زهرة🌸

الحلقة السابعة و الثمانون

🔸️حلقة 87
🔸️مريم_تحكي:
هزيت يدي حطيتها على صدرو...فرد وقت نتحسس في صوابعو...لي تتعدا بين خصلات شعري...كبس على يدي باسني منها يحكي
حسام:شبيك مش قد بعضك اليوم ؟
انا:منعرفش
حسام:زهرة مرة أخرى ؟
هزيت راسي شوية غزرتلو...و خذيت نفس نحكي
أنا:زهرة ماهيش لباس...متأكدة لي صارت معاها حاجة و بلكشي تكون ولدت...و إحنا معندناش خبر
حسام:مش مزال شهر آخر
أنا:منعرفش حسام...والله خايفة عاللخر
حسام:حد فينا ما ينجم يعمل شي...مدام عمر لتوا في الحبس...خاصة بعد القرار لي خذاتو زهرة...أنها تبقى مع مراد بإرادتها...النقطة هاذي بالظبط...خلات عمر ما يحب يقابل حد فينا المدة هاذي الكل
أنا:ياخي مزال برشا باش يخرج ؟
حسام:على قول المحامي الشهر الجاي
أنا:إن شاء الله
حسام:فما حاجة من غير زهرة منعرفش بيها ؟
أنا:متقلقة على رنيم
حسام:شصار ؟
أنا:منعرفش من البارح حسيتها مش قد بعضها...و محبيتش نكثر عليها بأسألتي أما والله خايفة عليها
حسام:طبيعي تكون حالتها هكا...تعرف لي الفاك حاجة جديدة عليها
أنا:يمكن
حسام:يزي حبي...مرة وحدة خمم في روحك
أنا:هاني نخمم فيك أنت
ضحك بالوقت...يمكن مكانش يستنى في الكلام هذاكا مني...قرصني من خشمي يحكي
حسام:ممم هاني نشوف
أنا:بربي...معناها نكذب عليك أنا ؟
حسام:لا مقلتش هكا
أنا:ملا شنية تقصد ؟
حسام:ما نقصد شي يا روحي...و هاك إنتي متنجمش تقعد دقيقتين على بعضهم من غير ما تعاركني
أنا:معناها أنا مجودرة
حسام:الصبر يا ربي...للحظة حسيت لإنتي باش تكمل الرومانسية متاعك
أنا:معناها مانيش رومانسية ؟
حسام:ما ريت شي راني
أنا:بربي...على أساس أنت معلم في رومانسية
حسام:إنتي أرجع لدارك و تو نوريك الرومانسية على قاعدة و في كل وقت عزيزتي
عاودت حطيت راسي على صدرو...و سكت...بعد آخر مرة بابا رفض يسمعو و يحكي معاه...منجمتش نطلب منو يمشي عندو مرة أخرى...منحبوش يتحط في نفس الموقف مرة أخرى...كبس على شعري يحكي
حسام:أنا وعدتك قبل إني باش نصلح كلشي...و كان موافقش من أول مرة...باش يوافق المرة الجاية
أنا:قولتك باش يوافق على علاقتنا مرة أخرى ؟
حسام:إحنا عدينا أكثر من هكا مع بعضنا...و باش نتعدو المرحلة هاذي زادة
أنا:تعرف حاجة
حسام:مممم
أنا:ديما يجي في بالي سؤال
حسام:سؤال شنية ؟
أنا:كان أنت بقيت تحب شراز...و رجعتلها بعد اللي صار فينا الكل...و بديت معاها من أول و جديد...كيفاه كنت باش نواجه كل حد تحديتو و إخترت ثنيتك ؟ و الأهم كيفاه كنت باش نتعدا كلشي وحدي ؟
تنهد بالقاوي...و عدا صوابعو على خذي بفيانة...يحكي
حسام:أسمعني مريم...أول مرة خذيت قرار إني باش نعرس بيك...و أول مرة وقفت فيها قدامك...و طلبت يدك باش تولي مرتي..معناها بيني و بين روحي فسخت إسم شراز من حياتي...و مكنتش باش نفضل مرا أخرى عليك جملة
أنا:حتى بعد اللي صار
