زهرة🌸

الحلقة السابعة و الخمسون

🔸️حلقة 57
🔸️عمر يحكي:
فقت الصباح...نحل في عينيا بالسيف...مش مصدق لي قاعد يصير...لتوا نشم في ريحة أمي...طلعت راسي شوية نغزرلها...تبسمت بالوقت...باقي كابسة عليا بيديها زوز...هزيت روحي شوية...خطفت بوسة منها...و تكيت لتالي...قربت مني بالوقت...مديت يدي حضنتها بالوقت مزال بكري شوية...منحبش نفيقها توا...نعرف لي تعبت معايا برشا البارح...غرست يدي في شعرها...نعدي فيها شوية و فاقت...حضنتني أكثر...تحكي
زهرة:عممر
انا:مممم
زهرة:فقت ياخي ؟
أنا:مممم من شوية
زهرة:تاعبة أنا
انا:باش نبقاو هكا ملا
زهرة:مممم...وين باش تمشي أنت توا ؟
أنا:حتى بلاصة يا روحي
زهرة:ماكش باش تزور أمك و هند
أنا:هوما باش يجيو عزيزتي
هزت روحها مروهجة...حطت يدها على صدري تحكي
زهرة:و إحنا لتوا مزلنا في الفرش
مديت يدي كبست عليها...و جبدتها عندي...نحكي
انا:مزال بكري...خليك شوية
زهرة:عمر...نحب نسألك شي
انا:اشكي
زهرة:شنوة ناوي تعمل توا ؟
أنا:منعرفش...أهم شي عندي توا هند...لازمني نعرف شنية حكاية العرس ؟
زهرة:و و بوك ؟
أنا:تو كلشي يتحل بالوقت صغرونتي...متخممش في الحكاية برشا...منحبكش تعب روحك بالحكايات هذوما
زهرة:مدامها باش تعبك...باش تعبني أنا زادة
بستها من راسها...و كبست عليها بيديا زوز...نحكي
أنا:بنتي
زهرة:مممم
انا:حبيت البلاصة هوني
زهرة:أكثر شي حبيتو...لقائك بعيلتك...و مدامك معايا ما يهمني حتى شي آخر
أنا:عيش حبي
زهرة:مممم فما شي اخر
أنا:دلل
زهرة:صراحة جعت برشا
انا:يعني
طلعت راسها غزرتلي ندرا كيف تستعطف فيا...جبدتها من عندي شوية نحكي
انا:باهي باهي...هاني باش نقوم لالة
زهرة:عيش حبي
قربت مني...تبوس فيا...تبسمت بالوقت...نحكي
انا:يزززي مانيش باش نتحمل أكثر
رمات روحها لتالي...غزرتلي ندرا كيف...تحكي
زهرة:باهي هاني باش نقوم أنا زادة
جبدتها عندي بالوقت...و هزيت روحي شوية نحكي
انا:ايجا هوني وين ماشية ؟
زهرة:مش تحبني نقوم أنت
أنا:توا بدلت رايي
جبدتها عندي اكثر...و نزلت عليها...أول ما وصلت لشفايفها دق الباب بالوقت...غزرتلي ندرا كيف تحكي
زهرة:شكون باش يجي توا ؟
انا:شكون غيرها
زهرة:هند
انا:مممم
زهرة:هيااا قوم افتحلها...لازمني نبدل دبشي و نخلط عليك
انا:صحة ليك منعت المرة هاذي
تبسمت ندرا كيف...تستفز فيا الفرخة...دوب خطفت بوسة من شفايفها...و هزيت روحي...عديت يدي على شعري...و مشيت حليت الباب...لقيتها واقفة...هازة في يديها الفطور...قربت مني شوية...نزلت عليها شوية باستني من خدي تحكي
هند:صباااح الخير...لأحلى اخ في الدنيا
انا:صباح النور يا روحي
هند:منكونش فيقتكم ؟
انا:لا عزيزتي...هيا أدخل
هند:وين زهرة ؟
انا:تو تخلط
هند:باهي...ملا أنا باش نحط الفطور...و أنت برا حضر روحك
انا:تو نحطو أنا
هند:هيااا سي عمر...تو ندبر راسي وحدي
انا:بااااهي...اعتبرني ما قلت شي
قربت بستها من راسها...و رجعت للبيت...نغزرلها...لمت شعرها كعكعة...تبسمتلي بالوقت...قربت منها...عديت صوابعي على خدها...نحكي
