🔸️حلقة 25
🔸️عمر يحكي:
وصلت مريم...و شديت ثنية لدار...منعرفش على روحي كيفاش وصلت...لتوا مش مصدق لي صار...خايف عليها و على حالتها...لي ماشية و تسوء اكثر...كان صار و مراد ربح القضية...باش تتعقد الأمور أكثر من هكا...حليت الباب و دخلت...نحيت الفاست طيشتها عالفوتاي
عملت دوش...رخفت بيه أعصابي...كلما نسكر عينيا تتعدا صورتها قدامي...كملت فيسع...بدلت دبشي و رجعت لصالة...ترميت عالفوتاي...و حليت البيسي...لقيت إيمايل متاع أمين لحقني...حليتو بالوقت...نقرا في المعلومات لي وصلتني على المشروع...نقرا فيه و نقنع في روحي...انو هذا الحل الصحيح...و هذا لي لازم يصير...تكيت لتالي...للحظة حسيت إني اللي نعمل فيه غالط...منعرفش إذا قاعد نهرب منها و لا من روحي منعرفش اذا بالرسمي البعد باش ينسيني فيها و لا يخليني نتعلق بيها اكثر...تسطحت لتالي...منجمتش حتى نمشي لبيتي...تذكرت كلامها متاع قبيل و تحضينتها لي جات على غفلة...متوقعتهاش منها جملة تبسمت على جنب...بالرسمي ساعات نحس روحي رجعت لايام المراهقة...فايت عشر سنين و أنا نقري
تعدا على راسي اشكال و انواع متاع بنات...اما اول مرة نقابل وحدة كيما زهرة...منعرفش شنية الحاجة السبيسيال لي حسيتها فيها...برغم تصرفاتها ياسر بسيطة...اما شدتني ليها...حتى كي تحب حاجة...ما تطلبها من حتى حد...الوقت لي تعدا علينا...تحاول قد ما تنجم تتحمل مسؤوليتها وحدها...لي متاكد منو كان تربات في ظروف اخرى...و من غير ما يكون مراد في حياتها...كانت باش تعيش حياة هادية...من غير الخوف هذا و التوتر لي مسيطرين عليها ديما...منعرفش كيفاش هزني نوم..و غفيت...فقت على صوت دقان الباب هزيت روحي بالسيف...دقدقت من نومة الفوتاي...حليت الباب من غير ما نرا شكون...لقيتو في وجهي...ضيقت عينيا نحكي
أنا:تنوم فيا ياخي ؟
حسام:الكرواصون سخون...قلت خليني نفطر معاك اليوم
أنا:تفضل ملا
حسام:برا حضر روحك...و أنا باش نحضر الفطور
انا:باهي
خليتو...و مشيت لبيت البانو...غسلت وجهي...و رجعت لبيتي...بدلت دبشي...ريقلت روحي...وخرجت عندو لقيتو قاعد عالفوتاي...يغزر للبيسي...طلع راسو غزرلي مصدوم يحكي
حسام:شنننوة هذا ؟
قربت منو...سكرت البيسي...و غزرتلو نحكي
انا:حتى شي...وينو الفطور ؟
هز روحو وقف...قحرلي...و قرب مني شوية يحكي
حسام:عممممر...فهمني شنوة هذا...بالرسمي باش تسافر أنت ؟
أنا:مزال مقررتش
حسام:قرار شننوة ياخي ؟
أنا:فرصة مليحة...يعني مشروع كيما هذا...ميجيش نرفضو
حسام:¤¤¤¤¤¤ بيا عمر...مش قبل عام جاتك نفس الخدمة في الشريكة معانا و رفضت...قلت خدمة وحدة تكفيك...مش قلت معادش تسافر...خاطر منجمتش على العيشة وحدك غديكا...شنية لي تبدل...علاه تحب ترجع لفرنسا توا ؟
