زهرة🌸

الحلقة مئة و ستة

حلقة 106
هند تحكي:
حطيت اوراقي في الصاك...و هزيت روحي وقفت...تبسمت للبروف و خرجت من الكلاصة...اليوم بالظبط ما عيني في حتى شي...فديت من الوضع لاحنا فيه...فرد وقت تفكيري في عمر و مصطفى...و منعرفش شنية باش يصير فيهم اكثر من هكا...و معادش نعرف في شنية نخمم بالظبط...عمر لي لتوا مرتو بعيدة عليه...و كل مرة تجي باش تشوف بنتها...تلقى امي و سلمى في وجها...كل مرة نغزر لزهرة...نفهم علاش عمر اختارها هي...علاش حبها هي...و كل مرة نغزر لريحان و هي تبكي...ننقم على عيلتي اكثر...و نكره روحي خاطرني فرد منهم...كان مش عمر و مصطفى...منجمش نتحمل لتوا...و الاسوء منعرفش شنية باش يصير كي يسمعو بحكاية مصطفى و آسيا...متأكدة لاول واحد باش يعارضهم هو بابا...و حتى بوها...مستحيل يقبل علاقتهم...و حسب ما حكالي مصطفى و لي سمعتو منها وقت حكيت معاها...انو كان ينجم يقتلها...من غير ما يخمم مرتين...بعد اللي صار الكل...وليت خايفة اني نخمم في اللي جاي...لي مصبرني لتوا عالقعدة في الظار هذيكا هي ريحان و كهو...كل مرة نحملها بين يديا و نشم ريحتها...نحس بطاقة جديدة...و مدامها امانة عمر و زهرة...منجمش نفرط فيها جملة...كأنها بنتي بالظبط...حتى اني كل مرة نغزر لعينيها...ننسى لي تعدا عليا الكل...و نحاول نكمل من غير ما نتلفت ورايا جملة...شيعت راسي لتالي...نتحسس في قطرات المطر لي قاعدة تطيح على وجهي...رغم الدنيا باردة عاللخر...الا انو الجو هذا بالنسمة الباردة متاعو...خلاني نرتاح و ناخو نفس نظيف...لفيت روحي بكبوطي اكثر...و حطيت يديا في مكاتبي...تنهدت بالقاوي و شديت الثنية لبرا...مدام ما عندي شي مبعد...نحب نرجع لدار على بكري و نلتهى بريحان...وقفت عالرصيف...نستنى في طاكسي تتعدا اما شي...من دقايق وليت في ساعة...خممت اني نكلم عمر...اما منحبش نعطلو على خدمتو...و على صاحبو زادة...دخلت بعضي اكثر...كي تبدل الجو في لحظة...و قام الريح...يهز و ينفض...و المطر لي قوات على غفلة...خلاتني مزهبلة...منعرفش شنية نعمل بالظبط...نرجع للمعهد...و لا نستنى في بلاصة اخرى...بقيت ندور في عينيا حايرة في امري...اما تفكيري تقص...عالمطر لي حبست فوق راسي...و عالجهامة لي حسيت بيها بجنبي...هزيت راسي شوية غزرت لل parapluie و طلعت بعينيا لوجهو...بقيت نغزرلو مستغربة...آخر حد توقعت اني نقابلو توا...من آخر مرة تقابلنا فيها...ريتو مرتين من بعيد...لا جاني و لا جيتو حتى بالصدفة...منعرفش كيفاش سألتو من صدمتي بيه
انا:أنت ؟
كريم:تستنى في حد آخر ؟
انا:مش وقت بلادتك...شتعمل هوني ياخي ؟
كريم:لا الجو و لا البلاصة مناسبة باش تاقف وحدك هوني...على طرف الطريق
انا:سامحني...و انت شمدخلك فيا ؟
كريم:ديما لسانك حاضر ؟
انا:ياااخي منين قاعد تخرجلي انت ؟
كريم:حتى انا عندي نفس سؤال
انا:بربي ؟ مش انت لي جيتني توا ؟
كريم:هدي روحك مدام هند...ما عندي حتى نية خايبة...جيست مش باهية وقفتك هوني
جيت باش نحكي...الريح القوي لي ضرب في وجهي...سكتني...مديت يديا زوز نبعد في شعري لتالي...اما شي...لا نجمت نبعدو...و لا نجمت نغزرلو...حسيت بصوابع يدو...لي بعدولي خصلة من وجهي...هزيت عينيا في وجهو مصدومة من الفازة لي عملها...و مصدومة من قربنا...منعرفش حتى كيفاش قربتلو لهدرجة...وخرت خطوة لتالي مصدومة...مد ال parapluie شوية لعندي...يغطي فيا و يحكي فرد وقت
كريم:مستحيل تلقى طاكسي توا...و مستحيل تاقفلك وحدة في الحال هذا
انا:باهي...تو نطلب شكون يجي يهزني
كريم:و تبقى في المطر هاذي ؟
انا:عندك حل آخر
كريم:هيا معايا
انا:شننوة ؟ لباس ماهو ؟ وين تحبني نجي معاك يا شاسمك
كريم:الصبر يا ربي...تعرف حاجة...انا الغالط خاطر جيتك من الاول
انا:حمد الله كي عرفت غلطتك
قرب مني في لحظة...دورت عينيا عالبقعة لانا فيها...بالرسمي مفما حتى حد...و بعدت عالمعهد شوية...منعرفش شنية لي جا لمخي وقتها...و انا نغزر لملامحو لي تبدلت في لحظة...جيت باش نحكي...كبس على يدي...عينيا وساعو بالوقت...معرفتش شنية نعمل بالظبط...حتى حسيت انو لساني تبلع...لا نجمت نحكي معاه...و لا نغزر لعينيه...كبست على صاكي...نخبي في توتري منو...فرد وقت نخمم كيفاش باش نسلك روحي من الوحلة لانا فيها...منين طلعلي و علاش جا عندي مرة اخرى منعرفش...اما لي متاكدة منو اني كل مرة نقابلو فيها...تصير فيها مشكلة...خذيت نفس...نهدي في روحي...و نلم في الحروف لي حسيتها وحلت على طرف لساني...غمضت عينيا بالقاوي...و عاودت حليتهم...نحكي
انا:ك..كريم...نقصد مسيو كريم...ا..انا
سكت كي قربلي اكثر...و دقات قلبي قوات مع غزرتو ليا...حتى المطر لي نازلة علينا محسيتش بيها...قص عليا افكاري اللي داخلة بعضها...وقت حط...ال parapluie متاعو في يدي...منعرفش اصلا كيفاه شديتها عليها...يمكن خفت منو و من البلاصة لاحنا فيها...قحرلي يحكي
