🔸️حلقة 39
🔸️حسام يحكي:
ركيت الكرهبة على جنب...و نزلت...نغزر للعباد خارجين هزيت يدي عديتها على شعري...منعرفش كيفاش باش نلقاها توا...و لا اصلا علاه نعاند في عمر و جاي باش نحكي معاها..شيهمني فيها انا...كنت باش نرجع للكرهبة خاصة كيف لمحت كرهبة شراز...منحبش نقابلها حتى هي...اما حبست كي ريتها...جاية مع وائل و لا ندرا شكونو...تي دوب مزلت مذكرو...وقت ريتو في المحكمة نهارتها...هزيتها و حطيتها...شي ما تبدل فيها خذيت نفس و قربت منهم شوية...طلعت راسها..غزرتلي مستغربة...عقدت حواجبها تحكي
مريم:حساااام
أنا:مممم...حاجتي بيك
مريم:عالأقل تصرف كي العباد
كبست عالبونية متاعي...منحبش نغلط معاها خاصة توا...عديت يدي على وجهي نحكي
أنا:أمشي قدامي
مريم:وين نمشي ؟
وائل:لباس ماهو ؟
أنا:من غير ما تدخل أنت
مريم:يدخل...مش هو واقف معايا...ملا يدخل...شكونك أنت باش تحط أوامرك علينا ؟
أنا:صاار...هذا لي عندك
مريم:بالظبط
انا:باهي
تلفتت عطاتني بظهرها...حلت كراستها باش تسألو خطفتها من يدها...جبدتها عندي بقوة...قحرتلي تحكي
مريم:فاااش تعمل...سيببني ؟
حطت يدها على يدي...تجبد في روحها...كبست عليها أكثر...قرب مني يحكي
وائل:سييبها فاش تعمل ؟
انا:قتلك متدخلش أحسنلك
مريم:سييييبني يا سخطة...الله لا تربحك
أنا:أمشي
مريم:وين نمشي...شتحب عندي ؟
جبدتها عندي أكثر...و تلفت باش نمشي...قص عليا كي حط يدو على كتفي يحكي
وائل:ماكش تسمع فيها...سييبها...و إلا
رخفت يدي على يدها...و تلفت عندو...هزيتو و حطيتو تبسمت على جنب نحكي
انا:و إلا شنوة ؟
مريم:حسااام يزززي
وائل:أمشي من هوني أحسنلك...مكانش تو نكلم الأمن
مريم:واائل
منعرفش كيفاش...هزيت يدي و ضربتو ببونية لخشمو وخر لتالي مروهج...قربت مني تجبد فيا لتالي تحكي
مريم:حساااام يزززي...فاش قام تضرب فيه
نطرت يدي منها...و قربت منو...شديتو من الفاست متاعو نحكي
أنا:برا خبرهم...فاش تستنى...أغزرلي هوني...لعب الفروخ هذا مش عليا...و ثاني مرة خمم بالقدا قبل ما تاقف قدامي
وائل:غالط برشا...انت زادة متعرفش مع شكون واقف
كبست على يدي اكثر...قبل ما نهزها في وجهو...حسيت بيديها زوز تحطو على يدي...كبست عليا تحكي
مريم:يزززي...رد بالك تضربو
غمضت عينيا بالقاوي...و رجعت حليتهم...تلفت عندها شوية...نغزرلها...باقي تقحرلي...رخفت يدي شوية هزيتها و حطيتها...نحكي
أنا:أمشي
قحرتلي قحرة موت...و نزلت هزت صاكها بنطرة...تحكي
مريم:وائل...رد بالك على روحك...أصلا مجنون و ميعرفش يتصرف...اتو نحكيو مبعد
قربت منها جبدتها من يدها...منحبش نغلط معاهم اكثر اول ما وصلت للكرهبة...حليتلها الباب...نطرت يدها مني تحكي
مريم:نركب وحدي
