🔸️حلقة 31
🔸️زهرة تحكي:
فقت الصباح نحل في عينيا بالسيف...مديت يدي بعدت شعري لتالي...نحس في بدني مدقدق...تلفت شوية ملقيتوش بجنبي...أما متأكدة لي كان معايا ليل كامل لتوا ريحتو في خشمي...و في دبشي...تذكرت لي صار البارح...تلكمت على روحي أكثر...دقايق لي عديتهم بين يدين الطبيب...حسيتهم دهر...قد ما حاولت ننسى لي صار منجمتش...نحس في قلبي يوجع بصفة غريبة منعرفش شنوة كان باش يصير...كان بقيت وحدي البارح...بالعادة نرتاح كي نبدا معاه...كي نسمعو...اما رغم هذاكا الكل نحس في روحي موجوعة عاللخر...هزيت روحي بالسيف تقعدت...رجعت شعري لتالي...نغزر لمريولو محطوط عالفرش...مديت يدي...جبدتو عندي كبست عليه...و تنهدت بالقاوي منعرفش شنوة مزال باش يصير فيا أكثر من هكا منعرفش علاه مبقاش معايا لتوا...عديت يدي على وجهي...و قمت...خرجت من البيت..نمشي بالسيف مزلت نحس في روحي دايخة تعديت لصالة ملقيتوش خذيت نفس...و مشيت للكوجينة...لقيتو حط الفطور عالطاولة...هز آخر صحن حطو...و تلفتلي يحكي
عمر:صباح الخير
أنا:صباح الخير
عمر:لباس توا ؟
هزيتلو براسي ايه...قرب مني شوية...وقف قدامي...هز يدو و عدا صوابعو على خدي...يحكي
عمر:أغزرلي هوني...معادش نحب نراك هكا مرة أخرى
أنا:لباس عليا...جيست تعبت شوية
قرب مني أكثر...حط يدو على ظهري...لزني ليه أكثر حضني يحكي
عمر:معاد تعمل حتى شي...قبل ما تسألني
أنا:خفت برشا
عمر:و أنا خفت عليك برشا
أنا:شنوة مزال باش يصير ؟
جبد روحو شوية...حط يديه زوز على وجهي...طلعلي راسي يحكي
عمر:أغزرلي هوني...منعرفش شنوة لي باش يصير...أما لي لازم تعرفو...أنو مستحيل نخليك وحدك...مهما صار باهي
هزيتلو براسي إيه...و تبسمت بالوقت...منعرفش علاه حسيتو...يحاول يفرهدني...بقى يغزرلي ندرا كيف...نزل عليا شوية...حط شفايفو على شفايفي...بدني رعش بالوقت...هزيت يديا زوز بالسيف...حطيتهم على جنابو نحب نبعدو...اما فرد وقت...منجمتش...كبست عليه أكثر و غمضت عينيا...حليتهم على صوت الباب ينوقز...جبد روحو شوية...غزرلي ندرا كيف...حتى هو حسيتو استغرب تنهد بالقاوي...نزل بيديه لكتافي...و تبسم يحكي
عمر:برا أفطر...تو نخلط عليك
أنا:ب..باهي
أول ما بعد عليا...هزيت يدي حطيتها على شفايفي...لي صار البارح تعدا قدام عينيا...قلبي دق بالقاوي...و أنا نسمع فيها تحكي معاه...آخر حد توقعتو يجي توا سيرين...تنهدت بالقاوي...نسمع فيها تحكي
سيرين:عممر شصااار..من بارح نكلم فيك انا
عمر:برا أمشي توا...نكلمك مبعد
سيرين:شمعناها الكلام هذا...طرد فيا ياخي ؟
عمر:سيرين قتلك نكلمك مبعد
سيرين:شنية لي قاعد يصير عمر ؟
بقيت واقفة في بلاصتي...منعرفش علاه حسيتو بدا يتغشش...طلعت راسي كي حسيتها واقفة قدامي ضحكت ندرا كيف...و هزت يدها شاورتلي تحكي
