ؟
هند:ل..لا...انا مليحة
انا:متأكدة
هزتلي براسها ايه...كبست على ساقها شوية...نعدي في المرهم على النفخ...فرد وقت نغزر لعينيها لي تغمضو من الوجيعة...لفيتها في بونداج...و هزيت روحي قعدت بجنبها نحكي
انا:كيفاش تحس في روحك
هند:لباس...عيشك
انا:شد اشرب شوية
حطيت دبوزة الما في يدها...شربت شوية و نزلتها...تحكي
هند:امتى نمشو من هوني ؟
انا:صباح...لازمك ترتاح شوية
هند:باهي
انا:شنية لي صار هند ؟
هند:م..معادش نحب نحكي في اللي صار كريم
انا:زهرة مرت عمر ؟
هزت راسها غزرتلي ندرا كيف...كبست بيدها على طرف السرير...تحكي
هند:م..من وين عرفت انت ؟
انا:هدي روحك هند...قاعد نسأل فيك و كهو
هند:ص..صحيح
انا:معناها مراد عمل فيك هكا...على خاطر زهرة ؟
غزرتلي ندرا كيف...و نزلت عينيها من وجهي...تحكي
هند:م..مراد استغلني باش يوصل لزهرة
انا:شقصدك ؟
هند:د..خل لحياتي على غفلة...كان اول حد يخليني تتعلق بيه...ستانست بوجودو...و باهتمامو...اما في لحظة سرق مني كلشي...كنت مجرد خطة بديلة باش يلحق لزهرة...و باش ينتقم من خويا زادة
انا:ص..صارت حاجة بيناتكم قبل ؟
هند:لا...كان فما بيناتنا حدود واضحة...برغم لي عملو فيا اما و لا مرة استغلني من الناحية هذيكا
انا:معناها ؟
هند:ق..قصدي واضح...يمكن هاذي الحاجة الوحيدة لي خلاتني نقاوم لي صار...و نتقوى على روحي مرة اخرى
انا:حبيتو هند ؟
غزرتلي بالوقت...منعرفش علاش مزلت مركز على سؤال هذا بالظبط...نحب على جواب يهديني من داخل...جواب ينحي عليا الخنقة لي نحس فيها...حتى كان مشيت لآخر الدنيا...لي يهمني انها محبتوش هو و ماهيش باش تحبو...تنهدت بالقاوي تحكي
هند:منعتبرش لي صار معايا حب...ا..انت متتصورش قداش كرهتو...من اول مرة هاني فيها...من اول مرة تعامل معايا على اساس وحدة ما تسوا شي...و اليومين هذوما عمل نفس الشي...قالي الكلام لي كنت نهرب منو ديما...للدرجة تمنيت اني نموت قبل ما نسمعو
انا:مهما كان لي قالو...متأكد لانتي عكس اكاكا
هند:باش تنكر اني وحدة ضعيفة ؟ منجمش ناثق في روحي...اما ناثق فيسع بالناس لي دايرة بيا...باش تنكر اني مانيش مرغوبة من حتى حد...اما ديما نكون لقمة ساهلة ليكم
عديت عينيا على وجها...متأكد انو هو لي زرع الكلام هذا في مخها...هو لي خلاها تحس هكا...قربتلها شوية...حاوطت وجها بيديا زوز...نحكي
انا:انتي عكس هذا الكل هند...رد بالك تخلي حد يزعزع ثيقتك في نفسك...و لا يخليك تكره روحك...حتى كان مرااد...خاطرني انا نرا عكس هذا الكل باهي
هند:م..مش كنت معاه انت...شبيك درت في رايك و قاعد تعاون فيا ؟
انا:عمري ما كنت باش نخليه يضرك و لا يوصلك...لي صار غلطة...و انتي بالرسمي تخطفت قدام عينيا هند
هند:م..ملا فاش كنت تعمل عندو ؟
رخفت يديا عليه...و جبدت روحي منها شوية...منعرفش كيفاش باش نخبرها كلشي...غزرتلي ندرا كيف تحكي
هند:انت من وين تعرف مراد...و زهرة ؟
انا:مراااد...خ..خويا...اسمو الكامل مراد بن عيسى
بقات تغزرلي من غير حتى كلمة...يديها تغرسو اكثر في اطراف الفرش...و وخرت لتالي اكثر...نزلت راسي نحكي
