زهرة🌸

الحلقة مئة و عشرون

حلقة 120
حسام يحكي:
مديت يدي شوية...نبعد في خصلات شعرها لتالي...بعد توا مستحيل نخلي لي تعدا علينا...يتعاود معانا مرة اخرى...مستحيل نضيعها بعد ما لقيتها...مستحيل نجم نستخايل روحي من غيرها...نزلت عليها شوية...بستها من خدها و جبدت روحي منها...محبيتش نفيقها...نعرف لي تعبت في غيابي...و تعبت بين يديا البارح اكثر...تبسمت و انا نذكر في اللي صار...هزيت روحي لبيت البانو...عملت دوش خفيف...بدلت دبشي...قربت منها غطيتها...و خرجت من البيت...هزيت راسي شوية...نغزر لبيت فرح...قلبي عصر عليا كي العادة...منعرفش علاش هزوني ساقيا ليها...كبست عالبواني و حليت الباب...في لحظة تمنيت...نلقى بنتي تلعب في وسط سريرها...تمنيت اني نحملها و نبوسها و نشم ريحتها...تنهدت بالقاوي...ورجعت لتالي...هارب من الذكريات لي هدت عليا...نزلت اللوطة...و دخلت للكوجينة...نخمم شنية نحضر و لا من وين نبدا...جاب ربي مزال شوية قضية هوني...حطيتها عالرخامة...و نحضر في القهوة فرد وقت...تبسمت كي حسيت بيها ورايا...تلفت شوية...نغزرلها...السكينة ترخفت من يدي...قدام المظهر لي قاعد نشوف فيه...عديت عينيا عليها من الفوق للوطة...على بدنها لي غاطس في وسط سوريتي...مقدمة ساق على ساق...شعرها داخل بعضو...و خصلات منو مبلولين لتوا...نزلت بعينيا للاخر فلس لي بقى محلول و مخلي شوية من صدرها لبرا...لساقيها لي حفيانين...كان مش حالتها هاذي...نقول عاملة فيا بلعاني...فقت من سرحتي...على صوتها تحكي
مريم:صباح الخير
عديت يدي على وجهي....نحس في ريقي شاح...جاب ربي خذيت العفو العام...مكانش مزالني نتكرم لتوا...تبسمت نحكي
انا:صباح الحب
تلفت باش نطفي عالقهوة...قربتلي بالوقت...حضنتني من تالي...تحكي
مريم:شبيك قمت و خليتني
حطيت يدي على يديها زوز...لي كابسة بيهم على كرشي...و تلفت عندها...بعدتلها خصلات شعرها لتالي...نحكي
انا:محبيتش نفسد عليك نومتك
مريم:اما زادة مكانش لازمك تقوم و تخليني
انا:ملا صغرونتي تغشت ؟
مريم:لااا...اما معادش نحبك تبعد عليا
انا:كان بقيت بجنبك...اكيد باش نتعبك اكثر
نزلت بصوابعي على رقبتها...على تراص العضة لي ولات غامقة اكثر...فوق بوسة الخال بالظبط...هاذي من اهم نقاط ضعفي...لي تخليني نسلم في كلشي...غمضت عينيها بالوقت...تبسمت نحكي
انا:توجع فيك ؟
مريم:مممم
انا:يظهرلي باش تعدي عمرك و انتي موجوعة منها
مريم:يرضيك هكا ؟
انا:شنعمل لعمري...مش بيدي
عدات يديها زوز على اجنابي...و غزرتلي ندرا كيف...تحكي
مريم:نهون عليك انا ؟
انا:مريم...متغزرليش هكا عزيزتي...خاطرك انتي باش تخلص الفتورة
قربتلي اكثر...حطت راسها على صدري...و كبست عليا بيديها زوز...تحكي
مريم:ماكش باش تبطلها العادة متاع تهديد هاذي
غرست يدي في شعرها...اصلا من تصرفاتها...عرفت لي مزالت تاعبة...بستها من راسها...و تبسمت نحكي
انا:متحبش تفطر حبي ؟
هزت راسها شوية...غزرتلي ندرا كيف...و ضيقت عينيها...تحكي
مريم:انت باش تحضر الفطور ؟
انا:فما حد غيري معاك ؟
مريم:مممم...باهي هاني نستنى ملا
انا:اقعد ساعة
مريم:منحبش
انا:يااا بننتي هكا...مانيش باش نجم نعمل حاجة
مريم:لهدرجة قربي يعمل فيك
ضحكت ندرا كيف و هي و تغزرلي...عرفتها تستفز فيا الفرخة...نزلت عليها في لحظة...و قصيت ضحكتها...كي جبدت شفتها اللوطنية بسناني...دوب عضيتها نحكي
