زهرة🌸

الحلقة السابعة و الستون

🔸️حلقة 67
🔸️عمر يحكي:
تلفتت عندي مفجوعة...وجها اصفر مش نورمال..عرفتها خافت...تنهدت بثوة...و عاودت قعدت...قربت منها قعدت بجنبها...من غير حتى كلمة...اصلا متوقعتش لي سلمى تنجم توصل تعمل فيها هكا...كان مش بابا منعرفش شنية لي كنت باش نعملو فيها وقتها...اما اكيد مانيش باش نعديلها اللي صار...احسن شي عملت توا اني خلطت عليها...قبل ما نفقدها...خذيت نفس نحكي
انا:علاه مخبرتنيش من قبل ؟
زهرة:كنت باش تصدقني ؟
أنا:أنا كنت باش نخسرك...و نخسر ولدي...لي عشتو ليلتها...مانيش باش ننساه في حياتي زهرة
زهرة:أنت لي عطيتها الفرصة هاذي
أنا:ش..شقصدك ؟
زهرة:أنت صدقتها مرة...و معطيتنيش فرصة حتى نبرر لي صار...أكيد باش تعمل اكثر...و كي العادة ديما أنا الغالطة...و معنديش حق...و مدامك صدقتها مرة...برا أقف معاها توا و ساندها
مديت يدي...دورتها عليها...و جبدتها عندي...نحكي
أنا:إيجا هوني تراه
حطت راسها على صدري بالوقت...نعرف لي مزالت تاعبة...غرست يدي في شعرها...نحكي
أنا:عمري ما صدقتها...أكثر شي كنت مصدوم من لي سمعتو و كهو
زهرة:و شنية تفسر علاقتك بيها...بعد اللي صار ؟
أنا: زهرة...قتلك و باش نعاودلك...مفما حتى شي يربطني بيها...سلمى مش أكثر من هند...و عمري ما خممت فيها لا قبل و لا توا
زهرة:أما هي تحبك
أنا:آخر همي
زهرة:علاه أنت هوني توا ؟
أنا:أنا وين لازم نكون
زهرة:شنية باش يصير توا ؟
أنا:شنية ؟
زهرة:عيلتك باش تاخو موقف أقوى المرة هاذي
أنا:ميهمكش فيهم...أنا معاك...و أصلا أول ما ترتاح نرجعو لدارنا
زهرة:أحسن
أنا:ساعة قولي قبل...من وين جيب فيها القوة هاذي
زهرة:شقصدك ؟
أنا:نقصد في الكف يا روحي
زهرة:باش تحاسبني عليه توا ؟
عمر:لااا اما والله صحيتك
زهرة:على شنوة ؟
أنا:على الكف عزيزتي
زهرة:تستهل
أنا:ملا لا...أما مزال حسابها معايا
زهرة:إيه أحسن
تبسمت على جنب...جبدت روحها مني...وقفت...غزرتلها نحكي
أنا:وين ماشية ؟
زهرة:عندي ما نعمل
أنا:بربي ؟
زهرة:إيه برا على روحك
عطاتني بظهرها...و بعدت عليا شوية...بقيت نغزرلها مستغرب...خذيت نفس و خلطت عليها نحكي
أنا:زهرة وين ماشية ياخي ؟
زهرة:شمدخلك فيا توا ؟
شديتها من يدها...دورتها عندي...قحرتلها نحكي
أنا:ريت حالتك ياخي...تحب ترجع للكلينيك مرة أخرى ؟
زهرة:ياا عممر تي سيبني زح...قتلك عندي ما نعمل حاجة متخصكش
أنا:اغزرلي هوني...أول شي الدنيا باردة...و ماكش لابسة بالقدا...ثاني شي مزلت تاعبة...و أهم شي لي يخصك يخصني أنا زادة حبيت و لا كرهت
زهرة:معناها معندكش مشكلة تجي معايا توا
أنا:أكيد
زهرة:باهي...هاني ماشية نفركس على كرموس
أنا:كرمووس توااا ؟ و هووني ؟
زهرة:مممم هيا عزيزي
خلطت عليها نمشي وراها...مش فاهم اصلا شنية حكاية الكرموس...من عركة ولينا في كرموس و لا ندرا شنية خذيت نفس نحكي
أنا:زهرة وين باش تلقى الكرموس هوني ؟
زهرة:منعرفش...أكيد باش تعرضني شجرة يكون فيها
انا:يا بنتي لي هوني الكل متاع الزيتون...و الباقي أراضي متاع فلاحين...و الكرموس مزال وقتو شوية هيا معاايا توا...أكيد نلقاه يتباع
زهرة:كان تعبت برا أرجع على روحك
قربت منها...شديتها من يدها...دورتها عندي...و حاوطت وجها...بيديا زوز...نحكي
انا:زهرة يا روحي...متأكد لماكش باش تلقى منو هوني و زيد تعب في روحك بلا فايدة...هيا معايا تو انا ندبر راسي
زهرة:لاااا
دزتني بيديها زوز...و كملت طريقها...خذيت نفس و قربت منها...خطفتها من يدها...و هزيتها في حملتي غزرتلي مصدومة...تحكي
زهرة:نزلننني فاش تعمل ؟
انا:مانيش باش نوسع بالي معاك اكثر...قتلك لماكش باش تلقى منو هوني...و البلاصة لي باش تكمل تمشي فيها محظورة
زهرة:و انت شنية لي حارقك ؟
انا:زهررررة يزززي
زهرة:نزلني عمر
انا:استغفر الله...من وين جيب فيها الكسوحية هاذي انتي
زهرة:نزلني و كهو
انا:مانيش باش نزلك...و سكر علينا الحكاية متاع الكرموس هذا توا
دورت وجها بالوقت...حسيتها مش قد بعضها...نعرف الوحم عامل فيها...و كان نخليها توا...ترصالنا في جيهة أخرى من هوني...حطيتها عالارض...و حليت الباب نحكي
انا:اركب
قحرتلي و ركبت...جبدت الباب بالقاوي سكرتها...خلطت عليها و خدمت الكرهبة...ثنية كاملة قعدت من غير حتى كلمة...محبيتش نرجعها للقصر وحدها...رصاتلي نفركس عالكرموس و هي معايا...منعرفش كيفاش غلبها نوم و رقدت...مصدقتش لي لقيت منو...خذيت منو...و شديت ثنية للقصر...فيقتها بالسيف...حلت عينيها مروهجة...تغزرلي...عديت يدي على شعرها نحكي
انا:هيا صغرونتي...في بيتنا ترتاح اكثر
زهرة:منحبش
انا:زهررة تحب تخسر لي في كرشك ياخي
جبدت روحها لتالي...هزتلي براسها لا...و نزلت تجري تبسمت و انا نغزرلها...خلطت عليها دخلت وراها...نحكي
انا:برا اطلع توا
زهرة:وين ماشي أنت ؟
أنا:زهرررة قتلك اطلع
وخرت لتالي و هزتلي براسها إيه...أول ما طلعت...غزرت لمليكة نحكي
انا:وينها سلمى ؟
مليكة:في بيتها سي عمر
هزيت روحي...و طلعت الدروج في لحظة...وقفت امي في وجهي تحكي
امي:عممر وين ماشي انت ؟
انا:امي ابعد من قدامي توا
امي:عمممر شباش تعمل ؟
انا:وينها بنت اختك المصون ؟
امي:لي تحكي عليها بنت خالتك...و امانة عندنا
انا:بنت خالتي ؟؟ باهي تعرف لي بنت خالتي حاولت تقتل ولدي...و قبل هكا كان باش تضر مرتي
أمي:رد بالك تتصرف قبل ما تسمع منها زادة
أنا:تقصد لي زهرة كذبت عليها ؟
أمي:متنساش لي غلطت مع هند اختك قبل
أنا:مش نفس الشي امي...و أول مرة حطيت ساقي هوني...قلت لي يوصل لمرتي بكلمة معناها وصلني اناو كان سلمى امانة عندكم...زهرة امانة عندي انا و كهو...و توا أبعد من قدامي امانك
امي:عمر عيش ولدي...رد بالك تعمل حاجة تندم عليها مبعد
خليتها و كملت ثنيتي...حليت باب بيتها ملقيتهاش رجعت خطوات لتالي و حليت بيت امي...وقفت بالوقت غزرتلي ندرا كيف...عينيها حمر من البكا...سكرت الباب ورايا...وخرت خطوة لتالي...تحكي
سلمى:ع...عمر