سيرين:على خاطر هاذي تحبني نمشي ؟
عمر:سيريييين
سيرين:عمر شتعمل هاذي في دارنا...شنوة لي قاعد يصير...مش قتلي معادش تقابلها ؟
دورت راسي بالوقت غزرتلو...غزرلي ندرا كيف...و قرب منها...نزللها يدها يحكي
عمر:سيريين قتلك يزززي
سرين:ميزيييش عمر...توا تفهمني لي قاعد يصير...لاهي معاها ياخي...و الطاولة حاضرة زادة...شنوة عمر...شنية صار بيناتكم ؟
عمر:سيرين أحترم روحك
سيرين:كنت ديما نقول لأنا غلطت معاك...بلكشي انا معرفتش نتصرف...أنا لي قاعدة نضيع فيك...أما أنت عمر...أنت معاها هي
أنا:يزززي...مفما حتى شي بيناتنا
سيرين:إنتي تسكر فمك باهي
قربت مني أكثر...وقفت قدامي بالظبط...هزتني و حطتني تحكي
سيرين:مانيش باش نلومو...خاطر نعرف لبنات لي كيفك و دار هاذي مانيش باش نعيش فيها تعرف علاه...خاطر بعد عرسنا باش نسافرو من هوني...يعني الوحيدة لي طلعت خاسرة في الحكاية إنتي
بقيت نغزرلها...كلامها تالي دخلني بعضي...قلبي دق بالقاوي...طلعت راسي غزرتلو...معناها الكلام لي قالو البارح و قبيل مفماش منو جملة...حتى هو بقى يغزرلي من غير حتى كلمة...فقت من سرحتي..كي دزتني تحكي
سيرين:أغزرلي هوني...برا سيب خمجك في بلاصة بعيدة على هوني...عالأقل احترم الفرق لي بينكم
كلامها ركبلي العصب أكثر...جا باش يحكي...قصيت عليه...كي دزيتها بيدي نحكي
انا:يززززي...رد بااالك تحكي معايا بالطريقة هاذي
هزت يدها باش تضربني...شديتها بالوقت...كبست عليها بكل قوتي...نحكي
انا:أول و آخر مرة تهز يدك في وجهي...و إلا و رحمة بابا ما نخليك تندم فهههمت
دزيتها لتالي شوية...قرب منها...جبدها من يدها يحكي
عمر:سيرين لتوا موسع بالي معاك...أمشي قدامي
سيرين:مانيش باش نمشي لحتى بلاصة...لين تفهمني شنية حكايتها...اغزرلها كيفاش قاعدة تهدد فيا قدامك
عمر:ميهمكش في حكايتها
انا:تحب تعرف حكايتي بااهي أسمع
عمر:زهرررة
انا:راجل أمي تحرش بيا
سيرين:شنننوة ؟
عمر:زهرة سكككر ¤¤¤¤¤ فمك
أنا:و راجلك لي خايفة عليه...عاوني في القضية و كهو مفما حتى شي بيناتنا..و مستحيل يكون مستحيل نحب البروف متاعي...علاقتنا كيما الأخ و اختو...لين توفا القضية هاذي...و مستحيل ننسى الفرق لي بيناتنا زادة و أصلا أنا
طلعت راسي غزرتلو...من غزرتو عرفتو مصدوم و معصب فرد وقت...يستنا فيا نكمل كلامي...غزرت في عينيه و كملت كلامي نحكي
أنا:أنا نحب شكون...فما شكون في حياتي و حاجتو بيا معناها بعد القضية و بعد عرسكم...أنا زادة باش نشوف حياتي...و مش بعيد نعرسو بعدكم
بقى يغزرلي من غير حتى كلمة...منعرفش منين جاني الكلام هذاكا الكل...أما حبيت نرجعلو الفازة...حبيتو يحس لي قاعدة نحس بيه...و أنو مش لازم يشفق عليا خذيت نفس و تلفت غزرتلها نحكي