انا:قداش من مرة قتلك متلعبش معايا...خاطرك باش تطلع خاسرة في التالي
مريم:شكون قلك لانا طلعت خاسرة ؟
انا:بربي ؟
مريم:مممم انا كسبتك انت...و فكيت منك هذا زادة
حطت يدها على قلبي...لي دقاتو فضحتني مع كلامها...عندها حق...انا كي نوصل ليها...معادش يهمني شنية خليت ورايا...مهم عندي انها معايا و كهو...صوابعها لي سرحت على رقبتي...دخلتني بعضي اكثر...كبست على يدها و قربتها لشفايفي...بستها منها...نحكي
انا:يززي كهو
مريم:باهي شقولك نعاونك في تحضير الفطور ؟
انا:انتي ؟
مريم:مممم انا
انا:مش لازم يا روحي
مريم:شقصدك ؟
انا:يا حبي انتي كي تستلمها الكوجينة...توحل هوني
مريم:كنت نستلمها على خاطرك سي حسااام...توا ولى مش عااجبك
جبدت روحها مني على غفلة...و عطاتني بظهرها...خطفتها من يدها قبل ما تبعد...حضنتها من تالي...و نزلت عليها شوية...نحكي
انا:وين ماشية ؟
مريم:شيهمك انت ؟ مدام مفما حتى فايدة من حضوري...خليني نخرج احسن
انا:صاار...و شكون قلك مفما حتى فايدة ؟
مريم:انت قلت ؟
تنهدت بالقاوي...و تبسمت فرد وقت...كبست عليها اكثر...و عديت خشمي على شعرها...نحكي
انا:معاادش تحكي كلام اكبر منك يا فرخة
مريم:شنية قلت انا ؟
نزلت بيديا زوز لاجنابها...و دورتها عندي في لحظة...عديت عينيا على وجها...قلبت شفايفها مش عاجبها...في اللحظة هاذي بالظبط...رغبتي زادت فيها اكثر...قحرتلي...تحكي
مريم:
شنوة زادة ؟ ياخي انت ..
بقية كلامها ضاع بين شفايفي...منجمتش نصبر عليها اكثر من هكا...صوابعها لي تغرسو في صدري...خلاوني نتمادى اكثر...و نغطس فيها اكثر...نزلت عليها شوية...هزيتها بين يديا...نحكي
انا:قتلك متلعبش معايا يا مريم
مريم:باهي نزلني ساعة
انا:بالساهل ياخي
مريم:و الفطور ؟
انا:نفطرو برا
مريم:باهي ملا...خليني نطلع نلبس حوايجي
حطيتها فوق الطاولة و حاوطتها بيديا زوز من شيرتين نحكي
انا:شكون قلك باش تطلع ؟
مريم:حسااام ياا رووحي...شبيك ياخي ؟
انا:انتي سبابي
مريم:شنية عملتلك انا ؟
كبست على دقنونتها و قربتها ليا خطفت بوسة اخرى من شفايفها...و نزلت بصوابعي...من رقبتها لاول فلس عند صدرها...و عاودت غزرت لوجها نحكي
انا:شنية لي معملتوش فيا انتي ؟ هذا السؤال الصحيح
جبدتها عندي اكثر...و غطست في شفايفها مرة اخرى...يديا تمردو اكثر على بدنها...لتوا مشبعتش منها الفرخة...و عمري ما وصلت للحالة لانا فيها توا...حليت بقية الازرار...و مديت يديا زوز...نزل في السورية لتالي...قص عليا صوت تليفوني...لي محبش يحبس...كبست على جنبي تحكي
مريم:ح..حسام...بلكشي تليفون مهم
استندت بيدي عالطاولة...نرد في نفس...و مديت يدي لاخرى هزيت تليفوني...لي وراها...ضيقت عينيا كي لقيتها امي...غزرتلها و هي تحاول تنزل...قحرتلها نحكي
انا:شد بلاصتك
خذيت نفس طويل...نهدي في روحي...و رديت عليها نحكي
انا:فتحية ياخي مانيش ولدك انا ؟
فتحية:شبي عزااك...عالصباح ؟
انا:نحب نشوف صغاري...ارتحت توا امي
ضربتني بيدها لكتفي...عديت عينيا عليها مرة اخرى...و فقت من سرحتي...على صوت امي تحكي
امي:يكب سعدك...معادش فما احترام حتى لامك
انا:شفما فتحية تفضل ؟
امي:هاني نستنى فيك انت و مريم
انا:علاش شفما ؟
امي:عمر جاني في الليل و خلى ريحان هوني
جبدت روحي خطوة لتالي...دم جمد في عروقي...اكثر من فكرة جات في مخي...خذيت نفس نحكي
انا:شصاار امي ؟ عمر و زهرة لباس ؟
