زهرة🌸

الحلقة التاسعة و التسعون

🔸️حلقة 99
🔸️زهرة تحكي:
حليت عينيا على صوت المطر...نحس في راسي...باش يطرشق...هزيت روحي شوية شوية...منعرفش كيفاه هزني نوم ليلة البارح...تقويت على روحي و قمت نكركر في بدني لصال دوبان...هزيت راسي نغزر لحالتي..عكس لي خرجت بيها البارح من هوني...مديت يدي...عديتها على خدي...نتحسس في الكحل لي نزل على وجهي قلبي عصر عليا...و انا نغزر لصبعي...و الخاتم لي نحيتو فوق طاقتي...منعرفش اذا لي عملتو صحيح و لا غالط اما حبيتو يتحرر مني...و من لعنة مراد زادة...تنهدت بالقاوي...و هزيت يديا شوية...حليت الروبة...و سيبتها طاحت عالارض...حليت شعري...عبيت البانو...و غطست داخلو...تكيت راسي لتالي...و غمضت عينيا...صورتهم مع بعضهم البارح و كلامو...محبوش يتفسخو من مخي قد ما حاولت ننسى لي ريتو منجمتش...كبست بيديا زوز...على حروف البانو...و غطست في الما...نمنع في دموعي لي تحب تلقى طريقها على خدي...معادش نحب نبكي...اكثر من اللي بكيتو البارح...و لي بكيتو في عمري الكل...نعرف حبي لعمر...ماهوش باش ينقص...و لا باش يتأثر باللي قاعد يصير...اما بالنسبة ليه...و بعد ما ريتها لاصقة فيه بالطريقة هذيكا...بعد ما ريتو نرتاح معاها...حسيت انو مراد نجح في اول خطوة عملها حتى انا منجمش نلوم عمر اكثر من هكا...منجمش نفسد عليه حياتو اكثر...و برغم نعرف انو تضرر برشا جرايري و مزال يعاني من مراد لتوا...و مهما بعدت عليه...و مهما حاولت نعيش من غيرو...اما منجمش نتقبل فكرة لي باش تكون فما مرا اخرى في حياتو...باش يحب وحدة غيري انا...هو وعدني قبل و بالسيف عليه باش يبقى عند وعدو ليا...هزيت راسي...اول ما حسيت روحي تخنقت...عديت يديا زوز على وجهي...نرد في نفس فرد وقت...بقيت فترة و انا تحت الما...نحب كل لمسة من مراد...تحطت على بدني...تتنحى وحدها...على خاطر معادش عندي جهد باش نعمل شي...و كان مزال عندي قوة نواجهو بيها...توا بالظبط و بعد ليلة البارح...قاعدة نستمد فيها من بنتي و كهو...هزيت روحي شوية شوية شللت بدني و لبست الكاب متاعي...خرجت للبيت استغربت كي سمعت الحس برا...اما محبيتش نركز اكثر...جبدت دبشي من القارد روب...لبست سروال و خلعة صوف...شيحت شعري و لميتو كيما جا...معادش عيني في حتى شي...اصلا لتوا نحس في راسي يوجع فيا...شي من الحفلة...و شي من البكا لي بكيتو البارح نزلت شوية...هزيت سطوشتي من الارض...اصلا وقت دخلت لهوني...كنت نحب نرقد و ننسى كلشي عشتو و ريتو وقتها...خذيت نفس و جبدت تليفوني...ضيقت عينيا و استغربت من كمية المكالمات و الميساجات لي جاتني منو...ليلة البارح و الصباح زادة...متوقعتش باش يطلبني مرة اخرى...بعد اللي صار...ملحقتش باش نحل حتى ميساج من اللي بعثهم...و نوقز تليفون في يدي دخلت بعضي...و قلبي خض بالقاوي...كانو واقف قدامي توا...معادش نعرف شنية نقول بعد اللي صار بيناتنا الكل...حطيت يدي على رقبتي...محاولة مني باش نقص التوتر لي هد عليا...و نتصرف عادي...خذيت نفس طويل...قبل ما نهز عليه و نسمع صوتو...يحكي