كريم:شد هاذي...و اقعد تستنى في طاكسي متاعك
رخف يدو على يدي في لحظة...و وخر خطوة لتالي...تلفت من غير ما يزيد معايا حتى كلمة...دوب نجمت ناخو نفس...و انا نغزرلو ماشي يبعد...جمدت في بقعتي و معرفتش شنية نعمل بالظبط...صوت المطر لي زادت قوات رعبتني اكثر...بقيت واقفة في بلاصتي مزهبلة...بين اني نخلط عليه...و لا نكلم عمر...لي اكيد  ياخو تقريبا نص ساعة و لا اكثر باش يوصل...بين المد و الجزر لي طحت فيه...لقيت ساقيا هازتني وراه بالظبط...كبست ال parapluie و صاكي...كاني نحاول نقص الستراس لي حكمني...زربت في خطواتي باش نلحق عليه...المهم ميغيبش على عيني عالاقل لين نوصل لبلاصة فيها عباد و لا نلقى فيها طاكسي...اصلا منعرفش عليه وين ماشي السخطة بعد الرعبة لي كليتها منو دقايق لتالي...حبست كي تلفت عندي في لحظة...غزرتو خلاتني ننزل على شفايفي...و نلعن في روحي عالفازة لي عملتها...هزيت راسي شوية...وقت حسيت بيه رجع عندي...دخلت بعضي اكثر...و دقات قلبي قوات...ياخي نورمال الحالة لي وصلني ليها الهامل هذا...منعرفش قداش من كلمة قلتها عليه في قلبي...و قداش سبيتو عالرعبة لي كليتها...اما فرد وقت عندو حق...البلاصة لي كنت فيها خطيرة...و كان ممكن نطيح مع حد ميخافش ربي...نزلت على شفايفي اكثر من قبل...اما المرة هاذي...على بهامتي...و عالموقف لي حطيت روحي فيه...فقت من سرحتي كي فك ال parapluie من يدي...من غزرتو فهمت شيقصد...قربت من غير ما نزيد حتى كلمة...نمشي بجنبو عالساكت...طلعت راسي على صوتو يحكي
كريم:هيا ايجا توا
انا:و..وين ؟
كريم:للكافي لي في الجيهة لاخرى
انا:علاش ؟
كريم:لين يهدى الجو شوية و تنقص المطر...مكانش تو تتبهدل حالتك اكثر
انا:بااهي
خذيت نفس و مديت ساقي باش نشق الكياس...اما يدو حبستني بالوقت...وجهي مشى الوان و قلبي سقط بين ضلوعي...وقت ريت الكرهبة تعدات من قدامنا طايرة...حسيت نفس تسكر عليا في لحظة و معرفتش شنية نعمل...كبس على يدي اكثر...يحكي
كريم:ساافاا اهدا...ما صار شي
هزيتلو براسي ايه...غمضت عينيا بالقاوي...نرد في النفس بالجهد...قربلي شوية يحكي
كريم:ايجا معايا
حليت عينيا...نثبت في الكراهي لي متعدية...منجمتش نحط ساقي مرة اخرى...رغم الوقت لي تعدا عليا في تونس...اما منجمتش نستانس بالزحمة لي هوني...عكس البلاد في كلشي...من الناس...للبلايص...للطرق...و هاني شعرة لا مشيت فيها...عاودت غزرتلو بخوف...كأنو فهم عليا...تبسم على جنب...يحكي
كريم:متخافش...هاني معاك
هزيتلو براسي ايه...كبس على يدي اكثر...و جبدني معاه...حليت عينيا على وسعهم نثبت في الكراهب لي جاية و رايحة...شقينا الكياس بالزربة...و كان مش يدو لي تجر فيا...منعرفش كيفاه كنت باش باش نوصل للجيهة لاخرى...اول وصلنا للكافي...جبد يدو مني...يحكي
كريم:سافا ؟
اناسافا
كريم:هيا ايجا
سكر ال parapluie و حل الباب...هزلي براسو باش ندخل...خذيت نفس نهدي بيه روحي...و قربت منو...بعدلي شوية باش ندخل...عديت عينيا على وجهو بالزربة...نزلت راسي...و دخلت...خلط عليا بالوقت...حطها من يدو على جنب...و نزل الكابيش متاعو...عديت عينيا على كل بقعة في الكافي...يظهر قديم شوية...و مافيهش برشا عباد الداخل...اما ستيلو مزيان...و دافي...غزرلي يحكي
كريم:تفضل
جيت باش نحكي...قص علينا شيخ شوية كبير...كي قرب منا يحكي
هو:اهلا كريم ولدي
كريم:عيشك عمي لطيف
هو:شبيك طولت علينا المرة هاذي
كريم:هاني جيت عمي
هو:مرحبا بيك بنتي
انا:عيشك
هو:تفضلو
دورت راسي غزرتلو مستغربة...تبسم و عاود غزرلو يحكي
كريم:عم لطيف...انا كيما العادة...و جيب للمدام حاجة تدفيها
هو:اكيد ولدي...طاولتك فارغة
كريم:باهي عيشك...هيا ايجا
قربت منو نمشي وراه...لين وصل لآخر طاولة...نحيت كبوطي حطيتو عالكرسي...و رجعت شعري لتالي...بردني اكثر بعد ما تبلل...هزيت راسي غزرتلو...نحا الفاست متاعو...حطها على جنب...و ترمى عالكرسي...منعرفش علاش مركز عالنوار برشا...قعدت عالكرسي...منحبش نخمم في حاجة متهمنيش...هزيت بابيي من الطاولة...نمسح في وجهي و رقبتي...على هزت راسي لقيتو يغزرلي...تعدلت في قعدتي و حطيتو من يدي...نحكي
انا:لباس ماهو ؟
هزلي براسو ايه...و تكى لتالي...خذيت نفس و جبدت تليفوني...ضيقت عينيا نحكي
انا:مفماش ريزو هوني ؟
كريم:لا
