السفاح العاشق

بارت 13

🍂 ﺑﻌﺪ ﻣﺮﻭﺭ ﺳﺘﺔ ﺃﺷﻬﺮ 🍂
ﻭﺍﻗﻔﺔ ﻗﺪﺍﻡ ﻟﻤﺮﺍﻳﺔ ﻻﺑﺴﺔ ﺳﺮﻭﺍﻝ ﻛﺤﻞ ﻣﻊ ﺟﺎﻛﻴﻂ ﺟﻴﻨﺰ ... ﻗﺎﺩﺍﺕ ﺷﻌﺮﻫﺎ ﺑﻴﺪﻳﻬﺎ ﻫﺰﺍﺕ ﻣﺴﻜﺎﺭﺍ ﺩﺍﺭﺗﻬﺎ ... ﻭ ﺩﺍﺭﺕ ﻋﻜﺮ ﻓﻠﻮﻥ ﺧﻔﻴﻒ ﻟﺸﻔﺎﻳﻔﻬﺎ ... ﻣﻄﺎﺕ ﺷﻔﺎﻳﻔﻬﺎ ﻭ ﻟﺒﺴﺎﺕ ﺍﻟﻨﻀﺎﺭﺍﺕ ... ﻫﺰﺍﺕ ﺻﺎﻛﻬﺎ ﻭ ﻫﺒﻄﺎﺕ ﻟﺘﺤﺖ ﺩﺧﻼﺕ ﻟﻌﻨﺪ ﻣﻬﺎ ﻟﺒﻴﺖ ...
ﺟﻮﻻﻥ : ﻣﺎﻣﺎ ﻫﺎﻧﻲ ﻣﺸﻴﺖ
ﺣﻔﻴﻀﺔ : ﻣﺘﻌﻄﻠﻴﺶ ﺍﻟﻠﻪ ﻳﺮﺿﻲ ﻋﻠﻴﻚ
ﺟﻮﻻﻥ : " ﺑﺎﺳﺘﻬﺎ " ﺍﻭﻛﻲ ﻣﻐﺎﺩﻳﺶ ﻧﺘﻌﻄﻞ
ﺧﺮﺟﺎﺕ ﺟﻮﻻﻥ ﻭ ﺣﺎﺳﺔ ﺑﺸﻌﻮﺭ ﻣﺨﻠﻂ ... ﻛﺘﻜﺮﻩ ﺗﻜﺬﺏ ﻋﻠﻰ ﺍﻷﻡ ﺩﻳﺎﻟﻬﺎ ... ﺧﺎﺻﺔ ﻓﺎﺵ ﻛﺘﻜﻮﻥ ﻏﺎﺩﺓ ﺗﻘﺎﺑﻞ ﺯﻫﻴﺮ ... ﺍﻟﻲ ﻣﺮﺕ 6 ﺷﻬﻮﺭ ﻋﻠﻰ ﻋﻼﻗﺘﻬﻢ ... ﻭﻟﻮ ﺍﻧﻬﺎ ﺩﺍﻳﺮﺓ ﺣﺪﻭﺩ ﻭ ﻫﻮ ﻋﻤﺮﻭ ﺗﺠﺎﻭﺯﻫﻢ ... ﻟﻜﻦ ﻣﻊ ﺫﻟﻚ ﺧﺎﻃﺮﻫﺎ ﻛﻴﻀﺮﻫﺎ ... ﻭ ﻣﺘﻘﺪﺭﺵ ﻣﺘﺸﻮﻓﻮﺵ ﺧﺎﺻﺔ ﻓﻬﺎﺩ ﺍﻷﻭﺍﺧﺮ ﻣﺸﺎﻋﺮﻫﺎ ﺍﺗﺠﺎﻫﻮ ﺗﻌﻤﻘﺎﺕ ﺍﻛﺜﺮ ...
ﻭ ﺣﺎﺳﺔ ﺑﻠﻲ ﻛﻴﺒﺎﺩﻟﻬﺎ ﻧﻔﺲ ﺍﻟﺸﻌﻮﺭ ... ﺑﺘﻌﺎﻣﻠﻮ ﺍﻟﺠﻴﺪ ﻭ ﺍﻹﺣﺘﺮﺍﻡ ﺍﻟﻲ ﻛﻴﻌﺎﻣﻠﻬﺎ ﺑﻴﻪ ... ﻭ ﺍﻟﻲ ﺯﺍﺩ ﻋﻠﻰ ﺫﻟﻚ ﻫﻮ ﺗﺸﺠﻴﻌﻮ ﻟﻴﻬﺎ ﺗﺒﻊ ﺣﻠﻤﻬﺎ ﻓﺎﻟﻜﺘﺎﺑﺔ ...
ﺧﺪﺍﺕ ﻃﺎﻛﺴﻲ ﻟﺒﺤﺮ ﻓﻴﻦ ﻛﺎﻳﻦ ﺯﻫﻴﺮ ... ﺧﻠﺼﺎﺗﻮ ﻭ ﻫﺒﻄﺎﺕ ... ﺧﺪﺍﺕ ﻧﻔﺲ ﻃﻮﻳﻞ ﻛﺘﺴﺘﻨﺸﻖ ﺍﻟﻬﻮﺍﺀ ... ﺗﻤﺸﺎﺕ ﺷﻮﻳﺔ ﻓﺎﻟﺸﺎﻃﺊ ﻛﺘﻘﻠﺐ ﻋﻠﻴﻪ ... ﺣﺘﺎ ﺑﺎﻥ ﻟﻴﻬﺎ ﻭﺍﻗﻒ ﻣﻊ ﺷﻲ ﺩﺭﺍﺭﻱ ... ﺑﻘﺎﺕ ﻭﺍﻗﻔﺔ ﻛﺘﺸﻮﻑ ﻓﻴﻪ ... ﺷﺎﺩ ﻟﻮﺡ ﺍﻟﺴﻮﺭﻑ ﻓﻴﺪﻭ ﻻﺑﺲ ﻏﻴﺮ ﺷﻮﺭﻁ ... ﺍﺑﺘﺎﺳﻤﺎﺕ ﺑﺨﺠﻞ ﻭ ﻫﻲ ﻛﺘﺤﻘﻖ ﻓﻴﻪ ...
ﻓﺠﺄﺓ ﺗﻠﻔﺖ ﺯﻫﻴﺮ ... ﺑﺎﻧﺖ ﻟﻴﻪ ﻭ ﻫﻮ ﻳﺘﻢ ﺟﺎﻱ ﻋﻨﺪﻫﺎ ... ﻭﻗﻒ ﻗﺮﻳﺐ ﻟﻴﻬﺎ ﻭ ﺗﺤﻨﺎ ﺑﺎﺳﻬﺎ ﻣﻦ ﺧﺪﻫﺎ ...
ﺯﻫﻴﺮ : ﺍﻣﺘﺎ ﻭﺻﻠﺘﻲ ؟
ﺟﻮﻻﻥ : ﻏﻴﺮ ﺩﺍﺑﺔ
ﺯﻫﻴﺮ : ﺗﻮﺣﺸﺘﻚ
ﺟﻮﻻﻥ : " ﺩﻏﻴﺎ ﺗﺰﻧﮕﺎﺕ " ﻏﻴﺮ ﻟﺒﺎﺭﺝ ﺗﺸﺎﻭﻓﻨﺎ
ﺯﻫﻴﺮ : ﻭﺍﺧﺔ ... ﻣﻨﺘﻮﺣﺸﻜﺶ ﺯﻋﻤﺎ !
ﺟﻮﻻﻥ : ﻻ ﻣﺎﻗﺼﺪﺗﺶ ﻫﻜﺎﻙ ﻫﻬﻪ " ﺑﻐﺎﺕ ﺗﺒﺪﻝ ﺍﻟﻤﻮﺿﻮﻉ " ﻛﻨﺘﻲ ﻛﺘﺴﻮﺭﻓﻲ ؟
ﺯﻫﻴﺮ : ﺍﻣﻤﻢ " ﺷﺪ ﻓﻴﺪﻫﺎ " ﺣﻴﺪﻱ ﺳﺒﺮﺩﻳﻠﺘﻚ ... ﻧﺘﻤﺸﺎﻭ ﺷﻮﻳﺔ
ﺣﻴﺪﺍﺗﻬﺎ ﻭ ﻫﺰﺍﺗﻬﺎ ﻓﻴﺪﻫﺎ ... ﺑﻘﺎﺕ ﻏﺎﺩﺓ ﻫﻲ ﻭﻳﺎﻩ ﺟﻨﺐ ﻟﺒﺤﺮ ﻣﺠﻤﻌﻴﻦ ... ﺣﺘﺎ ﻭﻗﻒ ﻭ ﺿﺎﺭ ﻋﻨﺪﻫﺎ ...
