🔸️حلقة 77
🔸️عمر يحكي:
هزيت راسي على صوت الحرس لي ينادي باسمي تعدلت في قعدتي...عاود غزرلي يحكي
هو:عمر بن قاسم عندك زيارة
خذيت نفس...و هزيت روحي وقفت...نمد في الخطوة بالسيف...جمعة تعدات عليا هوني...حسيت روحي في فراغ كبير من غير ما نراها و لا نسمع صوتها...نفسيتي تعبت اكثر...كي بعدت عليها...تفكيري الكل محصور فيها و في بنتي...منعرفش علاه فما احساس يقول انو ماهيش مرتاحة...و فما حاجة كبيرة صارت لبرا...و الا مستحيل حد ما يجي عندي لتوا...زادة استغربت الزيارة متاع توا لي على غفلة...اصلا مش بعيد يكون مراد...و كيما توقعت بالظبط...اول ما تحل الباب...لقيتو قاعد عالطاولة...هزني و حطني...كانو متشمت فيا...اما مش عليا الحركات هذوما...و مش انا لي نخليه يستفزني بتصرفاتو...تبسمت على جنب نحكي
انا:منجمتش تصبر عليا ياخي
مراد:الله غالب...اللعب يحلى معاك انت و كهو...اما طمن هاذي اخر مرة تراني فيها
انا:منظنش...مزال باش نتقابلو و برشا زادة
مراد:تفضل اقعد
قربت منو جبد الكرسي بيدي قعدت...هز يدو شاور للحرس باش يخرج...تكيت لتالي نحكي
انا:هات لي عندك من تالي...معنديش خلق باش نبقى مقابل وجهك
مراد:اكيد مانيش باش نطول عليك
غزرلي ندرا كيف...و حط يدو على دوسي...قربو مني يحكي
مراد:هاذي باش تكون اخر حاجة تجمعنا سي عمر
غزرتلو و نزلت راسي نثبت في دوسي...خذيت نفس و مديت يدي حليتو...عديت عينيا نقرا فيه...حسيت الدنيا وقفت بيا...عمري ما ستخايلت نقرا الورقة هاذي و لا نوصل نطلق زهرة...و لا مرة فكرت اني نجم نسلم فيها و معادش فما شي يربطنا ببعضنا... دقايق عديتهم نقرا في اللي مكتوب...منعرفش قداش عاودتو من مرة و منعرفش زادة شنية قصدو و شنية باش يكون مقابل اني نطلقها...قص عليا سرحتي يحكي
مراد:نعرف لصعيب تستوعب هذا الكل فرد مرة...شرايك نوضحلك انا احسن
طلعت راسي غزرتلو...تبسم على جنب...و كمل كلامو يحكي
مراد:بعد ما توقع عالاوراق هذوما...نكون استرجعت امانتي من عندك...و معاد فما حتى شي يربطنا ببعضنا
ضربت يدي عالطاولة...و هديت عليه...جبدتو من كول الفاست متاعو نحكي
انا:اقسم بالله...نهايتك على يدي ياااا مرااااد
تحل الباب بالوقت...دخل الحرس يجري...و يحكي
هو:فاااش تعمل ياخي هبلت ؟
مراد:مفما شي...تنجم تخرج
هو:اما
مراد:قتلك اخرج
اول ما خرج...كبست عليه اكثر...طلع راسو غزرلي ندرا كيف يحكي
مراد:مظطر توقع عالاوراق هذوما
انا:و كيفاش باش تجبرني تراه ؟
مراد:هدي روحك ساعة...شبيك ديما على اعصابك
دزيتو شوية لتالي...و رجعت لبلاصتي...غمضت عينيا بالقاوي و عاودت حليتهم نحكي
انا:شنية المقابل المرة هاذي ؟
مراد:هاك بديت تفهم قواعد اللعبة
انا:حل جلغتك و رتحني من وجهك
مراد:كان متوقعش عالاوراق هذوما...تنجم تخسر صغيرك...و عيلتك...و كلشي يربطك بالدنيا لي برا
انا:نعتبر هذا تهديد ؟
مراد:لا هذا لي باش يصير...كل ما انت بعدت عليها...هي باش تكون بخير...اما مدامها ملكك و على اسمك صدقني باش تتعذب اكثر من اللي تتخيل...الورقة هاذي باش تحرر زهرة منك و من العذاب اللي باش يجيها
بقيت نغزرلو...للحظة وحدة استوعبت وين يحب يوصل بالظبط...باش تربح عدوك لازمك تخمم كيفو...كان انا وقعت عالاوراق هذوما توا...يمشي في بالو لي نجم يفك زهرة مني...هاذي الطريقة الوحيدة لي تخليه يصدق انو غلبني...خذيت نفس نحكي
انا:هات ستيلو متاعك
جبدو من مكتوبو...باش يحطو في يدي...جبد يدو شوية يحكي