أنا:منكونش وحدي..المرة هاذي باش نهز سيرين معايا
حسام:قاعد تهرب معناها
طلعت راسي...غزرتلو ندرا كيف...منعرفش علاه حسيت كلامو صحيح...اما حبيت نتلف الحكاية...خذيت نفس نحكي
أنا:شتقصد ؟
حسام:تعرف قصدي بالقدا...في بالك بالطريقة هاذي باش تنساها...صدقني...باش تتعب اكثر...اللي تعمل فيه مش حل يا عمر...اعمل عقلك يا ولدي..راك باش ضيع روحك...و تضيع الطفلة معاك...ياخي نورمال انت باش تخليها وحدها...زهرة تعلقت بيك و هذا ظاهر في تصرفاتها...يا سيدي كان تحب تسافر...هز زهرة معاك مش سيرين...لمرة وحدة برك تبع قلبك...و الا راك باش تندم بالرسمي
قربت منو شوية...هزيت يدي...نضرب فيه على كتفو بالشوية و نحكي
انا:كلامك صحيح...أنا حبيتها...منعرفش كيفاش و لا علاش...اما زادة منجمش نقرب منها أكثر...الوقت و الظروف...كلشي ضدنا...مش انا لي نفرح على حساب غيري...انا مديت كلمتي لسيرين...و منيش باش نتراجع باش نعرس بيها...و باش تولي مرتي قدام ربي و عبادو و زهرة كيما دخلتها لحياتي...باش نخرجها بنفس الطريقة...صدقني منجمش نعذبها معايا...حتى هي من حقها تحب و تعيش حياتها
حسام:باهي...مع أنو حسب معرفتي...متأكد ماكش باش تخليها لغيرك
ضربني بيدو لكتفي...و غزرلي ندرا كيف يتحدى فيا تبسمت على جنب نحكي
أنا:اخطانا من السيرة هاذي توا...وينو الفطور ؟
عدا يدو على شعرو...منعرفش علاش حسيتو عمل كارثة...ضيقت عينيا و مشيت للكوجينة..منعرفش شنية لقيت فوق الطاولة بالظبط...حط كان الموجود من غير ما يتعب روحو و يحضر شي...خلط عليا بالوقت يحكي
حسام:باش تبقى واقف برشا ؟
أنا:شننوة هذا ؟
حسام:فطوور
انا:اكاكا الظاهر
جبدت الكرسي و قعدت...قعد مقابلني...و غزرلي يحكي
حسام:متغزرليش اكاكا...معنديش خبرة كيفك
انا:أحسن شي جبت الكرواصون معاك...عالاقل نلقى شنية ناكول صباح ربي
حسام:الحق عليا نخمم فيك
أنا:كول و أسكت...أصلا معادش فما وقت
حسام:وين ماشي ؟
أنا:للكلينيك
حسام:علاه ؟
أنا:المحامي...قال إفادة طبيب مهمة برشا في القضية
حسام:باهي حتى انا باش نمشي معاك و منها ناخو التحاليل متاع امي
انا:باهي
كملنا الفطور المحنون...و نزلنا مع بعض...بقى مخالط عليا بكرهبتو...وصلنا مع بعض...طلب تحاليل متاع امو...قربت من الفرملية نحكي
انا:نحب نقابل الدكتور ¤¤¤¤¤¤
هي:سامحني منجمش نعاونك...الدكتور عندو مؤتمر
انا:مؤتمر شنية ؟
هي:مؤتمر الاطباء و اللي نعرفو...انو سفرتو اليوم
انا:شننننوة...مش قتلي اليوم تلقاه هوني ؟
حسام:شفما ؟
هي:صحيح...أما هو كلمني و قالي باش يغيب فترة
انا:قدااش يقعد ؟
هي:منعرفش أسبوعين و لا ثلاثة
انا:شننننوة...ياخي نورمال لي تحكي فيه ؟
