🔸️حلقة 17
🔸️زهرة_تحكي:
بقيت طول الثنية ساكتة...منحبش نغزرلو...منعرفش شبيه و لا علاه يتصرف بالطريقة هاذي..كابس عالفولون و يسوق...كأني مش موجودة معاه جملة أصلا خرجني ساقيا أعلى من راسي..حتى كبوطي ملبستوش جاب ربي مريولي صوف...مكانش راني مت بالبرد دورت وجهي للبلار...أحسن شي نسكت و نخليه...زايد حتى هو مريض من راسو...فقت من سرحتي كي شد الفران بالقاوي...يحكي
عمر:أنزل
أنا:وين إحنا ؟
عمر:أنزل تو تعرف
خذيت نفس و نزلت...خالط عليا بالوقت...طلعت راسي نقرا في إسم المحامي...توا فهمت وين احنا...سبقني دخل...مشيت وراه...دخلنا للبيرو مع بعض...قرب منا يحكي
هو:أهلا مسيو عمر مرحبا بيك
عمر:عيشك
هو:تفضلو
قربت قعدت عالفوتاي...قعد هو بحذايا...طلعت راسي نغزر للمحامي لي قعد مقابلنا...يحكي
هو:ملا إنتي مدموزال زهرة
هزيتلو براسي إيه...مدلي يدو...هزيت يدي صافحتو نسمع فيه يحكي
هو:أنا ماتر عبد النور
أنا:متشرفين
هو:عيشك...بما انو جيت ليوم...نحب نحكيو في القضية شوية
انا:باهي
هو:مسيو عمر حكالي كلشي...و نظن فهمك شنية لازم في الفترة هاذي
دورت راسي غزرتلو...خذيت نفس...و رجعت غزرت للمحامي نحكي
أنا:نعرف
هو:الفترة هاذي حاولو تبقاو بعاد على بعضكم...كان لزم متتقابلوش قدام ناس برشا...خاطر أول حاجة ينجم يثبتها مراد باش يربح القضية...يثبت أنو فما علاقة بينكم
تروهجت من كلامو...و حشمت من عمر لي قاعد قدامي أصلا نعرف لمراد ينجم يعملها...خاصة بعد ما تأكد اني بقيت عند عمر فترة مليحة...خذيت نفس نحكي
أنا:زعمة نجم نربح القضية هاذي
هو:كان مشيت بكلامي...وقتها نجمو نربحو القضية متنساش انت تواجه في شكون...مراد بن عيسى...و قضية كيما هاذي ضدو شوية صعيبة
أنا:نعرف
هو:مسيو عمر...عملت لي قتلك عليه
عمر:بالطبيعة...هذوما تحاليل متاع اول مرة...و التقرير الطبي زادة
بقيت نغزرلو مستغربة مش فاهمة اللي يحكيو فيه فقت من سرحتي على صوت المحامي يحكي
هو:باهي برشا...هذوما باش يفيدونا في أول جلسة
عمر:إمتى أول جلسة
هو:القضية تحولت للمحكمة جديد...يعني باش تاخو وقت قبل ما يعلنو أول جلسة
أنا:يعني مش باش يشدوه الحاكم
هو:صعيب برشا...معندناش أدلة كافية عليه و لا حتى شهود...معناها في الوضع هذا مراد...بريء من اي تهمة في حقو
نفس تسكر عليا من كلامو...خايفة كان نخسر القضية من اول مرة...حسيت بيدو لي تحطت على يدي..غزرتلو بالوقت...كبس عليا كانو يحاول يطمني...هزيتلو براسي إيه...و تلفت للمحامي نحكي
أنا:شنية لازم نعمل ؟
هو:توا ما تعمل حتى شي...و ما تخليه يثبت عليك حتى شي آخر باهي
انا:باش نربحها القضية هاذي
هو؛الحقيقة باش تبان توا و لا مبعد...خلي هذا في بالك
انا:باهي عيشك
عمر:إحنا باش نمشيو توا...أي تطور كلمني
هو:بالطبيعة
جبد يدو من يدي ووقف...وقفت في جرتو...صافحو و قربلي يحكي
عمر:باش نمشيو توا
هزيتلو براسي إيه...خلطت عليه للكرهبة...أول ما ركبت غزرتلو نحكي
أنا:مرسسي برشااا...على كلشي
عمر:من غير مزية زهرة
أنا:مسيو عمر...ميسالش نسألك ؟
عمر:مممم تفضل
أنا:نحب نعرف حق المحامي قداش ؟
تلفت عندي...غزرلي مستغرب...ضيق عينيه...يحكي
عمر:شتقصد ؟
أنا:أنت عاونتني برشا...و نعرف المحامي...باش يطلب برشا فلوس
عمر:و هاك عرفت شباش تعمل ؟