مراد:اما قبل هذا الكل...باش تقنع زهرة توقع الاوراق هذوما
انا:علاه متنجمش تقنعها انت ؟
مراد:باش تقنعها و لا لا
انا:عندي شرط قبل هذا الكل
مراد:هاك طلعت تعرف تساوم
انا:المرة هاذي باش تخليني ناثق فيك
مراد:شتقصد ؟
انا:ماكش باش تقرب من زهرة...و لا حتى تمس شعرة منها...مدامها حبلة...طول الفترة هاذي مجبور تبقى بعيد عليها
مراد:خايف على صغيرك ياخي ؟
انا:ميهمكش برشا على شكون خايف...انت مستعد باش تكون قد كلمتك...من هوني لين يجي صغيري لدنيا ماكش باش تحط يدك عليها
مراد:توقعتك تحبها اكثر من هكا
انا:مستعد و لا لا ؟
مراد:باش تقنعها توقع الاوراق هذوما ؟ و تخرج من حياتها بالسياسة...و تخليها تكرهك ؟
هزيتلو براسي ايه...تبسم ندرا كيف و حط ستيلو في يدي...كبست عليه بكل قوتي...اللي باش نعملو توا...في مصلحتها هي...باش نحاول قد ما نجم نخليه يبعد عليها...خاصة في الفترة هاذي...و من هوني لين تولد باش يلقاني في وجهو...خاطر اللي ميعرفوش هو توا انو باش نقدم طعن...و الحبس لي ماشي في بالو باش يشدني فيه عامين..تو نخرج منو في ست شهور عالاكثر...تعدات صورتها بين عينيا ليلة عرسنا...و كتبان صداقنا...عمري ما توقعت باش نصحح ورقة اخرى تخليني نفسخ العقد لي وقعتو بيدي ليلتها...نعرف باش توجعها الفازة برشا...اما توا مجبور...مجبور باش هي تعيش..باش بنتي تعيش زادة...مجبور نعمل هكا باش نربح وقت لينا زوز...خذيت نفس ووقعت...كاني وقعت على قرار موتي...حطيتو من يدي و غزرتلو نحكي
انا:باش نعتبر روحي خذيت وعد من راجل
مراد:لي متعرفوش انت...انو انا مستحيل نحط يدي عليها بلا رضايتها...انا و انت نعرفو بالظبط شنية زهرة بالنسبة لينا...اما توا عندك ما اهم...انا باش ناخو زهرة و انت تاخو ولدك و لا بنتك...و هكا نكونو تصافينا
انا:قتلك من قبل و باش نعاودلك توا...انا عمري ما نعتبر زهرة لعبة...و لا حتى باش نستغلها في مصلحتي...حتى كان نعرف روحي باش نموت...حط هذا في مخك...و الثنية مزالت طويلة...و اكيد باش نقعدو برشا مع بعضنا اليمات الجاية
مراد:المرة الجاية باش تكون عندك اخر قعدة مع زهرة رد بالك تحاول تلعب معايا...و لا تلعب بمخها...وقتها متنجمش تتصور شنية نجم نعملو...خاصة و الصغير لي في كرشها مقلقني برشا
هزيتو و حطيتو بعينيا...و تبسمت على جنب...نحكي
انا:ماكش باش تمس شعرة منهم متأكد...كان تمس الصغير لي في كرشها...تكون حكمت على روحك و على اللعبة متاعك المسخة...وقتها تكون قتلت زهرة بيدك في تالي ماهوش صغيري وحدي
دزيت الدوسي بيدي...و هزيت روحي وقفت...قربت من الباب...وقفني يحكي
مراد:قتلك من قبل...انو في اللعبة هاذي فما رابح واحد كهو...و هو انا...بالمقابل انت الخاسر الوحيد سي عمر
تبسمت من غير ما نتلفتلو...اصلا مش وقت كلام توا...مدام يحب يلعب بشروطو...حد ماهو باش يوقفو خاطر الحقيقة الوحيدة...هو قاعد يلعب بشروطي انا و كهو...مديت يدي دقيت الباب...حلي بالوقت...خذيت نفس و خرجت...رجعت للمهجع...دخلت لتوالات بالوقت نحس في راسي باش يطرشق...غسلت وجهي اكثر من مرة...منعرفش من وين جبت القوة هذيكا...لي خلاتني نوقع على الاوراق هذيكا...لتوا مش مصدق لي ماهيش باش تولي على اسمي...اما كلشي يهون على خاطرها و خاطر الصغير لي في كرشها...طلعت راسي نغزر لروحي في المرايا...جات عيني على واحد من اللي معانا يغزرلي و يتبسم باستهزاء...ضيقت عينيا و تلفت عندو باقي يغزرلي...قحرتلو نحكي
انا:لباس ماهو ؟