انا:تفضل لالة سلمى...نسمع فيك
سلمى:و...والله مش كيما لي فهمتو
انا:فهمنني اننتي عاد...انططططق
سلمى:ع...عمر امانك
قربت منها اكثر...ضربت في القاردروب...جات باش تحكي...هزيت يدي كبست على وجها...نحكي
انا:شبييك بكشت...معادش عندك شنية تقول...هذا حد مخك لالة سلمى...تقتلي ولدي...في بالك باش نعديلك لعملتو...و لا فكرت لانا مانيش باش نعرف بيها الحكاية تكلللم
رخفت يدي شوية عليها...تنهدت بالقاوي...تحكي
سلمى:م...مكنتش نعرف لهي مزالت حبلة...و مكنتش نعرف زادة لي ت...تيزانة هذيكا باش تضرها عمر...انا عمري...ما خممت اني نضرك في مرتك و ولدك...صدقني منقصدش لي صار
عدات يدها على خدها تمسح في دموعها...ضربت يدي عالقارد روب بحذا راسها...نحكي
انا:اغزرلي هوني بالقدا...زهررة خط احمر...رد بالك تفكر جيب ثنيتها...و لا حتى تقرب منها...وقتها مانيش باش نرحمك سلمى...تسمع فيا
سلمى:قتلك لي صار الكل غلطة
انا:و انا قاعد نعطيك في نصيحة...من أخ لأختو...خاطر المرة الجاية...حتى علاقة أخوة و ماهيش باش تجمعنا مفهوم كلامي
سلمى:مفهوم
خذيت نفس و وخرت لتالي...عطيتها بظهري...اول ما وصلت للباب...وقفتني تحكي
سلمى:صدقني باش يجي وقت و تفهم لانت غلطت معانا برشا...الحب هذا باش يدمرك عمر...و يخليك تخسر برشا حاجات...و اولهم عيلتك عمر
انا:كان خسرت روحي ماهوش باش يهمني...و كلامي مانيش باش نعاودو مرة اخرى
حليت الباب...لقيت أمي في وجهي...تغزرلي مرعوبة مستنيتهاش تحكي...خليتها و نزلت...رجعت للكرهبة هزيت القضية...و دخلت للكوجينة نحكي
أنا:مليكة عيش أختي...كان مفماش تعب...حضر هذوما لزهرة في ثنيتك
مليكة:أكيد سي عمر
أنا:عيشك
خذيت نفس طويل...و خلطت عليها...لقيتها غفات عالفوتاي...أصلا ولات دازة عالنوم اكثر من شي آخر قعدت عالطاولة مقابلها...عديت صوابعي على خصلات شعرها...سرحت في وجها...و تذكرت اول ليلة هربت فيها لعندي...متوقعتش ليلتها لي باش نوصلو لهوني...و لا باش تولي مرتي و تحمل صغيري...زهرة كانت حلمة بعيدة برشا...و مانيش مستعد نخسرها...و لا نعيش من غيرها...تنهدت بالقاوي...و هزيت تليفوني...كلمت حسام هز عليا يحكي
حسام:أهلا عمر لباس ؟
انا:مرحبا صاحبي...لباس عيشك...انت شعامل ؟
حسام:كي العادة...مع الخدمة
انا:شراز لتوا عندك ؟
حسام:ايه
انا:مريم في بالها ؟
حسام:لتوا لا...و منفكرش إني نخبرها...خاصة توا
أنا:متأكد
حسام:عالمعدل هذاكا أنا باش نخسرها بالرسمي
أنا:يزيكم حسام...كان باش تبدا صفحة جديدة...احكيلها على كلشي...صحيح ماهيش باش تسامحك من اول مرة...أما أكيد باش تتفهم مع الوقت
حسام:إن شاء الله صاحبي
أنا:حسام...امانك اعطي مفاتح دار لخالتي نعيمة...تشوف كان ناقصة حاجة...و ابعث معاها طفلة تعاونها
حسام:امتى راجع
انا:بعد يامات...و زهرة تاعبة شوية...لازمها ترتاح فترة
حسام:لباس ماهو ؟
أنا:جيست من الحبالة و كهو
حسام:يطلع منك يا وحيد...باش تولي أب على قريب
انا:برا زمر...هاك عرست ورايا و سبقتني
حسام:ماك تعرف صاحبك عاد
انا:زايد متحشمش
حسام:مبروك صاحبي
انا:عيش خويا...هاني باش نخليك توا...متنساش لي وصيتك عليه
حسام:باهي
علقت عليه و نزلت بستها من خدها...هزيتها في حملتي دخلتها للبيت...حطيتها عالسرير...غطيتها و دخلت لبيت البانو...عملت دوش...تفرهدت بيه...أول ما خرجت سمعتها تهتري ببوها مرة اخرى...عديت يدي على وجهي و قربت من نفيق فيها...نطرت من بلاصتها...جات قاعدة كبست عليها نحكي
أنا:اهدا...حلمة و كهو
زهرة:ب...بابا...بابا كان هوني عمر
انا:زهرة اهدا عزيزتي...حاول تاخو نفس
هزتلي براسها ايه...جبدتها عندي نهدي فيها...بستها من راسها نحكي
انا:وفات يا روحي...وفات
زهرة:وين كنت ؟
انا:هاني معاك توا
جبدت روحي منها...حاوطت وجها بيديا زوز...نحكي
انا:حاول ترتاح...هاني باش نبدل دبشي و نرجعلك
زهرة:باهي
جبدت روحي منها...بدلت دبشي...تلفت عندها...سارحة ندرا وين...قص عليا صوت الباب...طيشت المنشفة من يدي...و خرجت لقيت مليكة...هازة صحن الغلة و صحن فيه الكرموس...احسن شي حطاتو وحدو...شديت عليها صينية...و رجعت عندها...حطيتها بجنبها نحكي
أنا:تفضل الكرموس...لي شيحتلي ريقي عليه
زهرة:معادش عيني
أنا:بربي ؟
زهرة:ممممم
أنا:باهي كيما تحب
عاودت هزيت الصينية حطيتها عالكوافوز...هزيت صحن الكرموس...و ترميت بجنبها...تكيت لتالي...ناكل منو...و نحكي
أنا:والله صحيتك عالفكرة...عندي برشا مكليتش منو
زهرة:صحة ليك
انا:عيشك يا روحي
هزيت الثانية في يدي...قحرتلي و دورت وجها...غزرتلها نحكي
انا:متأكدة متحبش ؟
زهرة:اففف منك
انا:ساعة بنين مش نورمال
زهرة:باش تبقى تحكي هكا
انا:كان باش ترقد تو نمشي لصالة...حتى انا عندي خدمة
زهرة:زايد دمك بارد
انا:شعملت زادة ؟
زهرة:الصحن هذاكا متاعي
انا:انتي معادش تحب عليه
زهرة:توا وليت نحب
انا:لا عزيزتي
زهرة:عممر يزززي امانك
انا:باهي اتو نزيد وحدة
زهرة:لاااا
قربت مني خطفت الصحن من يدي...و تلفتت...جبدتها عندي نحكي
انا:فاش تعمل ياخي
زهرة:سييبني
اول ما بدات تاكل...نحيت صحن من يدها...دارت عندي بالوقت...حطيتو عالتابل دو نوي و جبدتها عندي أكثر جات باش تحكي...سكتها كيف غطست في شفايفها حتى انا عندي عليهم برشا...توحشتها الفرخة...جبدت روحي شوية نحكي
انا:طلع بنين اكثر من عندك
زهرة:ع..عمر
أنا:شننوة ؟
زهرة:رجعلي صحن أمانك...مش أنا نحب...والله ولدك
أنا:نرجعو ملا لا
عاودت خطفت بوسة منها...و ترميت لتالي...حطيتو في يدها...كبست عليه...و بعدت شوية تحكي
زهرة:و معادش تمسني مرة أخرى...ولدك ميحبش
قحرتلي و عطاتني بظهرها...تبسمت بالوقت...و سكرت عينيا...منحبش نركز معاها اكثر...نعرف مزالت متغشة مني...و ماهيش ترضى بالسرعة هاذي...تنهدت بالقاوي لتوا نحس في روحي تاعب...خاصة بعد الاحداث التالية معادش نجم نفكر في شي...باش نأكد لبابا على هند و نرجع لتونس...و كل أسبوع نتفقد الوضع هوني.....هذا باش يكون أحسن حل لينا الكل.
