زهرة🌸

الحلقة الخامسة و التسعون

🔸️حلقة 95
🔸️هند_تحكي:
لميت اوراقي الكل في يدي...و هزيت روحي خرجت من الكلاصة...شيعت راسي لتالي...نستنشق في النسمة الباردة...اول نهار في المعهد الجديد...حسيتو ياسر رزين رغم البلاصة هوني غير البلاد...المعهد كبير..عباد جديدة و عالم جديد...فما كلشي...اما فرد وقت مفما حتى شي عالأقل بالنسبة ليا انا...رغم كلشي موجود اما مفماش هوني اختي و عشيرة عمري...اللي ما نمشي و نجي كان بيها هي...مفماش اصحاب...و منجمش نعمل اصحاب وسط العباد هذوما الكل...و حتى لي بروف متاعنا مش نفسهم...تنهدت بحصرة...خاطر تمنيت نجي لهوني قبل أما في ظروف اخرى...و مع اسيا كيما حلمنا بالظبط مش وسط الظغط هذا الكل...خذيت نفس و جبدت تليفوني...باش نكلم عمر يروح بيا...أما تراجعت في اخر لحظة...يمكن وقيت باش نعتمد على روحي من اول نهار...منحبش نزيد نقلقو عليا اكثر من هكا...خاصة في الحالة لي وصل ليها...بعدو على زهرة...خلاه عبد آخر كان مش الوقت لي يعديه ريحان...منصدقش لهو عمر خويا...اصلا معادش نعرف شنية لي قاعد يصير بالظبط و لا كيفاه وصل للي هو فيه...عمرو ما حكالي عالفيلا لي عندو و لا سوسيتي و الكراهب هذوكا الكل...الكل ولينا عايشين في دوامة...برشا تساؤلات قاعدة تدور في راس كل واحد فينا و أكبر ضحية بيناتنا هي ريحان لي بقات بعيدة على امها...رجعت شعري لتالي...مع النسمة القوية لي ضربت...و رميت ساقي...باش نشق الكياس...اما في لحظة فقدت توازني..مع الضربة القوية لي حسيت بيها...طحت عالارض بالوقت...و الاوراق فلتت من يدي...كبست بيدي على حافة الرصيف...و هزيت راسي نغزرلو...توا استوعبت إني تضربت بالموطو نزل بالزربة...و حط يديه الزوز على راسو...نحى الكاسك جات عيني في عينو...رجع شعرو لتالي...و قرب مني يحكي
هو:لباس ماهو ؟
عديت عينيا على وجهو...و مديت يدي بالسيف حطيتها على زندي...غمضت عينيا بالوقت من الوجيعة لي حسيتها...حتى جمبي و ساقي معادش حسيت بيهم هزيت راسي شوية...كي حسيت بيه نزل عليا اكثر...حط يدو على كتفي يحكي
هو:لباس مدموزال
حليت عينيا مروهجة...و وخرت شوية لتالي...جبدت روحي منو نحكي
انا:ف...فاش تعمل ؟
هو:اهدا مدموزال...مقصدتش إني نخوفك...جيست نحب نطمن عليك و كهو
غزرت لعينيه بالظبط...من الوجيعة لي حسيتها دوب نجمت نركز فيهم...لونهم...لونهم هزني لبعيد في لحظة لدرجة قلبي خض بالقاوي...منحبش...منحبش نفكر فيه جملة...و منحبش نشوف وجهو في كل حد يعرضني فقت من سرحتي على صوتو يحكي
هو:جاوبني...تحس في روحك سافا ؟
هزيتلو براسي لا...و دورت وجهي نغزر للأوراق لي تمرمدو في الأرض...هز روحو شوية...لمهم الكل في يدو...و عاود رجعلي يحكي
هو:تحب نهزك للكلينيك ؟