حسام:حتى بعد اللي صار
أنا:حتى كان محبيتش نرجعلك...مكنتش باش ترجعلها و تعرس بيها ؟
حسام:لا...أما كنت باش نلقى وحدة أخرى تناسبني
جبدت روحي منو...و هزيت راسي قحرتلو...ضربتو لكرشو نحكي
أنا:كي هكا شبيك معايا توا...مدامك تنجم تلقى شكون تناسبك ؟
حسام:معنديش وقت باش نفركس عزيزتي
أنا:ناوي تجلطني حسام.. شنية لي تقول فيه أنت
حسام:إيجا عندي تو نقلك
أنا:منحبش
جبدني من يدي...كبس عليا...دورت وجهي منحبش نغزرلو...قربلي أكثر...حط خشمو على رقبتي...غمضت عينيا بالقاوي...بوستو شلتني كي العادة...خلاتني نقربلو من غير ما نحس على روحي...كبس عليا أكثر...و قرب لوذني يحكي
حسام:مزال مفهمتش لأنا باش نضيع بلاش بيك
دورت راسي شوية...جات عيني في عينو...حسيت الكلام هرب مني الكل في لحظة...مديت يدي عديتها على خدو...غطس في شفايفي بالوقت...و مرة أخرى حسيت بنفس الإحساس البنين متاع كل مرة يجو شفايفو على شفايفي...كبشت فيه أكثر...و عديت يديا زوز ورا رقبتو...لدرجة محسيتش كيفاه هزني من بلاصتي لحملتو...جبدت روحي شوية نرد في النفس حاوطت وجهو بيديا زوز نحكي
أنا:و..و أنت مزال مفهمتش لتوا...لأنا نغير عليك
حسام:ملا أنا شنية نقول على غيرتي
حطيت صوابعو على شفايفو...و قربت منو أكثر...نحكي
أنا:ما تقول شي...خاطرني لا قبل و لا توا...و لا حتى مبعد...غزرت لحد غيرك...و لا راني باش نغزر...أما
حسام:أما ؟
أنا:كان أنت عملت العكس...وقتها باش
حطيت يدي على رقبتو كبست عليه...و قربت من وذنو نحكي
أنا:وقتها باش نقتلك بيدي
ضحك بالصوت...و كبس على ظهري من تالي...لصقني فيه يحكي
حسام:مجنونة...معملتهاش و إحنا اعداء...باش نعملها توا
انا:مممم...أسمعني شباش نقلك
حسام:مممم
أنا:معادش نحبك ترجع أكا السخطة لي كنت عايشة معاه قبل...مفهوم كلامي
حسام:مفماش حاجة أخرى نسيتها عزيزتي
أنا:اووه...شباش نحكي...و شباش نخلي...و أنت خليت شي معملت...
قص عليا...كي عضني على غفلة..كبست على كتافو..ندز فيه...جبد روحو شوية يحكي
حسام:هذا لي معملتوش...و برشا حاجات غيرها
حطيت يدي على فمي...و غمضت عينيا موجوعة حاولت نجبد روحي...كبس عليا يحكي
حسام:خليك
أنا:ياخي لإمتى باش تبقى مجودر هكا
حسام:باهي إيجا هوني...حقك عليا
عنقني قبل ما نقول حرف...كبس على شعري...يحكي
حسام:نعرف لي باش تحكيه...و عرفت قيمة لي خسرتو بعد ما حسيت روحي باش نخسرك...و مانيش مستعد نعاود نفس الغلطة مرة أخرى...على هذاكا معادش نحبك تخاف مني باهي
كبست عليه أكثر...و حطيت راسي على كتفو...نحكي
أنا:مانيش خايفة منك...أما خايفة من اللي باش يصير
حسام:مدامني معاك...ما تخاف من حتى شي باهي ؟
أنا:باهي
كبست عليه أكثر...لين قصيت كل مسافة تفصلني عليه هزيت راسي شوية بستو من خدو نحكي
أنا:أنا عندي ثقة فيك حسام