🌸🌸🌸🌸🌸🌸🌸🌸🌸🌸🌸
🔸️مريم تحكي :
دخلت في الخامس...كرشي خرجت برشا على قبل عالحالة هاذي حتى شي من الدبش ماهو باش يجي قدي...بدلت حوايجي كيما جا...حاسة روحي تاعبة و مش قد بعضي...حل الباب و دخل...غزرلي يحكي
حسام:حاضرة
هزيتلو براسي ايه...و قربت من التابل دونوي...هزيت الفونتولين متاعي...و سبقتو...نزل ورايا...فطرت بالسيف كان مش امي فتحية...ما نحط شي في فمي...اول ما ركبت في الكرهبة...غزرلي يحكي
حسام:مرييم عزيزتي...من غير ما تروح اليوم
انا:عندي كور مهم
حسام:اول ما تكمل كلمني
انا:باهي
دورت راسي للبلار...منحبش نحكي معاه اكثر..منحبوش يكون باهي معايا بعد اللي صار الكل...منحبش نضعف و لا حتى نحنلو...نعرف لهذا الكل باش يوفا في نهار من نهارات...و كان مزلت معاه لتوا...على خاطر بنتي و كهو اول ما شد الفران نزلت من الكرهبة...بقى في بلاصتو لين بعدت عليه...حبست على صوت مرا تعيط من تالي
هي:مرررريم
تلفت عندها...نغزرلها...اول مرة نراها في حياتي...مرا كبيرة شوية...لبستها...ستيلها...وقفتها...كلشي فيها يقول لهي مرا مضخمة...و قد حالها...عديت عينيا عليها نحكي
انا:تفضل مدام
بقات تغزرلي من غير حتى كلمة...تثبت في وجهي و تعاود...ضيقت عينيا نحكي
انا:لباس ماهو ؟
قربت مني وقفت قدامي بالظبط...هزت يدها ترعش تحكي
هي:انا نرمين
انا:شكون نرمين ؟
نرمين:ايجا معايا تو تعرف
انا:لباس ماهو...وين تحبني نجي معاك ؟
نرمين:مريم عزيزتي
انا:مت نعرف حتى وحدة اسمها نرمين من قبل...باز غالطة فيا...سامحني لازمني ندخل نقرا توا
مشيت خطوتين...و حبست...حبست على صوتها و هي تحكي
نرمين: مانيش باش نغلط...اول مرة بعد السنين هاذي نرا فرح مرة اخرى...فيك انتي
جمدت في بقعتي...قلبي خض بالقاوي و شعرة لا طحت تلفت عندها بالسيف...نحكي
انا:ش...شكونك انتي ؟
نرمين:انا نرمين...اخت امك
بقيت نغزرلها...حتى هي تشبه لامي شوية...غمضت عينيا بالقاوي...و عاودت حليتهم...دنيا دارت بيا و شعرة لا طحت...شدتني من يدي بالوقت...تحكي
نرمين:ايجا معايا
مشيت معاها...ايه مشيت من غير حتى كلمة...خلطت عليها...و مخي بعيد برشا...اول مرة يعرضني حد من عيلة امي...اول مرة نحس لي ريحة امي قريبة ليا بعد السنين هذوما...طلعت راسي...نغزر لشوفور متاعها...حل الباب من تالي...غزرتلي تحكي
نرمين:اركب عزيزتي
خذيت نفس و ركبت...خلطت عليا...ثنية كاملة و احنا ساكتين...كبست عالخاتم متاع امي...نرد في النفس نزلت البلار...نغزر للفيلا متاعها...فيلا صغيرة تحفونة حلت البون الباب...دخلت وراها...غزرتلي تحكي
نرمين:تحب تقعد هوني و لا في الجنينة
انا:برا احسن
نرمين:ايجا عزيزتي
خلطت عليها مترددة...نعمل في الخطوة بالسيف..قعدت عالطاولة...قعدت مقابلتني...غزرتلي تحكي
نرمين:تشرب حاجة ؟
انا:احكيلي على امي
نرمين:شنية تحب تعرف ؟
انا:كلشي...شنية كانت تحب...شنية كانت تكره...شتحب تاكول...شنية تحب تلبس...احكيلي كلشي...امانك
نرمين:فرح كانت نسخة منك...كانت اصغر وحدة فين اكثر وحدة كان يحبها بابا
انا:فما غيرك ياخي ؟
نرمين:فما ليلى...اكبر وحدة فينا...بعدها انا...و فرح كانت اخر وحدة...و اكثر وحدة دخلت لفرح لدارنا
انا:باهي ك...كيفاش حتى عرست مع بابا...و شبيني ما نعرف حتى وحدة فيكم
نرمين:فرح تعرفت على احمد و هي تقرا في لفاك..وقتها عمرها 20 سنة...بوك كان يخدم عند بابا...و بحكم كانت تمشي لشريكة برشا...تعرفت عليه غديكا...منعرفش امتى و لا كيفاش لحقت تحبو...مع انو احمد كان ظاهر مكانش يحبها بنفس الطريقة
انا:ش...شقصدك ؟
نرمين:احمد كان يحب طفلة اخرى وقتها...على حساب ما نتذكر امو وقفت في وجهو...و الطفلة عرست على روحها...فرح كانت تعرف بهذا الكل...و احمد صارحها من اول مرة...اما كسحت راسها و كبشت فيه...برغم حبو ليها مكانش كبير...اما وقفت في وجهنا الكل...و اهم شي في وجه بابا...وقتها حطها بين قرارين...اما تختارو هو و لا احنا
انا:اختارت بابا
نرمين:للاسف...اختارت احمد...فرح بقرارها هذا قضات على حياتها...خلات العز و الجاه لي كانت فيه و نزلت لصفر...بابا تبرا منها...و حرمها علينا...مع هذا الكل محاولتش ترجع...و معاودتش خذات ثنية الدار مرة اخرى...بعد خمس سنين من عرسهم مرضت
عديت يدي على رقبتي...نحس في قلبي باش يخرج من بقعتو...لبني العرق...و النفس تسكر عليا...خذيت نفس و انا نسمع فيها تكمل تحكي
نرمين:كان عندها سرطان في راسها...المرحلة الاخيرة
انا:ل...لا...لا...لا...امي مكانش عندها سرطان...لاا مستحيل...بابا يكون كذب عليا
هزيت روحي وقفت...وخرت لتالي...نرد في النفس اما شي...حطيت يدي على صدري...نحس في روحي تخنقت...و روحي باش تطلع مني...حلت صاكي بالزربة جبدت الفونتولين متاعي...عاونتني ناخو نفس...و شدتني من يدي تحكي
نرمين:ايجا اقعد
كبست على يدها...و رجعت لبلاصتي...غزرتلها...نحكي
انا:م...من وين تعرف لانا مريضة ؟
نرمين:فرح كان عندها نفس المشكلة زادة...و اكيد عندي فترة نراقب فيك قبل...اصلا متوقعتش لي باش نلقاك معرسة و حبلة
عديت يدي على كرشي...و خذيت نفس نحكي
انا:ب...بابا عرس بأمي باش ينسى حبو القديم
نرمين:منعرفش...اما لي متاكدة منو انو اختي كانت اكبر ضحية