عمر:زهرررة...لباااس مااهو ؟
بقيت ساكتة...اسمي لي خرج من شفايفو روهجني احساس غريب هد عليا...مخلط بين الغش و الحب..بين اني نبعد و لا نقرب...بين اني نحكي معاه و لا نعلق عليه...قص عليا صوتو مرة اخرى...يحكي
عمر:نعرف لي تسمع فيا...جاوبني أماانك ؟
بلعت ريقي...أول ما حسيت بخوف في صوتو...مشى في بالي معادش نحس بيه مرة أخرى...تنهدت بالقاوي نحكي
انا:نسمع فيك
سمعت تنهيدتو و حسيت بيها...اما كبست روحي...و انا نسمع فيه يحكي
عمر:زهرررة...يااااخي تحب تهبلني إنتي و لا شنية حكايتك ؟
أنا:شنية عملتلك زادة...هاني خليتك على راحتك و خرجت منها الحفلة و خرجت من حياتك زادة
عمر:يظهرلي إنتي لي هبلت...تعرف الكلاام لي قاعدة تخرف بيه...وين باش يوصلنا ؟
أنا:ما عندنا وين باش نوصلو...قصتنا وفات البارح عمر اللي مزال بيناتنا توا...واضح
عمر:واااضح ملا...تحبني نصدقك توا...مش هكا ؟
انا:أمورك...تحب تصدق و لا لا...معادش يهمني فاش تفكر...مدامك تحب تاخو خطوة جديدة في حياتك معادش تخمم فيا...و معادش تتلفت وراك...باش متعاودش نفس الغلطة متاع قبل...و تخسر كلشي جرايري
عمر:ناخو خطوة جديدة ؟ هذا لي تحب عليه إنتي ؟
كبست على رقبتي اكثر...سؤالو خلى النفس يتسكر عليا في لحظة...مش هذا لي نحب عليه...انا نحبو معايا و كهو...خذيت نفس نحكي...و نتهرب من سؤالو فرد وقت
انا:علاش طلبتني ؟
عمر:نحب نشوفك
انا:فاااش قام ؟
عمر:صبر يااا ربي...الصبر...فما برشا كلام...باش نحكيو فيه مع بعضنا...ارتحت توا ؟
انا:من غير ما تضيع وقتك مع طليقتك...فما حاجات أهم لازمك تعملها
عمر:منعرفش...شنية لي قاعدة تخمم فيه توا...اما كلشي عملتو و كلشي قاعد نعمل فيه لمصلحتك انتي و كهو
أنا:كيما قاعد تنشر في طلاقنا مثلا
عمر:¤¤¤¤¤¤¤¤ نهار لي وقعت فيه على اكا الورقة ياخي مش حكينا فيه الموضوع هذا...مصممة باش تحرقلي اعصااابي و لا شنية
انا:مش مشكلتي...مدامك تحب تحرق أعصابك شمدخلني انا ؟
عمر:شمدخلك ملا ؟ بااهي يا زهرة...بااهي...تو نشوفو صحة راس لي خرجتلي بيها...وين باش توصلك
انا:ما عندي وين باش نوصل اخر...كان قاعد تحاول تريح ضميرك باللي تعمل فيه...ارتاح من توا...صدقني هذا احسن قرار لينا الزوز
عمر:مش إنتي لي تقرر الاحسن ليا زهررة...و الكلام لي قلتو ماهوش باش يتعدالك بالسااهل صدقني...انا نعرف كيفاه نخرجك من غديكا...ووقتها لينا حساب اخر مع بعضنا
ناقص كان باش يحاسبني...اصلا لتوا مكرزة عاللي عملو فيا البارح...جييت باش نحكي...اما سكت...كي سمعت ريحان تبكي...قلبي عصر عليا في لحظة...و تمنيت كان جيت بجنبها توا...فقت من سرحتي على صوتو يحكي
عمر:باش نعلق انا توا...رد بالك على روحك
انا:عمر...لحظة
عمر:اشكي ؟
انا:شبيها ريحان تبكي ؟
عمر:أكيد جاعت...تو وين فاقت
انا:باهي...شوف هند ترضعها
عمر:تو ندبر راسي...اتلهى بامورك الجديدة انتي...مدامك وليت سيدة اعمال