امي:منعرفش...اكا علاش كلمتك...قالي الصغيرة امانك عندكم...و بالاخص عند حسام و مريم...مشى في بالي تعرف بيها الحكاية...خاصة وقت جاني بعد ما مشيت انت
عديت يدي على وجهي...فكرة اني مانيش باش نخلط عليه...و انو المشكلة كبرت اكثر من اللي توقعت...بردتني...تلفت لمريم لي تسكر في سورية على بدنها و تغزرلي مستغربة...خذيت نفس نحكي
انا:باهي امي...مسافة الثنية و نكونو عندك
امي:رد بالك على روحك و على مريم
انا:باهي
علقت عليها...و قربت منها...نزلتها من الطاولة...نحكي
انا:هيا عزيزتي...برا البس حوايجك فيسع
مريم:شفما حسام ؟ شصاار ؟
انا:هاني باش نحكيلك في الثنية
بستها من جبينها نهدي فيها...و سبقتها قبلي...بقيت نغزرلها لين طلعت...كبست على تليفوني...و طلبتو...دخلت بعضي كي مهزش عليا...حتى زهرة نفس الشي...اخر شي كنت نعرفو انهم مع بعض...و في بلاصة بعيدة على هوني...علاش حتى يرجع هوني...و علاش حتى يخلي ريحان عند امي...غزرت لساعة نلقاها 7:30 هزيت راسي نغزر لمريم لي هابطة بالزربة...قربت مني تحكي
مريم:خلينا نمشو
هزيت الفاست متاعها من الفوتاي...و قربت منها...نحكي
انا:هيا عزيزتي
مريم:امي فتحية لباس ؟
انا:لبااس متخافش
مريم:شنية لي صار ؟
خذيت نفس...قربتلها اكثر...و حاوطت وجها بيديا زوز...نحكي
انا:منعرفش شنية لي صار...اما عمر و زهرة خلاو ريحان مع امي...على هذاكا باش نبقاو فترة مع فتحية لين يرجعو
مريم:زهرة لباس ؟
انا:لباس عزيزتي...كي نفهم الحكاية باش نطمنك اكيد
مريم:باهي...خلينا نمشو ملا
انا:باهي يا روحي
خلطت عليها للكرهبة...عديت الثنية بين المد و الجزر...غاطس في افكاري...هاذي اول مرة اخبار عمر تغيب عليا...و ندرا شنية لي صار في غيابي...حتى مريم حسيتها دخلت بعضها...من يديها لي قعدت تفرك فيهم ثنية كاملة...اول ما وصلت شديت الفران بالقاوي...و نزلت...لازمني نفهم الحكاية من امي ساعة...قبل ما نعمل حتى خطوة...اول ما دخلنا قربتلها...مريم تحكي
مريم:امي وينها ريحان ؟
امي:في بيتي عزيزتي
مريم:هاني باش نطلع عندها...كان معندكش مانع
امي:اطلع بنتي...حتى هي لازمها شكون يتلهى بيها اكثر
مريم:بااهي
اول ما طلعت...قربت منها قعدتها عالفوتاي...و قعدت بجنبها نحكي
انا:امي فهمني في الحكاية من الاول...شنية لي صار بالظبط
امي:و انا كلمتك باش نفهم منك...خاطرني ما نجمت ناخو منو لا حق و لا باطل...راني اكثر وحدة نعرف عمر...و الطريقة لي كلمني بيها...مسمعتهاش منو من قبل...مدام وصل يأمنك على بنتو...معناها الحكاية كبيرة برشا
انا:زهرة كانت معاه ؟
امي:بقات في الكرهبة
انا:باهي امي متخاافش...كلشي باش يكون مليح اكيد...انا لازمني نمشي توا...هوكا مريم و محمد بحذاك...و كان صار شي كلمني باهي
امي:طمني عليه...عيش ولدي
انا:باهي امي تهنى
بستها من راسها و هزيت روحي خرجت من دار...و نطلب فيه فرد وقت...يأست لي هو باش يهز عليا...اخر حد ضرب في مخي...سليم...هو الوحيد لي ينجم يوصلني ليه...و هذا لي عرفتو من عمر اخر مرة...و من مساعدتو ليهم...شديت الثنية للمركز لي يخدم فيه...هذا آخر ينجم يوصلني لعمر...و نفهم لي صار في غيابي...و لا عالاقل نجم ندخل في آخر فرصة...و مهما كانت الاحتمالات متاكد انو مراد لي باش يطلع خاسر في آخر الحلقة...يزيه ما ربح لتوا...و يزي من اللي عاشوه زوز جرايرو....يمكن هذا هو اعلان نهاية الحرب...و بداية جديدة #لزهرة_و_عمر .
