زهرة🌸

الحلقة مئة و الخامسة عشر

حلقة 115
هند تحكي:
دورت راسي في شيرتين...من حلمة مزيانة لقيت روحي في كابوس...مزلت واقفة عالشط...مزلت نستنى فيه يرجع بعد ما غاب عليا...منعرفش اذا لي صار معيا...حقيقة و لا مجرد حلمة كهو...اما لتوا نحس في ملمس شفايفو فوق شفايفي...مزلت نشم في ريحتو...و مزلت نحس بقربو...اما فرد وقت نحس في روحي وحدي...و نفس الشعور تملكني مرة اخرى...خوف من الوحدة ؟ حاولت نفركس عليه بعينيا...لمحتو من بعيد...حاولت نخلط عليه...اما بدني مش مطاوعني...صوتي خاني و منجمتش نادي عليه...غمضت عينيا بالقاوي...هاربة من احساسي...هاربة من النسمة الباردة...و الجو لي تبدل...هاربة من روحي...و الاهم من هذا الكل هاربة من وجيعتي...حليتهم شوية شوية...اما المرة هاذي مش حلمة...و مش كابوس...حليتهم على واقع...واقع مخبي معاه اللي الحقيقة لي هربت منها ديما...حسيت راسي باش يطرشق...وجيعة ندرا كيف سيطرت عليا...مديت يدي شوية...حطيتها على راسي...كأني نحاول نستوعب لي صار...اما للحظة حسيت كلشي تمسح من ذاكرتي...خذيت نفس بالسيف...و دورت راسي شوية...غمضت عينيا بالقاوي و عاودت حليتهم...كاني نحب نستوعب لي قاعدة نشوف فيه...آخر حد توقعت اني نحل عينيا عليه هو مراد...دقايق تعدات منجمتش نهز راسي من المخدة...و لا حتى ننطق بحرف...كأني نحب نتأكد لي فقت و مانيش غاطسة في نفس الكابوس...يدو لي تمدت شوية..و تحطت على خدي...فيقتني على وضعي...جبدت روحي في لحظة...استندت بيدي على طرف السرير و تقعدت...نغزرلو مصدومة...مزال مسطح في بلاصتو...دوخة قوية روهجتني...منعتني حتى باش نثبت في تفاصيلو...عديت عينيا عالفرش لي يجمعنا...و نزلت عينيا نغزر لدبشي...اصلا منعرفش شنية جا لمخي و انا في الحالة هاذي...مديت يدي شوية...نلم في الفاست متاعي على بدني...برودة قوية اجتاحتني...من الخوف لي حسيتو و من الافكار لي هدت عليا...نزلت راسي شوية على صوتو يحكي
مراد:اهدا عزيزتي...مزالت الليلة طويلة...اكيد مانيش باش ناخو منك حاجة من غير موافقتك
بردت اكثر من كلامو...و فشلة خدرتني...منجمتش حتى نقوم من جنبو...حط يدو تحت راسو...يغزر لسقف و يحكي فرد وقت
مراد:امتى آخر مرة ريتك فيها ؟
بقيت ساكتة من غير حتى كلمة...كاني نحاول نستوعب وين انا و علاش انا معاه من اصلو...شمزال يحب مني اكثر..دور راسو شوية...غزرلي ندرا كيف يحكي
مراد:تتذكر ؟
بعدت عينيا من وجهو...و سرحت بذاكرتي ﻵخر مرة ريتو فيها...صحيح كان آخر ريتو فيها...اما كانت اول وجيعة ناخوها في قلبي...اول حرقة و اول دمعة تنزل على خاطر راجل...قلبي قبض عليا في لحظة...شديت دموعي باش متنزلش مرة اخرى...عالاقل منوليش ضحكة عندو كيما قبل...منجمتش حتى ندور راسي و نغزرلو...نفس تسكر عليا...منجمتش نصدق و لا نستوعب اني طحت بين يديه مرة اخرى...و منعرفش على شنية ناوي المرة هاذي زادة...كبست عالفاست متاعي اكثر مع صوتو
مراد:شنية كنت تحب تقول وقتها ؟
نزلت راسي أكثر...نتذكر في تفاصيل نهار هذاكا...نتذكر في وجيعتي...في قهرتي...في كل كلمة قالها وقتها...كانو الاحداث تعاودت قدامي...كاني نشوف في روحي و انا قدامو...نترجا فيه باش يقولي انو كلشي كذب...و مستحيل يكون استغلني...غمضت عينيا نتذكر في آخر كلامنا