انا:ش...شكون المرا لي كان يحبها ؟
نرمين:نفسها حياة لي معرس بيه توا
دمعتي نزلت بالوقت...اول مرة نحس لبابا خذلني بالرسمي...للحظة ستخايلت لهو عرس بحياة باش منبقاش من غير ام...اما ظاهر فيه كان يستنى في موت امي...من دمعة ولات دموع...بكيت بقهرة...عديت يدي على خدي نحكي
انا:علاه رجعت توا ؟
نرمين:رجعت توا ؟ بابا بعد ما ماتت فرح...باع كلشي هوني...حاول مع احمد برشا...باش يهزك معاه اما رفض و برغم نفوذ بابا...اما احترم وصية امك...متعداش العام و مات هو زادة...متحملش موت فرح...و كان يلوم روحو ديما...منعرفش يمكن كان عرفنا بمرضها...كان لحقنا عليها...توا راهي عايشة
انا:امي مكانتش تنجم تقوم من فرشها...كانت تتوجع برشا...كانت دوب تنجم تحضني...هذا الخاتم كان اخر حاجة حطتها في يدي...مانيش متذكرة شنية لي قالتو بالظبط...اما من وقتها ما خليت حد يمس الخاتم هذا و لا حتى يفكو مني...ما عندي حتى شي يخص امي غيرو...و صورتين كهو
هزت يدها شاورت للبون...و هزتلها براسها ايه...دورت راسي...نغزرلها جاية عندنا...هازة صندوق في يدها حطاتو عالطاولة...و مشات...حلاتو جبدت منو صورة و عاودت سكراتو...و غزرتلي تحكي
نرمين:الصورة هاذي تلمنا الكل...اغزر هوني...هذا بابا...و هاذي ليلى...و لي هوني انا...و هاذي
انا:امي
نرمين:فرح
انا:وينها امكم ؟
نرمين:حتى امي ماتت وقتها فرح كانت صغيرة برشا...على هذاكا بابا كان متعلق بيها اكثر وحدة
انا:نجم ناخو صورة هاذي ؟
نرمين:اكيد...الصندوق لي هوني ولا متاعك انتي
انا:بالحق ؟
نرمين:في الصندوق هذا تلقى كلشي يخص امك المذكرات متاعها...تحكي فيهم على كلشي...على حبها لاحمد...على صحابها...على قرايتها...كلشي يخص امك تعرفو منها...فما تصاورها صياغتها زادة...و الكتاب لي كانت تحبو...و برفانتها...و الفولار لي كانت تحبو و برشا حاجات اخرى...الصندوق هذا كان عندي من سنين...و توا ولا من حقك انتي مريم
مديت يديا زوز كبست عليه...مش مصدقة اني نمس في حاجات متاع امي و كهو...كبست عليه بكل قوتي خايفة لا دور في رايها و تحرمني منو...تبسمت تحكي
نرمين:انا جيت لهوني لسبب اقوى من هذا الكل
انا:شنية ؟
نرمين:رجعت لهوني من سنين...اما بوك حرمني اني نشوفك...و لا حتى نقابلك...جيتك للمدرسة...اما وقتها خفت مني و هربت...من وقتها قررت نستناك لي تكبر هذا باش يكون احسن قرار...مريم...راهو بابا بعد فرح بكى عليك انتي...صار فينا و تعذبنا...راني لتوا عايشة بيه تأنيب الضمير...راني لتوا مش منجمة نسامح احمد على لي صار في اختي...ليلى من وقتها حلفت متحطش ساقها في تونس...و كان انا هوني توا...على خاطرك انتي و كهو
هزت يدها مرة اخرى...شاورت للبون...رجعت و المرة هاذي...هازة دوسي في يدها...حطاتو عالطاولة و مشات خذيت نفس نحكي
انا:شنية هذا ؟
حلاتو و هزت الاوراق لي داخلو...حطتهم قدامي تحكي
نرمين:هذا حق امك
انا:ش...شقصدك ؟
نرمين:بابا بعد موت فرح...باع كلشي...و حتى الشريكة زادة...ما خلى حتى شي يخص فرح...الشاك هذا...فيه فلوس امك الكل...تنجم تتصرف بيهم...الفلوس لي هوني باش يعاونوك تعمل لي تحب عليه...بعد توا ماكش بحاجة حتى حد
هزيت راسي نغزرلها مصدومة...عمري ما توقعت لامي كانت غنية و من الطبقة الراقية...عمري ما توقعت نسمع هذا الكل...و لا نقعد ما حد يعرف امي اكثر مني...حتى بابا...مكانش يحكي عليها برشا...غزرت للعقد...و عاودت غزرتلها نحكي
انا:ه...هذا شنية ؟
نرمين:بعد ما توقع العقد هذا...تنجم تصرف الفلوس كيما تحب...و حقك من الفيلا متاع بابا في سوسة موجود زادة...و تنجم تجي وقت ما تحب...هوني حقوقك الكل محفوظة...و حتى حد ماهو باش ياقف في وجهك...اصلا ليها سنين مسكرة توا...يجيو ليها الاولاد في الفاكونس كهو
انا:عندك اولاد ؟
نرمين:جهان و ندى...و ليلى عندها سامي و منى
انا:مكانش في بالي...لي عندي عيلة كبيرة
نرمين:تو تتعرف عليهم بالوقت...الاهم توا...اني نجمت نوصلك حقك
خذيت نفس...رجعت شعري لتالي...و عاودت غزرتلها نحكي
انا:اكيد مانيش باش نقبل هذا الكل مدام نرمين
نرمين:مانيش نعمل في مزية عليك مريم...هذا حق امك...معناها حقك انتي و كهو...و معادش تقولي مدام نرمين...خالتي نرمين
انا:كيفاش باش نتقبل هذا الكل ؟
نرمين:ماكش مجبورة تتقبل كلشي توا...برا اقعد مع روحك...و وقت تحس روحك مرتاحة ارجع لهوني
انا:نجم نمشي توا
نرمين:اكيد...و هز الاوراق هذوما معاك...تنجم تتأكد منهم عند المحامي
انا:باهي
نرمين:تحب تشرب حاجة ؟
انا:لا نحب نمشي و كهو
نرمين:حسام يعامل فيك مليح ؟
انا:من وين تعرف حسام انتي ؟
نرمين:قتلك كلشي يخصك عندي...ليا سنين و انا نراقب فيك من بعيد
انا:مهما عمل حسام...اما اكيد ماهوش كيما بابا...توا تأكدت بالقدا...انو قراري كان صحيح...يمكن انتقمت لأمي من غير ما نحس
نرمين:فرح عطات من روحها برشا لاحمد...منعرفش اذا كان يستهل و لا لا...اما متاكدة لهي ماهيش نادمة خاطر خرجت بيك لدنيا
انا:و انا فرحانة عاللخر خاطرها امي
نرمين:زعمة لي في ثنية ولد و لا بنية ؟
حطيت يدي على كرشي...و تبسمتلها....نحكي
انا:فرح صغرونة