ﺯﻫﻴﺮ : ﻋﺮﻓﺘﻲ ﻋﻼﺵ ﻗﻠﺖ ﻟﻴﻚ ﻧﺸﻮﻓﻚ ﻫﺎﺩ ﻟﻌﺸﻴﺔ
ﺟﻮﻻﻥ : ﻋﻼﺵ ؟؟
ﺯﻫﻴﺮ : ﻛﻨﺖ ﻏﻨﺨﻠﻴﻬﺎ ﻣﻔﺎﺟﺄﺓ ﺣﺘﺎ ﻟﻌﻴﺪ ﻣﻴﻼﺩﻙ ... ﻟﻜﻦ ﺑﺎﻗﻲ ﺑﻌﻴﺪ ﻭ ﺧﺎﺻﻚ ﺗﻼﻗﺎﻱ ﺑﺸﻲ ﻧﺎﺱ
ﺟﻮﻻﻥ : " ﺑﺎﺳﺘﻔﻬﺎﻡ " ﻣﺎﻓﻬﻤﺘﺶ ... ﺍﻧﺎ ﻣﻔﺎﺟﺄﺓ ؟؟
ﺯﻫﻴﺮ : " ﻗﺎﺑﻠﻬﺎ ﻣﻌﺎﻩ ﻭ ﺷﺪ ﻓﻴﻬﺎ ﻣﻦ ﺩﺭﺍﻋﻬﺎ " ﺭﻭﺍﻳﺘﻚ ﺑﻌﺪﻣﺎ ﻋﻄﺘﻴﻬﺎ ﻟﻴﺎ ﻭ ﻗﺮﻳﺘﻬﺎ ... ﻣﺎﻗﺪﺭﺗﺶ ﻧﺒﻘﺎ ﺑﻼﻣﺎ ﻧﺪﻳﺮ ﻭﺍﻟﻮ ... ﺭﻭﺍﻳﺘﻚ ﺧﺎﺻﻬﺎ ﺗﻨﺸﺮ ﻭ ﺇﺳﻤﻚ ﻳﺘﻌﺮﻑ ... ﺧﺎﺹ ﺍﻟﻨﺎﺱ ﻳﻌﺮﻓﻮ ﺑﻤﻮﻫﺒﺘﻚ ... ﻭ ﺑﺪﻝ ﺗﺨﺪﻣﻲ ﺗﺤﺖ ﺇﻣﺮﺍﺕ ﺷﺨﺺ ﺁﺧﺮ ... ﻣﻤﻜﻦ ﺗﻜﻮﻧﻲ ﻛﺎﺗﺒﺔ ﻧﺎﺟﺤﺔ ... ﻭ ﺗﺨﺼﺼﻲ ﻭﻗﺘﻚ ﻏﻴﺮ ﻟﻠﻜﺘﺎﺑﺔ ... ﻭ ﺗﺨﺮﺟﻲ ﻣﻦ ﻫﺎﺩ ﺍﻷﻧﺎﻣﻞ ﺗﺤﻔﺎﺕ ﺁﺧﺮﻳﻦ ... ﺑﺤﺎﻝ ﺭﻭﺍﻳﺘﻚ ﺍﻷﻭﻟﻰ
ﺟﻮﻻﻥ : " ﻣﺸﻮﻛﻴﺔ " ﺷﻨﻮ ﻛﺘﻘﺼﺪ ؟؟
ﺯﻫﻴﺮ : ﻭﺍﺣﺪ ﻣﻦ ﺍﻟﺰﺑﻨﺎﺀ ﻓﺎﻟﺮﻳﺴﻄﻮ ﺍﻟﻲ ﺧﺪﺍﻡ ﻓﻴﻬﺎ ... ﻋﻨﺪﻭ ﺩﺍﺭ ﻧﺸﺮ ... ﻭ ﻋﻄﻴﺘﻮ ﺭﻭﺍﻳﺘﻚ ﺷﻲ ﺃﺳﺒﻮﻉ ﺩﺍﺑﺔ ... ﻟﺒﺎﺭﺡ ﺍﺗﺎﺻﻞ ﺑﻴﺎ ﻭ ﻗﺎﻟﻲ ﺿﺮﻭﺭﻱ ﻳﻘﺎﺑﻠﻚ
ﺟﻮﻻﻥ : " ﺗﻐﺮﻏﺮﻭ ﻋﻨﻴﻬﺎ ﺑﺎﻟﺪﻣﻮﻉ " ﺑﺎﻟﺼﺢ ... ﻣﺎﻣﺼﺪﻗﺎﺵ ... ﻳﻌﻨﻲ ﺭﻭﺍﻳﺘﻲ ﻏﺘﻄﺒﻊ ﻭ ﻳﻘﺮﺍﻭﻫﺎ ﺍﻟﻨﺎﺱ !
ﺯﻫﻴﺮ : " ﺣﺮﻙ ﺭﺍﺳﻮ ﺑﺎﻹﻳﺠﺎﺏ " ﻭﻱ ... ﻫﻮ ﺃﻛﺪ ﻟﻴﺎ ﺃﻥ ﺍﻟﺮﻭﺍﻳﺔ ﻋﺠﺒﺎﺗﻮ ... ﻭ ﻣﺴﺘﺎﻋﺪ ﻳﻐﺎﻣﺮ ﻣﻌﺎﻙ ﻭﺍﺧﺔ ﺇﺳﻢ ﺟﺪﻳﺪ ... ﻷﻧﻮ ﻭﺍﺛﻖ ﻣﻦ ﻧﺠﺎﺣﻬﺎ
ﺟﻮﻻﻥ : " ﺗﻼﺣﺖ ﻋﻠﻴﻪ ﻋﻨﻘﺎﺗﻮ " ﻧﺎﺭﻱ ﻣﺎﻣﺼﺪﻗﺎﺍﺍﺍﺵ ... ﺃﺧﻴﺮﺍ ﺣﻠﻤﻲ ﻏﺎﺩﻱ ﻳﺘﺤﻘﻖ
ﺯﻫﻴﺮ : ﻭﻱ ... ﻏﺪﺍ ﻣﻨﻴﻦ ﺗﺨﺮﺟﻲ ﻣﻦ ﻻﻓﺎﻙ ... ﻏﺎﺩﻱ ﺗﻠﻘﺎﻳﻨﻲ ﻛﻨﺘﺴﻨﺎﻙ ... ﺑﺎﺵ ﻧﻤﺸﻴﻮ ﻧﻘﺎﺑﻠﻮﻩ
ﺟﻮﻻﻥ : " ﺑﻔﺮﺣﺔ ﻛﺒﻴﺮﺓ " ﺇﻧﺸﺎﺀ ﺍﻟﻠﻪ ... ﻧﺎﺭﻱ ﻣﺰﺍﻝ ﻣﻘﺎﺩﺭﺓ ﻧﺴﺘﻮﻋﺐ ﻫﺎﺩﺷﻲ ﺍﻟﻲ ﻗﻠﺘﻲ ﻟﻴﺎ ... ﻭ ﻣﻌﺮﻓﺎﺵ ﻛﻴﻔﺎﺵ ﻧﺸﻜﺮﻙ
ﺯﻫﻴﺮ : " ﺣﻂ ﻳﺪﻭ ﻋﻠﻰ ﺧﺪﻫﺎ " ﻟﻤﻬﻢ ﻋﻨﺪﻱ ﻫﻮ ﻧﺸﻮﻑ ﺿﺤﻜﺘﻚ ﻭ ﻧﺴﺎﻫﻢ ﻭﻟﻮ ﺷﻮﻳﺔ ﻓﺘﺤﻘﻴﻖ ﺣﻠﻤﻚ
ﺟﻮﻻﻥ : ﻫﺎﺩﻱ ﺛﺎﻧﻴﺔ ﺃﺣﺴﻦ ﺣﺎﺣﺔ ﺗﻮﻗﻊ ﻟﻴﺎ ﻓﺤﻴﺎﺗﻲ ﻣﻦ ﺑﻌﺪ ﻟﻘﺎﺋﻲ ﺑﻴﻚ
ﺯﻫﻴﺮ : " ﻗﺮﺏ ﻟﻴﻬﺎ ﺍﻛﺜﺮ " ﺳﻌﺎﺩﺗﻚ ﻫﻲ ﺳﻌﺎﺩﺗﻲ ... ﻭ ﺍﻧﻲ ﻧﺸﻮﻑ ﻫﺎﺩ ﺍﻟﻠﻤﻌﺔ ﻓﻌﻨﻴﻚ ﻫﻲ ﺍﻟﺪﻧﻴﺎ ﻭ ﻣﺎﻓﻴﻬﺎ
ﺟﻮﻻﻥ ﺣﺴﺎﺕ ﺑﻴﻪ ﻛﻴﻘﺮﺏ ﺍﻛﺜﺮ ﻭ ﻳﺪﻭ ﻛﺘﺪﺍﻋﺐ ﺧﺪﻫﺎ ... ﺗﻮﺛﺮﺍﺕ ﻭ ﺣﺪﺭﺍﺕ ﻋﻨﻴﻬﺎ ... ﺯﻫﻴﺮ ﺣﺲ ﺑﻴﻬﺎ ﻣﺎﻣﺮﺗﺤﺎﺵ ﻭ ﻫﻮ ﻳﺒﻌﺪ ...
