زهرة🌸

الحلقة الرابعة و التسعون

🔸️حلقة 94
🔸️مراد يحكي:
شديت الفران بالقاوي و نزلت...دورت عينيا عالبلاصة ما لقيت حتى شي يوصلني وين نحب...اخر اشارة جاتني من تليفونها انها في البقعة هاذي...اصلا منعرفش علاه جيت وراها...برغم متأكد لماهيش باش تغدرني...هزيت راسي نغزر لضو لي جاي من البعيد...قربت بخطوات ثابتة...و مع كل خطوة...صورة الدار تولي واضحة أكثر...ضيقت عينيا عالضو لي شاعل برا...عديت عينيا على كل بقعة...و قربت من الباب...دقيت عليه مرة و زوز...أما ما حسيت بشي...تلفت على صوت الكرهبة عرفت اشرف لحقني...كبست عالبواني...أما شي...و صعيب يتحل من برا...تلفت على صوت اشرف يحكي
أشرف:سي مراد...وصلت لحاجة
أنا:برا فركس ورا دار...و متورنيش وجهك برشا...مدامك ضيعتها...منعرفش كيفاه قاعد توريني في روحك
أشرف:سامحني سي مراد...أما مشى في بالي بقات في دارها
أنا:مانيش ناقصك...كمل لي جيت عليه
اشرف:باهي
ضربت الباب بساقي...ووخرت خطوة لتالي...نحس في راسي باش يطرشق...طلبتها مرة اخرى...باقي مسكر منعرفش اذا قاعدة تلعب على اعصابي...و وين باش توصل...أما لي متاكد منو توا انهم كانو مع بعض هوني سمعت أشرف يعيط من غادي...خذيت نفس و مشيت لعندو...هزيت راسي قحرتلو نحكي
انا:شفما ؟
أشرف:الباب تلاني محلول
ضيقت عينيا مستغرب و قربت بالزربة...دزيتو و دخلت...نحكي
أنا:خليك هوني
هزلي براسو إيه...و وخر خطوة لتالي...دخلت لصالة و وقفت في نص...ندور في راسي على كل تركينة...قربت من الكنتوار...نغزر للكاسة لي معبية...تبسمت على جنب...و شيعت راسي للبيت لي محلولة...ضيقت عينيا...و قربت منها...و مع أول خطوة...قلبي خض بالقاوي...منعرفش شنية لي حسيتو بالظبط...أما فكرة لهي كانت معاه هوني...و في البيت هاذي...دخلتني بعضي...و اول حاجة غزرتلها السرير...رغم كان منظم كأنو حد ما كان هوني...أما إحساسي يقول العكس منعرفش اذا كانو في دار هاذي من اصلو و لا لا...اما الضو متاع برا...و الضو متاع الصالة...و كاسة الويسكي لي فوق الكنتوار...حاجات تقول فما شكون كان هوني قبل ما نوصلو...اما وينو...قربت من السرير بخطوات رزينة...هزيت المخدة في يدي...و قبل ما نقربها مني و نشم ريحتها...وقفني صوت اشرف...لي دخل لصالة يحكي
أشرف:سي مرااد
غمضت عينيا بالقاوي...طيشتها من يدي...و خرجت عندو نحكي
أنا:شفماا ؟
أشرف:واحد من رجال...وصل لعنوان عمر بن قاسم
أنا:حتى لتوا ؟
أشرف:مكانش عندنا علم بالفيلا الجديدة
أنا:فيلا ملا ؟
هزلي براسو ايه...تبسمت على جنب...و غزرتلو نحكي
أنا:زهرة غديكا ؟
أشرف:من غير العنوان مفما حتى معلومة أخرى
أنا:و أنت في رايك...تهمني برشا الادريسة متاعو
قربت منو شوية...شديتو من كول الفاست وجبدتو عندي نحكي
انا:نحب على زهرة و كهو...تسمع فيا...ميهمني حتى حد غيرها توا
اشرف:احتمال تكون غديكا