نرمين:فرحتني عاللخر...باش تزيد صغرونة للعيلة
انا:مداام نرمين...نقصد خالتي نرمين...منحبش بابا يعرف لانا تلقيت بيك...و متحاولش تفركس عليا في دارنا
نرمين:نعرف وين نلقاك...اما اوعدني قبل...لانا باش نراك مرة اخرى
انا:اكيد
نرمين:خليني نوصلك
انا:ميسالش...خلي الشوفور يوصلني...نحب نبقى وحدي شوية
نرمين:باهي يا روحي
هزيت روحي وقفت...وقفت في جرتي...و قربت مني تحكي
نرمين:ميسالش نحضنك مرة وحدة
منجمتش نرجعلها...منعرفش حتى كيفاش حضنتني...و لا شنية لي حسيتو بالظبط...لتوا مانيش مصدقة لي قاعد يصير...جبدت روحي منها..نحكي
انا:وقيت لازمني نمشي توا
نرمين:باهي...متنساش اوراقك
هزيت الدوسي و الشاك...حطيتهم في الصاك...و كبست على الصندوق في يدي و خرجت...خالطت عليا حتى وصلت للكرهبة...ودعتها و طلعت...ثنية كاملة و انا كابسة عليه في يدي...غزرلي شوفور يحكي
هو:وين تحب نوصلك مدام
انا:تو تلقى جنينة متاع صغار...شوية للقدام...حطني غديكا
هو:باهي
بقيت نتبع في الثنية...هزيت يدي وقفتو...نحكي
انا:حطني هوني
هو:باهي
شد الفران...و نزل من الكرهبة بالزربة...حلي الباب خذيت نفس و نزلت...دخلت للجنينة...عندي برشا عليها اكثر بلاصة كنت نحبها من صغرتي...اكثر بلاصة كنت نحلم نجيها مع امي...الكرسي هذا قعدت فيه اكثر من مرة و انا نغزر لصغار لي ندادي و هوما مع امهاتهم
حتى بابا مكانش عندو وقت يجيبني لهوني...حطيت صاكي على جنب...و حليت الصندوق...هزيت نفس الصورة مرة اخرى...عديت صوابعي على صورة امي قداش كانت فرحانة هوني...كنت نعرف لهي مريضة..اما متوقعتش لهدرجة...توا فهمت علاه منجمتش تقاوم..توا فهمت علاه حتى حد ما حس بيها...كانت ديما وحدها حتى نانا عمرها ما رحمتها...مشكلتها مكانتش مع حياة و كهو...حتى مع امي زادة...توا فهمت برشا حاجات فهمت علاه حياة عمرها ما اعتبرتني كيما رنيم...عمرها ما غزرتلي كيما امي...توا فهمت علاه بابا بعد ما عرس بحياة معادش سافر و بعد...كل لحظة...كل ذكرى كانت تتعدا بين عينيا...تقهرني اكثر...عديت يدي عالشال لي محطوط على جنب...هزيتو في يدي...و قربتو لخشمي نفس الريحة البنينة...لي كنت نرقد عليها و انا صغيرة غريبة كيفاش مزالت فيه لتوا...و لا يمكن انا شميتها خاطرني حسيت بيها...هزيت صورها...نغزرلهم بالوحدة علاه اختارت بابا...علاه ضحات بعمرها...زعمة عملت نفس الغلطة متاعها في اختياري لحسام...زعمة طول السنين هاذي...ظلمت رنيم زادة خاطرني منجمتش نحبها و لا نهار...ديما كنت ندزها و نبعدها عليا...ديما كنت نضربها و نسمعها الكلام...قداش من مرة كانت تبكي و تطلب سماح مع انو مغلطتش...زعمة بابا هو المذنب الوحيد في الحكاية...حرمني من عيلة امي سنين طويلة...و يسكتني في كل مرة نحاول نحل الموضوع...حطيت كلشي من يدي...و هزيت المذكرة متاعها...عديت يدي عليها...ظاهر فيها قديمة برشا خذيت نفس و حليتها...نقرا في السطور لي جات على عيني << منعرفش اذا القرار هذا صحيح و لا غالط...اما متأكدة باش يجي نهار و بابا يسامحني...و يعرف لاحمد بالرسمي يحبني...نعرف لهو ماهوش باش يخليها بيا...تو يتفهم الحب هذا مع الوقت...حتى احمد وعدني لباش يبقى معايا لاخر لحظة...على هذاكا عمري ماني باش نسلم فيه >> طاحت دمعتي على اخر كلمة...سكرتها بالوقت...قداش تخذلت في حياتها...قداش بابا ظلمها طول عمري ستخايلت لهو كان يحبها و الموت فرقتهم اما هو...هو السبب...هو لي قتلها...هو لي حرمني من امي...باش يعيش مع المرا لي حبها...ضحى بأمي...و ضحى بيا زادة...سنين...و موت امي...بقى كي الجمرة في قلبي...قد ما حاولت منجمتش ننسى اكا ليلة منجمتش ننسى لهي ماتت و انا راقدة في حضنها منجمتش ننسى لانا بقيت برشا نستنى فيها تفيق عالاقل تعدي يدها على شعري و طمني...عالاقل تطلب مني كاسة ما كي العادة..لتوا نتذكر كبست نانا على يدي و هي تقولي لهي ماتت على روحها...عمري ما ريت الشر لي ريتو في عينيها...عمري ما نجمت نسامحها و لا نغزر لوجها...حتى حد ما حس لي حسيتو وقتها...حتى حد ما هزني في حضنو و طمني...بالعكس حضن امي و هي ميتة...هو لي حسسني بالراحة...كنت متأكدة لهي باش تفيق و ماهيش باش تخليني...كيما متأكدة لامي كانت معايا ديما...قوتي كنت ناخوها منها...اما توا بالظبط قوتي الكل تبخرت...عمري ما بكيت عليها و انا في البلاصة هاذي...خاطرني كنت نستخايل فيها معايا حضنت المذكرة لصدري...و بكيت...بكيت كأنو امي توا ماتت مش من 18 سنة...بكيت عليها بالقهرة و الضعف لي حسيتو الكل...عشت حياتي الكل ناقصة...عمري ما لقيت الحنان متاع امي...لا عند بابا....و لا حتى حسام لي ستخايلتو للحظة لهو بالحق حبني...يمكن حتى انا كنت ضحية كيما هي زادة...المرا الوحيدة...لعطاتني احساس امي...هي امي فتحية و كهو...غمضت عينيا بالقاوي...مستحيل نخلي بنتي تعيش لي عشتو انا و امي...اكيد باش تكون عندها حياة خاصة...و متأكدة لحسام ماهوش باش يسلم فيها...عالاقل ماهوش باش يكون اناني كيما بابا...كلشي نحب عليه...انو حسام ميظلمش بنتو مهما كان السبب...و يكون معاها ديما...و عمرو ما يسلم فيها...مهما كان المشكل بيناتنا...ماهوش باش يكون اهم من بنتي جملة .
