🔸️حلقة 79
🔸️زهرة تحكي:
فقت صباح نحل في عينيا بالسيف...نحس في راسي باش يطرشق...مديت يدي بعدت شعري من وجهي هزيت روحي مروهجة...نثبت في البيت...لتوا مستغربة كيفاه طاوعتو و جيت معاه لهوني...خذيت نفس و قمت...خواطري دايرة كي العادة...جاب ربي البيت فيها صال دوبان...منعرفش كيفاش وصلت...اول ما تقييت حسيت روحي ارتحت شوية...غسلت وجهي...و هزيت راسي غزرت للمرايا...لتوا منجمتش نستوعب لي تعدا على راسي...و منعرفش لي نعمل فيه صحيح و لا غالط اما لي متأكدة منو توا...اني لازم نبعد مراد على عمر...و اهم شي منخليهش يحس بالاتفاق لي بيني و بين عمر حطيت يديا زوز على كرشي...تبسمت بالوقت...بنتي كهو لي تحسسني انو قريب مني...و باش يرجعلي خذيت نفس نحكي
انا:نعرف لأنتي باش تتعب معايا برشا يا روحي...اما هذا الكل باش يوفا...و باش نرجعو لدارنا...متأكدة باش يجي نهار و نعيشو كلنا مع بعض...على هذاكا نحبك قوية ديما
قص عليا سرحتي صوت الباب لي دق...خذيت نفس و خرجت لقيت البون في وجهي...صبحت عليا تحكي
هي:صباح النور مدام زهرة
انا:صباح الخير
هي:تحب نجيبلك فطورك هوني
انا:لا هاني باش نمشي على روحي
هي:باهي
لبست البوت متاعي...و هزيت كبوطي في يدي...عديت عينيا مرة اخرى عالبيت...طلع محضرها من كلشي..اصلا يعرف بالقدا وين يحب يوصل...و شنية قاعد يعمل محاولتش نركز برشا...خذيت نفس و خرجت...حسيت روحي في متاهة...منعرفش فاش قام يعيش في القصر هذا وحدو...كبست روحي و نزلت الدروج وحدة..وحدة نعرف لبنتي ماهيش باش تتحمل ظغط اخر بعد توا حبست في بلاصتي...نغزرلو...قاعد يفطر كأنو ما صار شي...هز راسو يغزرلي...تبسم يحكي
مراد:صباح الخير
خذيت نفس و كملت نزلت من غير حتى كلمة...قربت منو مترددة نحكي
انا:لازمني نمشي توا
مراد:اقعد افطر ساعة
انا:معينيش
مراد:زهرة قتلك اقعد
انا:مراد
هز روحو وقف بالوقت...غزرلي ندرا كيف...كبست بيديا زوز عالكرسي...تنهد بالقاوي يحكي
مراد:يزي من كسوحية راسك توا...كان مش على خاطرك...على خاطر لي في كرشك
محبيتش نشد صحيح فيه اكثر...وخرت شوية...جبد الكرسي بيدو...قعدت بلا ما نغزرلو...عاود شد بلاصتو يحكي
مراد:لباس توا ؟
هزيتلو براسي ايه...و عديت عينيا عالطاولة فرد وقت كلشي كنت نحبو محطوط هوني...ما نسى منو شي...اما بعد الحبالة ستانست بالفطور لي يحطو عمر...و كلشي يحضرو هو...حتى شهاويا ولى يعرفهم من غير ما نحكي...مديت يدي بالسيف...شربت من كاسة الما لي قدامي...ضيق عينيه يحكي
مراد:تحب حاجة اخرى ؟
انا:لا
مراد:زهرة ماكش باش تخرج من هوني قبل ما تفطر...و انتي دبر راسك
هزيت راسي قحرتلو...و مديت هزيت قطعة خبز غطستها في العسل...حتى انا حسيت عينيا خرجو اول ما ريتو...من قطعة وليت في زوز و ثلاثة...منعرفش كيفاش تحلت شهيتي عليه...تلفت على غفلة نغزرلو سارح فيا...يمكن وقتها برك ستوعبت لهو قدامي...بلعت لي في فمي بالسيف...تبسم بالوقت...و مد يدو مدلي كاسة العصير...هزيتلو براسي لا...جيت باش نحكي...اما ريحتو غلبتني...حطيت يدي على فمي...ضيق عينيه يحكي