هي:مسيو اهدا
حسام:عمممر
انا:اسمعني...الحكاية مهمة برشا...لازمني نمنعو يسافر هي:منظنش باش تلحق...خاطر طيارتو عندها نص ساعة توا
انا:يااااخي فما شكون يسافر بين ليلة و نهار على خاطر مؤتمر و لا ندرا شنوة...اللي تحكي فيه انتي٦
هي:هذا لي فهمتو منو...حتى العمليات لي عندو استلمهم طبيب اخر
انا:تنجم تقولي وين يسكن و لا رقم تليفونو...صدقني انا بحاجتو...لازمني نحكي معاه فيسع
هي:سامحني مسيو...اما هذا خارج خدمتي و كان كلمني باز باش نخبرك
انا:اسسسمعني الحكاية مهمة اكثر من اللي تتوقع شنووة لي خااارج خدمتك اه شنووووة ؟
حسام:عمممر اهدا...ميجيش لي تعمل فيه هوني
انا:نحط يدي في نار...كان مطلعش الكلب متاع مراد ورا الحكاية هاذي
حسام:شنننوة ؟
انا:قاعد يلعب بينا كيما يحب...القضية الكل في يدو اما مانيش عمر...كان نخليه يربحها
حسام:باهي...خلينا نخرجو من هوني قبل
قحرت للفرملية و خرجت...ضربت يديا زوز عالكرهبة كان لازم نتوقع الخطوة هاذي منو...اصلا متأكد لهو مراقب كلشي من بعيد...قرب مني حسام يحكي
حسام:تو نحاولو نوصلولو بطريقة اخرى
انا:إذا سافر ما نجمو نعملو حتى شي حسام...فهمتني حتى شي
حسام:عمر اهدددا...باز فما حل
أنا:كان صار و مراد ربح القضية...كلشي يطيح في الما صدقني زهرة تدمر...ياخي مريتش خوفها منو
حسام:مفما حتى شاهد اخر...من غير طبيب
انا: انا و مريم...اما الإفادة متاعو مهمة
حسام:خلينا نمشيو توا
انا:عندي كور توا
حسام:اه ملا شبيها زهرة...قاتلي منقراش
انا:متقراش عندي اليوم...و زيد نظن عندها كور آخر خليها ترتاح...مش وقت القراية توا
حسام:بااهي...عندك حق...شنوة عندك بعد الكور ؟
انا:باش نقابل سيرين...هملتها اليومين هذوما و زيد فما مشكلة لازم نحلها معاها
حسام:متأكد من اللي تعمل فيه ؟ بالرسمي باش تسافر
انا:منعرفش حسام..أما توا هذا أفضل حل
حسام:باهي نتقابلو مبعد
انا:باهي
خذيت نفس...و ركبت...منعرفش كيفاش وصلت للفاك عديت الكور كيما جا و خرجت...طلبت سيرين...تخلط عليا للكافي...اصلا معينيش باش نمشي للوكالة هذيكا و لا نرا حد من صحابها..لقيتها ديجا وصلت...أول ما جات عيني في عينها...هزت روحها...و قربت مني تجري حضنتني...تحكي
سيرين:عمممر...شبيك حتى اليوم باش كلمتني انت ؟
هزيت يدي حطيتها على زندها...جبدتها من عندي شوية نحكي
انا:هيا سيرين...ناس تغزر
سيرين:شمدخلني في ناس...توحشتك راهو
أنا:سيرييين
سيرين:باهي...إيجا نقعدو