ﺯﻫﻴﺮ : ﻳﺎﻻﻩ ﻧﺮﺟﻌﻮ
ﺟﻮﻻﻥ : " ﺍﺑﺘﺎﺳﻤﺎﺕ " ﺧﺎﺹ ﻧﻘﻮﻟﻬﺎ ﻟﻮﺋﺎﻡ ﻏﺎﺩﻱ ﺗﺼﺪﻡ ... ﺩﻳﻤﺎ ﻓﺎﺵ ﻛﻨﻬﻀﺮ ﻟﻴﻬﺎ ﻋﻠﻰ ﺭﻭﺍﻳﺘﻲ ﻛﻀﺤﻚ ﻋﻠﻴﺎ ... ﻭ ﺗﻘﻮﻝ ﻟﻴﺎ ﻭ ﺍﻟﻠﻪ ﻻ ﻃﻔﺮﺗﻴﻪ ... ﻏﻨﻤﺸﻲ ﻧﻮﺻﻠﻬﺎ ﻟﻴﻬﺎ ﺳﺨﻮﻧﺔ ﻭ ﻧﻔﻘﺼﻬﺎ
ﺯﻫﻴﺮ : ﻫﻬﻬﻪ ... ﺷﺮﻳﺮﺓ ﻣﻊ ﺭﺍﺳﻚ
ﺟﻮﻻﻥ : ﻫﻬﻬﻪ ... ﻭﺍﺧﺔ ﻫﺒﻴﻠﺔ ﻭ ﺩﻳﻤﺎ ﻣﺸﺎﺩﻳﻦ ... ﻣﻲ ﻣﺘﺄﻛﺪﺓ ﻏﺘﻔﺮﺡ ﻟﻴﺎ ﺑﺰﺍﻑ
ﺑﻘﺎﻭ ﻏﺎﺩﻳﻴﻦ ﻳﺪﻳﻬﻢ ﻣﺸﺎﺑﻜﻴﻦ ﻭ ﻣﺠﻤﻌﻴﻦ ... ﺍﻏﻠﺐ ﺣﺪﻳﺜﻬﻢ ﻋﻠﻰ ﺣﻴﺎﺗﻬﻢ ﺍﻟﻤﺴﻘﺒﻠﻴﺔ ﻣﻊ ﺑﻌﺾ ﻛﻴﻒ ﺭﺳﻤﻮﻫﺎ ... ﻭ ﻫﺎﺩ ﺍﻟﺨﻄﻮﺓ ﻛﺎﻧﺖ ﺑﺤﺎﻝ ﺃﻣﻞ ﺍﻥ ﺍﻟﻲ ﻫﻀﺮﻭ ﻓﻴﻪ ﻣﻤﻜﻦ ﻳﺘﺤﻘﻖ ... ﻭ ﺑﻌﺪﻣﺎ ﻛﻞ ﻭﺍﺣﺪ ﻓﻴﻬﻢ ﻳﺒﺪﺍ ﺍﻟﺨﻄﻮﺓ ﺍﻷﻭﻟﻰ ﻓﻄﺮﻳﻖ ﺍﻟﻨﺠﺎﺡ ﻏﻴﻘﺪﺭﻭ ﻳﺘﺠﻤﻌﻮ ... ﻭ ﻳﺘﻮﺟﻮ ﻋﻼﻗﺘﻬﻢ ﺑﺎﻟﺰﻭﺍﺝ ﺍﻟﻲ ﺫﻛﺮﻭ ﺯﻫﻴﺮ ﻋﺪﺓ ﻣﺮﺍﺕ ...
ﻟﻮ ﺍﻥ ﺟﻮﻻﻥ ﻣﻜﺎﻧﺘﺶ ﻣﺘﺎﻛﺪﺓ ﺑﻠﻲ ﻫﻮ ﺟﺪﻱ ﻓﻌﻼﻗﺘﻬﻢ ﻣﻜﺎﻧﺘﺶ ﻏﺘﺒﻘﺎ ﻣﻌﺎﻩ ﺑﺘﺎﺗﺎ ... ﻟﻜﻦ ﺗﺒﺚ ﻟﻴﻬﺎ ﺃﻧﻪ ﺑﺎﻏﻴﻬﺎ ﺷﺮﻳﻜﺔ ﺣﻴﺎﺗﻮ ... ﻭ ﺣﺎﺟﺔ ﻭﺣﺪﺓ ﺍﻟﻲ ﻣﺎﻧﻌﺎﻩ ﺃﻧﻪ ﻣﺰﺍﻝ ﻣﺎﻣﺴﺘﺎﻗﺮ ﻣﺎﺩﻳﺎ ... ﻛﻴﻒ ﻭﺻﻠﻮ ﻭﺩﻋﺎﺗﻮ ﺟﻮﻻﻥ ﻭ ﺭﺟﻌﺎﺕ ﻟﻠﺪﺍﺭ ... ﻭ ﻗﺒﻞ ﻣﺎ ﺗﺪﺧﻞ ﺩﺍﺯﺕ ﻋﻨﺪ ﻭﺋﺎﻡ ﻋﺎﻭﺩﺍﺕ ﻟﻴﻬﺎ ﻛﻠﺸﻲ ﺑﺎﻟﺘﻔﺼﻴﻞ ﻭ ﺍﻟﻔﺮﺣﺔ ﻣﻘﺪﻫﺎﺵ ...
🍃🍃🍃🍃 ؛
ﺗﺤﻞ ﺑﺎﺏ ﺍﻟﻤﻜﺘﺐ ﻭ ﺩﺧﻞ ... ﻫﺎﺯ ﺿﺮﻑ ﻛﺒﻴﺮ ﻓﻴﺪﻭ ... ﺗﻘﺪﻡ ﺑﺨﻄﻰ ﻫﺎﺩﺋﺔ ﻭ ﺣﻄﻮ ﻓﻮﻕ ﺍﻟﻤﻜﺘﺐ ...
ﺑﻬﺎﺀ : ﺩﺍﻛﺸﻲ ﺍﻟﻲ ﻃﻠﺒﺘﻲ ﻣﻨﻲ
ﺭﺋﺒﺎﻝ : " ﻫﺰ ﻓﻴﻪ ﺭﺍﺳﻮ " ﻫﺎﺩﺷﻲ ﺑﺎﺵ ﻛﺘﻌﺠﺒﻨﻲ
ﺑﻬﺎﺀ : ﺷﻜﺮﺍ ﻣﻮﺳﻴﻮ
ﺗﺤﻞ ﻟﺒﺎﺏ ﺑﺎﻟﺠﻬﺪ ﻭ ﺩﺧﻞ ﺳﻨﻤﺎﺭ ﻭ ﺇﻟﻴﺎﺱ ... ﻗﺮﺏ ﺇﻟﻴﺎﺱ ﻭ ﻻﺡ ﺩﺭﺍﻋﻮ ﻋﻠﻰ ﺑﻬﺎﺀ ... ﻭ ﺳﻨﻤﺎﺭ ﺟﻠﺲ ﻓﻮﻕ ﺍﻟﻤﻜﺘﺐ ...