انا:هاك حضرت روحك فيسع
زهرة:و أنت زادة باش تحضر روحك فيسع...هاني انا باش نبقى بحذا هند
قربت مني باستني بالزربة...و خرجت تجري...تنهدت بالقاوي...و دخلت لبيت البانو...غسلت وجهي...باش نصحصح اكثر...بدلت دبشي...وخرجت عندهم...جبدت الكرسي..و قعدت...تبسمت بالوقت...غزرتلي هند تحكي
هند:مممم شفما ؟
انا:الفطور هذا...حضراتو فاطمة
هند:كيفاش عرفت ؟
انا:والله كلشي نحبو...موجود هوني
هند:صحة ليك عزيزي
انا:عيش اختي
هزيت يديا...غطست في الماكلة...ليا سنين عليها...بعد الوقت هذا الكل...ما نسات حتى شي نحبو...طلعت راسي غزرتلها...مركزة معايا...مع انو قومتني على خاطر كرشها...تبسمتلي بالوقت...و نزلت راسها لصحن تاكول منعرفش شنية كنت باش نعمل من غيرها...حتى تصرفاتها لي مش مقصودة تخليني نعشقها اكثر...اول ما كملت فطوري...هزيت روحي نحكي
انا:هند متقراش ياخي ؟
هند:لااا مانيش باش نمشي...و ماكش باش تجبرني زادة نحب نبقى معاكم
انا:باهي باهي...لي يغلبك يجي يحاسبني
هند:وين ماشي انت توا ؟
انا:باش ناخو قضية...و نعمل دورة...نحاول نتذكر البلايص هوني
هند:باهي ملا انا باش نبقى مع زهرة هوني...يعني فما برشا حاجات...نحكوهم مع بعض...مش هكا عزيزتي
زهرة:اكيد عزيزتي
انا:معناها طردتوني بطريقة محترمة
هزت روحها قربت مني...حضنتني بالوقت...تحكي
زهرة:لا يا روحي...منجمش نفرط فيك
بستها من راسها...و عديت يدي على ظهرها...نحكي
انا:هيا باهي...هاني انا باش نخرج توا
هند:مطولش برشا...خاطر امي تنجم جي في اي لحظة
انا:هو في الدار على هذاكا ؟
هزتلي براسها ايه...عديت يدي على وجهي...نحكي
انا:باهي...احسن شي نخرج توا
جبدت روحي من زهرة...و حليت الباب خرجت...خذيت نفس...و هزيت الكرهبة...ندور بيها و كهو...كلشي تبدل هوني...تقريبا مش نفس البلاصة لي عشنا فيها...عشر سنين...تبدلت برشا حاجات...ركيت على جنب...نغزر للعطار...القهوة و المصور...باقي كلشي في بلاصتو برغم برشا عباد تبدلت...خذيت نفس و نزلت...دخلت للقهوة شديت طاولة مطرفة...طلبت تاي...و تكيت لتالي منعرفش في شنوة سرحت بالظبط...يمكن في الماضي لي خليتو ورايا من سنين...في غزرة امي لكلها وحش و وجيعة...حسيت بحاجة هند ليا في تعنيقتها و اخر شي توقعتو...غزرات اللوم لي غزرتلي بيهم...وقت جات عيني في عينها...مستانس بيهم في كل مرة كنت نغيب و نرجع...اما المرة هاذي نجمت نتوقع قداشها متغشة مني...هروبها مني ساعتها...خلاني نتوقع لي مزالت موجوعة مني...باقي طبيعتها هادية كيما قبل...شي ما تبدل فيها...منعرفش اصلا علاه ضربت في مخي توا حطيت الفلوس عالطاولة...هزيت روحي وقفت...عديت عينيا على كل بلاصة...تذكرني بالماضي...تبسمت و حليت الباب باش نخرج...ضرب فيا واحد بالوقت داخل بالزربة...و يحكي مع صحابو وراه...ضيقت عينيا و طلعت راسي غزرتلو نحكي
انا:بالشوية صاحبي
هو:سامحني خويا...منق...