حطيتو من يدي...من غير حتى كلمة اخرى...كنت نحب نطمن على ريحان...تنهدت بحصرة...و عاودت غزرتلو...مرة يغزرلي و مرة يدور وجهو...قحرتلو...و دورت وجهي...منحبش نثبت فيه برشا...منعرفش علاه ملامحو...تذكرني في حد منحبش حتى نشوف خيالو...لون عينيه يخليني نتذكر لي عديتو شهور لتالي...و الحالة لي وصلتلها...و خويا لي حسيت روحي خنتو...وقت حسيت حاجة تحركت داخلي لراجل...كان يخطط باش يدمرني و يدمر خويا و عيلتي الكل...لحظات تعداو في حياتي...حسيتهم سبيسيال برشا...و مش كل طفلة تنجم تعيشهم...اما لقيت روحي في اسوء كابوس...ما نجم نتمناه لحتى حد...الحقد لي ريتو في عينيه آخر مرة...خلاني نعفس على كل حاجة حلوة عشتها و حسيتها معاه...يمكن اكثر شي كنت بحاجتو...هي غزرتو هذيكا...باش نرجع ناقف على ساقيا مرة اخرى...و ننسى كلشي تعدا على راسي قبل...ذكريات غمتني....و خلات دموعي تتحصر في عينيا...منجمتش نسكرهم...خايفة دمعتي تخوني و تنزل...ووقتها معنديش مبرر و لا شنية باش نقول...حتى كان ميهمنيش الشخص لي مقابلني...اما مش فازة نعملها قدامو...فقت من سرحتي...كي تحطت الكاسة قدامي...هزيت راسي غزرتلو...تبسم يحكي
هو:كاسة شكولاطة...باش تهديك
انا:عيشك عمي
هو:صحة بنتي...و هاذي قهوتك انت
كريم:عيشك
اول ما مشى...كبست عالكاسة بيديا زوز...ندفس فيهم بسخانتها...هزيت راسي على صوتو يحكي
كريم:لباس مدام ؟
انا:مدموزال
هز حاجبو مستغرب...و خذا رشفة من كاستو...يحكي
كريم:و البيبي لي كنت تحكي عليه آخر مرة ؟
انا:مع انو الحكاية متخصكش...اما هاني باش نجاوبك...البيبي بنت خويا
كريم:باهي...سامحني كان قلقتك بأسئلتي
انا:ميسالش
تبسملي و تكى لتالي...كبست عالكاسة في يدي...شربت منها...و عاودت نزلتها نحكي
انا:مرسي
كريم:على شنية ؟
مديت يديا شوية...و غزرت لعينيه بالظبط...نحب نتغلب عالصورة متاع مراد لي قعدت في مخيلتي...و ندمرها جملة...و مش لازم كل حد يذكرني بيه...تبسمت نحكي
انا:عالشكولاطة...و عالكافي لي عرفتني عليها
كريم:صحة ليك
انا:عيشك
كريم:قداش عندك في تونس ؟
انا:شيعرفك انت...لانا مش من هوني ؟
كريم:من تصرفاتك
انا:شبيها تصرفاتي زادة ؟
كريم:هدي روحك..ما نقصد شي بكلامي...اما تصرفاتك ظاهرة...انك متعرفش البلاصة هوني...و الدليل خوفك متاع قبيل
انا:صحيح...مانيش من هوني
غزرلي ندرا كيف...انو يسأل فيا من وين انا...خذست نفس و كملت كلامي نحكي
انا:من منطقة ¤¤¤¤¤¤¤¤
بقى يغزرلي من غير حتى كلمة...لدرجة استغربت كيفاه بقى ساكت هكا...حطيت الكاسة من يدي...نحكي
انا:تعرفها من قبل ؟
كريم:مممم...اما مجيتش ليها قبل
انا:باهي
كبست عالكاسة في يدي...و تكيت لتالي...نغزرلو و نهرب في الافكار لي جات في مخي...منحبش نذكر حتى شي يتعلق بالماضي...حتى انا باش نبدا كلشي من جديد...كانو ما صار حتى شي قبل...ضيقت عينيا كي ريتو...حط كاسة القهوة من يدو...و عدا عينيه على وجهي يحكي
كريم:نحب نعتذر على لي صار آخر مرة
انا:مممم من فازة الاكسيدون و لا الكلاصة
كريم:زوز مع بعض...باهيشي هكا
انا:باهي برشا
كريم:مدام تصافينا...نجمو نتعرف عليك توا ؟
ضيقت عينيا مستغربة...دوب تبسم و مدلي يدو...نزلت راسي نغزرلها...خذيت نفس...بعد ما دورت الحكاية في مخي...و حطيت يدي في يدو...صافحتو...غزر لعينيا يحكي
كريم:كريم
انا:هند
كريم:متشرفين مدموزال
انا:عيشك
جبدت يدي منو...و عاودت كبست عالكاسة في يدي...منحبش نخمم انو الكل باش يكون كيفو...و شي ماهو باش يصير كان عملت اصحاب في المعهد...لي لتوا منجمت نتعامل مع حتى حد...خذيت نفس نحكي
انا:متوقعتش لانت بروف
كريم:مانيش بروف في المعهد لانتي فيه
انا:ملا ؟
كريم:البرومو هذيكا...عندها دورة تدريبية...يعني انا جيست نعلمهم التطبيق...و كيفية الصور لي ينجمو ياخذوها من الطبيعة
انا:في الحالتين...تتسمى بروف
كريم:باهي و انتي شعاملة فيك الموسيقى
انا:قاعدة نتعود عالآلآت الجديدة لي عندكم في المعهد
كريم:معجبتكش ؟
انا:بالعكس...اما ستانست بالمعهد القديم لي في البلاد
كريم:ميهمش على شنية تعزف...قد ما يهم الاحساس لي تعزف بيه
انا:مرسي عالمعلومة
كريم:عيشك
تنهدت براحة...و دورت راسي...نغزر للمطر...لي بدات تنقص...حسيتو فهم عليا و في اللي نخمم فيه...وقت تكلم
كريم:تو نوصي عم لطيف يطلبلك طاكسي لهوني...و آخر مرة تعاودها الفازة هاذي
انا:باهي...عيشك على وقفتك معايا
كريم:مبيناتناش
نزلت عينيا من وجهو لكاسة الشكلاطة لي مقابلتني...منحبش نركز في غزراتو ليا برشا...رغم قاعد يتصرف عادي...اما مدامني اول مرة نقعد مع حد غريب فرد طاولة بعد مراد...خلاني منجم نعطي ثقة في حتى حد بعد اللي تعدا على راسي آخر مرة...اما زادة...نحب نكون متصالحة مع روحي و مع ناس الكل...و مستحيل نتلفت ورايا...مهما صار...يكفي اني نتبع نهايتو من بعيد و كهو
🌸🌸🌸🌸🌸🌸🌸🌸🌸🌸🌸🌸🌸🌸
زهرة تحكي:
حليت الباب و نزلت...عدلت البوني متاعي...و كبوطي...حطيت يديا زوز في مكاتبي...و دخلت للكلينيك...الاحداث لي تعدات علينا يومين لتالي...كانت كابوس بالرسمي...لتوا مش مصدقة انو كلشي تحسن...الحالة لي كان فيها حسام...كانت كافية باش دمرنا الكل...يومين اخرى تعدات...و دوب نجمت نقنعو لانا يلزمني نمشي يحذاهم مرة اخرى...كل بقعة تجمعني بعمر...يبعدني عليها...حتى بنتي لي نمشي بحذاها...ميكونش هو في الفيلا...منجمش نقول متوحشتوش...دقايق لي وليت نعديها معاه...معادش تكفي باش نشبع منو و من قربو...كل يوم يتعدا عليا...و كل ليلة نرقد فيها...نخاف نفيق على خسارتو...علاقتي بيه...هي لي قاعدة تعطيني في الامل باش نقاوم هذا الكل...حتى بنتي منحبهاش تتربى بعيدة عليا اكثر من هكا...هاجس الخوف ولى الحاجة الوحيدة لي ملازمتني...مانيش خايفة من مراد...قد خوفي من الايام شنية مخبيتلنا...و شنية باش يصير فينا أكثر...قرب ملك من عمر زادة مخوفني...رغم واثقة من حبو ليا...اما فكرة مرا اخرى في حياتو...حتى كان مجرد صداقة منجمش نتحملها...و زادة منجم نقول شي...خاصة بعد لي سمعتو منو آخر مرة في البيرو...خذيت نفس بالقاوي...نهرب في الافكار الخايبة لي جات لمخي...حليت الاصونصير و دخلت...اول ما تلفت لقيتو في وجهي...وين كان و من وين خرجلي منعرفش...حتى انو نحس في الكلام هرب مني...و معرفتش شنية نقولو بالظبط...دخل معايا...و مد يدو كبس عالزر...عينيا وساعات...و قربت خطوة منو...نحكي
انا:فااش تعمل يااخي ؟
سليم:ششش متخافش
انا:ماانيش خاايفة...اما علاش مطلعني الفوق...لباس ماهو ؟
سليم:نحب نحكي معاك
انا:تحكي معايا في تيراس
سليم:اهدا مدام زهرة
انا:سلييم...يزي من تصرفات هذوما...كان فما شي احكيه توا...نسمع فيك...مش لازم تهزني بعيد عالناس الكل
سليم:البلاصة الوحيدة لي نجمو نحكو فيها على راحتنا..بعيد على العينين لي تراقب فيك
انا:شقصدك ؟
سليم:نقصد في مراد...و في عمر زادة
انا:عمر هوني ؟
سليم:مممم
انا:بربي...ناقصة مشاكل معاه انا ياخي
سليم:مش على اساس طليقك
انا:شيهمك انت
سليم:باهي تنجم تسكت لين نوصلو
جيت باش نحكي...اما سكت كي قحرلي...كبست على يديا زوز...نفرك فيهم بغزول...فكرة انو عمر هوني...و لا باش يشوفني معاه...دخلتني بعضي...نعرف لي مستحيل يعديلي الفازة مهما صار...كان هو شاد روحو على مراد بشعرة...و يعرف بحكاية سليم توا...ماهوش باش يسكت...اكثر حاجة نخاف منها غشو...نعرفو يحط كلشي على جنب و يولي عبد آخر جملة...و حتى انا منحبش نجرحو بفازة اني نقرب من حد غيرو...مهما كان السبب...اما الوقت و الظروف جات ضدنا...و مدام فما امل...حتى كان صغير...انو سليم ينجم يخلصنا من مراد...مانيش باش نسلم...مانيش باش نسلم في الامل هذا...كلشي وليت نحب عليه...انو في نهار من نهارات نفيق في بيتنا...على صوتو و ريحتو...نفيق على وجه بنتي...لي حاسة انو الشهرين هذوما...عامين على حالهم...كل نهار قاعدة تكبر فيه و هي بعيدة عليا...انا قاعدة نتحرق...من غير ما يحس بيا حد...حتى كان شديت دموعي...قلبي قاعد ينزف دم عليها...و على فراقها...بنتي لي تحرمت منها اول ما خرجت من كرشي...غمضت عينيا بالقاوي...و حليتهم وقت تحل الباب...غزرلي يحكي
سليم:هيا ايجا
انا:منحبش
قرب مني في لحظة...كبس على زندي...و جبدني معاه لبرا...غزرتلو مصدومة...ضربتو ليدو...نحكي
انا:سيبني...فاااش تعمل ياااخي
سليم:ماكش باش تسكت
انا:سيييبني...يااا سخطة
مد يدو حل الباب...لي تخرج البرا...نسمة باردة ضربتني...منعرفش كيفاه مديت الخطوة معاه و طلعت الدرجة هذيكا...جبدت يدي منو بالوقت...و قحرتلو نحكي
انا:شتحب مني ياااخي
سليم:نحكي معاك...بعدها تنجم تمشي على روحك
انا:باهي...ابعد عليا ساعة
سليم:زهرررة
هزيت راسي غزرت لعينيه...مع صياحو في وجهي...نفخ بالقاوي...و عدا يدو على وجهو يحكي
سليم:متخافش مني...أما منحبش نحطك في موقف خايب...و يعرف حد لإنتي تعاون فيا...وقتها حياتك بالرسمي باش تكون في خطر
قحرتلو...و عديت عينيا عالبلاصة لانا فيها...خذيت نفس بالقاوي...و قربت للحافة...كبست عالحديد بيديا زوز...و غزرت اللوطة...كلشي يبان صغير من هوني النسمة قوية برشا...حسيت بيه كي قرب مني...وقف ورايا بالظبط...غمضت عينيا بالقاوي...نذكر في كل لحظة تعدات عليا...من اول نهار ريت مراد و دخل لحياتي...لليوم...حليتهم و انا موجوعة من الماضي مهما حاولت اني نتعدا منجمتش...مستحيل يجي نهار...و ننسى لي تعدا على راسي الكل...خذيت نفس نحكي
انا:كان عمري 12 سنة...وقت ريتو اول مرة...قد كانت ملامحو هادية...عينيه كانت تقول العكس...كانت تقول انو ورا الشخص هذا فما بركان هايج...مكنتش نعرف شنية نعمل وقتها...نتقبلو في حياتي...و لا نهرب لبعيد أما طفلة عمرها 12 سنة...معندهاش راي و قرار قدام امها...انا بين ليلة و نهار...لقيت روحي عايشة مع راجل ما نعرف عليه شي...غير اسمو...نهار بعد نهار...و مع الوقت...لقيت روحي ستانست بيه
