السفاح العاشق

بارت 88

ﻳﺎﻣﻦ : ﺟﻮﻻﻥ
ﺟﻮﻻﻥ : " ﺿﺎﺭﺕ ﺷﺎﻓﺖ ﻓﻴﻪ " ﺍﻣﻢ
ﻳﺎﻣﻦ : ﻻ ﺍﺣﺘﺎﺟﻴﺘﻲ ﺃﻱ ﺣﺎﺟﺔ ... ﺍﻱ ﺣﺎﺟﺔ ﺍﻧﺎ ﻫﻨﺎ ... ﻣﺎﺗﺮﺩﺩﻳﺶ ﻓﻄﻠﺐ ﻣﺴﺎﻋﺪﺗﻲ ... ﺗﻔﺎﻫﻤﻨﺎ
ﺟﻮﻻﻥ : " ﺣﺮﻛﺎﺕ ﺭﺍﺳﻬﺎ ﺑﺎﻹﻳﺠﺎﺏ " ﺷﻜﺮﺍ
ﻳﺎﻣﻦ : ﻣﺎﺑﻴﻨﺎﺗﻨﺎﺵ
ﻣﺎ ﺑﻌﺪ ﺣﺘﻰ ﺳﺪﺍﺕ ﻟﺒﺎﺏ ... ﻋﺎﺩ ﺗﻮﺟﻪ ﻟﺪﺍﺭﻫﻢ ﻭ ﻭﺟﻬﻮ ﻣﺒﺸﻮﺭ ... ﻣﻴﻘﻮﻟﺶ ﻫﻮ ﺍﻟﻲ ﻛﺎﻥ ﺯﺍﻋﻒ ... ﻓﺎﺵ ﻭﺻﻠﻮﻩ ﺃﺧﺒﺎﺭ ﺍﻋﺘﻘﺎﻝ ﻟﻴﺎﻥ ﻓﺎﻟﻤﻄﺎﺭ ﻭ ﻫﻲ ﻣﻐﺎﺩﺭﺓ ﻷﻣﺮﻳﻜﺎ ... ﺑﺘﻬﻤﺔ ﻗﺘﻞ ﺧﻠﻴﻞ ﺍﻟﻨﺎﺻﻴﺮﻱ ... ﺗﺼﺪﻡ ﻣﻦ ﺍﻟﺨﺒﺮ ﻭ ﻣﻦ ﻛﻮﻥ ﻇﺎﺑﻄﺔ ﻣﻦ ﺭﺗﺒﺔ ﻧﻘﻴﺐ ﻣﺘﻮﺭﻃﺔ ﻣﻊ ﺷﻘﻴﻖ ﺭﺋﺒﺎﻝ ﺍﻟﻌﺜﻤﺎﻧﻲ ﻭ ﻗﺘﻼﺗﻮ ...
ﺟﺎﻩ ﻫﺎﺩﺷﻲ ﻏﺮﻳﺐ ﻭ ﻧﺎﻗﺼﺎﻩ ﺍﺟﺰﺍﺀ ﻣﻦ ﺍﻟﻘﺼﺔ ... ﻟﻜﻦ ﺣﺎﻭﻝ ﻣﺎﻳﺪﺧﻠﺶ ﺭﺍﺳﻮ ﻓﻬﺎﺩﺷﻲ ... ﻣﻨﻴﻦ ﺭﺋﺒﺎﻝ ﻣﺎﺷﻲ ﻣﺘﻮﺭﻁ ﻓﻬﻮ ﻣﺎﻋﻨﺪﻭﺵ ﺍﻫﺘﻤﺎﻡ ﻳﻌﺮﻑ ﺍﻟﺘﻔﺎﺻﻴﻞ ...
ﺑﻌﺪﻣﺎ ﺩﺧﻼﺕ ﺟﻮﻻﻥ ﻭ ﺣﻄﺎﺕ ﻟﻤﻘﺪﻳﺔ ... ﻛﺎﻧﺖ ﻃﺎﻟﻌﺔ ﻟﻐﺮﻓﺘﻬﺎ ﻭ ﻫﻲ ﺗﻨﺎﺩﻱ ﻋﻠﻴﻬﺎ ﺧﺪﻳﺠﺔ ... ﻃﻠﺒﺎﺕ ﺍﻧﻬﺎ ﺗﺴﺎﻋﺪﻫﺎ ﻓﺈﻋﺪﺍﺩ ﺍﻟﻐﺪﺍ ... ﻭﺍﺧﺔ ﻗﺎﻟﺖ ﻓﺎﻟﺼﺒﺎﺡ ﺑﻮﺿﻮﺡ ﺍﻧﻬﺎ ﻫﻲ ﺍﻟﻲ ﻏﺎﺩﻱ ﺗﻮﺟﺪﻭ ... ﺟﻮﻻﻥ ﺑﺪﻭﻥ ﻣﺎﺗﺤﻜﺮ ﺩﺧﻼﺕ ﻟﻜﻮﺯﻳﻨﺔ ﻭ ﺳﺎﻋﺪﺍﺗﻬﺎ ...