سكت كي طلع راسو غزرلي...تبدل لونو في لحظة..باقي نغزرلو...مش فاهم شبيه...عديت عينيا على تفاصيل وجهو...مش غريبة عليا...اما زادة منجمتش نتذكرو بعد السنين هاذي الكل...حطيت يدي على كتفو...خذيت نفس نحكي
انا:ما صار شي...سامحني توا
بعد شوية مروهج...من غير ما ينزل راسو...جبدت روحي شوية و خرجت...تلفت ورايا بالوقت...منعرفش شبيني و لا شنية حسيتو...باقي واقف في بلاصتو...أول ما وصلت للكرهبة...نسمع في واحد يعيط عليه
هو:مصططفى...يا ولدي فيسع...لازمنا نرجعو
جمدت في بلاصتي...كلمة صدمة أقل شي توصف حالتي توا...تلفت شوية شوية...نغزرلو...جات عيني في عينو مرة اخرى...فلت الباب من يدو...و قرب مني..وقف قدامي بالظبط...منعرفش قداش تعدا وقت...و إحنا نغزرو لبعض...منجمتش نصدق لهو مصطفى خويا...هو الوحيد لي كنت نعرف اخبارو من بعيد...من غير ما نرا صورتو...مش مصدق لهو واقف قدامي توا...عدا يدو على وجهو يحكي
مصطفى:ع عمر
عديت عينيا على تفاصيل وجهو...يغزرلي مصدوم...كانو يحب يتاكد لانا بالرسمي واقف قدامو...هز براسو لا يحكي
مصطفى:ل لا...لا مستحيل تكون عمر...باز غلطت
خذيت نفس بالسيف...قربت خطوة منو...نحكي
انا:م..مصطفى
مديت يدي باش نمسو...دزني لتالي...بيديه زوز...يحكي
مصطفى:فاش تعمل ياااخي...شكونك أنت...و شنية تستخايل في روحك ؟
عديت يدي على وجهي...متوقعتش باش تكون ردة فعلو هكا...جيت باش نحكي...هز يدو في وجهي يحكي
مصطفى:اببععد...رد بالك تخمم تقرب مني
تلفت بالوقت...هز كرهبتو و طار بيها...خلطت عليه بالوقت...باقي نسوق وراه...نفخت بالقاوي...كي شد الفران بالقاوي...نزل و دخل لدار بالوقت...دخلت وراه نلقى امي...نازلة من دروج...محضرة روحها باش تخرج وقف قدامها بالظبط يحكي
مصطفى:وين ماشية ؟
طلعت راسها غزرتلي بالوقت...هزيتلها براسي ايه...تلفت عندي...تبسم على جنب يحكي
مصطفى:كنت تعرف لهو رجع امي ؟
امي:م مصطفى...عيش ولدي...أسمعني
طلع يجري من غير ما يسمع حتى كلمة أخرى...خلطت عليه بالوقت...دخل لبيتي...وقفت في الباب نغزرلو يرمي في كلشي يخصني عالارض...و يصيح فرد وقت
مصطفى:مستحييل...ماهوش باش يرجع...عمر مشى و مستحيل يرجع...هو اختار ثنيتو...فاش قام حتى يرجع
امي:مصطططفى يزززي عيش ولدي
تلفت عندي بالوقت...قرب مني وقف قدامي...غزرلي ندرا كيف يحكي
مصطفى:امشي من هوني...ارجع منين جيت
غمضت عينيا و رجعت حليتهم...قبل ما نحل فمي بكلمة...خلاني و خرج...قربت مني...حطت يدها على صدري تحكي
امي:متسمعش كلامو عيش ولدي...مزال متغشش منك و كهو...حتى هو منساكش طول سنين هاذي
خذيت نفس بالقاوي..متوقعتش باش يجن لهدرجة
مديت يديا زوز حضنتها...نحكي
انا:أرتاح أمي...مصطفى من بكري هذيكا طبيعتو...و أكيد بعد سنين باش تكون ردة فعلو هكا...هاني باش نخلط عليه و نحكي معاه