خلطت عليها لطاولة...قعدت مقابلها...طلبت قهوة و تكيت لتالي نغزرلها...نثبت في تفاصيل وجها...ما تبدل فيها حتى شي من اول ما عرفتها لتوا...باقي سيرين نفسها...حتى تصرفاتها نفسهم...زعمة غلطت كي خذيت الخطوة هاذي معاها...مش انا لي حبيت نكمل معاها حياتي...و نبني عيلة جديدة...شنوة لي تبدل...علاه حبيت زهرة...علاه نحس في روحي قاعد نظلم فيها حتى هي...زعمة نجم ننسى هذا الكل مع الوقت...و نرجع معاها كيما الأول...عالأقل منحسش بالذنب وقت نقربلها و لا نغزرلها في عينيها...منحبش نعيشها في متاهة معايا...منحبش نكون معاها و فرد وقت قلبي و عقلي مع زهرة...منحبش نظلمها...حتى هي صبرت عليا السنين هذوما الكل...هذا لي كنت نقنع روحي بيه و انا نغزرلها...فقت من سرحتي..كي حطت يدها على يدي تحكي
سيرين:عممر...لباس ماهو...فما حاجة ؟
هزيتلها براسي لا...خذيت نفس و كبست على يدها نحكي
انا:سيريين...اللي باش نحكيه توا...باش يحدد مصيرنا الزوز
سيرين:شفما ؟
انا:جاتني خدمة...نقصد مشروع...في فرنسا
جبدت يدها مني مفجوعة...غزرتلي ندرا كيف...تحكي
سيرين:ش..شتقصد ؟
انا:لي سمعتو...المشروع هذا...باش يبدل حياتنا الزوز
سيرين:كيفاش ؟
انا:انتي باش تسافر معايا سيرين
بقات تغزرلي من غير حتى كلمة...تنهدت بالقاوي...و كملت نحكي
انا:هذا باش يكون أحسن حل لينا الزوز
سيرين:و..و خدمتي عمر ؟
انا:سيرين موضوع الخدمة نظن تسكر...مزلت موسع بالي معاك...خاطر نعرفك متعلقة بالشلة متاعك مش الخدمة...أما تعرف بالقدا...ميساعدنيش جملة...أنو مرتي تصوحب عباد اكاكا
سيرين:نعرف...أما والله نحب نبقى على خاطر خدمتي أمان عمر...علاه باش نسافرو احنا...شبيها خدمتك هوني ؟
انا:مانيش نشاور فيك...قاعد نخبر فيك...كان بالرسمي تحبني...و تحب تكمل حياتك معايا كيما قبل...تعرف وين تلقاني...خاطرني بالرسمي تعبت من الموضوع هذا من أول مرة بدينا فيها علاقتنا...خمم بالقدا خاطرني بالحق منحبش نظلمك معايا...و زادة مانيش باش نحرمك من حتى شي تحب عليه...يا ريت تكلمني كان وقت تاخو قرارك باهي
هزيت روحي وقفت...حطيت الفلوس عالطاولة...و خرجت...احسن حاجة نخليها وحدها شوية...عالاقل تنجم تفكر بالقدا...و تاخو القرار لي يناسبها...رجعت للكرهبة و طرت بيها...هزيت تليفوني كلمتها...ردت عليا بالوقت...تبسمت نحكي
أنا:بونجور ؟
زهرة:صباح الخير عمر
أنا:لباس توا ؟
زهرة:مممم أحسن عيشك
انا:باهي ملا حضر روحك و ألبس بالقدا...تو نتعدالك
زهرة:وين ماشيين ؟
أنا:مبعد تعرف...منطولش برشا و نكون عندك
زهرة:بااهي
علقت عليها و تبسمت على جنب..منعرفش كيفاش جات الفكرة في راسي...و انا نكلم فيها اما نحب نبعدها على الستراس هذا شوية...عالاقل باش ترتاح نفسيتها و ما تاخو حتى دوا قبل تحاليل...منعرفش كيفاش وصلت لدار...بدلت دبشي و مشيت عندها...أول ما كلمتها خرجت...نزلت عندها و ضيقت عينيا نحكي
انا:زهرة برا بدلها الروبة
زهرة:علاه...أصلا مانيش باش نحي الفاست