أنا:باش نخدم
عمر:شنننوة ؟
انا:م..مسيو عمر أنا
عمر:إنتي باش تسكت توا
أنا:ا أما ميجيش راو...منجمش نقبل منك فلوس فوق لي عملتو معايا
عمر:شنية لي عملتو معاك أنا
أنا:أمانك افهمني
عمر:تحب تخدم ملا
انا:مممم
عمر:شتعرف عليها الخدمة إنتي اه...تحبو يطلع في وجهك ديما...باهي و قرايتك...تحب تخدم عقاب ليالي باش لي يسوا و لي ميسواش يحط عينو عليك...تحب هكا إنتي
أنا:ما نحب شي...أما منحبش نحس روحي حمل ثقيل عليك
عمر:كان أنا جيت نراك هكا...مندخلش في حياتك جملة
نزلت راسي حاشمة منو...خدم الكرهبة و تلفتلي يحكي
عمر:شرايك في حاجة ؟
طلعت راسي نغزرلو...مش فاهمة كلامو...تبسملي يحكي
عمر:نمشيو عند عم طاهر
تبسمت بالوقت و هزيتلو براسي إيه...الفكرة كهو ريحتني...نحب نمشي للبلاصة هذيكا مرة اخرى...بعيد على هوني...و على الافكار اللي قاعدة دور في مخي توا برك وين حسيت روحي تفرهدت...محسيتش بالثنية كيفاه وصلنا...نزلت قبلو من الكرهبة...دخلت نجري لريستو...بحكم الدنيا برد...خلط عليا بالوقت يحكي
عمر:شبيك ؟
أنا:ياسر البرد برا
جا باش يحكي...قص علينا عم طاهر...كي قرب منا يحكي
طاهر:أهلا أهلا
تبسمتلو بالوقت...قربت منو سلمت عليه...غزرلي يحكي
طاهر:مرحبا بيك مرة أخرى
أنا:عيشك عمي
عمر:ظاهر فيك نسيتني
طاهر:يجي الكلام هذا...هوكا طاولة حاضرة تستنى فيكم
عمر:لاااا المرة هاذي مجيناش باش نقعدو
تلفت عندو نغزرلو مستغربة...تبسم على جنب يحكي
عمر:نحب نشد بلاصتي اليوم...اما مش وحدي
طاهر:بالطبيعة...ملا أنا باش نرتاح اليوم
عمر:مدامني هوني تنجم ترتاح
باقي واقفة مبهمة...مش فاهمة شي...تلفت عندي يحكي
عمر:هيا معايا
أنا:وين ؟
عمر:إيجا تو تعرف
غزرت لعم طاهر...عملي بيدو باش نخلط عليه...بقيت نمشي وراه...لين دخلنا للكوجينة...طلعت حاجبي مستغربة و انا نغزرلهم كيفاش قربو منو يصافحو فيه و يحكيو معاه...فرحانين بيه...نحى الفاست متاعو حطها على جنب...نغزرلو يطلع في يدين سوريتو...تلفت عندي يحكي
عمر:باش تبقى تغزرلي
انا:كيفاش ؟
عمر:ماكش باش تعاوني ؟
انا:و شنية نعمل انا ؟
عمر:ايجا البس هذا قبل
مديت يدي شديت عليه البلوزة...كبست عليها و انا نغزرلو...يلبس في وحدة حتى هو...تبسمت و لبستها فرد وقت...ربطت سيول من تالي...و قربت منو نحكي
انا:مممم شباش نعملو توا
عمر:باش نحضرو طلبات لي برا
أنا:كيفاش هكا...ميجيش و كان ميعجبهمش
عمر:هيا برك
أنا:باهي ما عندي حتى ذنب راو
عمر:تي إيجا قص الخضرة كهو
انا:باهي
قربت منو شوية...وقفت قدامو...نغزر للخضرة و مش فاهمة شنية نعمل بالظبط...نغزر لطفل لي جاب طلبات حطهم قدامو...غزرلي يحكي
عمر:هيا
مديت يدي جبدت الحضرة ليا...نقص فيها...جبدها من عندي...يقص فيها و يحكي
عمر:لازم تقصها بالطريقة هاذي
بقيت نغزرلو...في لحظة كملها...ضيقت عينيا...نحكي
انا:وين تعلمت هذا الكل ؟
عمر:كنت نخدم هوني
انا:شنننوة ؟
عمر:وقتها كنت صغير شوية...يعني تنجم تقول من هوني بدات رحلتي
انا:تقصد لي تعلمت هذا الكل من عند عم طاهر
عمر:مممم
انا:مممم معناها حتى انت شاف هوني
عمر:بالظبط
انا:باهي برشا
عمر:برا جيب لحم لي غديكا
جبتو ورجعت عندو...باقي نتفرج عليه...لين كمل الصحنين مع بعض...حطهم في صينية يحكي
عمر:ممممم بما انو قاعد تتفرج عليا...باش تخدم سرفوس توا...ايا شد هاذي