هو:لباس...لباس صاحبي
انا:حاول تلتهى في امورك المرة الجاية باهي
هو:باهي...ساعة معنديش وقت باش نواسي العباد لي كيفك
انا:بربي ؟
جا باش يحكي...جبدتو من مريولو بيديا زوز...و ضربتو براسي...طاح لتالي مروهج...عدا يدو على خشمو يمسح في دم...هزيت يدي في وجهو نحكي
انا:لعب متاعك مش عليا انا...متخلينيش نحطك في راسي احسنلك
هز روحو باش يضربني...شديتو من يدو و عاودت ضربتو...خليتو دايخ في بلاصتو...غسلت يديا...و خرجت عندهم...خلط عليا مدمدم...يصيح عالحرس قعدت على سريري...نسمع في الحرس يصيح
هو:شكووون عمل فيك هكا انطق ؟
قص عليه صوت دوب يتسمع هوني...اما ظاهر الكل يخافو منو...يعقوب نفس الراجل لي ريتو اول ما دخلت لهوني...اصلا مستغرب كيف حد كيفو علاش هوني
منعرفش اذا عدا عمرو في الحبس و لا دخل جديد...اما الكل عاملو حسابو...و طول الفترة هاذي لا جاب ثنيتي و انا نفس شي...اصلا حسيتو محملش وجودي هوني و لا انا طايق حد من الاساس...طلعت راسي نغزرلو يحكي
يعقوب:مفما شي...الولد هذا ديما بعمايلو
هو:ميسالش يقولي شكون عمل فيه هكا...تو نشوفو خدمتنا معاه
يعقوب:احكي ولدي...قولو شكون عمل فيك هكا
تلفت غزرلي...و عاود غزر ليعقوب...و منو للحرس لي واقف يستنى فيه...عدا يدو على خشمو...يحكي
هو:حتى حد...طحت في التوالات
الحرس:ملا كيما طحت...ريقل بقية امورك وحدك
سكر الباب في وجهو و مشى...تبسمت على جنب من حالتو...نسمع في يعقوب يحكي معاه
يعقوب:برا اغسل حالتك...و المرة الجاية اعرف كيفاش تتصرف
هو:اما..
هز يدو سكتو بيها...نزل راسو و مشى على روحو خذيت نفس و تسطحت لتالي...منجمتش حتى نحكي معاه و نستفسر منو علاه عمل هكا...الغريبة من هذا الكل...انو كل حد هوني يخاف منو و عاملو الف حساب محاولتش نركز عالحكاية اكثر...مديت يدي جبدت البراصلي متاعها من مكتوبي...كبست عليها...اكثر شي نخمم فيه توا ردة فعلها على الحكاية..نعرف لي ماهيش باش تتقبلها حتى طرف...نعرف لي باش تتعب و يصير فيها...اما اكيد مانيش باش نخليه يستغل فرصة طلاقنا لصالحو بالعكس...انا باش نستغل الفرصة هاذي لينا زوز انا و زهرة...نعرف لي طريقة الوحيدة لي باش تخليه ينقص حقدو عليها الفترة هاذي...معاد نجم نخمم في حتى شي اخر...كان اني نراها و نطمن عليها...نفهمها و نفهم منها كلشي صار...كان فما شي تعبتو منو لتوا...هو بعدها عليا و كهو...و توا بالظبط تهديت من الفازة...برغم قاعد نصبر في روحي انو كلشي لصالحنا...اما مقهور كيفاش نجمت نطلقها بالطريقة هاذي...لي مطمني لتو انو مهما عمل ماهوش باش يمحي رابط لي يجمعني بيها لاخر عمري...بنتي لي في ثنية باش تكون اقوى رابط يهد مراد...و اكيد باش يلقاني في وجهو في كل مرة يفكر فيها انو تخلص مني...الحرب لي بداها هو باش نكملها انا...سكرت عينيا...نحاول نرتاح من كل فكرة جي لمخي...نحاول نفركس على صورتها في مخيلتي...تخليني نهدا...و ننسى لي صار...حتى دقيقة من زمان...في اللحظة هاذي هاذي بالظبط..نحب ناخوها في حضني...و نسرح لبعيد...كي العادة...من غير ما نخمم في شي...و من غير ما نخاف شي...لا من بعدها و لا حتى من اللي جاي...اما بعد توا...حتى وسط الخوف و القهرة لي عايشين فيها...باش نكمل وعدي ليها لاخر لحظة...باش نحررها منو...مهما صار...و مهما كانت النتيجة...زهرة باش تكون حرة...و باش تكمل حياتها و هي حرة...وقتها برك باش نرتاح من هذا الكل.
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
