زهرة🌸

الحلقة الخامسة عشر

🔸️حلقة 15
فقت الصباح بالسيف...منعرفش كيفاش رقدت أصلا..كل مرة نسكر عينيا...تتعدا صورتها بين عينيا...كل مرة نتذكر غزرتها ليا ندخل في حيط...نفخت بالقاوي...أصلا هذا لي لازمو يصير...طفلة باش نعاونها كهو...مش أكثر من هكا...نحب نحي الافكار هذوما الكل من مخي هزيت روحي...مشيت لبيت البانو...عملت دوش...بدلت دبشي...و خرجت...لقيتها داخلة لبيت البانو...وقفتها نحكي
أنا:زهرة
طلعت راسها غزرتلي...تبعد في عينيها من وجهي و تحكي
زهرة:مممم
انا:متمشيش للفاك ليوم
زهرة:علاه ؟
انا:اكاكا...اليوم منقريش...و زادة منحبكش تبقى وحدك
زهرة:أما عندي قضية مهمة راو
ضيقت عينيا مستغرب...نزلت راسي نغزرلها...نحكي
أنا:قضية شنوة ؟
زهرة:ب..باش نفركس على خدمة
أنا:شننننوة ؟
زهرة:مسيو عمر أنا
أنا:إنتي شنوة...ياخي تضربت على راسك صباح ربي و لا شنية حكايتك
زهرة:هذا لي لازم يصير...منحبش نتعبك معايا أكثر
تبسمت على جنب...مش نورمال طفلة هاذي...قربت منها شوية...وخرت لتالي أكثر...حطيت يدي عالحيط بحذا راسها و نزلت عليها اكثر...نحكي
أنا:الموضوع هذا تنحيه من مخك جملة باهي يا فرخة مزلت صغيرة عالخدمة...و زادة تعرف لهو ماهوش باش يخليك في حالك...ملا ريض الفترة هاذي و أسمع الكلام أحسنلك
زهرة:ب..باهي
أنا:شي آخر
زهرة:ش..شنوة ؟
أنا:تحب أي حاجة...خاصة في لفاك...تجي و تخبرني...ما تمشي لحد و لا تحير في شي
زهرة:أما
أنا:هيا لبيتك توا
زهرة:مستحيل نقبل
أنا:باش تقبل بالسيف عليك...و كان نعرف لإنتي خرجت من دار...ما تلوم كان روحك
زهرة:شبيك تهدد فيا لباس ماهو ؟
أنا:شو كي طلع عندها لسان
زهرة:ملا شنية كنت تستخايل ؟
شدني ضحك و هي تعارك فيا...قربت منها أكثر...نحكي
انا:شنوة لالة زهرة...شتحب عالصباح ؟
زهرة:ش..شي
أنا:برا لبيتك ملا
نزلت راسها شوية...و هربت لبيتها...بقيت نغزرلها لين دخلت...تبسمت وحدي...دخلت لصالة هزيت مفاتحي لمحت دوا متاعها هزيتو معايا زادة...حتى كي نبه عليها طبيب...مزال تاخو منو...جاب ربي نساتو هوني...خرجت من دار و سكرت الباب من برا...نعرفها تخدم مخها و تحاول تخرج...هزيت الكرهبة و دريكسيون للمحامي كنت ماخو موعد معاه عالبارح...اما تلهيت نلوج عليها من بلاصة لبلاصة...منعرفش كيفاش وصلت...اول ما دخلت استقبلني...قرب مني قعد عالفوتاي مقابلني حكيتلو كلشي نعرفو...من أول الحكاية...لآخر مرة هربت من عندو...شبك يديه يحكي
هو:مسيو عمر...الحكاية ياسر معقدة...و مش بعيد نخسرو القضية في بداية الطريق
أنا:كيفاش ؟
هو:أول شي الطفلة فاتت السن القانوني...و معندهاش دليل يثبت كلامها و لي عاشتو...و كان امها شهدت في المحكمة ضدها كلشي يطيح في الما
أنا:شباش نعملو توا ؟
هو:مش بعيد يحاول يسقط القضية لي هزيتوها في حقو...و اذا ثبت في المحكمة أنو الطفلة قاعدة عندك باش يربح القضية من أول محاكمة
انا:شنوة لي لازم يصير توا ؟
هو:أول شي هي لازم تخرج من عندك...تبقى عند وحدة من صحباتها كيما قلتو في المحضر
أنا:هكا خطر عليها
هو:مفماش حل آخر...و ثاني شي...تطلب من الكلينيك تحاليل لي عملتهم أول مرة...و لي تثبت أنو هي كانت تشرب مهدئات...و تقرير رسمي يقول لهي تعرضت لضرب من قبل
