🔸️حلقة 3
حطيت يدي على خدي نثبت معاه...أول مرة بعد اليمات اللي تعدات...نركز في تفاصيل وجهو..عينيه لي واسعين عسليين اما نظرتو ياسر حادة...لحيتو لي محصورة شعرو اكحل كيف ليل...صوتو كهو لي مسموع في الكلاصة...اصلا ميحكيش برشا...دوب يشرح و يسكت نزلت بعينيا نغزر لمنقالتو...سوريتو لي فلسها محلول من فوق...عندها حق مريم...سخطة كعبة مش نورمال أما ياسر عاقدها...و مضروب في روحو...فقت من سرحتي...كان كي ريتهم خارجين...تعدلت في قعدتي قربت مني مريم دز فيا تحكي
مريم:قوم يا سخطة...باش يمشي
تلفت نغزرلها...منعرفش كيفاه باش نمشي عندو...طرف القوة لي لميتها حسيتها طاحت في الما...قرصتني من يدي تحكي
مريم:زهههرررة...تي قوم يا طفلة...باش نضيعو في جرتك
قحرتلها و أنا نعدي في يدي على بلاصة القرصة...طلعت راسي نغزرلو...يسكر في البيسي...كبست على الورقة...و هزيت روحي وقفت...بلعت ريقي...قربت شوية...نغزرلو كيفاه تعدا من قدامي من غير حتى ما يغزرلي...غمضت عينيا بالقاوي و رجعت حليتهم...تلفت لمريم...عملتلي براسها باش نلحقو...خذيت نفس نحكي
أنا:ا استتااااذ
كمل يمشي كأنو مسمعنيش جملة...كبست على الورقة أكثر...نحس في قلبي باش يخرج من بقعتو...قربت زوز خطوات نحكي
أنا:أستاااذ عمر
وقف بالوقت...حسيت دم جمد في عروقي..تلفت لمريم عملتلي بيدها باش نقرب...قربت منو بالسيف...تلفت عندي يهز فيا و يحط...نحس في الأرض تهزت تحتي منعرفش شبيني خايفة منو لهدرجة...و لا علاه خايفة من غزراتو ليا...تقويت على روحي و قربت منو...نحكي
أنا:ا أستاذ...أنا...أنا
عمر:أختصر
أنا:ص..صراحة نحب نعتذر على البارح
عمر:كهو
أنا:مممم...نقصد لاا..أنا
نفخ بالقاوي...نعرف روحي عطلتو...جا باش يتلفت وقفتو نحكي
أنا:أمااان تنجم تقبل المشروع توا
تلفت عندي...غزرلي ندرا كيف...دخلت بعضي أكثر..نزلت راسي و رجعت هزيتو...ما قال حتى كلمة...خذيت نفس و كملت نحكي
أنا:ا البارح...م منعرفش كيفاش نسيتو...صدقني لي كان حاضر من قبل أما
عمر:كيفاش باش تقنعني ؟
أنا:و رحمة بابا كان حاضر من قبل
بقى يغزرلي من غير حتى كلمة أخرى...منجمتش نتحرك من بلاصتي...ريحة برفانتو ماشية و تقوى في خشمي نظراتو دخلتني بعضي أكثر و أكثر...حاسة روحي مكبلة قدامو...مش مستانسة نحكي مع حد...و الأساتذة لي تعداو علينا مش كيفو...ملقيتش كلام آخر نحكي بيه أصلا من غزرتو...ظاهر فيه مكبش في قرارو...تلفت شوية لمريم...هزيتلها بكتافي الله غالب...بقات تغزرلي نعرف أنو المشروع هذا أساسي في تقويم...و يمكن كلشي يطيح في الما إذا هو مقبلوش...فيقني من سرحتي صوتو يحكي
عمر:باش تكون آخر مرة
طلعت راسي نغزرلو مصدومة...جيت باش نحكي...قص عليا...كيف مد يدو...يستنى فيا نعطيه المشروع...هزيت يدي بالسيف حطيتو في يدو نحكي