انا:متخاافش هند...اكيد مانيش باش نأذيك
هند:م..معناها هو لي بعثك ليا مرة اخرى
خذيت نفس...و عاودت غزرتلها مرة اخرى...نفس الخوف عاود ظهر على عينيها و ملامحها...نعرف لي صعيب تتقبل الحقيقة...اما مكانش عندي حل آخر نحبها تعرف كلشي...و فرد وقت تسامحني على كلشي...تنهدت بالقاوي نحكي
انا:مكنتش نعرف...اصلا و لا مرة توقعت انو عندك ماضي مع مراد قبل
هند:م..مستحيل تكون صدفة
قربت منها اكثر...كبست على يديها زوز...وين خوفها ولى واضح اكثر من قبل...غزرت لعينيها...نحكي
انا:بالنسبة ليا كانت احلى صدفة في حياتي...اليوم الصباح ظطريت نمشي...خاطر مراد خيرني بين حياتك و بين اني نسافر
هند:ك..كنت باش تسافر ؟
انا:مكنتش باش نعملها قبل ما نمنعك منو ؟
هند:ا..انت حكيتلي انك تحب خوك من قبل...علاش باش تاقف معايا ضدو ؟
انا:مانيش ضدو هند...انا ضد الظلم لي قاعد يصير هاذي واحد...و ثاني شي...على خاطر
هند:شنووة ؟
انا:على خاطرك...على خاطرني حبيتك
جبدت يديها زوز مني...غزرتلي ندرا كيف...ووخرت لتالي اكثر...هزتلي براسها لا تحكي
هند:م..مستحيل...تنجم تحبني...ماكش مظطر تكذب عليا...كريم
انا:هند...يمكن هاذي آخر ليلة تجمع بيناتنا
هزت راسها بالوقت...جات عيني في عينها...خذيت نفس طويل قبل ما نكمل كلامي
انا:صدقني مكنتش نعرف بالحكاية قبل...و الا مستحيل كنت نخليها توصل لهوني...و مستحيل نكون موافق عاللي يعمل فيه مراد...كان غمضت عينيا و مشيت من هوني..ضميري و الاحساس بالذنب...باش يقتلوني اكيد...انا كنت نعرف مراد غير هكا...و رباني بطريقة غير هكا زادة...اكا علاش منجمتش نصدق لي صار اليمات هذوما...اصلا استوعبت الحكاية...بعد ما زهرة حاولت تقتلو
هند:ش..شنوة ؟
انا:كهو لي صار...و اصلا قبل ما نستوعب لي باش يعملو...لقيتك ضعت مني
هند:ش..شنوة باش يصير توا ؟
انا:بعد توا...كلشي باش يكون مليح...من غدوة صباح تنجم ترجع لحياتك عادي...لقرايتك...و لي صار تو تنساه مع الوقت
هند:و انت ؟
انا:باش نحل امور...مزالت عالقة في ذهني...بعدها نمشي من هوني
هند:و..وين ؟
انا:امريكا
هند:امريكا ؟
انا:هذا الحل الوحيد لينا زوز
هند:ع..عندك حق
خذيت نفس و هزيت روحي وقفت...غزرتلها...نحكي
انا:هيا توا...لازمك تاكول حاجة
هند:معينيش
انا:ثنية طويلة...عالاقل تهز صحتك شوية
هزيت السوندويتش...حطيتو في يدها...و قربت من الشباك...هزيتو ريدو...و سرحت في قطرات المطر...متاع الربيع...احساس القهرة حرقني من داخل...و منجمتش نغزرلها اكثر...منحبش نتعلق بيها اكثر من هكا...في الاخير نهايتنا واضحة...و توا بالظبط...ماهيش اكثر من مجرد امانة...لازمني نرجعها لاهلها سالمة...تلفت شوية...على صوتها تحكي
هند:كهو...معادش نجم ناكول اكثر
انا:هيا ملا باش ترقد شوية
هند:ن..نحب نمشي...ل..لتوالات
تبسمت بالوقت...من ربثتها...و من خدودها لي حمارو اكثر...قربت منها شوية و عطيتها يدي...شدتني و هزت روحها وقفت...وصلتها و مديت يدي سكرت الباب...تكيت لتالي نستنى فيها...فقت من سرحتي كي حلت الباب و خرجت...اطراف شعرها مبلولين...غزرتلها نحكي