ﺇﻟﻴﺎﺱ : ﺷﻨﻮ ﺑﺎﻥ ﻟﻴﻜﻢ ﻧﻤﺸﻴﻮ ﻧﺰﻫﺎﻭ ﻫﺎﺩ ﻟﻴﻠﺔ
ﺳﻨﻤﺎﺭ : ﻋﻠﻰ ﺃﺳﺎﺱ ﻣﻜﺘﺰﻫﺎﺵ ﻛﻼ ﻟﻴﻠﺔ
ﺇﻟﻴﺎﺱ : ﺑﻼ ﻓﻬﺎﻣﺎﺕ ... ﻣﺒﺎﻏﻴﺶ ﺗﻤﺸﻲ ﻫﻨﻴﻨﺎﺍﺍ
ﺳﻨﻤﺎﺭ : ﻭ ﺷﻜﻮﻥ ﻛﻴﺮﺟﻌﻚ ﻟﺪﺍﺭﻙ ﺍﻟﺴﻜﺎﻳﺮﻱ ﻛﻼ ﻟﻴﻠﺔ ... ﺟﺪﺍﺍﺍﻙ
ﺇﻟﻴﺎﺱ : " ﺷﺎﻑ ﻓﺒﻬﺎﺀ " ﻟﻌﺸﻴﺮ ﺗﻤﺸﻲ ؟
ﺑﻬﺎﺀ : ﻻ ﻏﻴﺮ ﻋﻔﻴﻨﻲ
ﺇﻟﻴﺎﺱ : " ﺿﺎﺭ ﻋﻨﺪ ﺭﺋﺒﺎﻝ " ﻏﻴﺮ ﺍﻟﻴﻮﻡ ﺩﻳﺮ ﻟﻴﺎ ﺧﺎﻃﺮﻱ ... ﻻ ﻣﺸﻴﺘﻲ ﻧﺘﺎ ﻏﻴﻤﺸﻴﻮ ﻛﺎﻣﻠﻴﻦ
ﺭﺋﺒﺎﻝ : " ﻭﻗﻒ ﻭ ﻗﺮﺏ ﻋﻨﺪﻫﻢ " ﻏﺪﺍ ﻋﻨﺪﻙ ﺟﻠﺴﺔ ﺗﺼﻮﻳﺮ ... ﺳﻴﺮ ﻟﺪﺍﺭﻙ ﺗﻨﻌﺲ ... ﺑﻬﺎﺀ ... ﻣﻦ ﺍﻟﻴﻮﻡ ﻣﻤﻨﻮﻉ ﻋﻠﻴﻪ ﻳﺴﻬﺮ ﻓﺸﻲ ﻗﻨﺖ
ﺇﻟﻴﺎﺱ : ﻭ ﺣﺸﻮﻭﻭﻣﺔ ﻫﺎﺩﺷﻲ ... ﺑﺎﻏﻲ ﺗﻘﻄﻊ ﻋﻠﻴﻨﺎ ﻟﻤﺎ ﻭ ﺿﻮﻭﻭ ... ﻭ ﺍﻧﺎ ﻓﺤﻀﻦ ﺷﻜﻮﻭﻥ ﻏﻨﻌﺲ ... ﺭﺍﻩ ﻛﻨﺨﺎﺍﻑ ﺑﺎﻟﻠﻴﻞ
ﺳﻨﻤﺎﺭ : ﻃﺮﮒ ﻣﻌﺎﻙ ﺷﻲ ﻭﺣﺪﺓ ﻣﻦ ﺍﻟﺸﺮﻛﺔ ... ﻭ ﻻ ﺩﺯﺗﻲ ﻋﻠﻴﻬﻢ ﻛﺎﻣﻠﻴﻦ
ﺇﻟﻴﺎﺱ : ﻻ ﺑﺎﻗﻲ ﻟﻴﺎ ﺑﻬﺎﺀ ﻫﻬﻬﻬﻪ
ﺑﻬﺎﺀ : " ﺩﻓﻌﻮ ﻋﻠﻴﻪ " ﻣﻮﺳﻴﻮ ﺍﻟﻌﺜﻤﺎﻧﻲ ﻣﺤﺘﺎﺟﻨﻲ ﻓﺸﻲ ﺣﺎﺟﺔ ﺃﺧﺮﻯ
ﺭﺋﺒﺎﻝ : " ﻭﺍﻗﻒ ﻋﻨﺪ ﺍﻟﻨﺎﻓﺪﺓ " ﻻ ... ﻣﻤﻜﻦ ﺗﻤﺸﻲ
ﺧﺮﺝ ﺑﻬﺎﺀ ﻣﺴﺮﻉ ﻣﻦ ﺍﻟﻤﻜﺘﺐ ... ﻭ ﻫﻮ ﻣﺰﻳﺮ ﻋﻠﻰ ﻗﺒﻈﺔ ﻳﺪﻳﻪ ... ﺩﺧﻞ ﻟﻤﻜﺘﺒﻮ ﻫﺰ ﻟﻜﺮﺳﻲ ﻭ ﺿﺮﺏ ﺑﻴﻪ ﻣﻊ ﻟﺮﺽ ... ﺭﺟﻊ ﺣﻤﺮﺭﺭﺭ ﻭ ﻛﻮﻟﻮ ﻛﻴﺘﺮﻋﺪ ... ﻭﻗﻒ ﻟﻠﺤﻈﺔ ﻗﺎﺩ ﻟﻜﻮﻣﺒﻠﻲ ﺩﻳﺎﻟﻮ ... ﺗﺤﺪﺭ ﻫﺰ ﺍﻟﻜﺮﺳﻲ ﻭ ﺭﺟﻌﻮ ﻟﺒﻼﺻﺘﻮ ﺑﻬﺪﻭﺀ ...
ﭼﻠﺲ ﻭ ﺧﺸﺎ ﻳﺪﻭ ﻓﺎﻟﭭﻴﺴﺖ ... ﺟﺒﺪ ﻣﻨﻬﺎ ﺳﺎﺭﻭﺕ ﻭ ﺣﻞ ﻟﻤﺠﺮ ﺩﻳﺎﻝ ﺍﻟﻤﻜﺘﺐ ... ﺟﺒﺪ ﻛﺘﺎﺏ ﻟﻮﻥ ﻏﻼﻓﻮ ﺃﺳﻮﺩ ... ﺗﻜﺎ ﻋﻠﻰ ﺍﻟﻜﺮﺳﻲ ﻭ ﻓﺘﺤﻮ ... ﻛﺎﻥ ﺩﺍﺧﻠﻮ ﺻﻮﺭﺓ ... ﻫﺰﻫﺎ ﻗﺎﺑﻠﻬﺎ ﻣﻌﺎﻩ ﻛﻴﺸﻮﻑ ﻓﻴﻬﺎ ... ﺑﻌﺪﻣﺎ ﻛﺎﻧﻮ ﻣﻼﻣﺢ ﻭﺟﻬﻮ ﻣﺸﺪﻭﺩﺓ ﺗﻄﻠﻘﻮ ... ﻭ ﺑﻘﺎ ﻛﻴﺸﻮﻭﻭﻑ ﻓﺎﻟﺼﻮﺭﺓ ﺑﺘﻤﻌﻦ ...
ﺣﺘﺎ ﺗﺤﻞ ﻟﺒﺎﺏ ﻓﺠﺄﺓ ﻭ ﺗﻢ ﺩﺍﺧﻞ ﺭﺋﺒﺎﻝ ... ﻏﻴﺮ ﺷﺎﻓﻮ ﺑﻬﺎﺀ ﻃﻴﺢ ﺍﻟﺼﻮﺭﺓ ﻓﻠﺮﺽ ﻭ ﺣﻂ ﻋﻠﻴﻬﺎ ﺭﺟﻠﻮ ... ﻭ ﻭﻗﻒ ...