انا:ز..زوز موجودين هوني
تلفت شوية غزر لمريم...كبس عالورق...هزني و حطني و تلفت باش يخرج وقفتو نحكي
أنا:م..مرسي أستاااذ
مرجعليش...كمل مشيتو...بقيت نتبع فيه بعينيا و هو يبعد...فقت من سرحتي كيف نطرت عليا حضنتني تحكي
مريم:مقوااااك يا طفلة...نجمت تقنعو
تبسمت وحدي...جبدت روحي منها...دزيتها شوية نحكي
أنا:سيبببني يا طفلة...شعرة و قلبي يحبس
مريم:هاك لباس عليك...جيست وجهك أحمر باش يطرشق...و قلبك مزال نحس بيه يدق بالقاوي...ارتاح يا بنتي...مشى على روحو
هزيت يدي ضربتها لكتفها...و قحرتلها نحكي
انا:دكك عليا يا فرخة...أنا الغالطة خاطرني مشيت نحكي معاه
مريم:هههههههه هاك سلكتنا...و زيد مريتوش كيفاه كان يثبت فيك
انا:مريييم يززززي...اخطانا من سيرتو توا..و يا ريت معادش ندخلو معاه في حتى مشكلة...لين يوفا العام هذا
مريم:مع انو متأكدة مزال باش تتواجه معاه يا روحي
انا:مريييم
مريم:باهي باهي...شرايك نمشو نفطرو بعد الفجعة متاع اليوم
قربت من الطاولة نسكر في صاكي...و نحكي فرد وقت
انا:مريم منجمش اليوم
مريم:علاه شفما...ميكونش سي مراد مانعك
انا:ل لا...صراحة الفلوس لي عندي ميكفوش
مريم:فجعتني في بالي منعك عليا زادة...تو هذا كلام تقولهولي ليا..من إمتى بيناتنا فلوس ياخي
انا:مرييم
مريم:لا مريم و لا شي...هيا باش نفطرو مع بعض اليوم...و آخر كلام عندي متناقشنيش
تبسمت بالوقت...هزيت صاكي...و قربت شديتها من يدها...خرجنا مع بعض...تنهدت نحكي
انا:مرييم
مريم:مممم
انا:في بالك...لي مراد اليوم عطاني فلوس
مريم:تحكي بالرسمي
انا:مممم
مريم:قداش ؟
انا:منعرفش...محسبتهمش...عطيتهم لأول واحد عارضني
مريم:كي العادة و كيما كل مرة
أنا:منجمش نصرف منهم مريم...منحبش نستغل الوضع لصالحي...كلشي نحب عليه...أنو يعتقني...و يخليني نعيش كيف اندادي
مريم:كان لمينا فلوسو...رانا رفعنا عليه قضية
شدني ضحك...ساعات تفكيرها يجي في صواب..تنهدت نحكي
انا:والله تعبت منو...تعبت من تحكمو زايد...وليت نخاف كان يخرجلي في اي بقعة نكون فيها...تي نخاف نحكي مع طفل...خاطر نعرفو يجن
مريم:صراااحة انا معادش فاهماتو جملة...ياخي نورمال معرس بامك...و يحبك انتي
انا:مجنوون...مستحيل يكون مليح في عقلو...منعرفش اصلا علاه عرس بامي...و لا كيفاه بدا الكابوس هذا تصدق لمراد كان كيف خويا و اكثر...في اول مشكلة نمشيلو ليه...في لحظة تقلب عليا...منعرفش كيفاه و لا علاش حبني...منعرفش اذا هذا حقيقي...و لا حلمة مكنتش نتوقع لهو باش يولي كابوس في حياتي...باش نولي نخاف حتى من اسمو
مريم:اهددااا زهرة...لي تعمل فيه مش حل...خوفك منو هو لي مقويه عليك...ياخي باش تبقى عايشة معاه بالطريقة هاذي انتي...باش تبقى تحت رحمتو
انا:منننننعرفش