شديتها عليه...نغزرلو مبهمة...عوجت فمي...نحكي
انا:و شيعرفني وين طاولتهم
عمر:سعيد باش يعاونك
انا:باهي
عمر:جيب باقي طلبات معاك
هزيتلو براسي ايه و خرجت...حطيت صحون و غزرت لعمي طاهر...تبسملي بالوقت...هزيت باقي طلبات...و رجعت عندو بالوقت...نحكي
أنا:سيبون
عمر:باهي برشا
كمل يحضر في الصحون...للحظة سرحت فيه...في ملامحو...في قصتو لي هبطت و هو يخدم...لحيتو لي محصورة...عينيه لي نحس انو برشا حاجات مخبية وراهم...سرحت فيه...نسيت روحي و نسيت الدنيا نسيت لهو أستاذي...نسيت لي فما شكون في حياتو منعرفش كيفاش و امتى دخل لحياتي...كيفاش نجمت نتعلق بيه لهدرجة...فقت من سرحتي على صوتو يحكي
عمر:زهرررة
أنا:مممم
عمر:وين سرحت ؟
أنا:اه شي...نهزهم توا ؟
عمر:إيه تفضل
قربت هزيت صينية...و تلفت...وقفت على صوتو يحكي
عمر:استنى
جيت باش نتلفت...حسيت بيه واقف ورايا...جمدت في بلاصتي...دورت راسي شوية...نسمع فيه يحكي
عمر:تفكت
حسيت بيديه تحطو على جنابي بالوقت...بدني رعش قربلي أكثر...يعقد في سيول...حسيت بيه كبس عليا أكثر...غمضت عينيا بالوقت...و انا نحس بالنفس متاعو قريبة ليا...منعرفش شبيني...كبست على الصينية أكثر نحاول نهدي روحي...جبد روحو لتالي يحكي
عمر:هيا فيسع...بطيت عالجماعة
منجمتش نتلفت...منعرفش كيفاش نجمت نمشي...و لا كيفاش خرجت للجماعة برا...لتوا مزلت مروهجة من اللي صار...حطيت صحون...و بعدت لتالي...منعرفش كيفاه باش نرجع نقابلو توا..دخلت عندو مترددة..حاولت نبرد الجو نحكي
أنا:م..مسيو عمر
عمر:عمر كهو
انا:مممم باهي أنا
عمر:شنوة ؟
أنا:جعت...و نحب ناكول
عمر:اونفان طلبت حاجة باهية
أنا:ههههههه و شباش ناكول انا توا
بقى يغزرلي...دورت عينيا على وجهو...حطيت الصينية نحكي
انا:عممر
عمر:مممم قولي إنتي شتحب
انا:كيما الصحن لي هزيتو توا...و واحد كيما لي قبلو
عمر:زوز مع بعض
انا:مممم
عمر:باش تاكلهم وحدك
انا:كان تحب تاكول معايا...مانيش باش نرفض
عمر:مجنونة...هيا برا حضر طاولة...لي غادي...لين نكمل انا
انا:مممم باهي لحظة
خليتو لاهي...نحضر في طاولة و ضربة ضربة نغزرلو نحس في روحي مرتاحة عاللخر...متوقعتش باش نعيش نهار اخر هكا مع عمر...ما نحب نفكر في شي
كان نعيش اللحظات هذوما معاه هو و كهو...قربت منو نحكي
انا:مزال ماهو
عمر:سيبون...حط هذوما
شديتهم عليه و قربت من طاولة...خلط عليا بالوقت حط باقي صحون...و قعد مقابلني...بديت ناكول من غير ما نغزرلو...اصلا ياسر بنين...يطلع منو السخطة قص علينا صوت تليفون...هز عليها بالوقت يحكي
عمر:أهلا عزيزتي...لا توا أنا بعيد...باهي مطولش برشا و أرجع لدار
بقيت نغزرلو...و هو يحكي معاها...كبست عالشوكة أكثر منعرفش علاه حسيت ندرا كيف...تمنيت كان فما زادة لي يخاف عليا بالطريقة هاذي...تبسمت على جنب و انا نستخايل في الحكاية...غزرلي يحكي
عمر:لباس ماهو ؟
أنا:مممم
عمر:هيا كمل باش نمشيو...أصلا بدات تظلام...تو فتحية تحل محضر
انا:باااهي
منعرفش كيفاش كملت...نغزرلو وقف...نحا البلوزة...و لبس الفاست متاعو...خلطت عليه نحيتها و حطيتها على جنب...و خرجت قبلو...نحب نحكي شوية مع عم طاهر لين يخلط عليا
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