أنا:مرة أخرى خدم مخك شوية...فكر قبل ما تحكي كلام أكبر منك...مانيش بحاجة لحد باش نحطك عند حدك...و توا سامحوني...أنا باش نمشي...الأحسن تحلو أموركم مع بعض...من غير ما دخلوني بينكم
كبست على يدي...ضربت فيها و تعديت...دخلت لبيتو نلبس في البوت متاعي...سمعت صوت الباب كي تسكر بالقاوي...عرفتها خرجت...هزيت الفاست متاعي...باش نخرج...خلط عليا...و نطر باب البيت وراه بالقاوي يحكي
عمر:شنية الكلام لي كنت تقول فيه برا ؟
انا:لي كان لازم نقولو
عمر:أغزرلي هوني...متركبهاليش أكثر ملا حل فمك احسنلك
انا:مش كان تمشي تحاسبها هي أحسن
عمر:شمدددخلك فيها هي...نحكي مع ¤¤¤¤¤ جاااوبني كبست عالفاست أكثر...طيشتها عالأرض...و قربت منو شوية نحكي
انا:شيهممك فيا عمر...شيهمك فيا...ياخي كي عاونتني لازمني نسمع كلامك الكل
عمر:زهررررة...شمعناها الكلام لي كنت تحكي فيه
انا:يززززي...فاش يهمك الكلام لي حكيتو برا...أصلا أيامات و تسافر...يعني لهدرجة باش تتقلق عليا مع شكون باش نبقى
عمر:معناها جاتك على قلبك مش هكا
أنا:عمممر فاش تحكي أنت...و شبيك تتصرف معايا بالطريقة هاذي...حياتك و أنت حر فيها...تعمل مع مرتك لي تحب عليه...تحب تبقى و لا تسافر أمورك...ماكش مجبور باش تبقى معايا و تتحمل مشاكلي ديما مستحيل ننسى لي عملتو معايا...لآخر نهار في عمري أما زادة عمري ما خممت إني نستغل الوضع لي راني فيه جملة
عمر:شكونو ؟
أنا:ميهمكش
عمر:زهرررة حل فمممك...حل فمك قبل ما نستجرم فيك
انا:شي مرة سألتك انا على علاقتك بسيرين...شيهمممك فيا...علاه قاعدة تتصرف معايا هكا عمر
عمر:على خاااطر
سكت و هز يدو عداها على وجهو...باقي يرقل من الغش...قرب من الكوافوز نزل كلشي عالارض...وخرت لتالي مروهجة...أول مرة نراه في الحالة هاذي...خذيت نفس نحكي
أنا:ع..على خاطر شننوة عمر ؟
طلع راسو غزرلي ندرا كيف...شدني من يدي و دزني لتالي...ضربت في القارد روب...كبس على يدي أكثر...و نزل عليا شوية...يحكي
عمر:على خاطرني نحبك...هذا لي تحب تسمعو إنتي
هذا الكل قاعد يصير خاطرني حبيتك...ارتحت توا
بقيت نغزرلو مصدومة...عمري ما توقعت اني نسمع الكلمة هاذي منو...حسيت الأرض وقفت تحتي...باقي نغزرلو من غير حتى كلمة...النفس متاعو ماشية و تقوى على وجهي...روهجتني اكثر...فقت من سرحتي...كي ضرب يدو بالقاوي...عالقاردروب...تهزيت و تحطيت في بلاصتي...جبد روحو لتالي...عدا يدو على شعرو...واقف في بلاصتو يحكي
عمر:ملا وليت تحب...لالة زهرة باهي...باهي
بقيت واقفة في بلاصتي نغزرلو...ما نجمت نسمع حتى كلمة من غيرها...نحس روحي في حلمة...مش مصدقة لهو يحبني كيما نحبو بالظبط...مش مصدقة لهو اعترفلي...هزيت روحي بالسيف...قربت منو...وقفت مقابلاتو...طلعت راسي نحكي
انا:ع..عمر فاش تحكي أنت...كيفاش تحبني ؟