انا:علاه عملت فيا هذا الكل...شنية ذنبي باش تستغلني بالطريقة هاذي ؟
مراد:انتي ما عندك حتى ذنب...انتي خلصت لي عملو خوك و كهو...توا نظن كلشي ولى واضح...تنجم تمشي على روحك...تعرف الخرجة منين
حليت عينيا مروهجة...نمنع في دموعي باش تنزل...نمنع في ضعفي قدامي...حسيت بيه كي تقعد شوية...يدو لي تحطت فوق يدي لسعتني...و خلاتني نفيق على وضعي...و عالحالة لانا فيها...خلاتني نستوعب اني مخطوفة و مجيتش هوني بارادتي...مجيتش باش نقابلو و لا حتى نحكي معاه...اصلا متوقعتش باش نعاود نقابلو مرة اخرى...جبدت روحي لتالي...وقفت في لحظة...بعدت عليه...و هزيت راسي نغزرلو...تبسم ندرا كيف...و عاود حط يدو تحت راسو...كانو ما صار حتى شي...كاني مش مخطوفة...خذيت نفس بالسيف...نلم في الحروف لي وحلت في حلقي...دوب نجمت نلقى قوة باش نسألو بيها
انا:ش..شنية تستخايل في روحك تعمل ؟
مراد:اونفاان سمعنا صوتك يا روحي
انا:مراااد...شنية لي قاعد تعمل فيه انت ؟
مراد:نفس الشي لي قاعد يعمل فيه خوك
انا:شنية ذنبي انا...علاش جبتني هوني...و شنية تحب مني ؟
جمدت في بقعتي...كي ريتو هز روحو شوية تقعد و عطاني بظهرو...حطيت يدي على رقبتي نهدي في روحي...نخمم في حل يخرجني من هوني...عديت يديا زوز على مكاتبي...ملقيتش تليفوني...بلعت ريقي من الخوف لي تسلل داخلي...مع وقفتو...تلفت عندي بالوقت...هزني و حطني...من فوق للوطة...منعرفش علاش حسيت غزرتو عراتني...خلاتني نوخر خطوة لتالي من غير ما نحس...كل خطوة يقربلي بيها...قلبي يتقبض اكثر...نفس تسكر عليا...بعد ما وقف قدامي بالظبط...نزل راسو غزرلي...منجمتش نهز عينيا في وجهو...هاربة من غزراتو ليا...من قربو و ريحتو...و من كل احساس يجمعني بيه...حب و لا كره...نقمة...حقد...معادش نحب نحس ناحيتو بحتى شي...معادش نحب نتذكر اني دخلتو لحياتي في نهار من نهارات...يدو لي تمدت لخصلات شعري...خلتني نسكر عينيا بالوقت...كبست روحي...ووخرت خطوة لتالي...دوب نجمت نهز عينيا في وجهو...يدو قعدت معلقة في الهوا...و غزرتو...خلاوني نوخر اكثر...ضربت في الباب لي ورايا...قربلي بالوقت...لي منع المسافة لي تفصلنا...و رجع حط صوابعو على خصلات شعري...جبدت روحي شوية...حط لاخرى عالباب...منع عليا باش نبعد...خذيت نفس...و عاودت غزرتلو نحكي
انا:م..مراد
مراد:نسمع فيك
انا:ا..ابعد عليا...نحب نمشي
مراد:قبل مكانش عندي وقت...اما توا ولى عندي فضول باش نسمع الكلام لي حبيت تقولو نهارتها
انا:ش..شقصدك ؟
نزل بصوابعو من خصلات شعري...و تركز بصبعو على صدري...شيرة قلبي يحكي
مراد:الكلام لي كان في قلبك نهارتها...نحب نسمعو توا
نطرتلو يدو...و هزيت راسي في وجهو...قحرتلو نحكي
انا:مفما حتى شي نحب نقولهولك...لا قبل و لا توااا...ابعععد عليا و خرجني من هوووني فيييسع
مراد:ششش...هدي روحك عزيزتي مزال بكري
مديت يديا زوز...دزيتو لتالي...و هزيت راسي غزرتلو نحكي
انا:حلل الباااب هذا...نحب نخرج من هووني
مراد:لهدرجة مقلقك وجودي ياخي ؟