أنا:كهو
هو:مبدئيا لازم نجمعو الادلة الكافية...و أي حاجة ممكن تفيدنا في القضية...و اهم شي متبقاش عندك...خاطر كان هو ثبت شي هذا توا...باش يسقط الشكوى من اولها انا:باهي تو نحاول نتصرف...و نكلمك في أقرب وقت
هو:باهي مسيو عمر
هزيت روحي وقفت...وقف في جرتي...صافحتو و خرجت...حليت الباب ركبت...نسوق و كلامو يتعاود في مخي...نحس راسي باش يطرشق...مخي تحرق و انا نفكر في حل...منجمش نخليها بعيدة عليا...و منجمش نأمن عليها لحتى حد زادة...نعرف لهو باش يستغل اي فرصة توصلو ليها...منعرفش كيفاه لقيت روحي...قدام دارهم...أصلا أول حد جا لبالي حسام...هو الحل الوحيد باش نجم نمنعها الفترة هاذي...عالأقل لين يوفا التحقيق شديت الفران و نزلت...دقيت الباب حلتلي المرا لي تخدم عندهم...جيت باش نحكي قصت عليا أمو جاية من غادي تحكي
فتحية:عمممر
أنا:أمي فتحية
فتحية:زارتنا البركة...يا ولدي وينك لتوا...لا تجي لا تطل على أمك...و ترسلي سلام من بعيد كهو
قربت منها بستها من راسها...و غزرتلها...نحكي
أنا:و راسك وحلت في الخدمة...و هاني جيتك توا
فتحية:ايجا ادخل
أنا:أمي حسام هوني ياخي
فتحية:هوكا راقد لتوا...ماك تعرفو كان سهر في الليل يقوم بالسيف صباح
أنا:هاني باش نطلعلو توا...حاجتي بيه في قضية مهمة
فتحية:باهي اما رد بالك تمشي بلا ما تفطر
أنا:باهي لالة فتحية
تبسمتلها و طلعت...هديت عليه...راقد على كرشو و غاطس في نوم...حليت الريدو...و هزيت كاسة الما عالتابل دونوي...رميتها عليه...تنطر من بلاصتو...يحكي و يسب
حسام:¤¤¤¤¤¤¤ يا ¤¤¤¤¤ هذا أنت
انا:قوم سي السبع راقد لتوا
حسام:تي برا اخطاني...رقدت وجه الصباح
انا:شو كي يقولي اخطاني...باش تغلق 37 سنة و راقد لتوا
حسام:تعلمت منك...ماك 20 سنة و أنت في خلقتي
انا:ههههههه تي قوم ¤¤¤ عندي كلام معاك
هز روحو تقعد...شعرو داخل بعضو...يحل في عينيه بالسيف...و يحكي
حسام:شتحب عند ¤¤¤ صباح ربي
انا:هز روحك ساعة...باش تنجم تستوعب اللي باش نحكيه
عقد حواجبو مستغرب...هز روحو تقعد...يحكي
حسام:شفما ؟
جيت باش نحكي...قص عليا صوت الباب...حليتو و شديت القهوة على خالتي نعيمة...عرفتها امي فتحية بعثتها...كبست عليها و سكرت الباب...حطيتها عالتابل دونوي...غزرلي يحكي
حسام:شفماااا عمر...بديت نفقد أعصابي راهو ؟
أنا:الموضوع يخص زهرة
حسام:شنننننوة...متقليش عملت حاجة لطفلة...و تحب تسترها و لا تعرس بيها ؟
انا:كان تسكر ¤¤¤¤ فمك مش خير
حسام:ملا شفمااا ؟
أنا:زهرة باش تولي تعيش عندكم...و متنجمش ترفض هاني قتلك من توا
حسام:عمر فهمني بالشوية...و لا نقلك هات القهوة هذيكا...ظاهر المشروب مزال مأثر فيا...و لا أنت لي شربت عالصباح
أنا:حساااام...ركز مع ¤¤¤ متخلينيش نندم خاطر جيت ليك
حسام:كيفاش تولي تعيش عندنا...و فتحية شنوة نقلها...تمشيش توحل طفلة في راسي ؟
انا:فتحية انا نحكي معاها...انت لي لازمك تسمعني و تفهم بالقدا لي باش نقولو
حسام:ايه هاني نسمع...تفضل سي عمر
أنا:باش تبقى معاكم فترة...و كلشي يخصها انا نتكلف بيه...حتى مصروفها
حسام:ملا فاش قام جايبها عندي...متكونش سيرين كبساتك