ﺧﺪﺍﻣﻴﻦ ﻓﺼﻤﺖ ... ﻭ ﺑﻌﺪﻣﺎ ﺗﻐﺪﺍﻭ ﻧﺎﺿﺖ ﺟﻮﻻﻥ ﻭ ﻫﻲ ﺗﺴﻤﻌﻬﺎ ﺛﺎﻧﻲ ﻋﻴﻄﺎﺕ ﻋﻠﻴﻬﺎ ﺿﺎﺭﺕ ﻋﻨﺪﻫﺎ ﺑﻘﻠﺔ ﺻﺒﺮ ...
ﺟﻮﻻﻥ : ﺷﻨﻮ
ﺧﺪﻳﺠﺔ : ﻣﻨﻴﻦ ﺳﻴﺪﻱ ﺇﺑﺮﺍﻫﻴﻢ ﻣﻜﺎﻳﻨﺶ ... ﺁﺵ ﺑﺎﻥ ﻟﻴﻚ ﻧﻄﻠﻌﻮ ﻫﺎﺩ ﺍﻟﺰﺭﺍﺑﻲ ﻧﻐﺴﻠﻮﻫﻢ ﻓﺎﻟﺴﻄﺎﺡ ... ﺑﺎﻳﻨﺔ ﺷﺤﺎﻝ ﻫﺬﺍ ﻣﺎ ﺗﻐﺴﻠﻮ
ﺟﻮﻻﻥ : " ﺗﻨﻬﺪﺍﺕ " ﺑﻼﺗﻲ ﻧﺒﺪﻝ ﺣﻮﺍﻳﺠﻲ
ﻃﻠﻌﺎﺕ ﺟﻮﻻﻥ ﻟﻐﺮﻓﺘﻬﺎ ... ﻟﺒﺴﺎﺕ ﺑﻴﺠﺎﻣﺔ ﻭ ﻫﺒﻄﺎﺕ ... ﻫﺰﺍﺕ ﻫﻲ ﻭ ﺧﺪﻳﺠﺔ ﺍﻟﺰﺭﺍﺑﻲ ﺍﻟﻜﺒﺎﺭ ﺑﺠﻮﺝ ﻃﻠﻌﻮﻫﻢ ﻟﻠﺴﻄﺎﺡ ... ﺳﺮﺣﻮﻫﻢ ﻭ ﻋﻤﺮﻭ ﻟﻤﺎ ﻓﺎﻟﺴﻄﻮﻟﺔ ... ﻳﺎﻻﻩ ﻓﺰﮔﻮﻫﻢ ﻭ ﺑﻐﺎﻭ ﻳﺒﺪﺍﻭ ﻓﺎﻟﺤﻜﺎﻥ ... ﺻﻮﻧﺎ ﺍﻟﻔﻮﻥ ﻟﺨﺪﻳﺠﺔ ... ﺟﺒﺪﺍﺗﻮ ﻣﻦ ﺟﻴﺐ ﺗﺨﻤﻴﻠﺘﻬﺎ ﺍﻟﺒﻴﻀﺔ ﻭ ﺍﺑﺘﺎﺳﻤﺎﺕ ﻭ ﻫﻲ ﻛﺘﺠﺎﻭﺏ ...
ﺳﻤﻌﺎﺕ ﺟﻮﻻﻥ ﺩﻳﻚ ' ﺳﻴﺪﻱ ﺇﺑﺮﺍﻫﻴﻢ " ﺧﺎﻓﺖ ﺗﻜﺮﻩ ﺍﺳﻢ ﺑﺎﻫﺎ ﺑﺴﺒﺐ ﻫﺎﺩﻱ ... ﻭ ﻫﻲ ﻛﺘﻬﻀﺮ ﻭ ﺗﻀﺤﻚ ﺗﻤﺎﺕ ﻫﺎﺑﻄﺔ ﻣﻊ ﺍﻟﺪﺭﻭﺝ ... ﺟﻮﻻﻥ ﺑﻘﺎﺕ ﻭﺍﻗﻔﺔ ﻛﺘﺸﻮﻑ ﺣﺘﻰ ﺑﺎﻧﺖ ﻟﻴﻬﺎ ﻏﺒﺮﺍﺕ ... ﻫﺰﺍﺕ ﻋﻨﻴﻬﺎ ﻟﻔﻮﻕ ﻛﺘﺸﻮﻑ ﻓﺎﻟﺸﻤﺲ ﺍﻟﺤﺎﺭﺓ ... ﻣﺎﺑﻐﺎﺗﺶ ﺗﺒﻘﻰ ﺗﺴﻨﻰ ﻓﻴﻬﺎ ﺣﺘﻰ ﺗﻌﺎﻭﺩ ﺗﻜﺮﻡ ﺗﺮﺟﻊ ...