ﺭﺋﺒﺎﻝ : " ﻭﺍﻗﻒ ﺧﺎﺷﻲ ﻳﺪﻳﻪ ﻓﺠﻴﺒﺎﻭ " ﻣﺎﺗﺪﻳﺶ ﻋﻠﻰ ﺇﻟﻴﺎﺱ ... ﺭﺍﻙ ﻋﺎﺭﻓﻮ ﻛﻴﻒ ﺩﺍﻳﺮ
ﺑﻬﺎﺀ : ﻋﺎﺭﻑ
ﺭﺋﺒﺎﻝ : " ﻛﻴﺸﻮﻑ ﻓﻴﻪ " ﻏﺪﺍ ﻣﻦ ﺑﻌﺪ ﺍﻹﺟﺘﻤﺎﻉ ... ﻏﻨﺪﻭﺯ ﻟﻠﻤﺘﺠﺮ ﺩﻳﺎﻝ ' ﺳﺎﻓﻴﺮ ﺑﻠﻮ '
ﺑﻬﺎﺀ : ﻻ ﺑﻐﻴﺘﻲ ﺷﻲ ﺣﺎﺟﺔ ﻧﻤﺸﻲ ﻧﺠﻴﺒﻬﺎ ﻟﻴﻚ
ﺭﺋﺒﺎﻝ : ﻻ ... ﻏﻨﻤﺸﻲ ﺭﺍﺳﻲ
ﺑﻬﺎﺀ : ﺍﻭﻛﻲ ﻣﻴﺴﺘﺮ ﺍﻟﻌﺜﻤﺎﻧﻲ
ﺭﺋﺒﺎﻝ : " ﻭ ﻫﻮ ﺧﺎﺭﺝ " ﻛﻮﻥ ﻋﻠﻰ ﺣﺬﺭ ... ﻣﻤﻜﻦ ﺗﻠﻒ ﺍﻟﺼﻮﺭﺓ ... ﻭ ﻫﻲ ﺑﺎﻳﻨﺔ ﻟﺸﺨﺺ ﻣﻬﻢ
ﻛﻴﻒ ﺧﺮﺝ ﺭﺋﺒﺎﻝ ﻫﺰ ﺑﻬﺎﺀ ﺍﻟﺼﻮﺭﺓ ﻭ ﺟﺒﻬﺘﻮ ﻛﺘﻠﻤﻊ ﺑﺎﻟﻌﺮﻕ ... ﺩﻭﺯ ﻋﻠﻴﻬﺎ ﺭﺍﺣﺔ ﻳﺪﻭ ﻭ ﺭﺟﻌﻬﺎ ﻟﻠﻤﺠﺮ ... ﺳﺪﻭ ﻭ ﺧﺸﺎ ﺍﻟﺴﻮﺍﺭﺕ ﻋﻨﺪﻭ ...
ﺧﺮﺝ ﺭﺋﺒﺎﻝ ﻭ ﻫﺒﻂ ﻟﺘﺤﺖ ... ﺧﺪﺍ ﺳﻴﺎﺭﺗﻮ ﻭ ﺗﻮﺟﻪ ﻟﻠﺪﺍﺭ ...
☀ ﻳﻮﻡ ﺟﺪﻳﺪ ☀
ﻓﺎﻗﺖ ﺟﻮﻻﻥ ﻛﻠﻬﺎ ﺣﻤﺎﺱ ... ﺍﻟﻴﻮﻡ ﻣﺎﺷﻲ ﻛﺒﺎﻗﻲ ﺍﻷﻳﺎﻡ ... ﻫﻮ ﺍﻟﻴﻮﻡ ﺍﻟﻲ ﻏﺘﺨﻄﻰ ﻓﻴﻪ ﺍﻟﺨﻄﻮﺓ ﺍﻷﻭﻟﻰ ﻧﺤﻮ ﺗﺤﻘﻴﻖ ﺣﻠﻤﻬﺎ ... ﺩﺍﺭﺕ ﺭﻭﺗﻴﻨﻬﺎ ﺍﻟﺼﺒﺎﺣﻲ ﻭ ﺗﻮﺟﻬﺎﺕ ﻻﻓﺎﻙ ... ﺩﻭﺯﺍﺕ ﺍﻟﺤﺼﺺ ﺍﻟﻲ ﻋﻨﺪﻫﺎ ﻭ ﺧﺮﺟﺎﺕ ... ﺑﻘﺎﺕ ﻭﺍﻗﻔﺔ ﻋﻨﺪ ﻟﺒﺎﺏ ﻛﺘﺴﻨﺎ ﺯﻫﻴﺮ ... ﻷﻧﻮ ﺩﺍﺭ ﻣﻌﻬﺎ ﻳﺠﻲ ﻟﻌﻨﺪﻫﺎ ﺑﺎﺵ ﻳﻤﺸﻴﻮ ﻋﻨﺪ ﺍﻟﺴﻴﺪ ﺍﻟﻲ ﻏﻴﻘﺎﺑﻠﻬﺎ ...
ﺧﺪﺍﺕ ﻟﻔﻮﻥ ﻭ ﺭﺳﻼﺕ ﻟﻴﻪ ﺭﺳﺎﻟﺔ ﺑﻠﻲ ﻛﺘﺴﻨﺎﻩ ... ﺑﻘﺎﺕ ﻭﺍﻗﻔﺔ ﻟﻤﺪﺓ ﻧﺼﻒ ﺳﺎﻋﺔ ﻭ ﻣﺰﺍﻝ ﻣﺒﺎﻥ ... ﺩﺍﺯﺕ ﺳﺎﻋﺔ ﺃﺧﺮﻯ ﻭ ﻫﻲ ﺗﻬﺰ ﺟﻮﻻﻥ ﺍﻟﻔﻮﻥ ﻛﺘﺎﺻﻞ ﺑﻴﻪ ... ﻣﻜﺎﻧﺶ ﻛﻴﺠﺎﻭﺏ ﺳﻴﻔﻄﺎﺕ ﻟﻴﻪ ﻋﺪﺓ ﻣﻴﺴﺎﺟﺎﺕ ... ﻭ ﺍﻟﺨﻮﻑ ﺑﺪﺍ ﻛﻴﺪﺧﻞ ﻣﻌﻬﺎ ...
ﺧﺎﻓﺖ ﺗﻜﻮﻥ ﻭﻗﻌﺎﺕ ﻟﻴﻪ ﺷﻲ ﺣﺎﺟﺔ ﻭ ﻫﻮ ﻓﺎﻟﻄﺮﻳﻖ ... ﻋﺎﺭﻓﺔ ﻣﻜﻴﺸﻮﺭﺵ ﻭ ﻛﻴﻤﺸﻲ ﺑﺴﺮﻋﺔ ... ﻛﺎﻥ ﻛﻞ ﻫﻤﻬﺎ ﻫﻮ ﻳﺠﺎﻭﺏ ﻭ ﻳﻄﻤﺄﻧﻬﺎ ﻋﻠﻴﻪ ... ﻏﻴﺮ ﺩﺍﺯﺕ ﻧﺼﻒ ﺳﺎﻋﺔ ﺃﺧﺮﻯ ... ﺧﺪﺍﺕ ﻃﺎﻛﺴﻲ ﻭ ﺭﺟﻌﺎﺕ ﻟﻠﺪﺍﺭ ... ﻭ ﻫﻲ ﺩﺍﺧﻠﺔ ﻣﻊ ﺍﻟﺪﺭﺏ ﺷﺎﻓﺖ ﻭﺋﺎﻡ ﺟﺎﻳﺔ ... ﻣﺸﺎﺕ ﻋﻨﺪﻫﺎ ﻣﺴﺮﻋﺔ ...