أنا:¤¤¤¤¤¤ بيا ياخي...سيرين ما عندها حتى دخل
حسام:فهمني الحكاية...خاطر صراحة مخي تسكر عالصباح
أنا:زهرة واحلة في مشكلة
حسام:كنت متأكد لي باش يجينا الهم من وراها
أنا:راجل امها يتحرش بيها
طلع راسو غزرلي مستغرب...محبيتش نحكي...اما حسام لازم يعرف الحكاية باش ينجم يعاوني...عقد حواجبو مستغرب يحكي
حسام:شنننوة...عمر فاش تحكي انت ؟
أنا:لي سمعتو...طفلة هربت عندي باش تمنع روحها...على هذاكا منجمتش نخليها وحدها...و متاكد حتى أنت كنت باش تعمل نفس الشي
حسام:كيفاش عرفت انت ؟
أنا:أنا لي ظغطت عليها باش تحكي...الحكاية محبستش هوني..وصل ضربها...و الطفلة ولات مدمنة على الحبوب تاخوها باش تهدي اعصابها
حسام:تحكي بجدك ؟
أنا:رفعت قضية عليه...و كان الحاكم يعرفو لهي تعيش عندي...مع الاشاعات لي قاعدة دور في لفاك...كلشي يطيح في الما...انا ما نحب حتى شي من طفلة كان اني نمنعها...و نخليها تعيش كيما لبنات لي في عمرها
حسام:و أمها في بالها ؟
انا:إيه حكاتلها قدامي...اما كذبتها...و فوق هذا الكل ضربتها
حسام:لااا عاد...علاه كي سألتك ما حكيت شي
انا:منحبش نضرها حسام...طفلة صغيرة و الحكاية باش تأثر عليها و تخليها تنقص من روحها...اصلا طبيعتها هادية و كان محاولتش تسالها و تطمن عليها...لا تشتكي و لا تحل فمها بحرف
حسام:مممم لاحظت هذا من قبل
انا:باش تبقى عندكم فترة...مع أمك...حتى اذا عملو تحقيق ماهيش باش تتضرر
حسام:أما لفاك بعيدة عليها من هوني
هزيت المخدة ضربتو بيها على راسو...نحكي
انا:و أنت شقاعد تعمل...توصلها في ثنيتك...ماك تتعدا على لفاك باش تمشي تخدم...و الفترة هاذي عطلة..يعني كان تعدا تحقيق على خير...نرجعها عندي
حسام:متكونش حاط عينك على طفلة...نرا فيك راني
أنا:شو ¤¤¤¤¤¤ كيفاش يحكي...ماني باش نعرس بعد شهور يا ساقط
حسام:عالطريق لي تمشي فيه...مش بعيد تتعدا 40 سنة و نلقاك مزال في خلقتي
انا؛قوم...قوم ¤¤¤ أحسن ما نعمل فيك شي
حسام:إمتى جيبها لالة زهرة ؟
أنا:حتى نحكي معاها
حسام:برا أقنع فتحية ساعة
أنا:قوم برك...هاني باش نسبقك
حسام:بااااهي
نزلت اللوطة...لقيت امي فتحية قاعدة عالفطور وحدها باز الفرخ لاخر راقد زادة...جبدت الكرسي و قعدت مقابلها...غزرتلي تحكي
فتحية:ايه شنية خبارك وين غاطس...و خطيبتك لباس
انا:لباس امي...صراحة عندي مشكلة...و مفما حتى وحدة غيرك تنجم تعاوني
فتحية:بالطبيعة...راك في مقام حسام عزيزتي...اطلب لي تحب عليه
انا:عيشك امي
وصل حسام بالوقت...جبد الكرسي قعد بحذاها...خذيت نفس نحكي
انا:صراحة فما طفلة تقرا عندي...من فترة مات بوها...و هوما من ولاية اخرى...حتى حد من عيلتها ما جا لتوا...و الكاري خرجها من دار
فتحية:وه...وينها الطفلة توا
غزرت لحسام...هزلي بكتافو ميعرفش...خذيت نفس نحكي
انا:قاعدة عندي توا...بوها كان يقري معايا من قبل و منجمتش نخليها وحدها...و ماك تعرف انا عايش وحدي و كان الكلام هذا وصل لفاك...نوحل في مشكلة...و حتى من سيرين معجبهاش الوضع
حسام:أمي كان مفماش مشكلة...الطفلة باش تعدي أيامات بحذانا
أنا:لين تتحل الأمور...و نوعدك تمشي في أقرب وقت جيست خاطر خفت عليها و منجمش نأمن عليها مع حتى حد غيركم