انا:مراااد...يزززي...ما نحب منك حتى شي...لا نحكي معاك و لا نسمعك...خليني نمشي على روحي...و الا باش تندم عاللي تعمل فيه
قربلي اكثر...عاود حصرني مع الباب...و تبسم على جنب يحكي
مراد:شكون يندمني...انتي و لا سي خوك ؟
انا:عمر ماهوش باش يعديلك لي تعمل فيه معايا صدقني
مراد؛شنية عملتلك...مش انتي لي كنت جيني بساقيك في كل مرة
قربلي اكثر...حط خشمو على شعري...دزيتو بيديا زوز لتالي نحكي
انا:ساااقط
تبسم باستهزاء و عاود قربلي...دزيتو اكثر...و تلفت نحل في الباب...دخلت بعضي اكثر كي لقيتو مسكر...ضربت عليه بيديا زوز...نصيح
انا:حللل الباااب هذااا حلووو...فمااا حد هوووني
سكت و صوتي ضاع مني...كي حسيت بيه لصقني من تالي...نزل عليا شوية...يحكي في وذني
مراد:حتى حد ماهو باش يسمعك
مديت يدي شوية...كبست عالبواني...نحاول نحلها...حط يديه زوز بحذا راسي...شلني و منع عليا الحركة...صوتو لي نقبلي وذني...فشلني اكثر و هو يحكي
مراد:تعرف حاجة...طول الفترة لي عديتها معاك...شهر...شهرين...منتذكرش بالظبط...حاولت نلقى فيك اي شي من زهرة...غزرتها...ضحكتها...صوتها حتى
ريحتها...اما ملقيت فيك حتى شي من هذوما...و منجمتش تولي كيفها زادة...تعرف علاش ؟
غمضت عينيا بالقاوي...و دمعتي لي كنت حاصرتها لقات طريقها على خدي...منجمتش نبعدو عليا و لا حتى نمنعو انو يحكي...قربلي اكثر و كمل كلامو
مراد:على خاطرك مستحيل تكون كيفها...و مستحيل تولي كيفها زادة
انا:م..مراد...يزززي
مراد:صدقت لانا نجم نحب وحدة كيفك انتي ؟
انا:ي..يززي
مراد:انتي كيما خوك بالظبط...حتى تعرف تستهل الشفقة...اكثر من الحب يا روحي
دموعي نزلو اكثر...دزيتو لتالي...و تلفت عندو...نبعد فيه بيديا و نصيح فرد وقت
انا:اااببعععد علياااا...ابععععد...ابععععدنني
سكرت وذنيا زوز بيديا...و تكيت عالباب...دموعي حرقتني...و منعتني بشا نغزرلو...ضحك ضحكة خفيفة يحكي
مراد:رييت حتى في وضعك...تخلي الواحد يشفق عليك
انا:يزززي اسسكت...اسسسكت
قعد على طرف السرير...هزيت راسي شوية نغزرلو...تبسم على جنب يحكي
مراد:تعرف حاجة...في عيلة بن قاسم...انتي الطعم متاعهم في كل مصالحهم...من بوك لي حاول يبيعك مرتين...لخوك لي رماك بين يديا على خاطر زهرة
انا:يززي...اسسكت
كبست على وذنيا اكثر...نحس في بدني تخدر و منجمتش ناقف على ساقيا...قعدت عالارض...و تكيت عالباب نغزرلو...يعدي في عينيه عليا...و يحكي
مراد:كنت لقمة ساهلة بالنسبة ليا...البنت الوحيدة لعثمان بن قاسم...كانت محتاجة شوية اهتمام...انتي كنت تهرب من عيلتك لعندي...كنت توهم في روحك اني نحبك...مش صحيح كلامي ؟
بقيت نغزرلو من غير حتى كلمة...كل لحظة عشتها قبل...تعدا قدام عينيا...كلامو صحيح...انا كنت نفركس عالاهتمام لي ملقيتوش في عيلتي...كنت نرتاح كي نبدا موجودة معاه...كنت نحب قربو ليا...اما العبد لي كنت معاه...مش نفسو لي قاعدة نغزرلو توا...كرهت روحي اكثر من اني ننقم عليه...انا اخترت ثنية هاذي بساقيا...انا لي جريت وراه...و انا لي كنت باش نعترفلو بمشاعري ليه...انا لي كنت باش نذل روحي اكثر...نزلت عينيا من وجهو...هاربة من غزرة عينيه...من صوتو...و من حضورو معيا...انا لي حسيت بوجيعة دوبل على قبل...نزلت يديا شوية...بعد ما سكت...دقايق تعدات صوت انفاسي الوحيد لي مسموع في البيت...حتى دموعي حسيتها شاحت...و معادش عند جهد ليها...خذيت نفس نحكي