دزيتو لتالي...و هزيت راسي...قحرتلو...نصيح
انا:مفماااش احتمااالااات هوني...كان صار و ملقيتهاش ليلة قبل غدوة...حسابك باش يكون دوبل
اشرف:س..سامحني سي مراد...اما لازمنا نمشو توا...عالاقل فما احتمال لي هوما مع بعضهم في الفيلا
انا:ابعثلي  localisation توا...و اطلب ربي نلقاها غاديكا
هزلي براسو ايه...و نزل عينيه لوطة...دورت عينيا عالدار مرة...و سبقتو...مدام الباب تلاني محلول...معناها خرجو منو...عديت يدي على شعري و رجعت للكرهبة...ضربت الفولون بيديا زوز...نحكي
أنا:باهي يا زهرة باهي
كبست عالفيتاس و طرت بيها...منعرفش كيفاه قريت الادريسة و كيفاه شديت ثنبة لغديكا...لي يهمني اني نلقاها و كهو...و الثنية متاع ساعتين رحيتها في ساعة وحدة كهو...أول ما وصلت...شديت الفران و نزلت..تلفت لأشرف خلط عليا بالوقت...هزيت يدي نحكي
أنا:خليك هوني أنت
أشرف:تدخل وحدك
أنا:مانيش باش نعاود كلامي
أشرف:باهي...سي مراد
سكرت الباب بالقاوي...و دزيت الباب الكبيرة...وقفني العساس يحكي
هو:مسيو فاش تعمل ياااخي
انا:خليك غادي انت
قربت من الباب بالزربة...نضرب فيها و نصيح فرد وقت أول ما حلت البون...دزيتو بيدي و دخلت...نعيط
أنا:عممممر...عممممر
دورت راسي على صوتو...يمد في الخطوة بالسيف...قحرلي يحكي
عثمان:مراااد...شنية تستخايل في روحك...مسيب علينا كي العزري
أنا:برا عيطلي لولدك...أحسن ما نقلب دار على راسكم واحد واحد
جا باش يحكي...أما قص علينا صوتها من تالي...تحكي
هند:هدي روحك سي مراد...ميجيش تدخل لديور الناس بالطريقة هاذي
دورت راسي نغزرلها...جات عيني مع عينها...نفس الغزرة متاعها...متبدلتش...اما عينيها فيهم لمعة جديدة...رغم متاكد اني غلطت في حقها اكثر من اللازم...اما كيما يقولو وحدة بوحدة...هو اللي اختار يقرب من نار جهنم من غير ما يخمم في عيلتو...هو لي اختار الحرب هاذي...من اول لحظة حط عينيه عليها...يمكن جبدت روحي في الوقت اللي كنت باش ناخو منها كلشي و ندمرها...و رغم كنت نجم نعمل معاها اكثر...اما غزرتها هاذي منعتني...متستهلش تخلص في بلاصة خوها خاطر حتى هو مشافش وجيعتها...على خاطر حبو لزهرة عماه...يمكن هذاكا لي خلاني نرجع لتالي...قبل ما ناخو كلشي منها...الوحيد اللي لازمو يتعذب هو عمر و كهو...لي صار من بكري لتوا...هو البداية كهو...استرجعت أفكاري...قحرتلها... و تلفت نصيح
انا:عممممر...انزززل لهوووني فييييسع
هزيت راسي نغزرلو...هابط الدروج وحدة وحدة...بقيت نتبع فيه بعينيا لين وصل وقف قدامي بالقدا و تواجهنا مرة أخرى...و جات العين في العين...تعدات دقايق...دنيا سكتت...و حد فينا ما نطق بكلمة...لين قرب بوه باش يحكي...مد يدو وقفو...يحكي
عمر:أول مرة و آخر مرة...تحط ساقك في الدار هاذي...و بالطريقة هاذي زادة
انا:اللي متعرفوش أنت...انو مراد بن عيسى يمشي وين يحب و بالطريقة لي يحب عليها زادة