انا:نعرف...أما البلاصة لي باش نمشيولها...متنجمش تلبس فيها هكا
زهرة:ياااا بالرسمي...كان قتلي من قبل...تو كيفاش نزيد نقنع أمي فتحية باللي قاعد يصير
انا:قلها عمر طلب مني هيا
زهرة:و أنت ماكش باش تدخل ؟
انا:لااا...نستنى فيك هوني هيا فيسع
زهرة:باهي تو نرجع
هزيتلها براسي ايه...بقيت نتبع فيها بعينيا...أول مرة ريتها لابسة روبة...رغم أنو ما ظهر منها شي...بحكم لابسة كبوطها..أما منعرفش علاش حسيتها تبدلت بقيت متكي على الكرهبة نستنى فيها...نغزر لدالي لي جاي قرب مني يحكي
دالي:أهلا بيك
أنا:عيشك
دالي:شبيك واقف هوني ؟
أنا:نستنى في شكون
دالي:تقصد في زهرة ؟
خرجت بالوقت...خذيت نفس...منحبش ندخل معاه في عركة توا...خاطر ظاهر فيه لتوا لا فاق من السم لي قاعد يشرب فيه ليل نهار...قرب منها يحكي
دالي:بونجور زهرة
زهرة:صباح الخير محمد
دالي:ظاهر فيك ناشطة عالبارح
زهرة:ممم أحسن
دالي:حمد الله...منعطلكمش أكثر...نشوفك مبعد
زهرة:باهي
هزتلو براسها إيه...و قربت مني اكثر...باقي نتبع فيه بعينيا...نزلت راسي على صوتها
زهرة:سافا هكا ؟
تسأل فيا عاللبسة...قحرتلها...و نفخت بالقاوي نحكي
انا:الطفل هذا باش تبقى بعيدة عليه مفهوم كلامي
زهرة:باهي كيما تحب
بقيت نغزرلها...منعرفش علاش جاوبتني بالطريقة هاذي منعرفش علاش ستنيت إجابة اخرى...ترفض و لا تقول أي شي...منعرفش علاه تتعمد تغلبني ديما بطبيعتها خذيت نفس نحكي
أنا:هيا أركب
هزتلي براسها ايه...عديت يدي على شعرها...و خلطت عليها...بقينا طول الثنية ساكتين...لين قص عليا صوتها تحكي
زهرة:عمممر ياخي مش هاذي ثنية الريستو متاع عمي طاهر ؟
انا:مممم
زهرة:ياااا بالرسمي إحنا ماشيين عندو
انا:لااا...باش نمشيو للفيرما
زهرة:يعني منجمش نشوفو
انا:منعرفش...بلكشي يخلط علينا مبعد
زهرة:هيا باهي
منعرفش كيفاش وصلت...الدنيا ياسر برد...نغزرلها تفرك في يديها...تحاول دفي روحها...قربت منها نحكي
انا:لازمك تستناس بالبرد لي هوني
زهرة:م..ميسالش...اما علاه جينا احنا
انا:شبيك تسأل برشا اليوم ؟
زهرة:منقصدش انا جيست
قربت منها اكثر...هزيت يدي...حطيت صوابعي...على شفايفها نحكي
انا:ششش...أسمعني...ما نحبك تفكر في حتى شي توا النهار هذا باش يكون سبيسيال برشا لينا زوز...منحبكش تنساه جملة باهي
هزتلي براسها ايه...مديت يديا زوز...هزيت الكابيش متاعها حطيتو على راسها...نحكي
انا:هكا باش متبردش أكثر
زهرة:باهي...هيا فيسع...ياسر برد
انا:هههههههههه باهي هيا
بقات تغزرلي ندرا كيف...ضيقت عينيا مستغرب...نحكي
انا:شبيك ؟
زهرة:ش..شي شي...هيا