غزرلي ندرا كيف...كبست على خدو...و قربت منو أكثر غمضت عينيا بالقاوي...و نزلت بستو من شفايفو...كأني نسرق فيها كيف كل مرة...جبدت روحي منو...و غزرتلو في عينيه...مد يدو يبعدلي في خصلات شعري...و عاود قربلي مرة أخرى...أول ما وصل لشفايفي...قص علينا صوت تليفونو...غمض عينيه باش يكمل اللي يعمل فيه أما صوت تليفون طول برشا...جبدت روحي منو نحكي
أنا:بلكشي تليفون مهم
هزو في يدو...و حطو في وجهي...يحكي باش يطرشق
حسام:هذا مهم ؟
شدني ضحك و أنا نغزر لاسم محمد...هزيتلو براسي إيه نحكي
أنا:بلكشي حاجة مهمة...هيا رد عليه عيش حبي
نفخ بالقاوي...هز عليه و هو يقحرلي...تكيت عليه نسمع فيهم
حسام:تفضل سي الفرخ
محمد:عالكلمة هاذي...ظاهر فيا قصيتلكم بونتو
حسام:يهلكك...الحق عليا لي رديت عليك...شتحب مني توا ؟
محمد:حبيت نقلك لي أنا وصلت لشونطي...أنت وينك ؟
هزيت يدي نعدي فيها مرة بين خصلات شعرو...مرة على خدو...و رقبتو...تنهد بالقاوي يحكي
حسام:اهدا...مانيش ناقص توا
محمد:شنوة ؟
حسام:مانيش معاك سي الهم...دبر أمورك وحدك...ياخي منجمش نعدي ساعتين رايض كيما العباد
حسام:باهي باهي...إعتبرني ما قلت شي...و سلم على مريم
قربتلو أكثر...نحكي في تليفون...و هو في وذنو
أنا:عيشك محمد
حسيتو تروهج أكثر...كي نزل يدو و علق عليه...دورت وجهي نحكي
أنا:شبيك علقت
حسام:ينعمبو عمري...هيا حبي أرجع لبلاصتك توا
أنا:علاش ؟
حسام:هاو باش نقلك علاش...راجلك عندو قدرة تحمل لا يزي عندو عام شايح...لا يزي هو في الكرهبة و قنبلة موقوتة بين يديه...حرام عليك راهو
أنا:حسام أماااانك...هكا ياخي
حسام:لا حسام لا زوز...هيا عزيزتي
كبس على جنابي...و رجعني لبلاصتي...و مد يدو نزل البلار...تلكمت على روحي...و دورت وجهي...نحكي
أنا:أنت لي اخترت تخليني من أول ليلة...معادش ترمي عليا اللوم
تنهد بالقاوي...و عدا يديه زوز على شعرو...قربلي شوية جبدني عندو يحكي
حسام:مانيش نلوم فيك يا عمري...أما زادة برشا عليا
أنا:باهي منقصدش لي قلتو
حسام:سامحني عزيزتي
انا:حسام تنجم تهزني للفاك قبل ما تمشي لمحمد ؟
حسام:علاش ؟
أنا:كيفاه علاش عزيزي...نسيت لي لازمني نعاود آخر عام...و هاني روطار ديجا...و زادة ممكن برشا معادش يقبلوني
حسام:شنننوة...علاه الفاك مكتوبة على بوهم
أنا:آخر مرة مشيت فيها...لقيت
حسام:أحكي متجهلنيش مع صباح
أنا:لقيت شراز شاكية بيا العام لي فات...و موصلنيش الإنذار مشى في بالهم لأنا طفيت الحكاية و معطيتهاش قيمة...خاصة بروف كيفها
حسام:صار ولينا هكا
غزرتلو مستغربة...خدم الكرهبة قبل ما نقول كلمة أخرى منعرفش كيفاه لحق يخرج لطريق...كبست على يدو نحكي
أنا:حساام سوق في عقلك...شبييك
حسام:كان حليت فمك أول ما سمعت بالحكاية...كنت باش نوريك فيها
أنا:معنديش برشا من اللي عرفت...يمكن أسبوع اكاكا...و مخبرتكش خاطر كنت خايفة من ردة فعلك هاذي...و زادة أمور الفاك نحلها وحدي