🌸🌸🌸🌸🌸🌸🌸🌸🌸🌸🌸🌸🌸
مراد يحكي:
حطيت يدي على جنبي...و تكيت لتالي...نغزر لنهار لي بدا يطلع...و الثنية لي ماشية و تنقص...و خط نهاية ولى واضح...النهاية لي يمكن تفصلني و لا تجمعني بزهرة للابد...زعمة باش تكون هاذي المرة الاولى لي نخسر فيها ؟ خسارتي لزهرة هو خسارتي لروحي...خسارتي لكل نفس يدخل و يخرج مني...لكل قطرة دم قاعدة تجري في عروقي...خسارتي لزهرة هي نهايتي...مديت يدي شوية...نزلت البلار...و تكيت راسي لتالي...نتحسس في النسمة الباردة على وجهي...النسمة لي كنت نحسها دافية خاطرها هي بجنبي...الدنيا لي كنت نحسها عندها معنى...في كل مرة نغزر لعينيها...اليوم بالظبط...داخل لنهاية الحرب و يديا فارغة...يا قاتل يا مقتول...يا منتصر يا مهزوم...و الاهم من هكا...انو نهاية الحرب...باش تكون في البقعة لي بدات فيها الحرب النفسية متاعي...غمضت عينيا و رجعت سنين لتالي...سنين طويلة...و مهما تعدا عليها...منجمتش نفسخ منها حتى تفصيل عشتو...حتى لحظة مريت بيها...لتوا غزرة عينيه...محفورة في ذاكرتي...لتوا نسمع صوتو في عز الصمت لانا فيه...و لتوا نحس بالطفل الصغير لي مزال مدفون في القبو...الطفل الصغير لي خرجتو مني و خرجت لدنيا بوجه جديد...خرجت و انا مرااد...مش ابن اكبر محامي في البلاد...دفنت كلشي ورايا...و شقيت ثنيتي وحدي...ثنية كان لازمني نخلي فيها كريم يعيش لانا تحرمت منو...و لا نقول نخليه يحقق اللي انا حلمت بيه من صغرتي...انا بيدي كسرت المستحيل...و معنديش الكلمة هاذي في قاموسي...و ماهيش باش تكون عندي...انا قبل سنين من توا تحصرت في تركينة مظلومة...خلاتني نحط قواعد اساسية...مستحيل يجي نهار و نخلي حد يتعدا عليها...و كل زلقة بفلقة...منجمش نغفر و منعرفش نسامح...حتى كان جا العبد من دمي و لحمي...اما زهرة خلاتني نعفس بساقيا عالقواعد هذوما...خلاتني نغفر مرة و زوز و ثلاثة...خلاتني نعرف نحب...حتى انتصار...محبيتهاش قبل...يمكن عرسي بيها كان لاحتمالين...اولهم انها كانت عندها طفلة قبل و ماهيش باش تمرجني على الصغار...و الثانية حبيت نثبت لامي مرة وحدة انو تنجم تكون عندي عيلة لي تحرمت منها...اما وسط السنين هذوما لقيت روحي اسير حبها...لقيت روحي نحب في طفلة عندها 12 سنة...و حبيتها اكثر نهار بعد نهار...مرضت بيها...و منجمتش نلم روحي مرة اخرى...نزلت راسي شوية...نغزر للفرد في يدي...نفس الفرد لي كان بين يديه ايامات لتالي...و لي كانت تنجم تحرر بيه روحها مني...كانت تنجم تاخو حريتها بموتي...اما بعملتها...خلاتنا في العد التنازلي...دورت راسي على صوت الفران...كبست عالفرد في يدي اكثر...و غزرت لشوفور لي نزل حلي الباب بالوقت...خذيت نفس طويل و نزلت...نغزر لدار لي بدا منها كلشي...و اخر حاجة توقعتها...انو حكايتنا باش توفى هوني زادة...نقطة البداية...هي نفسها نقطة النهاية...لي باش يوفى فيها كلشي...و الغريبة انو الاطراف لي حاجتي بيها جاتني بساقيها...قربت بخطوات ثابتة...نغزر لرجالي لي حلو الباب...تنهدت بالقاوي...و دخلت...رغم انو البلاصة هاذي تخنقني بطريقة غريبة...اما عالاغرب منجمش نخمم في بلاصة غيرها...منجمش ناخو قرار كبير قبل ما نجي لهوني...و نقعد مع روحي...و الاهم قبل ما نحكي مع امي و نشاورها...رغم اني نعرف لا هي باش تحكي و لا حتى انا باش نسمعلها...اما هذا الكل كان ضروري بالنسبة لكل خطوة في حياتي...اما الخطوات متاع توا...ماهمش محسوبين...و مانيش مخططلهم...خطوات يمكن نخرج خاسر كلشي و لا رابح زهرة لاخر نهار في عمري...و مع تفكيري فيها حبست على صوتها...صوتها لي خرج مع عيطة وحدة باسمي