عمر:شنوة استغربت...اي صحيح نسيت لي فما فرق بيناتنا
أنا:عمر قتلك شقصدك بكلامك...كيفاش تحبني ؟ و سيرين؟
عمر:توا وليت تخمم فيها سيرين...هاني باش نهزها و نسافر...مفماش ترتاح مني
أنا:باهي أحسن...سافر و أبعد من هوني...هذا أحسن حل لينا زوز
عمر:بالطبيعة...نظن ماكش بحاجتي بعد توا
أنا:و أنا هكا نظن زادة
عمر:باهي...ملا هوكا باش تسمع الكلام لي عندي...و تحطو في بالك بالقدا
أنا:شنوة ؟
عمر:من هوني لين توفا القضية باش تبقى في دار حسام...و رد بالك تحط ساقك لبرا من غير علمي...و لا تعمل حاجة ورا ظهري
انا:و إلا شباش تعمل...آه شباش تعمل ؟
عمر:وقتها
غزرلي ندرا كيف...جيت باش نحكي...قص عليا الكلام كي نزل على شفايفي بقوة..هزيت يدي بالسيف حطيتها على خدو...وصلي جوابو بطريقة اخرى...كبست عليه بيدي...ما نحب نفكر في حتى شي غيرو توا...مش مصدقة لي قاعد يصير...للحظة تمنيت...كان مجاتش سيرين في حياتو...انو يكون متاعي أنا و كهو...قربتلو اكثر...حط يدو على ظهري...كبس عليا...جبد روحو شوية...حط خشمو على خشمي...يتنفس بالقاوي...و يحكي فرد وقت
عمر:وقتها صدقني...باش نتعدا حدودي معاك
خذيت نفس بالسيف...نزلت بيدي...حطيتها على رقبتو نحكي
أنا:تعديتهم عندك برشا...من وقت تجرأت و حبيت طالبتك
هز يدو...حطها على خدي...رجعلي شعري لتالي...و نزل عليا اكثر يحكي
عمر:نعرف...صحة ليك عرفت كيفاش ترجع فازتك
أنا:في شنوة ينفع...آخرتها باش تسافر من هوني
كبس عليا أكثر...رجعني لتالي...ضربت في القارد روب باقي قريب ليا بنفس الدرجة...تنهد بالقاوي يحكي
عمر:زهررة يزززي أمانك...معاد تقول حتى كلمة...نعرف روحي غلطت...و قاعد نغلط باللي نعمل فيه زادة
أنا:ع..علاه قتلي نحبك
عمر:منعرفش زهرة...صدقني منعرفش...منعرفش كيفاش و لا علاش حبيتك...منعرفش إمتى لقيت روحي نحبك...أما حبيتك...هذا لي صار...و هذا لي لازم تعرفو إنتي زادة...نحبك و باش نبقى نحبك لآخر نهار في حياتي...رغم لي صار و اللي باش يصير زادة...أما منحبش نظلمك معايا لا إنتي و لا سيرين...على هذاكا حبيت نبعد من هوني
انا:ع علاه هي...و مش أنا ؟
جبدني عندو أكثر...لين معادش فما مسافة تفصلنا غزرلي ندرا كيف يحكي
عمر:منجمش...منجمش بعد السنين هذوما نقلها لأنا منحبكش...منجمش نحطها في موقف خايب قدام دارهم...منحبش نوجعها بالطريقة هاذي...و أنا وعدتها من قبل...صدقني سريين ماهيش خايبة لهدرجة...على هذاكا منجمش نفرح على حسابها..منجمش نكمل حياتي معاك...و انا نلوم في روحي...منحبش نخليك تعيش الندم هذا معايا زهرة...انا وعدتها قبل 3 سنين انو مهما صار مانيش باش نخليها