انا:لباس ؟
هند:ممم
قربت منها شوية...سندتها...وصلتها لسرير...عاونتها تسطحت و مديت الغطا...حطيتو فوقها...نحكي
انا:ما تخمم في حتى شي...باهي
هند:ب..باهي
دوب تبسمتلي...و غمضت عينيها...جبدت روحي لتالي...قعدت عالكرسي مقابلها...نغزرلها...اول ما تأكدت لي هي غفات...قربت منها و قعدت على طرف السرير بجنبها...مديت يدي شوية...بعدتلها...خصلات شعرها لتالي...و سرحت في تفاصيلها...كانها اول لحظة و آخر لحظة باش نشوفها فيها...مهما كانت ليلة هاذي خايبة...كافية باش تخليني نشبع منها و من قربها ﻻخر مرة في حياتي...كافية باش تخليني نلم ذكريات باش تقويني عاللي جاي...و عاللي مزال مخبي...بعد اللي عملو مراد فيها...تأكدت انو علاقتنا ممنوعة بعد توا...نزلت بصوابعي لشفايفها...لي ذقتهم مرة وحدة...و معادش عندي حق فيهم مرة أخرى...تنهدت بالقاوي نحكي
انا:بعد توا باش تعيش كيما تحب انتي و كهو...لا مراااد و لا حتى انا...باش ناقف في طريقك يا روحي
نزلت عليها شوية...دوب بستها من خدها...فوق الجرح بالظبط...منحبهاش تفيق جرايري...و لا حتى تدخل في متاعة اخرى...اصلا من التعب لي طاح عليها...اول ما حطت راسها غفات...خذيت نفس طويل من ريحتها...و من ريحة شعرها...نستطعم في الاحساس البنين متاع كل مرة تبدا فيه قريبة مني و معايا...احساس باش نفقدو بعد الليلة هاذي...هزيت روحي بالسيف...تسطحت بجنبها...و حطيت يدي تحت راسي...اول مرة في حياتي...نحس انو الحمل هذا ثقيل برشا...و اول مرة نذوق طعم الخسارة في حياتي...اما المرة هاذي...الدوزة كانت قوية...لدرجة تمنيت انو الليلة هاذي تطواال اكثر...مديت يدي شوية...حطيتها على خصلات شعرها من تالي...نحب نحسها بقربها اكثر...من غير ما نخمم في حتى شي آخر...و لا حتى في شنية لي باش يصير فينا مبعد...عالاقل اللحظاات هذوما يكونو خااصين بيا...انا و كهو
🌸🌸🌸🌸🌸🌸🌸🌸🌸🌸🌸🌸🌸
حسام يحكي:
حليت عينيا شوية شوية...منعرفش كيفاه غفيت عالفوتاي...اصلا بعد ما وصلت...ملقيتش جهد باش نكلم حد...ظغط الخدمة و السفر...لقيت روحي غاطس في نوم...ليا عليه اكثر من اسبوع...هزيت روحي تقعدت...و عديت يدي على وجهي...و تكيت لتالي...عديت عينيا عالصالة...تبسمت و انا نتذكر...في اللي صار هوني آخر مرة...توحشتها الفرخة...و عملت فيا اليومين هذوما...لا تحب تهز عليا...منعرفش شنية لي صار بالظبط...متاكد لي حكاية سفر مقلقتها خاصة اني طولت عليها...اما نعرف لي غشها وراه حاجة اكيد...غزرت لساعة لقيتها 18:00 منعرفش كيفاش تعدا الوقت..خذيت نفس...و هزيت روحي وقفت...طلعت لبيتي...اول ما حليت الباب ضربتني ريحتها...رغم نعرف لي مرجعتش بعد ما مشيت...عديت عينيا عالسرير...و تبسمت بالوقت...صحة ليها الفرخة...مشى في بالي باش نرتاح...ياخي لقيت روحي نحسب في الوقت بالدقيقة و الدرج باش نرجع...اصلا معادش نصبر عليها و لا نعيش من غيرها...يزي لي خسرناه لتوا...و يزي من لي تعدا علينا...تنهدت بالقاوي...و دخلت لبيت البانو...عملت دوش خفيف...نفرهدت و نحيت التعب لي نحس بيه...بدلت دبشي و ريقلت اموري...و في مخي شي واحد كهو...انو الليلة ما تبات كان في حضني...هزيت الفاست متاعي و نزلت اللوطة...تبسمت عالافكار لي خطرت في بالي...خدمت الكرهبة و طلبت محمد...هز عليا...يحكي