فتحية:معناها متفاهمين أنت و هو من قبل...و جايين تخبروني مش تسألو فيا
حسام:أمي
فتحية:أنت تسكر فمك
أنا:أمي اذا
فتحية:و أنت تسكرو زادة
سكتنا زوز...حطت يديها عالطاولة...و غزرتلي تحكي
فتحية:داري مفتوحة ليك من زمان مش من اليوم كهو و ماكش مظطر تشاورني باش جيبها لهوني
أنا:يعني
فتحية:كلامي واضح...هوكا باش نخلي نعيمة تحضرلها بيت الفوق...و انت جيبها في اقرب فرصة...حتى انا فديت وحدي...و الفرخ متاع صاحبك...حلف لا يعرس و يخليني نشوف صغارو قبل ما ربي يهز أمانتو
حسام:أممممي رجعنا لنفس الحكاية...هوكا عمر باش يعرس...بعد أربع شهور و تشوف ولادو...هذا اذا عرس
فتحية:ندادكم صغارهم دخلو يقراو...و أنا نمني روحي برك باش نعرسلكم
أنا:أمي صراحة ولدك هذا...مفماش شكون تقبل بيه أغزرلو شو كيفاش قالب خلقتو عالصباح
حسام:بربي ريتو هذا أمي...أكا اللي يقريهم راكبهم الرعب جرايرو
فتحية:والله لا تتبدلو...باش تبقاو طول عمركم هكا
تبسمت على جنب...و كملت نفطر...قص عليا صوت تليفوني...عقدت حواجبي...كي لقيت تليفون دار يطلب اعتذرت منهم...و هزيت روحي بعدت عليهم...عرفتها هي تطلب...هزيت عليها نحكي
أنا:زهررة
زهرة:و..وين دوا متاعي...وين حطيتو ؟
أنا:زهرة لباس ماهو ؟
زهرة:ويييين حطيتو ؟ راااني باش نهبل...ساعة و انا نفركس عليه...تي وييينو ؟
صياحها ماشي و يعلا...عقدت حواجبي مستغرب خذيت نفس نحكي
أنا:زههرررة اهدااا
زهرة:ياااربي وينو...ويييينو
أنا:زهرة...زهررررة
معادش سمعت صوتها...نسمع كان في صياحها...قلبي دق بالوقت...باز تكون جاتها كريز...صحيح نقصت في دوا...أما نعرف لهي تاخو منو ساعات...خرجت من دار من غير ما نحكي معاهم...خطفت الكرهبة...و طرت لدار...منعرفش على روحي كيفاش وصلت...طلعت نجري...حتى الأصونصير منجمتش نستناها...حليت الباب و دخلت طليت على بيتها...عينيا وساعو كي لقيتها مقلوبة...حتى من فرشها...قربت من صالة...دورت عينيا عليها...حتى هي مخلاتش فيها...عديت يدي على وجهي...وخرت لتالي...حسيت بحركة في بيتي...قربت بالزربة دزيت الباب...نغزرلها باقي تلوج عالبوات...ضيقت عينيا نحكي
انا:زهررررة
تلفتت عندي...وجها أحمر باش يطرشق...شعرها داخل بعضو...قربت مني شوية تحكي
زهرة:وينووو...وين حطيتو ؟
أنا:زهرررة اهدا
هزت يدها ضربتني على صدري...دز فيا لتالي و تصيح
زهرة:أنت هزييييتو مش هكا...أنت سبب...ويينو...وين حطيتو ؟
شديتها من يديها زوز...كبست عليها...نحكي و نصيح فرد وقت
انا:زهههررررة...يززززي
سكتت تغزرلي...و تتنفس بالسيف...دموعها نزلو بالوقت ترمات في حملتي.. رخفت يديا عليها...حطت يديها على جنابي...كبست عليا تحكي و تبكي
زهرة:ا..أمانك عمر...رجعهولي راني باش نهبل
هزيت يدي بالسيف حطيتها على ظهرها...كبست عليها نحكي
أنا:ششش هدي روحك...إنتي باش تكون مليحة
هزتلي براسها لا...كبست عليا اكثر...حسيت بدموعها يزيدو...نزلت بيديا لكتافها...كبست عليها...جبدتها من عندي شوية نحكي
أنا:اهدددا...حاول تهدا
زهرة:ن..نحب عليه توا...أمانك
أنا:لااا ماكش باش تشربو...خاطر باش يضرك اكثر