🌸🌸🌸🌸🌸🌸🌸🌸🌸🌸
🔸️حسام يحكي:
ركيت الكرهبة على جنب...و هزيت تليفوني نكلم فيها اما شي...دخلت بعضي...و نزلت من الكرهبة...مش من عادتها طول لهدرجة...بقيت نطلب فيها اما شي...طلعت راسي نغزر لشراز...ماشية و تقرب...مش وقتها حتى طرف...وقفت قدامي تحكي
شراز:اهلا حسام
انا:لباس ؟
شراز:لباس عيشك...و انت ؟
انا:حمد الله على عينك
شراز:تستنى في مريم ؟
انا:ايه
شراز:اما في بالي لي مجاتش اليوم
انا:شقصدك ؟
شراز:عندها كور معايا و كهو...مدخلتش عندي و مريتهاش برا
انا:انا وصلتها صباح...وين تكون مشات ؟
شراز:منعرفش...كلمها ؟
انا:ماهيش ترد...و الصباح كانت حالتها تاعبة شوية
شراز:متقلقش روحك...بلكشي تكون رجعت لدار
انا:يمكن
شراز:صحيح قبل ما ننسى
انا:شنوة ؟
حلت صاكها...و حطت مفاتح داري في يدي..غزرتلها مستغرب نحكي
انا:شنية هذا ؟
شراز:انا نقلت من يومين
انا:شبيني منعرفش بالحكاية
شراز:حاولت نخبرك...اما مكنتش ترد على تليفوناتي...و حتى لي ميساج متاعي زادة
انا:وينك توا ؟
شراز:كريت برتمان قريب من الفاك
انا:مش كانك تسرعت شوية
شراز:بالعكس...هذا احسن قرار لينا...خاصة الفترة هاذي
انا:مبروك عالدار
شراز:عيشك...هاني باش نخليك توا...كي تلقاها طمني عليها
انا:باهي عيشك
عاودت هزيت تليفوني نطلب فيها...اما شي...كلمت امي...زادة مدخلتش لدار..رجعت للكرهبة...نحس في راسي باش يطرشق...الافكار الكل هدت عليا...خذيت نفس نهدي في روحي...كلمت محمد...حتى هو مش معاها...ركيت على جنب...و طلبت الكلينيك لي تمشيلها بالعادة...طمنت لهي مش موجودة غديكا...ضربت في راسي زهرة...كلمتها بالوقت...هزت عليا تحكي
زهرة:اهلا حسام لباس ؟
انا:لباس عيش اختي...و انتي شعاملة ؟
زهرة:لباس عيشك
انا:زهرة باش نسألك حاجة ؟
زهرة:لباس حسام ؟
انا:صراحة منعرفش مريم وين
زهرة:شقصدك ؟
انا:منعرفش...كانت تاعبة شوية...و هاني نكلم فيها متحبش تهز عليا...و ملقيتهاش في لفاك و حتى في دار
زهرة:تغشت من حاجة ؟
انا:حد علمي لا...صباح كنا لباس
زهرة:ساعات تحب تقعد وحدها...تلقاها توحشت امها على هذاكا
انا:وين نجم نلقاها ؟
زهرة:فما جنينة...قريبة لدارهم...بالعادة نلقاها غديكا...و كانك ملقيتهاش...امشي للمقبرة...و هاني باش نكلمها انا بلكشي تهز عليا
انا:باهي عيش اختي
زهرة:طمني عليها
انا:اكيد...رد بالك على روحك
زهرة:عيشك
علقت عليها...و طرت بالكرهبة...منعرفش على روحي كيفاش وصلت...شديت الفران و نزلت...دخلت للجنينة نفركس عليها...تنهدت بالقاوي...و انا نغزرلها...عاطية بظهرها...قدمت بخطوات رزينة...خايف من الحالة لي باش نلقاها فيها...خذيت نفس و قعدت بجنبها...عديت عينيا على وجها...اول مرة في حياتي نراها في الحالة هاذي...اول مرة من اللي عرفتها ريت دموعها...و رعشت شفايفها...منعرفش شنية لي حسيتو بالظبط...منعرفش اذا هي بالرسمي قاعدة تبكي و لا انا قاعد نستخايل فيها...قلبي خض بالقاوي...اول مرة نحس لهي بالرسمي بحاجتي...مديت يدي دورتها على ظهرها و جبدتها عندي...حطت راسها على صدري...من غير حتى كلمة كابسة على كتاب صغير في يدها و لا ندرا شنية...زادة مفهمتش شنية حكاية صندوق لمحطوط بحذاها محبيتش نسألها...و لا حتى نحكي معاها...نعرفها باش تحكي وحدها كي العادة...غرست يدي في شعرها نهدي فيها...و قلبي محروق...خايف عليها و هي في الحالة هاذي...هزت راسها شوية تحكي
مريم:احسن حاجة انك جيت عندي
بستها من راسها...و نزلت يدي...حطيتها على يديها زوز...لي كابسة بيهم على الكتاب لي في يدها...نحكي
انا:شنية لي صار...و شبي حالتك هكا ؟ و شنية هذا لي في يدك ؟
مريم:م...مذكرة متاع أمي
انا:امك ؟ مريم ياخي قابلت بوك انتي ؟
مريم:لا
انا؛مشيت لداركم ؟
هزتلي براسها لا...و كبست عليها أكثر...تحكي بصوت مخنوق عاللخر
مريم:قابلت أخت أمي اليوم ؟
أنا:تقصد خالتك ؟
هزت راسها...جات عيني في عينها...غزرتلي ندرا كيف تحكي
مريم:عطاتني كلشي يخص أمي...المذكرة متاعها و الفولار...تصاورها متاع بكري...و برفانتها...كلشي يخص امي ولى متاعي توا...اما زادة حكاتلي برشا حاجات خايبين
انا:شننوة ؟
مريم:بابا عرس بأمي باش ينسى حياة..عرس بيها باش ينتقم من الطفلة لي حبها بكري
بقيت نغزرلها...كلامها صدمني...منعرفش علاه للحظة ضربت في راسي شراز...للحظة خفت يمشي في بالها إني تصرفت بنفس الطريقة...خذيت نفس نحكي
انا:مريم متأكدة من اللي تقول فيه ؟
مريم:توا فهمت علاه وقت عرس بحياة معادش بعد علينا
أنا:وين كان يمشي قبل ؟
مريم:و أنا صغيرة كان يسافر...كان يبعد عليا و على أمي...منذكرش برشا...أما آخر فترة أمي تعبت عاللخر حتى الفرش متقومش منو...وقتها نانا محبتش تكلمو و متشمتة في أمي...عمري ما ننسى غزرتها كي عرفت لهي ماتت...عمري ما ريت مرا قاسية كيفها...حتى حياة مكانتش اكاكا...برغم الحساسية الكبيرة و العرك لي كان بينا...أما عمرها ما غزرتلي اكا الغزرة...حتى في آخر فترة قبل ما نعرس بيك...حاولت تتبدل معايا...المذنب الوحيد مش حياة و مش نانا...المذنب الوحيد هو بابا هو لي حرمني من أمي...هو لي استغل حبها...و حرمني حتى من ريحتها...كل مرة نقلو نحب نمشي لعيلة أمي كان ياقف في وجهي...كان ياقف في وجهي باش منراش لحقيقة...حقيقة أنو أمي كان عندها سرطان في راسها...و منجمتش تقاوم...و لا هو لمحاولش يداويها عمري ما نجمت ننسى أكا ليلة...لتوا واقفة كحاجز بيني و بينو...و لي عملو في أمي عملو فيا...أمي بوها تبرا منها على خاطرو...و هو عمل فيا نفس الشي...مع أنو يعرف الحكاية توجع برشا...حتى محاولش يطمن عليا وين و كيفاش عايشة...كل مرة كان يقول لمانيش باش نتهنى معاك...وينو توا...علاه موقفش في وجهك...مدامو يعرفك لهدرجة...علاه خلاني عندك لتوا حسام...و لا حتى انا مستعجل على موتي باش يتهنى
هزيت يدي عديتها على خدودها...نمسح في دموعها لي كانت تفارع فيهم أما غلبوها و نزلو...نحكي
أنا:إيجا عندي تراه
قربت عندي بالوقت...حضنتها بكل قوتي...بكل الخوف لي حسيتو للحظة من كلامها تالي...نعرف لي مقهورة مني...و مستحيل تسامحني...نعرف لي جاي اصعب...اما مانيش باش نسلم...منعرفش كيفاش باش نصلح لي صار الكل...اما مدامها مرتي و على ذمتي مانيش باش نسمح فيها...و حكاية بوها مدخلتش لمخي...نعرف سي أحمد من سنين...و عمري ما ريت منو شي خايب...و لا مرة شتكى منو حد..يحترم لي فوقو و لي تحتو كيفاش باش يعمل في مرتو أكاكا...اكيد فما سوء تفاهم في الحكاية الكل...عديت يدي على ظهرها نحكي