انا:تفرك فيهم عليا
عمر:لا عزيزتي...برا اتلهى بامورك توا...و متخممش في بنتي
انا:و بنتي زادة
عمر:قلت العكس انا ؟
انا:لا...جيست حبيتك نذكرك...حتى حد ماهو باش يحرمني من بنتي...مهما صار
عمر:زهررة...يززي...حتى حد ما عندو حق انو يحرمك من بنتك...و حتى حد ما عندو الحق يحرمني منك انتي...حتى انتي بيدك متنجمش...حط هذا في مخك
نزلت تليفون...من غير ما نزيد معاه حتى كلمة اخرى نحس في قلبي باش يخرج من بقعتو من كلامو تالي...غمضت عينيا بالقاوي...ننفي في اللي نخمم فيه...اول ما حليتهم...جات عيني عالمرايا...غزرت لروحي مستغربة...للحظة وحدة رجعت لوعيي...شكونها هي باش نسلملها في روحي...يمكن كلامو تالي...خلاني نفيق على وضعي اكثر...لي صار البارح...لابد منو بلكشي يفيق على روحو...و يستوعب شنية قاعد يصير...تنهدت بالقاوي...حطيت تليفون من يدي...و خرجت من البيت...رجعت درجتين لتالي...كي سمعتو يحكي مع المحامي متاعو
هو:سي مراد...متأكد من الكلام لي تقول فيه...يمكن تضر روحك قبل ما تضرو
مراد:انت باش تعمل لي قتلك عليه و كهو
هو:الورقة لي تحكي عليها...تخص المشروع القديم...كيفاه باش تخليه يتحبس بيها مرة اخرى
حطيت يدي على فمي مصدومة...مستحيل يتبدل...مهما صار...كبست بيدي عالحيط و انا نسمع فيه يحكي
مراد:انت جيست...بدل المعلومات لي فيها...و خليها تخص المشروع متاعنا...و المرة هاذي ماهوش باش يخرج جملة
هو:النسخة الاصلية لتوا عندك
مراد:عندي
هو:نجم ناخوها توا
قبل ما يقول كلمة وحدة...عدلت روحي...و كملت نزلت...دور راسو غزرلي...يحكي
مراد:صباح الخير عزيزتي
انا:صباح الخير
مراد:لباس ؟
هزيتلو براسي ايه...و قحرت للمحامي...قرب مني يحكي
مراد:برا افطر...تو نخلط عليك
عرفتو باش يطلع...يجيب الورقة لي وقع عليها عمر...و لي كانت سبب في اللي صار فيه الكل...خذيت نفس نحكي
انا:نحب نحكي معاك
مراد:لحظة تو نرجعلك
انا:توااا
مراد:اماا
انا:توا هذا احسن مني ؟
مراد:زهررة
انا:تعرفشي حاجة...انا الغالطة...على خاطر جيت باش نحكي معاك
اول ما تلفت باش نمشي...شدني من يدي بالوقت...غمضت عينيا بالقاوي و عاودت حليت عينيا...و انا نسمع فيه يحكي
مراد:باهي استنى...انت تنجم تمشي...نكلمك مبعد
هو:باهي سي مراد
تلفت نغزرلو...لين خرج من الباب...و تلفت عندو...كي كبس على يدي يحكي
مراد:هيا ايجا معايا
انا:نخرجو للجنينة ؟
هزلي براسو ايه...جبدت يدي منو...و سبقتو...نخبي في توتر لي ظهر عليا في لحظة...على جثتي كان نخليه يقرب من عمر مرة اخرى...خذيت نفس من النسمة الباردة...حسيت بالفاست متاعو لي تحطت على كتافي في لحظة...و بقى واقف بجنبي...تنهدت بالقاوي نحكي
انا:توحشت امي
دورت راسي شوية غزرتلو...عدا عينيه على وجهي...يحكي
مراد:تحبها بحذاك ؟
هزيتلو براسي ايه...تبسم...و مد يدو عدا صوابعو على خدي...وخرت خطوة لتالي نحكي
انا:باش تجيبها لهوني ؟
مراد:من غدوة تبدا بحذاك
انا:نحب على حاجة اخرى زادة