حسام:حلوة هاذي...تعرف هي علاه شاكية بيك ؟ عندها سبب مقنع يخليها تعمل هكا ؟ كان عندها مشكلة تجي تحلها معايا مش معااك...و إنتي كيفاه باش تحلها وحدك عاد...حل ¤¤¤¤ جلغتك و جاوبني
أنا:ك..كنت باش
حسام:شنننوة ؟
أنا:كنت باش نعطي خبر لخالتي
شد الفران بالقاوي...لي خلاني نكبس عالكرسي مفجوعة و تلفت عندي يحكي
حسام:عاود شنية قلت ؟
أنا:ح..حسام
حسام:ياخي طرطور قدامك ؟
أنا:حاشا...جيست أنا
حسام:إنتي شنية ؟ و خالتك إمتى لحقت تعرفها ؟ باش تطلب منها تعاونك...في حاجة كنت أنا سبب فيها
أنا:شراز مشكلتها معاايا أنا...أنت ما عندك حتى علاقة باللي صار
حسام:بربي...ملا شبيها حاقدة على ¤¤¤ تكلللم ؟
أنا:يزززي حساام...نحب ننسى أنها كانت صحبتك و لي كنت تحبها...معادش نحبك تحكي معاها و لا تقرب منها خليها تخرج من حياتنا...يزي عاااد
حسام:بهلولة و لا تتبهلل عليا...تحبني ننسى لهي كانت سبب في موت بنتي...واللي شعرة لا خسرتك إنتي زادة تحبني نعدي هذا و نسكت...يحرزلها كانت مسافرة...و إلا راني قتلتها بلا ما نخمم مرتين
أنا:حسام ياخي فركست عليها بعد ما حكيتلك لي صار
حسام:ملا تحبني نبلع سكينة بدمها و نسكت
قربت منو شديتو من يدو...قبل ما يفقد أعصابو الكل و هزيت راسي غزرت لعينيه نحكي
أنا:حسام...يا روحي...قلة ثقتنا ببعضنا هي لي قتلت بنتنا...أنا منحبكش تعمل حاجة تندم عليها مبعد...و لا تعلق مع شراز أكثر من هكا...إحنا عندنا مشاكلنا لي لازمنا نحلوها...عندنا حياتنا لي لازم نبنوها زادة...خلينا نبداو من جديد كأنو شي ما صار...كأنو معندناش ماضي جملة...أمانك...عيش حبي
كبس على يدي أكثر...و هزها عندو...باسني منها يحكي
حسام:نعرف هذا الكل...و مانيش باش نخذلك مرة أخرى...أما لي عملاتو شراز...منجمش نسكت عليه عالأقل لازمها تعرف حدودها بعد توا
أنا:أوعدني لي أنت ماكش باش تعمل حاجة تضر بيها روحك
حسام:يززي مريم
أنا:أوعدني أماان...متخلينيش هكا
حسام:باهي وعد...إرتحت توا
هزيتلو براسي باهي...و قربت منو...حطيت راسي على صدرو...كبس على ظهري...تنهد بالقاوي...و عاود خدم الكرهبة من غير حتى كلمة أخرى...محسيتش كيفاه وصلنا...ركا على جنب...يحكي
حسام:وصلنا
هزيت روحي شوية...فك الحزام...و حل الباب..محبيتش ندخل في نقاش آخر معاه...على هذاكا خليتو على راحتو...هزيت صاكي...و نزلت وراه...قربت منو نحكي
أنا:باش تفركس عليها هوني زادة
حسام:أمشي قدامي و أسكت
نفخت بالقاوي باش نمشي...شدني من يدي كبس عليا هزيت راسي غزرتلو...نحكي
أنا:شنية باش تعمل توا ؟
حسام:باش نشكي بيها أنا زادة
أنا:بربي
حسام:شبيك ؟
أنا:شي
حسام:أمشي ملا
تنهدت بالقاوي و خلطت عليه...نمشي معاه من غير حتى كلمة...دخلنا مع بعض لل Administration قرب لرسيبسيون...طلب المسؤول علينا...غزرتلو نحكي
أنا:حسام نجم نقدم طعن في الحكاية...مبعد نحكيو معاه