امي:ماهوش باش يسمعك توا
انا:باش نبقى نحاول لين يسمعني
امي:باهي اهدا توا عيش ولدي
انا:ايجا...ارتاح
امي:خليت مرتك وحدها ؟
انا:مع هند
امي:هاني باش نمشي عندهم ملا
انا:خليني نوصلك
امي:و مصطفى ؟
انا:لازمو يبقى وحدو شوية
امي:باهي عزيزي
خلطت عليها...نمشي وراها...لين وصلنا للكرهبة...حليتلها الباب ركبت...و تفكيري بقى عندو...محبيتش نقابلو بطريقة هاذي...و لا نحطو في هكا موقف...اول ما وصلنا...لقيناهم زوز...قاعدين في الجنينة..دوب شافتني قربت منا تجري...تحكي
زهرة:مرحبا بيك خالتي
امي:متغششنيش منك...نحبك تعيطلي امي...كيما هوما بالظبط
زهرة:باهي امي
تبسمتلي بالوقت...دوب طلعت امي قربت مني...شدتني من يدي تحكي
زهرة:عمر...شبيك يا روحي...صارت حاجة
مديت يدي عديتها على ظهرها...جبدتها عندي..و نزلت بستها من راسها نحكي
انا:لباس يا روحي...جيست تعبت شوية و كهو
زهرة:قابلت بوك ياخي ؟
أنا:لا مصطفى
زهرة:شنية لي صار ؟
انا:حتى شي...رفض باش يسمعني
كبست على يدي اكثر...و طلعت راسها غزرتلي تحكي
زهرة:باش يسمعك...و باش يعذرك زادة...هيا برا امشي عندو توا
انا:و أمي ؟
زهرة:هوكا احنا معاها...تو نتعرفو على بعض اكثر...و انت برا رضي خوك...و خليه يجي بحذانا هو زادة
انا:شنوة كنت باش نعمل من غيرك
زهرة:مممم منعرفش
انا:هههههههه يحرزلك...الجماعة يغزرولنا
زهرة:و إلا شنوة كنت باش تعمل ؟
انا:مبعد تاخو اجابتك...هيا توا
كبست على يدها اكثر...و قربت منهم...وقفت بحذا امي نحكي
انا:لازمني نمشي توا...منطولش و نرجع...استناني
هند:وين ماشي زادة ؟
امي:تعرف وين تلقاه توا
هند:شكون ؟ حد يفهمني لي قاعد يصير
زهرة:مصطفى
انا:اكيد امي...مصطفى كبر...اما متبدلش
امي:باهي عزيزي
بستها من راسها و رجعت لتالي...هزيت الكرهبة و طرت بيها...ثنية كاملة نخمم كيفاش باش نقابلو...و لا كيفاش نخليه يسمعني...من بكري يعمل لي في راسو و كهو كبست عالفولون و زدت في الفيتاس...اكثر بلاصة يمشيلها وقت يبدا معصب من اي حاجة...و لا يحب يقعد وحدو...محسيتش بروحي كيفاش وصلت...تنهدت بالقاوي كي ريت كرهبتو...ركيت بجنبها و نزلت...قربت منو قعدت قدامو و تكيت لتالي...نغزر لساقية...من سنين كان ديما يهرب لهوني...منعرفش قداش تعدا وقت و احنا ساكتين...نطق من غير ما يطلع راسو و يغزرلي
مصطفى:علاه رجعت ؟
انا:خاطر منجمتش نحسب اليمات اكثر
مصطفى:شصااار...ماك من بكري شاطر في رياضيات
انا:توا صعابت عليا
مصطفى:انت خليتنا قبل عشر سنين...لدرجة وقت ريتني...منجمتش تتعرف عليا...معناها نسيتنا لهدرجة فاش قام حتى رجعت توا
انا:يمكن خاطر حسيت روحي بحاجتكم توا
هزلي براسو لا...دموعو نزلو بالوقت...و غزرلي يحكي