انا:ب..باش تندم على لي عملتو الكل
مراد:كيفاش باش نندم ؟
انا:عمر مستحيل يعديلك لي عملتو معايا
مراد:اصلا كلامو اكثر من فعلو
انا:المرة هاذي...باش تتحاسب يا مراد
مراد:كلشي في الدنيا هاذي عندو مقابل يا روحي
انا:تعرف حاجة...انا نشفق عليك انت...اكثر ما نشفق على روحي...حبك لزهرة باش يدمرك...هوسك بيها هو نهايتك يا مراد...اما هذا الكل كوم...و انو الطفلة لي تحبها تكرهك كوم آخر يا مراد
مراد:صدقني انا آخر شخص ممكن نخرج خاسر في الاخير
انا:كنت باش نصدقك...اما وجود عمر باش يخليك تخسر...انا ناثق في خويا...اكثر من اي حد في دنيا
هز روحو وقف...لميت روحي اكثر و لصقت في الباب...نزل عليا شوية...كبس على زندي...ووقفني...هزيت راسي ندز فيه و نصيح
انا:سيييييبني...نحيي يدددك عليا
جبدني عندو اكثر...لين معادش مسافة بيناتنا...و نزل راسو غزرلي...انفاسو ضربت في وجهي...يدو لاخرى لي كبست على جنبي...قطعت عليا النفس...قحرتو خلاتني نخاف منو و من اللي باش يصير...كبس عليا اكثر...يحكي
مراد:اغزرلي هوني يا فرخة...اطلب ربك خوك يرجعلي لي حاجتي بيه...مكانش مظطر باش نخليك هوني عندي...و باش تشوف الوجه الثاني متاع مراد...مفهوم كلامي
انا:تحلم كان عمر يرجعلك زهرة
مراد:كان ماهيش باش ترجع...انتي باش تكون البديل عليها...خلينا نشوفو سي عمر شنية يختار المرة هاذي...الطفلة لي يحبها و لا اختو البهلولة
انا:ا..انت واحد مريض يااا مراااد...صدقني باش تندم على كل كلشي
هز يدو من جنبي...كبس على وجهي...صوابعو لي تغرسو فيا...خلاوني نسكر عينيا مروهجة...نزل عليا اكثر يحكي
مراد:انتي لتوا ما ريت حتى شي مني يااا هند...و اطلب ربي ما تشوف مني شي...على خاطر صدقني ماكش باش تنجم تعيش بعدها
حليت عينيا شوية...نغزرلو...اول مرة نشوف نظرة الحقد لي في عينيه...كلامو وصلي بيه برشا حاجات...اولهم انو الحرب هاذي ماهيش باش توفى...كان ما يموت واحد منهم...نعرف و متاكدة لي عمر مستحيل يسلم في زهرة...كان على جثتو...فكرة خلاتني نتاكد انو ممكن برشا نهاية باش تكون بين يديه هو...خذيت نفس نحكي
انا:س..سيبني...ن..نحي يدك عليا
قربلي اكثر...لين حسيت بانفاسو ضربت في وجهي...نزل بعينيه لشفايفي و تبسم على جنب يحكي
مراد:تعرف حاجة...رغم اني دخلتك في اللعبة هاذي...اما كل لحظة و كل ثانية كنت نعديها معاك...نتقزز من قربك و من ريحتك...و من صوتك...حتى تعلقك بيا كرهتو...تحملتك و مزلت باش نتحملك على خاطر زهرة و كهو
مديت يديا زوز...حطيتهم فوق يدو لي كابس بيها على وجهي...نحكي
انا:س..سيبني...سيبني...و ابعد عليا
كبس عليا اكثر و دورني...دزني على طول يدو...طحت بحذا السرير بالظبط...هزيت راسي شوية نغزرلو...شاورلي بصبعو...يحكي
مراد:رد باالك نسمع صوتك...خليك مطيعة...احسن لينا زوز