هزتلي براسها لا...طلعت بيديا لوجها...كبست عليها نحكي
أنا:اغزرلي هوني...انا معاك...ماهو باش يصير حتى شي
زهرة:ع..عمر راسي يوجع فيا...نحس في روحي باش نهبل
أنا:إيجا معايا
قربتلها أكثر...مشيتها معايا...قعدتها عالسرير...و تلفت باش نمشي نجيب الما...حبستني كي كبست على يدي تحكي
زهرة:م..متمشيش
خذيت نفس...وقعدت بحذاها...مديت يدي عديتها على جنبها...جبدتها عندي...حطت راسها على صدري...كبست عليها نحكي
أنا:وفات...حاول تنسى...تو ترتاح
زهرة:خ..خايفة
حطيت يدي لأخرى على يديها زوز..يرعشو مش نورمال كبست عليهم أكثر...نحكي
أنا:هاني معاك...باش تكون مليحة
زهرة:ن..نحب نشرب دوايا توا
غرست يدي في شعرها...نهدي فيها و نحكي فرد وقت
أنا:مرة و أنا صغير تعاركت مع خويا...فشختو في طريحة...مشى شتكاني لبابا
زهرة:شعملت وقتها ؟
أنا:هربت من دار...فركست على بلاصة نتخبى فيها...اما شي...كل لي غادي يعرفوني...ياخي طلعت فوق الشجرة طاح الليل و انا نتفرج عليهم من فوق كيفاش يلوجو عليا
زهرة:مخفتش ؟
أنا:خفت و برشا زادة...أما تعرف إمتى راح الخوف هذا وقت ريت خويا لي ضربتو...يفركس عليا معاهم و يبكي...حتى بابا لي تحلف فيا كان مفجوع...تعرف حاجة عجبني خوفهم عليا...تلهيت نتفرج عليهم لين هزني نوم
زهرة:مبعد شصار ؟
أنا:حليت عينيا على صواتهم...بقاو يلوجو عليا لصباح وقتها برك عيطت عليهم من فوق...أول ما نزلت..حضني خويا...و حتى بابا زادة...دوب حسيت بالأمان ضربني و كليت طريحة أكبر من اللي عطيتها لخويا
زهرة:هههههههه تحكي بالرسمي
انا:مممم للأسف...اما وقتها تأكدت انو عمل اكاكا من خوفو عليا كهو...مش قصدو يضرني بعملتو
زهرة:وين عيلتك توا ؟
انا:ضيعتها
زهرة:كيما أنا ضيعت بابا
انا:مممم
زهرة:أما ماكش وحدك...سيرين معاك...و صاحبك زادة معاك...حياتك هادية...و أنا لي خليتك تغطس في مشاكلي...حتى أمي خلاتني و مسألتش عليا
أنا:شششش...أنا معاك ديما...ما نحبك تحتاج لحتى حد غيري باهي
زهرة:ماكش باش تخليني...حتى كان عرست مش هكا
أنا:مممم مستحيل...نحبك تحط كلامي في مخك و تحفظو...باش نبقى معاك لاخر لحظة
زهرة:عيششك أستاذ
تبسمت على جنب...حسيتها هدات...و نفسها تنظم..نزلت راسي شوية...لقيتها رقدت...قربت منها اكثر...خذيت نفس من ريحة شعرها...حسيت بالذنب اكثر...خاطر باش نخليها عند حسام...منعرفش اصلا كيفاش باش نحل الموضوع معاها بعد الي صار اليوم و الأهم كيفاش تنجم تقاوم هذا الكل وحدها...خاطر متأكد كان تكمل دوا باش يضرها اكثر...جبدت روحي منها شوية...شوية باش متفيقش...سطحتها عالسرير عدلتها و غطيتها رجعت شعرها لتالي بصوابعي...نزلت عليها اكثر بستها من راسها...منعرفش علاه عملت اكاكا...أما اليوم و في اللحظة هاذي بالظبط...تأكدت انو زهرة باش تخلي بلاصتها في حياتي...و مهما صار مانيش باش ننساها...و لا ننسى لي عديتو معاها الكل تنهدت بالقاوي..منجمتش حتى نقوم من بلاصتي...أصلا أول طفلة ترقد على سريري...خدودها و شفايفها حمر باش يطرشقو...حسيت روحي ركزت معاها أكثر...خذيت نفس و هزيت روحي خرجت من البيت...نمشي نلم الحالة...أحسن من الأفكار اللي قاعد دور في مخي توا...بلكشي نتلهى شوية.