ﮔﻔﻀﺎﺕ ﺟﻮﻻﻥ ﺳﺮﻭﺍﻟﻬﺎ ﻭ ﻛﻤﺎﻣﻬﺎ ﻭ ﺑﺪﺍﺕ ﻛﺘﺤﻚ ﻓﺎﻟﺰﺭﺑﻴﺔ ... ﻛﻤﻼﺕ ﺍﻷﻭﻟﻰ ﻭ ﻻﺧﺮﻯ ﻣﺰﺍﻝ ﻣﺎﺭﺟﻌﺎﺕ ... ﺩﺍﺯﺕ ﻟﻠﺜﺎﻧﻴﺔ ﺣﺘﻰ ﻫﻲ ﺣﻜﺎﺗﻬﺎ ﻭ ﺷﺸﻼﺗﻬﻢ ﺑﺠﻮﺝ ... ﺗﻌﺎﻓﺮﺍﺕ ﻣﻌﺎﻫﻢ ﺣﺘﻰ ﺟﻤﻌﺎﺗﻬﻢ ﻭ ﻭﻗﻔﺎﺗﻬﻢ ﻳﺘﺴﻘﻄﺮﻭ ... ﻭﻗﻔﺎﺕ ﻛﺘﻨﻬﺞ ﻭ ﺣﺒﻴﺒﺎﺕ ﺍﻟﻌﺮﻕ ﻋﻠﻰ ﺟﺒﻴﻨﻬﺎ ... ﺳﻴﻘﺎﺕ ﺍﻟﺴﻄﺎﺡ ﻭ ﻫﺒﻄﺎﺕ ﻭ ﺍﻟﻌﻴﺎ ﻏﺎﻟﺐ ﻋﻠﻴﻬﺎ ... ﻭ ﺭﻏﻢ ﺫﻟﻚ ﻛﺘﻔﻀﻞ ﺗﺤﺲ ﺑﺎﻹﺭﻫﺎﻕ ﺍﻟﺠﺴﺪﻱ ﻋﻠﻰ ﺍﻟﺘﻌﺐ ﺍﻟﻨﻔﺴﻲ ...
ﻣﺸﺎﺕ ﻣﺒﺎﺷﺮﺓ ﻟﻠﺪﻭﺵ ... ﺣﻴﺪﺍﺕ ﺣﻮﺍﻳﺠﻬﺎ ﺩﻭﺷﺎﺕ ﻭ ﺩﺧﻼﺕ ﻟﺒﻴﺘﻬﺎ ﻣﻠﻮﻳﺔ ﻓﺒﻴﻨﻮﺍﺭ ... ﺗﻼﺣﺖ ﻓﻮﻕ ﺳﺮﻳﺮﻫﺎ ﻭ ﺳﺪﺍﺕ ﻋﻨﻴﻬﺎ ... ﻣﺎﻋﻨﺪﻫﺎ ﺣﺘﻰ ﻣﺸﻜﻴﻞ ﻓﺎﻟﻤﺴﺎﻋﺪﺓ ﻓﻤﻬﺎﻡ ﺍﻟﺪﺍﺭ ... ﻭﺍﺧﺔ ﻛﺎﻧﺖ ﻣﻦ ﻗﺒﻞ ﻣﺪﻟﻠﺔ ﺑﻼ ﻗﻴﺎﺱ ﻣﻦ ﻃﺮﻑ ﻣﻬﺎ ... ﻣﻜﺎﻧﺘﺶ ﺗﺨﻠﻴﻬﺎ ﺩﻳﺮ ﺷﻲ ﺣﺎﺟﺔ ﺧﺎﺻﺔ ﻓﺎﺵ ﻛﺎﻧﺖ ﻛﺘﻘﺮﺍ ...