وقفت في بلاصتي...منعرفش كيفاه صحت...هزيت يديا زوز حطيتهم على وجهي...نفخت بالقاوي نحكي
انا:تعبت مريم...صدقني تعبت...كل يوم قاعدة نتخنق و حد ماهو حاسس بيا...تعبت منو...تعبت من تسلطو عليا...منعرفش اصلا كيفاه مخليني نقرا...تي عندو عينين في كل بلاصة...فددني في عيشتي...و كرهني في روحي
مريم:و أمك ما حست بشي
انا:ههههههه تحكي بجدك...أمي من أول ما عرست..دوب تسألني إذا حاجتي بشي...تي حتى كي نمرض كان يسهر معايا هو...لتوا تعتبرني عقبة في حياتها
مريم:شتقصد ؟
انا:ك كانت تقولي وقت كنت طفلة جبتك لدنيا...في بالها حرمتها من حياتها لي حبت تعيشها...كان مش بابا كبش فيا...مانيش عايشة توا
مريم:لطف على اختي...نحي الافكار هذوما من مخك و طاطا إنتصار...بالسيف عليها باش تصدقك إنتي
انا:كيفاااه..قولي كيفاااه...كيفاه باش تصدقني...و هي كل همها ترضي مراد...تي حتى شغل دار الكل على راسي...مع انو قادرة جيب بون...أما خايفة عليه بالطبيعةد..خايفة كان وحدة تخطفو من يديها
مريم:أغزرلي هوني زهرة
طلعت راسي شوية غزرتلها...هزت يدها...حطتها على يدي كبست عليا تحكي
مريم:إنتي اقوى من هكا ببرشاااا...إنتي زهرة...كان منجمتش تقاوم حبو...استغلو
بقيت نغزرلها مستغربة...مفهمتش شتقصد بكلامها عقدت حواجبي نحكي
انا:شتقصد مريم
مريم:إنتي تعرف مراد قداش يحبك و يموت عليك..كيما تعرف لهو يغير عليك برشا...تي ساعات كي يجي لهوني يفكروه خطيبك و لا راجلك...و انا نتلز نسكت...خاطر منجمش نقولهم لهو راجل أمك...كي يبدا يصيح اكاكا..و يلوم فيك
أنا:وين تحب توصل مريم ؟
مريم:استغل حبو زهرة...لازم توري لأمك شكون مراد حاول تستفزو قدامها...حاول تخليه يغير...وقتها كهو تنجم توصل للي تحب عليه
انا:تحكي بجدك...تي انا نخاف وقت نغزر لوجهو..تحبني نستفزو
مريم:معندكش حل آخر زهرة...يا تعمل على روحك...و تخلي امك تعرفو على حقيقتو...يا باش تتلز تعيش طول عمرك تحت رحمتو
بقيت نغزرلها...اول مرة تحكي معايا هكا...نغزرلها و تفكيري مع كلامها...يمكن اول مرة نحس انو هي عندها حق..خطوة وحدة مني...تنجم تبدل برشا حاجات..نعرف لي مراد مش ساهل...كيما نعرف لهو يحبني لدرجة كبيرة...و مستعد يعمل كلشي على خاطري...و أحسن حاجة ميظهرش لهو راجل امي...اصلا من وهرتو و لبستو ميبانش عمرو 38 سنة...و الا راني تبهدلت معاهم خذيت نفس نحكي
أنا:سكر الموضوع توا...راسي وجعني منو
مريم:باهي احسن شي نمشو نفطرو توا
هزيتلها براسي ايه...بقيت نمشي معاها...و تفكيري مع الكلام لي قالتو...اول مرة نخمم في الموضوع من ناحية هاذي...كان نخلي امي تصدقني...وقتها بااز باش تبعد عليه...و بالطريقة هاذي نجم نبعد مراد من حياتنا
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