مراد:لباس ماهو ؟
منجمتش نرجعلو...هزيت روحي نفركس على بيت البانو لوطة...اما في بلاصة كيما هاذي عادي الواحد يضيع فيها...جات عيني على الباب متاع الجنينة...خرجت من غير ما نخمم مرتين...رديت كلشي كليتو...خلط عليا شدني من يدي يحكي
مراد:زهرة شفما عزيزتي ؟ شبي حالتك هكا ؟
انا:م..مراد
مراد:يا روحي
مد يدو يبعدلي في خصلات شعري...و يحكي فرد وقت
مراد:هيا ايجا معايا
جبدت روحي شوية...حسيت روحي تفرهدت...عاودت دخلت معاه...قعدت على اول فوتاي عرضني...عيط للبون طلب منها الما...و قعد بجنبي يحكي
مراد:شنية لي صار...علاه حالتك هكا ؟
انا:لباس عليا
مراد:تحب نطلبلك طبيب...اكيد تسممت من حاجة
هزيت راسي نغزرلو مستغربة...لتوا وجهو اصفر...معناها الشر لي فيه الكل...و منجمش يفهم انو هذا من الوحم عقد حواجبو مرة اخرى يحكي
مراد:شبييك ؟ موجوعة ياخي ؟
انا:لي قاعد يصير حاجة عادية
مراد:كيفاش هكا ؟
انا:مراد...هذا من الوحم...يعني طبيعي يصير فيا هكا
مراد:صاار ؟
انا:مممم
مراد:باهي
باقي مستغرب في كلامي...هزيت كاسة الما لي جابتها البون...شربت منها نحكي
انا:نحب نمشي توا
مراد:اكيد مانيش باش نخليك بعد لي صار
انا:مرااد عيشك...لباس عليا...على هذاكا متنجمش تجبرني نبقى هوني اكثر
مراد:و متنجمش تبقى غديكا زادة
انا:اما غديكا نرتاح اكثر
مراد:زهررة
انا:يزززي معادش نحب نسمع حتى حد فيكم لا انت و لا حتى عمر...توا بالظبط ما يهمني حتى حد من غير بنتي
مراد:باهي قوم نوصلك...بعدها نشوفو وين توصلك كسوحية الراس لي عندك
انا:ميسالش...خلي شوفور متاعك يوصلني
مراد:باهي يا زهرة باهي
خذيت نفس و هزيت روحي وقفت...وقف في جرتي بقى يمشي ورايا من غير حتى كلمة...شاور لشوفور متاعو...قرب منو يحكي معاه
أشرف:تفضل سي مراد
مراد:وصل المدام وين تحب
أشرف:باهي تفضل
مراد:متعبش روحك...ارتاح بعدها عندنا ما نحكيو
هزيتلو براسي ايه...و قربت من الكرهبة...حلي الباب من تالي...ركبت كبست على صاكي في يدي...طول الثنية و انا نخمم في كلام عمر...نعرف انو الحكاية صعيبة برشا اما مفماش حل اخر...لازمني نمنع روحي و راجلي من اللي قاعد يصير...يزي لي تعدا على راسو لتوا...جرايري انا...محسيتش بالوقت كيفاش وصلنا...نزل يجري حلي الباب...نزلت من غير ما نهز عيني في وجهو...خذيت نفس و طلعت لداري...فرد وقت نحس قلبي مقبوض جبدت مفاتحي باش نحل الباب...يدي رعشت كي لقيتها محلولة...دزيتها بيدي و دخلت...جات عيني في عينو قاعد في نص الفوتاي...قلبي خض بالوقت...معرفتش اذا نقدم و لا نوخر...اخر حد توقعت نلقاه في داري هزني و حطني يحكي
عثمان:غيب يا قط العب يا فار
كبست على صاكي بالوقت...اخر حاجة توقعت نسمعها منو...هز روحو وقف...قرب مني بخطوات ثابتة...بلعت ريقي بالوقت...غزرلي ندرا كيف يحكي