انا:ما نحب منك شي...ابعدني و كهو
هو:منجمش نخليك في الحالة هاذي...بعد ما ضربتك لحظة برك متتحركش باهي
انا:باهي
حط الأوراق في يدي و هز روحو وقف...خرج لطريق شوية...حبس طاكسي...ورجع بالزربة...عدل الموطو متاعو...و قربلي يحكي
هو:هيا قوم معايا
أنا:علاش ؟
هو:نهزك لكلينيك
انا:منحبش
هو:مانيش نشاور فيك
أنا:شننوة ؟
نزل عليا أكثر...لين غطاني بجهامتو...كبس على كتافي في لحظة...وقفني بالوقت...معرفتش نركز مع تصرفو الهمجي و لا مع الوجيعة لي نحس فيه...كبست بيدي على يدو...منجمتش نعفس على ساقي من الوجيعة هزيت راسي شوية قحرتلو نحكي
انا:شنية تستخايل في روحك تعمل ؟
هو:هيا أركب ساعة
مد يدو حل الباب...ركبني و عاود سكرها...دورت راسي للبلار...نغزرلو هز صاكي و الاوراق...و الكاسك متاعو ورجع ركب بجمبي يحكي
هو:هزنا لأقرب كلينيك عيشك
أنا:لحظة نحب نهبط
هو:هيا خويا أمشي عيشك
أنا:نحب نهبط قتلك
قحرلي و مد يدو حطها على كتفو باش يمشي...أول ما خدم الكرهبة...فكيت صاكي من يدو...حطيتو على حجري...حطيت الأوراق داخلو بغزول..ضحك على جنب و دور راسو للبلار...ينقر بيديه عالكاسك متاعو...غمضت عينيا بالقاوي...مش مستحملة هذا الكل مع الوجيعة لي كنت نحس فيها...خذيت نفس و هزيت راسي قحرتلو نحكي
انا:ميسالش تحبس
هو:ديزولي
كبست على صاكي أكثر...نحب نكلم عمر و فرد وقت خايفة من ردة فعلو...كان يعرف لي صار...اذا انا من اول نهار عملت هكا في روحي و بلبزت دنيا...شنية باش يصير وقتها...كمل عليا حضور العبد الغريب لي قدامي توا...لابس النوار من فوق للوطة...شعرو داخل بعضو بصفة غريبة زادة...ريحة برفانتو قوية لدرجة سكرت عليا النفس...مديت يدي بالسيف...حليت البلار...و تكيت راسي لتالي...دخلت بعضي و منجمتش نستوعب لي قاعد يصير جملة...منعرفش كيفاه وصلنا...حليت الباب قبل ما يهبط هو...و مديت ساقي نزلت...في لحظة لقيتو في وجهي...هزيت راسي قحرتلو نحكي
انا:تنجم تمشي على روحك...تو ندبر راسي وحدي
هو:هيا أمشي قدامي
أنا:شو على أكا المنظر...شنية تستخايل في روحك ياخي...نورمال في مخك أنت...ديجا مانيش ماشية...برا داوي روحك أنت...الهم هذا مكفاش لي عملتو فيا...تزيد تتأمر عليا من فوق...بقى كان دخلني بالسيف عليا
كبست عالباب...و تلفت باش نرجع نركب...قرب مني شوية يحكي
هو:اش خص...مدام هذا هو الحل الوحيد توا
قبل ما نتلفت و نفهم...لي قاعد يقول فيه...لقيت روحي بين سما و أرض...مفقتش كيفاه هزني في لحظة..دورت وجهي مصدومة...جات عيني في عينو...دقيقتين ما نجمت نقول فيهم شي من الصدمة لي حسيتها...فقت من سرحتي على صوتو يحكي
هو:مرسي عالاقتراح
مديت يدي ضربتو لصدرو...نعافر فيه رغم الوجيعة لي نحس فيها...و نصيح فرد وقت