عمر:شمجيبك لهوني ؟
انا:جيت باش ناخو امانتي سي عمر
تبسمت و انا نغزر...لملامحو لي تكبست...نعرف بالقدا الصراع لي قاعد يعيش فيه داخلو...عشتو و دوبل زادة...هزيت عينيا من وجهو...لاول الدروج...و قدمت خطوة نحكي
انا:اهوكا وصلت...من غير ما تعب روحك
جات عيني في عينها...نغزرلها...و هي محملة بنتها في حضنها...منظرها خلاني...ننسى لي جيت على خاطرو من اصلو...كل درجة تنزلها و هي تقرب مني...خلات بدنس يتكبس اكثر...وقفت قدامي بالقدا...نزلت راسي نغزرلها...ملايكة على حالها...احساس غريب تحرك داخلي...اول مرة في حياتي نعيشو...قلبي لي خض بالقاوي...و عينيا لي منجمتش نهزهم منها...مش اول بيبي نشوفو...اما هي بالظبط...خلات احساس بنين يتحرك داخلي...احساس اول مرة نستطعمو...يمكن خاطرها قطعة منها...من زهرتي...للحظة معادش حسيت بالعباد لي دايرة بيا...و معادش نعرف شنية اللي قاعد يصير معايا...فرد وقت...منجمتش نهز يدي و نمسها...و لا حتى نبوسها...فقت من سرحتي على صوتو يحكي
عمر:تنجم تهز أمانتك و تمشي
هزيت راسي شوية غزرتلها...غزرت لعينيها لي تعلقو في وجهو...كأنها تلوم فيه عالكلام لي قالو...دورت راسي نغزرلو...دور عينيه منها لهند...يحكي
عمر:هز ريحان من عندها
عينيها لي دمعت في لحظة...و يديها لي كبست بيهم على بنتها و هي تلز فيها لحضنها اكثر من قبل...خلات قلبي يخض بالقاوي...و شيطاني للحظة قالي برشا حاجات...أولهم إني نرجعلها بنتها الليلة قبل غدوة أما هي وقفت في وجهي...رفضت تخليني ندخل منعرفش إذا صحيح اللي نعمل فيه و لا لا...أما محملتش الدمعة المحصور بين شوافرها...محملتش الغصة لي كانت تحكي بيها مع هند
زهرة:لحظة...خليها لحظة عندي كهو
نزلت عليها اكثر...تشم في ريحتها...و تغزرلها بالوقت البوستين لي طبعتهم على وجها...وجعوني بصفة غريبة منحبش نشوفها ضعيفة...و منحبهاش تضعف حتى قدامي زادة...خذيت نفس نحكي
أنا:هيا فيسع
قربت منها...حطتها في يدها...و عاودت بستها...تحكي
زهرة:رد بالك عليها أمانك
هند:طمن
تلفت عندو بالوقت...حطيت عيني في عينو...و قحرتلو نحكي
أنا:ماكش باش تخلص مني بساهل
عمر:اللي تنجم عليه...متقصرش فيه
أنا:الوقت بيناتنا
عمر:أكيد
حسيت بيدها لي تحطت على كتفي...وقت وقفت بيناتنا بالظبط...دورت وجهي غزرتلها...فرد وقت مفهمتش شنية تحب توصلي و من الكلمتين لي رماتهم خلاتني نرجع لتالي بالوقت
زهرة:هزني من هوني و كهو
هزيتلها براسي ايه...أول ما هبطت يدها...كبست عليها بالوقت...حتى هي حسيتها استغربت الفازة...غزرتلهم نحكي
انا:نتلقاو في ساعة اخرى...تصبحو على خير
كبست عليها اكثر...و خرجتها معايا...قدامهم الكل...و اهم شي قدام عينيه هو...اول ما تسكر الباب ورانا...و خرجنا من الفيلا جملة...جبدت يدها بالقاوي تحكي