تلفتت تمشي...تبسمت على جنب و خلطت عليها...تمشي و تتلفت شوية...تتأكد لي مزلت وراها...خذيت نفس طويل...ما نحب نفكر في حتى شي توا...نعرف لي النهار كيما هذا مستحيل يرجع...خليتها دور...و تكتشف في البلاصة...هزيت يدي شاورت لعم محمود...قرب مني بالوقت...يحكي
محمود:مرحبا بيك...وينك معادش جيت...ياخي نسيتنا
أنا:عيشك عمي...اما هاك تعرف خدمة...دوب نجم نخلط
محمود:هيا تفضل ملا
انا:لااا...قولي حصاني مزال موجود
محمود:بالطبيعة...سي طاهر موصي عليه أكثر منك
أنا:عيشك...أنا باش ناخو توا و أنت أبعث خبر لعم طاهر قولو لأنا هوني
محمود:باهي أمرك
أنا:عم محمود...ميسالش ندلل عليك في حاجة
محمود:بالطبيعة
أنا:تنجم تطلب منهم يحضرو الطاولة
محمود:بالطبيعة...تحب هوني و لا في دار
انا:لا في دار أحسن...الجو بارد...منظنش لهي باش تتحمل أكثر
محمود:هيا باهي...برا بدلو جو...لين تحضر
أنا:عيشك
حطيت يدي على كتفو...تبسمتلو...و تلفت نغزرلها...باقي واقفة في بلاصتها...قربت منها...نحكي
انا:نمشيو ؟
زهرة:مممم
انا:تو كي تمشي تدفى هيا
زهرة:باهي
بقات تمشي ورايا...قربنا من الاحصنة مع بعض...نغزر لعم محمود...لي جابلي الحصان بالوقت...قربت منو نمسح عليه...غزرتلها باقي جامدة في بلاصتها...ضيقت عينيا نحكي
انا:ايجا
زهرة:ل..لا...هوني أحسن
انا:شبيك ؟
زهرة:شي...مش كنا باش نمشيو
انا:مممم إيجا
هزتلي براسها لا...منعرفش علاه حسيتها خايفة منو تبسمت نحكي
انا:ايجا يا بنتي شبيك...متخافش...ما يعملك شي
زهرة:لااا...كمل معاه أنت...نستنى فيك هوني
انا:نكمل شنوة...متحبش تركب عليه ياخي
زهرة:لااا مستحيل...منحبش
انا:باهي إيجا برك متخافش
بقات تغزرلي..مديتلها يدي...هزت يدها مترددة شدتني كبست عليها...و جبدتها عندي...وخرت خطوة لتالي تحكي
زهرة:عمر أمان خلينا نمشيو
انا:متخافش...هيا قرب منو
تلفت عندها غزرتلها...كبست على يدي اكثر...و قربت شوية...حطت يدها عليه مترددة تعدي فيها...و تحكي
زهرة:شبيه هادي هكا ؟
أنا:إنتي لي شبيك خايفة منو ؟
زهرة:أول مرة نقرب من حصان لهدرجة
أنا:شرايك في دورة ؟
زهرة:لا أمانك...نخاف نطيح
أنا:ماهو باش يصير شي
زهرة:أما
أنا:تاثق فيا إنتي ؟
زهرة:مممم
انا:هيا ملا
جبدت يدي منها...طلعت عليه...و عاونتها تطلع...قعدتها قبلي...حسيت بيها خايفة...تبسمت نحكي
أنا:ارخف روحك...شي ماهو باش يصير
زهرة:ياخي الحصان هذا متاعك ؟
انا:لا متاع عم طاهر...أما هذا حصاني المفضل
زهرة:ماهوش باش يرميني مش هكا
انا:ههههههه متخافش...مينجمش يعمل هكا
زهرة:هيا باهي...متجريش بيه امانك
انا:طمن
قربتلي اكثر...تكات عليا...تنهدت بالقاوي...نعرف لي مزالت خايفة..مديت يدي نزلتلها الكابيش شوية..قربتلها أكثر...خذيت نفس نشم في ريحة شعرها منعرفش علاه جبتها لهوني...أما نحب...تبقى بينا حاجة سبيسيال حاجة باهية عشناها مع بعض بعيد عالمشاكل لي قاعدة تصير...فقت من سرحتي على صوتها تحكي