انا:نزززلني يااا هم...هبطني...الله لا تربحك
هو:استنى لحظة تو نرجعلك عيش خويا
يحكي مع تاكسيست و متلفني...دورت راسي عالعباد لي تغزرلنا مصدومة...كبست على كتفو و عاودت غزرتلو نحكي معاه بالسياسة
انا:اسمع يا سيد...نزلني أحسنلك...هاني نقلك
تبسم على جنب...و كمل يمشي داخل للكلينيك و يحكي فرد وقت
هو:تهدد فيا إنتي ؟
انا:مممم نهدد فيك...و انا مستغنية على مزيتك...كان مجيتش اعمى مانيش في الحالة هاذي توا
حطني عالكرسي بنطرة..عيطت من الوجيعة لي حسيتها في جنبي...كبست على طرف الكرسي...و قحرتلو نحكي
انا:زايد مجودر و متحشمش
نزل عليا في لحظة...حط يدو عالكرسي بحذا راسي...و غزرلي يحكي
هو:ششش اسمعني...مجبورة تتحملني لين نطمن عليك و نمشي على روحي
انا:يكثر خيرك...تفضل من توا
هو:منحبش ندخل في نقاش مع فرخة قدك...ملا خليك ساكتة...أحسن ليا و ليك
انا:بربي...ميزيتش من الحالة لي وصلتني ليها
وخر لتالي...يستغفر...و يحكي مع روحو...نفخت بالقاوي و سكرت عينيا من الوجيعة...ما حسيت كان بالطبيب و زوز فراملة عند راسي...عاونوني وقفت...دورت راسي غزرتلو...واقف على جنب...يتبع فينا بعينيه...منعرفش كيفاه نجمت نوصل للبيت...تسطحت عالسرير بالوقت ارتحت شوية كي مخالطش عليا...غزرلي طبيب يحكي
طبيب:باش نعملو اشعة خفيفة...نطمنو بيها اكثر
انا:ل..لباس عليا
طبيب:متخافش...مش باش نطولو عليك
هزيتلو براسي ايه...و سلمت أمري لربي...بعد ما عدا عليا...جاني الفرملي بالكرسي...يحكي
هو:هيا مدموزال
انا:شنية هذا ؟
هو:باش نجم نهزك تعمل الأشعة متاوعك
انا:نجم نمشي وحدي
طبيب:هيا عيش بنتي...منحبكش تعب روحك...و اكيد تخرج من هوني على ساقيك
نفخت بالقاوي...و هزيت روحي شوية...قرب مني الفرملي باش يعاوني...قحرتلو نحكي
انا:نقعد وحدي
هزلي براسو ايه...تقويت على روحي و قعدت عالكرسي قرب مني يدز فيا...مس مستوعبة وين كنت و وين وليت...ناقصة انا هذا الكل...اول ما خرجنا من البيت جات عيني في عينو...مكسل عالكرسي و حط ساق على ساق...يلعب بتليفون...عامل مولا دار مش هوني كرزت عليه اكثر...الهامل...الساقط...كبست عالكرسي بيديا زوز...باش نقوم...حبسني الفرملي بيدو...و قص عليا هو كي وقف...قرب مني بالزربة...وقف في وجهي يحكي مع طبيب
هو:لباس ماهو ؟
طبيب:باش ناخو اشعة للمدموزال...باش نطمنو لي مفما حتى خطر عليها
هو:باهي...شنية نجم نعمل ؟
مديت ساقي شوية...ضربتو بكل قوتي لساقو...وخر لتالي مروهج...و نزل راسو يغزرلي مستغرب...تبسمت نحكي
انا:أبعد و كهو...متعطلناش أكثر
حسيتو باش يفقد أعصابو...من ملامح وجهو لي تبدلت و قبل ما ينطق بحرف واحد...دورت وجهي...للفرملي نحكي
انا:دز...دز و أزرب روحك...منجمش نضيع وقت اكثر من هكا