محمد:حساام
انا:شحاالك سي شباب ؟
محمد:انت في تونس ؟
انا:اي
محمد:امتى وصلت ؟
انا:معنديش برشا...هاني في ثنية لعندكم...نحب نطمن على فتحية
محمد:باهي...حتى هي تستنى فيك ليها برشا
انا:شفما ؟
محمد:خرجني انا من الحكاية...و دبر امورك معاها وحدك
انا:باهي...تو نشوفو فتحية شنية مخبيتلنا
محمد:نستنى فيك
انا:باهي
كبست عالفولون...و شديت الثنية لدار...ندرا شنية لي صار بالظبط...اما نعرف لي ماهيش باش تعديهالي في الحالتين...منعرفش كيفاه وصلت...شديت الفران و نزلت...حلتلي خالتي نعيمة...حضنتني بالوقت...تبسمت نحكي
انا:شحالك نعيمة ؟
نعيمة:مش مصدقة اني ريت طلتك هوني
بستها من راسها...و كملت دخلت...اصلا من وقت الحادث معادش جيت لهوني مرة اخرى...تبسمت نحكي
انا:وينها فتحية ؟
نعيمة:هوكا في الصالة تستنى فيك
هزيتلها براسي ايه و دخلت...لقيتها قاعدة عالفوتاي...تشرب في تاي متاعها كي العادة...نزلت عليها شوية بستها من راسها...و ترميت بجنبها...نحكي
انا:مفرحتش بولدك لالة فتحية ؟
غزرتلي على جنب و دورت وجها...تكيت لتالي و حطيت راسي على حجرها نغزرلها...و نحكي
انا:نعرف لانتي متغشة مني...اما نعرف زادة لي تحب تشوفني
امي:صحة ليك ديما غالبني
انا:مممم باهي...قولي شنية مقلقك ؟
امي:وضعك هذا لي مقلقني
تنهدت بالقاوي...و هزيت روحي تقعدت...عديت يدي على وجهي نحكي
انا:وقتو توا الموضوع هذا ؟
امي:اصلا نظن وخرت برشا
انا:شفما امي ؟
امي:لامتى ناوي تبقى هكا ؟
انا:شقصدك ؟
امي:نقصد الطريقة لي عايش بيها...امتى ناوي ترجع مرتك و تستقر ؟
انا:ليلة
امي:حسااام
انا:شبييك ؟ انتي سالتني و انا جاوبتك
امي:اسمعني حساام...بنت الناس ماهيش لعبة عندك...ترجع مرتك...و لا طلقها و تخليها تشوف حياتها
انا:طلاق شنية فتحية ؟
امي:انا و انت نعرفو شنية لي تعدا عليكم قبل...و حضرت على عمايلك الكل زادة...كانك مستعد باش ترجعها...معادش نحبك تبكيها...و لا تذلها...و لا حتى تعاملها لا نحبك لا نصبر عليك...نظن لي ريتو لتوا علمك برشا...انا ما نحب حتى شي من دنيا كان اني نشوفك مستقر و بصغارك
عديت يديا زوز على وجهي...نعرف انو الفترة هذيكا...تعبتها برشا...و وجعتها زادة...اما فكرة انها تشوف حياتها و من غيري...مستحيلة...كانت و باش تبقى متاعي لاخر نهار في حياتي...خذيت نفس نحكي
انا:فتحية...تعرف بالقدا لي منجمش نعيش من غيرها...نعرف روحي غلطت...اما مش لدرجة اني نتحرم منها...ساعة انتي حكيت معاها انتي ؟
امي:اكهو...يا تحلو الحكاية مع بعضكم...يا نحلها بطريقتي
انا:الا طريقتك...اصلا كان صبرت شوية...نفرحك بصغير
امي:زايد متحشمش حتى مني
انا:استغفر الله...مش انتي لي تحب تشوف صغاري ؟