ﺟﻮﻻﻥ : ﺯﻫﻴﺮ ﺩﺍﺭ ﻣﻌﻴﺎ ﻭ ﻣﺠﺎﺵ ... ﻛﻨﺘﺎﺻﻞ ﺑﻴﻪ ﻣﻜﻴﺠﺎﻭﺑﺶ
ﻭﺋﺎﻡ : ﺷﻮﻑ ﻋﻼﺵ ... ﻏﻴﻜﻮﻥ ﺷﻐﻼﺗﻮ ﺷﻲ ﺣﺎﺟﺔ
ﺟﻮﻻﻥ : ﻫﻮ ﻗﺎﻝ ﻟﻴﺎ ﻏﻴﺠﻲ ﻋﻨﺪﻱ ﻻﻓﺎﻙ ... ﺗﺴﻨﻴﺘﻮ ﺳﺎﻋﺘﻴﻦ ﻣﺠﺎﺵ ﻭ ﺍﻧﺎ ﻧﺠﻲ
ﻭﺋﺎﻡ : ﻭ ﻣﺎﻟﻚ ﻛﺘﺮﻋﺪﻱ
ﺟﻮﻻﻥ : ﺧﻔﺖ ﺗﻜﻮﻥ ﻭﺍﻗﻌﺔ ﻟﻴﻪ ﺷﻲ ﺣﺎﺟﺔ ... ﻭ ﻣﻌﺎﺭﻓﺔ ﺣﺘﺎ ﻓﻴﻦ ﺳﺎﻛﻦ ... ﻭ ﻻ ﻓﻴﻦ ﻧﺴﻮﻝ ﻋﻠﻴﻪ
ﻭﺋﺎﻡ : ﺑﻼﻣﺎ ﺗﺨﻠﻌﻲ ... ﻳﻘﺪﺭ ﻳﻜﻮﻥ ﻣﻊ ﺩﻭﻙ ﺍﻟﻨﺎﺱ ﺍﻟﻲ ﻗﺎﻟﻴﻚ ﻋﻠﻴﻬﻢ ﻭ ﻣﻴﻤﻜﻨﺶ ﻟﻴﻪ ﻳﺠﺎﻭﺏ ... ﺳﻴﺮﻱ ﻟﺪﺍﺭ ﺍﺭﺗﺎﺣﻲ ﻭ ﺭﺍﻩ ﻏﻴﺘﺎﺻﻞ ﺑﻴﻚ ﻣﻨﻴﻦ ﻳﺸﻮﻑ ﻟﻲ ﺯﺍﭘﻴﻞ ﺩﻳﺎﻭﻟﻚ
ﺟﻮﻻﻥ : ﺑﻐﻴﺘﻮ ﻏﻴﺮ ﻳﻜﻮﻥ ﺑﺨﻴﺮ ... ﺣﺎﺳﺔ ﺑﻘﻠﺒﻲ ﻣﺰﻳﺮ ﻋﻠﻴﺎ
ﻭﺋﺎﻡ : ﻭ ﻻ ﺗﺰﺩﻳﺶ ﻓﻴﻪ ﺍﺻﺎﺣﺒﺘﻲ
ﺟﻮﻻﻥ : ﺑﻼﻣﺎ ﻧﺸﺪﻙ ... ﻏﺎﺩﺓ ﻟﻠﺨﺪﻣﺔ ؟
ﻭﺋﺎﻡ : ﺁﻩ
ﺟﻮﻻﻥ : ﺍﻧﺎ ﻏﻨﺪﺧﻞ ﻭ ﻧﺮﺟﻊ ﻧﻌﻴﻂ ﻋﻠﻴﻪ
ﻭﺋﺎﻡ : ﻣﻨﻴﻦ ﻧﻜﻤﻞ ﻏﻨﺪﻭﺯ ﻋﻨﺪﻙ
ﺟﻮﻻﻥ : ﻭﺍﺧﺔ
ﻣﺸﺎﺕ ﻭﺋﺎﻡ ﻭ ﺟﻮﻻﺕ ﺩﺧﻼﺕ ﻟﻠﺪﺍﺭ ... ﺗﻐﺪﺍﺕ ﻣﻊ ﻭﺍﻟﺪﻳﻬﺎ ﻏﻴﺮ ﻧﻘﺒﺎﺕ ﻣﺎﺑﻐﺎﺵ ﻳﺪﻭﺯ ﻟﻴﻬﺎ ... ﻭ ﻃﻠﻌﺎﺕ ﻟﺒﻴﺘﻬﺎ ﻫﺰﺍﺕ ﻟﻔﻮﻥ ﻭ ﺭﺟﻌﺎﺕ ﻛﺘﺘﺎﺻﻞ ﺑﻴﻪ ﻭ ﻻ ﻣﺠﻴﺐ ... ﺟﻠﺴﺎﺕ ﻋﻨﺪ ﺍﻟﺸﺮﺟﻢ ﺣﺎﻃﺔ ﻳﺪﻫﺎ ﺗﺤﺖ ﺫﻗﻨﻬﺎ ﻭ ﺑﺎﻟﻬﺎ ﻣﺸﻐﻮﻝ ﻋﻠﻴﻪ ...
ﺟﺎﻟﺲ ﻓﻤﻜﺘﺒﻮ ﻭ ﻛﻴﺪﻭﺭ ﺍﻟﺴﺘﻴﻠﻮ ﺍﻟﻲ ﻓﺎﻟﺬﻫﺒﻲ ﻭ ﺍﻷﺳﻮﺩ ﺑﻴﻦ ﺻﺒﺎﻋﻮ ... ﺷﺎﻑ ﻓﺎﻟﺴﺎﻋﺔ ﺍﻟﻲ ﻓﻴﺪﻭ ﻭ ﻧﺎﺽ ... ﻫﺰ ﺍﻟﻔﻮﻥ ﻭ ﺗﻢ ﺧﺎﺭﺝ ﻣﻦ ﺍﻟﻤﻜﺘﺐ ... ﻟﻤﺤﻮ ﺑﻬﺎﺀ ﻣﻦ ﺑﻌﻴﺪ ﻭ ﺑﻘﺎ ﻭﺍﻗﻒ ﻫﺎﺯ ﺷﻲ ﻣﻠﻔﺎﺕ ﻭ ﻣﺘﺒﻌﻮ ﺑﻌﻨﻴﻪ ﺣﺘﺎ ﺩﺧﻞ ﺭﺋﺒﺎﻝ ﻟﻠﻤﺼﻌﺪ ... ﺧﺪﺍ ﺍﻟﺴﻴﺎﺭﺓ ﻭ ﺩﻳﻤﺎﺭﺍ ... ﺑﻌﺪ ﻣﺪﺓ ﻭﻗﻒ ﺃﻣﺎﻡ ﺍﻟﻤﺘﺠﺮ ...
ﺣﻞ ﻟﺒﺎﺏ ﻭ ﻫﺒﻂ ﻏﺎﺩﻱ ﺑﻨﺨﻮﺓ ... ﺩﺧﻞ ﻭ ﺑﻘﺎ ﻭﺍﻗﻒ ﻛﻴﺸﻮﻑ ... ﻛﺎﻧﺖ ﺇﺣﺪﻯ ﺍﻟﻤﺴﺎﻋﺪﺍﺕ ﻣﺘﻜﻴﺎ ﻋﻠﻰ ﺣﺎﺷﻴﺔ ﻻﻛﻴﺴﺖ ﻭ ﻛﺘﻨﺪﻍ ﺍﻟﻤﺴﻜﺔ ... ﺩﻭﺭﺍﺕ ﻭﺟﻬﺎ ﻭ ﻫﻲ ﺗﻠﻤﺤﻮ ... ﺧﺮﺟﺎﺕ ﻋﻨﻴﻬﺎ ﻭ ﻫﻲ ﻛﺘﺸﻮﻓﻮ ﺟﺎﻱ ﺟﻬﺘﻬﺎ ... ﺑﻠﻌﺎﺕ ﻟﻤﺴﻜﺔ ﻭ ﺗﻘﺎﺩﺍﺕ ﻓﺎﻟﻮﻗﻔﺔ ...
ﺍﻟﻤﺴﺎﻋﺪﺓ : ﻣﺮﺣﺒﺎ ﺑﻴﻚ ﻣﻮﺳﻴﻮ ﺍﻟﻌﺜﻤﺎﻧﻲ ... ﻧﻮﺭﺗﻲ ﺍﻟﻤﺤﻞ
ﺷﺎﻓﺘﻮ ﺍﻟﻤﺴﺆﻭﻟﺔ ﻣﻦ ﺑﻌﻴﺪ ﻭ ﺟﺎﺕ ﻛﺘﺠﺮﻱ ... ﻭ ﻛﺘﺤﻘﻖ ﺑﻌﻨﻴﻬﺎ ﻭﺍﺵ ﻛﻠﺸﻲ ﻫﻮ ﻫﺪﺍﻙ ... ﻭﻗﻔﺎﺕ ﺣﺪﺍﻩ ﻛﺘﻨﻬﺞ ...