ﺑﻌﺪﻣﺎ ﺍﺭﺗﺎﺣﺖ ﻧﺎﺿﺖ ﻟﺒﺴﺎﺕ ﺣﻮﺍﻳﺠﻬﺎ ... ﺳﺮﻭﺍﻝ ﺳﺒﻮﺭ ﻣﻊ ﺗﺮﻳﻜﻮ ﺧﻴﻂ ﺑﻴﺾ ﻃﺎﻟﻊ ﻟﻴﻪ ﺍﻟﻜﻮﻝ ... ﻧﺸﻔﺎﺕ ﺷﻌﺮﻫﺎ ﻭ ﺟﻤﻌﺎﺗﻮ ﺑﻌﺸﻮﺍﺋﻴﺔ ... ﻳﺎﻻﻩ ﺣﻼﺕ ﻟﺒﻴﺴﻲ ﺩﻳﺎﻟﻬﺎ ﺑﻐﺎﺕ ﺗﻜﺘﺐ ﻭ ﻫﻲ ﺗﺴﻤﻊ ﺻﻮﺕ ﺑﺎﻫﺎ ﻛﻴﻌﻴﻂ ﻋﻠﻴﻬﺎ ... ﺣﻄﺎﺗﻮ ﻭ ﻫﺒﻄﺎﺕ ﻟﺘﺤﺖ ... ﻟﻘﺎﺕ ﺑﺎﻫﺎ ﻭﺍﻗﻒ ﻓﻮﺳﻂ ﺍﻟﺪﺍﺭ ... ﺳﻠﻤﺎﺕ ﻋﻠﻴﻪ ﻭ ﻫﻮ ﻳﻨﻌﺖ ﻟﻴﻬﺎ ﺟﻴﻬﺔ ﺻﻨﺪﻭﻕ ﻣﺴﺘﻄﻴﻞ ﻣﺤﻄﻮﻁ ﻓﻠﺮﺽ ...
ﺇﺑﺮﺍﻫﻴﻢ : ﻫﺬﺍ ﺩﻳﻪ ﻟﺪﺍﺭ ﺳﻲ ﺳﻌﻴﺪ ﺭﺍﻩ ﺟﻨﺐ ﻟﻘﻬﻮﺓ ... ﻻ ﺳﻮﻟﻮﻙ ﻗﻮﻟﻲ ﻟﻴﻬﻢ ﻫﻮ ﺍﻟﻲ ﺳﻴﻔﻄﻮ ﻟﻴﻬﻢ ﻣﻊ ﺑﺎ
ﺧﺪﻳﺠﺔ : " ﻭﺍﻗﻔﺔ ﻓﺒﺎﺏ ﺍﻟﻜﻮﺯﻳﻨﺔ " ﻛﻦ ﻏﻴﺮ ﺧﻠﺘﻴﻪ ﺍﺳﻴﺪﻱ ﺍﺑﺮﺍﻫﻴﻢ ﺣﺘﺎﻝ ﻏﺪﺍ ... ﺟﻮﻻﻥ ﻏﺘﻜﻮﻥ ﻋﻴﺎﻧﺔ ... ﻣﻦ ﺍﻟﺼﺒﺎﺡ ﻭ ﺣﻨﺎ ﻓﺎﻟﺴﻄﺎﺡ ﻛﻨﺼﺒﻨﻮ ﺍﻟﺰﺭﺍﺑﻲ
ﺷﺎﻓﺖ ﻓﻴﻬﺎ ﺟﻮﻻﻥ ﺑﻨﻈﺮﺓ ﺣﺎﺩﺓ ... ﺩﻏﻴﺎ ﺑﻌﺪﺍﺕ ﺧﺪﻳﺠﺔ ﻧﻈﺮﻫﺎ ﻋﻠﻰ ﺟﻮﻻﻥ ﻭ ﺩﺧﻼﺕ ﻟﻜﻮﺯﻳﻨﺔ ... ﻟﻜﻦ ﺟﻮﻻﻥ ﻣﻜﺎﻧﺖ ﻋﻨﺪﻫﺎ ﻻ ﺍﻟﻄﺎﻗﺔ ﻭ ﻻ ﻟﺨﺎﻃﺮ ﻟﻬﺎﺩﺷﻲ ﻛﺎﻣﻞ ... ﻭ ﺑﺪﻭﻥ ﻣﺎﺗﻜﻠﻢ ﻣﺸﺎﺕ ﻫﺰﺍﺕ ﺍﻟﺼﻨﺪﻭﻕ ﻣﻦ ﺍﻷﺭﺽ ﻭ ﺗﻮﺟﻬﺎﺕ ﻟﺒﺎﺏ ... ﺧﺮﺟﺎﺕ ﻏﺎﺩﺓ ﻓﺎﻟﺪﺭﺏ ﻛﺎﻧﺖ ﺩﻳﻚ 8 ﺩﻳﺎﻝ ﺍﻟﻠﻴﻞ ... ﻭﺻﻼﺕ ﻟﻘﻬﻮﺓ ﻭ ﺩﻗﺎﺕ ﻓﺎﻟﺒﺎﺏ ﺍﻟﻲ ﺟﻨﺒﻬﺎ ... ﺧﺮﺟﺎﺕ ﻋﻨﺪﻫﺎ ﻣﺮﺍﺕ ﻣﻮﻝ ﺍﻟﻘﻬﻮﺓ ﻭ ﺳﻠﻤﺎﺗﻬﺎ ﺟﻮﻻﻥ ﺍﻟﺼﻨﺪﻭﻕ ﺍﻟﻲ ﻛﺎﻥ ﻓﻴﻪ ﺷﻲ ﻧﻮﻉ ﻣﻦ ﺍﻟﻔﺎﻛﻬﺔ ...