امي:قوم من قدامي حسام...الحق عليا...لي حليت الموضوع معاك
انا:هاني باش نصلح لي عملتو عزيزتي...انتي ادعي تولي معايا...و بعد تسع شهور تشوف ولد ولدك
ضربتني بيدها لكتفي...ضحكت بالوقت و هزيت روحي وقفت بستها من راسها مرة اخرى...و دورت راسي نغزر لمحمد لي دخل من برا...حضني بالوقت...يحكي
محمد:حمد الله على سلامتك و ربي معاك
انا:متعرفش تخبرني باللي صار
محمد:اعفوني منها الحكاية
انا:جايك دور...هاك تعرف امك
امي:نسمع فيك سي حسام
انا:باهي...هاني ماشي انا توا...عالاقل قبل ما يرقد سي احمد
محمد:على حد علمي يرقد بعد ساعة من توا
امي:هوكا خوك يعرف مواقيت نسيبك
انا:و نسيبو زادة
ضحكت بالوقت...ضربتو بيدي على كتفو...و رجعت لتالي...توا فهمت السبب لي خلاها رافضة تحكي معايا...ندرا شنية لي سمعاتو من امي...اما صحة ليها فتحية...طلعت قدها...رجعت للكرهبة...دريكسيون لدارهم...من غير ما نخمم في شنية نحكي و لا حتى كيفاه باش نقابل سي احمد الوقت هذا...اما لي يهمني...اني نشوفها و كهو...منعرفش على روحي كيفاه وصلت...ركيت على جنب و نزلت...خذيت نفس طويل قبل ما ندق الباب...وخرت خطوة لتالي...و هزيت راسي نغزرلو...ضيق عينيه مستغرب...عدلت الفاست متاعي نحكي
انا:سي احمد
احمد:اهلا بيك
انا:عيشك...نعرف لي الوقت متأخر...اما نحب نحكي معاك 
احمد:تفضل ؟
وخر خطوة لتالي...خذيت نفس و و طلعت الدرجة لي قعدت تفصلنا...اصلا متوقعتش لهو باش يستقبلني...رغم اني حكيت معاه من قبل...اما بعد ما حضر عالعركة آخر مرة...توقعت باش يعاود يرفضني كي العادة...دخلت معاه لصالة...قعدت مقابلو...غزرلي يحكي
احمد:شنية تحب تشرب
انا:قهوة
دخلت مدام حياة الوقت...رحبت بيا...غزرلها يحكي
احمد:حضرلنا زوز قهوة عيشك
حياة:كيفاش تحبها ؟
انا؛من غير سكر
اول ما خرجت...تكيت لتالي و هزيت راسي غزرتلو...فرد وقت نفركس عليها بعينا...نحب نلمحها...خذيت نفس نحكي
انا:سي احمد...انا اليوم رجعت من السفر
احمد:حمد الله على سلامتك
انا:عيشك
احمد:جيت باش تشوف مريم
كبست على يديا زوز...بقات فيها شوفة هي...هزيت عينيا في وجهو نحكي
انا:صراحة سي احمد...كان معندكش مانع...انا نحب ناخو مرتي معايا
احمد:اكيد ماهوش باش يكون عندي مانع...اما مريم تاعبة اليومين هذوما
ضيقت عينيا مستغرب...دقات قلبي قوات اكثر مع كلامو...عديت يدي على وجهي نحكي
انا:شبيها ؟
احمد:جاتها كريز قوية
انا:علاش
احمد:لتوا منعرفش السبب...ياخي تعاركت انت وياها ؟
بقيت نغزرلو من غير حتى كلمة...اكيد حطت في قلبها من كلام امي...و كملت عليها كي طولت في السفرة...خذيت نفس نحكي
انا:نحب نشوفها توا ؟
احمد:باهي تفضل
هزيت روحي وقفت...نغزر لرنيم...لي نزلت بالوقت...غزرلها يحكي
احمد:رنيم...دل حسام على بيت مريم
عديت يدي على شعري...كي تذكرت ليلة لي دخلت لهوني بالسرقة...اصلا لتوا مستغرب في ردة فعلو معايا...خلطت على رنيم من غير حتى كلمة...اول ما لحقنا غزرتلي تحكي
رنيم:رقدت قبيل...من غير ما تفجعها
انا:باهي يا صغرونة
رنيم:رد بالك عليها حسام...و صراحة ربي معاك