ﻓﺪﻭﻯ : ﻣﻮﺳﻴﻮ ﺍﻟﻌﺜﻤﺎﻧﻲ ... ﺣﺘﺎ ﺣﺪ ﻣﻘﺎﻝ ﻟﻴﻨﺎ ﺑﻠﻲ ﺭﺍﻙ ﺟﺎﻱ
ﺭﺋﺒﺎﻝ : ﺑﻐﻴﺖ ﻭﺣﺪﺓ ﻣﻦ ﺍﻟﻤﺴﺎﻋﺪﺍﺕ
ﻓﺪﻭﻯ : ﺍﻧﺎ ﻓﺎﻟﺨﺪﻣﺔ ﺃﻣﻮﺳﻴﻮ
ﺭﺋﺒﺎﻝ : ﻣﺎﺷﻲ ﻧﺘﻲ
ﻓﺪﻭﻯ : ﺁﻩ ... " ﻛﺘﺸﻮﻑ ﻓﻴﻬﺎ ﺑﺘﺤﺬﻳﺮ " ﺻﻮﻓﻴﺎ ﺳﺎﻋﺪﻱ ﺳﻲ ﺍﻟﻌﺜﻤﺎﻧﻲ
ﺭﺋﺒﺎﻝ : ﻻ ﻣﺎﺷﻲ ﻫﺎﺩﻱ
ﻓﺪﻭﻯ : ﻭ ﺷﻜﻮﻥ ﺑﻐﻴﺘﻲ ؟
ﺭﺋﺒﺎﻝ : ﺷﻲ ﻭﺣﺪﺓ ﺃﺧﺮﻯ
ﻓﺪﻭﻯ : ﺍﻭﻛﻲ ﺍﻧﺎ ﻧﺠﻤﻌﻬﻢ ﻭ ﺍﺧﺘﺎﺭ ﺍﻟﻲ ﺑﻐﻴﺘﻲ ﻏﺘﻜﻮﻥ ﻓﺎﻟﺨﺪﻣﺔ ﺩﻳﺎﻟﻚ
ﻣﺸﺎﺕ ﻓﺪﻭﻯ ﺟﻤﻌﺎﺕ ﺍﻟﻤﺴﺎﻋﺪﺍﺕ ﻛﻠﻬﻢ ... ﺗﺴﺘﻔﻮ ﻭﺣﺪﺓ ﺣﺪﺍ ﻭﺣﺪﺓ ﻭ ﻛﻞ ﻭﺣﺪﺓ ﻓﻴﻬﻢ ﻛﺘﻘﺎﺩ ﺣﺎﺟﺔ ... ﻫﺎﻟﻲ ﻛﻄﻠﻊ ﺍﻟﺠﻴﺐ ﻫﺎﻟﻲ ﻛﺘﻬﺰ ﻓﺼﺪﺭﻫﺎ ... ﺭﺋﺒﺎﻝ ﻛﺎﻥ ﻭﺍﻗﻒ ﻛﻴﺸﻮﻑ ﻓﺎﻟﺮﻓﻮﻑ ﻭ ﻋﺎﻃﻴﻬﻢ ﺑﻈﻬﺮﻭ ... ﻗﺮﺑﺎﺕ ﻋﻨﺪﻭ ﺍﻟﻤﺴﻮﺅﻟﺔ ...
ﻓﺪﻭﻯ : ﻣﻮﺳﻴﻮ
ﺿﺎﺭ ﺷﺎﻑ ﻓﻴﻬﺎ ﻭ ﺗﻠﻔﺖ ﻋﻨﺪﻫﻢ ... ﺩﻭﺯ ﻋﻨﻴﻪ ﻋﻠﻴﻬﻢ ﻛﺎﻣﻠﻴﻦ ﻭ ﺗﻮﻗﻒ ﻋﻨﺪﻫﺎ ...
ﺭﺋﺒﺎﻝ : ﻏﻨﺴﻴﻔﻂ ﺑﻬﺎﺀ ﻳﺎﺧﺪ ﺩﺍﻛﺸﻲ ﺍﻟﻲ ﺑﻐﻴﺖ
ﻛﻤﻞ ﻫﻀﺮﺗﻮ ﻭ ﺗﻢ ﺧﺎﺭﺝ ... ﻃﻠﻊ ﻓﺎﻟﺴﻴﺎﺭﺓ ﺩﻭﺯ ﻳﺪﻭ ﻋﻠﻰ ﻟﺤﻴﺘﻮ ﻭ ﺩﻳﻤﺎﺭﺍ ... ﺑﻘﺎﻭ ﻓﺎﻟﺪﺍﺧﻞ ﻛﻴﺸﻮﻓﻮ ﻓﺒﻌﻀﻬﻢ ﻣﺎﻓﻬﻤﻮ ﻭﺍﻟﻮ ... ﺻﺮﻓﺎﺗﻬﻢ ﺍﻟﻤﺴﺆﻭﻟﺔ ﻭ ﻫﻲ ﻣﺘﺎﺟﻪ ﻟﻤﻜﺘﺒﻬﺎ ... ﻛﺘﺴﺎﺀﻝ ﻣﻊ ﺭﺍﺳﻬﺎ ﻋﻼﺵ ﺟﺎ ﻓﺠﺄﺓ ﺑﺪﻭﻥ ﻣﻴﻌﻠﻤﻬﻢ ... ﻭ ﺷﻨﻮ ﺍﻟﻲ ﺧﻼﻩ ﻳﻤﺸﻲ ﺑﺪﻭﻥ ﻣﻴﺎﺧﺪ ﻭﺍﻟﻮ ... ﻭ ﺍﻟﻄﺮﻳﻘﺔ ﺑﺎﺵ ﺷﺎﻑ ﻓﺎﻟﻤﺴﺎﻋﺪﺍﺕ ... ﻛﺄﻧﻮ ﻛﻴﻘﻠﺐ ﻋﻠﻰ ﺍﺣﺪﻫﻢ ...
ﻏﺎﺩﻱ ﻓﺎﻟﻄﺮﻳﻖ ﻭ ﺻﻮﺭﺓ ﻟﻔﺘﺎﺓ ﺑﺎﻟﺰﻱ ﺩﻳﺎﻝ ﺍﻟﻤﺴﺎﻋﺪﺍﺕ ﻣﻊ ﻟﻜﻮﻧﭭﻴﺮﺻﺔ ﻭ ﺍﻟﻨﻀﺎﺭﺍﺕ ﻗﺪﺍﻡ ﻋﻨﻴﻪ ... ﻛﺎﻥ ﻛﻴﻘﻠﺐ ﻋﻠﻴﻬﺎ ﺑﻴﻨﻬﻢ ﻭ ﻟﺴﺒﺐ ﻣﺎ ﺑﺎﻏﻲ ﻳﺸﻮﻓﻬﺎ ... ﺭﻏﻢ ﻣﺮﻭﺭ ﺃﺷﻬﺮ ﻋﻠﻰ ﻓﺎﺵ ﺷﺎﻓﻬﺎ ﺍﻻ ﺍﻥ ﺻﻮﺭﺗﻬﺎ ﻣﺮﺓ ﻣﺮﺓ ﻛﺘﺠﻲ ﻓﺒﺎﻟﻮ ...
ﺍﻟﺸﻲﺀ ﺍﻟﻲ ﺧﻼﻩ ﺑﺎﻏﻲ ﻳﺮﺟﻊ ﻭ ﻳﺘﺄﻛﺪ ﻋﻼﺵ ﻛﻴﺘﻔﻜﺮﻫﺎ ﻫﻲ ﺑﺎﻟﺬﺍﺕ ... ﻟﻜﻦ ﻣﻜﺎﻧﺘﺶ ﺑﻴﻨﺎﺗﻬﻢ ... ﻭﻗﻒ ﺍﻟﺴﻴﺎﺭﺓ ﺧﺪﺍﻫﺎ ﻣﻦ ﻋﻨﺪﻭ ﺍﺣﺪ ﺍﻟﻤﻮﺿﻔﻴﻦ ﻭ ﻃﻠﻊ ﻟﻤﻜﺘﺒﻮ ...
ﻣﺮ ﺃﺳﺒﻮﻉ ﻋﻠﻰ ﺟﻮﻻﻥ ﺑﺪﻭﻥ ﻣﺎﺗﺴﻤﻊ ﺣﺘﺎ ﺧﺒﺮ ﻋﻠﻰ ﺯﻫﻴﺮ ... ﺣﺘﺎ ﻟﻔﻮﻥ ﺩﻳﺎﻟﻮ ﻃﺎﻓﻲ ... ﺑﻐﺎﺕ ﺗﻬﺒﻞ ﻣﺎﻋﺮﻓﺎﺕ ﻓﻴﻦ ﺗﺴﻮﻝ ﻋﻠﻴﻪ ﻭ ﻻ ﺷﻨﻮ ﻃﺎﺭﻱ ﻣﻌﺎﻩ ... ﻭﻻﺕ ﻏﻴﺮ ﺳﺎﻫﻴﺔ ﻭ ﻣﻘﺎﺩﺭﺓ ﺗﺮﻛﺰ ﻓﻘﺮﺍﻳﺘﻬﺎ ... ﻭﻗﺘﻤﺎ ﺻﻮﻧﺎ ﻟﻴﻬﺎ ﻟﻔﻮﻥ ﻭ ﻻ ﻭﺻﻠﻬﺎ ﺷﻲ ﻣﻴﺴﺎﺝ ﻛﺘﻘﻔﺰ ... ﺣﺘﺎ ﻛﺘﻠﻘﻰ ﻣﻬﺎ ﻭ ﻻ ﺷﻲ ﺣﺪ ﺁﺧﺮ ...
