زهرة🌸

توضيح

بين الضعف و القوة...خيط رقيق...كلمة و لا فعل...تنجم تقطعو...اللي باش نكتبو توا ماهوش حلقة...اما نحب نحكي عليهم...و على كل شخصية منهم...زهرة اللي الكل رفض شخصيتها...رفض ضعفها...برشا اسئلة بقات دور على شخصيتها...شخصية كل حد تبدا من الصغر...و عالحالة لي تربى عليها...و ديما نلاحظو الفرق في برشا عباد نعرفوهم...نجو لزهرة...مراد دخل لحياتها و هي عمرها 12 سنة و هو عمرو 28 سنة...هذا اول فرق بينهم...رباها هو بيدو...علمها كلشي على اساس انو سندها...و اول شي كان بينهم ثقة كبيرة...في لحظة لقى روحو يحبها...و يحب يملكها...و هي لقات روحها مسجونة عندو...سنين عاشتهم في الحبس متاعو...بين خوف و اوامر...متنساوش لهي كانت طفلة صغيرة...و هو شهد على كلشي في حياتها...يعرف نقاط ضعفها...و نقاط قوتها...يعرف كيفاه يتحكم فيها...مستحيل تنجم تبني شخصية جديدة و تصنع قوة كبيرة بين يوم و ليلة...برغم مريم لشخصيتها اجابية رغم الظروف...الحاجة الباهية بوها يحبها....و حتى بعد ما عرس ما هملش بنتو و مخلهاش بيها...و هذا لي خلى مريم قوية.. تعرف لبوها ديما في صفها...عندها سند في حياتها و هذا اهم حاجة باش الواحد ينجم يكمل...عمر ظهر في حياتها صدفة...عمر شخصيتو غامضة...هادية و عصبية فرد وقت...مبادىءو اهم حاجة في حياتو...شي لي خلاه يتنازل على عيلتو...على املاكو و ارضو...باش يثبت روحو وحدو...ووصل وين يحب...حتى هو في لحظة لقى روحو يحب زهرة...كيفاش و علاش ؟ و سرين ؟ هو محبهاش...هو حب زينها...طبيعتها...تعلق بيها...كان فما فراغ في حياتو يحب يعبيه...كان يحب على عيلة...عيلتو هو...خاصة بيه...اما طلع غالط...الطريقة لي كان يخمم بيها كانت باش دمرو...زهرة برغم ضعفها...و قلة حيلتها...خبرتها القليلة...خلاتو يتعلق بيها...خلاتو رغم المشاكل الكبيرة لي في حياتها يحبها و يضحي على جالها...خلاتو يضعف قدامها...ضعف الرجال يصنع قوة النساء....زعمة زهرة باش تتصرف عالاساس هذا...عمر باش يعطيها القوة هاذي ؟؟ و لا باش يمشي و يبعد عليها جملة ؟ بالنسبة لحسام...ساعات العباد لي تخرج من حياتنا تعطينا فرصة جديدة...فرصة لحياة افضل و هذا لي صار معاه هو...شراز لي خرجت من حياتو...خلاتو يوي واضح مع روحو اكثر...يحقق اهدافو...يوصل وين هو على خاطر امو و خوه...و على خاطر كرامتو لي حسها تجرحت...حسام حب شراز بالحق...يقولو الراجل صعيب برشا ينسى حبو لول...و كان شراز عندها سبب مقنع للي صار...زعمة تنجم ترد حبها بعد السنين هاذي لي تعدات...زعمة مريم باش تكون ضحية حبهم ؟ و لا باش تكون هي الحب الحقيقي لحسام...نفس شي لمحمد...دالي حب ريم...حب صغر...حكاية و تعدات...حب و لا مش حب...هو منجمش يتخطى لي صار...اما زعمة صار فيه هكا خاطرو مزال يحبها و لا جيست حاسس بالذنب لهي ماتت جرايرو هو ؟ زعمة باش يبقى غاطس في الادمان لهو فيه...و لاش باش يرا النور مرة اخرى...نجو لانتصار....انتصار زادة عانت برشا في حياتها...تعذبت من عيلتها و من راجلها الاول...صحيح تحب بنتها اما ديما تحس بالنقص...برغم لهي ام...اما كانت تحس لي زهرة حرمتها من برشا حاجات...حتى من مراد...لي مع الوقت ولا يهتم ببنتها اكثر منها...زعمة كي تكتشف الحقيقة كاملة شباش يصير ؟ بالنسبة لفتحية...مرا شافت من دنيا و تعلمت منها...مرا ولادها زوز تعبو في حياتهم بعد موت بوهم...اما ديما كانت تعطيهم من قوتها...و حبت عمر كيفهم و اكثر...و حبت زهرة كيما بنتها...هذا الفرق بينها و بين انتصار...الكرونيك يا لبنات تجمع كل شخصية بالنقيض متاعها...و كل حد شخصيتو  عكس لاخر...اما نجمو يكون صحاب...نجمو يكونو حباب...يمكن ساعات الاختلاف يكون باهي باش الواحد يكمل لاخر...الكرونيك هاذي...كتبتها بعد برشا تفكير...بعد حكاية سمعتها من وحدة...اما يا ريت...يا ريت كان عندها شوية من قوة زهرة...لي انتو تشوفو فيها ضعيفة...هي حبت نحكي على حياتها....اما صراحة منجمتش...يمكن كان نكتب لي عاشتو هي باش نظطر نوجعها...و لا يمكن نأيدها في طريق لهي فيه...الكرونيك بعيدة على حياتها...بعيدة على شخصيتها و على شي لي صرالها...الكرونيك خيالية...اما حبيت نوصل بيها حاجة لبرشا بنات لي يعانو من تحرش...للاسف...مش كان راجل الام...ساعات حتى الخو و البو...الحاجات لي ولات تصدمنا في مجتمعنا...زهرة اختارت تهرب منو...اختارت ثنية واسعة...اختارت عمر لي كان سند ليها مش استغلها و حاول يستغل الوضع لهي فيه...بعد اللي صار معاها ربي عوضها بعيلة ثانية...احن من عيلتها...برغم مزالو برشا احداث باش تصير....الضعف متاعها باش يعطيها قوة...اما القوة هاذي باش جي في وقتها...شخصية تتبنى من الصغر...و اذا الواحد عطى فرصة لحد اخر يتحكم في حياتو...يكون الغى شخصيتو بشكل كامل...و هذا لي عملاتو زهرة...هي سلمت حياتها الكل لمراد...و خلاتو يعرف نقاط ضعفها لي نجم يضرها بيهم...و زهرة بضعفها خلات مراد يطغى عليها...و كل حد فيهم عندو جانب ضعف مينجم يوريه لحد...الجزء الثاني من الكرونيك...باش تتبدل فيه برشا حاجات...و باش تراو فيه برشا حاجات...باش تكون بدايات جديدة لكل شخصية فيهم...و الشخصيات لي فيه اعظم....نقلكم اقراو بين سطور...اكثر من انها مجرد كرونيك هي ميساج...و حاجات حكاولي عليها...حاجات كنت نسمعها في تلفزة في الاخبار...حتى ساعات كنت نقول مستحيل المغرب العربي يصير فيه هكا...اما للاسف فما برشا حالات...حياتهم اكبر من انها تتكتب كرونيك...انشاء الله تكون عجبتكم الحكاية.