زهرة:شنييية هذااا لي عملتو انت ؟ شنيية تستخايل في روحك تعمل...ياااخي نورمال تجي تخرجني بالطريقة هاذي...شنية صااار ؟ كي حبيت نزيد دقيقة مع بنتي...ااااه قلللي شنية صااار ؟
قربت منها في لحظة...وخرت لتالي...تكات عالكرهبة حطيت يدي بحذا راسها نحكي
انا:بحذا بنتك...و لا حبيت تزيد دقيقة معاه هو ؟
زهرة:شنننية تقصد ؟
انا:هاااني باش ناخوك على حساب عقلك...نعرف لانتي و هو...كنتو مع بعضكم...ووين كنتو زادة...و ماكش مجبورة باش تبررلي
زهرة:نعرف لي مانيش مجبورة...و ميهمنيش شنية جا في مخك بالظبط...اما...انا على خاطر بنتي مستعدة نمشي لاخر دنيا يا مرااااد...و لي عملتو توااا كاافي باش يخليني نعرف...قدااش توثق فيااا
دزتني بيدها و حلت الباب بالوقت ركبت...و نزلت البلار تحكي
زهرة:تنجم تهزني من هوني توا...مش هذا لي جيت خاطرو...تفضل
عديت يدي على شعري...نحس في راسي باش يطرشق...مش ناقص اللي قاعد يصير حتى طرف شاورت لأشرف باش يلحقني...خذيت نفس و خالطت عليها...خدمت الكرهبة من غير ما نزيد معاها كلمة وحدة...ثنية كاملة...و هي تغزر لطريق...مديت يدي طلعت البلار من عندي...عاودت نزلاتو بالوقت...تنهدت بالقاوي و تبسمت على جنب...منعرفش علاش ضحكتني الفازة...قحرتلي تحكي
زهرة:شنية يضحك فيك أنت ؟
انا:حتى شي
زهرة:المرة الجاية خلي خدمتك و اعمل بوديقارد عليا باهي
انا:ايه علاش لا
زهرة:يااسر ضامر
أنا:محلاها بنتك
غزرتلي ندرا كيف...و كبست على يديها...حركة تعملها ديما...كي تبدا متوترة...دورت راسها للبلار تحكي
زهرة:عيشك
غمضت عيننيا بالقاوي...و عاودت حليتهم...نعرف و متأكد اللي الحكاية توجعها برشا...و متأكد زادة لي مزالت مروهجة من كلامو متاع قبيل...قص عليا سرحتي صوت تليفوني...هزيتو في يدي...اول ما ريت اسمها فديت و تيقرت من روحي...مش ناقصها هي توا...منعرفش كيفاه وصلت...غزرتلها نحكي
أنا:برا شد بيتك توا...مبعد عندنا حديث اخر
زهرة:شنية صار في موضوع أمي
انا:هيا أزرب روحك
قحرتلي و نزلت...ساقها أعلى من راسها...بقيت نتبع فيها بعينيا لين دخلت لدار...و عاودت طلبت شراز..هزت عليا بالوقت تحكي
شراز:م..مراااد...مراد...من بكري نطلب فيك راني
انا:شفممااا شرااز ؟
شراز:نحب نقابلك توا...إيجا عندي أمانك
انا:مانيش ناقصك توا
شراز:أمااانك...أنا معنديش غيرك يا مراااد
نفخت بالقاوي...و كبست بيدي عالفولون...نحكي
انا:باهي علق تو نجيك
شراز:ب..باهي
رميت تليفون بجنبي...و نزلت البلار شاورت لاشرف...جا عندي بالوقت...هزيت راسي غزرتلو نحكي
انا:خلي عينيك عليها...و رد بالك تصير حاجة في غياابي
اشرف:باهي سي مراد طمن
انا:صحيتك