زهرة:مرررراااااااااااااددد
غمضت عينيا بالقاوي و عاودت حليتهم...تقشعيرة خفيفة سرات في بدني...كيما كل مرة نحسها قريبة مني...ساقيا رزنت...و رغم قوتي...مزلت نضعف في حضورها...خذيت نفس طويل قبل ما نتلفت عندها...و تجي العين في العين...هزيتها و حطيتها اكثر من مرة...ما تبدل فيها شي على آخر مرة ريتها فيها...كان الجبيرة لي في يدها...خصلات شعرها لي غلبتها النسمة...غزرتها لي متبدلتش اما لمعة الحقد فيهم قوات اكثر...تفاصيل صغيرة بالنسبة لاي حد...اما وقعها كبير بالنسبة ليا...الطفلة لانا نغزرلها توا...هي قطعة مني...روحي و دنيتي...رغم انها تكرهني...تكره حضوري و قربي منها...اما منجمش نبعد...و مهما حاولت فما حاجة تمنعني اني نسلم فيها...نسلم في احساسي ناحيتها...في حبها لي قاعد يمشي في عروقي...يمكن مانيش باش نجم نخليها تحبني...حتى لخظة وحدة...اما قربها كافي باش يخليني نعيش و نتنفس كل لحظة...ثواني...دقايق...منعرفش قداش تعدا بالظبط على وقفتنا...اصلا معاها و في حضورها...الوقت ميوليش عندو معنى في حياتي...تبسمت على جنب...كي سمعتو يعيط عليها من تالي
عمر:زهرررررررة
دورت راسي شوية نغزرلو...واقف عند المدخل متاع الدار...اكيد خرج بعد ما سمع صوتها...ستنيت لقاءنا هذا ليا برشا...لقاء كان كافي باش يبين حاجة كل حد فينا من غزرة وحدة...غزرتو ليها...خلاتني نغزرلها بالوقت...تبسيمتها ليه حرقتني...و قتلتني في بلاصة المرة الف...كبست عالفرد في يدي...و هزيتو في وجهو...و نفس ردة الفعل كانت منو...تبسمت و انا نغزر للفرد متاعو لي وجهو ليا...في الاخير مطلعش احسن مني...و مبقاش الاستاذ البريء...هزيتو و حطيتو...مستحيل حد غيري يحط نهاية للحكاية هاذي...كبست عالفرد اكثر...و دورتو ليها...خطواتها لي قربتلي بيهم رزنو...رجعت ساقها لتالي...عديت عينيا عليها...المسافة الفاصلة بيناتنا...خلاتني نعاود كل لحظة و كل تفصيلة عشتها معاها قبل...من سنين طويلة...تفاصيل حاربت و مزلت نحارب على خاطرها...زعمة وصلت لاخر نقطة...و معادش فما اختيار آخر...زعمة نجم نظغط على زناد هذا و ننهي اللعبة هوني...هاذي باش تكون اكبر خسارة ليه هو...على خاطر...ماهيش باش تمشي وحدها من هوني...غزرتها كانت كافية باش توصلي التحدي متاعها...و خوفها لي تعدم مني...كانها توصلي في خسارتي...بغزراتها...لي بدلتهم من وجهي...ليه هو...نفس الغزرة لي تمنيتها منها...نفس الغزرة لي تقتلني في كل مرة...فقت من سرحتي على صوتها تحكي
زهرة:عمممر...ماااكش مجبوور باش تهز الفرد...انت ماكش مجرم و مااكش باش تكوون
عمر:علاااش رجعت ؟
زهرة:رجععت على خاطرك...رجعت خاطرني منجمش نخليك وحدك
عمر:مرااااد...انت حساابك معايا انا خليها تمشي
تبسمت بالوقت...تبسمت و انا نعدي في عينيا على ملامح وجها...على لون عينيها لي ولى غامق اكثر...و خوفها لي بدا يظهر...خوفها عليه هو...مش مني انا...هزيتها و حطيتها نحكي
انا:كانت عندك فرصة قبل...كنت تنجم تقتلني و تعيش حياتك يا زهرة
زهرة:مانيش كيفك يا مراد...منقتلش باش نعيش...اما مدام فيا نفس...باش نبقى نحارب فيك لاخر لحظة في عمري
انا:حتى انا في رايي...من غير ما نطولو فيها اكثر
زهرة:ملا خليها توفا توا
عمر:مرااااد...خلييها تمشي من هوني
تلفت عندو شوية...مزال الفرد متاعو في وجهي...تبسمت نحكي
انا:شقولك نخليك تختار...حياتك و لا حياتها ؟