مصطفى:تكذذذب...انت عمرك ما كنت بحاجتنا...انت ديما كنت تختار الطريق لي يساعدك و كهو...مشيت من غير ما تتلفت لشكون خليت وراك...انت حرقتني عمر كسرتلي ظهري و سندي و قدوتي بعد ما مشيت...انا كنت متعلق بيك اكثر من اي حد هوني...اما انت خرجت من الباب هذاكا...حتى بلا ما تودعني...حتى بلا ما ترا دموعي...و الكلام لي حبيت نوصلهولك...و لا مرة خممت ترجع لهوني على خاطري...و لا مرة حاولت توصل ليا...فاش قام حتى تحتاجنا توا...تعرف قداش من مرة حاولت نوصلك...تعرف لبعد مدة جيت لتونس تحججت بالكورة..منجحتش في الفريق نهارتها خاطرني خرجت نفركس عليك...في كل بلاصة تنجم تكون فيها مشيت حتى للجامعة لي قريت فيها...و عرفت منهم لانت سافرت لفرنسا...مشيت من هوني و متلفتش شكون خليت وراك...و هاك وصلت وين حبيت كرهبة و فلوس...بنيت روحك من اول و جديد...ملا علاه رجعتلنا توا...شنية لي تحبو منا...احكي
بقيت نسمع فيه لتالي...حسيت بوجيعتو...و قهرتو دموعي نزلت مع دموعو...في كل كلمة خرجت منو خذيت نفس بالسيف نحكي
انا:شنية تستخايل انت مصطفى...في بالك فرحان باللي عملتو...تعرف شنية حسيتو...وقت لي هو تبرا مني قدامكم الكل...تعرف شنية معناها تعيش عشر سنين من غير عيلة...من غير ما نقول امي...من غير ما نراها و نحضنها...من غير ما نحضر معاكم افراحكم و احزانكم ياخي لهدرجة تستخايلني فرحان بحياتي
مصطفى:ملااا علاااش...علاش مشيت عمر ؟ مدامك ماكش فرحان بيها المعيشة هاذي...علاه خليتنا...علاه خذيت منا أمنا...تعرف لهي كانت موجودة معانا...اما تفكيرها عندك...هاك رجعت...شنوة باش ترجع معاك باش ترجع شي من الوجيعة لي عشناها بعدك
انا:مانيش باش نرجع...اللي خسرتو صعيب برشا...اني نجم نرجعو يا مصطفى
مصطفى:مجاوبتنيش...علاه رجعت عمر ؟
انا:وقتها كنت قدك...عديت 3 سنين هوني بعد ما كملت قرايتي...حاولت نتعود على خدمة المصنع و الارض حاولت نرا الدنيا كيما هو يحبنا نشوفوها...صدقني حاولت اما منجمتش...محبيتش نكون نسخة منو...نحب نعيش حياتي كيما رسمتها...تعبت اما وصلت...حبيت نوصل باش نصحح مفهومو الغالط...وقت قال القراية هاذي ما عندها وين توصلك...العشر سنين لي عديتهم في كل درجة كنت نطلعها كنت نثبتلو لكلامو غالط...مع انو مكانش يراني و لا حتى يعرف خباري...هاني وليت مهندس و دكتور جامعة فرد وقت...وقفت برشا مرات قدام روحي...كاني نكلم فيه و نقولو اغزر لولدك وين توا...نجم يبدا من صفر بعد ما انت حرمتو من كلشي صحيح وصلت...اما في الوقت لكنت نثبت في هذا الكل...تأكدت لي خسرتك و خسرت هند...و خسرت امي زادة...هوكا علاه رجعت...رجعت على خاطركم
هز يدو عداها على وجهو...و تنهد بالقاوي يحكي
مصطفى:كنت تنجم توصلي...كيما عملت مع هند...اما انت قررت تبقى بعيد عليا
انا:صحيح...خاطر نعرف لهكا باش تكون ردة فعلك مكنتش باش تسمعني...و مكنتش باش تفهمني
مصطفى:كنت باش نحاول نفهمك كيما توا...كنت باش نسمعك عمر