تبسمت على جنب...و تلفت عندو...غزرت لعينيه...نحكي
انا:تعرف علاش ستانست بيه ؟
هزلي براسو لا...تنهدت بحصرة...و كملت كلامي...نحكي
انا:على خاطر لقيت لي فقدتو سنين...لقيت حضن بابا مرة اخرى...لهوة مراد كانت سبيسيال عاللخر...كلشي كنت نطلبو نلقاه...وقت نمرض...كان يبقى بجنبي لين يطلع النهار...وقتها مراد عوض بلاصة امي و بابا...على خاطر...هي ما كانت تشوف حتى حد غيرو...حتى أنا كنت مجرد حمل ثقيل عليها و كهو...كل مرة تغزرلي تتذكر العذاب لي عاشتو مع بابا...رغم اني كنت نشوفو أحلى راجل في دنيا
كبست بيديا زوز لتالي...و انا نذكر في كل لحظة تعدات على حياتي...منعرفش كيفاش نجمت نجمت نحضر ذكريات هذوما و نحكي عليهم مرة أخرى..دورت وجهي نغزر للفراغ...منحبش نضعف و لا نخلي لي صار يبكيني مرة اخرى...تنهدت بالقاوي نحكي
أنا:هذا الكل تبدل بين ليلة و نهار...و الحياة لي بديت نساتنس بيها...تقلبت لجحيم...جحيم نرقد و نفيق عليه...وقت لقيت مراد يحبني...راجل امي يحبني انا مش امي...لقيت روحي اسيرة عندو...لا نجمت نهرب منو و لا نبقى في دار هذيكا
غمضت عينيا بالقاوي...دمعة سخونة نزلت على خدي حرقتني...مسحتها بكف يدي...و خذيت نفس طويل نحكي
انا:اكثر من اربع سنين...كنت عايشة تحت رحمتو هو...و اكثر شي كنت نخاف منو...هو غشو...حتى ساعات كان يوصل يضربني...وقت يحس انو فما شكون قريب مني مكنتش نجم نواجهو...و منجمتش ناقف في وجهو زادة...حتى...ح..حتى امي لي مشى في بالي باش تصدقني وقتها...خذيت اقوى كف منها...خلاني نسكت و معادش نحل الموضوع مرة اخرى..على خاطر مكانش عندي بلاصة أخرى نمشيلها...لين
سكت شوية...و عاودت تلفت عندو...باقي واقف في بلاصتو من غير حتى كلمة...يسمع فيا و كهو...تنهدت بالقاوي...و كملت نحكي
انا:لين ظهر عمر في حياتي
غزرت للخاتم في يدي...و عديت صوابعي عليه...نحكي
انا:عمر كان الحقيقة الوحيدة الصادقة في حياتي...كان المنقذ متاعي من الجحيم لي كنت عايشة فيه...حتى كان مزال مسيطر عليا مراد لتوا...نعرف لي عمر مستحيل يسلم فيا...و اكيد باش يخرجني من عندو كيما عمل قبل
تلفت من غير ما نزيد معاه حتى كلمة اخرى...منجمتش نحكي اكثر من هكا...منحبش نتذكر لي صار مرة أخرى حسيت بيه كي قرب مني...وقف قدامي بالظبط..يحكي
سليم:علاش طلقتو ؟
انا:عمر دخل للحبس ظلم
سليم:مراد كان ورايا الحكاية ؟
هزيتلو براسي ايه...و كبست عالحديدة بيديا زوز نحكي
انا:عمر طلقني وقتها...باش يحميني منو...كانت الطريقة الوحيدة لي تخلي مراد يهدى في الفترة هذيكا...هي طلاقنا
سليم:معناها مزلتو مع بعضكم ؟
دورت راسي غزرتلو...جات عيني في عينو...خذيت نفس...نحكي
انا:احنا ديما مع بعضنا
سليم:باهي...الليلة لي ولدت فيها...شنية صار ؟
انا:مش هذا موضوعنا سي سليم
سليم:كل شي عندو علاقة بمراد و عمر...هو موضوعنا و على حد علمي...انو عمر لتوا ميعرفش لي صار ليلتها
انا:وين تحب توصل ؟
سليم:مراد لي طيشك بالطريقة هذيكا ؟
انا:اكيد لا
سليم:شنية نفهم من ردة فعلك توا ؟
انا:مراد مستحيل يعمل فيا اكاكا...اكيد ماهوش باش يرميني للموت بيدو
سليم:ملا سي عثمان هو اللي عمل فيك هكا
انا:هاك تعرف شكون...فاش قام تسأل فيا ؟
سليم:نحب نعرف لي صار الكل ليلتها ؟
انا:باهي...ليلتها سمعت مراد و هو يحكي مع المحامي متاعو...باش يقتل عمر في الحبس...بعدها باش يخرجني من البلاد مع بنتي...مكانش عندي حل آخر كان اني...نمشي للقصر...كان عندي امل انو مدامني حبلة من ولدهم...باش ياقفو معايا...اما عثمان اللي تحكي عليه انت...اول ما ولدت رماني برا...من غير ما نشوف بنتي و لا نشم ريحتها...ليلتها سمعت صوتها و هي تبكي...و كهو...الباقي تعرفو انت
سليم:علاش ؟ شنية لي يخلي عثمان يعمل فيك هكا ؟
انا:على خاطر يحبو ولدهم مع بنت خالتو
سليم:علاش محكيتش لعمر كلشي ؟
انا:على خاطرو عدا عشرة سنين بعيد على أهلو..بعملتي باش نكسر صورتهم في عينيه...انا خفت عليه...مش عليهم...اما لتوا نحس اني مخذيتش حقي من عثمان
سليم:في رايي خليه يعرف...على خاطر لي عملوه يعتبر جريمة
انا:نعرف...اما هذا ميهمش قدام مشكلتي مع مراد
سليم:شنية لي يخليك مزلت عندو لتوا ؟
انا:على خاطر امي
سليم:شتقصد ؟
عديت عينيا على وجهو...لملامح الصدمة لي بدات تظهر عليه...و هو يسأل فيا...يمكن معادش فما مجال للاسرار اكثر...و بداية النهاية متاع مراد...باش تنطلق من هوني خذيت نفس نحكي
انا:امي مزالت عايشة لتوا
عينيه وساعت بالوقت...بقى ساكت دقايق...و عاود تكلم يحكي
سليم:مش على اساس ماتت في الحادث
انا:هذا لي كنت نعرفو انا زادة...اما امي مزالت عايشة لتوا...و مزالت في غيبوبة شهور هذوما الكل