عمر:خليها تمشي...مدامك وصلت لهوني واجهني
انا:صعيب القرار شوية سي عمر...خاطرني مدامني وصلت لهوني...اكيد باش نسترجع منك كلشي
عمر:انت ما عندك حتى شي عندي...و ما تملك حتى شي من الاول...مهما كانت النتيجة...انت الوحيد لي باش تطلع خاسر في الحكاية
زهرة:مدامك تحب عليا هاني قدامك مراد...اعمل فيا لي تحب عليه...المرة هاذي ماكش مظطر باش تخليني نمشي...و حتى انا مانيش باش نهرب منك
انا:باهي عزيزتي...اما قبل كلشي نحب نقدملك عرض خاص...قبل ما نسكرو كتابنا
قربت منها بخطوات ثابتة...نسمع فيه يحكي من تالي
عمر:حدك غااادي مراااد
غزرت لعينيها...و تكلمت من غير ما نتلفت ليه...اصلا معادش نحب نضيع حتى ثانية...تخليني نضيع في تفاصيلها اكثر
انا:كاااان تحب اضرررب من عندك...و هاني باش ناخو زهرتي معايا...للابد
وقفت قدامها بالظبط...حسيت بخطواتو لي قربلي بيهم من تالي...حطيت الفرد في نص كرشها...و تبسمت نحكي
انا:متقربش اكثر
قربتلها اكثر...وقفت وراها...من غير ما نزل الفرد عليها...جات عيني في عينو مرة اخرى...قحرلي يحكي
عمر:زاايد ساااقط يااا مراااد...ديما تخبي ضعفك...ورا حاجات تافهة
انا:مانيش بحاجة لموعظتك استاذ عمر...يمكن تفيد بيها طلابك...هذا كان مزال عندك فرصة باش تقري
عمر:خليها تمشي من هوني...مدامك تحب عليا هاني قدامك...خلي الحساب الاخير يكون بيناتنا احنا زوز كهو
زهرة:عمممر...متخلييهش يوصل للي يحب علييه...متخليهش يوصلك باش تكون مجرم...ريحان بحااااجتك...امشي من هوني و معاادش تتلفت ورااك
عمر:متخااافش يا روووحي...مستحيل نخليه يضرك...انتي باش تكون لباس
زهرة:امششششي من هوووني امااانك...امشي يااا عمرررر...ابعععد عليااا...مانيش باش نتحمل خساارتك
انا:زهررتي يزززي من الدرااماا عاااد
عمر:سيييبهااااااا
انا:نزل فردك
عمر:باااهي...مدام هذا مخوفك هاني باش نزلو
نزل يدو شوية شوية...رماه عالارض...و هز يديه زوز في وجهي يحكي
عمر:سييبها توا
انا:نحب نسألك ساعة ؟ ياخي متأكد مزلت حاجتك بيها ؟
عمر:مرااااااد...من غير ما تتعدا حددوك اكثر
انا:سبق و تعديتهم
مديت الفرد حطيتو على رقبتها...و نزلت بيها على ثنايا بدنها نحكي
انا:قولك بعد ما حطيت بصمتي عليها باش نرجعهالك
بقى يغزرلي من غير حتى كلمة...ملامحو تكبست بدرجة البونية متاعو...و هذا لي حبيت نشوفو...حبيت نغزرلو و هو عااجز...لا ينجم يقرب و لا حتى يبعد...و هو بساقيه دخل للعرين متاعي...غزرلي ندرا كيف يحكي
عمر:ماكش باش تبدل حتى شي بكلامك يا مراااد...حبيت و لا كرهت انت مستحيل تنجم تكسر علاقتنا
زهرة:يااا ريتني قتلتك ليلتها يا مراااد
كبست عليها اكثر...لي حسيت بنفسها ضاق بين يديا...غزرلها...يحكي
عمر:متخااافش...مهما كان لي باش يصير...تذكر لانا معاك ديما و مانيش باش نخليك مهما صار...يا عمري
هزتلو براسها ايه...كبست عالفرد و طلقت كرطوشة في الهوا...لي خلاها...تهز يديها و تسكر وذنيها بالقاوي...قحرلي يحكي
عمر:سيييبها مراااد...مشكلتك معاايا انا
زهرة:اممشي من هووني يااا عمر...برااس ريحان اخرررج من هوني
عمر:اهددااا يااا عمرييي...هاني معاااك...مستحيل نخليك مع واحد مريض كيفو
انا:اسمع الكلام عزيزتي...باش نخليه يمشي...بعد المفاجأة متاعي ليك
دورت راسي...نغزر لرجالي لي دخلو...تبسمت...نحكي
انا:هذا حاجة خفيفة مني ليك
كبست عليها و جبدتها معايا لتالي...نغزرلو و هو محصور في وسطهم...نزلت نحكي في وذنها