عثمان:وين كنت هاملة ؟ بالمعنى صحيح وين عديت ليلتك ؟
انا:ع..عم عثمان...فاش تحكي ياخي ؟
عثمان:نظن كلامي واضح ؟ ياخي كنت تستنى ترمي ولدي في الحبس...باش تولي تمشي و تجي على كيفك
رميت صاكي عالارض...و قربت خطوة منو...نحكي
انا:سي عثمان...لي تحكي معاها مرت ولدك...على هذاكا مجبور انك تحترمني كيما قاعدة نحترم فيك...و اللي تقول عليه ولدي..هذاكا راهو روحي تسمع فيا..منعرفش علاه جيت...و لا كيفاش دخلت...اما معندكش حق باش تهيني في داري
عثمان:تقصد بيها دار ولدي ؟ كيفاش دخلت و علاه جيت حاجات متخصكش...و دار هاذي كيما دخلتها تفضل اخرج منها
انا:معندكش حق تخرجني من هوني...الوحيد لي لازمو يخرج هو انت سي عثمان
سلمى:الله الله على أخلاقك عزيزتي
تلفت نغزرلها...جاية من الكوجينة...حسيت روحي باش نهبل ساعتها...اخر وحدة نحب نقابلها توا...و لا نخليها تدخل داري...خذيت نفس نحكي
انا:شتعمل هوني انتي ؟
سلمى:باش طردنا ياخي ؟
انا:لي باش يوصل في حقي...منجمش نستقبلو في داري
عثمان:عندك حق عزيزتي...على هذاكا اول وحدة لازمها تخرج من هوني هي انتي
قرب مني شدني من يدي...يجر فيا للباب...حلها و دزني لبرا...حطيت يدي على كرشي مروهجة من اللي صار نغزرلو مصدومة...نحاول نستوعب الجرأة لي هو فيها هز يدو في وجهي يحكي
عثمان:الدار لي تحكي عليها دار ولدي...يالالة...صدقني بعد ما يخرج عمر...الا ما نخليه يعفسك و يتعدا
منعرفش علاه كلمتو تالية وجعتني بصفة غريبة...فكرة لعمر ينجم يعمل فيا اكاكا...جيت باش نحكي...اما قص عليا كي سكر الباب في وجهي...تهزيت و تحطيت فرد وقت...وخرت لتالي مروهجة...ضربت في حسام لي واقف ورايا...حضنتو من غير ما نخمم مرتين...كبس عليا بيدو يحكي
حسام:زهرة شفما ؟
انا:ح...حسام
كبس على كتافي...و جبدني من عندو...يغزرلي مستغرب...ضيق عينيه يحكي
حسام:زهرة سألتك جاوبني...شنية الحالة لي انتي فيها ؟
هزيت يدي نشاورلو للباب...نحس في الكلام هرب مني و فقدت القدرة على نطق...قحرلي يحكي
حسام:زهرررة اخر مرة نسألك جاوبني...شكون عمل فيك هكا ؟ ياخي مراد جاب ثنيتك ؟
هزيتلو براسي لا...خذيت نفس...نلم في الكلام بالسيف نحكي
انا:ع..عثمان...هوني
حسام:شنننوة ؟؟
جبدني من يدي و قرب من الباب...يدق بالقاوي...من غير ما يحاول يفهم الباقي...حاولت نوقفو اما شي...حل الباب...وقف في وجهو يحكي
حسام:سي عثمان شنية لي قاعد يصير ؟
عثمان:فيسع لقيت شكون في صفك
انا:حسام خلينا نمشيو من هوني أمانك
حسام:مش قبل ما نفهم لي قاعد يصير
عثمان:الطفلة هاذي معادش تحط ساقها هوني
حسام:بصفتك شكون باش تمنعها سي عثمان ؟
انا:حسام يزي امانك
عثمان:يزي لي شافو ولدي منها...بعد توا نحبها تخرج من حياتو و دارو
حسام:الدار لي تحكي عليها مش متاع عمر
عثمان:شقصدك ؟
حسام:عمر قبل ما يدخل للحبس...كتب الدار باسم مرتو...معناها حتى حد ما عندو الحق هوني من غير زهرة