مراد:تدلل
انا:نحب نرجع نقرا
مراد:متأكدة ؟
انا:الحكاية لي دخلتني فيها...انا معنديش فيها...اما باش نعمل لي تقولي عليه اكيد...جيست نحب نكمل قرايتي و كهو
مراد:باهي...لي تحب عليه باش يصير
انا؛ملا احكي معاهم اليوم ؟
مراد:من غدوة نحل الحكاية ؟ باهيشي هكا
انا:لا نحب اليوم...نعرف لانت باش تحل الحكاية...اماان
مراد:باهي باهي...متغزرليش هكا...تو نشوف كيفاه نحل الحكاية
انا:خلينا نمشو ملا
مراد:ارتاح انتي...تو نحلها بمعرفتي
انا:و خبر بنت عمتك و لا ندرا شنية...تبقى بعيدة عليا
مراد:حتى حد ما عندو حق يقربلك بكلمة عزيزتي
انا؛احسن ملا...هيا انت باش تمشي من توا
مراد:امرك عزيزتي
دوب تبسمتلو...و نحيت الفاست حطيتها في يدو...غزرلي ندرا كيف يحكي
مراد؛ماكش باش تمشي عند بنتك
انا:منحبش نمشي اليوم
مراد:باهي على راحتك عزيزتي
هزيتلو براسي ايه...و عطيتو بظهري...نخمم كيفاه نعمل ووين باش نلقى الورقة...اهم شي عندي توا...انو يخرج من غير ما يهزها معاه...خلط عليا بالوقت...لبس الفاست...متاعو...و هز مفاتحو و تليفونو من الطاولة يحكي
مراد:كول حاجة و برا ارتاح شوية
انا:باهي
قعدت عالطاولة...و جبدت الصحن ليا...دوب كليت شوية...اول ما سمعت صوت كرهبتو...هزيت روحي وقفت...قربت من الشباك...و تأكدت لهو بعد برشا...اول شي عملتو...قطعت نظام الضو في الدار...نعرف لفما كاميرات هوني...حاجة ماهيش باش تخفى عليه...خذيت نفس و عاودت طلعت...شاورت للبون باش تهبط....خلت لبيتي...هزيت تليفوني...و رجعت لبيروه...ديما مظلم كي العادة...شعلت الفلاش...و قاعدة نفركس بين اوراقو...اما شي...ما لقيت حتى ورقة تخص عمر...خذيت نفس و زوز...و كملت نفركس عليها...ما خليت حتى بقعة ممكن توصلني ليها...برغم معنديش فكرة...شنية الورقة هاذي بالظبط...اما لي متأكدة منو...انها تخص عمر...و اهم شي توقيعو عليها...جات عيني عالخزنة متاعو...نزلت شوية و قابلتها...نغزرلها...نخمم في الكود متاعو...يجي نص ساعة...حاولت فيها كل رقم جا لمخي...لي يأست انها تتحل معايا...غمضت عينيا نحكي
انا:خمم زهرة خمم...مراد متعلق بيك انتي...معناها كلشي في حياتو يخصك انتي...كان مش عيد ميلادك...ملا
حليت عينيا مروهجة...و انا نعاود في تاريخ بين شفايفي
انا:15  سبتمبر 2011
التاريخ هذا بالقدا...كان اول مرة تقرب فيها لمراد...و ننسى انو هو راجل امي و كهو...اول مرة نتصرف معاه بعفوية تامة...حضنتو و بستو من خدو نهارتها...و اكدت عليه انو تاريخ هذا باش يبقى احلى حاجة جمعتنا مع بعضنا...على خاطرو مركاني في افضل ليسي...و مكنتش نحلم اني نقرا فيه قبل...و متأكدة لي مستحيل ينسى تاريخ هذا...خذيت نفس...كتبتو و يدي ترعش بالكل...عينيا وساعو و انا نشوف في الضو الاخضر...كبست عليها و حليتها...لقيت اكثر من ورقة...و اكثر من دوسي...فلوس...و اللي روهجني اكثر...السلاح لي محطوط في الوسط...هزيتو في يدي...نغزرلو مستغربة...شنية يعمل عندو منجمتش نستوعب...