انا:انتي لي وصلتنا لنقطة هاذي يا زهرة...انتي لي خليت كل حد يقربلك يظطر يعيش موجوع ديما
زهرة:سييبو يااا مراااد...هو ما عندو حتى الذنب...والله العظيم ما عندو حتى ذنب...خليه يمشي من هوني امااانك
انا؛ماهوش باش يمشي و ماهوش باش يخليك...حبو ليك باش يمنعو انو يمشي
زهرة؛ملاااا علاااش قاااعد تعمممل هكا...هاااني قدامك...اقتلني و ارتاح
انا:حبيتك تذوق شوية من اللي خليتني نعيشو يا روحي
هزيت راسي شوية نغزرلو...باقي يقاوم فيهم لاخر لحظة...لين سلم وسط اربع رجال...حااولت تجبد روحها مني...تحكي فرد وقت
زهرة؛عمممرر...سيييبني...سييبني يااا مراااد
كبست على يدها اكثر...رجعتها لتالي...تلفتت عندي...تضرب فيا لصدري و تحكي فرد وقت
زهرة:انت مجيش عبببد ياااا مراااد...مجييييش عبببد...جررااايرك كرهت حياااتي و كرهتك اكثر من اي شي في دنييااااا...سيييبنييي...سيييبني...نحي كسرررتك عليااا...سيييبني
عديت عينيا على دموعها لي نزلو...و هزيت راسي نغزرلو...غارق في دمو...مديت يدي شاورتلهم باش يبعدو عليه...و رخفت عليها...غزرتلي ندرا كيف...و قربت منو تجري...قعدت بجنبو...تعدي في يدها على وجهو...و تحكي
زهرة:ع..عممررر...عممرر تسممع فيا ياخي
هز روحو شوية يكح بالقاوي...يرد في دم...مد يدو شوية...حطها على خدها يحكي
عمر:متخاافش يا روحي...هذا اقل شي ينجم يعملو
تبسمت على جنب...و قربت منها...جبدتها من زندها...كبشت فيه اكثر...كبس بيدو على ظهرها...يجبد فيها ليه...كبست عليها اكثر...و جبدتها عندي...نحكي
انا:كان تحبو يعيش...مظطرة باش طاوعني المرة هاذي
زهرة؛ب..باااهي...باااهي...هاني باش نجي معاااك
تلفتت عندي بالوقت...غزرتلي ندرا كيف...و حطت يدها على صدري تحكي
زهرة:يزززي مراااد...يزززي كهووو...حرااام عليك والله حرااام علييك
انا:انتي لي اخترت يااا زهرة
زهرة:انااااا ماااا اخترررت شي ياااا مراااد...انت لي كنت تختاااار ديماااا
انا:عللااش جييت هووني ؟
زهرة:انا عرفت كلشي...عرفت لانت قتلت بوك...و انت سبب في اللي صار لامك زاادة...على هذاكا مانيش باش نستغرب اللي قاااعد تعمل فيه توا...اما عالاقل متخليش عمر و لا غيرو...يدفع اغلاطي...امااانك...خليه يمشي من هوني...انت حاجتك بيا انا يا مراااد
انا:كان حاجتي بيك يا زهرة...اما توا مستحيل فما حياة مزالت تجمعنا
زهرة:شقصدك ؟
انا:انا و انتي مصيرنا واحد...قتلك هذا قبل...و باش نعاودلك...يا نعيشو مع بعضنا...و لا نموتو مع بعضنا يا زهرة...الحياة هاذي رفضتني...و باقي ترفض فيا لآخر لحظة
زهرة:انت لي اخترت ثنية مسكرة يااا مراااد...انت لي حبيت تعيش بالطريقة هاذي
نزلت راسي غزرتلو...يهز في روحو بالقدرة...شنية الفرق بيناتنا...علاش هو مش انا...علاش و كيفاش دخل لحياتنا...كيفاش قطع خيوط الوصال بيناتنا...كنت راضي نعدي حياتي و هي بجنبي...حتى من غير ما نحط يدي عليها...اما منعيش من غيرها...حبهم واضح كي الشمس...و واضح بالنسبة ليا زادة...اما اذا عاش الحب هذا...معناها انا باش نموت...لقيت روحي...نغزر لنفس الطفلة لي عندها 12 سنة...نفس الطفلة لي لقيتها قاعدة في اول درجة...متغشة من فكرة انو حد جديد باش يدخل حياتها...ربي كهو يعلم قداش حبيتها...قداش عشقتها...و شنية كنت مستعد نعمل على خاطر لحظة وحدة كان...يمكن انها تحبني فيها...صغري لي عديتو في ظلام...الوجيعةو القهرة لي دفنتها سنين داخلي...ما تسوا شي قدام لي قاعد نحس فيه و نعيش فيه توا...ما يجي شي قدام دموعها و قهرتها على راجل آخر...و عيني تشوف...