جبد المفتاح...حل الباب و خرج...مديت يدي شوية...استندت بيها عالسرير...الليلة هاذي بالرسمي عشت اكبر كابوس في حياتي...عينيا قعدو معلقين في الباب لي تسكرت في وجهي...كلامو مزال يزن في وذني...للحظة خلاني نكره روحي...و ننقم على بدني...كلامو قززني من روحي قبل ما نتقزز منو...دموعي لي بدات تنزل شوية شوية...منجمتش نمنعها...و منجمتش نمنع تفكيري في الماضي...و في كل لحظة عديتها معاه...هو لي دخل لي حياتي...هو لي قرب مني...كان اول حد يقربلي بالطريقة هذيكا...اول واحد يحسسني بوجودي كأنثى...هو لي استغلني و دمرني...علاش قاااعد يلوم فيا على حاجة معنديش ذنب فيها...علاش قرب مني...باش في الاخير...يسمعني لي عديت شهور و انا هاربة منو...و لا مرة توقعت باش نقابلو مرة اخرى...و لا حتى باش نكون مظطرة نسمع الكلام هذا الكل منو هو...غمضت عينيا بالقاوي و تلكمت على روحي...مراد عطاني كلشي...و خذا من كلشي فرد وقت...نقمت عليه و على روحي و على كل كلمة خرجت من شفايفو...مديت يدي شوية...عديت صوابعي على شفايفي...تعدات صورتو بين عينيا...دوب نجمت نتبسم...منعرفش علاش قاعدة نخمم فيه و انا في الوضع هذا...اما الكلام لي حكاه معايا بكري...خلاني نخرج شوسة من الحالة لانا فيها...هو قال كلام غير لي قالو مراد...اصلا مفماش علاش يستغلني...بلكشي عندو حق و مانيش خايبة للدرجة هاذي...لدرجة انو العبد الوحيد لي وثقت فيه بعد خاوتي...و لي حسيت بقربو...و لي كنت مستعدة نسلملو في قلبي...طلع يتقزز من سيرتي...غمضت عينيا بالقاوي...و حطيت راسي بين ساقيا...هاربة من الكابوس لي أنا فيه...هاربة من كلام مراد...و من اللي سمعتو...هاربة من ضعفي...و قلة حيلتي...للحظة تمنيت يتحل الباب هذا و يدخل عمر...سبيلي الوحيد باش نخرج من هوني...و الا الباب هذا باش يبقى مسكر للابد
🌸🌸🌸🌸🌸🌸🌸🌸🌸🌸🌸🌸🌸
#زهرة تحكي:
نزلت عليها شوية...بستها من خدها...و حطيت الغطا عليها...اصلا من بكري متقلقة تحب ترقد...تبسمت و انا نغزرلها...شهور لتالي...متوقعتش باش تكون عندي فرصة اني نرقد و نفيق...و بنتي معايا...نغزرلها كاني نغزر لروحي...قبل سنين من توا...كان امي غزرتلي كيما انا نغزر لبنتي توا...كان حبتني بنفس الطريقة هاذي...و لا عالاقل حبتني كيما حبت مراد...مستحيل كان ينجم يدخل بيناتنا و لا يفرقنا...مراد سيطر عالماضي متاعي...و بيدو قاعد يجر فيا لمستقبل مظلم...مستقبل فيه كان هو...و حتى كان غاب...ذكرياتو باش تكون حاضرة معايا ديما...تنهدت بالقاوي...و هزيت روحي قمت...قربت من شباك و هزيت ريدو شوية...دنيا ظلامت...حطيت يدي عالبلار...نغزرلو...واقف مع اشرف...من تصرفاتو عرفت لي الحكاية كبيرة...و ندرا شنية لي صار اكثر...تلفت على صوت تليفونو...نزلت ريدو...و رجعت لتالي...هزيتو من طاولة...استغربت كي لقيت سليم يطلب فيه خاصة في الوقت هذا...خذيت نفس و هزيت عليه نحكي
انا:الو
سليم:زهرة ؟
انا:اي
سليم:شحاالك زهرة ؟
انا:لباس عيشك...اما لازمني نحكي معاك سليم...الموضوع مهم برشا
سليم:باهي نسمع فيك
عمر:موضوع شنية زهرة ؟
تلفت بالوقت جات عيني في عينو...منعرفش امتى دخل و لا كيفاه دخل...ملامح وجهو غير العادة...نزلت تليفون و علقت عليه...من غير ما نزيد حتى كلمة معاه...حطيتو من يدي و قربت منو...وقفت قدامو بالظبط...و هزيت راسي غزرتلة نحكي