حسام:متدخلش إنتي
سكت عالتنبيزة لي خذيتها منو...و خلطت معاه للبيرو صافحو و ترمى عالكرسي حط ساق على ساق...طلعت حاجبي مستغربة...قحرلي باش نقعد...قعدت مقابلاتو نتبع في كل حركة يعملها...غزرلو يحكي
حسام:كيفك كمال ؟
كمال:لباس...أنت شنية أخبارك
حسام:كيما قاعد تشوف...جيت باش نعرف شنية سبب الشكاية لي في حق مرتي...كان تسمح بالطبيعة
كمال:مريم مرتك ؟
حسام:المدام مريم...و توا خلينا في موضوعنا...شنية مصلحتها شراز من الحكاية؟
كمال:حسب التقرير لي عندي هوني...أنو المدام مريم رفضت تقدم المشروع النهائي متاع الفصل الأول...كيما رفضت تعدي الإمتحان في المادة لي تقريها شراز بالإضافة اللي هي تعرضت للمدام شراز بالكلام أكثر من مرة
أنا:مش صحيح...والله قدمت المشروع متاعي في وقتو كيما عديت الإمتحان زادة...لي يقراو معايا يشهدو تنجم تتأكد منهم...و أنا أصلا عمري ما خممت نوصلها بالكلام و لا نحكي معاها...حسام والله ما صار شي من هذا الكل
حسام:اهدا عزيزتي...نظن سي كمال سمع كلامك توا...و بما أنو شراز تعرضت لمرتي...أنا نحب نقدم شكاية في حقها...و نظن هذا حق مريم زادة
كمال:شقولك تعاود تحكي معاها أنت مرة أخرى...يعني بعد اللي كان بينكم قبل...كان تعرف لمريم عبد الله مرتك...تو تتنازل عالشكاية
ضرب يدو عالبيرو...لين تهزيت وتحطيت في بلاصتي قحرلو يحكي
حسام:كماااال...أنا هوني باش نرجع حق مرتي...مش باش نلحلح بشراز ولا بغيرها...لا على حساب لي كان بيناتنا قبل...و لا توا...شراز غلطت و لازمها تتحاسب مكانش باش تلزني نشكي بيكم الكل
كمال:باهي حسام...لي تحب عليه باش يصير...و بالنسبة ليك إنتي مريم...أطلع الفوق توا باش تهز الكارت متاعك و تو يقلولك غديكا شنية جيب معاك المرة الجاية
خذيت نفس...و هزيت راسي غزرتلو....نحكي
أنا:نجم نمشي
حسام:هاني نستنى فيك هوني
أنا:باهي
هزيت روحي خرجت...لتوا مستوعبتش كيفاش يعرف سي كمال...طلعت الدروج هذاكا بالسيف...و قربت من البيرو...دقيت مرتين و دخلت...تلفتت عندي بالوقت جات عيني في عينها...متوقعتش باش نشوفها توا...و هوني...هزتني و حطتني تحكي
شراز:حمد الله على سلامتك
أنا:عيشك
شراز:ربي يعوضك
أنا:إن شاء الله
شراز:شنية تعمل هوني ؟
أنا:كان معندكش مانع نحب نهز الكارت متاعي...لي فكتيها مني قبل...كيما سي كمال قالي تنجم تاخو اللي حاجتك بيه باش تسجل مرة أخرى
شراز:نرا فيك فرحانة
أنا:مممم علاش لا...نحب نقلك لأنا ضيعت عام كهو..مش عمري الكل...كيما نحب نقلك لي متنجم تعملي حتى شي بعد توا
شراز:وليت ياسر واثقة من روحك عزيزتي
أنا:خاطر لعبتك ولات مكشوفة لناس الكل...و دوماج إنتي ما ربحتي منها شي الحكاية...صحيح خسرت بنتي أما تأكدت من حب حسام ليا..هذا أهم ببرشا من إني نتنازل و ندخل معاك في صراع ما عندو حتى معنى
شراز:شنية الكذبة لي قالهالك المرة هاذي باش صدقت لهو يحبك