طلعت حاجبي مستغرب...فسعت لبيتها قبل ما نسألها...هديت روحي...و كبست عالبواني...حليت الباب بالسياسة...دخلت و سكرتو ورايا...قربت منها شوية شوية...قعدت على طرف السرير...نغزرلها...كان مريتهاش توا...منعرفش شنية لي كان باش يصير فيا...دقايق تعدات منجمت نعمل حتى شي...كان اني نسرح في تفاصيلها...مديت يدي شوية...بعدتلها خصلات شعرها لتالي...و نزلت بيهم لرقبتها...لبوسة الخال لي مزالت بقعة العضة متاعي عليها...تبسمت و انا نغزرلها تحل في عينيها بالشوية...دوب غزرتلي و عاودت سكرتهم...مدت يدها شوية تحك في عينها...و عاودت غزرتلي تحكي
مريم:ح..حسام
انا:مستانسة ترقد بكري انتي ؟
غزرتلي ندرا كيف...و هزت روحها تقعدت...تحكي
مريم:ش..شتعمل هوني ؟
انا:هكا تستقبلني ؟
مريم:و شكون قلك لانا باش نستقبلك ؟
انا:بربي...تحبني نمشي ملا ؟
مريم:علاش جيت من اصلو ؟
عديت عينيا على وجها...و نزلت بيهم لتابل دونوي...نغزر لدوا متاعها...مش بالعادة تاخو دوا مع الفونتولين متاعها...معناها بالرسمي تعبت في غيابي...اصلا من ملامحها نجمت نستوعب لي تعدات عليه...خذيت نفس و قربتلها اكثر...تكات لتالي تحكي
مريم:ا..امشي من هوني
مديت يدي شوية....رجعتلها خصلات شعرها ورا وذنها...نحكي
انا:تحبني نمشي بالحق ؟
غزرتلي ندرا كيف...نطرتلي يدي و قربت مني...تضرب فيا بيديها زوز و تحكي
مريم:ن..نحبك تمشي من هووني...امشششي و معاادش ترجع...ح..حياتك من غيري افضل
الغصة لي خرجت مع كلامها تالي...خلاتني نجبدها في حضني...نحكي
انا:ايجا هووني
دورت يديها زوز على رقبتي...كبست عليا بكل قوتها حسيت بدموعها لي نزلو مع تنهيدتها القوية...دوب نسمع فيها تحكي
مريم:م..متمشيش...متخلينيش حسام
كبست عليها اكثر...و عديت يدي على طول ظهرها نحكي
انا:اششش اهدا سااعة عزيزتي
كبست عليا أكثر...تنهدات بقوة...خليتها على راحتها لين حسيتها بدات تهدا...غرست يدي في شعرها نحكي
انا:مررريم...تنجم تفهمني شبي حالتك هكا
جبدت روحها شوية...عدات يديها زوز على وجها..تمسح في دموعها و تحكي فرد وقت
مريم:ا..انت بالرسمي...ت..تنجم تاخو وحدة غيري
انا:منين جبت الكلام هذا ؟
مريم:جااوبني...انت معاادش تحبني
انا:مرريم
مريم:امي فتحية...قاتلي لي تحب تاخولك اخت عمر
انا:هننند ؟
هزت راسها قحرتلي...و مدت يدها ضربتني لكتفي تحكي
مريم:معااادش تقول اسمها قدااامي
انا:مش إنتي لي جبدت سيرتها ؟
مريم:حسااام يزززي...اصلا كنت حاسة لأنت معادش تحبني
انا:بربي...قولي كيفاه عرفت ساعة ؟
هزت راسها غزرتلي ندرا كيف...ترد في نفس و تحكي فرد وقت
مريم:م..معادش تعاملني كيما قبل
انا:و كيفاش كنت نعاملك ؟
كبست على يديها زوز...تفرك فيهم مع بعضهم...وتحكي
مريم:معادش تقولي يا روحي...و حبي و صغرونتي
هزيت حاجبي مستغرب...آخر حاجة توقعتها كلامها هذا...غزرتلي ندرا كيف و كملت تحكي
مريم:و..و معادش لبست خاتمك مرة اخرى
انا:و إنتي ماكش لابساتو زادة
مريم:انا م..منجمتش نعاود نطلبو منك...بعد اللي عملتو خاطرني حشمت منك...أما انت..