سليم:شنية لي صار ؟
انا:حتى انا منعرفش لي صار...جيست امي توا بين يدين مراد...حتى انت ماكش باش تنجم تخلصها...على خاطر عالاكيد عامل حسابو لكلشي...مدام خلاني نعرف لهي عايشة لتوا
سليم:اسمعني زهرة...صدقني باش نعمل لي نجم عليه...و باش نخلصك انتي و امك من يدين اكا الكلب...اما لي يهمني توا...معلومات اكبر من هكا على مراد
انا:انت وين تحب توصل بالظبط
سليم:ليا سنين و انا نتابع في مراد و اعمالو
انا:هذا الكل على خاطر خدمتك...و لا فما امور عالقة بينك و بين مراد قبل ؟
سليم:خدمتي تفرض عليا
انا:كيفاش نجم نعاونك...لي نعرفو انا و انت انو اسم مراد نقي في السوق...و لتوا ما عندو حتى منافس من غير عمر
سليم:انتي واثقة من انو عمر ينجم يغلبو ؟
انا:اكيد
سليم:هذا لي تعرفو انتي...اما الاهم مراد كيفاش طلع بالسرعة هاذي...و خلى اسمو في الصدارة...انتي تعرف شكون مراد ؟
بقيت نغزرلو من غير حتى كلمة...انا عشت مع مراد سنين...اما بالرسمي شكون مراد ؟ انا ما نعرف عليه حتى شي...من غير لي هو يحبني نشوفو و نعرفو كهو...فقت من سرحتي على صوتو...يحكي
سليم:شنية تعرف على عيلتو...على الماضي متاعو..على أعمالو
نزلت راسي نستوعب في كلامو...نحاول نذكر اي حاجة على مراد...ننفي بيها الكلام لي قاعد يقول فيه...خذيت نفس و عاودت غزرتلو نحكي
انا:كريم...عندو خوه اسمو كريم...عايش معانا توا
سليم:كريم في ساحة من بكري...خوه يدو اليمين في أعمالو
انا:يعني ؟
سليم:يعني انتي لتوا ما تعرف حتى شي على مراد
انا:ملا كيفاش نجم نعاونك ؟
سليم:منعرفش...اما نحب نعرف تفاصيلو الكل...مثلا المشروع الجديد ؟
انا:تعرف لهو شريك عمر...و بالطريقة هاذي نكون نفضح في راجلي
سليم:طليقك
انا:مهما كان...مستحيل نقلك كلمة تخص عمر
سليم:كان تحب تكون حياتو بأمان...لازمك تحكي كلشي تعرفو
انا:كيفاش نجم ناثق فيك ؟
سليم:مجبورة باش تاثق فيا
انا:باهي...انا شريكة مراد 50% في المشروع...معاناها شريكة عمر و ملك زادة
سليم:الفكرة العامة متاع المشروع في بالي بيها
انا:شنية تحب تعرف ملا
سليم:مش لازم تخبرني كلشي توا...خمم بالقدا...و كان قررت تحكيلي و تلقى مخرج من الحبس من هذاكا...كلمني...و صدقني مهما صار...مانيش باش نخلي مراد يأذيك و لا يأذي امك...الانتقام لي بين عمر و مراد...باش يدمرك انتي...متغمضش عينيك عاللي تشوف فيه...و تعدي كلشي على خاطرك تحبو و تحب تهرب من مراد...خمم في روحك...اللعبة باش تكون اقوى المرة هاذي...و ملك شريكتكم...باش تكون اول عدوة ليك
انا:ش..شقصدك
سليم:ما نقصد شي...اما غزرتي كافية باش نعرف شنية لي تفكر فيه و لي يدور في راسها
قربلي شوية...وقف قدامي بالظبط...و نزل يحكي في وذني
سليم:حل عينيك
اول ما جبد روحو...وخرت خطوة لتالي...مروهجة من اللي سمعتو منو...تلفت عطيتو بظهري...نمد في الخطوة بالسيف...منحبش نسمع منو اكثر...مهما كانت نية ملك في اللي تخمم فيه...ثيقتي في عمر اكبر...و نعرف لهو مستحيل...يغزرلها...منعرفش على روحي...كيفاه وصلت للاصونصير...و كلامو الكل يدور في راسي...من مراد لملك...عندو حق في كل كلمة قالها...انا سنين هذوما الكل...مزلت منعرفش شكون هو مراد...مدام ظهر خوه بعد السنين هذوما الكل...معناها فما ما أكثر...و الأهم من هذا الكل...منين ليه النفوذ هذوما الكل...أسئلة دخلتني بعضي...خلاتني نبدل الخطوات بالسيف منعرفش كيفاش وصلت للأصونصير مرة اخرى...مديت يدي حليت الباب و دخلت...إخترت الطابق الثاني...و تكيت لتالي...ندور في كلامو داخل مخي بالكلمة..خاصة كلامو تالي...فقت من سرحتي...كي تحل الباب...خذيت نفس طويل...و خرجت...ماشية بخطواتي لبيت حسام خذيت نفس و حليت الباب...خاطرني متأكدة لمزال هوني...هزيت راسي...مع أول خطوة...نغزرلو و هو واقف بجنبها...دورت راسي نغزر لمريم لي قاعدة جنب حسام...أول ما شافتني قربت عندي بالزربة...حضنتني جات عيني في عينو...نزلت عينيا من وجهو...و كبست على مريم نحكي في وذنها
أنا:لباس عزيزتي ؟
مريم:منعرفش
أنا:باهي هدي روحك توا...الكل يغزرلنا
جبدت روحها شوية...غزرتلها نطمن فيها و تلفت لحسام نحكي
انا:شنية أحوالك حسام ؟
حسام:لباس عيشك
أنا:حمد الله
حسام:عيش اختي
خذيت نفس و تلفت عندو...من غير ما نغزرلها...كان باش يحكي أما قصيت عليه...كي عاودت غزرت لحسام نحكي
انا:باش نخطف مريم لحظة
هزلي براسو ايه...كبست على يدها و خرجتها معايا وقفنا برا...حسيتها مش قد بعضها...حطيت يدي على خدها نحكي
أنا:هااو حسام لباس عليه تواا...شنية الحالة لانتي فيها ملا ؟
مريم:منعرفش...نحس في روحي باش نخسرو يا زهرة
أنا:علاش قاعدة تخمم بالطريقة هاذي ؟
مريم:أنا سبب في اللي صار الكل...أنا لي رجعتلو خاتمو ليلتها...و قتلو لي كلشي بيناتنا وفى