ﺍﻟﻴﻮﻡ ﺍﻟﺴﺒﺖ ﻣﺎﻛﺘﻘﺮﺍﺵ ... ﻓﻄﺮﺍﺕ ﻭ ﺗﻮﺟﻬﺎﺕ ﻟﺨﺪﻣﺔ ... ﺩﺧﻼﺕ ﻏﻴﺮﺍﺕ ﺣﻮﺍﻳﺠﻬﺎ ﻭ ﺗﻮﺟﻬﺎﺕ ﻟﻠﻤﺨﺰﻥ ﻛﺘﺴﺘﻒ ﺍﻟﺴﻠﻌﺔ ... ﻭﺻﻞ ﻭﻗﺖ ﻟﻐﺪﺍ ﺧﺮﺟﺎﺕ ﻛﻼﺕ ﻭ ﺭﺟﻌﺎﺕ ... ﻭ ﻫﻲ ﻭﺍﻗﻔﺔ ﻣﻊ ﺃﺣﺪ ﺍﻟﺰﺑﻨﺎﺀ ﺻﻮﻧﺎ ﻟﻴﻬﺎ ﺍﻟﻔﻮﻥ ... ﺑﻘﺎﺕ ﺣﺘﺎ ﺳﺎﻋﺪﺍﺗﻮ ﻋﺎﺩ ﺑﻌﺪﺍﺕ ﻭ ﺟﺒﺪﺍﺕ ﺗﻴﻠﻴﻔﻮﻧﻬﺎ ... ﻛﺎﻧﺖ ﺭﺳﺎﻟﺔ ﻣﻦ ﻋﻨﺪ ﺑﻨﺖ ﻛﺘﻘﺮﺍ ﻣﻌﻬﺎ ﻓﻼﻓﺎﻙ ...
ﺣﻼﺗﻮ ﻛﺘﻘﺮﺍ ﻭ ﻣﻼﻣﺢ ﻭﺟﻬﺎ ﻛﻴﺘﻐﻴﺮﻭ ﻣﻊ ﻛﻞ ﻛﻠﻤﺔ ...
💬 " ﺟﻮﻻﻥ ﺷﻮﻓﻲ ﻫﺎﺩ ﺍﻟﺮﻭﺍﻳﺔ ﻗﺮﻳﺐ ﺗﺨﺮﺝ ﺍﺳﻤﻬﺎ ﺑﺤﺎﻝ ﺍﺳﻢ ﺍﻟﺮﻭﺍﻳﺔ ﺩﻳﺎﻟﻚ ﺍﻟﻲ ﻗﻠﺘﻲ ﻟﻴﺎ "
ﻇﻐﻄﺎﺕ ﺟﻮﻻﻥ ﻋﻠﻰ ﺍﻟﺼﻮﺭﺓ ... ﻭ ﻫﻮ ﻳﻄﻠﻊ ﻟﻴﻬﺎ ﻏﻼﻑ ﺍﻟﺮﻭﺍﻳﺔ ﺑﺎﻟﺨﻂ ﺍﻟﻌﺮﻳﺾ ' ﻃﻔﻠﺔ ﺗﺤﺖ ﺟﻨﺎﺣﻲ ' ﻫﺒﻄﺎﺕ ﻋﻨﻴﻬﺎ ﻟﺘﺤﺖ ﻷﺳﻢ ﺍﻟﻜﺎﺗﺒﺔ ... ﻗﺮﺍﺗﻮ ﺑﺘﺄﻧﻲ ﻭ ﺣﺮﻑ ﺑﺤﺮﻑ ' ﻭﺻﺎﻝ ﻣﺼﻠﺢ ' ... ﺭﺟﻌﺎﺕ ﻛﺘﻘﺮﺍ ﻭ ﺗﻌﺎﻭﺩ ﻭ ﻳﺪﻳﻬﺎ ﻛﻴﺮﺟﻔﻮ ... ﻃﺎﺣﺖ ﺩﻣﻌﺔ ﻋﻠﻰ ﻟﻴﻜﺨﻮﻥ ﺩﻳﺎﻝ ﺍﻟﺘﻴﻠﻲ ... ﻭ ﺗﺒﻌﺎﺗﻬﺎ ﻻﺧﺮﻯ ﻭ ﻫﻲ ﻣﺰﺍﻝ ﻭﺍﻗﻔﺔ ﺑﺪﻭﻥ ﺣﺮﻛﺔ ... ﻭﺫﻧﻴﻬﺎ ﻛﻴﺼﻔﺮﻭ ﻭ ﺍﻟﺼﻮﺭﺓ ﻣﻀﺒﺒﺔ ﻓﻌﻨﻴﻬﺎ ...
ﻣﺰﺍﻝ ﻣﺤﻴﺪﺍﺕ ﻋﻨﻴﻬﺎ ﻋﻠﻰ ﺍﻟﺼﻮﺭﺓ ... ﻛﺘﺮﺟﻊ ﺗﻘﺮﺍ ﺍﻟﻌﻨﻮﺍﻥ ﻭ ﺍﺳﻢ ﺍﻟﻜﺎﺗﺒﺔ ﻭ ﻋﻘﻠﻬﺎ ﻛﻴﺤﻠﻞ ﻭ ﻫﻲ ﻛﺘﺼﺮﺥ ﻓﺪﺍﺧﻠﻬﺎ ﻣﺴﺘﺤﻴﻞ ... ﺩﻗﺎﺋﻖ ﻣﺮﻭ ﻭ ﻛﻠﻤﺎ ﻛﺎﻧﺖ ﺍﻟﺸﺎﺷﺔ ﻏﺘﻄﻔﺎ ﻛﺘﺮﺟﻊ ﺗﻈﻐﻂ ﻋﻠﻴﻬﺎ ... ﺍﻟﺪﻧﻴﺎ ﺩﺍﺭﺕ ﺑﻴﻬﺎ ﻭ ﻣﺒﻘﺎﺗﺶ ﺣﺎﺳﺔ ﻓﻴﻦ ﻫﻲ ... ﺑﺪﺍﺕ ﻛﺘﺮﺑﻂ ﺍﻷﺣﺪﺍﺙ ... ﻏﻴﺎﺑﻮ ﻭ ﺍﻧﻘﻄﺎﻉ ﺍﻻﺗﺼﺎﻝ ﺑﻴﻨﺎﺗﻬﻢ ... ﺯﻋﻤﺎ ﺩﺍﻛﺸﻲ ﺍﻟﻲ ﺍﺳﺘﻨﺘﺠﺎﺕ ﻫﻮ ﺍﻟﻲ ﻭﻗﻊ ...
ﻻ ﻣﺎﻳﻤﻜﻨﺶ ﺃﻛﻴﺪ ﻛﺎﻳﻦ ﺷﻲ ﺗﻔﺴﻴﺮ ﻟﻬﺎﺩﺷﻲ ... ﺯﻫﻴﺮ ﻣﻴﻤﻜﻨﺶ ﻳﻜﻮﻥ ﻏﺪﺭﻫﺎ ﺑﻬﺎﺩ ﺍﻟﺸﻜﻞ ... ﻣﺘﺄﻛﺪﺓ ﺍﻥ ﻣﺸﺎﻋﺮﻭ ﺣﻘﻴﻘﻴﺔ ... ﺣﺴﺎﺕ ﺑﺼﺪﻗﻮ ﻭ ﻧﻴﺘﻮ ﺍﺗﺠﺎﻫﻬﺎ ... ﻣﺎﻳﻤﻜﻨﺶ ﺩﺍﻛﺸﻲ ﻛﻮﻟﻮ ﺍﻟﻲ ﺩﺍﺯ ﺑﻴﻨﺎﺗﻬﻢ ﻛﺎﻥ ﺗﻤﺜﻴﻞ ﻣﻦ ﺟﻬﺘﻮ ... ﻣﻴﻤﻜﻨﺶ ...
ﺃﺧﻴﺮﺍ ﻗﺪﺭﺍﺕ ﺗﺨﺮﺝ ﻣﻦ ﺍﻟﺮﺳﺎﻟﺔ ... ﻭ ﺩﻭﺯﺍﺕ ﺭﻗﻤﻮ ﻓﺎﻟﺤﻴﻦ ... ﻟﻜﻦ ﻛﺎﻥ ﻃﺎﻓﻲ ... ﺭﺟﻌﺎﺕ ﺻﻮﻧﺎﺕ ﺷﺤﺎﻝ ﻣﻦ ﻣﺮﺓ ﻭ ﻛﺘﺴﻨﺎﻩ ﻳﺮﻥ ﻭ ﻭﺍﻟﻮ ... ﻃﻠﻘﺎﺕ ﻳﺪﻫﺎ ﺑﺎﺳﺘﺴﻼﻡ ﻭ ﻫﻲ ﻛﺘﺸﻮﻑ ﻓﺎﻟﻔﺮﺍﻍ ...