انا:شنية ؟
مريم:معاادش تحب تلبسو مرة اخرى...و مش بعيد قاعد تخمم في كلام أمي فتحية
انا:و شنية لي قالتو فتحية ؟
مريم:ت..تحب تعرسلك بهند
انا:صاار
مريم:تحب تاخوها أنت ؟
انا:ماهيش فكرة خايبة صراحة
مريم:م..معناها...باش تاخو قرارك ؟
انا:مريم...ياخي ناوية تهبلني انتي ؟
مريم:ش..شقصدك ؟
انا:قراري واضح من الأول
مريم:كي هكا علاش عاودت عطيتني أمل لي إحنا باش نبداو من جديد...باهي نعرف روحي غلطت...اما مش لدرجة طلقني و تاخو اخت صاحبك...أصلا انا مهضمتهاش من أول مرة...و كان خذيت قرارك مانيش باش ناقف في وجهك أكثر...عندها حق أمك تحب تشوف صغارك
انا:علاش معندكش صغير في ثنية انتي ؟
غمضت عينيها و عاودت حلتهم...بالعادة تسخفني كي تبدا تبكي...اما توا بالظبط منعرفش شبيني شايخ عليها قحرتلي تحكي
مريم:ش..شقصدك ؟
مديت يدي حطيتها على كرشها...و تبسمت على جنب نحكي
انا:ياخي محكيتش لفتحية لي صار معانا آخر مرة
مدت يدها ضربتني لكتفي بقوة...و قحرتلي...تحكي
مريم:زاايد متحشمش أنت
انا:شنوووة ؟
مريم:صغير شنية لي تحكي عليه أنت
انا:عزيزتي توقعت نلقاك حبلة
مريم:ياااا حسااام يزززي...من غير شي قاعدة على أعصابي
انا:لطف عليك
مريم:حسااام
انا:مممم
مريم:م..معادش حاجتك بيا ياخي ؟
انا:مريم...يا روحي...تعمل مزية معادش تخدم مخك جيت من طرف الدنيا باش نروح بيك...ياخي تقوم تعملي درس انتي
مريم:شقصدك تروح بيا ؟
انا:متحبش ترجع لداارك
غزرتلي ندرا كيف...و ترمات عليا في لحظة...عنقتني بالقاوي...تحكي
مريم:نحب...معااادش نحبك تبعد عليا
مديت يدي كبست على ظهرها...و نزلت عليها نشم في ريحتها...يعطيها صحة فتحية مقواها...شعرة لا رزاتني في المرا...جبدت روحها شوية...تحكي
مريم:باش تحكي مع أمي فتحية
انا:فتحية عداتها عليك...و انتي خرجت غشك فيا
ياخي هكا تستقبلني
مريم:ك..كيفاش عداتها عليا ؟
انا:ايجا هوني ساعة...خليني نشبع بيك...مبعد نحلو امور فتحية
مريم:مدامك توحشتني...شبيك لتوا ؟
انا:خدمة ؟
مريم:خدمة اهم مني ؟
قربتلها شوية...بستها من خدها...و نزلت لرقبتها بالوقت كبست يدها خلاتني نعضها...جبدت روحها تحكي
مريم:يااا حسااام لتواا مزلت موجوعة
انا:إنتي ريت منها حاجة الوجيعة
مريم:بربي ؟
نزلت بصوابعي على على خدها...لشفايفها...نحكي فرد وقت
انا:متحبش ترجع معايا ليلة
مريم:مش قبل ما تحكي مع أمي فتحية
انا:الصبر يا ربي
مريم:حساام
انا:بااهي
تنهدت بقوة و جبدت تليفوني...كلمتها...حطيتو hp شوية و هزت عليا تحكي
امي:شنوة سي حسام ؟ فاش قام تطلب فيا توا ؟
انا:على خاطر مرتي متحبش ترجعلي...من غير موافقتك
امي:اسمعني حساام...كان مزلت تغششها بعد توا...والله ما نخليهالك الطفلة
انا:سمعت لالة...وليت أنا الغالط 
امي:و إنتي زادة مريم...كان مترجعش معاه...مظطرة باش نعمل لي قتلك عليه
قربت مني اكثر...عنقتني بالقاوي...تبسمت و انا نسمع فيها تحكي
مريم:ماكش باش تاخو حتى وحدة غيري...انت متاعي انا و كهو
انا:هيا فتحية تصبح على خير
امي:و نتوما بخير
علقت عليها...و حطيت يدي على ظهرها...حسيتها تفرهدت بعد ما سمعت كلامها...غرست يدي لاخرى في شعرها نحكي
انا:هيا قوم حضر روحك باش نمشو
جبدت روحها شوية...غزرتلي ندرا كيف...كانها بدات تستوعب...اللي قاعد يصير...رجعت شعرها لتالي...تحكي
مريم:حسام كيفاش دخلت ياخي ؟
انا:من الباب
مريم:يااا حساام يااخي ناوي تجلطني انت...كان يدخل بابا على غفلة ؟