غزرلي مبهم...قحرتلو...دز الكرسي من غير ما يزيد كلمة...منعرفش كيفاه وصلنا...نحس في روحي باش نطرشق...فرد وقت نطلب في ربي...انو كلشي يكون لباس...اول ما كملت...رجعوني لبيتي...و باقي هو قاعد عالكرسي...نفخت بالقاوي..و دورت وجهي عليه...خالط عليا طبيب...يتفحص في تصاور الاشعة و يحكي
طبيب:كلشي لباس مدموزال...جيست رضوض صغيرة في بدنك...ترتاح منها مع الوقت
انا:نجم نخرج معناها ؟
طبيب:سامحني...أما مش قبل ما نكمل خدمتي
تنهدت بحصرة...و خليتو يكمل...نحس في بدني الكل يوجع فيا..حتى ظقة الوريقة محسيتش بيها و الوجيعة نقصت معاها بالوقت...لدرجة منعرفش كيفاه هزني نوم ورقدت...حليت عينيا شوية شوية...نثبت في وجهو لي مقابلني...للحظة كنت باش ننسى وين انا و لا كيفاه وصلت لهوني...هزيت روحي شوية تقعدت...و حطيت يدي على راسي نتذكر لي صار...قرب مني شوية يحكي
هو:لباس توا ؟ كيفاه تحس في روحك ؟
انا:ق..قداش الساعة توا ؟
هو:17:00
انا:شنوووة ؟
هزيت راسي نغزرلو مروهجة...أول وحدة جات في بالي ريحان...خرجت بكري من المعهد على خاطرها...على خاطر أول مرة نخليها مع حد براني عليها...و منعرفش إذا باش تهتم بيها و لا لا...و فوق هذا وعدي لزهرة...اني باش نحافظ على بنتها كيما بنتي...من الأفكار لي دارت في راسي...نسيت حتى الوجيعة لي في بدني...طلعت راسي على صوتو يحكي
هو:عمر من بكري يكلم فيك
هزيت حاجبي مستغربة...كبست بيدي على طرف السرير نحكي
انا:من وين تعرفو عمر ؟
مد يدو شوية...تصدمت و انا نغزر لتليفوني في يدو منعرفش كيفاه نطرت من بلاصتي...فكيتو من يدو و رجعت لتالي نحكي
انا:متحشمش ياخي...شكون عطاك الحق تحل صاكي
هو:ظاهر تحير عليك
ترمى عالفوتاي...و تكا لتالي يغزرلي...منعرفش من وين يجيب فيها كمية الوقاحة لي عندو...قحرتلو نحكي
انا:باش تبقى مقابلني هكا ؟
هو:اعتبرني مش موجود
رجعت شعري لتالي...أكثر شي يقهرني...وقت الواحد يحاول يجبد عليا بالمرتاح...نزلت راسي نغزر لتليفوني منحبش نحير عمر معايا...فرد وقت يلزمني نرجع لدار توا...خذيت نفس نحكي
انا:تنجم تطلبلي طاكسي...أحسن ما قاعد مقابل وجهي
هو:تدلل
انا:على أساس عامل فيا مزية...مش أنت لي ضربتني بالهم متاعك
هو:كان ثبت شوية قبل ما ترمي ساقك...مكنتش وصلت للحالة هاذي
انا:معناها انا الغالطة ؟
هو: Malheureusement
أنا:بربي
هو:ياخي إنتي ديما هكا ؟
انا:شتقصد بديما هكا ؟
هو:متنجمش تسكت
أنا:لا نجم...أما صراحة انا عندي فوبيا من العباد لي كيفك أنت
هو:تليفونك ينوقز
كبست على يدي نهدي في روحي...و غزرت لعمر لي باقي يطلب و يعاود...خذيت نفس و هزيت عليه نحكي
أنا:أهلا يا روحي
عمر:هند وينك ؟
أنا:في طريقي لدار
هز حاجبو يغزرلي...قحرتلو...باش ما يقول حتى كلمة خذيت نفس و انا نسمع فيه يحكي