أنا:مقليش...أما قاعد يثبتلي لهو يحبني و يموت عليا
شراز:باهي برشا...إن شاء الله إنتي زادة تعطيه ثقتك مرة أخرى
قربت منها أكثر...وقفت قدامها بالظبط...و هزيت راسي غزرتلها بتحدي نحكي
أنا:النصائح هذوما باش يفيدوك أكثر مني...خاطرك حطيت روحك في موقف لا يحسد عليه صراحة...و كان مزلت تحب حسام...جرب فكو مني من غير ما تستغل وضعي...و كان مزال يحس معاك شوية من اللي قاعد يعيش فيه معاايا...أنا باش نخرج من حياتو...أما مدامني على إسمو و مدامو يحبني و يحب يبقى في حياتي...مانيش باش نخلي وحدة كيفك تدخل بينتنا و تفسد جونا...كان حبيت و لا كرهت...حسام راجلي انا و كهو...على هذاكا
قربت منها أكثر...و هزيت روحي شوية...نحكي في وذنها
أنا:لعبتك وفات مدام شراز
جبدت روحي لتالي...تبسمت على جنب...و قربت من السيد لي قاعد يغزرلنا مبهم...طلبت من الكارت و اللي حاجتي بيه...شديتهم عليه...و تلفتلها نحكي
أنا:إن شاء الله المرة هاذي...متخلطش بين أمورك الشخصية و خدمتك...و خلي علاقتنا تكون مجرد أستاذة و طالبة...نهارك زين
دوب تبسمتلها و خرجت...الغزرة لي ريتها في عينيها مريتهاش من قبل جملة...لدرجة منجمتش نفسر شنية تقصد بيها بالظبط...حقد...كره...و لا كانت تتحلف فيا منعرفش...أما لي يهمني...إني بردت دمي...و قلت لي لازم نقولو من أول مرة...أول ما نزلت لقيتو واقف يستنى فيا...كبست على يدو و بستو من خدو نحكي
أنا:سيبون...تو نجم نسجل من غير حتى مشكل مش هكا
حسام:أكيد يا روحي
تبسمت و أنا نغزرلو...يمكن توا وين استوعبت..أنو وحدة كيما شراز...ماهيش عائق بيناتنا...و كان جا فما إحتمال واحد يخلي حسام يغزرلها...مكانتش باش تضرني بالطريقة هذيكا...و تستغل وضعي معاه قبل...غزرلي مستغرب يحكي
حسام:شبيك ؟
أنا:علاش؟
حسام:قبل ما ندخل هوني...كنت تكش و مش عاجبك
أنا:توا ولى عاجبني
حسام:بربي
أنا:حسام
حسام:اشكي
أنا:قتلك من قبل لأنا نحبك ؟
حسام:بالرسمي
أنا:مممم بالرسمي
حسام:هيا يا مهبولة...مترصاليش نعمل حاجة غالطة في نص الفاك
أنا:ههههههههه مفيكش دوا عزيزي
حسام:الله غالب حبي
أنا:حكيت مع سي كمال على زهرة ؟
حسام:أكيد...قتلو وضعها الصحي ميسمحش تجي الفترة هاذي
أنا:إن شاء الله متلقاش مشكلة...ديجا هاو يعرفك ظاهر و يعرف علاقاتك قبل
حسام:كان يقرا معايا حبي...و كنت نعرف ماكش باش تعديها بلا ما تسأل
أنا:صاار
حسام:ياخي ترتاح كي تعاركني إنتي ؟
أنا:أنت زادة تحب تعاركني
حسام:أنا نحبك و كهو...هيا نمشيو توا
هزيتلو براسي إيه...شدني من يدي...كبس عليا...طلعت راسي...واقفة في بلاصتها تغزرلنا من فوق...طفيتها و لزيت ليه أكثر...مانيش باش نخسر وقت أكثر من اللي خسرتو جرايرها هي...بعد توا باش نحاول نعيش كلشي تحرمت منو مع حسام...مهما صار و لا لي باش يصير فينا....مانيش باش نتنازل على حبنا جملة.