انا:قاعد مع مرتي...مانيش نعمل في حاجة حرام
مريم:زاايد معاك...كيفاش نجي معاك و بابا هوني
انا:مررريم
مريم:شنوووة ؟
انا:جاوبني تحب تجي معايا توا و لا لا ؟
مريم:نحب
انا:باهي قوم حضر روحك ملا
مريم:و بابا ؟
انا:الصبر يا ربي...يا مريم يا روحي...بوك هو لي دخلني لهوني...هيا قوم حضر روحك...مزلت تاعب راني
مريم:باهي...لحظة برك
جات باش تقوم...عاودت غزرتلي...و ضيقت عينيها تحكي
مريم:كيفاه حتى خلاك تدخل لبيتي ؟
انا:مريم
مريم:باهي...هاني باش نقوم
جبدت روحها مني...باستني من خدي ووقفت...خذيت نفس نحكي
انا:البس الفاست متاعك كهو
مريم:باهي
هزيت الفونتولين متاعها في يدي...منجمش نخاطر بيها اكثر...خاصة بعد لي سمعتو من بوها...خذيت نفس ووقفت نغزرلها...تسكر في الفاست متاعها...رغم انو الربيع بدا يدخل...اما لتوا دنيا باردة...قربتلها شوية...و مديت يديا زوز...رجعتلها شعرها لتالي نحكي
انا:محلاك كي تسمع الكلام
مريم:مزلت متغشة منك
انا:تحب نرضيك هوني و لا في دارنا
مريم:حسااام
انا:باهي...ايجا عندي شوية ساعة
نزلت بيديا زوز لاجنابها...جبدتها عندي...نزلت عليها شوية...نحكي
انا:تعرف حاجة...كان متعاركنيش...نحس حاجة ناقصة
مريم:بربي سي حسام
انا:مممم
نزلت عليها اكثر...دوب بستها...عضتني بالوقت...جبدت روحي مروهج...ضحكت تحكي
مريم:تستهل
هربت من يدي قبل ما نقول كلمة...حلت الباب و سبقتي...عديت صوابعي على شفايفي...و خلطت عليها نزلت وراها...لقيت سي احمد في وجهي...غزرلها و عاود هز راسو غزرلي...يحكي
احمد:حليتو اموركم ؟
انا:سي احمد...كان معندكش مانع نجم نهز مرتي توا ؟
احمد:اكيد...اما مزال عندنا كلام آخر بيناتنا
انا:باهي سي احمد عيشك
احمد:رد بالكم على بعضكم
مريم:عيشك بابا
انا:تصبحو على خير
احمد:و انت بخير
خذيت نفس باش نخط عليها...حبسني بيدو لي تحطت على كتفي...يحكي
احمد:مريم امانة عندك...معادش نحب لي صار يتعاود
انا:تهنى سي احمد
تبسمتلو و خلطت عليها...حليتلها الباب ركبت...و ركبت بجنبها...خدمت الكرهبة من غير حتى كلمة...قربتلي شوية...حطت راسها على صدري...تحكي
مريم:حساااام
دوب غزرتلها و عاودت ركزت مع الثنية...مزلت شاعل من الفازة متاع قبيل...حطت يدها على خدي تحكي
مريم:ماكش باش تقلب عليا الطرح توا
بقيت ساكت من غير حتى كلمة...نزلت بصوابعها لشفايفي تحكي
مريم:حساام...باش تبقى مطفيني هكا
انا:يززي مريم
مريم:باهي...هاني باش نسكت
هزت راسها شوية باستني من خدي...و غرست راسها في رقبتي...كبست عالفولون مع انفاسها لي قوات في رقبتي...مستحيل ننجم ننكر تأثيرها عليا...و على حياتي...لتوا منعرفش كيفاش نجمت نبعد عليها مرة اخرى...رغم مش برشا...اما عملت فيا في آخر فترة دوب نجمت نركز في الثنية لي حسيتها طوالت اكثر...كبشت فيا اكثر...ضيقت عينيا نحكي
انا:شبيك ؟
مريم:ح..حسام...بالشوية
انا:متخافش
مريم:سوق بعقلك اماانك
انا:باهي هدي روحك
كبست عليا و سكتت...عرفت لي فكرة الاكسيدون عاودت دارت في مخها...تنهدت بالقاوي...و نقصت في الفيتاس...منحبش ندخلها بعضها اكثر...و منجمتش نقاوم قربها اكثر...يدي تمدت و استقرت فوق ظهرها بالظبط...حتى انا بحاجتها و حاجة قربها...اصلا لتوا مش مصدق لي امورنا تحلت...و لي معادش فما شي ياقف في طريقنا بعد توا...و لا احنا لي معادش نخلو طرف ثالث يتحكم فينا...اصلا معاد نحب حتى شي من الدنيا...كان انها تكون معايا و بجنبي..اكهو

#سمر💙💙💙