انا:ش..شبي حالتك هكا الساعة
عمر:ه..هند ؟
انا:شبيها ؟
عدا يدو على وجهو بعصب...يرد في نفس فرد وقت...و يحكي
عمر:مع مراد
انا:ش..شقصدك مع مراد ؟
عمر:خطفها
حطيت يدي مصدومة من آخر كلمة...متوقعتش باش يوصل لهند و يعمل فيها هكا...لي تعدا عليا خطر على بالي في لحظة...كان يعاود صنعتو معاها ؟ باش يقتلها في الحياة...حاولت نهدي روحي...فرد وقت نخمم في كلام نهدي بيه البركان لي شعل في عمر...و خلاه واقف بلا حيلة...قص علينا صوت الميساج لي لحق في تليفونو...قرب هزو بالزربة...و حلو...نزلت راسي نقرا فيه << زهرة مقابل هند >> هزيت راسي غزرتلو بالوقت...احساسي ما يجي شي قدام غزرة عينيه لي تبدلت...اصلا الطلب متاع مراد واضح من تصرفو...اكيد ماهوش باش يضيع الفرصة هاذي عليه...نعرف كان نرجع لمراد...نكون رسمت طريق نهايتي...اما مستحيل نخلي هند تكون الضحية جرايري انا...يزي لي صار فيها قبل...كبست يدو على تليفون...خلاتني نهز راسي في وجهو...خذيت نفس...و قربت منو اكثر...حطيت يدي على يدو...باردة ثلج...بردتني اكثر...تبسمت نحكي
انا:متخاافش...هند باش تكون مليحة
نزل راسو غزرلي ندرا كيف...كبست على يدو اكثر...نحكي
انا:مانيش باش نخليه يأذيها عمر...الطلب متاعو واضح
هزلي براسو لا...جبدني من زندي...و حضني بالقاوي...لدرجة ملقيتش نفس بين يديه...بقيت نسمع فيه و يحكي
عمر:مستحيل...مستحيل نرجعك عندو مرة اخرى
مديت يدي كبست على جنبو...فرد وقت نحاول نخمم اني نلقى حل يوصلنا لهند...خذيت نفس نحكي
انا:متخاافش عمر...مدامو يحب عليا...مستحيل يأذي هند
غرس يدو في شعري...باسني من راسي و جبد روحو لتالي...يحكي
عمر:زهرة...خليك انتي هوني مع ريحان...و مهما صار متخرجش منها الدار مفهوم كلامي
كبست على يدو في لحظة و هزيتلو براسي لا...نحكي
انا:مستحيل...مستحيل نخليك تمشي من هوني
عمر:وقيت باش نحطو عند حدو
انا:شباش تعمل عمر ؟
عمر:منعرفش...اما سي يعقوب باش يوصلني ليه اكيد
انا:عمررر يززي كهو...مستحيل نخليك تواجه مرااد
عمر:لي عندو اختي...هند يا زهرة
انا:نعرف...اما خلينا نخمو في حل...كلم سليم يجي يعااونا
حط يدو على خدي...كبس عليا...و غزرلي ندرا كيف...يحكي
عمر:اسمع الكلام المرة هاذي...و اعمل لي قتلك عليه
انا:لااا...مستحيل نخليك تمشي
مديت يدي حطيتها على خدو...بنفس الطريقة...نترجى فيه بعينيا و نحكي فرد وقت
انا:اسمعني عممر...نعرف لي مراد ماهوش باش يعاود لي عملو معايا في هند...كان يوصل يمسها...يخسر فرصة اني نرجعلو
عمر:ماكش باش ترجعلو...و مستحيل نخليه يقربلك مرة اخرى...الحكاية ولات شخصية بيني و بينو...و باش نحلوها بيناتنا...المهم انتي و هند باش تكونو بخير
دور راسو شوية غزر لريحان...تنهد بالقاوي...و تبسم يحكي
عمر:و ريحان زادة
هزيتلو براسي لا...نزل عليا شوية...باسني من جبيني...و قرب من ريحان...نزل عليها باسها...بقيت نتبع فيه مروهجة...قلبي خض بالقاوي...و خلاني نتاكد انو كان صار و عمر خرج من الباب هذا و منجمتش نمنعو...مستحيل نشوفو مرة اخرى...و لا حتى نجم نحضنو و نشم ريحتو...تقويت على روحي و قربت منو...شديتو من يدو نحكي