انا:يززي مريم...كان حسام قرر باش يخليك...ماهوش معاك لتوا...ياخي منعرفش انا قداش يحبك هو ؟
مريم:أنا وجعتو برشااا...و ماهوش باش ينسى لي صار بالساهل...أصلا نحس فيه لتوا مغشش مني
حطيت يديا زوز على وجها...كبست عليها...و تبسمت نحكي
أنا:ياماات أخرى و يرضى...نعرف بالقدا لهو مستحيل يسلم فيك...و ساعة هو باش يلقى أحلى منك
هزتلي براسها لا...و عاودت عنقتني بالوقت...تنهدت بالقاوي...و كبست عليها بيديا زوز..نعرف شنية لي تخمم فيه توا...حتى أنا قاعدة نحس كيفها...أما متأكدة لي حسام مستحيل يخليها...هو أكثر حد يعرف انو هي كي تتغشش..متعرفش شنية تعمل..يمكن وقيت باش يرجعو لبعضهم و يعوضو كلشي تعدا عليهم...عالأقل حد منا يكون فرحان...جبدت روحي شوية...و تبسمت نحكي
انا:برا ارجع بجنبو توا...هو بحاجتك اكثر حد توا
مريم:ماكش باش ترجع ؟
انا:لا خليني نمشي أنا توا
مريم:الطفلة هذيكا...شريكة عمر...هي سبب ؟
أنا:معادش نعرف شكون سبب...لي يهمني إني نبعد و كهو
مريم:مش على أساس تصالحتو ؟
انا:معادش نعرف إحنا شنية...خايفة قربنا يدمر كلشي و خايفة نبعد عليه...و نخسرو
مريم:متخافش...أنا أكثر حد نعرف...شكون إنتي بالنسبة لعمر..حتى حد ماهو باش يبدل الحقيقة هاذي يا روحي
انا:إن شاء الله عزيزتي...خليني نمشي انا توا
مريم:باهي رد بالك على روحك
انا:باهي عيش اختي
أول ما دخلت...خذيت نفس و نزلت اللوطة...دريكسيون للبركينغ...نحب نمشي من هوني و كهو...بعدها نعرف حسابي معاه...أول ما حل أشرف الباب...حسيت بيدو لي جبدتني لتالي...تلفت عندو مصدومة...جات عيني في عينو...من ملامحو عرفتو وصل لآخرو...ضيقت عينيا نحكي
أنا:فاش تعمل ياخي ؟
عمر:إيجا معايا
أنا:منحبش
عمر:مانيش نشاور فيك
انا:عمممر
عمر:تصرف أشرف
أشرف:باهي سي عمر
عرفت روحي ما عندي منين نسلك منو...أصلا متغشة منو عاللخر...قحرتلو نحكي
أنا:سيبني...نمشي وحدي
كبس على يدي أكثر...و هزني معاه لكرهبتو...حل الباب ركبني...و سكر الباب بالقاوي...خلط عليا...و طار بيها خرج لطريق بسرعة...يسوق و يحكي فرد وقت
عمر:شنية تصرفااات هذوما لي تعمل فيهم ؟ نورماال يااخي...من وين تعلمتهم الفازات هذوما تكلم
نزلت راسي من غير حتى كلمة...نحس في الكلام هرب مني..و معادش عندي جهد باش نحكي و لا نفسر حاجة خاصة بعد الذكريات لي تحيرت عليا الكل...ضرب يدو عالفولون يحكي
عمر:جاااوبني...شبيك سااااكتة
كبست على يديا زوز لي يرعشو...نزلو دموعي على خدي..قد ما حاولت إني نمنعهم اما شي...حسيت روحي فقدت اعصابي...و الأحداث الكل دارت عليا...شد الفران على جنب...و حط يدو على يديا زوز يحكي
عمر:زهرتي...شبيك يا روحي ؟
منجمتش نغزرلو...و منجمت نقول حاى حرف آخر..حتى بعد ما هدا منجمتش نحكي معاه...تنهد بالقاوي...يحكي
عمر:باهي...إيجا عندي عزيزتي
جبدني عندو بالوقت...حطيت راسي على صدرو...كبس عليا بيديه زوز...و باسني من راسي...يحكي
عمر:باهي منقصدش لي صار قبيل...اهدا توا
مديت يدي شوية...كبست على صدرو...و غرست راسي في رقبتو...هذا لي كنت بحاجتو...كنت بحاجة انو يحضني و كهو...غرس يدو في شعري...يحكي
عمر:شنية لي صار...شبي صغرونتي ؟
كبست عليه أكثر...من غير حتى كلمة...بقى يعدي في يدو على شعري...لين هديت...هزيت راسي شوية غزرتلو بعدلي خصلات شعري لتالي...خذيت نفس نحكي
أنا:سامحني عاللي صار قبيل
عمر:شبي حالتك هكا ؟ مراد عملك حاجة ؟
انا:لا
عمر:ملا...شنية لي صار...شبي حالتك هكا ؟
أنا:منعرفش...تاعبة و كهو
عاودت حطيت راسي على صدرو...و غمضت عينيا تعاود كلام سليم في راسي مرة اخرى...تنهدت بالقاوي و عاودت غزرتلو نحكي
أنا:ملك
عمر:شبيها ؟
انا:شبيها قريبة منك هكا
عمر:زهرة...غاايرة منها ياخي ؟
جبدت روحي منو...و غزرت لعينيه...فقدت أعصابي و انا نحكي معاه
انا:باااهي...انااا غايرة منها سافا هكا...و مدامك تعرفني لانا نغير...و منجم نغزر لحتى وحدة و هي معاك...فاش قام...تخليها قريبة منك...ديجا مش عندها كرهبة هي علاش مجاتش وحدها...و لا لازم عليه سي عمر يوصلها مش هكا...تكلم عاااد...عاجبك الوضع هكا
كبست على يدي...كي بقى يغزرلي من غير حتى كلمة جيت باش نحكي مرة اخرى...اما سكتني...ببوسة قوية للحظة لقيت شفايفي ضاعو بين شفايفو منعرفش إمتى و كيفاه...غدرني...و منعرفش على يديا كيفاه تمردو لصدرو...و كبشو فيه...جبد روحو شوية يحكي
عمر:ملا قتلي...لانتي غاايرة منها
انا:و أنت شبيك شايخ
عمر:باهي عزيزتي اهدا
انا:مااانيش باش نهدا لين تجاوبني...شبيها لاصقة فيك ديما
عمر:جيست أصحاب و كهو
انا:حسام صاحبك...محمد صاحبك...أما اصحاب بنات معندكش...مفهووم كلامي
عمر:ياخي تهدد فيا يا فرخة