عمر:لباس ماهو ؟ شبيك متهزش عليا
انا:حتى شي...مسمعتوش كهو الحكاية...شديت طاكسي و هاني في ثنيتي للفيلا...منحبكش تتقلق عليا باهي
عمر:باهي هاني نستنى فيك...خلي تليفونك قدامك
انا:باهي
علقت عليه...و هزيت روحي قعدت على طرف السرير نحكي
انا:لازمني نمشي توا
هو:باهي
عديت يدي على وجهي...سمعتو كي طلب طاكسي خذيت نفس و طلبت المربية متاع ريحان...أحسن شي خذيت نومروها قبل ما نخرج...هزت عليا بالوقت خذيت نفس نحكي
انا:أهلا هدى سافا ؟
هدى:لباس مدموزال هند
انا:ريحان كيفها ؟
هدى:راقدة
انا:عندها سخانة ؟
هدى:لا
انا:باهي رضعت بالقدا...بدلتلها الكوش متاعها ؟
هدى:طمن...عملت كلشي وصيتني عليه
انا:عيشك...رد بالك عليها...شوية وقت و نوصل
هدى:باهي طمن
نزلت يدي...و تلفت عندو نغزرلو...حسيت غزرتو تبدلت في لحظة...و فما كلام يحب يقولو...تعدلت في قعدتي نحكي
انا:تحب تقول حاجة ؟
هو:يظهرلي طاكسي وصل
انا:أحسن
تقويت على روحي...ووقفت...قرب مني شوية يحكي
هو:تحب نعاونك
أنا:لا عيشك
حطلي كبوطي في يدي...و وخر خطوة لتالي...حاولت نلبسو أما شي...قرب مني فكو من يدي...و عاوني نلبسو من غير حتى كلمة...جبد روحو شوية لتالي يحكي
هو:تنجم تمشي ؟
هزيتلو براسي ايه...وخر لتالي...يستنى فيا...لميت طرف القوة لي عندي...هزيت صاكي و خلطت عليه...نمد في الخطوة بالجهد...أول ما وصلنا...حلي الباب ركبت..تكيت لتالي.. باش نحكي مع تاكسيست...أما استغربت كي حل الباب...و ركب بجنبي...تلفت عندو...قحرتلو نحكي
انا:باش تجي معايا لدار ياخي ؟
هو:مش كان تنقص أسئلتك أحسن
انا:الصبر يا ربي...تنجم تمشي عيش خويا
نحكي مع تاكسيست و نقحر للهم لي قاعد بجنبي غزرت لساعة...و طلعت راسي نحكي
انا:أزرب شوية امانك
هو:وين تحب نحطك مدام ؟
جيت باش نحكي...قص عليا هو...كي حطلو فلوس في يدو يحكي
هو:حطني هوني...و وصل المدام وين تحب
انا:حمد الله يا ربي...اقف...اقف خليه ينزل
هو:رد بالك على روحك و سامحني مرة أخرى
انا:سامحتك...أما بربي لا عاد تخليني نشوف منظرك مرة أخرى
هو:حتى إنتي حاول متظهرش في طريقي مرة أخرى
حل الباب و نزل...في بلاصة قريبة وين ضربني قبيل ظاهر باش يرجع للموتور متاعو...خذيت نفس نحكي
انا:هزني لشارع ¤¤¤¤¤¤¤ و ازرب شوية عيشك
هو:باهي
تكيت راسي عالبلار...مش مصدقة لي تعدا على راسي اليوم...نحس في بدني الكل يوجع فيا...نحسب في الوقت بالدقيقة و الدرج...اول ما وصلنا...نتلفت باش نهز صاكي...جات عيني عالكاسك متاعو...غمضت عينيا بالقاوي...من وين هد عليا الهم هذا منعرفش...هزيتو في يدي و نزلت...اول ما وصلت حلتلي مليكة...غزرتلي مستغربة تحكي
مليكة:لباس عزيزتي ؟
انا:لباس مليكة...شد هذا عليا
مليكة:شنية هذا ؟
انا:حطو في بيتي...مبعد نحكيلك...ما تخلي حد يشوفو