حطيتو من يدي و جببدت الاوراق...نقرا فيهم بالوحدة...فما لي فهمتهم و فما لي مفهمتش متاع شنية اصلا...نقرا فيهم بالزربة...كان يرجع على غفلة...مستحيل يعديهالي...مهما صار...للحظة قطعت الامل اني نلقاها...منجمتش نصدق عينيا و انا نقرا في اسمو و نشوف في توقيعو...حطيتها على جنب ورجعت كلشي كيما كان في الاول...حطيت الفرد كيما كان فوقهم...سكرتها...هزيتها في يدي...و تأكدت كلشي خليتو كيما دخلت...خذيت نفس و حليت الباب...قلبي حبس و انا نغزرلها...و قبل ما تحل فمها...قحرتلها نحكي
انا:مش قتلك اتلهى لوطة...شبيك خلطت عليا ؟
هي:مدام زهرة
انا:مشغولة توا...لازمني نمشي
خليتها و دخلت و لبيتي...كبست عالورقة في يدي...نقرا فيها...و مش مصدقة...كيفاه قبل يوقع عليها...مستحيل نصدق انو عمر...يوصل يشري سلعة مضروبة...و يخاطر بالخدامين...و اللي باش يستلمو ديارهم مبعد...زعمة بشنية هددو باش خلاه يوقع عليها...و يخليه يشد الحبس 6 شهور من غير سبب...اسئلة هدت على راسي...و حتى حد ما ينجم يجاوبني عليها من غير عمر...تنهدت بالقاوي...و حليت القجر خبيتها...و سكرتو بالمفتاح...حطيتو في مكتوبي...و خرجت من البيت...منجمش نمشي توا بحذاه...و لا نمشي جيست باش نقابلو و نعطيه الورقة لي باش تخليه يشد الثنية الصحيحة جيهة مراد من غير خوف...انو ينجم يضرو مرة اخرى...اما اليوم بالظبط...منحبش نقابلو و لا نحكي معاه...خاصة بعد اللي صار فينا البارح...نزلت اللوطة...هزيت راسي مستغربة...نغزرلو...قاعد عالديفون...و حاط ساقيه عالطاولة...متكي راسو لتالي...و مغمض عينيه...ماخو راحتو عاللخر...قربت منو...نحكي
انا:تفضل شكوونك انت ؟ و شتعمل هووني ؟
حل عينيه...و هز راسو شوية...هزني و حطني...و عاود تكى راسو لتالي يحكي
هو:اللي يخدمو هوني الكل عندهم جرأة زايدة كيفك ؟
انا:برربي...شو على اكا المنظر لي باش نخدمو انا
نزل ساقيه...و تعدل في قعدتو...يغزر فيا ندرا كيف...كبست روحي و قحرتلو نحكي
انا:نسأل فيييك يااا سيد ؟ انت شكووون و شتعمل هووني ؟ و مراد في بالو بالمسخرة هاذي ؟
هو:انا كريم
انا:متشرفييين سي كريم...على اساس يهمني برشااا اسمك
كريم:هدي روحك...ميواتيكش الغش
انا:استغفر الله...ناقصتك ياخي ؟
كريم:فضيلة بيتي حاضرة ياخي ؟
انا:بيت شنية زاادة...فضيلة هذااا فاش يحكي
فضيلة:كنت باش نخبرك انو سي كريم هوني...اما رفضت انك تسمعني
انا:سي كريم زادة
كريم:متقلقش روحك صغرونة...كي يجي مراد...خليه يفسرلك
بقيت نغزرلو مستغربة...هز روحو وقف...هزني و حطني...تبسم على جنب...و كمل يمشي...اول ما وصل لدروج تلفتلي يحكي
كريم؛مراد عرف يختار...صحة ليه
هزيت راسي قحرتلو...تبسم ندرا كيف و كمل طلع...منحبش  اسم مراد يرتبط باسمي...حتى بالكلام...منحب حتى حد في دنيا...يقتنع بفكرة انو فما شي يربطني بيها مهما صاار...اول ما طلع...تلفت لفضيلة...و قربت منها نحكي
انا:شكوونو السخطة هذا ؟
فضيلة:سي كريم خو سي مرااد
انا:شنووووة