انا:نهدد فيك يا سيدي...علاقتك بيها مش عاجبتني...و منحبهاش تقرب منك...بيناتكم خدمة و هاذي هاني نحاول نتقبلها...أما حكاية أصحاب و ندرا شنية...انساها الحكاية جملة
مد يدو...كبس على ظهري من تالي...جبدني عندو...و غزر لعينيا يحكي
عمر:ايجا هوني...من إمتى تحكي معايا هكا إنتي
انا:من توا
عمر:و شنية لي مش عاجبك في حكاية الصحبة ؟
انا:منحبش مرا أخرى في حياتك...مهما كنت باش تعتبرها...أما كان الحكاية قلقتك...تصرف على راحتك
عمر:مش على أساس غايرة منها
انا:في الاخير أنت طليقي عمر...منجمش نغير على حاجة ماهيش متاعي
عمر:ساااييي...توا درت ليا و تحب تركبهالي
انا:مش هاذي الحقيقة ؟
عمر:لاااا...ماااهيش حقييقة...و كان مزلت نسمعها الكلمة منك...ما تلوم كان روحك
انا:ملا خليك بعيد عليها
عمر:تعملي في شونطاج إنتي
انا:نحاول نبعد على كل حاجة تحرق فيا و صدقني..كان نحس أنو علاقتك بيها..باش تحرقني..مهما كان لي باش يجمعكم...حتى الصحبة لي تحكي عليها أنت وقتها باش نبعد عليك بالرسمي عمر..على خاطر انا ناخو قوتي منك أنت...و القوة لي عندي...تكفي لبنتي و كهو..أنت بالظبط منجمش ناقف قدام قراراتك و تعرف الشي هذا بالقدا
عمر:مدامك متنجمش تاقف قدامهم...شبيك مزلت عندو لتوا ؟
انا:مانيش عندو...أنا قاعدة مع امي...و فرد وقت قاعدة نفركس على حل...لهذا الكل
عمر:باهي...إيجا هوني تراه
جبدني عندو و عاود حضني...عدا يدو على ظهري...و تنهد بالقاوي...يحكي
عمر:الكلام لي سمعتو منك...منحبوش يتعاود مرة أخرى و ملك حتى شي بالنسبة ليا...زميلة عمل و كهو...حتى هي تعرف بالقدا...لانا منجمش نسلم فيك...و بالنسبة للكلب متاع مراد...مبقاش برشا...و نخرجك من عندو
هزيت راسي غزرتلو مستغربة من كلامو تالي...و ضيقت عينيا...نحكي
انا:شقصدك ؟
عمر:على قريب تفهم قصدي
انا:عمر...على شنية ناوي ياخي
عمر:متعبش روحك بأمور هذوما توا...و خلينا وين كنا
انا:وين كنا إحنا ؟
عمر:والله دقيقتين لتالي...كنت نذوق في حاجة بنينة عاللخر...أما مولاتها بتخرنينها على راسي...خلاتني نقص عليها
انا:بربي...توا وليت خرنانة ؟
عمر:مممم ساعة قولي...شنية الحلاوة هاذي الكل
انا:تحبني نصدق الدك متاعك توا
عمر:مستانس ندكك عليك انا...ساعة البوني هذا مواتيك عاللخر
انا:باهي مدام تشوف فيا هكا...شبيك معبرتنيش في الكلينيك
عمر:والله سؤال هذا ليك...مشى في بالي متغششة مني ياخي هردت دنيا بغيرتك
انا:عمممر
عمر:باهي...شقولك نهزو ريحانة توا و نخرجو مع بعضنا
انا:م..منجمش
عمر:باهي...فهمت عليك
حطيت يدي على خدو...أول ما حسيت بيدو ترخفت على ظهري...كبست عليه نحكي
انا:بعد ساعتين باش يجي طبيب بحذا أمي...نحب نعرف منو...إذا تحسنت و لا لا
عمر:باهي زهرة...مش لازم تبررلي
انا:بربي...لشكون تحبني نبرر كلامي ملا
عمر:وين تحبني نوصلك ؟ و لا تحب نكلم أشرف يجيك لهوني
انا:مش لازم...هاني باش نمشي وحدي
تلفت...و مديت يدي باش نحل الباب...سكرها من عندو يحكي
عمر:الطريق فارغة هوني
انا:عادي
عمر:متكرزنيش
انا:كرز على روحك...ساعة أنت من بكري تحب تعاركني و هاك لقيت سبب...و كان قلقك كلامي متاع قبيل أحسب روحك مسمعتوش...حل الباب هذا توا
عمر:الصبر يا ربي...شو أنا وين و هي وين
أنا:حل الباب و تو نرتحك مني...ساعة أنت تكون أحسن من غيري
مد يدو ضربني لراسي...حطيت يدي بلاصة ضربة...و انا نسمع فيه
عمر:و شكون دخلك الفكرة هاذي لمخك
أنا:تصرفاتك متاع توا...تقول هكا
غصيت و انا نحكي...نفخ بالقاوي...و جبدني عندو في لحظة يحكي
عمر:باهي منقصدش...جيست على أعصابي شوية و كهو
انا:و..وجعتني
باسني من راسي فوق البوني...و عدا يديه زوز على أجنابي يحكي
عمر:باهي يا روحي...سامحني
انا:منحبش
عمر:زهرة افهمني عيش حبي...حتى انا منحبش نغلط معاك أكثر...منحبش نضرك و علاقتنا هكا...بالنسبة لناس مطلقين و احنا لتوا مع بعضنا...منحب حتى حد يحكي عليك كلمة ناقصة...نحب ديما راسك مرفوع...على خاطرك مرتي...نحب نوقع على صداقنا مرة اخرى...باش نخليك تواجه المجتمع...لي ينجم يضرك بكلامو...انتي متاعي و باش تبقى متاعي لاخر نفس في حياتي...و مانيش باش نخلي حتى مخلوق...يقول كلمة في حقك مهما صار
كبست عليه بيديا زوز...و حسيت بكل كلمة خرجت من شفايفو...يمكن بديت نستوعب الحرب لي هو فيها...و فاش يخمم بالظبط...علاقتنا بالنسبة للمجتمع معدومة و بالنسبة لينا حية كيما قبل و اكثر...و بين المد و الجزر...لا انا نجم نتصرف معاه عادي قدام الناس الكل و لا نجم نبعد عليه زادة...و نبقى مجرد طليقتو مش اكثر...الفكرة هاذي بالظبط منحبش نخمم فيها جملة مدامني وقعت عالاوراق هذيكا و انا مجبورة...مستحيل نعتبر انو انا و عمر طلقنا...اما رغم هذا الكل...حتى كلام ناس باش نعفس عليه زادة...و باش نثبت للكل لي هو متاعي انا و كهو