مليكة:باهي
أنا:وينو عمر ؟
مليكة:في بيت ريحان
انا:هيا عاوني نطلع...قبل ما يشلق بشي
مليكة:باهي...هيا فيسع
استندت عليها...و طلعت الدروج وحدة وحدة...نحمد ربي ما لقيت حد لوطة...و خاصة سلمى..منحبش حتى نشوف منظرها...اول ما دخلت لبيتي...نحيت كبوطي عطيتو لمليكة...عدلت شعري...و بدلت الخلعة متاعي دورت راسي...عالباب لي تحل...بدلتها بضحكة...كانو ما صار شي...قربت منهم نحكي
انا:فاقت روح عمتها هي...فاقت بنوتي الصغرونة
عمر:وين كنت ؟
هزيت راسي غزرتلو...عرفت لماهوش باش يصدقني...و لا حتى نجم نعديها عليه...خذيت نفس نحكي
أنا:حتى شي عمر...وحلت في سيركيلاسيون...حتى كان جيت أنت..باز رانا طولنا...و زيد أول نهار...حبيت نتعرف عالمعهد اكثر
عمر:نحسب روحي صدقتك
أنا:مممم باهي...نجم ناخو صغرونتي منك ؟
قربها ليه أكثر...باسها...و حطها في حضني...قربتها ليا نشم في ريحتها لي ستانست بيها...دوب تبسملي و خرج من البيت...حطيتها في نص السرير بالزربة منجمتش نحملها أكثر...من الوجيعة لي في يدي...قعدت بجمبها...نغزرلها...شوفتها برك تخليني نسى كلشي تعدا عليا...و أكثر شي نخمم فيه...هي زهرة كيفاش متحملة بعدها...بين ليلة و نهار حياتنا دخلت في حيط...و أكثر شي قاهرني لتوا...إني صدقتو...فرات و لا مراد..معادش تفرق عندي شنية اسمو...أما مستحيل نجم ننسى لي عملو فيا...مستحيل نجم نتعدا لي صار بالساهل...اصلا بعد لي عرفتو عليه...معادش نعرف اذا انا بالحق حبيتو و لا حبيت الشخص لي خلاني هو نشوفو...حبيت فرات مش مراد و يمكن ماهوش حب جملة...بالرسمي معادش نعرف روحي...و لا شنية نحب بالظبط...تنهدت بحصرة و نزلت راسي نغزر لريحان...أحسن شي...عمر يرقدها معاه كل ليلة...عالأقل يحس لزهرة قريبة منو...أصلا منعرفش كيفاه نجم نغزر لوجهو كل مرة...من غير ما نخبرو بالحقيقة...و اللي صار في زهرة ليلتها...معادش نعرف اذا لي نعمل فيه صحيح و لا غالط...اما ما نجم نقول شي مدام حياتو في خطر...يمكن سكوتي توا أحسن حاجة نعملها...واثقة أنو زهرة ماهيش باش تضرو تكيت لتالي...نغزر للكاسك متاعو...لي حطاتو مليكة عالأرض ورا الكوافوز..كبست على يدي بغزول..منعرفش من وين طلعلي الهم هذا...و زيد من فوق يزيد يتأمر و مش عاجبو...كنت متأكدة لهوني طايرين اكثر..أما مش لهدرجة عاد..هزيت روحي بالسيف...حليت القارد روب نحب نلبس حاجة خفيفة نرتاح بيها...نحيت الخلعة...و غزرت لروحي في المرايا...عديت صوابعي على زندي أزرق مش نورمال حتى من جنبي...نفس شي...خذيت نفس و لبست بيجامتي كيما جا...حليت صاكي...باش نشوف شنية صار في الاوراق...جات عيني عالكيس لي موجود الداخل...جبدتو في يدي...نغزر لدوا...ضيقت عينيا مستغربة...