انا:متمشيش عمر...تو نلقاو حل مع بعضنا
عمر:متصعبهاش يا روحي...اعمل لي قتلك عليه لين نرجع...باهي
هزيتلو براسي لا...عاود باسني و جبد يدو مني...غزرتو خوفتني اكثر...اول ما عطاني بظهرو...خلطت عليه للباب...محاولة مني باش نحبسو...خرجت معاه لبرا نحكي
انا:عمممر اسمععني...اسمعني امااانك...بالطريقة هاذي باش تعقد الامور اكثر
عمر:ارجع لدااار زهرة
انا:بااهي هزني معاااك...خليني نقابل مراد
عمر:يززززي زهرررة...يزززي كهووو...قتلك ماكش باش تقابلو و لا تحكي معاه مرة اخرى...ارجع لدار توا...ازرب روحك
عدا يدو على وجهو و حل الباب ركب...لحقت عليه...باش نحلها خدم الكرهبة...و طار بيها...حاولت نخلط عليه...لعبت بيا ساقي و طحت عالارض...تمسخت بالما متاع المطر لي في الارض...دموعي نزلت بالوقت...و الخوف لي داخلي قوا اكثر...على خاطرني منجمتش نمنعو...مديت يدي نمسح في دموعي لي قوات اكثر...كي ريتو حبس الكرهبة و رجع عندي...نزل عليا شوية...يحكي
عمر:علاااش متسمعش الكلام يا زهرررة
ترميت في حضنو بالوقت...منجمتش نصدق لهو رجع عندي...وليت نبكي بالشهقة...شي من الخوف لي حسيتو كي بعد عليا...و خوف من اللي جاي زادة...عدا يديه زوظز على ظهري...يحكي
عمر:يزززي كهو...هيا قووم معايا
انا:م..م..ماكش باش تمشي
عمر:هيا قووم معايا توا
كبس عليا وقفني...حط الفاست متاعو على اكتافي...و رجع معايا لدار...سكر الباب بيدو...و جبدني عندو اكثر...عاود حضني يحكي
عمر:يززي كهووو...اهدااا
انا:خ..خفت...تعملها و تمشي عندو
عمر:راهي اختي يا زهرة
انا:نعررف...اما تو نلقاو حل مع بعضنا
عمر:باهي يا روحي...ايجا اقعد ساعة
هزيتلو براسي ايه...و مشيت معاه لصالة...احسن شي ريحان مفاقتش بعد اللي صار...قعد بجنبي عالفوتاي يحكي
عمر؛موجوعة ؟
انا:لا
عمر:لازم تبدل دبشك توا
انا:م..منحبش
عمر:زهرة متعبنيش اكثر...عيش حبي
انا:ب..باهي...انا نبقى مع ريحان و انت جيبلي دبشي
تنهد بالقاوي...و هزلي براسو ايه...هز روحو وقف...بقيت نتبع فيه بعينيا لين طلع...مستحيل كنت نطلع انا و نخليه هوني...نعرف لي ينجم يمشي و يخليني...دورت راسي نغزر لريحان...نستمد في قوتي منها...دقايق و رجعلي...حطلي دبشي بجنبي...و يعاون فيا من غير حتى كلمة...اصلا تاكدت لي رجع باش يهزني معاه...من دبش ريحان لي نزلو...خذيت نفس نحكي
انا:ع..عمر
عمر؛نسمع فيك
انا:فما حاجة ضرورية...لازمك تعرفها
هز راسو شوية...غزرلي ندرا كيف...خذيت نفس و حطيت يدي على يدو نحكي
انا:ا..انا كذبت عليك في حاجة
عمر:زهررة
انا:ل..ليلة هذيكا...نقصد قبل ما مراد يعمل فيا اكاكا...كنت في طريقي لعندك
غمضت عينيا بالقاوي و عاودت حليتهم...نمنع في دموعي...و الغصة لي واحلة في حلقي...باش نجم نحكي
انا:ل..ليلتها حكيت مع امي
عمر:كنت تعرف لي هي فاقت
هزيتلو براسي ايه...و كبست على يدو اكثر...نهدي فيه و نحكي فرد وقت
انا:م..مقصدتش اني نكذب عليك...اما خفت من ردة فعلك هاذي...خفت تتصرف من راسك و تأذي روحك
عمر:كمل
انا:ح..حكات على مزرعة