انا:يززي كهو...حرام لي تعمل فيه...اكيد أمك متحبش تراك في الحالة هاذي...و حتى بنتك تعبتها معاك...يزي عيش حبي
مريم:تاعبة عاللخر حسام
أنا:أغزرلي هوني
كبست على وجها بيديا زوز...و غزرت لعينيها نحكي
أنا:باش نسألك...و إنتي جاوبني بصراحة باهي
مريم:باهي
أنا:خالتك هاذي تعرفها من قبل ؟
مريم:لا...اليوم قابلتها أول مرة
أنا:و صدقتها بالبساطة هاذي
مريم:شقصدك ؟
أنا:منعرفش...بلكشي حتى هي ناقمة على بوك و تحبك تبعد عليه...بلكشي عملت هكا باش تنتقم منو و كهو
في رايي عم احمد عندو كلام اخر...مستحيل يكون عمل في امك هذا الكل
مريم:و اللي عملو فيا ؟
أنا:إنتي قلتها...هو كان متأكد لأنا مانيش باش نهنيك...و باش نعذبك معايا برشا...و كلامو طلع صحيح...إنتي لتوا تعاني جرايري مريم...لتوا متنجمش تغزرلي كيما قبل...اسمعو مرة وحدة...بعدها القرار لي تاخذو انا معاك فيه وعد
جبدت روحها مني و تلفتت شوية...جبدت دوسي صغير من صاكها...حطاتو في يدي تحكي
مريم:عطاتني هذا
أنا:شنية هذا ؟
مريم:قالت لي حق أمي من الورثة
حليتو نقرا فيه...هزيت شاك في يدي...طلعت حاجبي مستغرب...صحيح المبلغ لباس عليه...و ينجم يعاونها في برشا حاجات تحب عليها في حياتها...و حتى العقد ينص لعندها حق في الدار متاع سوسة...أما علاه حتى لتوا...و اذا كانت الورق قانونية...لازمها توقع عالورقة هاذي...باش تتصرف في الفلوس لي عندها...الحكاية داخلة بعضها...و معادش نعرف شنية لي صار بالظبط غزرتلها نحكي
انا:متتصرفش من راسك...قبل ما تشاور محامي باهي
مريم:باهي
هزيت يدي عديتها على خدها...سخون يحرق...تبسمت نحكي
انا:شرايك نرجعو لدار توا ؟
مريم:معينيش
انا:مريم عزيزتي...اغزرلي...قعدتك هوني باش تعبك أكثر هيا معايا توا...و نوعدك لي تحب عليه باش يصير
مريم:باهي
قربت منها اكثر...بستها من راسها...و كبست على يدها نحكي
انا:هيا ملا
مريم:لحظة
هزت صندوق في حجرها...حطت كلشي داخلو و سكراتو عاونتها تاقف...جيت باش نشدو عليها...وقفتني تحكي
زهرة:لباس عليا
انا:باهي...إيجا
كبست على يدها...نمشي فيها ورايا...حليت باب الكرهبة ركبتها...و عاودت سكرتها...خلطت عليها...و طرت بيها لدار...طول الثنية...ساكتة...من غير حتى كلمة...اول مرة نراها في الحالة هاذي...نعرف لي موضوع امها حساس برشا بالنسبة ليها...اما اليوم بالظبط...حسيت بالنقص لي قاعدة تعيش فيه...اول ما وصلت...نزلت قبلها و حليتلها الباب...فكيت الصندوق من يدها...و غزرتلها نحكي
انا:هيا معايا توا
مريم:نحس في روحي مش قد بعضي
انا:هاني معاك
هزت يدها بالسيف...حطتها في يدي...كبست عليها استندت عليا بالوقت...احسن شي خرجت خالتي نعيمة قربت مني شدت عليا الصندوق و صاكها...تحكي
نعيمة:لباس ولدي ؟
انا:لباس خالتي لباس
كبست عليها بيديا زوز...نمشي فيها...عرضتني امي مفجوعة تحكي
امي:مرييم يا روحي...شبي حالتك هكا...شنية لي صار ؟
مريم:ل...لباس امي
امي:لا ماكش لباس...حسام ولدي شبيها...نعرفها متحبش تحكي...و تعبنا معاها
انا:امي اهدا...والله لباس...نحكيو مبعد باهي
امي:ايه يه...اكيد برا طلعها لبيتها...تو نوصي نعيمة تحضرلها عشاتها
انا:باهي فتحية...يخليك لينا
امي:عيش ولدي
نزلت راسي غزرتلها...كابسة على يدي...و تهرب في عينيها من امي...خذيت نفس نحكي
انا:هيا صغرون...ايجا
اول ما وصلت لدروج...هزيتها بين يديا...و طلعت لبيتي حطيتها عالسرير...و نزلت عليها...نحيتلها الفاست نحكي
انا:مريم لباس ماهو ؟
مرجعتليش...غطست في نوم من غير حتى كلمة...بدنها الكل سخون يحرق...خلي الدبش لي لابساتو تبلل نحيتلها الكونفارس...و عديت يدي على وجهي نغزرلها منجمش نقول لامي جي تبدللها و لا حتى خالتي نعيمة زعمة نبدللها انا...و كان ترصالنا في عركة مبعد...نعرف ماهيش باش تعديلي الحكاية...قربت من القارد روب جبدت أكثر روبة ترتاح فيها...و رجعتلها...عديت يدي على خدها نحكي
انا:مريم...يا روحي...هيا قوم بدل دبشك و ارجع ارقد مكانش تو تمرض اكثر
غمضت عينيا بقوة...و عاودت حليتهم...مخلاتليش حل اخر...يدي رعشت و أنا نحيلها في حوايجها متوقعتش باش نشوف بدنها مرة أخرى بعد أكا ليلة...و لا خلي نقول هي تعمدت تغطيه عليا في كل مرة تشوفني فيها عديت عينيا على كرشها...قلبي دق بالوقت منعرفش شنية لي حسيتو بالظبط...حطيت يدي عليها و تبسمت دوب حلت عينيها تحكي
مريم:ح..حسام...فاش تعمل ؟
انا:مريم...عزيزتي عاوني نلبسلك دبشك...كان تبقى هكا تو تمرض أكثر
مريم:ن..نلبس وحدي
أنا:باهي قوم برك
كبست عليها قعدتها شوية...ترمات في حملتي...بطلوع الروح باش نجمت نكمل نلبسلها...شي من سخانتها...شي من تخرنينها لي دوب يتسمع...عديت يدي على شعرها نحكي
انا:مترقدش توا...لازمك تاكول حاجة
مريم:معينيش
جبدتها من عندي شوية...تكيتها لتالي...و غزرتلها نحكي
أنا:تحب تخسر بنتك زادة...شنية ذنبها في اللي قاعد يصير...تعرف بالقدا حالتك هاذي باش تنعكس عليها زادة
مريم:شصار خفت عليها ؟
أنا:خايف عليكم زوز
كبست على يدها...و طلعتها عندي...بستها منها...نحكي
انا:منحبش نخسركم زوز...و منحبش نراك في الحالة هاذي...نوعدك كلشي تو يتعدا...و انا معاك في اي قرار تاخو...أما مش على حسابك و على حساب بنتي..مانيش مستعد لخسارة اخرى مريم
مريم:نحب نرقد و كهو
دق الباب بالوقت هزيت روحي...نلقى امي و خالتي نعيمة في الباب...شديت عليهم صينية و وخرت لتالي قربو منها...وحدة تقيس في سخانتها...و وحدة تسأل فيها...و هي مرة تغزرلهم...مرة تغزرلي...تبسمت نحكي
أنا:شنوة فتحية...لتوا لا طمنت عليها إنتي ؟
فتحية:والله كان يطلع عندك يد في حالتها يا مكبوب السعد...الا ما نوريك نجوم القايلة
نعيمة:وه...شنية عملتلها ولدي ؟
انا:والله يهديكم زوز...ديما تمسحو سكينة فيا
فتحية:خلي تقوم لباس و تو نتفاهمو...باهي يا روحي
مريم:ب...باهي أمي
قحرولي زوز...و خرجو...بقيت واقف في بلاصتي مبهم فقت من سرحتي..كي حطت يدها على كرشها موجوعة قربت منها نحكي
انا:لباس ماهو ؟
مريم:حاجة عادية متخافش