بقيت نغزرلو...كل كلمة قالها وجعتني بطريقة غريبة نعرف لعندو حق...نعرفو بالقدا انو مهما صار ميرجعش في كلامو...منعرفش علاه للحظة خممت في روحي شنوة باش يصير فيا...كان هو بالرسمي سافر لشكون باش يخليني...رغم كلشي صار...عمر كان الأمل متاعي في كل خطوة...منعرفش علاه حسيتو يخرج في الكلام بالسيف...و كل كلمة ينزل على ظهري اكثر...نزلو دموعي بالوقت...حط شفايفو على شفايفي يحكي
عمر:ششش يزززي
انا:م..متسافرش...متمشيش من هوني
عمر:كان نبقى هوني...نتعبك معايا اكثر...انتي زادة لازم تعيش حياتك...كيما أندادك
أنا:منحبش...صدقني باش نبقى بعيدة عليك...أما متمشيش و تخليني
طلع راسو شوية...تنهد بالقاوي...و غزرلي يحكي
عمر:أغزرلي هوني
أنا:منحبش
عمر:شو الفرخة...معناها متحبش تسمعني
انا:ما نحب حتى شي منك...سيبني
حطيت يدي على صدرو...نبعد فيه لتالي...كبس عليا اكثر...حضني بالقاوي يحكي
عمر:يزززي...مستحيل نخليك...انتي باش تبقى تحت عيني ديما...اما زادة منجمش نبقى معاك...منحبش نخنقك معايا...حاول تفهمني امانك...صدقني حتى انا منعرفش كيفاش باش نعيش من غيرك...كيفاه باش نجم نغزر لسرين...و تفكيري عندك...على هذاكا زهرة اسمع كلامي عيشك
هزيتلو براسي لا...و كبست عليه بيديا زوز...منجمتش نتقبل الكلام اللي قاعد يحكي فيه...باسني من راسي يحكي
عمر:يزززي...متخلينيش نندم لانا حكيتلك هذا الكل
جبدت روحي شوية...هزيت يديا زوز...عديتهم على وجهي نحكي
انا:باهي...جعت نحب نفطر
عمر:شنية تحب اخر
انا:نمشي من هوني
عمر:لهدرجة متحبش تبقى هوني
انا:منحبش نتعلق بيك أكثر...نحب ننساك من توا
عمر:باهي زهرة...باهي
انا:باش تنساني انت زادة مش هكا
عمر:زايد مجنونة...إيجا هوني
قربت منو...حضنتو بالقاوي...كبس عليا بيديه زوز يحكي
عمر:أنسى كلشي توا...خليك معايا و كهو
انا:عمر
عمر:مممم
انا:ماكش باش تحبها كيفي مش هكا
عمر:لااا
أنا:باهي...أوعدني...أنو مهما صار ماكش باش تخليني
عمر:مستحيل...معادش نحبك تخمم بالطريقة هاذي باهي
انا:باهي...هيا نفطرو ملا
عمر:باهي
جبد روحو مني...عدا يديه زوز على وجهي و تبسملي كبس على يدي...وهزني معاه للكوجينة...بقيت نغزرلو نعرف اللي قاعد يصير غالط...اما منحبش نسلم من توا...متأكدة لي في الاخير باش يكون مع سيرين اما يحبني انا...مانيش باش نكون انانية...اما باش نستغل كل دقيقة معاه...من غير ما نفكر في حتى شي آخر كلمتو لتوا ترن في وذني...لدرجة نسيت لي صار البارح منعرفش علاه حسيت بقوة غريبة...مع إني سمعت نفس الكلمة من مراد...و كان يقولها ديما...اما توا لا...رغم انو فرحتي ماهيش باش تكمل...اما يكفي لهو يحبني...و نعرف لهو يحبني...عالاقل نجم نرتاح شوية من الوجيعة لي داخلي...عالاقل باش يكون عندي سبب يخليني نستناه...حتى كان مشى لاخر الدنيا...باش يرجعلي...و باش يكون ليا و كهو
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