انا:بالسيف عليك باش تسمعني...و باش تسامحني زادة و الا كنت باش تاخو نفس طريحة متاع بكري
طلع راسو غزرلي ندرا كيف...و ضحك بالوقت...تبسمت و انا نغزرلو...عديت يدي على وجهي...نمسح في دموعي...و نسمع فيه فرد وقت
مصطفى:امتى رجعت ؟
انا:البارح
مصطفى:رجعت وحدك ؟
انا:مع مرتي
مصطفى:عرست ؟
انا:مممم
مصطفى:ملا ولى عندك صغار
انا:مزال بكري
مصطفى:بكري ؟
انا:ياولدي عندي ست شهور من اللي عرست...معناها مزال بكري
مصطفى:عشر سنين توا وين عرست
انا:هي عوضتني عالعشر سنين لي عشتهم وحدي
مصطفى:معناها اونفان طحت على راسك
انا:والله طحت يا خويا
مصطفى:ان شاء الله متخليهاش هي زادة
انا:مستحيل
مصطفى:فكرت فيا السنين هذوما ؟
انا:اكثر حد كنت نخاف نسأل عليه...حتى كي هند وقت تبدا تحكي...كنت نقاطعها...خاطر نعرف لكنت باش نلوم روحي اكثر
مصطفى:تعرف حاجة...وقت نرا قرارات بابا...كنت ندخل لبيتك و نقول هذا احسن قرار خذيتو...انك خليت كلشي و مشيت...يا ريت كنت نجم نعمل كيفك عمر
انا:شنية عملت في غيابي ؟
مصطفى:وليت مدير مصنع
ضحكت بالوقت...و عديت يديا زوز على وجهي...نمنع في دموعي...قحرلي يحكي
مصطفى:والله اكا لي فرضو عليا بوك
انا:و شعملت في الكورة ؟
مصطفى:مزلت نلعب مرة على مرة
انا:اكا ظاهر
مصطفى:شنووة ؟
انا:نحكي عالوزن الزائد...صحيح وين مشى ؟
مصطفى:دكك عليا
قربت منو شوية...نقرص فيه...نحكي و نضحك فرد وقت
انا:ضيعتو و انت تجري ورا الكورة
مصطفى:يزززي...عمر....ههههههههه تي يزززي...والله نحس في روحي...ناخو في نفس الطريحة...في نفس البلاصة
انا:ايجا ترا...ايجا خليني نعنقك
ترمى عليا بالوقت...حضنتو بيديا زوز...سنين تعدات الطفل لي خلاتو ورايا...و عمرو 17 سنة...ولى راجل توا...راجل يتعمل عليه...كبر و انا بعيد عليه...دموعي خانوني و نزلو مرة اخرى...كنت باش نجبد روحي..كبس عليا اكثر...يحكي
مصطفى:معادش تبعد عمر...معادش تخلي خوك وراك
انا:مانيش باش نمشي...مستحيل نبعد المرة هاذي
جبد روحو شوية...مسح دموعو...عديت يدي على وجهي...و خذيت نفس...تبسم يحكي
مصطفى:ماكش باش تعرفني على مرتك
انا:اكيد...الجماعة الكل غديكا هيا معايا توا
مصطفى:وين ؟
انا:دار خالتي
مصطفى:قابلت سلمى ؟
انا:ريتها و كهو
مصطفى:باهي...هيا توا...مزال برشا حاجات نحكيو فيهم...مانيش باش نفلتك اليوم
انا:تحت أمرك...سي الكعبور
مصطفى:شو تطياح القدر...ما صدقت لربي نساوها الكلمة
انا:لازمك تتعود عليها...خاطرني رجعت توا
مصطفى:كان باش تبقى...اكيد نتعود عليها
هزيتلو براسي ايه...و رجعت جبدتو عندي حضنتو...كل لحظة...نندم لانا بعدت لهدرجة...لي خليت خاوتي و امي وحدهم...كسرتهم و كسرت روحي...اما اكيد مزال فما وقت...انا مخسرتش كلشي...و هذا لي خلاتني زهرتي نتأكد منو...باش نجم نكمل ثنية لي خليتها من سنين طويلة