هزيت راسي نغزرلو مصدومة..متوقعتش لهو باش يعمل هذا الكل على خاطري...مجاتش لبالي جملة...انو باش يكتب الدار لي تعب على خاطرها سنين على إسمي حطيت يدي على كرشي نهدي في روحي منعرفش شنية لي حسيتو بالظبط...غزرت بعثمان لي واقف من غير حتى كلمة...و اكا اللفعة واقفة وراه...خذيت نفس و قربت باش ندخل...وقف في وجهي مرة اخرى يحكي
عثمان:ماكش باش تعفسها دار هاذي...لين نحكي مع عمر في الحكاية
غزرت لحسام بالوقت...حسيتو باش يطرشق...خذيت نفس نحكي
انا:حسام...ميسالش نحب ناخو لي حاجتي بيه و نخرج
حسام:ادخل زهرة...حتى حد ما عندو حق يحاسبك في دارك
هزيت راسي غزرتلو...بعد عالباب من غير حتى كلمة اخرى...هزيتها و حطيتها و دخلت لبيتي...سكرت الباب من الداخل...و تكيت عليها...نزلو دموعي بالوقت...عمري ما توقعت نتطرد من دار هاذي و بالطريقة هاذي...عديت يديا زوز على وجهي...خذيت نفس...هزيت الاوراق المهمة الكل متاع عمر و الاوراق لي تخصني زادة..قربت من القاردروب هزيت البرفان متاعو حطيتها في صاكي و خرجت...منعرفش علاه معنديش ثقة في بوه...و منعرفش على شنية ناوي بالظبط...لقيت حسام واقف بحذا الباب...كابس على يدو بغزول...قربت منو و تلفت لعثمان نحكي
انا:مانيش باش نلومك على شي...و لا حتى باش نطردك من دار ولدك...اما تأكد انو باش نتقابلو مرة اخرى
حليت الباب و خرجت...خلط عليا حسام بالوقت...نزلت معاه اللوطة...وقفت بحذا الكرهبة...غزرلي يحكي
حسام:متحطش في بالك...هيا معايا توا...متنساش لغديكا داركم زادة
هزيت راسي نغزرلو...تبسمت بالوقت...ديما نحب وقفتو معايا كي يبدا عمر غايب...اما منحبوش يدخل في الحكاية...و الا حتى هو زادة ماهوش باش يمنع من مراد...خذيت نفس نحكي
انا:عيشك حسام...اما منجمش نجي معاك بعد توا
حسام:شقصدك ؟
هزيت الاوراق لي تخص عمر...حطيتهم في يدو...شدهم عليا يحكي
حسام:شنية هذا ؟
انا:الاوراق هذوما فيهم كلشي يخص عمر...منجمش نخليهم عندي...خاطر نخاف شكون يستغلهم ضدو...و انا ما نجم ناثق في حتى حد غيرك...خاطر عمر ياثق فيك انت و كهو
حسام:زهرة شنية لي قاعد يصير ياخي ؟
انا:انا و عمر...طلقنا
حسام:شنننننوة ؟؟
انا:هاذي كانت خطة مراد
حسام:يعني انتي و عمر ؟
انا:لناس الكل باش نكونو مطلقين قانونيا...منحبش مراد يشك في الحكاية حتى طرف...و الا اكيد باش يتعمد يضر عمر مرة اخرى
حسام:باهي..و انتي شنية باش تعمل توا...وين ماشية ؟
بقيت نغزرلو من غير حتى كلمة...ضيق عينيه يحكي
حسام:زهرة ياخي انتي ؟
انا:اللي جا في بالك بالظبط
حسام:مستحيييل...في بالك باش نسمحلك ترمي روحك مرة اخرى ؟
انا:حسام...انا كهو لي نجم نوقف مراد عاللي قاعد يعمل فيه...منجمش نخليه يضر حد فيكم بعد توا
حسام:اما باش يضرك انتي
انا:ماهوش باش يعملها...طمن
حسام:امااا
انا:حساام...الحكاية هاذي باش تبقى سر بيناتنا
حسام:زهرة عيش اختي...خمم عاللي في كرشك..و ايجا معايا...نعرف روحي هملتك اليمات هذوما...اما وراسك معادش باش نخليك وحدك لين يخرج عمر من الحبس