بقيت نغزرلها مصدومة...هذا اخر شي توقعتو...انو مراد عندو خوه...علاش عمرو ما خبرني من قبل...و لا جبد سيرتو قدامنا...البارح شرااز...و اليوم كريم...و ندرا شنية مزاال مخبي اكثر من هكا...خذيت نفس و طلبتو...هز عليا يحكي
مراد:لباس عزيزتي ؟
انا:والله مش لباس بالكل
مراد:صاارت حاجة ياخي ؟
انا:سي خووك هوني
مراد:كرييم ؟
انا:مممم...هاك مستغربتش جملة...تنجم تفهمني شنية لي قاعد يصير ياخي ؟
مراد:مش وقتو عزيزتي...في كل الاحوال كنت باش نعرفك بيه اليوم...اما هوكا سبقني
انا:ارتاح...تعرفنا و كملنا...و كان فما شي...مزلت منعرفوش...تفضل خبرني بيه توا
مراد:زهررة...يززي عزيزتي...متحط شي في بالك توا...عندي خدمة يلزمني نكملها توا...اول ما نكمل...نجي و نفهمك كلشي
انا:شصاار في موضوعنا ؟
مراد:طمن...وعدتك باش نحلها الحكاية
انا:باهي برشا
نزلت تليفوني و علقت عليه...ترميت عالفوتاي...و هزيت راسي غزرت للبون نحكي
انا:فضيلة
هي:نعم مدام زهرة ؟
انا:ميسالش تتفقد السيستام متاع الضو...من بكري مفماش...و لا خلي اشرف يتصرف
فضيلة:باهي
تكيت راسي لتالي...نخمم في اللي صار...بين البارح و اليوم...الدنيا دخلت بعضها...و مراد كشف اوراقو الكل...و قاعد يلعب عالمكشوف توا...و ندرا فاش قاعد يخمم بالظبط...و رغم انو وعدني ماهوش باش يقرب لعمر مرة اخرى...اما اليوم...كان باش يلعب باخر كارطة ضد عمر...و يخليه يشد الحبس مرة اخرى...كان باش يدمرو...و يغدرو...و الاسوء منعرفش شبيه عمر مخممش ياخو من الورقة قبل...و رغم متأكدة انو مستحيل يغفرلي الفازة هاذي...اما مانيش باش نخليه يضرو...و لا يدخلو للحبس هذاكا مرة اخرى...كان على جثتي...كبست على راسي بيديا زوز...معادش نعرف...نخمم في حل للي احنا فيه الكل...ضرب في راسي سليم...هو الوحيد لي ينجم يحل اللغز متاع مراد...مدامو وراه...اكيد يحاول يكشف حاجة مهمة...و حضورو للحفلة ماهوش مفاجأة...قد ماهو مخططلو بالقدا من قبل...و بعد ما حكيت معاه البارح...متأكدة لهو باش يعاوني...و الاهم باش يكشف مراد...اما منجمش ناخو الخطوة هاذي...قبل ما نعرفو بالقدا...و هاذي اول خطوة باش نعملها...اني نتعرف على سليم بالقدا...و نفهم شنية يحب من مراد...ووين يحب يوصل زادة...و الاهم شكون كريم...و علاش جا لهوني بحذانا...برشا اسئلة يلزمني نجاوب عليها...قبل ما نخمم ناقف في وجهو و نواجهو...و الا باش نخسر اكثر من اللي خسرتو قبل ببرشا...و انا معادش عندي قوة اكبر باش نغزر للناس لي نحبها و هي تبعد عليا...و لا نعيش من غيرها...برغم عمر و ريحان مش معايا توا...اما طول ما هوما الزوز بخير...متأكدة لانا باش نكون مليحة...ووسط الحرب لاحنا فيها...باش تكون بنتي هي نقطة الامل...لي كل مرة نضعف فيها...تخليني نقوا اكثر من قبل...هي الحاجة الوحيدة الباهية في حياتي بعد عمر...يمكن على خاطر النهار اللي باش يجمعنا مىة اخرى تحت سقف واحد...مزلت نقاوم و باش نقاوم...لاخر نفس في حياتي