اول ما ركبت...نطرت الباب بالقاوي و خلطت عليها...قبل ما نحل الباب...لمحتها واقفة من بعيد تغزرلنا...كابسة عالورق في يدها...دوب جات عيني في عينها...غزرتلي ندرا كيف و نزلت راسها...نفخت بالقاوي...هي بالذات محبيتش نقابلها اليوم...منعرفش علاه حسيتها تلوم فيا...محبيتش نركز معاها اكثر...حليت الباب و ركبت خدمت الكرهبة...و طرت بيها...نسمع فيها تحكي
مريم:شنية تستخايل في روحك...ياخي نورمال أنت تفضحني قدام ناس اكاكا...علاه جيت و شتحب مني ؟
أنا:سكر ¤¤¤¤¤ فمك احسنلك
مريم:مانيييش باش نسكت...منين طلعتلي انت...ياخي نورمال لي تعمل فيه...علاه جيت عندي ؟
انا:مررررريم...يزززززي
مريم:أنت لي يزززي...شتحب مني زح...ياخي ناقصتك أنا...اخطاني زح
أنا:أما عندك وقت لحاجات أخرى
مريم:شيهمك فيا أنت...آه شيهمك...من وين طلعتلي..تي ما صدقت تهنيت منك
غزرتلها بشطر عين...لفتت وجها بالوقت...أحسن شي سكتت...منعرفش كيفاش وصلت لشط...شديت الفران بالقاوي و نزلت...خذيت نفس من النسمة الباردة...شوية و خالطت عليا تحكي
مريم:علاه جبتني لهوني ؟
تلفت عندها شوية...هزيتها و حطيتها...كبوطها محلول شعرها داخل بعضو...خشمها احمر من البرد...غزرت لعينيها نحكي
انا:اكيد مجبتكش باش نغزر للمنظر هذا
مريم:على أساس يهمني برشا...كيفاش تراني أنت
أنا:مرة وحدة...تصرف كيما لبنات الكل
مريم:لا مانيش كيما لبنات لي تعرفهم...و عاجبتني روحي هكا...باهي
أنا:باهي...أسكت و أسمعني
مريم:شنوة ؟
أنا:زهرة
مريم:شبيها زهرة ؟
أنا:إنتي لازمك تحكي معاها
مريم:حاولت نكلمها...اما محبتش تهز عليا...و منجمش نمشيلها لدار هذيكا
أنا:شبيها دار هذيكا ؟
مريم:شي...مش هذا موضوعنا
انا:زهرة تاعبة برشا...خاصة ليلة البارح...أكيد فما حاجة و ما تحب تحكي لحد
مريم:مراد لي ورا الحكاية هاذي...أما حد ما حب يصدقني
أنا:مراد في الحبس...ياخي وين باش تلقاه هي
مريم:زايد الكلام معاك
أنا:سكر فمك
مريم:منسكرش...برا زمر...ياخي متعرفش تحكي كيما العباد الكل...جايبني لهوني بالفضايح
انا:نحكي كيما نحب
مريم:اصلا مع شكون نحكي...اغزرلي هوني...معادش دور بيا باهي...و معادش تقرب مني...و صحبتي نعرف كيفاش و وين نحكي معاها
انا:لااا عاااد...فاش قام هذا الكل...متكونش عرست باش خايفة من الفضايح هذوما الكل
قربت مني في لحظة...ضربتني بيدها لصدري...تحكي
مريم:الله لا تربحك...انا الغالطة...خاطر ستخايلتك عبد و حكيتلك...مش لازم كل مرة تشوفني تذكرني بيها الحكاية...يا سخطة
هزيت يدي خطفتها من يدها...جبدتها عندي بالوقت لصقتها فيا...و كبست على ظهرها نحكي
انا:شبيك خايفة منها الحكاية لهدرجة ؟
مريم:بربي...أنا ما نخاف من حتى شي عزيزي...و ما يهمني في حد...و حتى حد ماهو باش يفرض عليا شي انا منحبش عليه...و توا سيبني
انا:افففف يا طفلة...اسكت احسنلك...منحبش نغلط معاك توا
نزلت بعينيا لشفايفها...منعرفش علاه ندخل بعضي كي تبدا قريبة مني لهدرجة...بقات تغزرلي باهتة...رخفت يدي شوية...وو خرت لتالي...نحكي