انا:والله البخص لي كليتو من فتحية اليوم...مسمعتوش حياتي الكل
مريم:تستهل
انا:من الناحية هاذي عندك حق...نستهل
دوب تبسمتلي...تفرهدت و انا نغزرلها...هزيت يدي نوكل فيها و نحكي
انا:هيا...حل فمك
قربتلي شوية...دوب كلات شوية و حبست...غزرتلي تحكي
مريم:بردانة عاللخر
انا:البيت سخونة عزيزتي
مريم:منعرفش
انا:باهي لحظة تو نرجعلك
مريم:باهي
هزيت كمادات من بيت البانو...حطيتهم على جبينها بدلت دبشي و رجعتلها...أما نفس الشي...تسطحت بجنبها...نحكي
أنا:إيجا عندي
قربت مني بالوقت غير العادة...كبست عليها في حضني نعدي في يدي على شعرها نحكي
انا:حاول تنسى لي صار اليوم...نعرف صغرونتي قوية
مريم:انت متعرفش شنية لي عشتو...راني لتوا نحلم بأمي...لتوا كي نشوف صغير مع أمو نغير منو...حتى اختي عمري ما حبيتها...خاطر هي عندها أمها و أنا لا
انا:حتى انا خسرت بابا...و لقيت روحي قدام مسؤوليات اكبر مني...محمد لي كان صغير و امي لي قعدت ضايعة و الديون لي تلمت علينا..اما حتى حال ما يدوم عزيزتي هاني قدامك توا...وصلت للي نحب عليه و اكثر...أما زادة في الطريق هاذي...خسرت برشا حاجات...حتى محمد بنيت حاجز بيني و بينو...اما وسط هذا الكل مزال كيما ولدي...مش خويا و كهو...و ساعات نحلم لي بابا يوصي فيا عليه...و متأكد لهو قريب مني زادة...و امك اكاكا...قريبة منك عاللخر
مريم:رنيم اكثر وحدة كنت نغير منها...برغم بابا عمرو ما فرق بينا...عمرو ما فضل حد عليا...اما زادة منجمتش نحبها..كل مرة تقرب مني ندزها...كل مرة تحاول تقربلي نبعدها...حتى وقت كنا صغار...كنت نضربها...مع انو نعرف لهي ما عملت شي...و لانا غالطة...اما هكا كان يرضيني عاللخر...حتى وقت تشتكي لبابا...كان يصدقني انا...فكرت اكاكا لانا قاعدة ننتقم لامي منو..أنا لي خلقت اكبر حاجز بيني و بين اختي...توا منعرفش شنية لازم نعمل...و لا شنوة باش يصير اكثر
انا:ما تفكر في حتى شي توا...ارتاح و كهو...كلشي باش يتحل مبعد صدقني
مريم:حسام
انا:مممم
مريم:أنت نهارتها
انا:شنوة ؟
مريم:حتى شي أنسى
انا:مزلت بردانة ؟
مريم:عاللخر
خذيتها في حضني اكثر...نعدي في يدي على شعرها لين هزها نوم و رقدت...ليلة كاملة تهتري بأمها...ليلة كاملة منجمتش نغمض عيني...مخي يهز فيا و يجيب خايف تصيرلها حاجة...جراير لي تعدا على راسها بين ليلة و نهار...اول ما طلع نهار..مديت يدي هزيت تليفوني و كلمت المحامي متاع الشريكة...هز عليا بالوقت يحكي
خالد:بونجور سي حسام
انا:بونجور سي خالد...صراحة حاجتي بيك في قضية مستعجلة
خالد:لباس...صارت حاجة في شريكة ؟
انا:لا...القضية شخصية
خالد:باهي...كيفاش نجم نعاونك ؟
انا:باش نبعثلك نسخة من عقد...نحبك تفهملي الحكاية بالقدا...و الاهم نحب نعرف شكون منهم لي في تونس مدام ليلى و لا مدام نرمين...و يا ريت تبعثلي عنوانها في أسرع وقت
خالد:أكيد سي حسام...بيناتنا تليفون
انا:باهي عيشك
حطيتو من يدي...و نزلت راسي نغزرلها...لتوا غاطسة في نوم...عديت صوابعي على خدها...و نزلت بيدي لكرشها...قلبي خض بالقاوي...دوب حسيت بيها تحركت عاودت غزرتلها...راقدة و مش حاسة على شي...خذيت نفس...و هزيت يدي نفيق فيها
أنا:مرريم...مريم عزيزتي فيق
مريم:مممم...ح...حسام
انا:تي فيق...ساعة
حلت عينيها مروهجة...دوب غزرتلي و عاودت سكرتهم تحكي
مريم:شفما ؟
أنا:حسيت بيها ؟
مريم:شكون ؟
انا:بنتي
مريم:فيقتني على هاذي أنت ؟
انا:حسيت بيها ياخي ؟
مريم:حسام شبيك...مش هي داخل كرشي...طبيعي نحس بيها
انا:ايه...والله صحيح
مريم:شبيك مفجوع ؟
انا:حتى شي...منعرفش...أنا
مريم:حسام طبيعي لي صار...إرتاح
انا:شبيها معادش تتحرك ؟
مريم:مش ديما تتحرك
انا:إنتي كيفاش تحس في روحك ؟
مريم:كان مفيقتنيش...راني أحسن من هكا
انا:ميسالش أرجع ارقد على روحك
مريم:معادش عيني
هزت روحها شوية...جا وجها في وجهي...غزرتلي ندرا كيف...مديت يدي...رجعت خصلات شعرها لتالي...و نزلت عليها اكثر...خذيت نفس من ريحتها...حسيت روحي سكرت...غزرتها ليا خلاتني ننسى لي صار...و الوضع لاحنا فيه...رعشة شفايفها حبست كي نزلت عليهم...كبست يدها على خدي...خلاتني نغطس فيها اكثر...اول مرة بعد شهور...لقيت روحي نعيش في نفس الإحساس مرة أخرى...لقيت روحي...شاهيها و متوحشها عاللخر...منعرفش كيفاش لتوا نجمت نحرم روحي منها يمكن أكثر حاجة كنت نعملها إني نهرب منها...أول مرة بعد اللي صار...نحس اللي مزال فما شي بيناتنا مستحيل أنو يموت...حبي ليها أقوى من كلشي في حياتي...فقدت السيطرة على روحي و بدني...كلشي نخمم فيه...هي و كهو...كبست بيدي على بروتال الروبة دوب نزلتها شوية...حطت يديها زوز على صدري..تحكي بالسيف
مريم:ح...حسام يززي...س...سيبني...حسام
جبدت روحي منها مروهج...كأنو فما شكون كب عليا سطل ما بارد...متوقعتش ننسى روحي معاها لهدجة كبست عالروبة بيدها...و وقفت بالزربة...ترعش...هزيت روحي وقفت مقابلها...وخرت لتالي تحكي
مريم:ح...حسام...شنية لي تعمل فيه أنت ؟
انا:مريم اهدا
قربت منها وخرت أكثر...خطفتها من يدها و حاوطت وجها بيديا زوز نحكي
انا:قتلك اهدا...ما صار شي
مريم:ا...أنا...مستحيل...حسام
انا:مريم يززي...منقصدش لي صار...منعرفش كيفاش عملت معاك اكاكا...أما منحبكش تخاف مني...لي صار قبل مستحيل يتعاود باهي...مانيش باش نمسك من غير رضايتك...على هذاكا طمن...مفهوم كلامي
مريم:ب..باهي
بستها من راسها...و جبدت روحي منها...تبسمت نحكي
انا:هيا توا...برا أعمل دوش...و أرجع لفرشك فيسع
مريم:لازمني نمشي للفاك...البارح مدخلتش زادة
انا:و ماكش باش تمشي اليوم زادة...نحبك ترتاح...وقتها برك باش نخليك تمشي على روحك
مريم:أما
انا:مريم قتلك ماكش باش تمشي لحتى بلاصة...و مانيش باش نعاود كلامي...من غير ما تصحح راسك المرة هاذي باهي
مريم:اففف باهي
وخرت لتالي...تلم في روحها و طلع في البروتال...دخلت لبيت البانو...و سكرت الباب بالقاوي...تبسمت بالوقت زايد معاها...مستحيل تتبدل طبيعتها...هزيت العقد من الصندوق...صورتو و رجعتو لبلاصتو...بعثتو في ميساج لخالد...اهم شي عندي توا...اني نقابل خالتها...و نفهم أصل الحكاية...مستحيل نخليها تغرق...على خاطر جرد عقد و شاك...و اكيد سي أحمد عندو تفسير للي صار الكل
#زهرة🌸
#سمر_القايد💌