خدمت الكرهبة...رجعت لتالي...و شديت ثنية...منعرفش شنية المصيبة لي وحلت روحها فيعا المرة هاذي...اما من صوتها حسيتها مش قد بعضها...و منجمش نتلف الحكاية هكا برك...رغم نحس في بدني مدقدق...و ما عيني في حتى شي بعد اللي صار الليلة...اما زادة مستحيل نخليها وحدها بعد ما رجعتها لتونس...نعرف لكلشي واقف ضدها...خاصة حسام...محسيتش بالثنية كيفاه وصلت...رغم الافكار لي داخلة بعضها في راسي شديت الفران...و نزلت...عدلت كبوطي...و هزيت روحي دريكسيون للبرتمان متاعها...مديت يدي دقيت الباب مرة...و مخلطتش عالثانية...حلتلي بالوقت...هزيتها و حطيتها مستغرب في حالتها...دبشها لي داخل بعضو عينيها منفوخين من البكا...لي خلى زروقيتهم تغماق اكثر...جيت باش نحكي...قربت مني...عنقتني بالوقت تحكي
شراز:أحسن شي أنك جيت يا مراد
مديت يدي بالسيف...حطيتها على ظهرها...و خذيت نفس نحكي
أنا:شبييك ؟ و شنية الحالة لي انتي فيها توا ؟
شراز:م..متخلينيش...متخلينيش أمانك
انا:بااهي اهدا...و أدخل قدامي توا
جبدت روحي منها شوية...دخلتها و سكرت الباب خلطت عليها...قعدتها عالفوتاي...و قعدت بجمبها نحكي
انا:شبيك وصلت للحالة هاذي..صارت حاجة انا منعرفش بيها ؟
شراز:م..مرااد...ا..أنا
انا:انطق شراااز...متفددنيش اكثر
شراز:م..مريم...مريم
انا:شبيها مريم ؟
شراز:ف..في كلينيك...مريم في الكلينيك...و يمكن حالتها خطيرة
انا:منبقاش نحلل و نفسر في كلاامك...شبيها مريم ؟ و فاش قااام حتى ترقد في كلينيك و حالتها خطيرة من فوق زادة
شراز:ا..انا...وصيت شكون يكسر البوتيك...متاعها...و بالصدفة كانت فيه هي
بقيت نغزرلها مصدوم...نستوعب في كلامها...و في عملتها...و في دموعها لي نزلو أكثر من قبل...جات باش تحكي...شديتها من وجها نحكي
انا:واااعية للكلام لي تقووول فيه...تعررف روووحك فاش قاعد تخرررج من فمك
شراز:م..مراد..ا..أمان
كبست عليها اكثر...حسيت روحي فقدت اعصابي من اللي سمعتو...جبدتها عندي شوية...و مديت يدي لاخرى نضرب لراسها و نحكي
انا:باااااش تخممم..بااااش تخممم ¤¤¤ ¤¤¤¤¤¤ تحب تجهلني في هالليلة الكلبة...كيفاااه تعمل حاااجة هكااا...تحححب تقتل الطفلة ياااخي ؟
جبدا روحها مني...و هزت روحها وقفت بالزربة...و غزرتلي تحكي
شراز:مقصدددتش...والله لا قصدتها يااا مراااد...حبيت نكبسها و كهههو...الاولاد ماشي في بالهم خرجت من البوتيك...خاطر الضو قص...اماانك افهمننني...افهممني...انا منحب منها شي...نحبها تبعد على حسام و كهو...تعبت و معادش نجم...معادش نجم نصبر اكثر...معادش نجم نعيش من غيرو...قاعدة نموت يا مراااد...انا قاعدة نموت من غير حسام...12 سنة تعدات و لتوا لا حس بيا...خليت كلشي ورايا...و هربت لهوني...عندو هو...انا رجعت على خاطرو...رجعت ليه هو...حد منكم يفهمني...والله قاااعدة نموت في كل دقيقة و في كل لحظة...عااوني مرااد...عااووني راني باش نضيع...والله باش نضييع
عديت يديا زوز على وجهي...و هزيت روحي وقفت قربت منها...شديتها من كتافها...كبست عليها...و حطيت عيني في عيني في عينها نحكي