ﺑﻌﺪﻣﺎ ﺷﻜﺮﺍﺗﻬﺎ ﺍﻟﻤﺮﺍ ﺗﺤﺮﻛﺎﺕ ﻏﺎﺩﺓ ﺟﻨﺐ ﺍﻟﻄﺮﻳﻖ ... ﻣﻜﺎﻧﺘﺶ ﺭﺍﺟﻌﺔ ﻓﺎﺗﺠﺎﻩ ﺩﺍﺭﻫﻢ ﻭ ﺍﻧﻤﺎ ﺧﺎﺭﺟﺔ ﻟﻠﺸﺎﺭﻉ ... ﻗﻄﻌﺎﺕ ﺍﻟﺸﺎﻧﻄﻲ ﻭ ﺗﻤﺸﺎﺕ ﺟﻨﺐ ﺍﻟﺠﺮﺩﺓ ﺍﻟﻲ ﻗﺮﻳﺒﺔ ﻟﻴﻬﻢ ... ﻏﺎﺩﺓ ﺧﺎﺷﻴﺔ ﻳﺪﻳﻬﺎ ﻓﺴﺮﻭﺍﻝ ﺍﻟﺴﻮﺭﭬﻴﺖ ﺍﻟﺮﻣﺎﺩﻱ ﻛﺘﻠﻌﺐ ﺑﺮﺟﻠﻴﻬﺎ ﻻﺑﺴﺔ ﻏﻴﺮ ﺑﺎﻟﻄﻮﻓﺔ ... ﺍﻟﺤﺠﺮﺓ ﺍﻟﻲ ﺑﺎﻧﺖ ﻟﻴﻬﺎ ﻛﺘﻀﺮﺑﻬﺎ ﺑﺮﺟﻠﻬﺎ ...
ﻛﺘﻤﻴﻞ ﺭﺍﺳﻬﺎ ﻣﺮﺓ ﻳﻤﻴﻦ ﻣﺮﺓ ﺷﻤﺎﻝ ... ﻭ ﺫﻳﻞ ﺷﻌﺮﻫﺎ ﻛﻴﺘﺤﺮﻙ ﻓﻮﻕ ﻛﺘﺎﻓﻬﺎ ﺑﺎﻧﺴﻴﺎﺏ ... ﻏﻴﺮ ﻣﺒﺎﻟﻴﺔ ﺑﺎﻟﻤﺎﺭﺓ ﺍﻟﻲ ﻛﻴﺪﻭﺯﻭ ﻣﺮﺓ ﻣﺮﺓ ﻣﻦ ﺟﻨﺒﻬﺎ ... ﺑﻘﺎﺕ ﺳﺎﺭﺣﺔ ﺑﺮﺟﻠﻴﻬﺎ ﻣﺒﻐﺎﺵ ﺗﺮﺟﻊ ﻟﻠﺪﺍﺭ ... ﺑﻌﺪﺍﺕ ﻟﻤﺴﺎﻓﺔ ﺣﺘﻰ ﻣﺎﺑﻘﺎﺗﺶ ﻛﺘﺴﻤﻊ ﺻﻮﺕ ﺍﻟﻀﺠﻴﺞ ﺩﻳﺎﻝ ﺍﻟﺴﻴﺎﺭﺍﺕ ... ﻫﺰﺍﺕ ﺭﺍﺳﻬﺎ ﻛﺘﺸﻮﻑ ﻓﻴﻦ ﻫﻲ ...