جزء مني يحب يحررها...و جزء مني مكبش فيها بكل قوتو...لدرجة نسيت وين احنا نسيت الوضع لاحنا فيه و اللي قاعد يصير...لحظة من الزمان جبدتها عندي اكثر...و نزلت نشم في ريحتها...ناخو في قوتي...لي حسيتها غرت بيا و باش توفا...الطفلة هاذي هي اكسجين حياتي...هي الما لي يبرد نار اللي شاعلة داخلي...هي المد و الجزر لعشت فيه سنين طويلة...زهرة حياتي و موتي فرد وقت...سنين عديتها...هاذي اول مرة نحس روحي مهزوم من داخل...مقهور و منجمش نقاوم اكثر...حطيت يدي على ظهرها...و كبست عليها بكل قوتي...حضنتها بقوة الخوف لي نحس فيه من بعدها...من خسارتها...من حياتي من غيرها...من فقدان ملامحها...ضحكتها ريحتها...زهرة ادماان بالنسبة ليا...سم قاعد يمشي في عروقي منجمتش نتخلص منو...منجمتش نتعداه و نبرا منو...تمنيت كان عنقتني مرة وحدة...حست بيا مرة وحدة كهو...كان نصفتني الدنيا مرة وحدة...و عوضتني بزهرتي...هزيت يدي شوية حطيت الفرد بين يديها...و كبست عليهم...دورتها عندو بالظبط...و نزلت عليها شوية نحكي
انا:تنجم تنهي اللعبة هاذي توا
زهرة:م..مرااد...فاش تعمل ياخي ؟
انا:نحبك تقتلو بيدك
زهرة:م..مستحيل...سيبني مراااد...سييبني...مااانيش باش نعملها
انا:اقتلو كيما قتلتني يا زهرة
زهرة:م..منحبش...س..سيبني مراااد...سيبني امااانك
عمر:م..متخاافش منو عزيزتي
حط يدو على صدرو موجوع...يهز في روحو بالسيف...تبسمت نحكي
انا:هاك نجمت تقااوم سي عمر
عمر:خ..خليها تمشي من هووني مراااد
زهرة:ع..عممر
انا:هيا اضرب عزيزتي...اقتلو...و لا نقتلو انا...اما في رايي هو يحب يموت على يدك
زهرة؛س..سيبني مراااد...سييبني امااانك
انا:اضرب
زهرة:لااا
عمر:اضرب عزيزتي
زهرة:م..مستحيل عمر...مااانيش باش نعملها
عمر:اغزرلي هوني...معادش نحبك تخااف منو زهرة...صدقني مهما عمل ماهوش باش يفرقنا على بعضنا
كبس على صدرو يكح بالقاوي...و يرد في دم فرد وقت...كبست على يديها اكثر...من غير ما نزل عينيا عليه...عاود غزرلها يحكي
عمر:انااا بااش نكون معااك ديماا...و في كل خطوة...حياتنا ماهيش باش تاقف هوني زهرة
انا:اضررب زهرة
زهرة:م..منجمش نعيش من غيرك عممر
عمر:مظطرة تعيش...على خاطري...و على خااطر رييحاان زاادة
زهرة:م..منجمش يااا عمممر...ماانيش باش نجم نعملها
عمر:خ..خليك راجل مرة وحدة في حياتك...كان تحبها بالحق...خليها تمشي من هوني...و واجهني من غير ما تستعمل رجاالك...و الا خلي لعبتك توفا بالكرطوشة...لي محتفظ بيها ليا
انا:تعرفشي حاجة سي عمر...اكثر حاجة تعجبني فيك...هي ثقتك في رووحك...و تحكمك في الامور...و تضحياتك لي قدمتهم على خاطر زهرتي لتوا
عمر:مهما عملت يا مراااد انت الوحيد لي باش تخرج خاسر من الحكاية
فكيت الفرد من يدها و صاوبتو ليه...دارت عندي بالوقت...كبست بيدها على صدري تحكي
زهرة:مراااد...متعملهاااش امااانك...مستعدة نمشي معااك توااا...وين تحب انت...اما متقتلوش...امااانك
نزلت راسي نغزرلها...نغزر لدموعها لي قواات اكثر...نغزر لضعفها لي عاود ظهر مع خوفها عليه...لهدرجة تحبو...لهدرجة سلمت في روحها باش يعيش هو...معادش عندي حق باش نسأل علاش...و معادش فما حاجة تخبي حبهم لبعضهم...كنت و باش نبقى الطرف الشرير في الحكاية...و الاهم مزلت نشوف فيها الطفلة الصغيرة لي كانت و مزالت مكبشة فيا...توا بالظبط مجبور باش نسكر قصة ليها سنين...مجبور باش نلم احلامي الكل و نسلمهم ليها...مجبور باش نكتب نهاية الحرب...نهاية حرب #مراد__زهرة_عمر 💔

#سمر 💙💙💙