زهرة:عمر
أنا:مممم
زهرة:ياخي ديما تجي لهوني أنت ؟
انا:وقت كنت نخدم في الريستو مع عم طاهر
زهرة:معناها مستانس تركب عالحصان وحدك
تبسمت على سؤالها...قربتلها اكثر...نحكي في وذنها
انا:مممم هاذي اول مرة نعمل دورة و انا مش وحدي...و انتي اول وحدة جبتها لهوني
زهرة:و سيرين ؟ نقصد خطيبتك ؟
انا:قتلك حتى حد قبلك...و باش تكون آخر وحدة زادة
زهرة:معادش باش نرجعو لهوني مرة أخرى
هزيت يدي...حطيت شعرها على جنب...و نزلت بيها لكرشها...كبست عليها...و جبدتها عندي نحكي
انا:يمكن مفماش مرة اخرى...معادش تسألني زهرة نحبك تعيش معايا نهار هذا لتالي
زهرة:بااهي عمر
منعرفش قداش تعدا علينا وقت بالظبط...بقينا زوز ساكتين من غير حتى كلمة...يمكن هذا احسن توا...ما نحب حتى سؤال اخر منها..منجمش نجاوب عليه يكفي لي قاعد نحس فيه معاها توا..نعرف الوقت هذا ماهوش باش يرجع جملة..أصلا محسيتش بيه كيفاش تعدا..أول ما رجعنا...جبدت روحي منها...نزلت...دورت راسها غزرتلي
زهرة:ع..عمر...شبيك خليتني هوني ؟
انا:مخليتكش هات يدك
زهرة:لااا باش نطيح
أنا:مطيحش هات يدك...قبل ما يهرب بيك
غزرتلي مفجوعة...شدني الضحك عالفازة...قربت منها اكثر...عطيتها يدي...شدتني بالسيف...كبست عليها...و جبدتها عندي...طاحت عليا بالوقت...حطيت يدي على ظهرها كبست عليه نحكي
انا:اهدا ما صار شي
كبست عليا بيديها زوز...نزلتها عالارض...طلعت راسها غزرتلي...ترعش وحدها..شي من البرد و شي من الخوف هزيت يدي حطيتها على وجها...نغزر لشفايفها لي حمارو اكثر...تخدرت اصل...قد ما حاولت نبعد عليها منجمتش بقات تغزرلي ندرا كيف...أول ما وصلت لشفايفها...قص عليا المطر لي بدات تصب...تبسمت على جنب...و بعدت لتالي نحكي
انا:هيا قبل ما تزيد أكثر
هزتلي براسها ايه...مزالت مروهجة...كبست على يدها و مشيتها ورايا...نحاول نهرب من روحي..عالأقل ننسى لي كان باش يصير توا...اول ما وصلنا...لقيت الباب محلول شوية...كملت دزيتو...خليتها دخلت...سكرتو و خلطت عليها...نغزرلها تنحي في الفاست...حطتها عالفوتاي...و قربت دفي في يديها...تلفتت تغزر لطاولة و تحكي
زهرة:ياااا شكون حضرها ؟
انا:عجباتك ؟
زهرة:نجم ناكول توا
أنا:مممم تفضل
نحيت الفاست و خلطت عليها...باز مفطرتش الصباح حتى انا منعتبرش روحي فطرت...أصلا أنا الغالط خاطر خليت ساقط متاع حسام يحضر الفطور...تكيت لتالي نغزرلها...مش ديما نراها متفرهدة هكا...خاصة و اليمات الجاية...صعيبة علينا الكل.
أنت تقرأ
زهرة🌸
Aléatoire🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