إمتى لحق حطو و شبيه مخبرنيش عليه تبسمت بلا ما نحس...هوكا طلع ينفع في شي حتى انا بحاجتو و ما نجم نطلب من حد...و لا نخلي حد يعرف باللي صار...أصلا من غير عمر و مصطفى و مليكة مكنتش نجم نزيد دقيقة اخرى هوني...أصلا أمي و بابا...كلشي لاهيين بيه توا...وين عمر ؟ فاش يعمل باش يرجع زهرة و لا لا ؟ و الاهم كيفاش يقنعوه يحب سلمى لحتى هي متحبش تقتنع أنو عمر مستحيل يحبها...و مستحيل يحب وحدة اخرى من غير زهرة حاجة ولات واضحة لينا الكل...حتى هو يعرف روحو مينجمش يكمل حياتو من غيرها...و اللي هو فيه توا...و اللي يعمل فيه...على خاطرها هي و كهو...أصلا كلشي نحب عليه توا...يرجعو لبعضهم و لبنتهم...نحب خويا عمر يرجعلنا و كهو...رجعت شعري لتالي و دهنت المرهم على ضربات لي في بدني...سمعت الباب يدق...عدلت روحي...و رجعتهم لصاكي...نحكي
انا:أدخل
هزيت راسي نغزر لمليكة...داخلة بالصينية...تبسمت بالوقت...هي كهو لي تحس بيا...حتى انا نهار الكل ما حطيتش لقمة في فمي...حطتها عالتابل دونوي تحكي
مليكة:لباس توا ؟
انا:لباس مليكة...جيست شوية وجيعة و كهو
مليكة:شصاار ؟
انا:فما شكون ضربني بالموتور
حطت يدها على فمها مصدومة...هزيتلها بيدي باش ما تقول شي...نزلت يدها تحكي
مليكة:كيفاه ؟
انا:هامل متاع وذني...منعرفش منين خرجلي...و صارت الحكاية...بعدها هزني للكلينيك و هاني توا قدامك
مليكة:هند عزيزتي...رد بالك المرة الجاية...هوني مش كيما كنت في البلاد قبل
انا:باهي مليكة باهي...قولي حطيت عينك عالمربية الجديدة ؟
مليكة:سافا...تلهات بريحان بالقدا...متخافش
انا:باهي برشا...عيش اختي
مليكة:مبينتاناش يا روحي...هاني لوطة...كان احتجت شي كلمني
انا:ما تخبر حد باللي صار معاايا
مليكة:أكيد طمن
أنا:عيشك
أول ما خرجت...كليت لقمة...و غزرت لريحان لقيتها رقدت...تبسمت بالوقت...محلى زينها الصغرونة هاذي عديت صوابعي على خدها...نحكي
أنا:صدقني يا روحي...باش نعمل لي نجم عليه...المهم أنك تكون مع أمك و بوك...صدقني كلشي باش يكون مليح
خطفت بوسة خفيفة منها...تقويت على روحي و هزيتها شوية حطيتها بجمبي...لفيتها في الغطا متاعها أكثر...و تسطحت لتالي...أول ما غمضت عينيا هزني النوم بالوقت...يمكن من التعب لي تعدا على راسي اليوم...من اول نهار حطيت فيه ساقي برا...كليت على راسي لين قلت يزي...و خلي كان عرف حد باللي صار كان مزلت في تحقيقات لتوا...ووحلت في سؤال و جواب متاع سي عثمان...على اساس هو مغفور من الذنوب...توا بالظبط...نحب نرتاح و كهو...على خاطر متاكدة اللي جاي اصعب من اللي تعدا ببرشا...و حتى حد فينا ما يعرف شنوة لي مخبي...و لا وين باش ترصيلنا اكثر...اما كلشي نحب عليه...انو عمر و مصطفى معادش يتعذبو اكثر من هكا و كهو.