عمر:مزرعة شنية ؟
انا:مزرعة تخص مراد...قاتلي باش تلقى السر متاع مراد غديكا
عمر:شقصدها ؟
انا:منعرفش...كنت باش نخبر سليم يتصرف...على خاطرني خفت عليك
عمر:وين المزرعة هاذي ؟
انا:مرة قريت اوراق تخص مراد...منتذكرش العنوان بالقدا...اما نعرف اسم المنطقة
عمر:وين ؟
انا:باش نخبرك...اما توعدني ساعة...لي باش تهزني معاك
عمر:زهررة...يززي كهو...كان حكيت قبل...الامور مكانتش باش توصل لهوني
انا:منقصدش يااا عمر...والله خفت عليك...بعد اللي ريتو معادش نجم ناثق في مراد مرة اخرى
عمر:اختي بين يديه توا يا زهرة
انا:ماااهوش باش يأذيها...هو يحب عليا انا يا عمر...يستغل في هند...باش يخليني نرجع...و انت باش تخرجها من غديكا...فما حلين معندهمش ثالث
بقى يغزرلي من غير حتى كلمة...مديت يدي حطيتها على خدو نحكي
انا:الاول انك تقبل اتفاق مراد...زهرة مقابل هند...عالاقل انا نعرف مراد و نجم نتصرف معاه
عمر:مستحيل...على جثتي
انا:باهي...كان هكا باش نمشي انا و انت توا...حتى قبل ما يطلع نهار...نلقاو سر مراد مع بعضنا...و باش يكون عندك سلاح تواجهو بيه...من غير ما تخسر حتى حد فينا...اماانك عمر
قربتلو اكثر...عنقتو بكل قوتي...نشم في ريحتو فرد وقت...عدا يدو على ظهرو...يحكي
عمر:باهي يااا زهرة...باهي
جبدت روحي منو...و كبست على خدو اكثر...نحكي
انا:الامور باش تكون بخير
هزلي براسو ايه...و عاود كبس على ظهري...عديت يدي على شعرو نحكي
انا:هند باش تكون لباس
عمر:خلينا نمشو توا
عدا يدو على شعري...جبدت روحي شوية...و خذيت نفس نحكي
انا:ريحان باش تبقى عند امي فتحية...و مريم باش تكون معاها زادة
عمر:لي تحب عليه باش يصير
تبسمت و هزيتلو براسي ايه...نعرف لي ميحبش يدخل في تفاصيل...و لا يحب يسأل علاش اخترت امي فتحية...فاطمة...يمكن على خاطر خفت انهم يمنعوني منها مرة اخرى...و لا سلمى تتعامل مع مراد اخرى...معادش نجم نامن لحد بعد لي  تعدا عليا...خاصة و هند في الوضع هذا اكيد العيلة باش تكون داخلة بعضها...بستو من خدو نحكي
انا:تنجم تعاوني نحضر ريحان
هزلي براسو ايه...و جبد روحو مني...اول ما هزها...حلت عينيها و ضحكتلو...حسيتو تفرهد شوية و هو يغزرلها...لبسلها الفاست متاعها...باسها و هز روحو وقف يحكي
عمر:هيا عزيزتي
هزيت روحي وقفت...و هزيت الصاك متاع ريحان في يدي...و خلطت عليه...حط ريحان من تالي...عاودت غفات بالوقت...ركبت بحذاه و كبست عالجبيرة في يدي...الطيحة متاع قبيل خلاتني نتوجع منها اكثر...اول ما خدم الكرهبة...حطيت راسي على كتفو...نزل راسو غزرلي ندرا كيف...حسيتو تغشش من الفازة اني خبيت عليه لي صار...اما رغم هكا ما قال حتى كلمة...يدو لي تمدت ورا ظهري و كبست عليا فرهدتني...و عطاتني قوة غريبة...هزيت عينيا في وجهو...نحكي
انا:سامحني عمر
باسني من جبيني و كبس عليا اكثر...سكت من غير ما نزيد معاه حرف...نعرف فاش قاعد يخمم و اللي يدور في راسو...كيما نعرف انو اللي باش يصير هو اكبر امتحان لينا الكل...و الثنية لي شديناها توا...مخبية معاها برشا حاجات...يمكن تكون ثنية جديدة لينا زوز...و يمكن تكون آخر ثنية نقطعوها مع بعضنا .

#سمر💙💙💙