انا:احسن شي تمشيلها توا
مريم:باهي
هزت يديها زوز...رجعت شعرها لتالي...و نفخت بالقاوي عديت عينيا على وجها...قحرتلي تحكي
مريم:باش نمشي توا...و من غير ما تزيد تطلع في وجهي مرة اخرى
انا:وين ماشية ؟
مريم:لجهنم الحمرا...تحب تجي معايا
انا:هيا من غير كلام زايد...امشي
مريم:منحبش...اخطاني زح...نعرف الطريق وحدي
بقيت نغزرلها مش نورمال الطفلة هاذي...تهيج و تهدا في دقيقة...قحرتلي...و تلفتت تمشي بالزربة...تحب تبعد...خلطت عليها بالوقت...نحكي
انا:مريييم
تلفتت عندي...هزتني و حطتني...ندرا كيف...تحكي
مريم:شنننوة...شبيك مزلت لاحقني ؟
انا:امشي قدامي توا
مريم:مانيش جاية معاك...اخطاااني
كلامها ركبلي العصب اكثر...قربت منها اكثر...وخرت لتالي تقحرلي و تحكي فرد وقت
مريم:فاش تعمل...ابعد...ابعدني
مرجعتلهاش...خطفتها من يدها...و هزيتها في حملتي على كتفي...نحكي
انا:ايجا هوني...ايجا
كبست عليها...راجع للكرهبة...تضرب فيا لظهري بيديها زوز و تصيح
مريم:نزززلني ياااا سخطة...نززززلني...الا ما نفضحك
تبسمت وحدي...باقي تضرب فيا...و تصيح...تحب تنزل اول ما وصلت للكرهبة...نزلتها عالارض...شعرة لا طاحت عرفتها داخت...استندت عليا تحكي
مريم:ك كلو جرايرك...ابعدني
هزيت يدي...حطيتها على جنبها...باش مطيحش نحكي
انا:ششش...اهدا
مريم:اففف منك...سيبني
انا:هيا...لازمك تقعد باش ترتاح
غمضت عينيها بالقاوي و رجعت حلتهم..مزالت مروهجة بعدتها شوية و حليت الباب...ركبتها و خلطت عليها نحكي
انا:لباس توا ؟
مريم:مممم...كلو جرايرك يا هامل
انا:معناها ماكش باش تسكت ؟
مريم:لا مجبور تتحملني
انا:يعني عندي حل آخر أنا
مريم:لا معندكش
انا:مممم باهي
تكات راسها لتالي...و مدت يدها...نزلت الشباك...تلفت شوية نغزرلها...سكرت عينيها ترد في نفس...باقي نثبت في تفاصيلها...تي شكان صار...كان تبقى هادية هكا هزت يدها تحكي من غير ما تحل عينيها
مريم:خدم الهم هاذي خلينا نمشيو
تبسمت على جنب...و خدمت الكرهبة بالوقت...منعرفش علاه حسيت روحي توحشتها في اليامات هذوما توحشت عركها و تخرنينها...أصلا منعرفش شبيني تصرفت بالطريقة هاذي مع وائل و معاها زادة..منعرفش علاه كي يبدا طفل في الحكاية معادش نعرف نتصرف فرد وقت باقي نخمم في موقف شراز...بعد آخر مرة قابلتها...ديما كلامها يتعاود في وذني...زعمة شنية لي لازم نسمعو و نعرفو...زعمة مهم لهدرجة...أما زادة منجمتش نعطي لروحي فرصة اني نسمعها...و لا حتى نقعد معاها...معنديش استعداد...نفركس في الماضي...و نتذكر لي تعدا عليا...لي صار صار...تعدا و فات و مستحيل مزال نعطيها فرصة و لا نعطي للعلاقة هاذي فرصة اخرى...كلشي وفا نهار لي وقفت قدامي و خلات كلشي بينا يوفا بكلمة...و مستحيل نخليها ترجع لحياتي مرة اخرى
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