انا:اغززرلي هوووني شراااز...اغزززرلي هووني...مداام دم بن عيسى يمشي فيك...بالسيف علييك باش تكون قوية...تسمع فيا يااا شراااز...حسااام ينجم يرجعلك...اما مش بالطريقة هااذي...مش تمرمد و تبهذل بحال مرتو إنتي هكا قاعدة تقوي في مريم من غير ما تشلق على روحك
شراز:خ..خاايفة...خاايفة من اللي باش يصيير...خايفة حسام يعرف لانا سبب...خايفة يكرهني اكثر و يبعد عليا...وقتها نقتلو و نقتل روحي تسمع فيا...نموتو مع بعضنا...و منخليهش يرجعلها
كبست على يدها اكثر...و جبدتها معايا للمرايا...وقفتها...ووقفت وراها نحكي
انا:اغزززر لرووحك...هذا منظر تحب حساام يغزرلو...مرا ضعييفة...مرا فاشلة في حيااتها...لا نجمت تحافظ على حبها الاول...لا نجمت تعيش مع راجلها...مرا متعرفش شنية تحب من الدنيااا...و تحبو يغزرلك...انتي ما تستهل كان الشفقة يااا شرااز
هزت يديها زوز...تعدي فيهم على وجها...و شعرها خذيت نفس نحكي
انا:ثبت في روحك بالقدا...تو تفهم شنية لازمك تعمل
تلفتت عندي بالوقت...غمضت عينيها و عاودت حلتهم تحكي
شراز:منحبش نباصي جرايرها هي...حل الحكاية من عندك
انا:باش تكون أول و اخر مرة يا شراااز...بعد توا باش تتحمل مسؤوليتك وحدك
شراز:باهي...و حاجة اخرى
انا:نسمع فيك
شراز:نحب نكون جزء من مشروعك...منعرفش كيفاه مهم تصرف...نحب نكون موجودة و كهو...نحب اي طريقة تخليني قريبة منو
أنا:نص الأسهم باش يكونو لزهرة...أما إنتي تنجم تكون المهندسة متاعنا كان تحب...و لا مساعدة المهندس متاع المشروع
شراز:موافقة
انا:ملاا حضر روحك للي جاي
شراز:حاضرة
تبسمت على جنب...هذا لي نحبها تكون عليه...مديت يدي كبست على كتفها نحكي
انا:خليك هكا ديما...لازمني نمشي توا
شراز:باهي...طمن
هزيتلها براسي ايه...و خرجت من عندها...دريكسيون للفيلا...خليت اشرف يمشي على روحو و طلعت...الدنيا هادية بصفة غريبة...هزيت راسي غزرت لبيتها...و قربت شوية...كبست عالبواني...حليتها بسياسة و هزيت راسي نغزرلها...كابسة عالبوني متاع ريحان و غاطسة في نوم...تنهدت بالقاوي...و عاودت سكرت الباب...مشيت لبيتي...طيشت كبوطي عالفوتاي...نحيت الفاست...و ترميت وسط سرير...لي تعدا على راسي اليوم...خلاني نحس روحي في دوامة كبيرة...واثق فيها...و مش واثق...نعرفها تنجم تبعد عليه...اما ماهيش باش تنساه ماهيش باش تنحيه من قلبها...ماهيش باش تتعداه مهما صار...و مهما عملت معاها حبها ليه اقوى...اما بالسيف عليها باش تكون متاعي انا و كهو...ماهيش باش تنسى اما باش تتناسى مع الوقت...باش تعيش لا و لبنتها كهو...قد ما حاولت نقاوم...لقيت روحي نحب فيها اكثر من قبل...عشقتها اكثر من السنين لي ماشية و تتعدا وسط الحرب هاذي الكل...الحاجة الوحيدة لي متأكد منها انو مهما...دار علينا الزمان...و مهما لعبت بينا الدنيا باش نبقى نحبها لآخر لحظة في حياتي...و لاخر نفس في عمري...و كان ماهيش باش تكون ليا ماهيش باش تكون ليه زادة...مصيرهم باش يكون بين يديا انا و كهو