انا:عمر لي بحاجتك مش انا
حسام:يا زهرة
انا:حسااام أنت اسمعني امانك...لي صار الفوق حتى حد ماهو باش يسمع بيه...حتى عمر...تعرف بالقدا قداش تعذب باش رجع لعيلتو...و زادة سي عثمان عندو حق كان مش انا...عمر ماهوش في الحبس توا...عذرتو و عذرت تصرفو معايا...على هذاكا براس الغالي عليك...ما تقول حتى كلمة مهما صار
حسام:باهي يا زهرة باهي
انا:لازمني نمشي توا
حسام:خليني نوصلك
انا:لا عيشك...متخليش مراد يحس لانا قريبة منكم
حسام:تتوقع باش نخليك وحدك
انا:مانيش وحدي حسام...نعرف لي نتوما معايا...اما منحبش حسام يضر واحد فيكم جرايري...و اكيد كي نستحق حاجة باش نطلبك
حسام:تخمم تعيش معاه ؟
انا:نحب نبقى في داري...اما هاك ريت لي صار
حسام:الدار باسمك زهرة
انا:منجمش نطرد بو من دار ولدو...اما متأكدة لي سلمى ورا هذا الكل
حسام:شقصدك ؟
انا:سلمى عندها علاقة بمراد
حسام:متأكدة ؟
انا:هذا لي محبش يصدقو عمر...و منجمش نتهمها من غير دليل...قاعدة نحكيلك توا...خاطر حتى حد ما صدقني من غير مريم...اما توا منجمش نتعبها بمشاكلي بعد لي صار...نعرف لي عمر صاحبك...و صعيب تخبي عليه هذا الكل...اما مفماش حل اخر نجم نعاونو بيه...و مانيش باش نخرج على إتفاقي معاه...خاطرني عمري ماني باش نعتبر انو عمر طلقني...هو وعدني باش يرجعلي...و انا باش نستناه أكيد...أما منجمش نخلي مراد يضرو و يستغلو اكثر
حسام:متأكدة لهو ماهوش باش يضرك ؟
انا:متأكدة حسام...اما باش توعدني انك ما تخبر عمر بحتى شي امانك
حسام:طمن عزيزتي
قربت منو حضنتو...و جبدت روحي شوية...هزيت راسي غزرتلو نحكي
انا:و رد بالك تخلي مريم وحدها...هاني باش نمشي بحذاها في اقرب فرصة
حسام:في رايك باش تسامحني ؟
انا:باش تسامحك معندهاش حل اخر
تبسملي بالوقت...حسيت بيه قداش تاعب...حطيت يدي على يدو نحكي
انا:هيا برا على روحك توا
حسام:رد بالك على روحك
انا:طمن
وخرت لتالي...نغزرلو هز كرهبتو و مشى...حطيت يدي على كرشي...كلشي نعرفو توا...اني لازمني نكون قوية مهما صار...و مهما تعدا عليا...هزيت تليفوني كلمتو...بقى ينوقز لين هز عليا يحكي
مراد:زهرة لباس ماهو ؟
انا:وينك أنت ؟
مراد:في الاجتماع عزيزتي...شصار ؟
انا:ايجاني توا
مراد:شنية لي صار ؟
انا:باش تجي و لا نمشي نرا بقعة اخرى على روحي
مراد:كريم باش يكمل الاجتماع في بلاصتي لازمني نخرج توا...باقي الاوراق نوقع عليهم مبعد...الو زهرة تسمع فيا ياخي
انا:نسمع فيك
مراد:وينك توا ؟
انا:الجنينة لي في الشارع متاعنا
مراد:باهي مسافة الطريق...رد بالك تتحرك من بلاصتك
انا:باهي
نزلت تليفون و علقت عليه...من غير حتى كلمة اخرى وقيت باش نكسب مراد في صفي...و باش ناخو منو كلشي زادة...مانيش باش نخليه يتحكم في حياتي بعد توا...باش نخليه يغرق المرة هاذي....لدرجة معادش ينجم باش يلقى بر الأمان مرة اخرى.
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
